1. Kosipisoyɛ wopo w’oyalaki nkfumbo kɛ Djakɔbɔ?

 DJAKƆBƆ, ankfunɛ Yeso, afulaka lá nkfumbo keyalaki la lonyuma lɔ wolo efula. b Ambotshi wande Yosɛfu nya Mariya, wakɔpaki Yehova efula la wananghaki kenkfumɔ k’iyakokaka nangha djɛ ndokambela. Djakɔbɔ ayalaki l’ɔtshɔkɔ onkina, mama kɛnde kɛ mpame ayɛka ndokoma Mesiya. Ɔsɔngo mpeyi kɛ wɔlɔ kewayisa Djakɔbɔ kɛ ndjala lá nkfumbo kɛ nghɔsɔ!

2. Donga djɛkɔnge djeyalisa la Djakɔbɔ djɛ nɛmɛyɛ wɔnanyɔ wɔnde?

² Djakɔbɔ ayalaki la donga efula djɛ ndjeka akambo me mama kɛnde. (Mat. 13:55) Ndjɔmbɔmba, Yeso ewaki Afunelo wɔlɔ djɛkondeke l’ɛnɔnyi 12, nde akamoyɛka wetsha welá Jerusalɛmɛ. (Luka 2:46, 47) Mbala imɔtshi Djakɔbɔ akambaka esanga nya Yeso l’isambo y’awaya. Djɛkondeke, nde akokaka ndjewa wɔnanyɔ wɔnde wɔlɔ wɔlɔ. Nathan H. Knorr atepelaki mbala la mbala ante: “Wɛ nkoka ndjeka akambo efula walendana l’onto ɔmɔtshi winá w’okambɛ esanga nyape.” c Lonkina Djakɔbɔ akokaka nsipisoyɛ ante ‘Yeso atafulaki lá balo lá demba edjinge atapomanaki la lokolo lɔ wɔlɔ lá wiso wa Ndjambe la w’anto.’ (Luka 2:52) Djɛkondeke iso nkoka nkanela ente Djakɔbɔ ayalaka onto wɔ ntondo w’okokisa nkoma ombeki wɔ Yeso. Koko nkambo djɛsɔ ntananghema nghɔsɔ.

3. Djakɔbɔ ndanange mo winá wɔ Yeso ndawange olemo w’ipoposanyɛ?

³ L’ilá k’olemo wɔ Yeso lanɛ lá looko, Djakɔbɔ atakoma ombeki wɔnde. (Dj. 7:3-5) Mbala imɔtshi, Djakɔbɔ ayalaka l’anteyi kɛ boto djɛ Yeso djɛfɛnyisa ambɔ nde ‘ambokoma okadji.’ (Mar. 3:21) Edjinge lako nkambo dj’ɛnyɛ ente Djakɔbɔ  ayalaka nya nyɔ kɛwɔ Mariya, winá w’iyapanyɛ Yeso l’otamba wɔ ndjolo.—Dj. 19:25-27.

4. Elakanyelo wɛkɔnge wɔkɔpaso nshishima?

⁴ L’ɔkɔngɔ, Djakɔbɔ ayɛka ndoyala la djawo te Yeso ko akomaka ikokolo y’iyalɛmɛyɛka l’otshumano w’Akristo. Lá djamba djɛnɛ, tɔngɛna elakanyelo epe w’okokaso mba me Djakɔbɔ: 1) lamo oyɛso ladjɛ ndjala l’okitshakitshɛ 2) wopo wokokaso nkoma wetsha wɛ wɔlɔ.

