1. Uno tanga yaYakova yapwile yakufwana ngachilihi?

 YAKOVA, songo yaYesu, akolelele mutanga yize yapwile yakushishika kuli Yehova. * Visemi jenyi, Yosefwe naMaliya vazangile chikuma Yehova, kaha vamuzachililenga kweseka noho hakumina ngolo javo. Yakova apwile nakutokwa chikwavo nawa, yayenyi ejile nakupwa Meshiya uze vashikile. Chikupu vene Yakova atokwele chikuma kupwa mutanga kana.

2. Kutokwa muka apwile nacho Yakova chakulinangula kuli yayenyi?

² Yakova apwile nakutokwa chachinene chakulinangula kuli yayenyi. (Mateu 13:55) Chakutalilaho, Yesu atachikijile kanawa Visoneka, kahomu apwile namyaka yakusemuka 12, akomwesele vaka-kunangula muYelusalema. (Luka 2:46, 47) Chasoloka nge Yakova azachililenga hamwe naYesu mulimo wakusonga maliva. Nge mukiko chapwile, kaha atachikijile kanawa yayenyi. Ndumbwetu Nathan H. Knorr ahanjikilenga ngwenyi, “Nge muzachila hamwe namutu, kaha mumutachikiza kanawa.” * Pamo Yakova amwene nawa ngwenyi “Yesu apwile nakuya lika nakuzovoloka mumangana, nakukula, nakumwivwila nawa uselewa kuli Kalunga nakuli vatu.” (Luka 2:52) Shikaho, mwomwo yavyuma kanevi, tunahase kushinganyeka ngwetu pamo Yakova apwile umwe watumbaji twaYesu vakulivanga. Oloze omu keshi mukiko chapwileko.

3. Vyuma muka alingile Yakova omu Yesu aputukile kuzata mulimo wenyi hano hamavu?

³ Omu Yesu apwile nakuzata mulimo wenyi hano hamavu, Yakova  kapwile kambaji kenyiko. (Yowa. 7:3-5) Kaha chasoloka nge Yakova apwile hali vaze vausoko jaYesu vashinganyekele ngwavo Yesu “nazaluka.” (Mako 3:21) Kaha nawa kakwatwama unjiho wasolola nge Yakova apwile hamwe nanevo Maliya, omu Yesu vamusukile hachitondo chakuyanjishilako.—Yowa. 19:25-27.

4. Vishina muka natushimutwila?

⁴ Kutwala muze, Yakova afwelelele Yesu, kaha ejile nakupwa mutu uze vavumbikile chikuma muchikungulwilo chavaka-Kulishitu. Muchihande chino, natushimutwila vishina vivali vize natulinangula kuli Yakova: (1) ovyo twatela kutwalaho lika kupwa vakulinyisa, (2) omwo tunahase kupwa vaka-kunangula vamwenemwene.

5. Vyuma muka alingile Yakova omu Yesu asolokele kuli ikiye hanyima yakusanguka?

⁵ Lwola muka Yakova ejile nakupwa muka-kukavangiza Yesu wakushishika? Omu Yesu asangukile, “asolokele kuli Yakova, nakuli vaposetolo vosena.” (Koli. 1, 15:7) Halwola kanelu hakiko Yakova ejile nakupwa kambaji kaYesu. Naikiye apwile hamwe navaposetolo mukapete kahelu muYelusalema omu vapwile nakuvandamina kutambula shipilitu yajila. (Vili. 1:13, 14) Kutwala muze, Yakova apwile nakutokwa chakupwa mulizavu lyakutwaminyina mulikulukaji lyamyaka lyakulivanga. (Vili. 15:6, 13-22; Ngale. 2:9) Kaha shimbu kanda mwaka wa 62 C.E., vamuhwiminyinyine asonekele mukanda vaka-Kulishitu vawavisa. Mukanda kana wapwa waulemu kuli etu tuvosena numba twatwama nalutalililo lwakukayoyela mwilu chipwe hano hamavu. (Yako. 1:1) Josephus, kaYuleya uze alinangula vyakushikulu asonekele ngwenyi, Kapilishitu waKulitulaho wavaYuleya Ananyiya mwana Anase ikiye etavishile vatu vajihe Yakova. Yakova apwile lika wakushishika kuli Yehova palanga nomu akumishile kuyoya chenyi chahano hamavu.

