1. We kupatuula naminyi pabitale kifuko kia Shake?

 SHAKE mukuabo na Yesu, badi mukudile mu kifuko kinyingie mu kikudi. * Baledi baye Yosefe na Mariya, babadi bafule Yehowa ngofu na babadi abekitshisha na muabo moso bua kumufubila. Shake bapetele ingi miabi​—nsaa ibafikile tuutu aye abadi mukule naye pamune bu Mesiya mulayibue. Shake badi na muabi ukata wa kutandikua mu kiakia kifuko!

2. Tubingilo kinyi tubadi na Shake tua kufula tuutu aye?

² Shake badi na tubingilo tuibungi tua kufula tuutu aye. (Mat. 13:55) Bu kileshesho, Yesu pa balombeshe bipua 12, badi muukie bifundue kalolo badi akanyisha mpa na balongieshi ba mu Yelusalema, aku namu babadi balongie kalolo. (Luk. 2:46, 47) Pangi Shake badi afubu na Yesu mu mudimo wa kuse mabaya pa muanda wa bino badi mufikie mu kuiuka tuutu aye kalolo. Nathan H. Knorr bakuile’shi: “We kuiuka bi muntu kalolo nka nsaa yofubu naye pamune.” * Biabia Shake tabadi mulombene penda kukuasha nya, anka badi alamiina mushindo ubadi aukitshi Yesu mianda “Yesu badi akulu mu kinangu na mukishisa na mulomgamine Efile Mukulu na bantu.” (Luk. 2:52) Pa muanda wa bino tui balombene kunangushena’shi Shake badi umune aku balongi ba Yesu ba kumpala. Anka ta bibadi bino nya.

3. Shake bakitshine kinyi nsaa ibabangile Yesu mudimo wa bulungudi pa nsenga?

³ Yesu pabadi akitshi mudimo wa bulungudi pano pa nsenga,  Shake ta muikale bu mulongi aye nya. (Yo. 7:3-5) Muanda Shake badi umune a ku bakuabo babadi abamono Yesu bu “bashimiisha kinangu.” (Mak. 3:21) Na takui kintu su nkimune akilesha’shi badi na nyin’aye Mariya, nsaa ibabadi abakokola Yesu ku mutshi bua kumuipa nya.​—Yo. 19:25-27.

4. Malongiesha kinyi atukataluula?

⁴ Kunyima kua mafuku, Shake badi mukumine mui Yesu na aye kufika muntu a kunemeka mu kakongie ka bena Kidishitu. Mu uno muisambo atukataluula malongiesha abidi atudi balombene kulongiela kui Shake: (1) buakinyi abitungu tushale beyishe na (2) mu mushindo kinyi watudi balombene kuikala balongieshi bebuwa.

5. Shake bakitshine naminyi nsaa ibamumuenekiele Yesu kunyima kuaye kusanguka?

⁵ Shake bafikile mulongi a Yesu nsaa kinyi? Kunyima kua Yesu kusanguka ku lufu, “bamuekiele Shake, akupu kui batumibua boso.” (1 Kod. 15:7, Esambi Dipya 2015) Kunyima kua kufumankana na Yesu, Shake bafikile mulongi aye. Nsaa ibadi batumibua mu kadimbo ka kuiilu mu Yelusalema abatengiela kikudi kibabadi bebalee, Shake badi muanka. (Bik. 1:13, 14) Na dingi, Shake badi mupete muloo wa kufuba bu muina kasaka ka bakunkushi bakulu ka mu siekele a kumpala. (Bik. 15:6, 13-22; Nga. 2:9) Kumpala kua kipua kia 62 bino bipungo bietu (B.B.), Shake badi muyokielue buadia kufundila bena Kidishitu bedibue muimu mukanda. Wawa mukanda uki nka na muulo kuatudi lelo uno, sunga tuekala na lukulupilo lua kuenda muiyilu, sunga lua kushaala pa nsenga. (Shak. 1:1) Muyile mungi muina Yunda auku mianda ya kala abetanyina bu Flavius Josèphe, a mu siekele a kumpala bafundile’shi, Shake babadi bamuipe ku matalua a ungi tshite-muakuidi mukata a mu Yunda ababadi abetayina bu Anne le Jeune. Shake bashele nka na lulamato kui Yehowa mpa na pabadi mufudishe luendo waye wa pa nsenga.

