1. Mhuri ya Tiyago yainga yakadini?

TIYAGO munukuna wa Djesu, wakarererhwa mu mhuri yainga yakabamba pakunamata. * Abereki ake, Zuzee na Mariya, aida maningi Djehovha uye aiita zvese zvaikwanisa kuti amuseenzere. Tiyago wakagarazve no cikomborero cimweni. Mukoma ake aizogara Mesiya. Tiyago wainga ano cikomborero cakakura cekubarirhwa mu mhuri iyona!

2. Tiyago wainga ano zvikonzero zvipi zvekuti afundire kubva kuna mukoma ake?

² Tiyago wainga ano zvikonzero zvakawanda zvekufundira kubva kuna mukoma ake. (Mt. 13:55) Ngo muezaniso, Djesu paainga ano makore 12, ainyasa kuziya zvakanaka matarhwa zvekuti afundisi amweni e mu Djerusarema akashamiswa ndiyena. (Ru. 2:46, 47) Pamweni Tiyago wainga wakamboseenza pamwepo na Djesu hingana mukarpintero. Kana zviri izvona, iyena wakaguma pakunyasa kuziya zvakanaka Djesu. Nathan H. Knorr aireketa kuti: “Imwimwi munonyasa kuziya zvakanaka munhu kana mukaseenza naye.” * Zvezvirokwazvo, Tiyago wakazwisisa kuti, “Djesu ainga ecikura mu ruziyo uye aikurawo pa nyama pamwepo nekutenderhwa na Mwari uye no anhu.” (Ru. 2:52) Mu masure me zvese izvi, zvainga zviri nyore kuti Tiyago agare mufundi wekutanga wa Djesu. Asi andizvopi zvakaitika.

3. Tiyago wakarangarirei Djesu paakatanga kuparidzira?

³ Panguwa yese yakapedzwa na Djesu eciparidzira pa nyika, Tiyago aazi kumbogara muteeri wake. (Ju. 7:3-5) Zvezvirokwazvo, pamweni Tiyago wainga ari umwe we anyaukama a  Djesu airangarira kuti iyena ainga “aakuhunguruka.” (Mk. 3:21) Zvingaitawo kuti Tiyago wainga asiripi na mai wawo Mariya, Djesu paakakhomerhwa pa mutanda wekutambudzikira.—Ju. 19:25-27.

4. Mafundo api aticaona mu fundo ino?

⁴ Mu masure mecinguwa, Tiyago wakatanga kugara no kutenda muna Djesu, uye wakagara mukuru wainga ano zviro zvakawanda zvekuita mu ungano. Mu fundo ino, ticaona mafundo mairi atingakwanisa kufunda kubva kuna Tiyago: (1) ngei tecidikana kurumbwa tecidzidodosa uye (2) tingatunhudzira kudini mishobo yedu yekufundisa amweni.

5. Cinyi cakaita Tiyago mumasure mekuti Djesu adzipangidza kaari?

⁵ Kodi Tiyago wakagara rini muteeri wakagondeka wa Djesu? Mu masure mekuti Djesu amutswa, “akabva adzipangidza kuna Tiyago, uye ku aphostori ake.” (1Ako. 15:7) Mu masure mazvo, Tiyago wakagara umwe we afundi a Djesu. Iyena wainga ari pamwepo no aphostori mu Djerusarema paakatambira mwiya mucena. (Zvi. 1:13, 14) Nokuhamba ke nguwa, Tiyago wakagara no mupfaro wekuseenza hinga nhai ye dare rinotungamirira. (Zvi. 15:6, 13-22; Aga. 2:9) Gore ra 62 K.A., risati raguma, iyena wakafemerhwa ndi Mwari kuti atare tsamba ku aKristu akadzodzwa. Dakara nyamasi, tese tinokwanisa kufunda zvakawanda kubva mu tsamba iyona, kunyazi tino kariro yekurarama nokusikaperi pa nyika, kunyazi kudenga. (Tg. 1:1) Maererano no mupanganidzi we zvakaitika we kuDjudha unozwi Josephus, iyena akati: Tiyago wakauraiwa nge mutemo we Mupristi Mukuru we ciDjudha, Mudjaha unozwi Ananias. Tiyago wakarumbwa akagondeka kuna Djehovha dakara ku mugumo ke upenyu wake pa nyika.

