1. Mukhalelo heeni yaaraayano emusi ya Yakobe?

YAKOBE, munneene Yesu aahuuwale ni emusi yoolipa omunepani. * Yosefe ni Maria, awo yannamusivela vantxipale Yehova ni yannapaka ele yaaweraaya weera emukokhorele. Yakobe aakhalano eparakha ekina—munnawe oopatxera oyariwa aarowa okhala Mesiya. Yakobe aakhalano eparakha yoohuuwa emusi ele!

2. Mikhalelo heeni saakhanle soomweeriha Yakobe omutikhina munneene oopatxera oyariwa?

² Yakobe aakhalano mathowa mantxipale ootikhina mikhalelo sa munnawe oopatxera oyariwa. (Math. 13:55) Mwa ntakihero, emaara Yesu aaraaweno iyaakha 12, owo annasuwela nnene soolepa, mpaka anamahusiha oYerusalemu yannakhala ootikiniheya ni yoowo. (Luka 2:46, 47) Oweharu pooti weera Yakobe avara vamoha muteko wa okarpinteiru ni Yesu. Wakhala weera tihiihaawo, owo aamusuwela nnene Yesu. Nathan H. Knorr aamakela ohima masu ala: “Nyuwo munnamusuwela nnene mutthu wakhala weera munnavara muteko vamoha nuuwo.” * Moohihovela Yakobe aahoonelela weera ‘Yesu annannuwa mwa miruku mweerutthuni ni mwa mahala vamaithoni va Muluku ni vaatthu.’ (Luka 2:52) Mwaha wa soothesene iya waamukhala wookhweya Yakobe okhala muttareli mmoha-mmoha a Yesu mene khaiyene tiyeeyo yaakhumelenle.

3. Emaara Yesu aapatxenraawe olaleera, Yakobe uupuwela hayi?

³ Ehuhu yootheene Yesu alaleeraawe elapo ela ya vathi, Yakobe khanakhale muttareli awe. (Yoh. 7:3-5) Mweekhaikhai pooti weera aari mmoha a emusi ya Yesu yuupuwela weera owo ‘onkhwa  anepa’. (Mar. 3:21) Apaale pooti weera Yakobe khaakhanle ni ameyawe vaavo Yesu aakhomelinwaawe vamwirini va nihaxero.—Yoh. 19:25-27.

4. Eheeni ninkelaahu oxuttera yoosomeene yeela?

⁴ Avinyererakaru Yesu, Yakobe aakhala ni nroromelo ni Yesu mpaka owo aakhala mutokweene a mmulokoni aarino miritti sintxipale. Yoosoma ela, nnoorowa oxuttera itthu piili voohima sa Yakobe: (1) Mwaha wa heeni ontthuneyaaya ovirelela okhala atthu oowiiyeviha ni (2) moota heeni nneeraahu nireherere mukhalelo ahu woolaleera.

5. Yakobe aapanke eheeni Yesu aisooneihakaru wa yoowo?

⁵ Ehuhu heeni Yakobe aakhanlaawe mutthareli a Yesu oororomeleya? Yesu avinyererakaru, ‘ahisoneiha wa Yakobe ni wa arummwa ootheene’. (1 Akor. 15:7) Muhoolo mwaya, Yakobe aakhala mutthareli a Yesu. Owo tho aari ni arummwa oYerusalemu vaavo yaakhenlaaya munepa wootteela. (Mit. 1:13, 14) Nave-tho muhoolo mwaya, Yakobe aahakalala mwaha wookhala mmoha a Mukuttula Woolamulela. (Mit. 15:6, 13-22; Agal. 2:9) Ehinaakuve ophiya eyaakha ya 62 E.C., owo ahupuxeriwa ni Muluku olepa ekaratta, aaroihelaawe akristu oothanliwa. Mpakana olelo va hiyo ninnaxuttera itthu sintxi ni ekaratta eyo, nihiwehaka yooweherera ahu wakhala weera ninrowa okhalaka elapo ya vathi kapena ninrowa wiirumu. (Yak. 1:1) Moovarihana ni mulipa onhima sooweeraya muYuda, Josefo, onahima weera, Yakobe ivinwe ni nlamulo naavahiwe ni namakeya muYuda Ananias, mmiravo. Yakobe aavirelela okhala oororomeleya wa Yehova mpaka okhwipi wa ekumi awe.