5. Wopo wɔkɔnge Djakɔbɔ ndeelola winá wɔ Yeso ndɛnama lende m’ɔkɔngɔ w’ekfundwelo kɛnde?

⁵ L’etena kɛkɔnge Djakɔbɔ ndookomaka ombeki wɔ Yeso wɔ nkɔmano? M’ɔkɔngɔ wɔ Yeso nkfundɔ má nyɔyi, ‘nde ɛnamaka le Djakɔbɔ ko masɔ le apɔstɔlɔ ankfumɔ.’ (1 Kɔ. 15:7) M’ɔkɔngɔ wɔ nde nyɛnana nya Yeso, Djakɔbɔ akomaka ombeki wɔnde. Nde ayalaka l’eteyi winá wɔ apɔstɔlɔ yakongaka nyuma k’ekina k’iyaalake lá mvulu kelá djiko lá Jerusalɛmɛ. (Ele. 1:13, 14) M’ɔkɔngɔ, Djakɔbɔ ayɛka ndoyala l’osasa wɔ nkamba etengo ose iloyi yɛlɔndjɛ l’ɛtɛndɔ kɛ ntondo. (Ele. 15:6, 13-22; Nga. 2:9) Edjinge lá mbamba kɛmɔtshi lá ntondo k’ɔnɔnyi 62 D.D., nde atshindamaka má nyuma k’ekina djɛ mfunela Akristo w’ankfutami onkanda ɔmɔtshi. Onkanda wɔsɔ wolekɔ djonyi edjinge leso lɔɔko kɛnɛ, ayale kaanga nkongi djɛso oyɛwɔnde djɛ ntowika l’olongo kana lá looko. (Dja. 1:1) Lá nkilika Joseph ondjewi ɔmɔtshi wɔ wamba wɔ l’ɛtɛndɔ kɛ ntondo, Djakɔbɔ ayakemaka má lotshungɔ lɔpɛyisa Nkfundji k’ekekete k’ose Juda k’iyetaka Ananiya w’ilɛngɛ. Djakɔbɔ atshikalaka la nkɔmano te Yehova tii l’ekomo kɛ lowiko lɔnde lanɛ lá looko.

6. Lá wopo wɔkɔnge Djakɔbɔ ndatshikitana l’ewandji wɛ ntolo wɛ l’etsho wɛnde?

⁶ Djakɔbɔ ayalaki l’okitshakitshɛ. Lamo okokaso ntepela nghɔsɔ? Tokolenda otshikitano woyalisa l’antenyɛ wopo wɔ Djakɔbɔ ndoyelolaka l’ɔkɔngɔ te Yeso la wopo w’ewandji wɛ ntolo efula iyelola. Winá wɔ Djakɔbɔ ndɛnyi tolembetelo tɔnsɔsɔlɔ t’ɛnyɛ djɛ Yeso alekɔ Wɔna Ndjambe, l’okitshakitshɛ onkfumɔ nde atateyɛka ndjala la djawo tende. Koko ewandji wɛ ntolo welá Jerusalɛmɛ watanangha nghɔsɔ. Ndjɔmbɔmba, iwɔ watanghana ambɔ Yeso akfundolaka Lazaro má nyɔyi. Koko l’edjena kɛ nkambo djɛsɔ ndatshinda dj’iwɔ ndjawola ambɔ Yeso ndayalakande Ontomami wɔ Yehova, iwɔ wahonakande ndjaka Yeso edjinge Lazaro. (Dj. 11:53; 12:9-11) L’ɔkɔngɔ, winá wɔ Yeso ndakfundɔ má nyɔyi, iwɔ watshɔka nkfuko djɛ ndjisa anto nkambo djɛ nsɔsɔlɔ djɛsɔ.  (Mat. 28:11-15) Otako w’ewandji wɛ ntolo wɛsɔ wokomɛka anto djɛ ntona Mesiya.

7. Lamo oyɛso ladjɛ ndjewɔ otako?

⁷ Olakanyelo w’owaso: Totone otako, koko toyale entshupa djɛ ndakanyema me Yehova. Ngo ngete olando okokawɔ nkomɛ oloko w’onto djɛ ndjala l’okakasano wɔ nkamba, otako nkoka ntshita oloko wɔso wɔ djingingi la ntokomɛ dj’ipa nɛmɛyɛ ɛlɔndjɛlɔ kɛtɔpɛyɛ Yehova. Afarisɛ w’awolaka djɛ eloko wɛwɔ nkoma wolo efula ko watonaka tolembetelo tɛnyɛki papoo ambɔ Yeso ayalaki la nyuma kɛ Ndjambe edjinge Nde ndeke loyakaki Wɔna Ndjambe. (Dj. 12:37-40) Otako wɔwɔ wɔsɔ woyalaka nyɛtshi efula mande kɛsɔ k’akomɛka dj’iwɔ nsamba lowiko l’etshinda. (Mat. 23:13, 33) Ape alekɔ djonyi efula iso nkindjɛ ndjawola dj’Otepala wɔ Ndjambe la nyuma kɛnde ndɔngɔsɔla lonto lɔso la ntotshinda djɛ ndjala l’ekanedji kɛ wɔlɔ la djɛ ndɔsa akano w’okana l’ɛkɔpa kɛ Ndjambe! (Dja. 3:17) Mande Djakɔbɔ ayalaki l’okitshakitshɛ nde awolaka ndakanyema me Yehova. Edjinge, etengo, sɔngɛna, m’ɔtɛ w’okitshakitshɛ wɔnde ndeke ndookomaka wetsha wɔ wɔlɔ.

