1. Ki nou kapav dir konsernan Zak so fami?

 ZAK, frer Zezi, ti grandi dan enn fami bien spiritiel. * So bann paran, Zozef ek Mari, ti bien kontan Zeova ek zot ti fer zot maximum pou servi Li. Me Zak ti gagn enn lot benediksion ankor. So gran frer, Zezi, ti Lemesi. Zak ti gagn enn gran privilez pou form parti dan sa fami-la!

2. Kifer Zak ti ena respe pou so gran frer?

² Zak ti ena plizir rezon pou ena respe pou so gran frer. (Mat. 13:55) Par exanp, Zezi ti konn bien bann Lekritir. Kan li ti ena 12 an, Zezi ti inpresionn bann ansegnan dan Zerizalem. (Lik 2:46, 47) Kitfwa Zak ti travay kouma sarpantie ansam avek Zezi. Alor, sirman sa ti ed li pou konn so frer pli bien. Nathan Knorr souvan ti dir: “Kan to travay ansam avek enn kikenn, to aprann boukou kitsoz lor li.” * Zak kitfwa ti remarke osi kouma “Zezi ti grandi dan sazes, ti grandi fizikman, e li ti trouv lagras devan Bondie  e devan dimoun.” (Lik 2:52) Me kanmem sa, Zak pa ti parmi bann premie pou vinn enn disip Zezi.

3. Kouma Zak ti reazir kan Zezi ti koumans so minister?

³ Pandan minister Zezi, Zak pa ti vinn enn disip. (Zan 7:3-5) An realite, kitfwa Zak ti enn parmi bann fami Zezi ki ti dir ki Zezi ti “perdi latet.” (Mark 3:21) Anplis, Labib pa dir ki Zak ti ansam avek so mama, Mari, kan Zezi ti pe soufer lor poto.​—Zan 19:25-27.

4. Ki nou pou examine dan sa lartik-la?

⁴ Me apre, Zak ti aksepte Zezi kouma Lemesi, ek li ti vinn enn ansien bien respekte dan lasanble Kretien. Dan sa lartik-la, nou pou get de leson ki nou kapav aprann ar Zak: (1) Kifer nou bizin ena limilite, ek (2) kouma nou kapav vinn bann bon ansegnan.

5. Kouma Zak ti reazir kan Zezi ti aparet avek li?

⁵ Kan eski Zak ti vinn enn disip Zezi? Apre so rezireksion, Zezi “finn paret devan Zak, answit devan tou bann apot.” (1 Kor. 15:7) Apre sa, Zak ti vinn enn disip Zezi. Kan tou bann zapot ti reini ansam dan enn lakaz dan Zerizalem ek ki zot ti pe atann lespri sin, Zak ti parmi zot. (Zist. 1:13, 14) Plitar, Zak ti gagn privilez pou vinn enn manb Komite Santral. (Zist. 15:6, 13-22; Gal. 2:9) Ek inpe avan 62 Nou Lepok, Zeova ti servi Zak pou ekrir enn let pou bann Kretien ki ena lesperans pou al dan lesiel. Mem si nou ena lesperans pou viv dan lesiel ouswa lor later, sa let-la ankor bien itil azordi. (Zak 1:1) Dapre istorien Joseph, Gran Pret Ann (Anan) ti fer touy Zak. Me Zak ti res fidel ar Zeova ziska so lamor.

6. Kifer Zak ti bien diferan ar bann sef relizie so lepok?

⁶ Zak ti ena limilite. Kifer nou dir sa? Parski Zak ti bien diferan ar bann sef relizie so lepok. Kan Zak ti gagn bann prev ki Zezi ti Garson Bondie, avek limilite li ti aksepte zot. Parkont, bann sef relizie dan Zerizalem pa ti aksepte sa bann prev-la. Par exanp, zot ti kone ki Zezi ti resisit Lazar. Me olie ki zot aksepte Zezi kouma reprezantan Zeova, zot ti esey touy Zezi ek Lazar toulede. (Zan 11:53; 12:9-11) Apre sa, kan Zezi ti resisite, zot ti esey kasiet sa lepep. (Mat. 28:11-15)  Akoz zot lorgey, sa bann sef relizie la ti rezet Lemesi.

7. Kifer nou bizin rezet lorgey?

⁷ Ki leson nou aprann? Nou bizin rezet lorgey ek nou bizin les Zeova ansegn nou. Parey kouma enn maladi ki kapav afekte nou leker, lorgey kapav anpes nou swiv direksion Zeova. Bann Farizien ti telman orgeye ki zot pa ti aksepte bann prev ki Zezi ti ena lespri sin Bondie ek ki li ti Garson Bondie. (Zan 12:37-40) Zot lorgey ti anpes zot gagn lavi eternel. (Mat. 23:13, 33) Li bien inportan ki nou kontign les Labib ek lespri sin Bondie sanz nou personalite ek inflians nou fason panse ek nou bann desizion! (Zak 3:17) Zak ti ena limilite ek li ti les Zeova ansegn li. Se gras-a so limilite osi ki li ti vinn enn bon ansegnan.

