1. Hewisa nösi nomo Yakobo wangebuaʼö yaʼia?

 TEʼEBUAʼÖ nakhi Yesu sotöi Yakobo ba nösi nomo saro ba wamati. * Satuania si darua, yaʼia daʼö Yosefo hegöi Maria, laʼomasiʼö sibai Yehowa ba lafosumange ia soroi ba dödö. Baero daʼö, so gaʼa Yakobo, yaʼia daʼö Mesia si no mufabuʼu. Daʼa zangoromaʼö wa iʼokhögö nösi nomo si tohude. Tatu no howu-howu sebua daʼa khö Yakobo!

2. Hadia manö zi sökhi niʼila Yakobo khö Yesu?

² Oya zi sökhi niʼila Yakobo khö gaʼania. (Mat. 13:55) Duma-dumania, me 12 fakhe ndröfi Yesu, no aboto ba dödönia Zura Niʼamoniʼö irege ahöli-höli dödö ndra sondröniaʼö ba agama si so ba Yeruzalema. (Luk. 2:46, 47) Tola manö falulu fohalöwö Yakobo khö Yesu tobali tuka geu. Börö daʼö, oya niʼilania sanandrösa khö gaʼania andrö. Simane sasese iwaʼö talifusöda Nathan H. Knorr, ”Tola itugu aboto ba dödöda zi samösa niha na falulu fohalöwö ita khönia.” * Baero daʼö, iʼila Yakobo wa ”itugu tedou waʼebua ba faʼatua-tua Yesu ba monönö laʼomasiʼö ia niha hegöi Lowalangi”. (Luk. 2:52) Börö daʼö, tola manö tumbu ba wangera-ngerada wa Yakobo andre zi oföna tobali nifahaʼö Yesu. Hizaʼi sindruhunia, tenga simane daʼö.

3. Sagötö mangai halöwö Yesu ba gulidanö, hadia no tobali nifahaʼönia Yakobo?

³ Sagötö mangai halöwö Yesu ba gulidanö, lö si tobali nifahaʼönia  Yakobo. (Yoh. 7:3-5) Tola manö, Yakobo andre samösa moroi ba gotalua nösi nomo Yesu sangumaʼö wa no ”owöhö ia”. (Mrk. 3:21) Ba me lahuku mate Yesu ba döla geu famakao, te lö hadöi si fao Yakobo khö ninara Maria me luo daʼö.—Yoh. 19:25-27.

4. Hadia nitutunöda ba artikel daʼa?

⁴ Ba gafuriata, mamati Yakobo khö Yesu ba tobali ia samösa satua sokubaloi ba mbanua niha Keriso. Ba artikel daʼa, tatutunö dombua wamahaʼö si tola tahalö moroi khö Yakobo enaʼö taʼila (1) hana wa moguna taʼokhögö wangide-ngideʼö, ba (2) hewisa enaʼö tola tobali ita samahaʼö si sökhi.

5. Me no aefa tesusugi Yesu, hewisa wanemaʼö Yakobo me falukha ira?

⁵ Hewisa wa tola tobali nifahaʼö Yesu si lö faröi Yakobo? Me no aefa tesusugi Yesu, möi ia ”ifalukhaisi Yakobo, awena ira sinengenia fefu”. (1 Ko. 15:7) Iʼotarai daʼö, tebulö lala waʼauri Yakobo ba tobali ia nifahaʼö Yesu. Me owulo ndra nifahaʼö Yesu ba mbateʼe tanö yawa ba Yeruzalema ba wanema eheha niʼamoniʼö, so göi Yakobo ba daʼö. (Hal. 1:13, 14) Ba gafuriata, itema halöwö si tohude Yakobo, tobali ia samösa moroi ba gotalua ndra boto solohe me abad siföföna. (Hal. 15:6, 13-22; Gal. 2:9) Fatua lö döfi 62 M, ibeʼe khönia wanuturu lala Lowalangi ba wanura sura khö ndra niha Keriso nibayoini. Surania andrö moguna khöda irugi maʼökhö, he na taʼokhögö dötönafö faʼauri ba zorugo mazui ba gulidanö. (Yak. 1:1) Itutunö samösa ahli sejarah me abad siföföna sotöi Yosefus wa lahuku mate Yakobo börö fareta moroi khö Gere Sebua Yahudi, yaʼia daʼö Anania ono Hanasi. Lö faröi Yakobo khö Yehowa irugi waʼamatenia.

