1. Yakoba wakudile mu fami ya luholo lutshi?

 YAKOBA wakudile mu fami ya athu akhalele agujinginyina gudi Yehowa. * Mvuaji jienji, Yozefe nu Madiya akhalele muzumba Yehowa muavula, akhalele nji mutshita ngolo ha gumukombelela. Yakoba wakhalele nu ndaga iko yakhalele gumusuanguluisa: mbuta wenji wabuile Masiya. Wakhalele diago nu luendu lua gukhala mu fami ya athu ana zumba Yehowa!

2. Ndaga jitshi jiakhalele naye gutuma Yakoba ha gunemesa Yesu?

² Yakoba wakhalele nu ndaga jiavula jiakhalele gumutuma ha gunemesa Yesu. (Mat. 13:55) Ha gufezegesa, tangua diakhalele Yesu nu ivo 12, wakhalele mujiya mbimbi ya Nzambi muabonga diago. Alongeshi a gu Yelusalema akhalele gudihula mukunda nu ndunge jienji. (Luka 2:46, 47) Yajiya gukhala egi Yakoba wakhalele mutshita nji mudimo wa mabaya nu Yesu. Gutshita mudimo nu Yesu guakuatesele Yakoba ha gumujiya muabonga. Phangi Nathan Knorr wazuelele egi: “Gula watshita mudimo nu muthu, mbawumujiya muabonga diago.” * Yajiya gukhala egi Yakoba nji wamonele luholo ‘Yesu walanduile gukudisa gutema guenji, wakudile mu muila nu luholo Nzambi nu athu akhalele gumutshigina.’ (Luka 2:52) Hene tuajiya gutangiza egi Yakoba wakhalele naye gukhala mukatshi dia athu a thomo abuile landudi a Yesu. Uvi yakhalelego ngenyi.

3. Tangua diakhalele Yesu ha mavu Yakoba wabuile mulandudi wenji ba?

³ Tangua diakhalele Yesu ha mavu, Yakoba gabuilego mulandudi wenji. (Yone 7:3-5) Yajiya gukhala egi Yakoba nji wakhalele mukatshi dia aphangi a Yesu anyi atangijile egi ‘Yesu wasaluga.’  (Mako 3:21) Luko, gushigo nga gima gimoshi gidi mumonesa egi tangua diashiyiwe Yesu ha mutshi wa lamba Yakoba wakhalele nu Madiya ha fundo diene.—Yone 19:25-27.

4. Ndaga jitshi tuza mutadila mu longo edi?

⁴ Uvi gungima, Yakoba washile gutshigina gudi Yesu, wabuile mukulu mu hungu dia Uklisto. Athu akhalele gumunemesa muavula. Mu longo edi, tuza mutadila ndaga mbadi tuajiya guheta mu gifezegeselo gia Yakoba: (1) mukunda natshi tudi naye gukhala athu agudibulumuisa? (2) luholo lutshi tuajiya gukhala alongeshi abonga?

5. Itshi Yakoba wakalegele tangua Yesu wamonegele gudi muene gungima dia gufuzumuga guenji?

⁵ Tangua ditshi Yakoba wabuile mulandudi wa Yesu? Biblia idi muzuela egi tangua Yesu wafuzumugile gu gufua, ‘wamonegele gudi Yakoba; gungima wamonegele nji gudi apostolo agasue.’ (1 Kol. 15:7) Gungima dia gudibungisa gua Yesu nu alandudi enji, Yakoba wabuile mulandudi wenji. Tangua apostolo akhalele munenga gu sugu ya gosa gu Yelusalema ha guheta nyuma ya Nzambi, Yakoba nji wakhalele hene. (Makal. 1:13, 14) Gungima Yakoba wabuile mumoshi mukatshi dia aphangi a hunji dia akulu atuameji dia mu siekle ya thomo. (Makal. 15:6, 13-22; Gal. 2:9) Gutuama dia givo 62 gungima dia guvualewa gua Yesu, nyuma ya Nzambi yakuatesele Yakoba ha gusonega mukanda mukunda nu Aklisto ambiwe maji mu nyuma. Mangino mukanda wene wana gutukuatesa nji, ikhale tudi nu felela dia guya mu dilu nga dia gukhala ha mavu. (Yak. 1:1) Muenya ndunge mumoshi, jina dienji Joseph udi muzuela egi, muthu wahanele mukhuala egi Yakoba ashiyiwe udi Ananiase, Nganga-nzambi Wakoma wa enya Yuda, mun’a Ana. Yakoba wasalele wagujinginyina gudi Yehowa uu nu tangua diafile muene ha guya mu dilu.