8. Kɛkɔnge kengotokotshɛ djɛ nkoma wetsha wɛ wɔlɔ?

⁸ Djakɔbɔ atingela nkalasa efula. Ape l’ehamo ewandji wɛ ntolo wɛ l’etsho wɛnde wɔwɔsaki etengo iyɔsaka ɔpɔstɔlɔ Pɛtɛlɔ nya Djɔanɛ, etengo ‘wanɛ wapewe onkanda l’anto ng’anto.’ (Ele. 4:13) Koko Djakɔbɔ ekaka djɛ ndjala wetsha wɔ wɔlɔ, etengo ɛnaso winá w’owalaso onkanda wolekɔ la djiina djɛnde. Ngo ngete Djakɔbɔ, nkonka ndjala edjinge iso totingela nkalasa efula. Ayale kaanga nghɔsɔ, m’okotshɔ wɔ nyuma kɛ Yehova la k’okfumbelo w’owaso m’olonghanyelo wɔnde, iso nkoka nkoma wetsha wɛ wɔlɔ. Nyontshɔ tokolenda ndjɔmbɔmba kɛ Djakɔbɔ ndatotshikela etengo wetsha la tolende elakanyelo w’okokaso mba m’eteyi.

9. Okokɛ ntepela nge lá wopo wɔ Djakɔbɔ ndalakanyɛka?

⁹ Djakɔbɔ atakambaki la totepela tɔ wolo kana la tokanyi tɔ wolo. Eposelo weyalisa la nkambo djɛsɔ nde, anto w’owekameyɛki wewaki kɛnɛ k’iyayale ladjɛ nangha la wopo wɔ nangha. Ndjɔmbɔmba, kolenda yopo yɛ wɔdju yɛ Djakɔbɔ ndalakanyɛ, yɛ Akristo oyɛwɔ ladjɛ ndjala entshupa djɛ nkfulumeyɛ wayi wa ntshamba djɛ sii ipa la mbomba onkomba. Nde  afunaka ante: ‘Iso ndɔsaka wanɛ wakfulumeyɛ ente, walekɔ l’osasa. Nyo nyokaka nkambo djelendana l’okfulumeyelo wɔ Djɔbɔ la nyɔmbɛna má wopo wɔ Yehova ndɔtshɔkɔla ente, Yehova alekɔ la ngandji k’efula edjinge la nkɛtshi.’ (Dja. 5:11) Tokote ente Djakɔbɔ aposɛki elakanyelo wɛnde má Afunelo. Nde akambaki l’Otepela wɔ Ndjambe djɛ nkotshɛ wanɛ wowekameyɛki, djɛ nyɛna ambɔ Yehova ntshɔkɔlaka winá enkfumɔ wanɛ walekɔ la nkɔmano tende, etengo Djɔbɔ. Djakɔbɔ alakanyɛki má nkamba la totepela tɔ wɔdju la tɔ djɔ. Lá lɛdji lɔsɔ, nde asepaki tokanyi t’anto ape tende nyɔmɛlɛ koko te Yehova.