6. Musiyano upi uripo pakati pa Tiyago no atungamiriri e zvitendero e pa nguwa iyona?

⁶Tiyago wainga ari munhu waidzidodosa. Ngei tingabhuya kudaro? Onai musiyano uripo pakati pa Tiyago no atungamiriri e zvitendero e pa nguwa iyona. Tiyago paakaona zviro zvinopangidza kuti Djesu ainga ari Mwana wa Mwari, iyena wakazvitendera ecidzidodosa. Asi Apristi akuru-akuru e mu Djerusarema, aazi kuzviita. Ngo muezaniso, awona ainga asikadikani kuramba kuti Djesu ainga amutsa Razaro. Asi pane kutendera kuti Djesu ainga atumwa ndi Djehovha, awona akaedza kuuraya Djesu pamwepo na Razaro. (Ju. 11:53; 12:9-11) Mu masure mecinguwa, Djesu aamutswa, awona akaedza kuzvifisa ku  anhu. (Mt. 28:11-15) Kudzikudza ke atungamiriri e zvitendero, kainga kakakura zvekuti akapedzesera aramba Mesiya.

7. Ngei tisikadikani kudzikudza?

⁷Zvatingafunda: Musadzikudze, uye siyai kuti Djehovha amufundise. Kana tikasama kungwarira, padoko no padoko kudzikudza kungaomesa mwoyo wedu. Onai zvakaitika no Afarisi. Mwoyo yawo yainga wakaomerhwa nge ndaa yekudzikudza zvekuti aazi kukwanisa kuona zviro zvaipangidza kuti Djesu ainga ari Mwana wa Mwari. Kudzikudza kuno ngozi uye kungakwanisa kutiparadzanisa na Djehovha. (Ju. 12:37-40) Nge ndaa yazvo, Afarisi akapedzesera aruza mukana wekuona upenyu usikaperi. (Mt. 23:13, 33) Ndiyo ndaa zvinokosha maningi kusiya kuti Bhaibheri no mwiya mucena wa Djehovha ucinje unhu wedu, mushobo wedu wekurangarira uye zvitibetse kuti tiite zvisananguro zvakanaka! (Tg. 3:17) Kudzidodosa ka Tiyago, kakaita kuti iyena atendere kucinjwa na Djehovha. Uye hingana zvaticaona, kudzidodosa kakaita kuti Tiyago agare mufundisi wakanaka.

8. Cinyi cingatibetsera kuti tigare afundisi akanaka?

⁸ Tiyago aazi kufunda zvikora zvepamusoro-soro. Atungamiriri e zvitendero e pa nguwa iyona, aiona Tiyago ngo mushobo umwewo waiona aphostori Pedru na Juau—hingana “anhu asikazi kufunda uye anhuwo hawo.” (Zvi. 4:13) Kunyazi zvakadaro, Tiyago wakagara mufundisi wakanaka, uye izvona zvinooneka pamhene patinoerenga bhuku re Bhaibheri raakatara. Kuita hingana Tiyago, pamweni isusu atiziwo kufunda zvikora zvepamusoro-soro. Asi no rubetso re mwiya mucena wa Djehovha, uye no rowedzo dzese dzatinopaswa no sangano rake, isusu tingafundira kugara afundisi akanaka. Hino, ngationei kuti zvinyi zvaiizwa na Tiyago kuti agare mufundisi wakanaka uye kuti tingakwanisawo kudini kuteera muezaniso wake.

9. Tiyago waifundisa nge mushobo upi?

⁹Tiyago wainga asikaseenzesi masoko anoshupha uye wainga asikapanganidzi masoko anoshupha kuzwisisa. Nge ndaa yazvo, Tiyago paaifundisa anhu aiziya zvaaidikana kuita uye mushobo waaidikana kuzviita. Ngo muezaniso,  onai mushobo uri nyore wakafundiswa ndi Tiyago wekuti aKristu aizosongana nokusama unatsi uye kunyazi zvakadaro asagare anhu ano hasha. Iyena wakatara kuti: “Anopfara aya akashingirira. Makazwa nge zve kushingirira ka Djobo uye makaona zvaakazoizirhwa na Djehovha, kuti Djehovha ane usisi ukuru uye ane nyasha.” (Tg. 5:11) Tiyago waifundisa eciseenzesa Matarhwa. Ngo mushobo uwona, iyena wakaseenzesa Soko ra Mwari kuti abetsere anhu kuzwisisa kuti Djehovha anokomborera anhu aya akagondeka kaari kuita hinga Djobo. Tiyago, waiseenzesa masoko ari nyore uye waipanganidza zviro ngo mushobo uri nyore kuzwisisa. Kunyazi zvakadaro, iyena wainga asikadzionesi, asi waikudza Djehovha.

