1-2. (a) Ahabw’enki omuri obu bwire abantu bingi kiri kubagumira kwesiga abine obushoborozi? (b) Ni enki eki twaza kushwijuma omuri eki kicweka?

 OMURI obu bwire nikigumira abantu bingi kwesiga abine obushoborozi. Abantu bakareba munonga obutegeki buri kufa aha bagiga n’aha bategeki, butari kufa aha bacene. Bibuli negira ngu: “Omuntu nayekuriza ahari mugenzi weye ngu amukore kubi.” (Mub 8:9) Nambwenu, abebembezi b’amadini nibakora ebintu bibi, ebyo bituma abantu batayesiga Ruhanga. Obwe rero, omuntu yayikiriza ngu tumwegese Bibuli, nituba tushemerire kumukwasa kwesiga Yehova n’abu yatireho omu nsi.

² Konka, abegi ba Bibuli tibo bonka abashemerire kwega kwesiga Yehova n’ekitongore ceye. N’obu twakuba tumazire emyaka myingi turi kuhereza Yehova, titushemerire kubanganisa ku ebi Yehova ari kukora ari byo birungi munonga. Hine obu hari kubaho ebintu ebiri kubasa kutuma twareka kwesiga Yehova. Omuri eki kicweka twaza kushwijuma ahantu hashatu ahu okwikiriza kwitu kuri kubasa kugezibwa: (1) Twaba turi kushoma enkuru z’omuri Bibuli, (2) twahebwa obuhabuzi omu kitongore ca Yehova (3) n’ebizibu ebi turije kubugana omu biro by’omu misho.

3. Ni bata oku enkuru z’omuri Bibuli ziri kubasa kutuma twabanganisa ahari Yehova?

 ³ Twaba turi kushoma Ekigambo ca Ruhanga, nitubasa kwebuza aha buryo obu Yehova yatwarizemu abantu bamwe n’aha nsharamu ezi yakozire. Ecokureberaho: Omu kitabo c’Okubara, Yehova akacwera omushija owaronzire  enku ahari sabato orw’okufa. Omu kitabo ca kabiri ca Samweli, hahwireho ebinyigana byingi bwanyima yaho, Yehova akasaasira Omugabe Dawudi owakozire ekibi c’obushambani n’obwisi. (Kub 15:32, 35; 2 Sam 12:9, 13) Nitubasa kwebuza ngu, ‘ahabw’enki Yehova yasaasire Dawudi owakozire ekibi c’obushambani n’obwisi, konka akacwera orw’okufa omushija owakozire ekibi ecabire kiri kurebeka nk’ecorobi?’ Kugira ngu tutunge ecokugarukamu, reba ebintu bishatu ebi tushemerire kutekatekaho twaba turi kushoma Bibuli.

4. Ni bata oku ebiri omu Kutandika 18:20, 21 n’omu c’​Ebiragiro 10:17 biri kutuma twayesiga emanja za Yehova?

⁴ Burijo ti ko Bibuli eri kutugambira byona ebiri kukwata aha nkuru. Ecokureberaho: Nitumanya ku Dawudi yayehanire ebibi byeye abyihire aha mutima. (Zab 51:2-4) Konka shi, ni bata oku ogo mushija owashishire ekiragiro ca sabato yatwarize? Mbehi akashasha ahabw’ekibi eki yabire akozire? Mbehi akaba yagomireho ekiragiro ca Yehova? Mbehi obuhabuzi obu yabire nahebwa akaba nayanga kubuhurikiza? Bibuli teri kubigamba. Konka, eki tushemerire kwijuka ni eki: Yehova “tagira okutahikirira.” (Bir 32:4) Ebi ari kukora byona nabikora agendire aha mazima atari aha bi abandi bagamba, okushorora ninga shi ekindi kintu ekiri kubasa kutuma abantu bagira emitekatecere etahikire ahari eyo nsharamu. (Shoma omu Kutandika 18:20, 21; Ebiragiro 10:17.) Oku turi kukizaho kwega ebiri kukwata ahari Yehova n’emisinge yeye, ni ko turi kukizaho kwesiga emanja zeye. N’obu twakushoma Bibuli tukebuza ebibuzo ebi tutari kubasa kutungira ebyokugarukamu hati, ebi turi kumanya ahari Ruhanga nibituma twayesiga ku ari “ohikirire omu mitwarize yeye yona.”—Zab 145:17.

5. Ni bata oku okutahikirira kuri kubasa kutuma twareba ebintu omu buryo obutahikire? (Nambwenu reba akashanduku akari kugira ngu, “ Okutahikirira nikutuma twareba ebintu omu buryo obutahikire.”)

