1. Iakobo ena ruma bese be ruma bese ede bamona?

 IAKOBO, Iesu tadina, na lauma dalanai e goadava ruma besena ta lalonai e tubu dae. * Ia tamana Iosef bona sinana Maria ese Iehova na e lalokau henia badava bona e hesiai henia goadagoadava. Iakobo ese e abia hahenamona ta na ina, ia kakana na gabeai gwauhamata Mesiana ai ela. Iakobo na ruma bese unu bamona ai e tubu dae na hahenamo badana!

2. Dahaka dainai Iakobo na kakana ena kara namodia bema lalodia bada diba?

² Iakobo na badi momo daidiai kakana ena kara namodia bema lalodia bada diba. (Mat. 13:55) Heḡereḡere, Iesu na Toretore Helaḡadia na mai dibana namonamo dainai, laḡanina 12 ai diba bada hahediba taudia Ierusalem ai na ena diba dainai e hoa. (Luka 2:46, 47) Iakobo na reana Iesu ida kapenta ḡaukaradia e karava. Bema unu bamona, ia ese kakana na bema dibaia namonamo. Nathan H. Knorr na nega momo e gwauva: “Ta na bo dibaia namonamomu bema ia ida bo ḡaukara heboumu.” * Reana Iakobo ese danu e itaia Iesu na “e bada oho bada oho mai aonegana ida; Dirava bona taunimanima ese e ura heniava.” (Luka 2:52) Una dainai reana baita laloamu Iakobo na Iesu ena hahediba ginigunana ta ai bema lao. To unu na se vara toma.

3. Iesu ese ena hesiai ḡaukara e hamatamaia neganai, Iakobo be dahaka e kara?

³ Iesu na tanobada ai ena hesiai ḡaukara e karaia neganai, Iakobo na iena hahediba tauna ta ai sela. (Ioa. 7:3-5) Iesu na varavarana ese e gwauraia “e kavaia” neganai reana Iakobo  danu idia padadiai. (Mar. 3:21) Bona Iesu hisihisi auna ai e mase neganai, ḡau ta ese se hahedinaraia Iakobo na sinana Maria ida.​—Ioa. 19:25-27.

4. Dahaka baita herevalaimu?

⁴ Gabeai, Iakobo ese Iesu e abidadama henia bona Kristen kongrigeisin ena elda namona ta ai ela. Ina atikol ai, Iakobo amo baita dibamu ḡaudia rua baita herevalaimu: (1) dahaka dainai hanaihanai baita manau, bona (2) edena dalai hahediba taudia namodia ai baitala.

5. Iesu e toreisi lou bona Iakobo enai e hedinarai neganai, Iakobo be dahaka e kara?

⁵ Iakobo be edena negai Iesu ena hahediba tauna ta ai ela? Iesu mase amo e toreisi lou neganai, “Iakobo enai e hedinarai” bena “aposetolo iboudiai ediai danu.” (1 Kor. 15:7) Una murinai Iakobo na Iesu ena hahediba tauna ta ai ela. Aposetolo taudia na Ierusalem ai atai daiutuna ta ai lauma helaḡa bae abia totona e nariva neganai, Iakobo danu idia ida. (Apos. 1:13, 14) Gabeai, Kristen ginigunadia edia negai Iakobo na gavanin bodi ena memba ta ai ela. (Apos. 15:6, 13-22; Gal. 2:9) Laḡani 62 C.E. e lao heniava lalonai, Iakobo na lauma helaḡa ena hahekau dainai revareva ta amo horoa Kristen taudia e tore henidia. Ena be eda helaro na guba ai eiava tanobada ai, to una revareva ese ita danu be durudamu. (Iak. 1:1) Iuda edia histori itorena tauna Josephus na e gwa, Iuda edia Hahelaḡa Tauna Badana Anania ena oda dainai Iakobo na e hamasea. Iakobo na Iehova e abidadama henia ela bona e mase.