10. Tingateedzera kudini Tiyago patinofundisa amweni nge zva Djehovha?

¹⁰Zvatingafunda: Fundisai nge mushobo uri nyore uye seenzesai Bhaibheri. Patinofundisa munhu Bhaibheri, cinangwa cedu acekumupangidzapi zvatinoziya, asi ngecekumupangidza nge zva Djehovha uye mushobo waanotida. (Aro. 11:33) Tingakwanisa kuzviita kana tikaseenzesa Bhaibheri patinofundisa. Ngo muezaniso, pane kubvunza mufundi wedu we Bhaibheri zviro zvataizoita pa mbuto yake, zvakanaka kuongorora miezaniso minganani ye Bhaibheri kuitira kuti azwisise maonero a Djehovha uye muzwiro waanoita nge zve nyaya iyona. Ngo mushobo iwona, awona acafundira kuti cinokosha ngecekupfadza Djehovha, haiwa isusu.

11. Tiyago wakapasa mazano api ku aKristu amweni? (Tiyago 5:13-15)

¹¹Tiyago waireketa zviro sezvazviri. Patinoerenga tsamba ya Tiyago, zvinogara pamhene kuti iyena waiziya pakarembera hama no hanzvadzi dzake. Ndiyo ndaa, iyena wakapasa mazano akananga akaringana no zviro zvaaidikana. Ngo muezaniso, aKristu amweni ainonoka kuseenzesa mazano aipaswa. (Tg. 1:22) Amweni ainyanya kukoshesa anhu ainga akapfuma. (Tg. 2:1-3) Uye amweni ainga ano cinetso cekudzibata pa masoko awo. (Tg. 3:8-10) Izvi zvainga zviri zvinetso kamare, zvekutoti Tiyago waiziya kuti hama idzi dzaikwanisa kucinja. Tiyago wakapasa mazano hama idzi ngo mushobo uno upfawi, asi asikasii kubhuya fundo raaidikana kureketa. Kusiya izvona, iyena wakabambisa hama idzi kuti dzipsvake rubetso re akuru kuti akwanise kuita cinjo idzona.—Erengai Tiyago 5:13-15.

12. Tingakwanisa kugara no rugondo ripi?

¹²Ziyai zviro sezvazviri uye musaruze kariro. Tinodikana kuziya zviro sezvazviri uye toziawo kuti afundi edu ajinji ano zvinetso zvokuseenzesa mazano e Bhaibheri. (Tg. 4:1-4) Zvingatora nguwa dakara amweni akwanisa kusiyana ne miitiro yakashata uye otanga kusakurira mawara e muKristu. Kuita hingana Tiyago, tinodikanawo kureketa mafundo anodikanwa kucinjwa ne mufundi wedu uye toabvunza zvaanodikana kuita kuti azvigadzirise. Tinodikanawo kugara ne rugondo rokuti Djehovha acakweya anhu anodzidodosa kaari uye acaapasa simba raanoda kuti aite cinjo mukati me upenyu wawo.—Tg. 4:10.

13. Maererano na Tiyago 3:2 pamwepo ne masoko e pasi, Tiyago wakatenderei?

¹³Tiyago wainga asikadzionesi hingana anokosha kudarika amweni. Tiyago wainga asikadzionesi hingana munhu anokosha kudarika aKristu amweni ngekuti wainga ari hama ya Djesu kana kuti ngekuti wainga ano ubaba wakakura. Iyena wakadainza aKristu aaiziya kuti “hama dzangu dzinodiwa.” (Tg. 1:16, 19; 2:5) Iyena wainga asikaiti kuti amweni amuone hingana kuti wainga ari munhu wakakwana. Kusiyana nazvo iyena  wakatodzibatanidzawo paakareketa masoko okuti: “Tese tinoshaisha kajinji.”—Erengai Tiyago 3:2, uye masoko e pasi.

14. Ngei zvecikosha kubvunza mufundi we Bhaibheri kuti tinoshaishawo?

¹⁴Zvatingafunda: Edzurirai kuti tese tinoshaisha. Atidikani kudziona hingana kuti tiri mashasha akhona kudarika afundi edu. Ngei tecidaro? Kana tikadzionesa pamberi pe afundi edu kuti isusu atimboshaishi, awona acaora mwoyo ngekuti acaona hingana kuti aazombokwanisi kuita zvinoda Djehovha. Isusu tingakwanisa kubetsera afundi edu kuti akwanise kuseenzera Djehovha, kana tikaita zvinoteera: Kutendera kuti azvirinyorepi kuseenzesa mazano e Bhaibheri, uye kupanganidza kuti Djehovha akatibetsera kudini kuita cinjo mu upenyu wedu.

