1. Ino inga mwaupandulula buti mukwasyi wa Jakobo?

JAKOBO, imwanookwabo Jesu, wakakomenena mumukwasyi wakali kusyomeka kuli Jehova. * Bazyali bakwe, ba Josefa a Mariya, bakali kumuyanda kapati Jehova alimwi bakacita kufwumbwa nzyobakali kukonzya kutegwa bamubelekele. Alimwi Jakobo wakalijisi cilongezyo cimbi cakuba amupati wakwe walo iwakali kuyooba Mesiya wakasyomezyedwe. Eelo kaka Jakobo wakajisi coolwe caalubazu cakuzulilwa mumukwasyi ooyu!

2. Ntwaambo nzi ntwaakajisi Jakobo itwakeelede kumupa kwiiya kumupati wakwe?

² Jakobo wakalijisi twaambo tunji ncaakeelede kwiiya kumupati wakwe. (Mt. 13:55) Mucikozyanyo, Jesu wakalaazyi kabotu Magwalo cakuti naakali amyaka iili 12, baalu bamu Jerusalemu bayiide bakali kwiile kulijata kumulomo. (Lk. 2:46, 47) Jakobo ambweni wakali kubeleka a Jesu mumulimo wakubeza mapulanga. Kuti wakacita oobu, nkokuti weelede kuti wakalimuzyi kabotu-kabotu mwanookwabo. Ba Nathan H. Knorr kanji-kanji bakali kwaamba kuti, “Kuzyiba muntu nkubeleka anguwe.” * Kweelede kuti awalo Jakobo wakalibonena kuti “Jesu wakali kuyaabukomena mubusongo aciimo, kayandwa kapati a Leza alimwi abantu.” (Lk. 2:52) Aboobo tulakonzya kuyeeyela kuti ambweni Jakobo naakaba akati kabasikwiiya ba Jesu bakusaanguna. Pele eeci tacili ncico cakacitika.

3. Ino Jakobo wakacita buti ciindi Jesu naakatalika mulimo wakwe?

 ³ Ciindi Jesu naakali anyika, Jakobo kunyina naakaba umwi wabasikwiiya ba Jesu. (Joh. 7:3-5) Amana buya, Jakobo ambweni ngumwi wabanamukwasyi ibakali kuyeeya kuti Jesu “wasondoka.” (Mk. 3:21) Alimwi kunyina bumboni butondezya kuti Jakobo wakali abanyina, ba Mariya, ciindi Jesu naakali kujaigwa acisamu cakupenzyezya.—Joh. 19:25-27.

4. Nziiyo nzi nzyotutiilange-lange?

⁴ Kumbele, Jakobo wakatalika kumusyoma Jesu akuba Munakristo uulemekwa mumbungano. Mucibalo eeci, tulalanga-langa ziiyo zyobilo nzyotukonzya kwiiya kuli Jakobo: (1) kaambo ncotweelede kulicesya alimwi (2) mbotweelede kuba bamayi bacibwene.

5. Ino Jakobo wakacita buti ciindi Jesu iwakabusyigwa naakalibonya kulinguwe?

⁵ Ino ndilili Jakobo naakaba sikutobela Jesu uusyomeka? Naakabusyigwa Jesu, “wakalibonya kuli Jakobo, mpoonya akubaapostolo boonse.” (1Kor. 15:7) Naakamana kubonana a Jesu, Jakobo wakaba umwi wabasikwiiya ba Jesu. Wakaliko cindi baapostolo nobakali kulindilila muuya uusalala ngobakasyomezyedwe muŋanda yamujulu ku Jerusalemu. (Mil. 1:13, 14) Kumbele, Jakobo wakakkomana kubeleka mukabunga keendelezya kamumwaanda wamyaka wakusaanguna. (Mil. 15:6, 13-22; Gal. 2:9) Mpoonya kumbele kautanasika mwaka wa 62 C.E., wakasololelwa amuuya kulemba lugwalo ku Banakristo bananike. Lugwalo oolu lulatugwasya amazuba aano, kufwumbwa naa tujisi bulangizi bwakuyoopona kujulu naa aano anyika. (Jak. 1:1) Syaazibwene mumakani aakaindi mu Juda wazina lya Josephus wakalemba kuti, Mupaizi Mupati waba Juda Hananiya Imusyoonto wakalailila kuti Jakobo ajaigwe. Jakobo wakazumanana kusyomeka kusikila ciindi naakamanizya buumi bwakwe bwaanyika.

