1, 2. (1) ¿Kʼãrẽa ẽbẽrabara ĩjãna ẽ leyba akʉza nokʼorãba jarabʉra? (2) ¿Kʼãrẽta akʉdai naʉ̃ artikulodera?

 IDI ewadera, ẽbẽrabara ĩjãna ẽ leyba akʉza nokʼorãba zokʼabʉra, ũdupanʉ baera leyba akʉza nokʼorãbara kʼarebabʉta yi plata erbʉta, mamina ẽbẽra plata neẽãra kʼareba ẽ. Daizeze Bedʼeaba jarabʉ: «Yumakẽrãba ewari jõmaʉ̃nẽ awuru yumakẽrãta zokʼabʉ maʉ̃ kayirua oita» (Ecl. 8:9). Religion nokʼorãba nemitiata opanʉ baera, ʉ̃kʉrʉ ẽbẽrabara Daizezeta ĩjãkĩrãna ẽ. Maʉ̃ kʼarea, ẽbẽraba Daizeze Bedʼea kʼawua jʉ̃drʉbʉrʉdera kʼarebadaibara Jeowata ĩjãnamarẽã akʉza Jeowaba iyi pʉwʉrʉ zokʼamarẽã ẽbẽra jʉrʉdasida.

² Daizeze Bedʼea kʼawua panʉrabara ĩjã kʼawuadaibara Daizezeta akʉza iyi organizasionta. Akʉza dayirã aba abaka Daizeze odebʉta poaga biobamina, idubʉda ẽ baibara ĩjãita Jeowaba jõma aripe obʉta, edaʉde krĩchaseabʉ baera Daizezebara jõma aripe oẽãta. Maʉ̃ kʼarea, naʉ̃ artikulode kʼawuadayi kʼãrẽa mawũã krĩchabibʉta. Nããra, Daizeze Bedʼea lebʉde. Yi ũmeta, Jeowa organizasionba jarabʉrʉde dayirãba nekʼãrẽ omarẽã. Yi ũbeata, ʉ̃ra zeide dayirãba bedʼea zroma ũdubʉrʉde.

3. ¿Kʼãrẽta krĩchaseapanʉ Daizeze Bedʼea lebʉdera?

 ³ Dayirãba Daizeze Bedʼea lebʉrʉde, edaʉde krĩchaseapanʉ, ¿kʼãrẽa Jeowabara mawũã osi? ¿Kʼãrẽa ẽbẽrarã  mawũã edasi? Bari jaraita, Daizeze Bedʼeaba jarabʉ, Jeowaba ẽbẽra aba beabisita sabadode tʉbʉ jʉrʉsi baera. Mamina Segundo libro Samuelde jarabʉ, Daizezebara kĩrãduasita Davidba ẽbẽra wẽrã erkãĩnata akʉza maʉ̃ kima bea zokʼadara (Núm. 15:32, 35; 2 Sam. 12:9, 13). Dayikʉza widiseabʉ: «¿Kʼãrẽa Jeowabara kĩrãduasi Davidba nemitia odara, mamina bea zokʼasi ẽbẽra sabadode tʉbʉ jʉrʉdara, iya nemitia mejãcha oẽ basimina?». Nama widibʉ panʉita Daizeze Bedʼea lebʉrʉde, nekʼãrẽ kĩrã ũbea kĩrãbeibara.

4. ¿Génesis 18:20, 21, Deuteronomio 10:17de jarabʉdera, ¿sãwũã audre ĩjãbibʉ Jeowaba obʉra?