6. Shake badi muilekene na bakata ba bipuilo ba mu mafuku aye naminyi?

⁶ Shake badi muiyishe. Buakinyi tui balombene kuakula biabia? Tutaluuleyi kuilekena kui pankatshi pa Shake, mushindo ubadi mukite pabitale Yesu na bibadi bikite namu bakata ba bipuilo bebungi. Nsaa ibapetele Shake bishinkamisho abilesha’shi Yesu Muana a Efile Mukulu, beyishishe na aye kukumina muadi. Anka ba tshite-muakuidi bakata ba mu Yelusalema tababadi bakite bino nya. Bu kileshesho, tababadi balombene kupela’shi Yesu ta musangule Lazare ku lufu nya. Pamutue pa kuuka’shi Yesu badi alesha mpala ya Yehowa, abo babadi abakimbi bia kuibepa boso babidi, Yesu na Lazare.  (Yo. 11:53; 12:9-11) Anka pa basangukile Yesu nabene ku lufu, babakimbile bua’shi bafie wawa muanda tala bantu beuuka. (Mat. 28:11-15) Kuitatula kua bano bakata boso ba bipuilo kubadi kuibatakule mu kupela Mesiya.

7. Buakinyi abitungu tulekie kuitatula?

⁷ Dilongiesha: Tuekalanga na kuitatula, kumina Yehowa a kulongieshe. Nka bilombene mishila ya kuisimba ina maladi kukutshishua eshimba kufuba kalolo, nyi bilombene namu kuitatula kukutshishua eshimba dietu dia mu kinfuanyi kukumina buludiki bua Yehowa. Ba Fadiseo babadi na kuitatula babapelele pa butooka kutundula bishinkamisho abilesha’shi Yesu badi na kikudi ki’Efile Mukulu na’shi badi Muana a Efile Mukulu. (Yo. 12:37-40) Kuno kuitatula ku badi masaku akata muanda kubadi kuibakutshishue kupeta muwa wa ikalayika. (Mat. 23:13, 33) Biabia bina muulo tutungunukie na kulekiala Eyi di’Efile Mukulu na kikudi kiaye bua’shi kituludikie, mu ngielelo etu a binangu na mu bitshibilo biatuata! (Shak. 3:17) Pa muanda wa’shi Shake badi muiyishe badi mukumine kulongieshibua na Yehowa. Na dingi, nka bu biatukebimono pa muanda wa’shi badi na kuiyisha badi mufikie mulongieshi ebuwa.

8. Nkinyi akiketukuasha buatudia kuikala balongieshi bebuwa?

⁸ Shake tabadi mulongie tulasa tukata nya. Bakata babipuilo ba aa mafuku aye, kushi mpaka babadi abamumono mushindo umune ubabadi abamono Mpyele mutumibua na Yowano​—bu “bantu bashi balongye mukanda na bu be bu bantu booso bisumanga.” (Bik. 4:13) Shake balongiele biadia kuikala mulongieshi ebuwa, anka bia tuibishinkamisha nsaa ya tubadika mukanda wina eshina diaye. Anka bu Shake tui kuikala balongie bipela. Sunga biekala biabia ku bukuashi bua kikudi kia Yehowa na mianda ya betulambukisha kui ndumbuluilo aye, n’atue namu tui kuikala balongieshi bebuwa. Tutaleyi kileshesho kia Shake kiadi muitulekiele bu bibadi mulongieshi ebuwa na tumone malongiesha atudi balombene kui kulongiela.

9. Mushindo kinyi odi mulombene kulesha mushindo ubadi aulongiesha Shake?

⁹ Shake tabadi mufubishe bishima bi bukopo sunga binangu bisha bipushika nya. Bu kipeta, bantu babadi abamutemesha babadi balombene kuuka kiabadia kukita na mushindo wa kuibikita. Bu kileshesho, badi mulongieshe mu mushindo  upelepele’shi bena Kidishitu mbalombene kunyingila na kukutua kua kululama kushi kufitshila bangi munda. Bafundile’shi: ‘Talangayi atwakula’shi kwi baaba abakankamana na lwishinko nubapushishe abakula mwanda wa lwishinko lwa Yoobo nubamwene bibamupele Yehowa kunfudiilo, kuuka’shi Yehowa muule ndaa na kifulo na lusa.’ (Shak. 5:11, Esambi Dipya 2015) Malongiesha a Shake abadi alongiesha bakuabo abadi emene mu bifundue. Badi afubisha Eyi di’Efie Mukulu bua kukuasha bantu babadi abamutemesha bua’shi baukie’shi misuusa yoso’shi Yehowa afutaa bantu bena lulamato kuadi, bu Yoobo. Shake badi atusha malongieshi mu bishima bibofule na abipushika kalolo. P’aye kukita biabia, tamukakie binangu bia bantu kuadi aye nabene nya, kadi badi muibikakie kui Yehowa.

