1. Bici wakaderha okubiyerekire omulala gwabo Yakobo?

 YAKOBO, mulumuna wa Yezu alereragwa omu mulala gwalisêzire kiroho. * Ababusi bage, Yozefu na Mariya bal’izigire Yehova bwenene bananakag’ijira okwabo koshi lyo bamukolera. Yakobo ashagalukire eyindi migisho: abona gurhi mukulu wage akula anahikira aha aba Masiya walaganyizibagwa. Yakobo agwerhe olukengwa lwinja lw’okuba muguma w’ogo mulala!

2. Birhumire bihi Yakobo agwerhe by’okulolerako mukulu wage olwiganyo?

² Yakobo agwerhe ebirhumire binji by’okulolerako mukulu wage olwiganyo. (Mt. 13:55) Kwa lwiganyo, oku myaka 12 Yezu alikola amanyire Amandiko bwinja, ahikira aha asomeza abigiriza b’e Yeruzalemu. (Lk. 2:46, 47) Byanahashikana Yakobo akozire haguma na Yezu omukolo gw’obubinji. Na ntyo ahikira aha amanya mukulu wage bwinja. Kanji-kanji Nathan Knorr akag’iderha ntya: “Wanaciyigiriza binji lugenda muntu mulebe erhi wakakola haguma naye.” * Na kandi Yakobo akagibona gurhi “Yezu akula omu bumanye, omu bushûke n’omu nshokano embere za Nyamuzinda n’embere z’abantu.” (Lk. 2:52) Co cirhumire rhurhanyize oku Yakobo akahikire aha aba muguma w’omu banafunzi barhangiriza ba Yezu. Cikone arhali ntyo ko byabire.

3. Gurhi Yakobo ajijire erhi Yezu arhondera omukolo gwage gw’amahubiri?

³ Omu mango Yezu akag’ijira omukolo gwage hanw’igulu, Yakobo  arhabaga muguma w’abanafunzi bage. (Yn. 7:3-5) Nkaba Yakobo ali muguma w’omu bene wabo Yezu bakag’iderha mpu “asirahire.” (Mk. 3:21) Na ntabyo biyerekine oku Yakobo ali haguma na nnina, Mariya, erhi Yezu anigwa oku murhi gw’amalibuko.​—Yn. 19:25-27.

4. Masomo gahi rhwaganirira?

⁴ Enyuma z’aho, Yakobo aba n’obuyemere muli Yezu anahikira aha aba muntu mukengwa w’omu cigamba c’Ecikristu. Mw’eci cigabi, rhwaganirira masomo abirhi rhwakaciyigiriza kugerera Yakobo: (1) bulya gurhi rhushinganine rhugendekere rhwaba birhohye na (2) gurhi rhwakabamwo bigiriza binja.

5. Gurhi Yakobo ajijire erhi Yezu amubonekera enyuma z’okufûka?

⁵ Mangaci Yakobo abaga mwanafunzi mwishwekerezi wa Yezu? Enyuma za Yezu akufûka, “abonekera Yakobo, abonekera n’entumwa zoshi.” (1 Kr. 15:7) Enyuma z’eyo ntimanano Yakobo aba muguma w’omu banafunzi ba Yezu. Amango entumwa zali omu cumpa c’enyanya e Yeruzalemu amango bakag’ilinda okuhikirira kw’eciragane c’okuhâbwa iroho litagatifu, Yakobo ahali. (Ebj. 1:13, 14) Enyuma z’aho, Yakobo ashagalukira okukola nka muguma w’omu mbaraza eri yalongoza y’omu myaka igana mirhanzi. (Ebj. 15:6, 13-22; Gl. 2:9) Na kasanzi kalebe embere z’omwaka gwa 62 muli Kano Kasanzi Kirhu (K.K.K.), alongozibwa n’iroho litagatifu ly’ayandikira Abakristu bashîge amavurha amaruba. Ene rhwanaciyunguka n’ago maruba, rhube rhugwerhe obulangalire bw’okulama empingu erhi hanw’igulu. (Yk. 1:1) Nk’oku Josephus, historien muguma w’omu myaka igana mirhanzi ayerekine, Yakobo anigagwa erhi Omukuhani Mukulu wakagihamagalwa Ananiya arhegeka oku anigwe. Yakobo agendekera abêra mwishwekerezi kuli Yehova kuhika oku buzinda bw’akalamo kage ka hanw’igulu.