6. Hadia gamaehuta gamuata Yakobo moroi khö ndra sondröniaʼö ba agama ba götönia?

⁶ So wangide-ngideʼö khö Yakobo. Hezo tola taʼila daʼö? Nehegö atö gamaehuta gamuata Yakobo khö ndra sondröniaʼö ba agama ba götö daʼö. Me iʼila Yakobo dandra sangoromaʼö wa Yesu andrö Ono Lowalangi, itemaʼö daʼö si fao fangide-ngideʼö. Hizaʼi, tenga simane daʼö ndra kafalo gere ba Yeruzalema. Duma-dumania, hewaʼae laʼila wa no isusugi Lazaro Yesu, hizaʼi lö lafaduhuʼö wa Yesu andrö nifatenge Lowalangi. Mamagölö ira ba wamunu Yesu hegöi Lazaro. (Yoh. 11:53; 12:9-11) Ba gafuriata, me no tesusugi Yesu,  laforege ba waminiʼö enaʼö lö laʼila daʼö niha sato. (Mat. 28:11-15) Börö waʼasiliyawara, latimbagö Mesia si no mufabuʼu.

7. Hadia mbörö wa moguna tatimbagö waʼasiliyawa?

⁷ Famahaʼönia: Moguna tatimbagö waʼasiliyawa, ba tatemaʼö wamahaʼö moroi khö Yehowa. So wökhö si tola mamakiko pembuluh darah si so ba dödöda irege abeʼe ia ba lö baga wohalöwönia ba mbotoda. Simanö göi, börö waʼasiliyawa, tola abeʼe dödöda irege tatimbagö wamahaʼö moroi khö Yehowa. Daʼö zalua khö ndra Farizaiʼo. Abeʼe sibai dödöra irege lö omasi ira lafaduhuʼö wa Yesu andrö Ono Lowalangi ba sanema faʼabölö moroi khö Lowalangi, hewaʼae no oya dandra niʼilara. (Yoh. 12:37-40) Börö waʼasiliyawara, lö latema waʼauri si lö aetu. (Mat. 23:13, 33) Börö daʼö, böi tebulö so khöda wangide-ngideʼö enaʼö Taromali Lowalangi hegöi ehehania niʼamoniʼö zangatulöʼö amuatada, fangera-ngerada, hegöi angetula nihalöda! (Yak. 3:17) Börö me so wangide-ngideʼö khö Yakobo, omasi ia ba wanemaʼö famahaʼö moroi khö Yehowa. Ba simane nitutunöda dania, daʼö zanolo yaʼia tobali samahaʼö si sökhi.

8. Hadia zanolo yaʼita enaʼö tobali ita samahaʼö si sökhi?

⁸ Lö nitörö Yakobo sekola salawa. Ba wamaigi niha sondröniaʼö ba agama ba götönia, yaʼia andrö ha ”niha si toʼölö manö ba si lö sekola”, simane sinenge sotöi Fetero ba Yohane. (Hal. 4:13) Hizaʼi, na tabaso mbuku nisura Yakobo ba Zura Niʼamoniʼö, tola taʼila wa yaʼia andrö samahaʼö si sökhi. Simane Yakobo, tola manö göi lö nitöröda sekola salawa. Hewaʼae simanö, börö wanolo geheha niʼamoniʼö moroi khö Yehowa hegöi famomaha moroi ba organisasinia, tola göi tobali ita samahaʼö si sökhi. Iadaʼa, datatutunö duma-duma nibeʼe Yakobo ba hewisa lalada ba woloʼö yaʼia.