10. Tui balombene kuambula Shake nsaa ya tulongiesha mushindo kinyi?

¹⁰ Dilongiesha: Longiesha mu mushindo upeelepeele, na malongiesha obe ekale aatukila mu’Eyi di’Efile Mukulu. Kepatshila ketu ta nka kukanyisha bantu na mushindo watuuku mianda i bungi nya, kadi mbua kukanyisha bantu pabauku mianda ayiuku Yehowa na pabauuku mushindo webapasukila. (Lom. 11:33) Atulombasha kano kepatshila ketu nsaa yoso yatuakula mianda imene mu bifundue. Bu kileshesho, pamutue pa kulungula balongi betu ba Bible mianda ya tukiebe kukita pa mbalo yaabo, tui balombene kui bakuasha buabadia kunangushena ku bileshesho bia mu Bible na buabadia kuuka bi binangu bia Yehowa na biapusha. Paapa abakatamisha lukalo luabo lua kusankisha Yehowa, kushi kuitusankisha atue.

11. Nkalakashi kinyi ibabadi abanyingila kui bena Kidishitu ba mu mafuku a Shake, na elango kinyi dibadi muibape? (Shake 5:13-15)

¹¹ Shake badi alombasha kibadi akula. Mu mukanda waye badi muukie’shi bakuabo balume na bakashi bakuete abanyingila nkalakashi, na badi muibape buludiki bua mushindo wabadi balombene kuiyikambila. Bu kileshesho, bangi bena Kidishitu babadi na lotoolo lua kutumikila dino elango. (Shak. 1:22) Bangi namu babadi abalesha ntondo pakukitshina ba mpeta mianda ibuwa. (Shak. 2:1-3) Bangi dingi, babadi na ngakuilo e bubi. (Shak. 3:8-10) Bano bena Kidishitu boso babadi nka na mianda i bukopo, anka Shake badi nka na lukumino’shi mbalombene kushintuluka. Badi mutushe dino elango na kalolo, kadi pa butooka na kunyingisha bano boso babadi na nkalakashi ya mu kikudi biabadi balombene kukimba bukuashi kui bakulu.​—Badika Shake 5:13-15.

12. Mushindo kinyi watudi balombene kushala na mueneno ebuwa nsaa y’atukuasha balongi betu ba Bible?

¹² Dilongiesha: Ikala olombasha biakula na wekale na mueneno ebuwa pabitale bangi bantu. Bantu bebungi batulonga nabo Bible be kuikala na lukalakashi lua kutumikila malango. (Shak. 4:1-4) Bi kuibata nsaa i bungi bua’shi bakatushe ngikashi i bubi ya kala na buabadia kuiyipianyikisha na ngikashi i buwa ya buina Kidishitu. Nsaa y’atuambula Shake abitungu kuikala na eshimba dinyingie bua kulungula balongi betu mianda kampanda ayitungu’shi balumbule. Abitungu dingi tulame mueneno ebuwa, tukulupile’shi Yehowa akakaa bantu beyishe kuadi, na ebapa bukome buabadia kushintuluka mu nshalelo abo.​—Shak. 4:10.

13. Nka bu biabebilesha mu Shake 3:2, Shake badi mutundule kinyi?

¹³ Shake badi na mueneno ebuwa pabimutale. Shake tabadi apusha’shi kifuko kiadi mukudile, sunga mashito abadi bamupe ngamuikashe bu muntu e pa buaye sunga kumuikasha bu muntu e kunundu kua bakuabo balume na bakashi nya. Badi muitayine bangi bena Kidishitu naye bu “bakwabo ba kifulo kikata.” (Shak. 1:16, 19; 2:5) Tabadi akiebe’shi bangi bamumone buye mupuidikie nya. Muanda badi muiele mu ano mayi aamba’shi: “Mwanda atukokolaa  atwe booso mu bipaso bi bungi.”​—Badika Shake 3:2.

14. Buakinyi abitungu n’atue tutentekieshe’shi atukitaa bilubilo?

¹⁴ Dilongiesha: Tutentekieshe’shi atue boso atukita miluisho. T’abitungu tunangushene’shi atue tui kunundu kua baba batukuete kulongiesha. Buakinyi atuamba biabia? Su tuakita mianda mu kipaso akilesha’shi tatukitaa miluisho, mulongi etu a Bible e kubanga kutshoboloka na kunangushena’shi aye ta mulombene kukokiela Efile Mukulu mu mushindo upuidikie. Biabia su tuatundula atue banabene’shi ta bibadi bibofole buatudia kutumikila mayi a kulonda a mu Bible, na ku mupatuluila mushindo ubadi Yehowa muitukuashe buatudia kukambila ino nkalakashi tui balombene kukuasha mulongi etu a Bible buadia kuimona aye namu’shi mulombene kufubila Yehowa.

