1, 2. 1) ¿Chumngelu pütrünque che maneluuhuequelai pu gobierno mu? 2) ¿Chem ngüneduamaiñ tüfachi troquiñ mu?

FAMÜLQUE mu pütrüquen che maneluuquelai tati pu gobierno mu. Tati pu gobierno ca tañi ley cümelcaquefi pu ricu müten, pu pofre femquelafi. Feimu Biblia feipi: ‘Tati pu che ngüneniequefi caquelu pu che, fei quiñentrür ñi huesalcalerpual engün’ (Ecl. 8:9). Ca femngechi famülque mu, pu loncolechi religioso huesaque dungu femqueingün. Feimu tati pu che pefiel mu tüfa, maneluuhuequelai Dios mu. Feimu enseñalfiliyiñ Biblia quiñe che, mülei taiñ quelluafiel ñi maneluhual Jehová mu ca pu loncolelu trahunche mu.

² Huelu pu chillcatuquelu müten ngelai ñi maneluhual Jehová ca tañi troquiñche mu, iñchiñ ca femngechi femaiñ. Chumten tripantu yeniefuliyiñ rume taiñ serfifiel Jehová, mülei taiñ loncontucual Jehová tañi cüme femquen rumel cüme tripaquei. Huelu quiñeque mu, cüdautuafuiñ taiñ loncontucual tüfa. Feimu, ngüneduamaiñ cüla dungu taiñ raquiduamelafeteu. 1) Papeltufiliyiñ Biblia mu ñi rupan quiñeque che. 2) Pu loncolelu feipieliyiñmu quiñeque dungu taiñ femal. Ca 3) rupaliyiñ huesaque dungu cüpalechi antü mu.

3. Papeltuliyiñ Biblia, ¿chem ramtuhuafuiñ?

 ³ Papeltufiel mu Biblia iñchiñ, ngüneduamqueiñ Jehová ñi chumfiel ta quiñeque che. Fei quiñeque mu ramtuhuafuiñ chemu ñi femfiel. Por ejemplo, Biblia feipi quiñe huentru ngümitumamüllmelu sabado antü mu. Ñi femün mu tüfa, Jehová condenaeyu ñi layal. Rupachi tripantu mu, David cudumfi ca huentru ñi domo ca langümfalmafi ñi füta, huelu Jehová perdonaeyu (Núm. 15:32, 35; 2 Sam. 12:9, 13). Fei iñchiñ ramtuhuafuiñ: “¿Chemu Jehová perdonafi ta David fütra culpalu? Huelu, ¿chumngelu condenafi ñi layal tati huentru ngümitumamüllquiyaulu?”. Taiñ quimal, peaiñ cüla dungu taiñ quelluaeteu papeltuliyiñ Biblia.

4. Ñi feipin Génesis 18:20, 21 ca Deuteronomio 10:17, ¿chumngechi quelluqueiñmu doi maneluhual Jehová ñi femquen mu?

⁴Quiñeque mu, Biblia feipiquelai com ñi rupan. Por ejemplo, quimnieiñ David ñi rüf repentiuhun tañi huesa femün mu (Sal. 51:2-4). Huelu, ¿chem piafuiñ cai ti huentru ngümitumamüllmelu? ¿Huesa duampei mai tañi femün mu? ¿Ca femquefui cuifi mu? Ngülamtungelu tañi femhuenoal, ¿feyentupei mai? Biblia feipilai. Huelu quimnieiñ ta Jehová “norngenochi dungu femquelai” (Deut. 32:4). Iñchiñ cüme juzgalayafuiñ ñi femün quiñe che, huelu Jehová cüme quimniei chumngechi ñi rupaquen ti dungu, feimu nor juzgachequei (papeltunge Génesis 18:20, 21; Deuteronomio 10:17). Doi quimfiliyiñ ñi chumngechi chengen ta Jehová, doi maneluhuaiñ ñi rumel cüme femquen ta Jehová. Famülque mu papeltuliyiñ Biblia, turpu entendelayafuiñ chi chumngelu Jehová ñi femün quiñeque dungu. Huelu maneluuqueiñ ta Chau Jehová norngei “com tañi femquen mu” (Sal. 145:17).

5. ¿Ca chumngelu huesa juzgacheafuiñ? (Inaduamnge ti huichulechi dungu “ Taiñ huelulcauquen mu com entendelayafuiñ ñi rupan”).