6. Ino muunzila nzi Jakobo mwaakaindene abasololi bazikombelo bamumazuba aakwe?

⁶ Jakobo wakali kulicesya. Nkaambo nzi ncotwaambila boobu? Amubone kwiindana kuliko akati kambwaakacita Jakobo kumbele kujatikizya Jesu alimwi ambobakacita basololi bazikombelo banji. Ciindi Jakobo naakabona bumboni busalede ibutondezya kuti Jesu Mwana wa Leza, cakulicesya wakazumina. Oobu tabusyi mbocakabede kuli basilutwe babapaizi mu Jerusalemu. Mucikozyanyo, cakabaalila kukazya kuti Jesu wakamubusya Lazaro kuzwa  kubafwu. Muciindi cakusyoma kuti Jesu wakali mwiiminizi wa Jehova, balo bakakanza kumujaya Jesu alimwi a Lazaro. (Joh. 11:53; 12:9-11) Kumbele ciindi Jesu lwakwe naakabusyigwa kuzwa kubafwu, bakasola kwaasisa makani aamasimpe aaya kubantu. (Mt. 28:11-15) Kulisumpula kwabasololi bazikombelo aaba kwakabapa kumukaka Mesiya.

7. Nkaambo nzi ncotweelede kukutantamuka kulisumpula?

⁷ Ncotwiiya: Atukutantamuke kulisumpula, alimwi atube bantu bayiisyika. Mbubwenya bulwazi mbobukonzya kupa kuti moyo wamuntu kautabeleki kabotu, akwalo kulisumpula kulakonzya kupa kuti cituyumine kutobela malailile aa Jehova. Ba Farisi bakali kulisumpula kapati cakuti bakakaka kusyoma kuti Jesu wakali aamuuya uusalala wa Leza alimwi akuti Mwana wa Leza. (Joh. 12:37-40) Kulisumpula kwabo kwakali kubyaabi kapati nkaambo kwakali kubasinkila kuyooba abuumi butamani. (Mt. 23:13, 33) Eelo kaka cilayandika kapati kuti tuzumanane kuzumizya Jwi lya Leza alimwi amuuya uusalala kuti zicince bube bwesu, mizeezo yesu alimwi azintu nzyotusala! (Jak. 3:17) Akaambo kakuti Jakobo wakali kulicesya, wakalilyaabide kuyiisyigwa a Jehova. Alimwi mbubwenya mbotutiibone, akaambo kakulicesya kwakwe cakapa kuti abe mwiiyi uucibwene.

8. Ncinzi cikonzya kutugwasya kuba bamayi bacibwene?

⁸ Jakobo kunyina naakayiide kapati kumubili. Cakutadooneka bamayi bazikombelo bamumazuba aakwe bakali kumubona mbweena mbobakali kubona baapostolo ba Petro a Johane kuti “tiibakayiide alimwi bakali bantu-bantu buyo.” (Mil. 4:13) Pele Jakobo wakaiya kuba mwiiyi uucibwene, mbubwenya mbotubala mubbuku ndyaakalemba ilijisi zina lyakwe. Mbubwenya mbuli Jakobo, inga katutayiide kapati kumubili. Nokuba boobo, kwiinda mukugwasyigwa amuuya wa Jehova alwiiyo lwacigaminina kuzwa kumbunga yakwe, andiswe tulakonzya kuba bamayi bacibwene. Lino atulange-lange cikozyanyo ca Jakobo kali mwiiyi akubona ncotukonzya kwiiya.

9. Ino inga mwaipandulula buti nzila njaakali kubelesya kuyiisya Jakobo?

⁹ Jakobo kunyina naakali kubelesya mabala  naa bupanduluzi bukatazya kumvwa. Akaambo kaceeci, baswiilizi bakwe bakalizyi ncobakeelede kucita alimwi ambocicitwa. Mucikozyanyo, amubone nzila nguba-uba njaakabelesya kuyiisya kuti Banakristo beelede kuzumina kupenga akutaba amfwundilili. Wakalemba kuti: “Tubabona kuti balikkomene aabo ibaliyumya. Mulimvwide zyakuliyumya kwa Jobu alimwi mulibwene mbwaakamucitila Jehova kumamanino, kuti Jehova ulaalubomba kapati aluse.” (Jak. 5:11) Amubone kuti Jakobo wakabelesya Magwalo ciindi naakali kuyiisya. Wakabelesya Jwi lya Leza kugwasya baswiilizi bakwe kubona kuti lyoonse Jehova ulabalumbula aabo, mbuli Jobu, ibasyomeka kulinguwe. Jakobo wakali kuyiisya kwiinda mukubelesya mabala mauba-uba alimwi amunzila iitobeleka. Kwiinda mukucita boobo, kunyina naakali kuyanda kulipangila mpuwo, pele wakali kupa Jehova bulemu.