15. Shake badi mufubishe bileshesho bia mushindo kinyi? (Shake 3:2-6, 10-12)

¹⁵ Shake badi afubisha bileshesho bibadi abikumu ku mashimba. Kushi mpaka kikudi kiselele ngi kibadi akimukuasha, na badi akumiina kulonga mianda ibungi pabitale mushindo wa kulongiesha ku bukuashi bua bileshesho bu bibadi abikitshi tuutu aye Yesu, na badi muibifubishe. Bileshesho bia Shake bibadi afubisha mu mukanda waye mbibofole na malongiesha aye ngatokane.​—Badika Shake 3:2-6, 10-12.

16. Buakinyi abitungu tufubishe bileshesho bibiwa?

¹⁶ Dilongiesha: Fubisha bileshesho bibuwa. Nsaa yofubisha bileshesho bibuwa bantu ta batemesha nka penda dilongiesha diokumina’shi balongie nya. Kadi mbalombene dingi kushala nadio mu binangu biabo, na kubanga kui dinangushena. Kiakia kifuatulo akishala mu binangu mua bantu abakutemesha buabadia kutentekiesha bia binyibinyi bia mu Bible bi na muulo. Yesu nyi badi muukibue ngofu bua kutusha bileshesho bina muulo, na mukuabo Shake namu badi mulonde kilesheho kiaye. Tutaleyi kileshesho kimune kia ku bileshesho bia Shake na tumone buakinyi kino kileshesho kibuwa.

17. Buakinyi kileshesho kiabadi bafunde mu Shake 1:22-25, kibuwa bukile?

¹⁷ Badika Shake 1:22-25. Kileshesho kia Shake kia lumueno kibuwa bukile bua tubingilo tuibungi. Shake badi akiebe kulongiesha muanda wina muulo ukata bua’shi bantu bamone muulo wi na Eyi di’Efile Mukulu, kushi penda kuidibadika kadi batumikile yaya mianda yababadika. Shake badi musangule kino kileshesho kibadi kibofule ki bababadi balombene kulamina bukidibukidi  kui bantu babadi abamutemesha​—kia muntu etala mu lumueno. Kibadi kitushe dilongiesha kinyi? Mbilombene kuikala kukutua kua binangu su muntu elobo mu lumueno kadi amono kabutshiafu, akutua kuikakatusha. Mu mushindo umune, nyi kukutuaka kua binangu su atubadika Eyi di’Efile Mukulu, na atusangana’shi kui mianda kampanda ayitungu’shi tushintuule pabitale bu muntu buetu, kadi atukutua kushintula.

18. Mianda kinyi isatu ayitungu’shi tukite nsaa yatufubisha bileshesho?

¹⁸ Nsaa yofubisha kileshesho, abitungu w’ambuule kileshesho kia Shake pakukita ino mianda isatu: 1) Ikala mushinkamishe’shi kileshesho nkilombane na nkipushene na muanda wa nukuete kuakuila. (2) Fubisha kileshesho kibofule kupusha kui bantu abakutemesha. (3) Patuula kalolo mushindo wa kutumikila kalolo mianda i mu kileshesho. Su bosangana’shi bi bukopo bua kupeta kileshesho kibuwa, tala Index des publications des Témoins de Jéhovah. Mushi mua ka mutue ka muanda akamba’shi “Exemples,” okapete bileshesho bibungi biodi mulombene kufubisha. Tentekiesha’shi binangu na bileshesho bi nka bu bikolo​—abilumbula mianda yokula, shinkamisha’shi otusha kileshesho nka penda bua muanda wina muulo okumina kulongiesha. Biabia, kabingilo kakata akatungu’shi tulongamishe malongiesha etu nka’shi, muanda ta tukumina kukaka binangu bia bantu kuatudi atue ba nabene nya, anka atukiebe kukuasha bantu bebungi patukina mushindo, bua badia kutuela mu kifuko kia Yehowa ki na muloo.

19. Mushindo kinyi watudi balombene kulesha’shi tuibafule bakuetu balume na bakashi?

¹⁹ Shake badi na tuutu aye mupuidikie, anka atue ta tuina ba tuutu bapuidikie nya, anka tuina muabi wa kufubila Yehowa pamune mu kifuko kikata kia bena Kidishitu mui bakuetu balume na bakashi. Atuibalesha kifulo na kuikala nabo bukuuku pa kulongiela kuabadi, na pakufuba nabo pamune na lulamato mu mudimo wa bulungudi na wa kulongiesha. Nsaa yatuikitshisha bua kuambula kileshesho kia Shake mu muikelo wetu, bikitshino bietu, na mu mayele etu a kulongiesha, atutumbisha Yehowa na atukuasha bantu basha mashima alulame buabadia kuifubuila kui Nshetu sha kifulo e muiyilu.