6. Omu njira nci Yakobo ali lubero n’abakulu b’amadîni b’omu mango gage?

⁶ Yakobo ali mwirhohye. Bulya gurhi rhwakaderha ntyo? Olole olubero egarhi k’oku Yakobo ajijire lugenda Yezu n’oku birongozi binji by’amadîni byajijire. Erhi Yakobo abona eby’okumuyemeza n’obwalagale biyerekine oku Yezu ali Mugala wa Nnâmahanga, ayemera n’obwirhohye. Arhali ntyo ko abakulu b’abakuhani bohe bal’iyosire. Kwa lwiganyo, barhakalahire oku Yezu afûzîre Lazaro. Ahali h’okuyemera oku Yezu al’irhumirwe  na Yehova, balonza okuniga Yezu na Lazaro. (Yn. 11:53; 12:9-11) Enyuma z’aho erhi Yezu afûka, bajira ekomplo lyo bafulika ogo mwanzi ly’abantu barhagigumanya. (Mt. 28:11-15) Obucibone bw’abo bakulu b’amadîni bwarhuma balahira Masiya.

7. Bulya gurhi rhushinganine rhuyake obucibone?

⁷ Isomo lici rhukuzire aho: Rhuyake obucibone, rhunagendekere rhwayigirizibwa na Yehova. Nka kula endwala yakahuma oku misi y’omurhima gw’omuntu na buzinda erhume gurhacikole bwinja, ko n’obucibone bwakahuma oku murhima gwirhu gw’olwiganyo na ntyo burhume rhurhacirhumikire obulongozi bwa Yehova. Abafarizeyo bajira emirhima yabo ebe mizibu nk’ibuye na ntyo balahira ebyaliyerekine n’obwalagale oku ebi Yezu akagijira akagibijira kugerera iroho lya Nnâmahanga. (Yn. 12:37-40) Oko kwali kubi bwenene bulya kwarhumire barhabona obuzine bw’ensiku n’amango. (Mt. 23:13, 33) Kuli kwa bulagirire bwenene erhi rhwakagendekera rhwaleka Akanwa ka Nnâmahanga n’iroho lyage bihindule obumuntu bwirhu n’okushumya entanya zirhu n’emihigo yirhu! (Yk. 3:17) Bulya Yakobo ali mwirhohye, akagiyemera ayigirizibwe na Yehova. Na nk’oku rhwayishibona, bulya ali mwirhohye co carhumire aba mwigiriza mulenga.

8. Bici byakarhurhabala lyo rhuhikira aha rhwaba bigiriza binja?

⁸ Yakobo arhasomaga bwenene. Buzira karhinda, abakulu b’amadîni b’omu mango gage bakag’imubona nk’oku bakag’ibona entumwa Petro na Yowane, nka “bantu kwône barhajiraga masomo.” (Ebj. 4:13) Cikone Yakobo aciyigiriza okuba mwigiriza mwinja, nk’oku rhunabona erhi rhusoma ecitabu cihamagalwa okw’izino lyage. Aka Yakobo, nkaba byanahashikana erhi nirhu rhurhasomaga bwenene. Ciru akaba ntyo, kugerera oburhabale bw’iroho lya Yehova n’okukolesa okukomerezibwa rhukomerezibwa n’ikubuliro lyage, nirhu rhwanahikira aha rhwaba bigiriza binja. Rhulole olwiganyo Yakobo alesire nka mwigiriza na masomo gahi rhwakaciyigiriza kugerera olwiganyo lwage.

9. Gurhi wakaganirira enjira ya Yakobo y’okuyigiriza?

 ⁹ Yakobo arhakolesagya enderho nzibu-zibu erhi mahugûlo mazibu-zibu. N’oko kwarhuma abumvirhiza bage bamanye ebi bashinganine bajire na gurhi bakabijiramwo. Kwa lwiganyo, olole enjira nembu Yakobo ayigirizagyamwo Abakristu oku bashinganine babe babidu okulibuka enyanya z’obubule bw’obushinganyanya na buzira kubika karhinda. Ayandika ntya: “Rhunabone abalembire oku bali ba bushagaluke. Mwayumvirhe baderha oku Ayubu alemberaga mwanabwine oluhembo Yehova amuhîre, bulya aba wa buzigire bunji na wa lukogo.” (Yk. 5:11, NWT) Olole oku Yakobo akagilangalira obuhashe bw’Amandiko. Akolesize Akanwa ka Nnâmahanga ly’arhabala abumvirhiza bage babone oku ngasi mango Yehova anakahemba bala bali bishwekerezi kuli Ye aka Ayubu. Yakobo ayigirizize ogo mwanzi omu kukolesa enderho nembu zinayumvikine. Muli eyo njira ashumya abumvirhiza bage basegeze obwenge bwabo kuli Yehova, ci arhali kuli yenene.

