1. U ka hlalosa lelapa labo Jakobo joang?

JAKOBO ngoan’abo Jesu, o holetse lelapeng le neng le e-na le kamano e ntle le Jehova. * Batsoali ba hae e leng Josefa le Maria ba ne ba rata Jehova haholo ebile ba etsa sohle seo ba ka se khonang ho mo sebeletsa. Ntho e ’ngoe e neng e thabisa haholo ke hore abuti oa hae e ne e tla ba Mesia. Kannete ena e ne e le tlotla e babatsehang hore ebe Jakobo ke karolo ea lelapa lena.

2. Ke mabaka afe ao Jakobo a neng a e-na le ’ona a neng a ka etsa hore a hlomphe abuti oa hae?

² Jakobo o ne a e-na le mabaka a mangata a neng a ka etsa hore a batle ho etsisa abuti oa hae. (Mat. 13:55) Ka mohlala, ha Jesu a le lilemo li 12 o ne a tseba Mangolo hantle hoo a ileng a makatsa banna ba rutehileng ba baholo ba Jerusalema. (Luka 2:46, 47) E ka ’na eaba Jakobo o ile a sebetsa le Jesu ho etsa mosebetsi oa mapolanka. Ka lebaka leo, ha ba ntse ba sebetsa o ne a tla tseba abuti oa hae haholoanyane. Hangata Mora oabo rona Nathan H. Knorr o ne a re: “U ka tseba motho haholoanyane haeba u sebetsa le eena.” * E ka ’na eaba Jakobo o ne a bona ha ‘Jesu a ntse a hatela pele bohlaleng le kholong ea ’mele ’me a amoheleha ho Molimo le ho batho.’ (Luka 2:52) Kahoo, re ka ’na ra nahana hore Jakobo e ne e tla ba eena morutuoa oa pele oa Jesu empa ha hoa ka ha e-ba joalo.

3. Jakobo o ile a etsa’ng ha Jesu a ne a qala tšebeletso ea hae?

 ³ Ha Jesu a ntse a etsa tšebeletso ea hae mona lefatšeng, Jakobo ha ea ka ea e-ba morutuoa oa hae. (Joh. 7:3-5) Ha e le hantle, e ka ’na eaba Jakobo e ne e le e mong oa leloko ea neng a nahana hore Jesu “o lahlehetsoe ke kelello.” (Mar. 3:21) Hape ha ho na bopaki bo bontšang hore Jakobo o ne a e-na le ’mè oa hae Maria ha Jesu a ne a le thupeng ea tlhokofatso.​—Joh. 19:25-27.

4. Re tl’o bua ka eng sehloohong see?

⁴ Hamorao Jakobo o ile a ba le tumelo ho Jesu ’me ea e-ba e mong oa baholo ba hlomphehang ba phutheho ea Bokreste. Sehloohong sena, re tla bua ka lintho tse peli tseo re ka ithutang tsona ho Jakobo: (1) ke hobane’ng ha re lokela ho lula re ikokobelitse? le (2) ke joang re ka bang matichere a hloahloa?   

5. Jakobo o ile a etsa’ng ha Jesu a bonahala ho eena ka mor’a ho tsosoa?

⁵ Jakobo e ile ea e-ba molateli oa Jesu ea tšepahalang neng? Ka mor’a hore Jesu a tsosoe bafung, o ile “a bonahala ho Jakobo, ea ntan’o ba ho baapostola bohle.” (1 Bakor. 15:7) Ka mor’a hore ba kopane, Jakobo e ile ea e-ba morutuoa oa hae. O ne a le teng ha baapostola ba emetse moea o halalelang kamoreng e ka holimo Jerusalema. (Lik. 1:13, 14) Hamorao Jakobo o ile a thabela ho sebeletsa e le e mong oa sehlopha se busang mehleng ea baapostola. (Lik. 15:6, 13-22; Bagal. 2:9) Hape pele ho selemo sa 62 mehleng ea baapostola, o ile a susumetsoa hore a ngolle Bakreste ba tlotsitsoeng lengolo. Lengolo leo le re tsoela molemo le kajeno, ebang re na le tšepo ea ho phela leholimong kapa lefatšeng. (Jak. 1:1) Rahistori oa mehleng ea baapostola Josephus, o ile a re Moprista ea Phahameng oa Mojuda e leng Ananiase mora oa Anase ke eena ea ileng a laela hore Jakobo a bolaoe. Jakobo o ile a lula a tšepahalla Jehova ho fihlela a qeta tšebeletso ea hae mona lefatšeng ha a ne a hlokahala.