6. Ovirikana heeni okhanle eriyari ya Yakobe ni anamahoolela a ittiini a ehuhu ele?

⁶Yakobe aari oowiiyeviha. Mwaha wa heeni nihimaahu hiiho? Moone ovirikana waakhanle, Yakobe ni anamahoolela a ittiini a ehuhu ele. Yakobe oonakaru weera Yesu aari mwaana a Muluku, owo moowiiyeviha aahakhulela. Mene anamahoolela anamakeya oYerusalemu, khayaapanke etthu eyo. Mwa ntakihero, awo yaasuwela weera Yesu aanvinyeririha Lazaro. Mene ohiya waakhulela weera Yesu aarumihiwe ni Yehova, awo yannatthuna omwiiva Yesu vamoha ni Lazaro. (Yoh. 11:53; 12:9-11) Evinreene ehuhu Yesu avinyerenreene, awo yaaherera wiipithiha weera atthu ehisuwele. (Math. 28:11-15) Wisunnuwiha wa ahooleli ale a ittiini waari otokotoko ti waaweeriha omukhootta Mesiya.

7. Heeni wiisunnuwiha oraaya woowopiha?

⁷Etthu ninxutteraahu: muhikhale mutthu owiisunnuwiha mmuhiye Yehova ooxuttihakani.  Naahikosoope wiisunnuwiha pooti opatxera vakhaani-vakhaani onanariha murima ahu. Nkawehani ele yeereñye ni afarisi. Murima aya waasareya wiisunnuwiha mpaka ohaakhulela weera Yesu aari mwaana a Muluku, naari yaasuwenle weera Yesu aari mwaana a Muluku. Wiisunnuwiha ti woowoopiha ni pooti onirakameliha wa Yehova. (Yoh. 12:37-40) Nto mwaha wa yeeyo, afarisi yaayeleela eparakha ya okhalano ekumi yoohimala. (Math. 23:13, 33) Ti vaavonto oraaya wootthuneya omuhiya Biblya ni munepa wootteela wa Yehova onxuttihaka moota nnuupuwelaahu ni moota woopaka soothanla sooreera sa mweekumini! (Yak. 3:17) Wiiyeviha wa Yakobe waamweeriha owo waakhulela oxuttihiwa ni Yehova. Ntoko nneeraahu nixuttere vahoolo vaya, waari wiiyevihawene weiwo waamweerinhe owo okhala muhusiha ookhumela nnene.

8. Eheeni eneera enikhavihere okhala ooxuttiha ookhumela nnene?

⁸ Yakobe khaasommexa. Moohihovela ahooleli a ittiini yaanweha Yakobe ntoko yaawoonelaaya arummwa Pedru ni Yohani—“khayari alipa olepa mene olima.” (Mit. 4:13) Nnamweera vareene hiiho, Yakobe aakhala muhusiha ookhumela nnene, eyo ennoonihereya ni ebuukhu ya mBiblyani owo olempaawe. Pooti weera ntoko hiihaale Yakobe, hiyo tho khanaanono eparakha yoosomaxa. Mene nikhaviheriwaka ni munepa wootteela wa Yehova ni soxuttihiwa sootheene nnaakhelaahu mmarehereroni mwawe, hiyo pooti oxuttera okhala atthu ooxuttiha nnene. Vano ninrowa oweha eheeni Yakobe apakaawe weera akhale muhusiha ookhumela nnene ni moota nneraahu nitthareke ntakihero nawe.