9. Hewisa lala Yakobo ba wameʼe famahaʼö?

⁹ Iʼogunaʼö Yakobo ngawua wehede salio aboto ba dödö niha. Buania, tola aboto ba dödö niha sombaso surania hadia zinangea lafalua ba hewisa lala ba wamalua yaʼia. Duma-dumania, nehegö hewisa wameʼe Yakobo famahaʼö ba niha Keriso enaʼö lö aetu so khöra waʼebolo dödö hewaʼae lafalua khöra  zi lö sökhi. Imane, ”Tafotöi niha sanau ölö andrö sohau-hau tödö. No mirongo waʼanau gölö Yobi ba miʼila hewisa wamahowuʼö Yehowa yaʼia, irege aboto ba dödömi wa safönu faʼomasi Yehowa ba sahakhö tödö.” (Yak. 5:11) Iʼogunaʼö duma-duma Yobi si so ba Zura Niʼamoniʼö enaʼö aboto ba dödö zombaso surania wa lö tebulö ifahowuʼö Yehowa niha sanau ölö. Na mamahaʼö Yakobo, lö aetu iʼogunaʼö Daromali Lowalangi hegöi ngawua wehede salio aboto ba dödö niha. Daʼa zangoromaʼö wa omasi Yakobo enaʼö tenga khönia teʼosambuaʼö dödö niha, hizaʼi khö Yehowa.

10. Hewisa woloʼöda duma-duma Yakobo ba wamahaʼö?

¹⁰ Famahaʼönia: Lö tola löʼö taʼogunaʼö ngawua wehede salio aboto ba dödö niha, ba taʼogunaʼö Daromali Lowalangi. Ba ginötö tafahaʼö niha, ohitö dödöda tenga enaʼö ahöli dödö niha khöda, hizaʼi enaʼö aboto ba dödöra wa Yehowa andrö Lowalangi safönu faʼatua-tua ba soʼameʼegö tödö yaʼira. (Rom. 11:33) Börö daʼö, böi taböhöli wangogunaʼö Sura Niʼamoniʼö. Duma-dumania, ba wanolo niha nifahaʼöda ba Zura Niʼamoniʼö enaʼö lafalua hadia zi no lafahaʼö yaʼira, böi tamane wangumaʼö, ’Na yaʼodo zimane yaʼugö, hasambalö ufalua . . . ’ Hizaʼi, tolo ira ba woʼangeragö duma-duma si so ba Zura Niʼamoniʼö hegöi ba wangokhögö faʼaboto ba dödö sanandrösa ba lala wangera-ngera Yehowa hegöi nirasoinia. Buania, lafalua hadia zi no lafahaʼö yaʼira börö me omasi ira laʼomusoiʼö dödö Yehowa, tenga yaʼita.

11. Hadia zaboto ba dödö Yakobo sanandrösa khö ndra talifusönia, ba hadia mene-mene nibeʼenia khöra? (Yakobo 5:13-15)

¹¹ Aboto ba dödö Yakobo ndra talifusönia. Moroi ba zurania, tola taʼila wa aboto ba dödö Yakobo hewisa gamuata ndra talifusönia si sara lala wamati, ba ibeʼe khöra wanuturu lala si tefaudu ba wanolo yaʼira. Duma-dumania, so ösa ndra niha Keriso sambö moʼameʼegö tödö ba wamalua mene-mene. (Yak. 1:22) So göi zebua dödö zambuana ba abölö lafosumange niha si kayo. (Yak. 2:1-3) Tanö böʼö, tebai lataha mbewera. (Yak. 3:8-10) Daʼö fefu gamuata si tebai laʼaohasi ba dödö. Hizaʼi, faduhu dödö Yakobo wa tola labulöʼö gamuatara. Lö itaha-taha wameʼe khöra mene-mene si fao faʼasökhi dödö, ba ifarou ira enaʼö laʼandrö wanolo khö ndra satua sokubaloi na abua khöra wamulöʼö amuatara.—Baso Yakobo 5:13-15.