6. Iakobo bona ena negai e nohova tomadiho igunalaina taudia edia idau be dahaka?

⁶ Iakobo na e manau. Dahaka dainai unu ta gwau tomamu? Mani Iakobo bona tomadiho igunalaina taudia ese Iesu e laloa dalana ena idau aita laloa. Iakobo na hahemomokani ḡaudia amo e diba Iesu na Dirava Natuna neganai, mai manauna ida e abia dae. To Ierusalem ai hahelaḡa taudia na dia unu bamona. Heḡereḡere, idia na mai dibadia Iesu ese Lasaro na mase amo e hatorea isi lou. To se urava bae abia dae Iesu na Iehova ese e siaia tauna, bona dala e tahuva Iesu bona Lasaro bae hamasedia. (Ioa. 11:53; 12:9-11) Gabeai Iesu e toreisi lou neganai, idia ese una sivarai na taunimanima edia amo e hunia. (Mat. 28:11-15) Unu tomadiho igunalaina taudia na edia hekokoroku dainai Mesia na e dadaraia.

7. Dahaka dainai hekokoroku karana baita dadaraia?

 ⁷ Ta dibamu ḡauna: Basita hekokoroku, to hanaihanai Iehova ena hahediba dalana baita abia dae. Gorere ese kudou ena ḡaukara e kouamu heḡereḡerena, hekokoroku ese baine kouda diba Iehova ena hahekau dalana basita badinaia. Farisea taudia na hekokoroku dainai, asie urava bae abia dae Iesu na Dirava Natuna bona Dirava ena lauma helaḡa na ienai e ḡaukarava. (Ioa. 12:37-40) Una kara ese e koudia vaira neganai mauri hanaihanai na basie abia. (Mat. 23:13, 33) Namona na Dirava ena Hereva bona ena lauma ese eda lalohadai bona kara bae haidau bona bae duruda abi hidi maorodia baita kara na ḡau badana! (Iak. 3:17) Iakobo na e manau dainai, Iehova ena hahediba dalana e abia dae. Bona baita itaiamu, ena manau karana dainai hahediba tauna namona ai ela.

8. Dahaka ese baine duruda diba hahediba taudia namodia ai baitala?

⁸ Iakobo na tanobada taudia edia skuli badana ta sela. Iena negai e nohova tomadiho igunalaina taudia ese ia na aposetolo Petro bona Ioane heḡereḡeredia e laloava​—“hahediba gabuna ta asiela bona asi aonegadia.” (Apos. 4:13) To Baibul bukana Iakobo baita duahiamu neganai, baita dibamu Iakobo na gabeai hahediba tauna namona ai ela. Iakobo heḡereḡerena, reana ita danu tanobada taudia edia skuli badana ta asitala. To, Iehova ena lauma helaḡa ena heduru bona ena orea amo ta abimu hahediba daladia ese e durudamu dainai, ita danu hahediba taudia namodia ai baitala diba. Mani Iakobo ena hahediba daladia bona baita diba ḡaudia aita herevalai.

9. Iakobo ena hahediba dalana be ede bo herevalaia tomamu?

⁹ Iakobo na hereva aukadia se ḡaukaralaiva. Una dainai, ia e kamonai heniava taudia na e dibava dahaka bae kara bona ede bae karaia toma. Heḡereḡere, Iakobo na dala haraḡana ai e hahedinaraia, Kristen taudia na hahemaoro kerere dainai bae hisihisi to basie lalohisihisi na namo. Ia na e gwa: “Ta tomamu haheauka taudia na nanamo, ani? Iobu ena haheauka harina vada o kamonai, bona Lohiabada ena kara vada o itaia,  ena hebogahisi bona ena hariharibada vada e bada herea.” (Iak. 5:11) Ina siri ese e hahedinaraiamu, Iakobo na ena hahediba ai Revareva Helaḡadia e ḡaukaralai. Dirava ena Hereva amo ena kamonai taudia ediai e hahedinaraia, Iehova ese ia e badinaiamu taudia na Iobu heḡereḡerena be hanamodiamu. Iakobo na taunimanima bae lalopararalai diba herevadia amo ena hereva badana anina e hahedinaraia. Unu amo taunimanima na bae diba, una na dia iena hereva to Iehova ena hereva.