10. Yopo imɔtshi yɛkɔnge y’okokaso ndjokola Djakɔbɔ winá w’olakanyɛso?

¹⁰ Olakanyelo w’owaso: Losango lɔso lokindjɛ ndjala wɔdju, la toposɛke elakanyelo wɛso ngo m’Otepela wɔ Ndjambe. Okoma wɔso w’otayalake wɔ nkamoyɛ anto má wopo w’ewaso akambo efula, koko woyalende wɔ ndaakamoyɛ lá wopo wɔ Yehova ewande akambo efula, la wopo w’oyakiyanyɛnde efula lá nkambo djɛwɔ. (Ɔrɔ. 11:33) Iso nkoka nkotshɛ okoma wɔsɔ má ndakanyɛka ngo kɛnɛ kelekɔ l’Otepela wɔ Ndjambe. Ndjɔmbɔmba, l’edjena kɛ nshimela ambeki waso wa Bible kɛnɛ k’otakokaso nangha l’edjena kɛwɔ, iso ladjɛ ndaakotshɛ djɛ ntɔnɔla lá ndjɔmbɔmba yelá Bible la nsipisoyɛ ekanedji kɛ yimba kɛ Yehova edjinge wopo wɔ oyawokande lá nkambo djɛkɔ. Má nangha nghɔsɔ iwɔ wangoyala la mposɛ kɛ nsasangɛ Yehova, koko ape iso.

11. Ekakasano wɛkɔnge weyalaki la Akristo wá l’etsho wɛ Djakɔbɔ, ko alako wakɔnge wa ndaapɛyɛ? (Djakɔbɔ 5:13-15)

¹¹ Djakɔbɔ ɛnaki akambo la ntsho djɛ wɔlɔ. Nyɛnamaka m’onkanda wɔnde ente, Djakɔbɔ ewaki ekakasano wepomanaki la winande andjawodji edjinge nde ápɛyɛka ɛlɔndjɛlɔ k’okama papoo lá wopo w’okokawɔ ndongela ekakasano wɛkɔ. Ndjɔmbɔmba, Akristo amɔtshi wayalaki l’okakasano wɔ nkamba l’alako. (Dja. 1:22) Ankina walekaki ndapɛyɛ ngo te ase okfudji. (Dja. 2:1-3) Ankina lonkina wayalaki l’okakasano wɔ ndjapamela nemi yɛwɔ. (Dja. 3:8-10) Akristo wasɔ wayalaki l’ekakasano wɛ nkekete efula, koko Djakɔbɔ ataapekɔ. Nde ápɛyɛka alako wa la ngandji, koko ipa la ntɔma ɔlɔmɔ, la akembɛka wanɛ wayalaki l’ekakasano lá nyuma djɛ mpona okotshɔ wɔ tokokolo.—Wala Djakɔbɔ 5:13-15.

12. Wopo wɔkɔnge w’okokaso nama ikanyi yɛ wɔlɔ winá w’okotshɛso ambeki waso wa Bible?

¹² Olakanyelo w’owaso: Ɛna akambo la ntshó djɛ wɔlɔ, kindjɛ ndjala l’ikanyi yɛ wɔlɔ lá nkambo dj’anto ankina. Efula kɛ wanɛ weka laso Bible nkoka ndjala l’okakasano wɔ nkamba l’alako w’ekawɔ. (Dja. 4:1-4) Nkoka ndɔsa ndambo k’etsho dj’iwɔ ndjopa losambi la nanghedji djɛwɔ djɛ mbindo ko ndjala la wekeka w’Okristo. Lá ndjɔmbɔmba kɛ Djakɔbɔ, iso ladjɛ ndjala l’oloko wolo djɛ nshimela ambeki waso akambo w’oyɛwɔ ladjɛ ndɔngɔsɔla. Koko lonkina, iso ladjɛ ndjala l’ikanyi yɛ wɔlɔ, má ndashikikɛ ente Yehova angosepa anto w’okitshakitshɛ tende ko angapɛyɛ wolo dj’iwɔ nangha etshikitano lá mbiko yɛwɔ.—Dja. 4:10.

