1. O ka hlalosa bjang lapa la bo Jakobo?

 JAKOBO e lego ngwanabo Jesu o goletše ka lapeng leo le bego le na le tumelo go Jehofa. * Batswadi ba gagwe e lego Maria le Josefa ba be ba rata Jehofa kudu gomme ba dira sohle seo ba ka se kgonago gore ba mo hlankele. Jakobo o ile a ba le tšhegofatšo e nngwe, ngwanabo e be e tlo ba Mesia. E tloga e bile tokelo e kgolo gore Jakobo a golele ka lapeng leo!

2. Jakobo o be a na le mabaka afe a go ekiša ngwanabo?

² Jakobo o be a na le mabaka a mantši a go ekiša mohlala wa ngwanabo. (Mat. 13:55) Ka mohlala Jesu o be a tseba mangwalo gabotse moo e lego gore ge a be a na le mengwaga e 12 o ile a makatša barutiši ba kua Jerusalema. (Lu 2:46, 47) Jakobo a ka ba a ile a šoma le Jesu mošomong wa go betla. Seo se ka ba se ile sa dira gore a tsebe ngwanabo gabotse. Nathan H. Knorr o itše: “O ithuta go gontši ka motho ge o šoma le yena.” * Go molaleng gore Jakobo o ile a bona ge “Jesu a tšwela pele a gatela pele bohlaleng le go goleng mmeleng le ka go kgahla Modimo le batho.” (Lu 2:52) Se se ka dira gore re nagane gore Jakobo e ka ba e bile yo mongwe wa barutiwa ba Jesu ba mathomo. Eupša go be go se bjalo.

3. Jakobo o ile a dira’ng ge Jesu a be a thoma bodiredi bja gagwe?

³ Nakong ya bodiredi bja Jesu bja mo lefaseng, Jakobo ga se a ka a ba yo mongwe wa barutiwa ba gagwe. (Joh 7:3-5) Ge e le gabotse go ka direga gore Jakobo e be e le yo mongwe wa ba leloko bao ba bego ba bona okare Jesu “o hlakane  hlogo.” (Mar 3:21) Le gona ga gona mo go bontšhago gore Jakobo o be a na le mmagwe e lego Maria ge Jesu a be a kokotelwa koteng ya tlhokofatšo.—Joh 19:25-27.

4. Re tlo ithuta ka’ng sehlogong se?

⁴ Ka morago Jakobo o ile a ba le tumelo go Jesu gomme a ba mogolo yo a hlomphegago ka phuthegong ya Bokriste. Sehlogong se re tlo bolela ka dilo tše pedi tšeo re ka ithutago tšona go Jakobo: (1) Lebaka leo re swanetšego go ikokobetša le (2) Kamoo re ka bago barutiši ba babotse.

5. Jakobo o ile a dira’ng ge Jesu yo a tsošitšwego bahung a be a iponagatša go yena?

⁵ Jakobo o thomile neng go ba molatedi wa Jesu? Ka morago ga gore Jesu a tsošwe bahung, “o ile a iponagatša go Jakobo, ke moka a tla a iponagatša go baapostola ka moka.” (1Ko 15:7) Ka morago ga go kopana le Jesu yo a tsošitšwego, bophelo bja Jakobo bo ile bja fetoga. O be a le gare ga baapostola bao ba bego ba emetše go amogela moya o mokgethwa phapošing ya ka godimo kua Jerusalema. (Dit 1:13, 14) Ka morago Jakobo o ile a thabela go hlankela e le yo mongwe wa Sehlopha se Bušago. (Dit 15:6, 13-22; Gal. 2:9) Le gona, pele ga ngwaga wa 62 C.E. o ile a ngwalela Bakriste ba tloditšwego lengwalo. Lengwalo leo le a re thuša lehono go sa šetšwe gore re na le kholofelo ya go yo phela legodimong goba mo lefaseng. (Jak. 1:1) Radihistori yo a bitšwago Josephus o ngwadile gore: “Jakobo o ile a bolawa e le ka taelo ya moperisita yo a phagamego wa Bajuda e lego Ananiase yo monyenyane.” Jakobo o ile a ba le tumelo go Jehofa go fihlela a fetša bophelo bja gagwe bja mo lefaseng.

