1. Murala wa Tiyago waali aavi?

 TIYAGO ddibile Yesu, aleliwe vamuralani woliba omuzimuni. * Juze ni Mariya, makolo aye, yomudhivela vanlubale Yehova ni yowilibihera wihina emulabele. Teto Tiyago ahikanna ofuru mmodhene— ddibile apogoya ere okala Mesiya. Tiyago ahikanna oneti munlubale mwaha wobaliwa vamuralani yola.

2. Dhithu baani dhamuthukulela Tiyago omutikina ddibile?

² Tiyago ahikanna mwaha dhowinjhiva dhamuthukulela omutikina ddibile. (Mat. 13:55) Motajhiha, Yesu aganna yaka 12, oliye ahinona pamadhene dholebela. Mwaha wayeyo anamasuziha oJeruzale yootikina enonelo anna Yesu. (Lucas 2:46, 47) Podi wera Tiyago ahilaba vamodha ni Yesu mabasa ookarpintero. Akala eyo ebaribari, oliye ahimunona pamadhene Yesu. Nathan H. Knorr owogesa: “Onomunona pama muthu walabaga vamodha nuliye.” * Mwebaribarene, Tiyago ahoonelamo wi ‘Yesu owunnuwelavo ni thotho vamodha ni epaddiya yomwiilini, arumedhiwaga vamentoni va Mulugu ni vaathu.’ (Lucas 2:52) Mwa dhatedhene dhendha, yaakale yokweya wubuwela wi Tiyago aakale namahara oobajha a Yesu. Mbwenye kahi yeyo yapadduwe.

3. Yesu nuwambela olaleya, Tiyago ubuwela ddi?

³ Muwari mwa yaka dhatedhene Yesu alaleyaga mwilaboni yavati, Tiyago kaarumedhe okala namahara aye. (João 7:3-5)  Mwebaribarene, podi wera di Tiyago ubuwela wihina Yesu ‘ohusavuwa.’ (Marcos 3:21) Podi wera, Yesu akomeliwaga vantxikwani na goyi, Tiyago kahanre amaye Mariya. — João 19:25-27.

4. Musulo ola nnahudhere ddi?

⁴ Tiyago obajha omuroromela Yesu, vano okala namaholela mulogo anna mutholo dhowinjhiva. Ohudhera wula, nnere woona dhithu bili nnahudherihu ni Tiyago: (1) mwahaya bwaddi nigadidela okala owiyeviha? (2) Nnawomihedhe addi makalelo ehu owahudhiha athu amodha?

5. Ethu baani erilena Tiyago, Yesu nuugumana nuliye?

⁵ Tiyago abanjhe alini okala namahara a Yesu? Yesu nuvenyihiwa mukwani, oliye ‘ogumana ni Tiyago, nuwindo ogumana ni arumiwi aatene.’ (1 Cor. 15:7) Eyo nupadduwa, Tiyago okala namahara a Yesu. Oliye aari vamodha ni arumiwi oJeruzale, yaakelaga muzimu wotxena. (Atos 1:13, 14) Nuuvira mudhidhi, Tiyago osakuliwa ninga ddibila a Nikuru Nolamulela. (Atos 15:6, 13-22; Gál. 2:9) Ehinafiye yaka ya 62, oliye ahivetheliwa ni Mulugu wihina alebe karta na makiristawu oothikitheliwa. Ofiyera peeno, iyo podi ohudhera ni karta nna, naarive nikanne ejhehedhelo yodhowa odhulu obe yokala elabo yela yavati. (Tia. 1:1) Mowiwanana ni mulobwana anasuziha thalako anithaniwa Josephus, Ananiya amuzombweya daarumile wihina Tiyago apiwe. Tiyago okalave oororomeleya vamentoni va Yehova ofiyera okwa.

6. Ohiyana baani orivo Tiyago ni anamaholela gereja a mudhidhi yole?

⁶ Tiyago aari owiyeviha. Mwahaya bwaddi nigawoga ndo? Kasugwa ohiyana baani orivo Tiyago ni anamaholela gereja amudhidhi yole. Tiyago nuwoona dhintelelo ahoweliye wihina Yesu di mwaana Mulugu, mowiyeviha oliye orumedha. Mbwenye anamaholela yadhile oJeruzale, newene kiyapwathile. Motajhiha, aliwa kiyanna makalelo okoodda wi Yesu ahinvenyiha Lazaru mukwani. Mbwenye ohiya orumedha wi Yesu arumiwe ni Yehova, aliwa wajaga makalelo ompa Yesu ni Lazaruya. (João 11:53; 12:9-11) Nuuvira mwaana mudhidhi, Yesu nuvenyihiwa mukwani, aliwa oxixaga makalelo oobibiddela muthenga ola. (Mat. 28:11-15) Withukula wa anamaholela ala gereja, wahithabwa wunnuwa. Teto mwaha wayeyo, aliwa omukodda Mesiya.