12. Hadia mbörö wa faduhu dödöda wa tola ibulöʼö gamuatania niha nifahaʼöda ba Zura Niʼamoniʼö?

¹² Famahaʼönia: Moguna aboto ba dödöda niha nifahaʼöda, ba faduhu dödöda wa tola ibulöʼö gamuatania. Te abua ba niha nifahaʼöda ba wamalua goi-goi Zura Niʼamoniʼö. (Yak. 4:1-4) Tola manö ara ginötö niʼogunaʼönia ba wamöhöli amuatania si lö sökhi hegöi ba wondrouʼö amuata niha Keriso. Simane Yakobo, böi ataʼu ita ba wamatunö ba niha nifahaʼöda ba Zura Niʼamoniʼö hadia zinangea ifalua. Hizaʼi, moguna göi faduhu dödöda wa tola ibulöʼö gamuatania niha nifahaʼöda andrö. Böi olifu ita wa Yehowa zondröni niha sangide-ngideʼö yaʼia khönia ba itolo ira ba wamulöʼö amuatara.—Yak. 4:10.

13. Ba Yakobo 3:2, hadia nifaduhuʼö Yakobo?

¹³ Lö iwaʼö tödönia Yakobo wa abölö tohude ia moroi ba niha böʼö. Hewaʼae na akhi Yesu ia ba no tebeʼe khönia halöwö sökhi, lö iwaʼö tödönia wa abölö tohude ia moroi khö ndra talifusönia tanö böʼö. Ikaoni ira ”talifusö niʼomasiʼö”. (Yak. 1:16, 19; 2:5) Lö iforomaʼö Yakobo wa yaʼia andrö hulö niha si no  moʼahonoa. Hizaʼi imane, ”Asese fasala ita fefu.”—Baso Yakobo 3:2.

14. Hadia mbörö wa lö tola löʼö tafaduhuʼö wa itaria göi abua khöda ba woloʼö goi-goi Zura Niʼamoniʼö?

¹⁴ Famahaʼönia: Böi olifu ita wa oi niha si lö moʼahonoa fefu ita. Tebai tawaʼö tödöda wa abölö tohude ita moroi ba niha nifahaʼöda ba Zura Niʼamoniʼö. Hadia mbörö? Na taforomaʼö khöra wa hulö lö irai tafalua zala, tola manö iwaʼö tödönia niha nifahaʼöda ba Zura Niʼamoniʼö wa lö sagu khönia tobali Samaduhuʼö Yehowa. Börö daʼö, moguna tafaduhuʼö wa itaria göi abua khöda ba woloʼö goi-goi Zura Niʼamoniʼö hegöi ba wamulöʼö amuatada. Aefa daʼö, tola tafatunö khönia hewisa wanolo Yehowa yaʼita. Na tafalua daʼö, aboto ba dödö niha nifahaʼöda ba Zura Niʼamoniʼö wa tola göi ifosumange Yehowa.

15. Hadia duma-duma niʼogunaʼö Yakobo? (Yakobo 3:2-6, 10-12)

¹⁵ Iʼogunaʼö Yakobo duma-duma si fagöna ba dödö. Tatu manö, tola ifalua daʼö börö wanolo moroi ba geheha niʼamoniʼö. Te oya göi ifahaʼö ia moroi khö gaʼania Yesu sanandrösa ba duma-duma niʼogunaʼönia. Ba zurania, iʼogunaʼö duma-duma si öna-öna irege alio aboto ba dödö zombaso hadia zi tobali famahaʼönia khöra.—Baso Yakobo 3:2-6, 10-12.

16. Hadia mbuania na taʼogunaʼö duma-duma si tefaudu?

¹⁶ Famahaʼönia: Lö tola löʼö taʼogunaʼö duma-duma si tefaudu. Na taʼogunaʼö duma-duma, aoha ba niha nifahaʼöda ba wokhalaigö hadia zi tobali famahaʼönia. Tola tobali fanolora daʼö irege lö alio olifu ira hadia wamahaʼö sabölö tohude. Atua-tua sibai Yesu ba wangogunaʼö duma-duma, ba iʼoʼö göi nifaluania andrö Yakobo. Datafaigi hadia duma-duma niʼogunaʼö Yakobo ba hadia mbörö wa tefaudu sibai duma-duma andrö.