9. Yakobe aaxuttiha moota heeni?

⁹Yakobe khavarihela muteko masu oxupa wiiwexexa. Nto mwaha wa yeeyo, Yakobe emaara owo aaxuttihaawe atthu, awo yannasuwela eheeni awo yaatthuneyaaya opaka, ni moota heeni yeeraaya epake etthu eyo. Mwa ntakihero, nkawehani moota wookhweya Yakobe aaxuttihaawe akristu weera pooti oviriha ohixariya ni naari vareene hiiho, ohikhala atthu oowali. Owo olempe ha: “Onani ninnakhaliha oreriwa yale evilenle. Mohiwa wuluma sa ovilela wa Yobi enraiye ni mosuwela emalihero Apwiya yamurehererenlaya okhala wera Apwiya tosareya othunku ni omorela ikharari.” (Yak. 5:11) Yakobe emaara  axuttihaawe annavarela muteko soolepa sa mBiblyani. Mwaheene yoola uulummawe, owo avarenle muteko masu a Muluku weera aakhavihere atthu wiiwexexa weera Yehova onnaatthuvela ale ari oororomeleya, ntoko hiihale amutthuvenlaawe Yobi. Yakobe annavarihela muteko masu ookhweya wiiwexexa. Avarelaka muteko oxuttiha wawe nno, owo khaittottopa mene anvaha ovuwa wootheene Yehova.

10. Ninkela omutakiha hayi Yakobe vaavo nnaaxuttihahu atthu akina voohima sa Yehova?

¹⁰Etthu ninxutteraahu: muxuttiheke mookhweya ni munvareleke muteko Biblya. Vaavo nnaxuttihaahu atthu akina Biblya, yoolakelaahu ohikhaleke owoonihera moota hiyo nimusuwenlaahu Biblya, mene moota Yehova osuwenlaawe ni moota onnisivelaawe. (Arom. 11:33) Nnoowera opaka eyo, wakhala weera ikwaha sootheene ninrowaahu waaxuttiha atthu ninnanvarela muteko Biblya. Mwa ntakihero, ohiya omuleela namasomaahu a Biblya eheeni neeraahu nipake va nipuroni vawe, vaamukhala vooreera othokorora nuuwo matakihero a mBiblyani weera iiwexexe moota Yehova onoonelaawe mwahaawe owo. Napaka eyo, awo enimoona otthuneya waya omuhakalaliha Yehova ohiya hiyo meekhiihu.

11. Soottettheya heeni akristu akina yaarayano, ni miruku heeni Yakobe aavanhaawe awo? (Yakobe 5:13-15)

¹¹Yakobe khaakhuwa. Vaavo ninsomaahu ekaratta ya Yakobe, ennonihera tthiri weera owo annasuwela soottetteya sa asinna ni asirokora. Nto mwaha wa yeeyo, owo aavaha miruku sooluluwanya voohima sa ele awo yaatthuneyaaya opaka. Mwa ntakihero, akristu akina yannalekela ovarihela muteko miruku yaavahiwaanya. (Yak. 1:22) Akina yaattittimiha anamuhakhu. (Yak. 2:1-3) Akina khayaawera okosoopa nlumi naya. (Yak. 3:8-10) Ala yaari maxupo tthiri matokweene. Mene Yakobe aasuwela weera asinna ala wanwereya otxentxa. Owo ahaavaha miruku mooreerela murima, mene ahihiyaka ottuli etthu yaatthuneyaaya opaka. Ophwaha mwa yeeyo, owo ahaalipiha ni awooperera asinna ale weera yaaseke nikhavihero na mmulokoni weera ewere opaka matxentxo mweekumini mwaya.—Mmusome Yakobe 5:13-15.