10. Omu njira ehi rhwakayigamwo olwiganyo lwa Yakobo amango rhuli rhwayigiriza?

¹⁰ Isomo lici rhukuzire aho: Ojire omwanzi gwawe gube mulembu, onayigirize Akanwa ka Nnâmahanga. Omuhigo gwirhu gurhashinganini gube gwakuyereka abandi bintu binganaci rhumanyire, cikone guba gwakubayereka binganaci Yehova aba amanyire na kunganaci abashibirira. (Rm. 11:33) Rhwanahikira ogo muhigo omu kujira Amandiko gube g’omusingi gw’ebi rhuli rhwaderha. Kwa lwiganyo, ahali h’okubwira abanafunzi birhu b’Ebibliya ebi rhwakajijire oku nafasi yabo, rhwanalonza okubarhabala barhanye oku nyiganyo ziri omu Bibliya n’okuhugûkwa entanya za Yehova n’oku aciyumva. Na buzinda irala ly’okushagalula Yehova lyanabashumya bamukolere, ci arhali lyo barhushagalula.

11. Mazibu gahi Bakristu baguma na baguma b’omu mango Yakobo bakagilwisa, n’ihano lihi abahire? (Yakobo 5:13-15)

¹¹ Yakobo akagiderha ebintu by’okunali biyerekire akalamo. Kugerera amaruba gage, Yakobo ayerekine oku alimanyirire amazibu ababo bemezi bakagilwisa, anabaha obulongozi buyumvikine buyerekine gurhi bakalwisize ago mazibu. Kwa lwiganyo, Bakristu baguma baguma barhakagikolesa amahano. (Yk. 1:22) Abandi bakagiyereka abagale enzigirizi. (Yk. 2:1-3) N’abandi barhakagihasha okukolesa olulimi lwabo bwinja. (Yk. 3:8-10) Abo Bakristu bagwerhe amazibu manene, cikone Yakobo arhabayakaga. Ahâna amahano gage omu njira nyinja cikone y’obwalagale anaha omurhima abantu bagwerhe amazibu g’ekiroho oku bajihûna abagula oburhabale.​—Osome Yakobo 5:13-15.

12. Gurhi rhwakagendekera rhwabamwo n’entanya nyinja amango rhuli rhwarhabala abanafunzi birhu b’Ebibliya?

¹² Isomo lici rhukuzire aho: Obe wakuderha ebintu by’okunali, cikone obe n’entanya nyinja lugenda oku obona abandi. Banafunzi birhu banji b’Ebibliya banaba n’amazibu g’okukolesa ihano ly’Ebibliya. (Yk. 4:1-4) Byanahûna kasanzi kanji lyo baleka enkomêdu zabo mbi n’okuba n’amorhere g’Ecikristu. Aka Yakobo, rhushinganine rhube n’oburhwali bw’okubwira abanafunzi birhu mpindûlo zihi bashinganine bajire. Na kandi rhushinganine rhugendekere rhwaba n’entanya nyinja, omu kulangalira oku Yehova akulula abantu birhohye emwage n’okubaha emisi y’okujira empidûlo omu kalamo kabo.​—Yk. 4:10.

13. Nk’oku biyerekinwe omu lwandiko lwa Yakobo 3:2 n’amahugûlo g’idako, bici Yakobo al’ihugûsirwe?

¹³ Yakobo agwerhe entanya nyinja kuciyerekera. Yakobo arhakagirhanya oku omulala akuliragamwo erhi omukolo agwerhe gumujijire abe wago-wago erhi kumujira abe  wa bulagirire bwenene kulusha bene wabo na bali babo. Ahamagala ababo bemezi “bene [wabo] bazigirwa.” (Yk. 1:16, 19; 2:5) Arhalonzagya okuhâna entanya z’okuyerekana nk’ali mwimana. Lubero n’oko, erhi aderha ezi nderho naye aciderha mulizo, aderha ntya: “Rhunajire amagosa kanji-kanji.”​—Osome Yakobo 3:2, NWT, n’amahugûlo g’idako.

14. Bulya gurhi rhushinganine rhube babidu okuyemera amagosa girhu?

¹⁴ Isomo lici rhukuzire aho: Rhukengere oku rhweshi rhuba banyabyaha. Rhurhashinganini rhukabona oku rhuli enyanya z’aba rhuli rhwayigiriza. Bulya gurhi? Erhi rhwakaha omwanafunzi wirhu w’Ebibliya entanya z’okubona nka rhwehe rhurhajira magosa, anahikira aha arhanya mpu arhakahash’irhumikira amarhegeko ga Nnâmahanga. Erhi rhwakayemera n’obwirhohye oku ngasi mango kurhaba kulembu okukulikira amakanuni g’Ebibliya n’okuhugûla gurhi Yehova arhurhabire rhuhime amazibu girhu, ntyo rhwanarhabala omwanafunzi abone oku naye anahash’ikolera Yehova.