8. Ki kitsoz kapav ed nou pou vinn bann bon ansegnan?

⁸ Zak pa ti ena enn gran ledikasion. Kitfwa bann sef relizie ti konsider Zak dan mem fason ki zot ti konsider Pier ek Zan, setadir kouma “bann dimounn sinp e san ledikasion.” (Zist. 4:13) Me Zak ti fer zefor pou vinn enn bon ansegnan. Nou trouv sa kan nou lir liv Labib ki li’nn ekrir. Parey kouma Zak, kitfwa nou pena enn gran ledikasion. Me kanmem sa, gras-a lespri sin Zeova ek formasion ki nou gagne avek so lorganizasion, nou osi nou kapav vinn bann bon ansegnan. Anou gete kifer Zak ti enn bon ansegnan, ek anou gete ki leson nou kapav aprann ar li

9. Ki nou kapav dir lor fason ki Zak ti ansegne?

⁹ Zak pa ti servi bann mo difisil ek bann rezonnman konplike. Gras-a sa, bann dimounn ki ti ekout li ti kone seki zot ti bizin fer ek kouma zot ti bizin fer sa. Par exanp, anou gete kouma Zak, dan enn fason bien sinp, ti ansegn bann Kretien ki zot bizin aksepte bann linzistis san ki zot vinn amer. Li ti ekrir: “Nou deklar bannla bienere parski zot finn ena landirans. Zot finn tann landirans Zob e zot finn trouve seki Bondie finn fer, kouma  li finn montre konpasion ek mizerikord pou li.” (Zak 5:11) Remarke ki Zak ti servi bann Lekritir pou ansegn so bann frer ek ser. Li ti servi Parol Bondie pou fer bann-la konpran ki Zeova touletan rekonpans bann ki fidel anver Li, parey kouma Zob. Zak ti servi bann mo sinp ek enn rezonnman lozik pou ansegn zot sa leson-la. Kan li ti fer sa, li ti atir latansion lor Zeova, pa lor limem.

10. Sit enn fason kouma nou kapav imit lexanp Zak kan nou ansegn bann dimounn.

¹⁰ Ki leson nou aprann? Koz dan enn fason sinp ek servi Parol Bondie. Kan nou ansegn bann dimounn, fode pa nou esey montre zot ki kantite nou nou kone. Nou bizin montre zot ki kantite Zeova kone ek ki kantite osi Li kontan zot. (Rom. 11:33) Pou nou reisi fer sa, nou bizin touletan servi Labib kan nou ansegne. Par exanp, olie ki nou dir nou bann etidian Labib seki nou nou ti pou fer dan zot plas, nou bizin ed zot pou reflesi lor bann lexanp Biblik ek ed zot pou konpran santiman ek fason panse Zeova. Lerla, zot pou aplik seki zot pe aprann, pa parski zot anvi fer nou plezir, me parski zot anvi fer Zeova plezir.

11. Dan lepok Zak, ki difikilte sertin Kretien ti gagne, ek ki konsey Zak ti donn zot? (Zak 5:13-15)

¹¹ Zak ti realist. Dan so let, nou trouve ki Zak ti konn bann difikilte ki so bann konpagnon ti pe gagne, ek li ti donn zot bann instriksion bien kler pou zot sirmont zot bann difikilte. Par exanp, sertin Kretien ti tarde pou aplik bann konsey ki zot ti gagne. (Zak 1:22) Ena lezot ki ti tret bann ris pli bien ki bann pov. (Zak 2:1-3) Ek ena lezot osi ki ti koze san reflesi. (Zak 3:8-10) Mem si sa bann Kretien-la ti ena sa bann problem-la, Zak pa ti abandonn zot. Avek bonte, li ti donn zot bann konsey bien fran, ek li ti ankouraz zot pou rod led bann ansien.​—Lir Zak 5:13-15, NW. *

12. Kouma nou kapav res pozitif kan nou ed nou bann etidian Labib?

¹² Ki leson nou aprann? Nou bizin realist ek res pozitif. Nou etidian kitfwa gagn bann difikilte pou aplik bann konsey ki ena dan Labib. (Zak 4:1-4) Kitfwa sa pou pran inpe letan avan ki li aret so bann move labitid ek ki li kiltiv bann kalite Kretien. Me parey kouma Zak, nou bizin ena kouraz pou dir nou etidian dan ki domenn li bizin fer bann progre. Nou bizin osi res pozitif ek ena konfians ki se Zeova ki atir bann dimounn ki ena limilite ver Li. Zeova pou donn zot lafors pou zot fer bann sanzman ki bizin.​—Zak 4:10.