6. Jakobo o be a fapana bjang le baetapele ba bodumedi ba mehleng ya gagwe?

⁶ Jakobo o be a na le boikokobetšo. Ke ka baka la’ng re bolela bjalo? Tsela yeo Jakobo a arabetšego ka yona go Jesu e fapana le yeo baetapele ba bodumedi ba arabetšego ka yona. Ge Jakobo a be a bona bohlatse bja gore Jesu ke morwa wa Modimo, ka boikokobetšo o ile a bo amogela. Eupša baperisita ba phagamego kua Jerusalema, ga se ba ka ba bo dumela. Ka mohlala, go be go le molaleng gore Jesu o tsošitše Latsaro bahung. Ba ile ba leka go bolaya Jesu le Latsaro go e na le gore ba dumele gore Latsaro o be a tsošitšwe ke Jehofa. (Joh 11:53; 12:9-11) Ka morago ga gore Jesu a tsošwe bahung, ba ile ba leka go utela batho taba yeo.  (Mat. 28:11-15) Baetapele ba bodumedi ba ile ba gana Mesia ka baka la boikgogomošo.

7. Ke ka baka la’ng re se ra swanela go ba le boikgogomošo?

⁷ Seo re ithutago sona: O se ke wa ba le boikgogomošo, gomme o dumelele Jehofa gore a go rute. Go no swana le ge bolwetši bo ka dira gore pelo ya motho e se ke ya šoma gabotse, boikgogomošo le bjona bo ka dira gore re se ke ra kwa dilo tšeo Jehofa a rego re di dire. Bafarisei ba be ba ikgogomoša gomme ba gana gore Jesu o be a na le moya wa Modimo o mokgethwa le gore e be e le Morwa wa Modimo. (Joh 12:37-40) Boikgogomošo bja bona bo be bo le kotsi ka gobane bo ile bja dira gore ba lahlegelwe ke tokelo ya go tlo phela ka mo go sa felego. (Mat 23:13, 33) Go bohlokwa gore re dumelele lentšu la Modimo le fetola tsela yeo re phelago ka yona le gore re nagane gabotse pele re dira diphetho! (Jak 3:17) Jakobo o be a ikemišeditše go rutwa ke Jehofa ka gobane o be a na le boikokobetšo. Le gona sehlogong se re tlo bona kamoo Jakobo o ilego a ba morutiši yo mobotse ka baka la boikokobetšo bja gagwe.

8. Ke’ng seo se ka re thušago go ba barutiši ba babotse?

⁸ Jakobo o be a se a hwetša thuto e phagamego. Baetapele ba bodumedi ba be ba nagana gore Jakobo ga se a rutega e bile ke motho yo a tlwaelegilego go no swana le ka mokgwa wo ba bego ba lebelela moapostola Petro le moapostola Johane. (Dit 4:13) Eupša Jakobo o ile a ithuta go ba morutiši yo mobotse, ka ge re bona seo pukung yeo a e ngwadilego yeo e bitšwago ka leina la gagwe. Le rena re ka no ba re se ra hwetša thuto e phagamego go no swana le Jakobo. Eupša re ka thušwa ke mokgatlo wa Jehofa le moya wa gagwe o mokgethwa gore re be barutiši ba babotse. A re boneng mohlala woo Jakobo a re beetšego wona bjalo ka morutiši, re bone le seo re ka ithutago sona.

9. O ka hlalosa bjang tsela ya Jakobo ya go ruta?

⁹ Jakobo o be a bolela dilo tšeo di kwešišegago gabonolo. Ka baka leo, batheetši ba gagwe ba be tseba dilo tšeo ba swanetšego go di dira le tsela yeo ba bego ba swanetše go di dira ka yona. Ka mohlala, Jakobo o ile a ruta Bakriste  gore ba swanetše go kgotlelela ge ba tlaišwa le gore ba se ke ba ba le lehloyo, o rutile se ka tsela e kwagalago. O ngwadile gore: “Bao ba kgotleletšego re re ba thabile. Le kwele ka kgotlelelo ya Jobo gomme le bone pheletšo yeo Jehofa a e neilego, gore Jehofa o na le lerato le legolo e bile ke yo a gaugelago.” (Jak 5:11) Hlokomela gore Jakobo o be a diriša mangwalo ge a be a ruta. O ile a diriša Lentšu la Modimo go ruta batheetši ba gagwe go bona gore Jehofa o putsa bao ba mmotegelago, go swana le Jobo. Jakobo o rutile thuto yeo ka go diriša mantšu a bonolo le ao a kwagalago. Seo se ile sa dira gore batho ba se ke ba reta yena, eupša ba tumiše Jehofa.