15. Gurhi wakaganirira enyiganyo Yakobo akagikolesa? (Yakobo 3:2-6, 10-12)

¹⁵ Yakobo akagikolesa enyiganyo zakagihuma oku murhima. Buzira karhinda arhabirwe n’iroho litagatifu, cikone nkaba ayizire binji lugenda okuyigiriza omu kuyiga enyiganyo mukulu wage, Yezu akagikolesa. Enyiganyo Yakobo akolesize ziri nembu n’isomo lyakag’irhenga mw’ezo nyiganyo liyumvikine.​—Osome Yakobo 3:2-6, 10-12.

16. Bulya gurhi kuli kwa bulagirire okukolesa enyiganyo nyinja?

¹⁶ Isomo lici rhukuzire aho: Okakolesa enyiganyo nyinja. Erhi wakakolesa enyiganyo zishinganine, abumvirhiza bawe barhakayumva ebi waderhaga byone ci banabona isomo lici bayizire. Wanahira ezo nyiganyo omu bwenge bw’abantu. Ezo nyiganyo zinarhabale abanafunzi bakakengera okuli kw’omusingi kw’Ebibliya. Yezu ali mulenga omu kukolesa enyiganyo nyinja, n’omulumuna Yakobo ayiga olo lwiganyo lwage. Rhuganirire lwiganyo luguma lw’omu nyiganyo Yakobo ahânaga rhunalole bulya gurhi luli lwinja bwenene.

17. Bulya gurhi olwiganyo luganirirwe omu Yakobo 1:22-25 luli lwinja bwenene?

¹⁷ Osome Yakobo 1:22-25. Hali birhumire binji biyerekine oku olwiganyo lw’ecilolero (ciyo) Yakobo akolesagya luli lwinja bwenene. Hali enyigirizo ziyumvikine akagirhanyako,  k’okuderha oku lyo rhuyunguka n’Akanwa ka Nnâmahanga, rhushinganine rhujire binji kulusha okusoma; rhushinganine rhukole kushimbana n’ebi rhuli rhwasoma. Yakobo acishoga okukolesa olwiganyo abumvirhiza bage bakakengire duba-duba, k’okuderha, lwiganyo lw’omuntu oli wacilolera omu cilolero. Isomo lici ayigirizagya? Bwanaba buhwinja erhi omuntu akacilolera omu cilolero, na buzinda abone izinga limuliko cikone abule kulikula. Ko n’oko, bwanaba buhwinja erhi rhwakakasoma Akanwa ka Nnâmahanga, buzinda rhubone akantu rhushinganine rhukubûle lugenda oborhere bwirhu, cikone rhurhajire ntyo.

18. Bintu bisharhu bihi rhushinganine rhujire amango rhwakolesa olwiganyo?

¹⁸ Amango g’okukolesa olwiganyo, wanayiga olwiganyo lwa Yakobo omu kujira ebi bintu bisharhu: (1) Omanyirire erhi olo lwiganyo lupatine n’ebi muli mwaganirira. (2) Okolese olwiganyo abumvirhiza bawe bakahugûkwa duba-duba. (3) Ojire olwiganyo lwawe lurhengemw’isomo liyumvikine. Erhi wakabona oku kuli kuzibu okurhanya oku nyiganyo zishinganine, olole Index des publications des Témoins de Jéhovah. Omu cirhwe cidesire “Exemples,” wanabona nyiganyo nyinji wakakolesa. Okengere oku enyiganyo ko ziba nka mikro, zinasegeze akantu k’obulagirire k’enyigirizo zawe. Co cirhumire okahugûkwa erhi wakolesize olwiganyo lusegize emyanzi mikulu olonzize okuyigiriza. Kobinali, ecirhumire cirhu cikulu c’okukubula obulenga bwirhu bw’okuyigiriza kurhaba kulonza mpu abandi basegeze entanya zabo kuli rhwe, cikone kuba kurhabala bantu banji nka bihashikine babe baguma b’omu mulala gwa Yehova gw’obushagaluke.

19. Gurhi rhuyerekanamwo oku rhushagalukire omulala gwirhu gw’ekiroho?

¹⁹ Rhurhasag’iba n’olukengwa lw’okukola haguma na mukulu wirhu oli mwimana, cikone rhugwerhe olukengwa lw’okukolera Yehova omu mulala munene gw’ekiroho gwa bene wirhu na bali birhu. Rhunayerekane oku rhubazigire omu kucilunga haguma nabo, omu kuciyigiriza binji kugerera olwiganyo lwabo, n’omu kukola haguma nabo n’obwishwekerezi omukolo gw’okuhubiri n’okuyigiriza. Erhi rhujira okwirhu koshi lyo rhuyiga olwiganyo lwa Yakobo omu ntanya zirhu, omu lugenzi n’oku rhuyigirizamwo, rhunalerhere Yehova irenge na kandi rhunarhabale abantu birhohye bayegere Larha wirhu w’obuzigire w’omu mpingu.