⁵ Tituri kubasa kucwa emanja ge burijo ahakuba tituhikirire. Ruhanga akatuhanga omu kishushani ceye, ni yo nshonga turi kuba nitwenda kureba abantu bari kutwarizibwa ge. (Kut 1:26) Konka ahabw’okuba tutahikirire nitubasa kureba ebintu omu buryo obutahikire n’obu twakuba turi kutekateka ku twine  ebihamya byona. Ecokureberaho: Yijuka oku cashashire Yona, Yehova ku yasaasire abantu b’omuri Nineve. (Yon 3:10–4:1) Konka reba ecarugiremu. Abantu b’omuri Nineve abari kukira aha 120,000 abayehanire bakarokoka! Bikahendera Yona ari we ori kwetenga obuhabuzi, atari Yehova.

6. Ahabw’enki Yehova atashemerire kutushobororera ensharamu ezi ari kukora?

⁶ Yehova tari kuba ashemerire kushobororera abantu ecatuma yakora ensharamu. Ni amazima, Yehova akaba nayikiriza abahereza beye b’omu bwire bwa kare kugira eki bagamba aha nsharamu eyi yakora. (Kut 18:25; Yon 4:2, 3) Kandi obumwe akaba nabashobororera enshonga ahabw’enki yakora ensharamu nanka. (Yon 4:10, 11) Konka tikiri kwetengesa ngu Yehova atushobororere enshonga ahabw’enki yakora ensharamu. Ahabw’okuba ari Omuhangi witu, tari kwetenga ngu tumuhe oruhusya rw’okukora ekintu.—Isa 40:13, 14; 55:9.

7. Ni kiha kigezo eki turi kubasa kubugana kandi ahabw’enki?

⁷ Nitwikiriza tutari kubanganisa ku Yehova burijo ari kukora ebihikire. Konka nikibasa kutugumira kwesiga abashija abu yatireho. Nitubasa kwebuza yaba abashija abine obushoborozi omu kitongore ceye bari kugendera aha bitekateko byeye ninga ebyabo. Eco kikabaho aha bantu ababireho omu bwire bwa Bibuli. Reba ebyokureberaho by’omuri  paragurafu ya 3. Omunyabuzare w’omushija owayisirwe ahabw’okushisha ekiragiro ca sabato, nabasa kuba yayeburize yaba Musa yaburize Yehova mbere y’okuranga ngu ogo mushija ayitwe. Kandi munywani wa Uriya w’Omuhiti, nabasa kuba yatekatekire ku Dawudi yakoresize obushoborozi bweye nk’Omugabe kugira ngu ayeyiheho orubanja. Konka amazima gari ngu, tituri kubasa kwesiga Yehova twaba tutari kwesiga abashija abu yatireho omu nsi kandi na we ari kubesiga.

8. Ni kaha kakwate akari ahagati y’ebiri kugambwa omu Byakozirwe 16:4, 5 n’oku ekibina c’Abakristo kiri kukora omuri obu bwire?

⁸ Omuri obu bwire Yehova nayebembera ekitongore ceye c’omu nsi akoresize “omwambari w’omwesigwa kandi w’omunyabwenge.” (Mat 24:45) Nk’oku Akakiko k’Abarisa k’omu kinyigana c’okubanza kabire nikakikora, ogo mwambari na we nareberera abahereza ba Ruhanga kandi aha obuhabuzi abazehe b’ekibina. (Shoma omu Byakozirwe 16:4, 5.) Abazehe na bo, nibaha obwo buhabuzi ab’omu kibina. Nitwereka ku turi kwesiga Yehova turi korobera obuhabuzi obu ekitongore kiri kutuha n’abazehe.

9. Ni ryari obu kiri kutugumira korobera ensharamu ezi abazehe bari kukora kandi ahabw’enki?

⁹ Obumwe, hine obu kiri kubasa kutugumira kwikirizingana n’ensharamu eyi abazehe bari kuba bakozire. Ecokureberaho: Omu myaka eyahwire, ebibina bimwe bikabuganisibwa hamwe, catuma ebibina bimwe byatebwa omu bundi bucweka. Omuri obwo buryo abazehe bakashaba ababurizi kuhindura ebibina kugira ngu bakorese ge Enju z’Obukama. Yaba ori omu bashabirwe kuhindura ekibina okareba oku kigumire kusigaho abanyabuzare n’abanywani bawe. Mbehi abazehe nibaba batungire omwika oguri kwera oguri kubagambira izina rya buri muburizi n’ekibina eki ashemerire kuzamu?  Ingaha. Eco nikibasa kutuma kugendera ahari obwo buhabuzi catugumira. Konka Yehova nayesiga ensharamu ezi abazehe bari kukora kandi n’itwe tushemerire kubesiga. *

10. Nk’oku biri kugambwa omu Baheburayo 13:17, ahabw’enki tushemerire kukoringana ge n’abazehe?

¹⁰ Ahabw’enki tushemerire kukoringana ge n’abazehe kandi tukashagika esharamu zabo n’obu twakuba tutazikunzire? Ni ahabw’okuba, okukikora nikirinda obumwe bw’abahereza ba Ruhanga. (Efe 4:2, 3) Ebibina nibigasirwa, abantu bona bashagika ensharamu z’akakiko k’abazehe. (Shoma omu Baheburayo 13:17.) Ekiri kukira byona nitwereka Yehova ku turi kumwesiga, turi kukoringana ge n’abu yatireho ngu batufeho.—Byak 20:28.