⁵Iñchiñ taiñ huelulcauquen mu, nor juzgachelayafuiñ. Jehová am deumaeteu iñchiñ quisu reque, feimu ayüqueiñ ñi cüme raquiduamangeal ta che (Gén. 1:26). Quiñeque mu “quimfiyiñ com ñi rupan” piafuiñ, huelu taiñ culpanchengen mu huesa juzgayafuiñ quiñeque che. ¿Acordaimi feichi Jehová ñi perdonafiel  pu niniveche? Jonás ayüucülelafui tañi femün mu Jehová. Jonás raquiduamquefui pu niniveche mülefui tañi apümcangeal müten (Jon. 3:10–4:1). Raquiduamaiñ chem rupai Jehová perdonafilu pu niniveche. Doi 120.000 niniveche repentiuhuingün, fei Jehová montuleyu engün. Quimfali Jonás huelulcaufui tañi raquiduam mu.

6. Jehová, ¿chumngelu ngelai taiñ feipiaeteu chemu ñi femquen quiñeque dungu?

⁶Jehová ngelai ñi feipiafiel tati pu che chemu ñi femquen quiñeque dungu. Quiñeque mu, Jehová eluhui ñi femal quiñe dungu, huelu allcütuñmafi ñi raquiduamcülen tañi pu serfiqueteu (Gén. 18:25; Jon. 4:2, 3). Ca quiñeque mu, Jehová feipifi engün chumngelu ñi femün quiñeque dungu (Jon. 4:10, 11). Huelu Jehová am taiñ deumaeteu, ngelai taiñ ramtuaeteu ñi chumal cam chemu ñi femün quiñeque dungu (Is. 40:13, 14; 55:9).

7. ¿Chem cüdautuafuiñ iñchiñ? ¿Chumngelu?

⁷ Maneluuqueiñ Jehová tañi cüme femquen mu, huelu quiñeque mu cüdautuafuiñ maneluhual ñi femün pu loncolelu. Quiñeque mu ramtuhuafuiñ: “Ñi dulliel pu loncolelu, ¿inapefingün mai Jehová ñi raquiduam cam quisu engün tañi raquiduam müten?”. Femngechi raquiduampelafui quiñeque che mülelu cuifi. Ca ngüneduamaiñ ñi rupan feitachi huentru ca ti rey David ñi nütramcapeel ti  parrafo cüla. Feitachi huentru ngümitumamüllquiyaulu sabado antü mu, condenangei ñi layal. Fei quiñe pariente ramtuupelai: “Moisés mai, ¿rüf ramtupefi ta Jehová tañi chumal?”. Ca femngechi David cudumfiel mu Bat-Seba, condenangeafulu ñi layal, huelu femngelai. Fei Urías tañi hueni, raquiduampelafui: “David allmalltui tañi reyngen, femngechi tañi condenangenoal”. Jehová dulliquefi quiñeque huentru ñi loncoleal trahunche mu, fei manelniefi. Iñchiñ ca mülefui taiñ maneluhual fei engün mu. Femnoliyiñ, ca maneluulayafuiñ Jehová mu.

8. ¿Chem dungu mu trürümngeafui ti trahunche hunen siglo mu ca famülque mu? (Hechos 16:4, 5).

⁸ Jehová elfalcünufi tati quim manelfal cona cam esclavo fiel y prudente ñi adnieafiel tañi troquiñche Mapu mu (Mat. 24:45). Hunen siglo mu, ti cuerpo gobernante adniequefi Jehová tañi pu che. Famülque mu, ca femngechi femmequei. Adniefi Jehová tañi pu che ca feipiquefi pu loncolelu tañi chumal engün (papeltunge Hechos 16:4, 5). Fei trahunche mu, pu loncolelu cüme inaquefi tañi feipieteu ti Cuerpo Gobernante. Feimu inafiliyiñ taiñ feipieteu ti Cuerpo Gobernante ca pu loncolelu, pengelaiñ taiñ maneluucülen Jehová mu.

9. ¿Chem dungu mu cüdautuafuiñ feyentual taiñ feipieteu pu loncolelu? ¿Chumngelu?

⁹ Quiñeque mu, cüdautuafuiñ taiñ inayal taiñ feipieteu pu loncolelu trahunche mu. ¿Chumngechi feipiafuiñ? Raquiduamnge tüfa: pichi rupachi tripantu mu, huiño adcünungetui tati trahunche ca tati circuito. Feimu, feipingei quiñeque peñi ca quiñeque lamngen ñi amual ca trahunche mu, femngechi ñi cüme pünengeal ti Trahunhue Ruca. Feipingerumeliyiñ taiñ amual ca trahunche mu, cüdautuafuiñ taiñ amual, el-lu am iñchiñ hueni, familia chi elafuiñ. ¿Jehová mai feipiquepefi pu loncolelu taiñ feipiaeteu  cheu taiñ trahuluhual? Femlai llemai. Feimu, cüdautuafuiñ taiñ inayal taiñ feipieteu pu loncolelu. Huelu Jehová maneluuquei pu loncolelu mu, iñchiñ ca mülei taiñ femal.⁠ *

10. ¿Chumngelu quelluntucuafiyiñ pu loncolelu? (Hebreos 13:17).