7. Mwahaya bwaddi sapama orabela ekalelo yowithukula?

 ⁷ Nnahudheravo ddi: Kaniithukulege, teto nihiye wihina Yehova anihudhihe. Nahikala pasope, withukula podi wummiha murima wehu. Kasugwa yapadduwe naFarizewu, murima wewa wahumma mwaha wowithukula. Mwaha wayeyo, aliwa kiyarumedhe dhithu dhatonyihedha wihina Yesu aari mwaana a Mulugu. Withukula ethu yowoopiha, teto podi ofiyera onlapeliha ni Mulugu. (João 12:37-40) Mwaha wayeyo, aFarizewu oyelela ofuru wokanna egumi yohimala. (Mat. 23:13, 33) Bumwahaya, sapama omwihiya Bibliya ni muzimu wotxena wa Yehova wuuba emuthu yehu, makalelo ehu owubuwela ni onikaviherege othoma dhithu dhapama! (Tia. 3:17) Wiyeviha wa Tiyago wahimuthukulela oliye orumedha wuubiwa ni Yehova. Ninga nnafunihu woona, waali wiyeviha wula wamweriha okala namasuziha apama.

8. Ethu baani enaanikavihere okala anamasuziha apama?

⁸ Tiyago kanna ohudhera wavadhulu. Anamaholela gereja a mudhidhi yole, yamoona Tiyago ninga arumiwi amodha, Peduru ni Juwawu — aliwa yooniwa ninga athu ‘yahathabwile ohudhera.’ (Atos 4:13) Mbwenye naari dhigarive ndo, Tiyago aari namasuziha apama. Eyo enowoneya nilerigi livuru namBibliyani oliye alembiye. Podi wera ninga Tiyago, iyo kaninna ohudhera wavadhulu, mbwenye nnikavihero na Yehova vamodha ni dhoxagiha dhatedhene nnakelihu munikuruni mwaaye, iyo podi ohudhera okala anamasuziha apama. Mowindo, nnafuna noone ethu baani yamweriha Tiyago okala namasuziha apama, teto nimakalelo baani nnafunihu omutajhiha.

9. Tiyago ahudhiha nimakalelo baani?

⁹ Tiyago kaalabihedha madhu oorusa, newene kawoga mwamakalelo oorusa wonelamo. Mwaha wayeyo, Tiyago ahudhihaga, athu yonona ethu yowera ni nimakalelo baani enafuniwa werana. Motajhiha, mwamakalelo ookweya, Tiyago ohahudhiha makiristawu wihina aliwa podi ofwanyiwaga obure. Naari dhigarive ndo, aliwa ehisadduwe okala athu abure. Oliye ohuleba egi: ‘Kasugwani!  nnowona wi ale yavilele ehihagalala. Yahiiwa ovilela wa Jo teto yahoona mareeliho Yehova anvahiliye; woona wi Yehova ohukanna nthebwa vanlubale ni dathagaraga.’ (Tia. 5:11) Tiyago oohudhiha alabihedhaga dholebela. Vala, oliye olabihedha Madhu a Mulugu, wihina aakavihere athu wonelamo wi Yehova anowapaganya athu oororomeleya, ninga Jo. Tiyago owalabihedha madhu ookweya wonelamo teto ootapulela mwamakalelo ookweya. Mowindo, oliye kaahudhiha wihina iithithimihe, mbwenye onvaha nthithimiho natene Yehova.