10. Ta hahedibamu neganai, edena dala ma ta ai Iakobo baita tohotohoa diba?

¹⁰ Ta dibamu ḡauna: Taunimanima bae lalopararalai herevadia baita ḡaukaralai, bona Dirava ena Hereva amo baita hahediba. Taunimanima ta hadibadiamu neganai, dia namo eda diba baita heaḡilaia, to namona na bae itaia Iehova ena diba na bada bona ia ese idia na e lalodia badamu. (Roma 11:33) Una baita karaia dalana na hanaihanai Baibul amo baita hahediba. Heḡereḡere, eda Baibul stadi na basita hamaorodia hekwakwanai neganai ita be dahaka baita kara, to namona na baita durudia idia ese Baibul ai e herevalai haheitalaidia bae haero, bona Iehova ena lalohadai bona hemami bae diba. Unu amo idia na be uramu Iehova bae hamoalea, dia ita.   

11. Iakobo ena negai Kristen taudia haida be dahaka hekwakwanai e davari, bona ia ese dahaka sisiba e henidia? (Iakobo 5:13-15)

¹¹ Iakobo ese tadikaka taihu edia hekwakwanai na e lalopararalai dainai e durudia. Iena revareva amo ta dibamu, tadikakana edia hekwakwanai na mai dibana, bona heduru daladia namodia e henidia bae hahanaidia totona. Heḡereḡere, Kristen taudia haida ese sisiba na asie badinava. (Iak. 1:22) Haida na taḡa taudia e lalodia badava. (Iak. 2:1-3) Ma haida be edia hereva nahuadia asie tohova. (Iak. 3:8-10) Unu Kristen taudia edia hekwakwanai na bada herea, to Iakobo na dounu e ura baine durudia. Ena be mai ena hebogahisi ida e sisiba to dahaka be maoro e hahedinaraia ḡoevaḡoeva, bona lauma dalanai e manoka taudia na e hagoadadia elda edia amo heduru bae tahu.​—Iakobo 5:13-15 ba duahi.

12. Eda Baibul stadi ta durudiamu neganai, dahaka dainai baita abia dae edia mauri na bae haidau diba?

¹² Ta dibamu ḡauna: Ma haida baita lalopararalaidia, baita durudia, bona baita abia dae edia mauri na bae haidau diba. Ta stadi henidiamu taudia momo na reana be hekwarahimu Baibul ena sisiba bae badinaia. (Iak. 4:1-4) Reana nega daudau lalonai be hekwarahimu e manadalai kara dikadia bae hadoko bona Kristen kara namodia bae hahedinarai. Iakobo heḡereḡerena, mai eda goada ida eda Baibul stadi ese bae hanamo ḡaudia na baita herevalai. Danu, baita abia dae Iehova ese manau taudia na ia dekena be veridia laomu, bona ia ese goada be henidiamu edia mauri be haidaumu.​—Iak. 4:10.

13. Iakobo 3:2 ena hereva heḡereḡerena, Iakobo be dahaka e hahedinaraia?

¹³ Iakobo na mai dibana ia na dia ḡoevadae. Iakobo na se lalo ena ruma bese eiava ena hesiai ḡaukara hahenamodia dainai tadikakana na e hereadia. Iakobo ese Kristen taudia e hereva henidia neganai, e gwa, “varavaragu e, egu lalokau.” (Iak. 1:16, 19; 2:5) Ena kara amo se hahedinaraia ia na ḡoevadae. Una dainai, ena revareva ai e gwa: “Ita iboudai ta hekwakwanai louloumu.”​—Iakobo 3:2 ba duahia.

14. Dahaka dainai eda kerere baita gwaurai hedinarai?

¹⁴ Ta dibamu ḡauna: Baita helalaotao ita iboudiai na kara dika tauda. Basita laloa ita ese ta hadibadiamu taudia na ta hereadia.  Dahaka dainai? Bema eda kara amo ta uramu baita hahedinaraia ita na asi eda kerere, eda stadi na be laloamu ia na dia heḡereḡere Dirava ena taravatu baine badinadia. To bema mai eda momokani ida baita hahedinaraia, nega haida edai danu e auka Baibul ena hahekau herevadia baita badinadia bona Iehova ese e duruda eda hekwakwanai ta hanaidia, eda stiuden na baita duruamu be lalopararamu ia ese danu Iehova baine hesiai henia diba.