¹⁰ Quiñeque mu, pu loncolelu dulliafui quiñeque dungu taiñ müte ayüquenoel. Huelu quelluntucufiliyiñ engün, ca quelluntucuaiñ ñi quiñeucüleal Jehová tañi troquiñche (Efes. 4:2, 3). Com ti trahunche quelluntucufile pu loncolelu, feimu cüme amuleai (papeltunge Hebreos 13:17). Huelu doyelchi mai, pengelaiñ taiñ maneluucülen Jehová mu (Hech. 20:28).

11. ¿Chem mülei taiñ loncontucual fei taiñ doi maneluhual pu loncolelu mu?

¹¹ ¿Chem quelluafeiñmu maneluhual pu loncolelu mu? Loncontucuaiñ: pu loncolelu petu ñi femnon mu quiñeque dungu ti trahunche mu, rumel ngillatuquefingün ta Jehová tañi adnieaeteu. Cafei cüme ngüneduamquefingün chem pin Biblia ca ngüneduamquefingün quiñeque huercün dungu ñi entuel Jehová tañi troquiñche. Tati pu loncolelu ayüquei tañi ayühulafiel ta Jehová ca ayüqueingün ñi cüme cuidayafiel tati trahunche, quimnielu engün am tañi feipilelafiel ta Jehová chumngechi tañi cuidaquefiel tañi pu che (1 Ped. 5:2, 3). Raquiduamnge tüfa mu, fachantü pu che quehuaquei tañi tuhun mu, tañi religion mu ca politica dungu mu. Huelu Jehová tañi pu che quiñeucüleingün tañi serfiquefiel mu ta Jehová. ¿Chumngelu femqueingün? Fei Jehová quelluquefi tañi pu che ñi quiñeucüleal.

12. Pu loncolelu, ¿chem mu raquiduamafui ñi rüf repentiucülen quiñe che culpalu?

¹² Jehová manelfi pu loncolelu ti falin cüdau: ñi lifcüleal ti trahunche. Feimu quiñe cristiano fütra culpale, tati pu loncolelu mülei ñi cüme ngüneduamafiel tañi mülenagal ti trahunche mu. Por ejemplo, mülei tañi cüme inaduamal ñi rüf repentiucületun tañi huesa femün mu. Tati che feipiafui tañi repentiucülen, huelu ¿rüf üdefi tañi huesa femün mu? ¿Eluucülei tañi huiño femhuenoal? Tañi pu huesaque hueni ñi duam mu culpale, ¿eluucüleafui tañi hueniyehuenoafiel? Tati pu loncolelu ngillatuquefi ta Jehová ca cüme ngüneduamquefi chem tañi rupan ca chem pin ta Biblia. Cüme inaduamafingün tañi chumngechi llouquefiel tañi ngülamtungeel. Fei hula, pu loncolelu raquiduamaingün tañi chumal: tañi mülenagal trahunche mu cam quechanentungeal (1 Cor. 5:11-13).

13. ¿Chem raquiduamcüleafuiñ huemünentungele quiñe taiñ hueni cam familia?

¹³ ¿Ca chem dungu mu cüdautuafuiñ maneluhual pu loncolelu mu? Huemünentungele quiñe che trahunche mu. Hueniyenofiliyiñ cam familiayenofiliyiñ feitachi che fei huemünentungele, pürüm maneluhuafuiñ tañi femün pu loncolelu. Huelu huemünentungele quiñe taiñ hueni cam quiñe taiñ familia, ramtuhuafuiñ chi: “¿Cüme ngüneduampeingün mai pu loncolelu com tañi rupan? ¿Cüme juzgapeingün mai chumngechi ñi juzgachequen ta Jehová?” piafuiñ. ¿Chem quelluafeiñmu taiñ cüme raquiduamal tañi femquen mu tati pu loncolelu? Peafiyiñ.

14. Pu loncolelu huemünentufile quiñe taiñ hueni cam taiñ familia, ¿chem acordayafuiñ?

 ¹⁴ Loncontucuaiñ: Jehová mai feipiquei fütra culpale quiñe che, mülei ñi huemünentungeal trahunche mu. Femngechi cuñiutucungequei tati trahunche ca quellungequei tati culpalu. Raquiduamnge tüfa: quiñe che fütra culpale, huemünentungenole, elcünungei tañi müleal ta trahunche mu, feipiafui ta caquelu ca ñi huesa femal (Gál. 5:9). Cafei feiti fütra culpalu, “müte huesa dungu no tañi femün” piafui. Ca femngechi, ti culpachi che müte eluucülelayafui tañi cüme raquiduamtual ca tañi femhuenoal feiti huesa dungu (Ecl. 8:11). Quimtucuaiñ: pu loncolelu ‘Jehová ñi duam mu juzgaqueingün, quiñe huentru ñi duam no tati’ (2 Crón. 19:6, 7). Feimu, pu loncolelu huemünentufile quiñe che trahunche mu, Jehová ñi duam mu cüme ngüneduamfingün com ti dungu.