11. Ni enki ekiri kubasa kutukwasa kukizaho kwesiga obuhabuzi obu abazehe bari kutuha?

¹¹ Nitukizaho kwesiga obuhabuzi obu abazehe bari kutuha twayijuka ku bari kubanza bashaba omwika oguri kwera mbere y’okukora ensharamu eziragire engaruka aha kibina. Nambwenu nibashwijuma betonzire emisinge y’omuri Bibuli n’obuhabuzi obu ekitongore ca Yehova catireho. Nibaba bari kwenda kuhimbisa Yehova n’okuteraho abahereza beye obuhabuzi oburabagasire. Abo bashija b’abesigwa nibamanya ku Yehova arije kubabuza oku bahikirize omurimo ogu Yehova yabahire. (1 Pet 5:2, 3) Yetegereze eki: Abahereza ba Yehova b’omu nsi yona nibamuramya omu bumwe, n’obu bari omu nsi eyebaganisizizemu ahabw’amoko g’abantu, amadini, n’eby’obutegeki. Eco nikibaho ahabw’emigisha eyi Yehova ari kuha ekitongore ceye!

12. Ni biha bintu ebi abazehe bashemerire kushwijuma baba bari kureba yaba omuntu ayehanire?

¹² Yehova akaha abazehe omurimo gw’amani g’okurinda ekibina ngu kigume kiri ekiri kwera. Hagira omuntu owakora ekibi c’amani, Yehova nashaba abazehe kushwijuma yaba ogo muntu ashemerire kuguma omu kibina. Nibaba bashemerire kushwijuma betonzire yaba ogo muntu ashashire ahabw’ekibi eki akozire. Nabasa kurebeka nk’oyehanire, konka shi mazima nayanga ekibi eki akozire? Mbwenu shi amaririre kutagaruka kukora eco kibi? Yaba banywani beye babi ari bo batumire yakora eco kibi, mbehi nayenda kubeyihaho? Abazehe nibashaba, bareba eki Bibuli eri kugamba, kandi bashwijuma oku ogo muntu ari kwehurira ahabw’ekibi eki ari kuba akozire. Bwanyima nibashwijuma yaba ogo muntu okozire ekibi ari kubasa kuguma omu kibina. Hine obu ari kuba ashemerire kubingwa omu kibina.—1 Kor 5:11-13.

13. Ni eha mitekatecere eyi turi kubasa kugira munywani witu ninga omunyabuzare yabingwa omu kibina?

¹³ Ni enki ekiri kubasa kutuma tutayesiga abazehe? Omuntu obingirwe omu kibina yaba atari munywani witu ninga omunyabuzare nikitworobera kwikiriza ensharamu z’abazehe. Konka shi ogo muntu obingirwe ku yakuba ari munywani witu wa hihi. Nitubasa kwebuza yaba abazehe bashwijumire ebihamya byona ninga yaba bakozire ensharamu nk’oku Yehova yakuba azikozire. Ni enki ekiri kubasa kutukwasa kugira emitekatecere mirungi aha nsharamu ezikozirwe?

14. Ni enki ekiri kubasa kutukwasa abazehe basharamu ngu omuntu owu turi kukunda abingwe omu kibina?

 ¹⁴ Tushemerire kwijuka ku okubinga omuntu omu kibina eri entebekanisa ya Yehova eri kugasira ab’omu kibina bona kandi ku eri kubasa kugasira omuntu okozire ekibi. Omuntu otari kwehana yaguma omu kibina nabasa kukishisha. (Gal 5:9) Nambwenu, nabasa kutamanya obuhango bw’ekibi eki akozire kituma atahindura emitekatecere yeye n’ebikorwa byeye kugira ngu Yehova ashube amusime. (Mub 8:11) Nitubasa kwesiga tutari kubanganisa ku abazehe baba bari kusharamu yaba omuntu ashemerire kubingwa omu kibina, ogo murimo batari kuguzanisa. Nibamanya ku nk’oku abaramuzi b’omuri Isirayeli ya kare bakikozire, “batari kuramurira abantu ahobwe ku ni Yehova.”—2 Bus 19:6, 7.