13. Dan Zak 3:2, ki kitsoz Zak ti rekonet?

¹³ Zak pa ti pans plis ki bizin lor limem. Zak pa ti panse ki li ti pli inportan ki bann lezot Kretien parski li ti frer Zezi ouswa parski li ti ena bann responsabilite bien inportan. Okontrer, kan li ti koz lor so bann konpagnon Kretien, li ti apel zot so “bann frer ek ser bieneme.” (Zak 1:16, 19; 2:5) Zak pa ti donn lezot linpresion ki li ti parfe. Li ti aksepte ki li ti fer bann erer li osi. Akoz sa, li ti dir: “Nou tou fer fot.”​—Lir Zak 3:2.

14. Kifer nou bizin rekonet nou bann erer?

¹⁴ Ki leson nou aprann? Pa bliye ki nou  tou nou fer pese. Fode pa nou panse ki nou pli bon ki nou bann etidian Labib. Si nou donn zot linpresion ki nou pa fer erer, sa kapav dekouraz zot ek fer zot panse ki zame zot pa pou kapav obeir Bondie. Parkont, si nou rekonet ki, pou nou osi li pa ti touletan fasil pou swiv bann prinsip Labib, ek si nou explik zot kouma Zeova inn ed nou pou sirmont nou bann difikilte, sa pou ed nou bann etidian pou trouve ki zot osi zot kapav servi Zeova.

15. Ki nou kapav dir lor bann lexanp ki Zak ti servi? (Zak 3:2-6, 10-12)

¹⁵ Zak ti servi bann lexanp ki tous leker. Li vre ki lespri sin ti ed Zak kan li ti servi bann lexanp. Me Zak ti osi aprann kouma pou servi bann lexanp dan enn fason efikas, kan li ti reflesi lor fason ki Zezi ti servi bann lexanp. Bann lexanp ki Zak servi dan so let, zot bien sinp ek zot bann leson bien kler.​—Lir Zak 3:2-6, 10-12.

16. Kifer nou bizin servi bann lexanp ki efikas?

¹⁶ Ki leson nou aprann? Servi bann lexanp ki efikas. Kan to servi bann lexanp ki efikas, to ed bann dimounn pou trouv bann zimaz devan zot. Sa bann zimaz-la kapav ed zot pou rapel bann verite Biblik bien inportan. Zezi ti konn servi bann lexanp ki efikas, ek so frer Zak ti swiv so lexanp. Anou get enn lexanp ki Zak ti servi, ek anou gete kifer li efikas.

17. Kifer lexanp ki ena dan Zak 1:22-25 li bien efikas?

¹⁷ Lir Zak 1:22-25. Dan sa bann verse-la, Zak servi lexanp enn laglas, ek sa lexanp-la li efikas pou plizir rezon. Zak ti pe ansegn enn leson bien presi: Si nou anvi gagn bann bienfe gras-a Parol Bondie, nou bizin pa zis lir li, me nou bizin osi met an pratik seki nou lir. Zak ti servi enn lexanp ki tou dimounn ti kapav konpran fasilman, lexanp enn zom ki ti pe get limem dan laglas. Ki leson nou aprann ar sa lexanp-la? Li pou bien bet si enn kikenn get li dan laglas ek ki li trouv enn defo ki li kapav korize, me ki li pa fer nanye pou koriz sa. Dan mem fason, nou pou bien bet si nou lir Parol Bondie ek ki nou trouv bann sanzman ki nou bizin fer  dan nou personalite, me ki nou pa fer okenn sanzman.

18. Sit trwa kitsoz ki nou bizin fer kan nou servi enn lexanp.

¹⁸ Kan to servi enn lexanp, to kapav imit Zak kan to fer sa trwa kitsoz-la: (1) Fer sir ki to lexanp ena enn lien ar leson ki to pe ansegne. (2) Servi enn lexanp ki bann dimounn pou konpran fasilman. (3) Leson ki to pou tire ar to lexanp bizin kler. Si to gagn difikilte pou trouv bann zoli lexanp, al dan Index des publications des Témoins de Jéhovah. Anba soutit « Exemples », to pou trouv plizir lexanp ki to kapav servi. Selman, pa bliye ki bann lexanp zot kouma bann mikro, setadir zot kapav fer bann dimounn konpran pli bien bann leson ki to pe ansegne. Alor, servi bann lexanp zis pou bann lide inportan ki to anvi ansegne. Biensir, rezon prinsipal pou kifer nou anvi amelior nou kapasite pou ansegne, se pou ed bann dimounn pou vinn ver Zeova, pa pou atir latansion lor noumem.

19. Kouma nou kapav montre ki nou kontan nou bann frer ek ser?

¹⁹ Nou pena enn gran frer ki parfe, parey kouma Zak. Selman, nou ena privilez pou servi Zeova ansam avek nou bann frer ek ser. Nou montre ki nou kontan zot kan nou frekant zot, kan nou aprann avek zot, ek kan nou prese ek ansegn bann dimounn ansam avek zot. Kan nou fer zefor pou swiv lexanp Zak dan nou latitid, nou kondwit, ek dan fason ki nou prese, nou donn laglwar nou Papa ki dan lesiel ek nou ed bann dimounn ki sinser pou vinn pros avek Li.