15. ¿Chemu fachantü mülei taiñ maneluhual Jehová ñi cüme femquen mu?

¹⁵ Pichilehuei ñi afal com ti huesaque dungu, feimu mülei taiñ doi maneluhual Jehová tañi cüme femquen mu. ¿Chumngelu? Acule ti fütra cutrancahun, feipingeaiñ taiñ chumal fei müte ayülayafuiñ chi taiñ feipingeal cam cüdautuafuiñ taiñ feyentual. Femngechi dungu mu rupaliyiñ, ngelai taiñ ramtuhual: “¿Rüf cüpapei mai Jehová mu ñi feipin pu loncolelu?” pilayaiñ. Inafemafiyiñ llemai. Loncontucuaiñ: Jehová dungunacümpalayaiñmu. Pu loncolelu mu feipiaiñmu taiñ chumal. Feimu famülque mu cüme inaliyiñ taiñ feipieteu pu loncolelu, ca femaiñ cüpalechi antü meu (Luc. 16:10).

16. ¿Chemu cüdautuafuiñ taiñ maneluhual Jehová ñi juzgachen mu cüpalechi antü mu?

¹⁶ ¿Ca chem dungu mu mülei taiñ maneluhual Jehová mu? Feichi juzgafile pu che cüpalechi antü meu. Famülque mu nieiñ chi quiñe taiñ familia cam taiñ hueni serfiquenofilu Jehová, huelu raquiduamcülefuiñ quiñe antü tañi serfiafiel ta Jehová engün. Huelu Armagedón mu, Jesús, Jehová ñi duam mu, juzgayafi tati pu che fei feipiai tañi apümcangeal cam ñi montual engün (Mat. 25:31-33; 2 Tes. 1:7-9). Iñchiñ feipilayaiñ inei tañi apümcangeal ca inei tañi mongetripayal (Mat. 25:34, 41, 46). ¿Maneluupeaiñ mai Jehová ñi cüme juzgayafiel tati pu che? Femngechi maneluhuaiñ ñi cüme juzgacheal cüpalechi antü meu.

17. Taiñ maneluucülen mu Jehová mu, ¿chem cümeque dungu llohuaiñ?

 ¹⁷ Jehová rupan juzgafile tati pu che, re cümeque dungu mületuai. Tati coilaque religion ca tati pu huesaque gobierno apümcangeai. Inei rume cutranhuelayai, com cüme feletuaiñ, füchahuelayaiñ ca lahuelayaiñ. Huaranca tripantu mu Satanás ca tati pu huesaque püllü traricünungeaingün, chumlayafingün rume tati pu che. Com tati huesaque dungu apümcangeai (Apoc. 20:2, 3). Maneluucülelu am Jehová mu iñchiñ, müna mañumtuafiyiñ.

18. ¿Chem quimeltuafeiñmu ñi femün pu israelche? (Números 11:4-6 ca 21:5).

¹⁸ Mongelen rumeliyiñ ti fütra cutrancahun mu, rupapelayaiñ cüdaungechi dungu mu. Fei, ¿maneluupeaiñ mai Jehová mu? Raquiduamnge tüfa: tati pu israelche tripalu Egipto mapu mu, müna echamenofui tati iyael tañi niequefel Egipto mapu mu. Doi mai, illamtufingün tati mana tañi elueteu Jehová (papeltunge Números 11:4-6; 21:5). Afle ti fütra cutrancahun, ¿ca femngechi raquiduam mai niepeaiñ tati pu israelche reque? Apümcangele com ti huesaque dungu, rume fentren cüdau nieaiñ. Müleafui taiñ liftuafiel ti Mapu ñi adcületual, fei ñi cüme mülehuengerpual. Müna cüdaungeai llemai. Fentren cüdau niealu am iñchiñ, ¿“chemu am fentren cüdau ta elumuqueiñ” piafiyiñ ta Jehová? ¿Illamüñmapeafiyiñ mai ta Jehová taiñ eluaeteu? Loncontucuaiñ: mañumtufiliyiñ ta Jehová fachantü, ca mañumafiyiñ cüpalechi antü meu.

19. Taiñ peel mu, ¿chumaiñ com iñchiñ?

¹⁹ Loncontucuaiñ taiñ peel tüfachi troquiñ mu. Jehová com tañi femqueel, cüme tripaquei. Ca mülei taiñ maneluhual tati pu loncolelu mu, Jehová tañi manelnieel. Ngoimanentulayaiñ Jehová taiñ feipicünueteu Isaías mu: “Tüngcülelmün ca maneluucülelmün ta iñche meu, nehuentuleaimün” (Is. 30:15).