15. Miezaniso ya Tiyago yainga yakaita kudini? (Tiyago 3:2-6, 10-12)

¹⁵Tiyago waiseenzesa miezaniso kuti abaye mwoyo ye anhu. Zviri pamhene kuti Tiyago wainga ano rubetso re mwiya mucena, asi zvingaitawo kuti iyena wakafunda zvakawanda no muezaniso ye mukoma ake, Djesu. Mu tsamba yake, Tiyago wakaseenzesa miezaniso iri nyore uye inobetsera.—Erengai Tiyago 3:2-6, 10-12.

16. Cinyi cinoitika patinoseenzesa miezaniso yakanaka?

¹⁶Zvatingafunda: Seenzesai miezaniso inobaya mwoyo. Miezaniso yakanaka ingakwanisa kufungura madziso e munhu. Zvamuri kufundisa zvingakwanisa kuzwisiswa no munhu uye zvingagara mundangariro dzake. Apana waikwanisa kuseenzesa miezaniso kudarika Djesu, uye Tiyago wakateedzera muezaniso wake. Ngatimboone muezaniso wa Tiyago uye kuti ngei muezaniso iwona wainga wakanaka.

17. Ngei tecikwanisa kureketa kuti muezaniso wa Tiyago 1:22-25 weciseenza zvakanaka?

¹⁷ Erengai Tiyago 1:22-25. Muezaniso we supea wakarekethwa na Tiyago unonyasa kuseenza nge zvikonzero zvakawanda. Cokutanga, Tiyago wainyasa kuziya zvaaida kufundisa. Mu muezaniso uu, iyena waida kufundisa kuti kana tecida kuti Soko ra Mwari riseenze mu upenyu wedu, tinodikana kuita zvakawanda kudarika kuerenga basi, tinodikana kuseenzesa zvatinofunda. Tiyago wakaita muezaniso eciseenzesa ciro cinoziikanwa ne munhu wese—supea. Ngacipi caaida kufundisa pa  muezaniso uu? Azvibetseri kana munhu akaringira pa supea oona kuti hope yake yakasvipa uye osama kuita ciro, nge mushobo umwewo azvibetseri ciro kana munhu akaerenga Soko ra Mwari uye oona kuti pano cinjo dzaanodikana kuita pa unhu wake kana mu upenyu wake asi osama kuita cinjo.

18. Mafundo api atinodikana kuedzurira kuti tikwanise kuseenzesa miezaniso yakanaka?

¹⁸ Tingateedzera kudini Tiyago pakuseenzesa miezaniso yakanaka? (1) Sanangurai muezaniso ucaita kuti mufundi anyase kuzwisisa zvaarikufunda. (2) Seenzesai miezaniso ye zviro zvinoziikanwa. (3) Pangidzai pamhene zviri kuda kufundiswa ne muezaniso. Asi zvakadini kana zvecimushuphira kuseenzesa miezaniso yakanaka? Mungaseenzesa Índice das Publicações da Torre de Vigia. Edzai pakazwi “Miezaniso,” imona mucagumira miezaniso yakawanda yamungaseenzesa. Asi edzurirai kuti miezaniso yakaita hingana mikrofoni—munhu paanoreketa ne mikrofoni izwi rake rinozika kure. Miezaniso inoitawo kuti mafundo atinoda kufundisa anyase kubuda pamhene. Ndiyo ndaa, tinodikana kungwarira pakuseenzesa miezaniso pa mafundo makuru. Zvezvirokwazvo isusu tinoda kugara afundisi akanaka haiwa kuti tidzipase mbiri, asi kuti tibetsere anhu akawanda kuti abatanidzwe mu mhuri ya Djehovha inopfara.

19. Tingapangidza kudini kuti tinokoshesa mhuri yedu ye kumwiya?

¹⁹ Icokwadi kuti akuna umwe wedu wakagara ne cikomborero hingana cainga na Tiyago, cekukura na mukoma ake akakwana. Asi isusu tinocikomborero cekuseenzera Djehovha pamwepo ne mhuri yedu yekumwiya hama ne hanzvadzi dzedu dze ciKristu. Isusu tinopangidza kuti tinokoshesa mhuri ii patinoungana, patinopedza nguwa tiri tese pamwepo nawo, patinofunda uye patinoparidzira tese takagondeka. Kana tikapeta masimba ekunyasa kuteedzera muezaniso wa Tiyago wakatisiira, ticakudza Djehovha uye ticakwanisa kubetsera anhu ano mwoyo unoda kufundira cokwadi.