10. Nnaamutajhihe nimakelelo baani Tiyago naasuzihaga athu amodha wodhela Yehova?

¹⁰ Nnahudheravo ddi: Ohudhihege mokweya ni omulabihedhege Bibliya. Namuhudhihaga muthu Bibliya, yoluba yehu kikale watonyihedha enonelo yehu, mbwenye nahudhihege enonelo ya Yehova, ni makalelo Yehova anaadhiveliye. (Rom. 11:33) Eyo nnere wanda, wodhela omulabihedha Bibliya malabo amatene namuhudhihaga muthu. Motajhiha, ohiya omwaddela namahudhera ehu a Bibliya ethu nafunihu werana ahakale iyo vamburoni vaye, sapama omutonyihedha dhotajhiha dha mBibliyani wihina oliye oonelemo monelo wa Yehova wodhela muselu yoyo. Ni makalelo yala, aliwa enere osuza wihina ethu yathimaya fumuhagalasa Yehova ohiya wihagalasa nannya.

11. Dhithu baani makiristawu amodha yahandiwa werana, ki yolaga baani Tiyago aavahiliye? (Tiago 5:13-15)

¹¹ Tiyago owoga ebaribari. Nilerigi karta na Tiyago, nnowonelamo wihina oliye ahinona dhithu baani dhaarusa addibila ni arogola. Bumwahaya, adhe aavahege dholaga wodhela dhithu yahoweliwa werana. Motajhiha, makiristawu amodha yolegela vang’no wapitha amodha oparihedha mabasa dholaga dha mBibliyani. (Tia. 1:22) Mbwenye amodha yathabwa waariha aliba oreela. (Tia. 2:1-3) Teto amodha kiyanna makalelo apama olabihedha nlumi neewa. (Tia. 3:8-10) Ala yaari makathamiho manlubale, mbwenye Tiyago ahinona wihina addibila ale yere osadduwa. Tiyago walaga addibila ala mwamakalelo apama, mbwenye ahaakuwile ethuya yahoweliwa werana. Ohiya yeyove, oliye wakongomedha addibila ala oveda nikavihero nanamaholela mulogo wihina yande osaddula egumi yewa. — Omwileri Tiago 5:13-15.    

12. Nroromelege ethu baani?

¹² Nnahudheravo ddi: Owogege ebaribari teto kuyelele ejhehero. Nnohowela niwogege ebaribari teto nrumedhege wi anamahudhera ehu owinjhiva, ehikanna makathamiho ooparihedha dholaga dha mBibliyani. (Tia. 4:1-4) Podi ovira mudhidhene wihina amodha yande osukuma dhilemelelo dhabure, teto ebajhe okanna dhikalelo dha mukiristawu. Ndo ninga Tiyago, kanakuwege anamahudhera ehu ethu baani enahoweliwa osaddula. Teto naawogegena nimakalelo apama, nroromelaga wihina Yehova anere wawithana athu owiyeviha mmulogoni mwaaye, teto aavahe kopolo enahoweliwa wihina esaddule egumi yewa. — Tia. 4:10.

13. Mowiwanana ni Tiago 3:2 ni notana, ethu baani Tiyago arumedhiye?

¹³ Tiyago kiwona ninga athimaya wapitha makiristawu amodha. Oliye kiwona ninga athimaya mwaha okala ddibile Yesu, obe mwaha okanna mutholo dhowinjhiva. Tiyago owawithana makiristawu aanoneliye ‘addibilaga a vati va murima.’ (Tia. 1:16, 19; 2:5) Oliye keerana dhithu wihina athu emoonege ninga muthu oologomana. Ohiya eyo, oliye ahiivolosihamo awogaga madhu ala: ‘Iyo  aatene nnokwakwathuwa dila dhowinjhivadhene.’ — Omwileri Tiago 3:2, ni nota.

14. Mwahaya bwaddi sapama wawaddela anamahudhera ehu wi nihiyoya nnoviriganiha?

¹⁴ Nnahudheravo ddi: Kuddiwale wi iyo atene nihithega. Kaniwoonege ninga athimaya wapitha anamahudherihu. Mwahaya bwaddi? Mwaha naatonyihedha anamahudhera ehu wi kannaviriganihege, aliwa podi wubuwelaga wi kidha yanda werana ele Mulugu anafuniye. Iyo podi wakavihera anamahudhera ehu omulabela Yehova, wodhela orumedha wi kahi yokweya oparihedha mabasa malagano amBibliyani, ni wawaddela makalelo Yehova anikaviheriye osaddula egumihu.