6. Ke ka tsela efe Jakobo a neng a fapane le baeta-pele ba bolumeli ba mehleng ea hae?

⁶ Jakobo o ne a ikokobelitse. Ke hobane’ng ha re ka cho joalo? Hlokomela phapang e teng tseleng eo Jakobo le baeta-pele ba bolumeli ba ileng ba itšoara ka eona. Ha Jakobo a bona bopaki bo hlakileng ba hore Jesu ke Mora oa Molimo, ka boikokobetso o ile a lumela seo. Empa baprista ba ka sehloohong ba  Jerusalema bona ha ba aa ka ba lumela. Ka mohlala, ba ne ba ke ke ba khona ho hana hore Jesu o tsositse Lazaro bafung. Ho e-na le hore ba lumele hore Jesu o ne a ronngoe ke Jehova, ba ile ba leka ho mo bolaea le Lazaro. (Joh. 11:53; 12:9-11) Hamorao ha Jesu a ne a tsositsoe bafung, ba ile ba leka ho patela batho taba eo. (Mat. 28:11-15) Kaha baeta-pele bao ba bolumeli ba ne ba ikhohomosa, ha ba aa ka ba lumela hore Jesu ke Mesia.

7. Ke hobane’ng ha re lokela ho qoba ho ikhohomosa?

⁷ Re ithuta’ng? Qoba ho ikhohomosa ’me u ikemisetse ho rutoa ke Jehova. Joalokaha boloetse bo ka etsa hore pelo ea motho e se ke ea sebetsa hantle, boikhohomoso bo ka etsa hore ho be thata hore motho a mamele litaelo tsa Jehova. Bafarisi ba ne ba ikhohomosa hoo ba ileng ba hloleha ho bona bopaki bo hlakileng ba hore Jesu ke Mora oa Molimo le hore o na le moea oa Hae. (Joh. 12:37-40) Eo e ne e le taba e kotsi hobane e ile ea ba sitisa hore ba be le tšepo ea bophelo bo sa feleng. (Mat. 23:13, 33) Ke ha bohlokoa hore re tsoele pele ho lumella Lentsoe la Molimo le moea oa hae ho fetola tsela eo re nahanang le ho etsa lintho ka eona. (Jak. 3:17) Kaha Jakobo o ne a ikokobelitse, o ile a lumella hore Jehova a mo rute. Joalokaha re tla bona, Jakobo e ile ea e-ba tichere e atlehileng hobane a ne a ikokobelitse.

8. Ke’ng e ka re thusang hore re be matichere a hloahloa?

⁸ Jakobo o ne a sa ruteha haholo. Ha ho pelaelo hore baeta-pele ba bolumeli ba mehleng ea hae, ba ne ba mo nka e le motho ea ‘sa rutehang le ea tloaelehileng’ joaloka moapostola Petrose le Johanne. (Lik. 4:13) Empa Jakobo o ile a ithuta ho ba tichere e hloahloa. Re bona sena ha re bala lengolo le ileng la bitsoa ka lebitso la hae. Le rona joaloka Jakobo ho ka etsahala hore ebe ha rea ruteha haholo. Leha ho le joalo, Jehova o re thusa ka moea oa hae le ka mokhatlo oa hae hore re be matichere a hloahloa. A re boneng hore na re ka ithuta’ng mohlaleng oa Jakobo eo e neng e le tichere e hloahloa.

9. U ka hlalosa tsela eo Jakobo a neng a ruta ka eona joang?

⁹ Jakobo ha aa ka a bua mantsoe a thata kapa  a hlalosa lintho ka tsela e thata. Kahoo, batho ba ne ba tseba hore na ke lintho life tseo ba lokelang ho li etsa le hore na ba ka li etsa joang. Ka mohlala, nahana ka tsela e bonolo eo Jakobo a ileng a ruta Bakreste hore ba lokela ho ikemisetsa ho tšoaroa hampe ntle le hore ba halefe. O ile a re: “Re phatlalatsa hore ba mameletseng ba thabile. Le utloile ka mamello ea Jobo ’me le bone phello eo Jehova a ileng a fana ka eona, hore Jehova o na le lerato le mofuthu haholo ’me o mohau.” (Jak. 5:11) Hlokomela hore Jakobo o ne a ruta lintho tse tsoang ka Mangolong. O ile a sebelisa Lentsoe la Molimo ho thusa batho ho bona hore Jehova o lula a hlohonolofatsa batho ba mo tšepahallang joaloka Jobo. Jakobo o ne a ba ruta lintho tsena a sebelisa mantsoe a bonolo le a utloahalang. Ka tsela eo, o ne a etsa hore batho ba rorise Jehova eseng eena.