10. Muunzila nzi motukonzya kumwiiya Jakobo caboola kukuyiisya?

¹⁰ Ncotwiiya: Atwaambe mulumbe uutakatazyi alimwi akuyiisya kuzwa mu Jwi lya Leza. Ciindi notuyiisya bamwi, makanze eesu taali aakutondezya luzyibo ndotujisi, pele tweelede kubatondezya luzyibo ndwajisi Jehova alimwi ambwabalanganya. (Rom. 11:33) Tulakonzya kwaazuzikizya makanze aaya kwiinda mukubelesya Magwalo lyoonse. Mucikozyanyo, muciindi cakwaambila basikwiiya Bbaibbele ncotunga twacita ikuti notwali mubukkale bwabo, tweelede kubagwasya kuyeeya zikozyanyo zyamu Bbaibbele alimwi akubona Jehova mbwayeeya ambwalimvwa. Mpoonya bayooba aluyandisisyo lwakukkomanisya Jehova, ikutali ndiswe.

11. Mbuyumuyumu nzi mbobakajisi Banakristo bamwi mumazuba aa Jakobo alimwi wakabapa lulayo nzi? (Jakobo 5:13-15)

¹¹ Jakobo wakali kuzilanga munzila yeelede zintu. Kuzwa mulugwalo lwakwe, cilalibonya kuti Jakobo wakalibuzyi kabotu-kabotu buyumuyumu mbobakali kujana basyominyina, alimwi wakapa busolozi bugaminide ibwakabagwasya kubona ncobakeelede kucita. Mucikozyanyo, Banakristo bamwi bakali kumuka kulubelesya lulayo ndobakali kupegwa. (Jak. 1:22) Bamwi bakali kubikkila buyo maano bavwubi. (Jak. 2:1-3) Mpoonya bamwi cakali kubayumina kuweendelezya kabotu mulaka wabo. (Jak. 3:8-10) Banakristo aaba bakajisi mapenzi mapati, pele Jakobo kunyina naakatyompwa akucileka kubagwasya. Wakabapa lulayo caluzyalo pele cakutainda mumbali alimwi akukulwaizya baabo ibakali kuyandika lugwasyo lwabaalu kutegwa bacince bukkale bwabo.—Amubale Jakobo 5:13-15.

12. Mbuti mbotukonzya kuzumanana kuzilanga munzila yeelede zintu ciindi notugwasya basikwiiya Bbaibbele?

¹² Ncotwiiya: Atuzilange munzila yeelede zintu, akubabona munzila iili kabotu bamwi. Bantu banji mbotuyiisya Bbaibbele balakonzya kuba abuyumuyumu bwakubelesya lulayo lwamu Bbaibbele. (Jak. 4:1-4) Cilakonzya kubatolela ciindi kutegwa bacince zilengwa zyabo zibyaabi akuba abube bwa Bunakristo. Kwiinda mukwiiya Jakobo, tweelede kuba abusicamba bwakubaambila kuti beelede kucinca. Kuyungizya waawo, tweelede kubabona munzila yeelede, katusyomede kuti Jehova ulakwela bantu balicesya kulinguwe alimwi uyoobapa nguzu zyakucinca mubuumi bwabo.—Jak. 4:10.

13. Kweelana alugwalo lwa Jakobo 3:2, ncinzi Jakobo ncaakazyi?

¹³ Jakobo wakali kulibona munzila yeelede. Jakobo kunyina naakali kulibona kuti wakalisumpukide kwiinda Banakristo bamwi akaambo buyo kakuti wakali mwanookwabo a Jesu naa akaambo kamukuli uulibedelede ngwaakajisi. Wakali kwiita Banakristonyina  kuti “bakwesu nomuyandwa.” (Jak. 1:16, 19; 2:5) Kunyina naakali kulitondezya kuti wakalilondokede. Muciindi caboobo, wakalibikkilizya mumajwi aakuti: “Toonse tulalubizya ziindi zinji.”—Amubale Jakobo 3:2.

14. Nkaambo nzi ncotweelede kuzumina kuti tulalubizya?

¹⁴ Ncotwiiya: Katuyeeya kuti toonse tuli basizibi. Tatweelede kulitondezya munzila iili yoonse kuti tulabainda aabo mbotuyiisya. Nkaambo nzi? Kuti twapa sikwiiya wesu kuyeeya kuti swebo tatulubizyi, ulakonzya kutyompwa akutalika kuyeeya kuti takacikonzyi kutobela milawo ya Leza cakulondoka. Pele kuti cakusyomeka twamwaambila kuti tiicali cuuba-uba kulindiswe kutobela njiisyo zyamu Magwalo alimwi akumupandulwida Jehova mbwaatugwasya kuzunda buyumuyumu, tuyoomugwasya kubona kuti awalo inga wacikonzya kubelekela Jehova.