6. Luholo lutshi Yakoba wakhalele wagudisha nu mafumu a ikombelelo a mu tangua dienji?

⁶ Yakoba wakhalele muthu wagudibulumuisa. Mukunda natshi tuazuela egi Yakoba wakhalele muthu wa gudibulumuisa? Tutadilenu gudisha guakhalele mukatshi dienji nu mafumu avula a ikombelelo a mu tangua dia Yesu. Tangua Yakoba wamonele ndaga jiakhalele mumonesa diago egi Yesu udi Mun’a Nzambi, watshiginyile ndaga yene nu gudibulumuisa guagasue. Uvi mafumu a nganga-nzambi a gu Yelusalema akalegelego ngenyi. Ha gufezegesa, tangua Yesu wafuzumuine Lazalo, atshiginyilego ndaga yene. Atshiginyilego nji egi Yehowa watumine Yesu, uvi akambele gushiya Yesu nu Lazalo. (Yone 11:53; 12:9-11) Gungima, tangua Yesu  wafuzumugile gu gufua, akambele gusuega ndaga yene, atshiginyilego egi athu ayijiye. (Mat. 28:11-15) Mafumu awa a ikombelelo akhalele enya lulendo, hene atunyile Masiya.

7. Mukunda natshi tudi naye gutuna khadilo dia lulendo?

⁷ Idi gutulongesa itshi? Tudi naye gutuna khadilo dia lulendo, uvi tutshigine egi Yehowa atulongese. Gula mutshima wa muthu udi nu misongo, wanago gutshita muabonga. Luholo lumoshi nji, gula muthu udi muenya lulendo, yajiya gukhala lamba ha gutumagela Yehowa. Afalese akhalele enya lulendo, hene atunyine ndaga jiakhalele mumonesa haphelo egi Yesu wakhalele nu nyuma ya Nzambi nu wakhalele mun’a Nzambi. (Yone 12:37-40) Lulendo luawo luakhalele luabola handaga luaakangele njila ha guheta monyo wa mayilago. (Mat. 23:13, 33) Hene tudi naye gubemba egi Mbimbi ya Nzambi nu nyuma yenji ilandule gusombegesa makalegelo etu nu matangi etu, itukuatese nji ha guzula badesizio abonga! (Yak. 3:17) Yakoba wabembele egi Yehowa amulongese handaga wakhalele muthu wa gudibulumuisa. Gifua luholo tuza guyimona, Yakoba wabuile mulongeshi wabonga handaga wakhalele muthu wagudibulumuisa.

8. Itshi yajiya gutukuatesa ha gukhala alongeshi abonga?

⁸ Yakoba ganginyilego makhalasa aleha-leha. Idi naye gukhala egi mafumu a ikombelelo a mu tangua dienji akhalele gumumona gifua luholo akhalele muzula Phetelo nu Yone egi, ‘athu a githuhu anginyilego khalasa.’ (Makal. 4:13) Ikhale ngenyi, Yakoba wabuile mulongeshi wabonga. Tuana mona ndaga yene tangua tuana tanga mukanda wasonegele muene. Yajiya gukhala egi esue nji tuanginyinego makhalasa aleha-leha gifua Yakoba. Uvi tuajiya gubua alongeshi abonga handaga Yehowa wana gutukuatesa nu nyuma yenji, ulondegi wenji wana gutuhana nji formasio yabonga. Henyaha tutalenu ndaga jidi mumonesa egi Yakoba wakhalele mulongeshi wabonga nu luholo tuajiya gulandula gifezegeselo gienji.