10. Ke ka tsela efe re ka etsisang Jakobo ha re ruta?

¹⁰ Re ithuta’ng? Ruta ka tsela e bonolo ’me u sebelise Lentsoe la Molimo. Ha re ruta batho ha rea lokela ho ba bontša hore na re tseba hakae empa re lokela ho ba bontša hore na Jehova o tseba hakae le hore oa ba tsotella. (Bar. 11:33) Re ka khona ho etsa seo haeba kamehla re sebelisa Bibele ha re ruta. Ka mohlala, ho e-na le ho bolella batho bao re ithutang Bibele le bona hore na re ne re ka etsa’ng haeba re ne re le boemong ba bona, re lokela ho ba thusa hore ba nahane ka mehlala e ka Bibeleng le hore na Jehova o nahana le ho ikutloa joang. Kahoo, ba tla batla ho etsa lintho tseo ba ithutileng tsona hobane ba batla ho thabisa Jehova eseng rona.

11. Ke mathata afe ao ba bang ba Bakreste ba mehleng ea Jakobo ba neng ba e-na le ’ona, hona o ile a ba fa keletso efe? (Jakobo 5:13-15)

¹¹ Jakobo e ne e le motho ea utloisisang. Lengolong la hae o ile a bontša hore o ne a utloisisa mathata ao Bakreste-’moho le eena ba neng ba e-na le ’ona ’me o ile a ba fa tataiso e hlakileng ea hore na ba ka hlola mathata a bona joang. Ka mohlala, ba bang ba Bakreste bao ba ne ba lieha ho mamela keletso eo ba e fuoeng. (Jak. 1:22) Ba bang ba ne ba tšoara batho ba ruileng hantle ho feta ba futsanehileng. (Jak. 2:1-3) Ha ba bang bona ba ne ba hloleha ho laola tsela eo ba buang ka eona. (Jak. 3:8-10) Bakreste bao ba ne ba e-na le bothata bo boholo empa Jakobo ha aa ka a khaotsa ho ba thusa. O ile a fana ka keletso ka tsela e mosa le e tobileng, a ba a khothaletsa ba bang ba hlokang thuso hore ba ee ho baholo e le hore ba ba thuse hore ba etse liphetoho.​—Bala Jakobo 5:13-15.

12. Ke joang re ka lulang re e-na le mamello ha re thusa batho bao re ithutang Bibele le bona?

¹² Re ithuta’ng? E-ba motho ea utloisisang le ea mamellang batho ba bang. Ho ka ’na ha e-ba thata hore batho ba bangata ba ithutang Bibele ba mamele keletso ea eona. (Jak. 4:1-4) Ho ka ’na ha nka nako hore ba tlohele lintho tse mpe tseo ba li etsang ’me ba be le makhabane ao Bakreste ba lokelang ho ba le ’ona. Joaloka Jakobo, re lokela ho ba le sebete sa hore re bolelle batho bao re ithutang Bibele le bona hore na ke hokae moo ba lokelang ho ntlafatsa. Re boetse re lokela ho ba le mamello le ho tšepa hore Jehova o tla hulela batho ba ikokobelitseng ho eena le ho ba fa matla ao ba a hlokang e le hore ba etse liphetoho bophelong ba bona.​—Jak. 4:10.

13. Joalokaha Jakobo 3:2 e bontša, ke’ng eo Jakobo a ileng a e hlokomela?

¹³ Jakobo o ne a ikokobelitse. Jakobo o ne a sa nke hore ke motho oa bohlokoa kapa o phahametse Bakreste-’moho ka lebaka la lelapa leo a tsoang ho lona kapa mesebetsi eo a neng a e etsa ka phuthehong. O ile a bitsa Bakreste-’moho le eena “barab’eso ba ratoang.” (Jak. 1:16, 19; 2:5) Ha aa ka a etsa  hore batho ba nahane hore eena ha a etse liphoso. Ho e-na le hoo, o ile a ikenyelletsa ha a ne a re: “Kaofela re khoptjoa hangata.”​—Bala Jakobo 3:2.

14. Ke hobane’ng ha re lokela ho lumela hore re etsa liphoso?

¹⁴ Re ithuta’ng? Hopola hore kaofela ha rona re etsa liphoso. Ha rea lokela ho nahana hore ka tsela e itseng re phahametse batho bao re ithutang Bibele le bona. Hobane’ng? Hobane haeba re etsa hore ba nahane eka rona ha re etse liphoso, ntho eo e tla etsa ba nahane hore ba ke ke ba khona ho etsa lintho tseo Jehova a reng ba li etse. Empa haeba re ba bolella hore ka linako tse ling ho ne ho se bonolo hore re mamele likeletso tsa Bibele le hore Jehova o ile a re thusa hore re mamelle mathata, ho ka ba thusa hore ba bone hore le bona ba ka khona ho sebeletsa Jehova.