12. Yoororomela heeni nintthuneyaahu okhalano?

¹²Muhikhuweke ni muhiyeleele yooweherera. Ninkela okhala atthu oohikhuwa nave osuwela weera anamasomaahu antxipale aakhalano maxupo oovarihela muteko miruku sa mBiblyani. (Yak. 4:1-4) Pooti ovira ehuhu yintxipale weera anamasoma ehiye mikhalelo soonanara ni opatxera okhalano mikhalelo sa akristu. Ntoko hiihale Yakobe, nintthuneya okhala atthu oohikhuwa ni waaleela anamasoma ahu etthu antthuneyaaya otxentxa. Nave nintthuneya ororomela weera Yehova onimwapurulela atthu oowiyeviha ni waavaha ikuru awo anhawelaaya weera epake matxentxo mweekumini mwaya.—Yak. 4:10.

13. Moovarihani ni Yakobe 3:2 ni enoota, Yakobe aakhulenle eheeni?

¹³Yakobe khaisoona okhala ootthuneyaxa waapwaha atthu akina. Yakobe khaisoona okhala ootepa otthuneya waapwaha akristu akina, mwaha wooweera aari munnawe Yesu naari mwaha wooweera aakhalano miritti mikina. Owo mpaka aawitthanne akristu yaawo aasuwenlaawe, “asinna osiveleyaxa.” (Yak. 1:16, 19; 2:5) Owo khatonko woonihera weera owo aari omalela. Opwaha mwa yeeyo, owo ahihela mpuwa emaara uulummawe masu ala: “Vawi othene hiyo ninnattheka mwa itthu sintxipale.”—Mmusome Yakobe 3:2, ni enoota.

14. Mwaha wa heeni oraaya vootthuneya waaleela anamasomaahu a Biblya weera emaara ekina onnanixupa otthara miruku sa mBiblyani?

¹⁴Etthu ninxutteraahu: muupuweleke weera ootheene hiyo noottheka. Hiyo kontthuneya wuupuwela weera hiyo tootthuneyaxa waapwaha anamasoma ahu a Biblya. Mwaha wa heeni? Mwaha wooweera wakhala weera hiyo ninnawoonihera  anamasoma ahu a Biblya weera khanittheka, awo anookhala ookhulumuwa nave eneereke wuupuwela weera khewera opaka ele Muluku onavekelaawe opaka. Mene hiyo pooti waakhavihera anamasoma ahu a Biblya onvarela muteko Yehova wakhala weweera noopaka etthu ela: waakhulela weera khavankhweya imaara sootheene ovarela muteko miruku sa mBiblyani ni waalela wi Yehova oonikhavihera opaka matxentxo mweekumini.

15. Maphwanaphwaniho a Yakobe yaari a moota heeni? (Yakobe 3:2-6, 10-12)

¹⁵Yakobe annavarela muteko maphwanaphwaniho ookhweya ni oovara murima. Moohihovela, Yakobe aakhaviheriwa ni munepa wootteela wa Muluku. Apaale pooti weeraka owo axuttenre maphwanaphwaniho awo ni munnawe opatxera oyariwa, Yesu. Mwa ekaratta awe, Yakobe aavarela muteko maphwanaphwaniho okhweya ni oovareleya muteko.—Mmusome Yakobe 3:2-6, 10-12.

16. Vaavo nimpakaahu niphwanaphwaniho noovara murima, yookhumelelaya ti heeni?

¹⁶Etthu ninxutteraahu: nvarele muteko maphwanaphwaniho aanvara murima. Maphwanaphwaniho oothanliwa nnene, pooti ovara mirima sa atthu. Etthu nyuwo muntthunaanyu oxuttiha nvarihelaka muteko niphwanaphwaniho ennakhala mmuru mwaatthu. Khaavo mutthu aaweera opaka maphwanaphwaniho ooreeraxa ompwaha Yesu ni Yakobe, ottanre ntakihero nawe. Nnoorowa oweha niphwanaphwaniho na Yakobe ni woona-tho mwaha wa heeni niphwanaphwaniho nno naaraaya nooreera.