15. Dholaddaniha dha Tiyago dhari avi? (Tiago 3:2-6, 10-12)

¹⁵ Tiyago ohulabihedha dholaddaniha wihina adahinye murima dhaathu. Mohanganyera, Tiyago ahikanna nikavihero na muzimu wotxena. Mbwenye podi wera oliye ahihudhera vanlubale ni dholaddaniha dha ddibile apogoya, Yesu. Mukartani mwaaye, Tiyago olabihera dholaddaniha dhokweya wonelamo. — Omwileri Tiago 3:2-6, 10-12.

16. Enapadduwa ddi nalabihedha yoladdaniha yapama?

¹⁶ Nnahudheravo ddi: olabiherege dholaddaniha dhinadahinya murima. Yoladdaniha yapama podi onfugula muthu mento. Ethu onafuniwe omusuziha, muthuya anere wonelamo pamadhene, ni kanadha addiwala. Kavo muthu anda olabihedha dholaddaniha ninga Yesu, teto Tiyago weragana emodhave. Kabeni noone yoladdaniha ya Tiyago, ni noone makalelo baani yoladdaniha ela eriwa yapama.

17. Mwahaya bwaddi nigawogaga wi nladdaniho nnafwanyeya va Tiago 1:22-25 nnotxova pamadhene?

¹⁷ Omwileri Tiago 1:22-25. Nladdaniho nna awonge Tiyago, wodhela espelyu enowoneleyamo mwamakalelo oohiyana-iyana. Yobajha, Tiyago ahinona pamadhene ethu baani afuniye ohudhiha. Va yoladdaniha ela, oliye afuna ahudhihe wi, yegi madhu a Mulugu evolowe mwigumini mwehu, nnohowela oparihedha mabasa ndhe nnahudherihu, ohiya wilerigi ninga jornale baahi. Tiyago owoga yoladdaniha wodhela ethu anamwinjhi yanoniliwa, espelyu. Wodhela nladdaniho nna, Tiyago afuna ahudhihe ddi? Kiyakale yapama muthu ddi muthu isugwe va  espelyuni ni woona wi kovaye ehitakala, vano kuhiwomihedha. Mwamakalelo mamodhave, kiyakale ethu yapama wawileri madhu a Mulugu vano woona wi enohoweleya osaddula ekalelo yawo, teto ohaaja makalelo owisaddula.

18. Thalo baani tharu nnafunihu wubuwelelaga wihina nande olabihera dholaddaniha dhapama?

¹⁸ Nnaamutajhihe addi Tiyago wodhela olabihera dholaddaniha dhapama? Nnohowela werana dhithu ndha tharu: (1) Osakulege nladdaniho nookweya, nnaamukavihere namahudherawo wonelamo muselu onamusuzihiwe. (2) Oladdanihege ni dhithu athu owinjhiva enonniwa. (3) Wawonelihegemo museluya onafuniwe wahudhiha. Ki akala enowurusa werana dholaddaniha dhokweya? We podi olabihera Índice das Publicações da Torre de Vigia. Wasayela dholaddaniha, onere ofwanya dhotajhiha dhowinjhiva onahoweliwe olabihera. Mbwenye kuddiwale, dholaddaniha dhinakala ninga mikorofoni. Muthu awogaga alabiheraga mikorofoni, ndhu naaye nnowiweya naathu amodha. Mwamakalelo mamodhave, dholaddaniha dhinowoniha thomodha nnafunihu ohudhiha. Mbwenye pole-pole olabihera dholaddaniha mburo muhunahoweleya. Mwebaribarene, nnafuna nikale anamahudhiha apama. Kannafuna withithimiha, mbwenye nnafuna naakavihere athu owinjhiva witaganyihedha ni emudhi ya Yehova.

19. Nnonihe addi wi nnovaha thima emudhihu yomuzimuni?

¹⁹ Mwebaribarene, kaninna ofuru mmodhave ninga Tiyago, unnuwile ni ddibile apogoya ni oologomana. Mbwenye iyo nihikanna ofuru womulabela Yehova vamodha ni addibilihu ni arogolihu oomuzimuni. Iyo nnowoniha wi nnovaha thima emudhi ela ni nnowavaha thima addibilihu, natugumanaga, najhaga mudhidhi wowinjhivene naaliwa, nahudheraga naaliwa ni nalaleyaga nuroromeleya naaliwa. Nilibiheraga ohara yotajhiha anihiyedhe Tiyago, nnere omuthithimiha Yehova, teto nnere wakavihera athu enna murima wapama ohudhera ebaribari.