15. U ka hlalosa lipapiso tseo Jakobo a ileng a li etsa joang? (Jakobo 3:2-6, 10-12)

¹⁵ Jakobo o ne a sebelisa lipapiso tse amang maikutlo. Ha ho pelaelo hore o ile a thusoa ke moea o halalelang hape e ka ’na eaba o ile a ithuta kamoo abuti oa hae Jesu a neng a sebelisa lipapiso kateng. Lipapiso tseo Jakobo a ileng a li sebelisa lengolong la hae li ne li le bonolo ebile thuto ea tsona e hlakile.—Bala Jakobo 3:2-6, 10-12.

16. Ke hobane’ng ha re lokela ho sebelisa lipapiso tseo batho ba li utloisisang?

¹⁶ Re ithuta’ng? Sebelisa lipapiso tseo batho ba tla li utloisisa. Ha u sebelisa lipapiso tseo batho ba tla li utloisisa, u ba thusa hore ba nahane ka ntho eo u ba rutang eona le hore ba ithute lintlha tsa bohlokoa ho eona. Lipapiso tseo li ka thusa batho bao re ithutang le bona hore ba hopole lintlha tsa bohlokoa tse hlahang ka Bibeleng. Jesu o ne a ipabola ka hore a sebelise lipapiso tseo batho ba khonang ho li utloisisa ’me Jakobo o ile a etsisa mohlala oa hae. A re bueng ka e ’ngoe ea lipapiso tseo Jakobo a ileng a li etsa ’me re bone hore na ke hobane’ng ha e ntse e atleha.

17. Ke hobane’ng ha papiso e hlahang ho Jakobo 1:22-25 e atleha?

¹⁷ Bala Jakobo 1:22-25. Ho na le mabaka a etsang hore papiso ea Jakobo ea seipone e be e atlehang. O ile a ruta thuto ea bohlokoa ea hore re lokela ho lula re bala Lentsoe la Molimo le ho sebelisa seo re ithutang sona ho lona, e le hore le re tsoele molemo. Jakobo o ile a sebelisa papiso eo batho ba neng ba ka e  utloisisa habonolo, e leng ea motho ea ichebileng ka seiponeng. O ne a ruta hore e tla be e le booatla ha motho a icheba ka seiponeng ’me a hlokomela hore ho na le ntho e seng hantle ho eena ebe ha a e lokise. Ka tsela e tšoanang, e tla be e le booatla hore ha re bala Lentsoe la Molimo ’me re hlokomela hore re lokela ho fetola botho ba rona ebe ha re etse joalo.

18. Ke lintho life tse tharo tseo re lokelang ho li etsa ha re etsa lipapiso?

¹⁸ Ha u etsa papiso u ka etsisa Jakobo ka hore u etse lintho tsena tse tharo: (1) Etsa bonnete ba hore papiso eo u e etsang e thusa motho eo u ithutang le eena hore a utloisise ntlha eo le buisanang ka eona. (2) Sebelisa papiso eo batho ba ka e utloisisang habonolo. (3) Hlakisa hore na papiso eo u e etsang e bolela’ng. Haeba u thatafalloa ke ho etsa lipapiso tseo batho ba ka li utloisisang, u ka kena ho Watch Tower Publications Index. Tlas’a sehlooho se reng “Illustrations,” u ka fumana mehlala e mengata eo u ka e sebelisang. Hopola hore lipapiso tseo u li etsang li ka tšoana le sebuela-hole, kaha li ka thusa motho eo u ithutang le eena hore a utloisise lintlha tseo u mo rutang tsona hantle. Kahoo, u lokela ho etsa bonnete ba hore u sebelisa lipapiso haholo-holo ha u ruta lintlha tsa bohlokoa. Ke ’nete hore lebaka la bohlokoa la hore re ntlafatse tsela eo re rutang ka eona, ke hobane re batla ho thusa batho ba bangata kamoo re ka khonang hore e be karolo ea lelapa le thabileng la Jehova, eseng hobane re ipatlela thoriso.

19. Re ka bontša joang hore re rata bara le barali babo rona?

¹⁹ Ke ’nete hore rona ha re na abuti ea phethahetseng joaloka Jakobo empa ntho e thabisang ke hore re sebeletsa Jehova le lelapa le leholo la bara le barali babo rona. Re bontša hore rea ba rata ha re qeta nako le bona, re ithuta lintho tse itseng ho bona le ho sebetsa le bona ha re etsa mosebetsi oa boboleli. Ha re ikemisetsa ho etsisa mohlala oa Jakobo tseleng eo re itšoarang le ho ruta ka eona re tla thabisa Jehova ’me re tla thusa batho ba batlang ho mo tseba hore e be metsoalle ea hae.