9. Yakoba wakhalele mulongesa luholo lutshi?

⁹ Yakoba gakhalelego mukalegela mbimbi jidi jiakola ha gukotelesa. Athu akhalele gumutegelela akhalele mujiya ndaga adi naye gutshita nu luholo adi naye gujikalegela. Tutadilenu gifezegeselo gimoshi. Yakoba walongesele mu luholo  lualeba ha gumonesa egi Aklisto adi naye gutshigina gumonesewa lamba, uvi ashigo naye gubamba umbalagaji mu mutshima. Wasonegele egi: ‘Athu anyi akolesele mu malamba adi enya gusuanguluga. Muavuile luholo Yobo wakolesele mu malamba, muamonele nji ndaga Yehowa wamukalegele gu gisugishilo. Idi mumonesa egi Yehowa wana khala nu guzumba guakola nu khenda jiavula.’ (Yak. 5:11) Verse eyi idi mumonesa egi ndaga jiakhalele mulongesa Yakoba jiakhalele mukatuga mu Mbimbi ya Nzambi. Ngenyi wakuatesele athu akhalele gumutegelela ha gujiya egi Yehowa wana shimbiga athu adi agujinginyina gudi muene gifua Yobo. Tuamona egi Yakoba walongesele malongo ene mu mbimbi jialeba nu mu luholo luabonga. Ngenyi wakuatesele athu ha guhaga matangi gudi Yehowa uvi gudi muene ndo.

10. Luholo lutshi tuajiya gulandula gifezegeselo gia Yakoba tangua tudi mulongesa?

¹⁰ Idi gutulongesa itshi? Tudi naye gulongesa mu luholo lualeba, tudi naye nji gukalegela Biblia tangua tudi mulongesa. Tangua tudi mulongesa, tushigo naye gutshita hagula athu amone egi tuajiya ndaga jiavula. Uvi tudi naye guakuatesa hagula akotelese egi Yehowa wana guajiya kiawaha nu wana gudisagesa diago mukunda nu ene. (Lomo 11:33) Ha guyikalagala, ndaga tudi mulongesa jidi naye gukatuga mu Biblia. Ha gufezegesa, tushigo naye guwambela athu tuana longesa Biblia ndaga tuakhalele naye gukalagala gula nga esue tuakhalele ha fundo diawo. Uvi tudi naye guakuatesa ha gutangiza ifezegeselo idi mu Biblia hagula akotelese matangi a Yehowa nu luholo luana gudivua muene. Ngenyi mbaatumagela ndaga adi mulonguga ha gusuanguluisa Yehowa, uvi esue ndo.

11. Malamba atshi Aklisto ako akhalele mutagana nawo mu tangua dia Yakoba? Luholo lutshi Yakoba waakuatesele? (Yakoba 5:13-15)

¹¹ Yakoba wakhalele mujiya egi aphangi’enji Aklisto mbaasombegesa. Mukanda wasonegele Yakoba udi mumonesa egi wakhalele mujiya muabonga malamba Aklisto akhalele mutagana nawo. Hene waahanele malongo ajiya guakuatesa ha gubinga malamba ene. Ha gufezegesa, Aklisto ako akhalelego mutumagela mbimbi ya Nzambi. (Yak. 1:22) Ako akhalele nu lutondo, akhalele muzula enya umonyi nu ndando uvi phutu ndo. (Yak. 2:1-3) Uvi ako akhalele enya izuele-zuele, akhalelego muzuela ndaga jiabonga. (Yak. 3:8-10) Yadiago, Aklisto akhalele nu milonga yavula yakhalele guasagesa. Uvi Yakoba wakhalele nu gutshigna egi mbaasombegesa. Waawambelele ndaga haphelo nu gisemo giagasue, wakuatesele nji Aklisto akhalele nu funu ya ukuateshi mu nyuma ha guya mumona akulu hagula a akuatese.—Tanga Yakoba 5:13-15.