17. Mwaha wa heeni ninhimaahu weera niphwanaphwaniho nimphwanyaahu va Yakobe 1:22-25, ninnavareleya muteko nnene?

¹⁷ Mmusome Yakobe 1:22-25. Niphwanaphwaniho Yakobe aavarenlaawe muteko, naavareleya muteko vantxipale. Mwaha wa heeni? Nthowa noopatxera, mwaha wooweera Yakobe aasuwela nnene eheeni owo aatthunaawe oxuttiha. Mwa niphwanaphwanihonene nenla, owo aatthuna oxuttiha weera masu a Biblya weera evareleye muteko mweekumini mwahu, ontthuneya opakavo etthu ohiya opaahi omusomaru Biblya. Nintthuneya weera nivariheleke muteko ele ninxutteraahu mBiblyani mmo. Yakobe aavarihela muteko niphwanaphwaniho avarihelaka muteko etthu atthu ootheene yaasuwelaaya—eloola (espelho). Etthu heeni Yakobe aatthunaawe oxuttiha nniphwanaphwaniho nna? Khawaarowa okhala wamiruku mutthu orowa wiiwehera valoolani ni oona weera khasusunle nnene, nnamweera onneene hiihale ahimpakavo etthu.  Vamoha-moharu, khonrowa okhala wamiruku omusoma Biblya ni woona weera mutthu onnatthuneya otxentxa etthu mene ohimpaka matxentxo awo mweekumini.

18. Ipontu heeni tthaaru nintthuneyaahu wuupuwelela vaavo nimpakaahu maphwanaphwaniho owiiwanyeya?

¹⁸ Ninkela omutakiha hayi Yakobe ni ovarela muteko maphwanaphwaniho oowiwanyeya? Nnoowera opaka eyo nipakaka itthu tthaaru: (1) Muthanle niphwanaphwaniho ninkela omukhweela namasomaanyu wiiwexexa eheeni nyuwo muntthunaanyo oxuttiha. (2) Nvareleke muteko maphwanaphwaniho atthu antxipale asuwenlaaya. (3) Mwiiwanyeihe etthu heeni niphwanaphwaniho nanyu nintthunaaya oxuttiha. Vano wakhala weera nyuwo onnooxupani opaka maphwanaphwaniho mpakeke eheeni? Nyuwo pooti orowa va Índice das Publicações da Torre de Vigia. Muttapunyaka nipuro nneera “Ilustrações,” va nipuro nno nyuwo munoophwanya maphwanaphwaniho nyuwo mukhanlaanyu oovarela muteko. Mene muupuweleke weera maphwanaphwaniho anyu anikhala ntoko mikrofoni—mutthu onuuluma mmikrofonini wiiwanyeya nsu nawe waapwaha atthu akina. Nave maphwanaphwaniho annattittimihera ele muntthunaanyu oxuttiha. Nto murimaa, mwaavarelaka muteko maphwanaphwaniho. Nto nvareleke paahi mpontuni mootthuneya. Moohihovela hiyo nintthuna okhala anamahusiha ookhumela nnene, mene khaiyene niivuwiheke yeehu, nto opwaha mwa yeeyo, nintthuna waakhavihera atthu antxipale weera yeereleke empari emusi yoohakalala ya Yehova.

19. Ninkela woonihera hayi weera ninnavaha mwiitti emusi ahu yoomunepani?

¹⁹ Ekhaikhai weera hiyo khanaanoono eparakha Yakobe aaraaweno—yookhala ni munnawe oomalela. Mene hiyo nookhalano eparakha yoonvarela muteko Yehova vamoha ni emusi ahu ya omunepani, asinna ni asiroko akristu. Hiyo ninnoonihera weera ninnahela mwiitti emusi eyo vaavo nintthekulaahu vamoha ni asinna ni asirokora, ni tho vaavo ninkhalaahu vamoha nxutteraka nave-tho nirowaka ovara muteko woolaleera vamoha. Wakhala weera hiyo ninniilipihera otthara ntakihero na Yakobe onihiyenrawe, ninkela onvuwiha Yehova nave noorowa waakhavihera atthu ekhalanne murima wooreera wootthuna oxuttera ekhaikhai.