15. Iakobo be haheitalai ede bamodia e ḡaukaralaiva? (Iakobo 3:2-6, 10-12)

¹⁵ Iakobo na taunimanima bae durudia haheitalaidia e ḡaukaralaiva. Mai dibada lauma helaḡa ese Iakobo na e durua, to danu ena hahediba dalana baine hanamoa totona, kakana Iesu ese e ḡaukaralai haheitalaidia e stadilai namonamo. Iakobo ese ena revareva ai e ḡaukaralai haheitalaidia na dia a’auka, anidia ilalopararalaidia na haraḡa bona baita badina diba.​—Iakobo 3:2-6, 10-12 ba duahi.

16. Dahaka dainai haheitalai maorodia baita ḡaukaralai na namo?

¹⁶ Ta dibamu ḡauna: Taunimanima bae durudia haheitalaidia baita ḡaukaralai. Bema haheitalai maorodia baita ḡaukaralaimu, be kamonaimu tauna na be lalopararamu. Kamonai tauna lalonai laulau ta, ta peniamu na heto. Una laulau ese ia baine durua diba Baibul ena hereva momokani ta baine laloatao. Haheitalai namodia iḡaukaralaidia ai Iesu ena diba na bada herea, bona tadina Iakobo ese ia na e tohotohoa. Mani Iakobo ese e ḡaukaralaia haheitalaina ta aita herevalaia bona baita itaiamu dahaka dainai ilalopararalaina na haraḡa.

17. Dahaka dainai Iakobo 1:22-25 ai ḡaukaralaia haheitalaina na haheitalai namona?

¹⁷ Iakobo 1:22-25 ba duahi. Iakobo ese e ḡaukaralaia hevarivari haheitalaina na dala idauidau ai baita badinaia diba. To e ura baine hahedibalaia ḡauna na, Dirava ena Hereva ese baine duruda totona, namona na dia baita duahia mo, to ta duahimu ḡaudia na baita badina. Iakobo na ena kamonai taudia mai dibadia haheitalaina e ḡaukaralaia​—ta sibona hevarivari ai e heitamu karana. Anina be dahaka? Bema ta na hevarivari ai baine hamaoromaoroa ḡauna baine itaia, to basine hamaoromaoroa, ia na kavakava. Una heḡereḡerena, bema Dirava ena Hereva ta duahiamu murinai, ta  dibamu eda kara ta baita haidaua na namo, to basita haidaua, ita na kavakava.

18. Haheitalai ta ḡaukaralaimu neganai, ededia dala toi baita badina?

¹⁸ Haheitalai ta ḡaukaralaimu neganai, Iakobo baita tohotohoa diba bema ini dala toi baita badina: (1) Namona na baita ḡaukaralaia haheitalaina ese ta herevalaiamu ḡauna anina baine hahedinaraia. (2) Kamonai taudia ese bae lalopararalaia haheitalaina baita ḡaukaralaia. (3) Una haheitalai amo baine diba ḡauna ibadinana dalana baita hahedinaraia namonamo. Bema o daradaramu edena haheitalai ba ḡaukaralaia, Watch Tower Publications Index ba itaia. Sinado ladana “Illustrations” henunai, haheitalai namodia momo bo davarimu. To ba helalotao, haheitalai na maikrofon heḡereḡerena​—o hahedibalaiamu ḡauna anina be hahedinaraia namonamomu. Una dainai namona na o uramu ba hahedibalai ḡauna ai mo haheitalai ba ḡaukaralai. Eda hahediba dalana ta uramu baita hanamoa badina badana na, dia eda diba baita heaḡilaia, to momo baita durudia Iehova ena ruma bese lalonai bae vareai.

19. Edena dalai baita hahedinaraia tadikaka taihu, eda Kristen ruma bese lalonai, na ta lalodia badamu?

¹⁹ Ena be ita kakada na dia ḡoevadae Iakobo kakana Iesu heḡereḡerena, to ta moalemu badina ita na Kristen ruma bese badana ta bamona Iehova ta hesiai heniamu. Idia baita bamodia, edia haheitalai amo diba baita abi, bona haroro bona hahediba ḡaukarana ai baita ḡaukara hebou karana amo ta hahedinaraiamu idia na ta lalokau henidiamu. Bema Iakobo ena haheitalai na eda hereva, kara, bona hahediba ai baita tohotohoamu, Iehova ladana baita imodaiamu bona kudou-maoro taudia baita durudiamu Tamada guba ai e nohomu be hetura heniamu.