10. Re ka ekiša Jakobo bjang ge re ruta?

¹⁰ Seo re ithutago sona: Dira gore molaetša wa gago o be bonolo e bile o rute go tšwa lentšung la Modimo. Ge re ruta batho Beibele, ga se ra swanela go ba bontšha gore rena re tseba kudu, eupša re swanetše go ba bontšha gore Jehofa ke yena a tsebago gakaone e bile o a ba rata. (Baroma 11:33) Re tlo kgona go dira seo ge e ba re diriša mangwalo ge re ruta. Ka mohlala, go e na le gore re botše batho bao re ithutago le bona Beibele gore re be re ka dira eng ge nkabe re le boemong bja bona, re swanetše go ba thuša go bala Beibele gomme ba bone gore Jehofa o nyaka gore ba dire eng. Seo se tla dira gore ba diriše seo Beibele e se rutago gore ba kgahliše Jehofa, e sego rena.

11. Ke mathata afe ao Bakriste ba mehleng ya Jakobo ba bego ba na le ona, gona o ile ba nea keletšo efe? (Jakobo 5:13-15)

¹¹ Jakobo o be a na le tekatekano. Lengwalo la Jakobo le a bontšha gore o be a tseba gore bana babo ba na le mathata afe, gomme o ile a ba nea keletšo mabapi le seo ba bego ba swanetše go se dira. Ka mohlala, Bakriste ba bangwe ba be ba sa amogele Keletšo. (Jak. 1:22) Ba bangwe ba be ba se na teka tekano. (Jak. 2:1-3) Le gona ba bangwe ba be ba sa kgone go bolela gabotse le batho. (Jak. 3:8-10) Le ge Bakriste bao ba be na le mathata, Jakobo o be a tshepa gore ba ka fetoga. O ile a ba nea keletšo ka tsela e bonolo le e kwagalago, le gona o ile a kgothaletša ba bangwe gore ge ba na le mathata ba kgopele thušo go bagolo.—Bala Jakobo 5:13-15.

12. Re ka thušwa ke’ng gore re se ke ra fela matla ge re thuša batho bao re ithutago Beibele le bona?

¹² Seo re ithutago sona: E ba le tekatekano e bile o lebelele batho ba bangwe gabotse. Ka dinako tše dingwe go ka ba thata gore batho bao re ithutago Beibele le bona ba diriše seo ba ithutago sona. (Jak. 4:1-4) Go ka ba tšea nako gore ba tlogele tsela yeo ba bego ba phela ka yona gomme ba hlagolele mekgwa ya Bokriste. Go swana le Jakobo, le rena re ka ba le sebete sa go botša batho bao re ithutago le bona dilo tšeo ba ka di lokišago maphelong a bona. Ga se ra swanela go fela matla, le gona re swanetše go tshepa gore Jehofa o tlo thuša batho bao ba ikokobeditšego gore ba dire diphetogo maphelong a bona.—Jak. 4:10.

13. Go ya ka Jakobo 3:2, Ke’ng seo Jakobo a ilego a se lemoga?

¹³ Jakobo o be a sa ipone a phala ba bangwe. Jakobo o be a sa ipone a le bohlokwa go feta bana babo le dikgaetšedi ka lebaka la ge e le ngwanabo Jesu goba ka baka la dikabelo tše bohlokwa tšeo a bego a na le tšona. O be a bitša Bakristegotee le yena gore ke ‘bana babo bao ba rategago.’ (Jak. 1:16, 19; 2:5) O be sa dire gore batho ba bangwe ba nagane eka ga a dire diphošo. Go e na le moo, o ile a ngwala gore: “Ka moka ga rena, re dira diphošo gantši.”—Bala Jakobo 3:2.

14. Ke ka baka la’ng re swanetše go amogela gore re dira diphošo?

 ¹⁴ Seo re ithutago sona: Gopola gore ka moka ga rena re dira diphošo. Re se ke ra nagana gore ka tsela e itšego, re phala batho bao re ithutago le bona Beibele. Ka baka la’ng? Ge e ba motho yo re ithutago le yena a ka bona eka ga re dire diphošo, seo se ka dira gore a bone okare a ka se tsoge a kgonne go kwa Modimo. Eupša ge re ka ba botša nnete le go ba hlalosetša gore ga se ka mehla go lego bonolo go phela ka melao ya motheo ya Beibele, le gore re dula re kgopela Jehofa gore a re thuše go fenya mathata ao re kopanago le ona, le bona ba ka bona gore ba ka kgona go hlankela Jehofa.