15. Ino inga mwazipandulula buti zikozyanyo nzyaakabelesya Jakobo? (Jakobo 3:2-6, 10-12)

¹⁵ Jakobo wakali kubelesya zikozyanyo zyakali kubasika amoyo bantu. Cakutadooneka wakagwasyigwa amuuya uusalala, pele alimwi weelede kuti wakaiya zinji kuzikozyanyo nzyaakali kubelesya mupati wakwe, Jesu. Zikozyanyo nzyaakabelesya Jakobo mulugwalo lwakwe nzyuuba-uba alimwi tazikatazyi kutobela.—Amubale Jakobo 3:2-6, 10-12.

16. Nkaambo nzi ncotweelede kubelesya zikozyanyo zigwasya?

¹⁶ Ncotwiiya: Atubelesye zikozyanyo zigwasya. Kuti mwabelesya zikozyanyo zigwasya, muyoopa bantu kuzimvwa nzyomwaamba alimwi akucikonzya kweezyeezya nzyomubayiisya. Zikozyanyo zili boobu ziyoogwasya baswiilizi banu kutuyeeya twaambo tuyandika kapati twakasimpe kamu Bbaibbele. Jesu wakalicibwene kapati kubelesya zikozyanyo, awalo mwanookwabo Jakobo wakaiya cikozyanyo cakwe. Lino atulange-lange cikozyanyo ca Jakobo comwe akubona mbocibeleka kabotu kapati.

17. Nkaambo nzi cikozyanyo cili kulugwalo lwa Jakobo 1:22-25 ncocigwasya kapati?

¹⁷ Amubale Jakobo 1:22-25. Cikozyanyo ca Jakobo cacimbonimboni cilabeleka kabotu mubukkale bwiindene-indene. Wakali kuyiisya ciiyo cigaminide cakuti, kutegwa tugwasyigwe a Jwi lya Leza, tweelede kucita zinji kunze buyo lyakulibala, nkokuti tweelede kuzibelesya nzyotubala. Jakobo wakasala cikozyanyo ncobakazyi kabotu baswiilizi bakwe icamwaalumi  uulilanga mucimbonimboni. Ncinzi ncaakali kuyiisya? Inga caba cabufwubafwuba kuti muntu walilanga mucimbonimboni, wabona buya mpayelede kubambulula, mpoonya waide kuumuna. Mbubwenya buyo, inga caba cabufwubafwuba kuti twabala Jwi lya Leza akubona motweelede kubambulula kujatikizya bube bwesu, mpoonya twaile kuumuna buyo.

18. Nzintu nzi zyotatwe nzyotweelede kucita ciindi notubelesya cikozyanyo?

¹⁸ Ciindi notubelesya cikozyanyo, tulakonzya kumwiiya Jakobo kwiinda mukucita zintu eezyi zyotatwe: (1) Atubone kuti cikozyanyo cileendelana akaambo nkotubandika. (2) Atubelesye cikozyanyo cuuba-uba. (3) Atucipandulule ncotwiiya kucikozyanyo eeco. Kuti kacimuyumina kujana zikozyanyo zyeelela, amubone mu Watch Tower Publications Index. Ansi aamutwe wamakani wakuti “Zikozyanyo,” muyoojana zikozyanyo zinji nzyomukonzya kubelesya. Nokuba boobo, amuyeeye kuti zikozyanyo zili mbuli maikkulofooni, yalo iigwasya kuti kaambo kalimvwisye. Aboobo amubone kuti mwakasalazya kaambo nkomuyanda kuyiisya. Nokuba boobo, kaambo kapati ikatupa kusumpula nzila zyesu zyakuyiisya nkugwasya bantu banji kuba cibeela camukwasyi wa Jehova uukkomene, ikutali kuyanda kulipangila mpuwo.

19. Mbuti mbotutondezya kuti tulabayanda bakwesu abacizyi?

¹⁹ Jakobo wakajisi mupati wakwe uulondokede, pele swebo tatujisi. Nokuba boobo, tulijisi coolwe cakubelekela Jehova antoomwe amukwasyi mupati wabakwesu abacizyi Banakristo. Tulatondezya kuti tulabayanda kwiinda mukuyanzana ambabo, kwiiya kuzwa kuli mbabo, akubeleka ambabo cakusyomeka mumulimo wakukambauka akuyiisya. Ciindi notusola kwiiya cikozyanyo ca Jakobo mubukkale bwesu, bube bwesu alimwi anzila zyakuyiisya, tupa kuti Jehova alemekwe akugwasya babombe myoyo kuba acilongwe ciyumu a Taateesu wakujulu.