6. Uno Yakova alihandunwine ngachilihi navatwamina vamukwitava vamumakumbi enyi?

⁶ Yakova apwile wakulinyisa. Mwomwo ika tunahanjikila ngocho? Tutalenu chihandwa chapwile hajila yize Yakova akwilililemo kuli Yesu najila yize vatwamina vavavulu vamukwitava vakwilililemo. Omu Yakova amwene unjiho wakusolola chikupu ngwenyi Yesu ikiye MwanaKalunga, alinyishile nakumwitavila. Oloze vapilishitu vavakulwane muYelusalema kavalingile ngochoko. Chakutalilaho, vamwene chikupu ngwavo Yesu nasangula Lazalu. Muchishishisa chakwitavila ngwavo chikupu vene Yesu  vamutumine kuli Yehova, vakiko vasakile kujiha Yesu hamwe kaha naLazalu. (Yowa. 11:53; 12:9-11) Kahomu Yesu vamusangwile, ava vapilishitu vaswekelele vatu mujimbu kana. (Mateu 28:11-15) Chikupu vene ava vatwamina vamukwitava vakanyine Meshiya mwomwo yakulivwimba.

7. Mwomwo ika twatela kulihendela kumuchima wakulivwimba?

⁷ Chishina natulinangulako: Kanda kulivwimbako oloze itavilenu Yehova aminangule. Ngana muze musongo unahase kulingisa muchima wamutu uhone kuzata kanawa, nakulivwimba nawa chinahase kulingisa mutu ahone kukavangiza jindongi jaYehova. VaFwaliseu vapwile vakulivwimba, ngocho vakanyine kwitavila unjiho uze wasolwele hatoma nge Yesu vapwile nakumukafwa kushipilitu yaKalunga, kaha nawa apwile MwanaKalulnga. (Yowa. 12:37-40) Muchima kana wavanehelele ukalu waunene mwomwo wavalingishile vakahone kukapwa nakuyoya chahaya myaka yosena. (Mateu 23:13, 33) Shikaho chapwa chachilemu kwitavila Mazu aKalunga nashipilitu yenyi vitukafwe kwalumuna vilinga vyetu navishinganyeka vyetu navyuma tweji kusakulanga. (Yako. 3:17) Hakuwana nge Yakova apwile wakulinyisa, ngocho etavilile vamunangule kuli Yehova. Kulinyisa chamulingishile apwenga muka-kunangula wamwenemwene nganomu natumona mujipalangalafu jinakavangizaho.

8. Vyuma muka navitukafwa tupwenga vaka-kunangula vamwenemwene?

⁸ Yakova kapwile wakutanga chikumako. Vatwamina vamukwitava vamumwenenga ngana muze vamwenenga kaposetolo Petulu naYowano ngwavo “vakuzeneka kulinangula kaha nawa hivatu vanganavene.” (Vili. 4:13) Oloze Yakova apwile muka-kunangula wamwenemwene, twatachikiza ngocho kweseka namazu tweji kutanganga mumukanda wenyi. Nayetu pamo katwatanga chikumako ngana mwaYakova. Oloze tunahase kupwa vaka-kunangula vamwenemwene hakutukafwa kushipilitu yaYehova nakutunangula kuliuka lyenyi. Tutalenu chakutalilaho atusela Yakova hakupwa muka-kunangula, navishina natulinangulako.

9. Yakova anangwilenga ngachilihi?

⁹ Yakova kazachishilenga mazu amakalu chipwe  kulumbununa vyuma mujila yayikalu kwivwishisako. Echi chakafwile vatu vatachikize vyuma vatela kulinga namwakuvilingila. Chakutalilaho, tutalenu jila yayashi yize Yakova alwezelelemo vaka-Kulishitu ngwenyi vatela kulisuula kuvayanjisa chakuzeneka kulama koko. Asonekele ngwenyi: “Vaze vanakakachila twavamona kupwa vakuwahilila. Enu mwevwa lyehi lukakachila lwaYopa, kaha munamono omu Yehova alingile hakukuminyina ngwenu, Yehova atwama nazangi chikuma, apwa muka-kutetela.” (Yako. 5:11) Tachikizenu ngwenu vyuma anangwilenga Yakova vyapendaminyine haVisoneka. Azachishile Mazu aKalunga hakukafwa vandumbwenyi vatachikize ngwavo lwola lwosena Yehova eji kufwetanga vaze vapwa vakushishika ngana mwaYopa. Yakova azachishile mazu amashi hakuhanjika chishina kana. Echi chalingishile vatu vatohwese Yehova muchishishisa chakutohwesa ikiye.