13. Etengo Djakɔbɔ 3:2 edjinge nɔtɛ ɛnyɛwɔ, kɛkɔnge kɛ Djakɔbɔ ndasipisoyɛka?

¹³ Djakɔbɔ alamaka ikanyi y’ɛdje lá nkambo djɛnde nyɔmɛlɛ. Djakɔbɔ atayawɔsaki etengo onto wɔ djonyi efula kana ndawila lá djiko djɛ wananyɔ l’ankaana yɛnde m’ɔtɛ wɔ nkfumbo k’indafule kana edjito weyalaki lande. Nde etaki winande andjawodji ante ‘anyanghɛmɔko yɛ ngandji.’ (Dja. 1:16, 19; 2:5) Nde atɛnyɛki anto ante nde alekɔ onto wɔ djɔ. Koko, nde ayawilaka l’eteyi winá wɔ ndatepela etepela wɛnɛ: ‘Isankfumɔ nanghaka evunga mbala efula.’—Wala Djakɔbɔ 3:2, edjinge nɔtɛ.

14. Lamo oyɛso ladjɛ ndjala entshupa djɛ ndjawolaka evunga wɛso?

 ¹⁴ Olakanyelo w’owaso: Tovungɔke ente isankfumɔ tolekɔ ananghi y’evunga. Totakanelake ente iso ndeka wanɛ wolakanyɛso lá yopo imɔtshi. Lamo? Ntsha iso ntshinda ambeki waso djɛ nkanela ambɔ iso topananghaka evunga, iwɔ nkokaka ndɛmba mande wangokanela ambɔ wapangoyala l’akoka wa nɛmɛyɛ ɛlɛmbɛ wɛ Ndjambe lá lɛdji lɔ djɔ. Koko winá w’awolaso la nkɔmano nkfumɔ ente apayalaka wɔdju leso winá enkfumɔ djɛ nkilika tɔkfɔ telá Afunelo, edjinge asipisoyɛso wopo wɔ Yehova ndatokotshɛ djɛ ndongela ekakasano wɛso, tongokotshɛ ambeki waso dj’iwɔ nyɛna ambɔ iwɔ nkoka nkambela Yehova.

15. Okokɛ ntepela mo lá kɛnɛ kelendana la ndjɔmbɔmba yɛ Djakɔbɔ ndakambaka la yɛkɔ? (Djakɔbɔ 3:2-6, 10-12)

¹⁵ Djakɔbɔ akambaki la ndjɔmbɔmba yekota eloko. Ape l’ehamo nyuma k’ekina k’okotshɛki, koko lonkina nde ekaka akambo efula lá kɛnɛ kelendana la wopo wɔ ndakanyɛ má ndjeka ndjɔmbɔmba yɛ mama kɛnde Yeso, ndakambaka la yɛkɔ. Ndjɔmbɔmba yekambisa la Djakɔbɔ l’onkanda wɔnde yelekɔ wɔdju, edjinge elakanyelo wim’eteyi ndjokamaka papoo.—Wala Djakɔbɔ 3:2-6, 10-12.

16. Lamo oyɛso ladjɛ nkamba la ndjɔmbɔmba yɛdje?

¹⁶ Olakanyelo w’owaso: Kambaka la ndjɔmbɔmba yɛdje. Winá w’okambɛ la ndjɔmbɔmba yɛdje, anto wakekameyɛ wapangowa ngo elekanyelo toko, koko wangoyala etengo anto wɛna olakanyelo wɔkɔ la wiso. Ndjɔmbɔmba yɛsɔ yengokotshɛ wanɛ wakekameyɛ djɛ mvungɔka akambo wa djonyi wemá Bible. Yeso akambaki wɔlɔ la ndjɔmbɔmba yɛdje, edjinge wɔnanyɔ kɛnde Djakɔbɔ owokolaka. Nyontshɔ tokoshishima ndjɔmbɔmba kɛmɔtshi kɛ Djakɔbɔ, la tolende lamo okokaso ntepela ente kelekɔ djɔ.