15. Ahabw’enki tushemerire kwesiga obuhabuzi obu Yehova ari kutuha omuri obu bwire kukira kare hona?

¹⁵ Ahakuba omuheru gw’egi nsi guri hihi, tushemerire kukizaho kwesiga ebi Yehova ari kukora kukira kare hona. Ahabw’enki? Omu kubonabona kwingi nitwija kutunga obuhabuzi oburije kurebeka nk’obutari kukora. Kandi Yehova tarije kugamba n’itwe butunu. Nayija kutuha obuhabuzi akoresize abashija abu yatireho ngu bamwemerere. Obwo tiburije kuba buri obwire bw’okubanganisa aha buhabuzi obu twahebwa turi kwebuza ngu: ‘Obu buhabuzi niburuga ahari Yehova ninga ni benetata abari kubweteraho?’ Mbehi omuri obwo bwire noyija kwesiga Yehova n’ekitongore ceye? Nikirugirira aha ku ori kureba obuhabuzi obu turi kuhebwa omuri obu bwire. Waba ori kwesiga obuhabuzi obu turi kuhebwa omuri obu bwire kandi okabworobera, nikija n’okukorobera omu kubonabona kwingi.—Luk 16:10.

16. Ni enki ekiri kubasa kutuma tutayesiga emanja ezi Yehova arije kucwa juba aha?

¹⁶ Nambwenu tushemerire kutekateka twetonzire aha ku turije kutwaza aha muheru gw’egi nsi obu Yehova ariba ari kucwa emanja. Twine amasiko ku abantu bingi abatari kuhereza Yehova harimu n’abanyabuzare bitu, barije kuhinduka bakamuhereza. Konka ahari Haramagedoni Yehova nayija kukora ensharamu yeye y’aha muheru akoresize Yesu. (Mat 25:31-33; 2 Tes 1:7-9) Omuri obwo bwire ti itwe abarije kusharamu abu Yehova arigirira embabazi ninga abu atarizigirira. (Mat 25:34, 41, 46) Mbehi nitwija kwikiriza  emanja za Yehova ninga nikija kutucwa entege tureke n’okumuhereza? Tushemerire kukizaho kwesiga Yehova hati kugira ngu twije kumwesiga omu bwijwire omu biro by’omu misho.

17. Ni bata oku emanja za Yehova zirije kutugasira aha muheru gw’egi nsi?

¹⁷ Tekateka oku turije kwehurira omu nsi ensya ya Ruhanga, twareba ebirije kuruga omu manja za Yehova. Edini y’ekishuba, obushubuzi, n’obutegeki ebyatwarize kubi abantu nibyija kuba bitakiriho. Oburwire, okukura, n’okufisa abantu bitu abu turi kukunda nibyija kuba byarugireho. Sitane na ba dayimoni nibija kusibwa emyaka 1000. Engaruka zona ezi baresire ahabw’okugoma kwabo nizija kurugaho. (Kush 20:2, 3) Mazima nitwija kushemererwa munonga ahakuba twayesigire ebi Yehova ari kukora!

18. Ni gaha amashomo agu turi kubasa kwegera aha cokureberaho c’Abisirayeli ekiri omu Kubara 11:4-6 na 21:5?

¹⁸ Mbehi n’omu nsi ensya nitwija kubugana ebintu ebiri kubasa kutuma twabanganisa aha bi Yehova ari kukora? Ecokureberaho: Reba ecabireho hahwireho obwire buce Abisirayeli barugire omuri Misiri. Abamwe bakatandika kwetombita ahabw’okubura ebyokurya ebi babire nibarya omuri Misiri, kandi manu eyi Yehova yabire nabaha tibaragirebamu kantu. (Shoma omu Kubara 11:4-6; 21:5.) Mbwenu shi n’itwe nitwija kugira emitekatecere nk’eyo bwanyima y’okubonabona kwingi? Tituri kumanya oku emirimo erije kuba eri kwingana obu turije kuba turi kuboneza ensi n’okugihindura paradiso. Nihabasa kwija kuba hariho emirimo myingi y’okukora kandi embera nizibasa kwija kuba zitorobi. Mbwenu shi nitwija kwetombita ahabw’ebi Yehova arije kutuha omuri obwo bwire? Amazima gari ngu: Oku turi kukizaho kusima ebi Yehova ari kutuha omuri obu bwire, ni ko turije n’okukikora omuri obwo bwire.

19. Gamba omu bugufu enshonga nkuru eziri omuri eki kicweka?

¹⁹ Ebi Yehova ari kukora, burijo nibiba bihikire. Eco tushemerire kucesiga tutari kubanganisa. Nambwenu, tushemerire kwesiga abu Yehova yatireho ngu batuhe obuhabuzi. Otariyebwa ebigambo bya Yehova ebi yagambire abirabize aha muhanuzi Isaya ebiri kugira ngu: “Omu kutuza n’omu kwesiga ni mwo amani ganyu gariruga.”—Isa 30:15.