10. Tunahase kulondezeza ngachilihi Yakova omu natunangulanga?

¹⁰ Chishina natulinangulako: Zachisenunga mazu amashi hakunangula nakupendaminanga haMazu aKalunga. Omu natunangulanga vakwetu, katwatela kulisolola nge etu yetu twatwama nachinyingi chachivuluko oloze twatela kuvakafwa vatachikize ngwavo Yehova ikiye atwama nachinyingi chachivulu, kaha nawa avazakama. (Loma 11:33) Tunahase kulinga ngocho hakuzachisanga Visoneka shimbu yosena omu natunangulanga. Chakutalilaho, muchishishisa chakulweza vilongesa vyetu ngwetu nge ngwapwanga yove kachi ngunalingi munganji oloze twatela kuvalweza vyakutalilaho vyamuMbimbiliya nakuvakafwa vatachikize vishinganyeka vyaYehova. Echi nachivakafwa vakavangize vyuma vali nakulinangula mwomwo yakufwila kwivwisa kuwaha Yehova keshi yetuko.

11. Ukalu muka vapwile nawo vaka-Kulishitu vamwe mumakumbi aYakova, kaha avakafwile ngachilihi? (WaYakova 5:13-15)

¹¹ Yakova ahanjikilenga chakuzeneka kuhita mutenga. Mukanda uze asonekele wasolwele nge atachikijile ukalu vapwile nakumona vandumbwenyi, ngocho avalwezele hatoma vyuma vatelele kulinga. Chakutalilaho, vaka-Kulishitu vamwe kavakavangijilenga washi vyuma vavalwezelengako. (Yako. 1:22) Veka vevwililenga uselewa vaka-luheto kuhambakana vaka-kuhutwa. (Yako. 2:1-3) Kaha veka vapwilenga nahanjikiso yayipi. (Yako. 3:8-10) Vaka-Kulishitu kana vapwile naukalu waunene, oloze Yakova atwalilieho lika kuvakafwa. Avahuhumwinenga mujila yalikoji oloze chakuzeneka kuhita mutenga. Akolezezelenga vaze vapwile nakusaka kuvakafwa valweze vakulwane vavakafwe.—Tangenu WaYakova 5:13-15.

12. Twatela kumona ngachilihi vilongesa vyetu mujila yamwaza omu natuvakafwa?

¹² Chishina natulinangulako: Hanjikenunga chakuzeneka kuhita mutenga, oloze monenunga vakwenu mujila yamwaza. Vatu vavavulu vaze tweji kunangulanga Mbimbiliya chinahase kuvakaluhwila kukavangiza vyuma vali nakulinangula. (Yako. 4:1-4) Chinahase kumbata lwola numba vambile jitato javo jajipi nakupwa navilinga vize vatela kupwa navyo vaka-Kulishitu. Ngana mwaYakova, nayetu twatela kuhamuka kulweza vilongesa vyetu vyuma vatela kuzachilaho. Twatela nawa kuvamona mujila yamwaza, nakufwelela ngwetu Yehova mwakoka vatu vakulinyisa vapandame kuli ikiye, kaha nawa mwavakafwa valumuneko chiyoyelo chavo.—Yako. 4:10.

13. Kweseka namazu ahali WaYakova 3:2 nakwinyikila chamwishi, Yakova atachikijile vyuma muka?

¹³ Yakova kalimwenenga kupwa wamulemu kuhambakana vakwavoko. Kashinganyekele ngwenyi apwile wamulemu kuhambakana vakwavo vaka-Kulishituko mwomwo yakupwa  songo yaYesu chipwe mwomwo yakuzata milimo yayilemuko. Avulukilenga vakwavo vaka-Kulishitu ngwenyi “vandumbwami ngwazanga.” (Yako. 1:16, 19; 2:5) Kalingishile vakwavo vamumone nge wakukupukako. Oloze ahanjikile ngwenyi: “Tuvosena tweji kulimbenjanga.”—Tangenu WaYakova 3:2, nakwinyikila chamwishi.

14. Mwomwo ika twatela kuhanjikila hatoma ngwetu nayetu tweji kulimbenjanga?

¹⁴ Chishina natulinangulako: Tachikizenu ngwenu tuvosena twapwa tuvaka-shili. Katwatela kumona ngwetu etu twapwa tuvavalemu kuhambakana vaze tweji kunangulangako. Mwomwo ika tunambila ngocho? Kachi nge natulingisa vilongesa vyetu vashinganyeke ngwavo etu katwalimbenjako, kaha nachivalingisa vashinganyeke ngwavo kaveshi kuhasa kukavangiza kanawa jindongi jaYehovako. Oloze nge natuvalweza hatoma ngwetu nayetu chatukaluhwilile kukavangiza jindongi jaYehova nakuvalumbwina omwo Yehova natukafwe twalumuneko vyuma vimwe nachivakafwa vamone ngwavo navakiko vanahase kuzachila Yehova.