12. Luholo lutshi tuajiya gumonesa egi tudi nu matangi abonga mukunda nu athu tuana longesa Biblia?

¹² Idi gutulongesa itshi? Tudi naye gukhala nu matangi abonga mukunda nu athu tuana longesa Biblia. Yajiya gukhala lamba gudi athu avula tuana longesa Biblia ha gutumagela ndaga tuana gualongesa. (Yak. 4:1-4) Yajiya guazula tangua diavula ha gubemba ndaga jiabola nu ha gukudisa makalegelo abonga. Hene tudi naye guawambela haphelo ndaga adi naye gusombegesa, gifua muatshitshile Yakoba. Tudi naye gukhala nu matangi abonga nu gusha mutshima egi Yehowa mbawukuatesa athu agudibulumuisa ha gumujiya, mbawaahana nji ngolo ha gusombegesa makalegelo awo.—Yak. 4:10.

13. Ha gutadila Yakoba 3:2, itshi Yakoba wakhalele mujiya mukunda nu athu ako?

¹³ Yakoba wakhalele muthu wagudibulumuisa. Yakoba gatangijilego egi wakhalele nu ndando yavula gubalega Aklisto ako handaga wakhalele phangi’a Yesu nu wakhalele nu inemo yavula mu hungu. Wakhalele mutamega Aklisto ako egi: “Aphangi’ami ngana zumba muavula.” (Yak. 1:16, 19; 2:5) Yakoba gatuminego athu ako ha gutangiza egi wakhalele muthu watagana. Uvi tangua diasonegele muene aphangi’enji Aklisto, muene nji wadinginyishile mukatshi. Wazuelele  egi: “Matangua avula mukut’etu agasue tuana jimbila.”—Tanga Yakoba 3:2, mbimbi goshi’a diyiji.

14. Mukunda natshi tudi naye gutshigina egi mukut’etu agasue tudi enya gubola?

¹⁴ Idi gutulongesa itshi? Tudi naye gujiya egi mukut’etu agasue tudi enya gubola. Tushigo naye gutangiza egi tuabalega athu anyi tuana longesa Biblia. Mukunda natshi? Handaga gula tuamonesa athu tuana longesa Biblia egi tuanago gutshigita gubola, ajiya guleba muila handaga ajiya gutangiza egi ajiyilego gutumagela Nzambi mu ndaga jiagasue. Uvi gula tuatshigina nu mutshima umoshi egi esue nji yakhalago ndaga yaleba ha gutumagela mikhuala ya Biblia, nu tuamonesa luholo Yehowa ana gutukuatesa ha gubinga malamba, mbayikuatesa athu tuana longesa Biblia ha gumona egi ene nji ajiya gukombelela Yehowa.

15. Ifezegeselo yahanele Yakoba idi luholo lutshi? (Yakoba 3:2-6, 10-12)

¹⁵ Yakoba wakhalele mukalegela ifezegeselo ha gukuata mitshima ya athu. Nyuma ya Nzambi yakuatesele Yakoba ha gukuata mitshima ya athu. Uvi yajiya gukhala egi walanduile nji luholo lua gulongesa lua phangi’enji Yesu; wakhalele mulonguga muabonga ifezegeselo yahanele Yesu. Yadiago, ifezegeselo yasonegele Yakoba mu mukanda wenji idi yaleba, malongo ayo nji ashigo akola ha gukotelesa.—Tanga Yakoba 3:2-6, 10-12.