17. Lamo ndjɔmbɔmba kelekɔ lá Djakɔbɔ 1:22-25 oyɛwɔ ndjɔmbɔmba kɛdje?

¹⁷ Wala Djakɔbɔ 1:22-25. Ndjɔmbɔmba kɛ Djakɔbɔ k’ilendjeyɛ kelekɔ ndjɔmbɔmba k’ɛdje m’ɔtɛ wɔ donga efula. Nde alakanyɛka olakanyelo ɔmɔthi wɔ kɔɔ, olakanyelo wɔkɔnde, djɛ mba wapɔ m’Otepela wɔ Ndjambe topakoke nkoma ngo lá ndowalaka toko, koko iso ladjɛ nkambaka la kɛnɛ k’owalaso m’eteyi. Djakɔbɔ asɔnaka ndjɔmbɔmba kɛ anto wowekameyɛ okokawɔ nsipisoyɛ lankeke, ndjɔmbɔmba  kɛkɔnde, onto woyashishima lá ilendjeyɛ. Olakanyelo wɔkɔnge ndakɔpɛ mpɛyɛ? Angoyala nkambo dj’enkesa ntsha onto woyashishima l’ilendjeyɛ ambɛna ikɔkɔmɔ y’okokande ndɔngɔsɔla, koko apananghe kaanga djoyi. Wopo wɔk’ɔmɔ ndeke, angoyala nkambo dj’enkesa ntsha winá w’owalaso Otepela wɔ Ndjambe, tɔmbɛna nkambo mɔtshi dj’oyɛso ladjɛ ntshikitanyɛ lá kɛnɛ kelendana la lonto lɔso, ko topananghe kaanga djoyi.

18. Akambo asato wakɔnge w’oyɛso ladjɛ nangha winá w’okambaso la ndjɔmbɔmba?

¹⁸ Winá w’okambɛ la ndjɔmbɔmba kɛmɔtshi, wɛ nkoka ndjokola Djakɔbɔ má nkamba l’akambo asato wanɛ: 1) Yashikikɛ ente ndjɔmbɔmba k’ɔkɔpɛ mpɛyɛ k’okana l’ikanyi y’osawolanyo. 2) Kamba la ndjɔmbɔmba kekoka ndjala wɔdju le anto wakekameyɛ djɛ nsipisoyɛ. 3) Ɛnyɛ lá yopo yokama papoo wopo w’okokawɔ nkamba lá ndjɔmbɔmba kɛkɔ. Ntsha ongoyalake l’okakasano djɛ wɛ mba ndjɔmbɔmba yɛdje, lenda Index des publications des Témoins de Jéhovah. Okoka ntana ndjɔmbɔmba efula y’okokɛ nkamba la yɛkɔ, l’itɛ yɛ djoyi yetepela ante “Ndjɔmbɔmba.” Koko vungɔka ente, ndjɔmbɔmba ilekɔ etengo mikro, yengokotshɛ anto wakekameyɛ dj’iwɔ ndeka nsipisoyɛ kɛnɛ k’olakanyɛ. Djɛkondeke yashikikɛ djɛ mpɛyɛ ngo ndjɔmbɔmba kɛngɔpɛyɛ olakanyelo wɔfɔna la kɛnɛ k’ɔkɔpɛ ndakanyɛ. Lá nsɔsɔlɔ, elonga keleka djonyi k’ohonaso ndɔngɔsɔla yopo yɛso yɛ ndakanyɛ, apalekɔ djɛ nsepa ikanyi y’anto teso, koko oyɛwɔnde djɛ nkotshɛ anto efula djɛ ndɔsa opiko lá nkfumbo kɛ Yehova.

19. Wopo wɔkɔnge w’okokaso nyɛnyɛ ente iso nsasangaka la nkfumbo kɛso kelá nyuma?

¹⁹ Totawa mpenyi kɛ mfula lá nkfumbo kɛmɔ la wɔnanyɔ wosɔ ɔmɔtshi wolekɔ djɔ, koko towaka mpeyi kɛ nkambela Yehova esanga lá nkfumbo k’ekekete kɛ wananyɔ l’ankaana y’Akristo. Iso nyɛnyɛka ente iso ndawokaka ngandji má nsanghanaka lawɔ, má ndjeka akambo mewɔ, la nkamba mpɛka la mpɛka lawɔ l’olemo w’ipoposanyɛ la wɔ ndakanyɛ. Winá w’onanghaso la wolo djɛ ndjokola ndjɔmbɔmba kɛ Djakɔbɔ lá djalelo, nanghedji, la lá yopo yɛso yɛ mpoposanyɛ, iso mpɛyɛka Yehova lomo edjinge iso nkotshɛka anto w’eloko wɔlɔ djɛ ndasukanyɛ la Papa kɛso kɛ ngandji kel’olongo.