15. Yakova azachishilenga vyakutalilaho vyakufwana ngachilihi? (WaYakova 3:2-6, 10-12)

¹⁵ Yakova azachishilenga vyakutalilaho vize vyahetelenga vatu kumichima. Twafwelela ngwetu shipilitu yajila yamukafwilenga oloze pamo alinangwile nawa vyavivulu mwakunangwila kanawa vatu hakukekesa vyakutalilaho vize azachishilenga yayenyi Yesu. Vyakutalilaho vize azachishile Yakova mumukanda wenyi vyapwile vyavyashi kaha nawa chachashi kulinangulako vishina.—Tangenu WaYakova 3:2-6, 10-12.

16. Mwomwo ika twatela kuzachishilanga vyakutalilaho vize naviheta vatu kumichima?

¹⁶ Chishina natulinangulako: Zachisenunga vyakutalilaho vize naviheta vatu kumichima. Nge namuzachisanga vyakutalilaho vyamwaza, kaha namukafwa vatu vashinganyeke havyuma muli nakuvanangula. Echi nachivakafwa vanukenga muchano wamuMbimbiliya. Yesu apwile kuluwa mukuzachisa vyakutalilaho vyamwaza, kaha nasongo yenyi Yakova amulondezezelenga. Tutalenu chakutalilaho chimwe azachishile Yakova novyo cheji kuhetelanga vatu kumichima.

17. Mwomwo ika chakutalilaho vasoneka hali WaYakova 1:22-25 cheji kuhetanga vatu kumichima?

¹⁷ Tangenu WaYakova 1:22-25. Chakutalilaho chachitalilo azachishile Yakova cheji kuhetanga vatu kumichima. Mwomwo ika? Mwomwo  hakuzachisa chakutalilaho kana asakile kukafwa vatu vatachikize ngwavo hakusaka vanganyale kuMazu aKalunga vatela kukavangiza vyuma vize navatanga keshi kuvitanga kahako. Yakova asakwile chakutalilaho chachashi kwivwishisa, chamutu uze ali nakulitalila muchitalilo. Uno asakile vatu vevwishise chishina muka? Kacheshi kupwa chakutamo kuli mutu uze mwalitalila muchitalilo nakumona haze hanapihi nakuhona kuwahisahoko. Chochimwe nakuli yetu nawa, kacheshi kupwa chakutamoko kachi nge natutanga Mazu aKalunga nakumona vilinga vize twatela kwalumunako oloze natuhona kuzachilaho.

18. Vyuma muka vitatu twatela kulinga nge tuli nakuzachisa chakutalilaho?

¹⁸ Hakuzachisa chakutalilaho, munahase kulondezeza Yakova hakulinga vyuma vino vitatu: (1) Mwatela kumona ngwenu chakutalilaho namuzachisa nachimikafwa mushindakanye chishina muli nakunangula. (2) Zachisenu chakutalilaho chize navevwishisa kanawa vatu vaze muli nakunangula. (3) Mwatela kumona ngwenu vatu navevwishisa chishina navalinangula kuchakutalilaho kana. Kachi nge cheji kumikaluhwilanga kuwana vyakutalilaho vyamwaza vyakuzachisa, kaha talenu muWatchTower Publications Index. Munahase kuwana vyakutalilaho vyavivulu vize munahase kuzachisa hamutwe wakwamba ngwavo “Illustrations.” Tachikizenu ngwenu, vyakutalilaho vyapwa nge mayikolofwoni, vyeji kulingisanga chishina namuhanjika chivwakane kanawa. Kanda kuzachisanga vyakutalilaho vyavivulu halwola lwolumweko mwomwo vinahase kujimbalisa chishina munakunangula. Tweji kuhotolanga uhashi wetu wakunangula mangana tukafwe vatu vavavulu vapandame kuliuka lyaYehova keshi tulitohwese etu vaveneko.

19. Natusolola ngachilihi ngwetu twazanga vandumbwetu?

¹⁹ Numba tuhu katweshi nakausoko wakukupuka ngana muze chapwile kuli Yakovako, oloze tuli nakutokwa chakuzachila Yehova hamwe navandumbwetu vavavulu. Tweji kusololanga ngwetu twavazanga hakulikata navo, nakulinangula kuli vakiko, nakuzachila hamwe mumulimo wakwambulula nakunangula. Kachi nge natulondezezanga Yakova muvilinga vyetu, namuhanjikiso najila natunangwilangamo, kaha natuneha kavumbi hali Yehova nakukafwa vatu vamichima yamwaza vapandame kuli Setu wamwilu wazangi.