16. Mukunda natshi tudi naye gukalegela ifezegeselo tangua tudi mulongesa?

¹⁶ Idi gutulongesa itshi? Tudi naye gukalegela ifezegeselo idi yabonga. Gula tuakalegela ifezegeselo yabonga, mbatukuatesa athu ha guvua nu ha gumona ndaga tudi gualongesa. Mbatuakuatesa nji hagula ajimbilago giamatshidia gia Biblia tudi gualongesa. Yesu wakhalele mukalegela ifezegeselo muabonga diago tangua diakhalele muene mulongesa. Phangi’enji Yakoba nji watshitshile gifua muene. Tutadilenu gifezegeselo gimoshi giahanele Yakoba ha gumona mukunda natshi gidi giabonga.

17. Mukunda natshi tudi muzuela egi gifezegeselo gidi mu Yakoba 1:22-25 gidi giabonga?

¹⁷ Tanga Yakoba 1:22-25. Gifezegeselo gia nganza giahanele Yakoba giana gutukuatesa mu ndaga jiavula. Mu gifezegeselo giene, Yakoba wakhalele mutshigina guzuela egi ha guheta gubonga mu Mbimbi ya Nzambi, tushigo naye phamba guyitanga, uvi tudi naye nji gutumagela ndaga tudi mutanga. Yakoba wahanele gifezegeselo ginyi athu a mu tangua dienji akhalele  mukotelesa muabonga. Gifezegeselo giene gidi muzuelela muthu udi guditala mu nganza. Itshi akhalele mutshigina gulongesa? Gula muthu waditala mu nganza, wamona ndaga adi naye gulondega uvi muene nu guyikalagala ndo, udi gifua muthu waheya. Luholo lumoshi nji, gula tuatanga Mbimbi ya Nzambi nu tuamona ndaga tudi naye gusombegesa uvi esue nu guyikalagala ndo, mbatukhala gifua athu aheya.

18. Ndaga jitshi thathu tudi naye gukalagala tangua tudi muhana gifezegeselo?

¹⁸ Gula tuakalegela gifezegeselo tangua tudi mulongesa, tudi naye gutshita gifua Yakoba. Tudi naye gukalagala ndaga eji thathu: (1) Tudi naye guhana gifezegeselo gidi giabonga, gidi mumonesa haphelo ndaga tudi muzuelela. (2) Tudi naye guhana gifezegeselo athu ajiya gukotelesa muabonga. (3) Tudi naye gumonesa haphelo gula gifezegeselo giene gidi gumulongesa itshi. Gula ushigo mujiya ifezegeselo yabonga ya guhana, tala mu Index des publications des Témoins de Jéhovah, ha fundo diasonegewa egi “illustrations,” mbawumona ifezegeselo yavula wajiya gukalegela. Uvi jiya egi ifezegeselo idi gifua micro, yakotelesa egi yana zola matangi a ndando haphelo gifua luholo micro yana zola dijui. Uvi gula wakalegela ifezegeselo yavula, mbayiwunganesa matangi a athu adi gugutegelela. Hene kalegela ifezegeselo idi muzuelela phamba matangi a ndando a ndaga udi mulongesa. Felela dietu dishigo dia gukamba egi athu atumone egi tuajiya ndaga jiavula, uvi didi dia gulondega luholo luetu lua gulongesa nu gukuatesa athu avula ha gubua akombeledi a Yehowa.

19. Luholo lutshi tuajiya gumonesa egi tuana guzumba aphangi’etu Aklisto?

¹⁹ Yakoba wahetele luendu lua gukhala nu phangi’enji Yesu, muthu watagana. Esue tushigo nu aphangi’etu atagana, uvi tudi nu luendu lua gukombelela Yehowa hamoshi nu aphangi’etu Aklisto a mala nu a akhetu. Tangua tuana gudibungisa nawo hamoshi, tangua tuana kamba gujiya makalegelo awo nu tangua tuana longesa nawo hamoshi, tuana monesa egi tuana guazumba. Gula tuatshita ngolo ha gulandula gifezegeselo gia Yakoba mu matangi etu nu makalegelo etu nu mu luholo luetu lua gulongesa, mbatutumbuisa Yehowa, mbatukuatesa nji athu adi musuanguluga nu giamatshidia ha gusuena hehi nu Tata wetu wa mu dilu.