17. Hadia mbörö wa tefaudu sibai duma-duma nisura ba Yakobo 1:22-25?

¹⁷ Baso Yakobo 1:22-25. Hadia mbörö wa tefaudu sibai duma-duma Yakobo sanandrösa ba zörömi? Si oföna, tefaudu duma-duma daʼö ba wamahaʼö sinangea ifaʼema: Na omasi ita tatema mbua moroi ba Daromali Lowalangi, lö ibönö na ha asala tabaso manö, hizaʼi moguna göi tafalua ia. Baero daʼö, aoha ba niha sombaso wokhalaigö duma-duma niʼogunaʼö Yakobo, yaʼia daʼö sanandrösa ba  niha samaigi yaʼia ba zörömi. Hadia geluaha duma-dumania andrö? Na so niha samaigi yaʼia ba zörömi ba iʼila wa so zinangea muheta ba mbawania, hizaʼi lö ifalua hadia ia, no niha si bodo niha daʼö. Börö daʼö, ba ginötö tabaso Daromali Lowalangi ba taʼila wa so gamuatada sinangea tabulöʼö, böi tahonogö manö ita. Moguna tabulöʼö.

18. Hadia zi tölu ngawalö zi tola tahalö khöda famahaʼö moroi ba lala Yakobo ba wangogunaʼö duma-duma?

¹⁸ So tölu ngawalö zi tola tahalö khöda famahaʼö moroi ba lala Yakobo ba wangogunaʼö duma-duma: (1) Moguna tefaudu duma-duma niʼogunaʼöda ba wamahaʼö sinangea tafaʼema. (2) Lö tola löʼö taʼogunaʼö duma-duma salio lakhalaigö ira niha samondrongo. (3) Moguna tahaogö wanutunö famahaʼö moroi ba duma-duma nibeʼeda. Na abua khöu wangalui duma-duma sinangea öʼogunaʼö, tola öbokai Indeks Publikasi Menara Pengawal. Ba duho ”Perumpamaan”, oya duma-duma si tola öʼogunaʼö. Hizaʼi törö tödöu, sökhi taʼogunaʼö duma-duma ha ba ginötö tatutunö duho sabölö moguna. Hadia mbörö? Simane mikrofon si tola möi fangebua lida, duma-duma göi tola möi fangaʼaroʼö mazui fangabakhaiʼö duho nifaʼemada. Börö daʼö, na talafo oya taʼogunaʼö duma-duma, tola manö alangu dödö zamondrongo börö me oya sibai zinangea taʼabakhaiʼö. No tafatunö wa moguna tadouʼö waʼatua-tuada ba wamahaʼö niha. Tafalua daʼö tenga enaʼö ahöli dödö niha, hizaʼi enaʼö ato niha nitoloda tobali ösi nomo Yehowa sohahau tödö.

19. Hewisa wangoromaʼöda wa taʼomasiʼö nösi nomoda ba wamati?

¹⁹ Sindruhu sa, lö hadöi talifusöda soʼahonoa simane Yesu. Hizaʼi, taʼokhögö nösi nomo ba wamati sato sibai ba falulu fohalöwö ita khöra ba wamosumange Yehowa. No taforomaʼö wa taʼomasiʼö ira na fariawö ba tafahaʼö ita khöra, ba falulu fohalöwö ita ba wanuriaigö hegöi ba wamahaʼö niha si fao faʼalöfaröi. Na taforege woloʼö amuata hegöi lala wamahaʼö nifalua Yakobo, no tafolakhömi Yehowa, Amada sebua faʼomasi, ba tatolo niha satulö tödö enaʼö ahatö ira khönia.