15. O ka hlalosa bjang dipapišo tšeo Jakobo a bego a di diriša? (Jakobo 3:2-6, 10-12)

¹⁵ Jakobo o be a diriša dipapišo tšeo di rutago. Ga go pelaelo gore o be a thušwa ke moya o mokgethwa, le gona o ithutile ka dipapišo tšeo Jesu a bego a e diriša. Dipapišo tšeo Jakobo a di dirišitšego lengwalong la gagwe di bonolo e bile thuto ya tšona e a kwašišega.—Bala Jakobo 3:2-6, 10-12.

16. Ke ka baka la’ng re swanetše go diriša dipapišo tšeo di rutago?

¹⁶ Seo re ithutago sona: Diriša dipapišo tšeo di rutago. Ge o diriša dipapišo tšeo di swanetšego, o thuša motho gore a kwešiše dithuto tše bohlokwa tša Beibele. Jesu o be a na le bokgoni bja go diriša dipapišo tšeo di rutago gomme Jakobo le yena o ile a mo ekiša. A re boleleng ka e nngwe ya dipapišo tša Jakobo gomme re bone gore e šoma bjang lehono.

17. Ke ka baka la’ng papišo yeo e lego go Jakobo 1:22-25 e kwagala?

¹⁷ Bala Jakobo 1:22-25. Go na le mabaka a mantši ao a dirago gore papišo ya Jakobo ya seipone e be e rutago. Go na le seo a bego a nyaka go se ruta ge a diriša papišo ye, e lego go diriša seo re se hwetšago ka Lentšung la Modimo, e sego go no se bala feela. Jakobo o ile a diriša papišo yeo batheetši ba gagwe ba tlago go e kwešiša ga bonolo, e lego ya motho yo a itebelelago seiponeng. Ke thuto efe yeo a bego a e ruta? E ka se be ga bohlale ge o ka se lokiše diphošo tšeo o di bonago ge o dutše o itebeletše seiponeng. Ka mo go swanago, e  ka se be ga bohlale gore re bale Lentšu la Modimo gomme la re bontšha gore re swanetše go dira diphetogo kae maphelong a rena ke moka ra se di dire.

18. Ke dilo dife tše tharo tšeo re swanetšego go di gopola ge re diriša dipapišo?

¹⁸ Ge o diriša papišo, o ka ekiša Jakobo ka go dira dilo tše tše tharo: (1) Dira gore papišo yeo e gatelele ntlha yeo o e rutago. (2) Diriša papišo yeo batheetši ba gago ba tla e kwešišago ga bonolo. (3) Dira gore papišo ya gago e kwagale. Ge e ba o palelwa ke go hwetša papišo yeo o ka e dirišago, o ka bala Watch Tower Publications Index. Ka tlase ga sehlogo sa “Illustrations,” o tlo hwetša mehlala e mentši yeo o ka e dirišago. Gopola gore dipapišo di swana le maekrofouno, di dira gore taba yeo o nyakago go e ruta e kwagale gabotse. Ka gona diriša dipapišo ge o nyaka go gatelela dintlha tše bohlokwa feela. Lebaka le legolo la gore re kaonefatše tsela ya rena ya go ruta, ga se gore batho ba re rete, eupša ke go thuša batho ba bantši kamoo go ka kgonegago gore e be karolo ya lapa le legolo la Jehofa leo le thabilego.

19. Re ka bontšha bjang gore re rata bana babo rena le dikgaetšedi?

¹⁹ Go fapana le Jakobo, ga se ra godišwa ka lapeng leo go nago le motho yo a phethagetšego, eupša re na le tokelo ya go hlankela Jehofa le bana babo rena ba bantši le dikgaetšedi. Re ba bontšha gore re a ba rata ka go kopanela le bona, go ithuta go bona, go ya le bona tšhemong le go ruta batho ka Beibele. Ge re ka lwela go ekiša mohlala wa Jakobo tseleng yeo re dirago dilo ka yona le tseleng yeo re rutago ka yona, re tlo tagafatša leina la Jehofa le go thuša batho ba dipelo tše di lokilego gore e be bagwera ba Tatago rena yo lerato wa legodimong.