⁴ Daizeze Bedʼeade nebʉrabʉra edaʉde jõma jara ẽ kʼãrẽ berabaridata. Bari jaraita, dayirãbara kʼawuapanʉ Davidbara soiduba jẽda krĩchasita iya mitia odara (Sal. 51:2-4). Mamina dayirãbara kʼawua ẽ yi ẽbẽra sabadode tʉbʉ jʉrʉdabara nãã ũrĩ ẽ basita Jeowaba zokʼadata, mawũã ẽ bʉrʉ iya sabado ley ũrĩ ẽ bada kʼarea jẽda soiduba krĩchasita iya nemitia odara. Naʉ̃ta Daizeze Bedʼeaba jõma jara ẽ baera, maʉ̃ kʼarea dayirãbara kʼawua jarabe ẽ Daizezebara jõma aripe obʉ ẽãta. Mamina, dayirãbara kʼawuapanʉ naʉ̃ta Daizeze ʉ̃rʉ: «Iyiʉ̃mera kayirua neẽ» (Deut. 32:4). Jeowabara kʼawua oẽ, ẽbẽra abaʉta audre kãgabʉ baera wuabemaraira, mia kʼawua oẽ wuabemaraba ẽbẽra abaʉ ʉ̃rʉ jarabʉ kʼarea (akʉra Génesis 18:20, 21; Deuteronomio 10:17). Audre kʼawuapanʉbʉrʉ Jeowa ʉ̃rʉ akʉza iya zokʼabʉ ʉ̃rʉ, audre ĩjãnañi iya jõma obʉra aripe obʉta. Daizeze Bedʼea lepanʉne dayikʉza wididara daya panʉbe ẽãta maʉ̃ kʼarea krĩcha orara, ¿kʼãrẽa? Dayirãba biʼia kʼawuapanʉ baera Jeowaba «jõma aripe obʉta» (Sal. 145:17).

5. ¿Kʼãrẽa dayirãbara aripe kʼawua jarabeda ẽ? (Akʉra rekuadro « Nemitia omia baera aripe kʼawua jarabeda ẽ»).

⁵ Edaʉde dayirãbara aripe kʼawua jarabeda ẽ jõmaʉ̃ta nemitia omia baera. Jeowaba dayirãra iyi kĩrãkʼa osi baera,  maʉ̃ kʼarea dayirãbara kãgapanʉ ẽbẽrarã jõmaʉ̃ta bia edadamarẽã (Gén. 1:26). Dayirãbara edaʉde krĩchaseabʉ jõma aripe kʼawua obʉta, jõma kʼawuapanʉ baera kʼãrẽ berabaridata. Mamina, naʉ̃ta aripe obeda ẽ dayirãra nemitia omia baera. Kĩrãbedadrʉ Jonásʼra mejãcha kĩrʉsita Jeowaba kĩrãduaside nínivitaraba nemitia odata (Jon. 3:10–4:1). Mamina krĩchara naʉ̃ta, 120.000 nínivitara ãya nemitia obʉta jẽda krĩchasida baera ẽdrʉsida beideba. Naʉ̃ba ũdubibʉ Jonásbara aripe kʼawua jara ẽ basita ẽbẽra ʉ̃rʉra, mamina Jeowabara aripe osi.

6. ¿Jeowabara dayirã jara ũrĩbibaraka iya obʉra?

⁶ Jeowabara kʼãrẽa dayirã jara ũrĩbira nesida ẽ iya obʉ ʉ̃rʉra. Jeowabara ũrĩbasi ʉ̃kʉrʉ nezokʼara bedʼeara, naʉ̃raba jarapanasi baera sãwũã sentibʉta iya oda kʼarea (Gén. 18:25; Jon. 4:2, 3). Edaʉde, Jeowabara jara ũrĩbibasi kʼãrẽa mawũã osita (Jon. 4:10, 11). Jeowaba nããra mawũã jara ũrĩbibasimina, naʉ̃ba jarakĩrãkʉ ẽ idi ewade, dayirã jara ũrĩbibarata iya kʼãrẽa mawũã obʉta. Jeowaba dayirãta parãsi baera iya obʉra dayirãba kʼawua eda jaraita nesida ẽ (Is. 40:13, 14; 55:9).

7. Edaʉde dayirãita, ¿kʼairata ĩjãita zare?

⁷ Dayirãitara zare ẽ Jeowaba zokʼabʉra soiduba oita. Mamina edaʉde zareabʉ ẽbẽra Jeowaba jʉrʉda bedʼea ũrĩta. Krĩchaseapanʉ ãya jarabʉra wãrĩnu Jeowadeba zebʉta, mawũã ẽ bʉrʉ ãyi krĩchadeba obʉta. Kĩrãbedadrʉ yiza  parrapo 3debʉta, ẽbẽra sabado ley ũrĩ ẽ bada mebẽrãbara krĩchaseabasi: ¿Wãrĩnu Moisésʼra bedʼeasika Jeowaʉ̃me, naʉ̃ yumakẽrã beamarẽã zokʼai nãã? Akʉza Urías neũdukʼawuaba krĩchaseabasi, Davidba Urías kima erkãĩsimina akʉza bea zokʼasimina Uríasta, beada ẽ basita nokʼo basi baera. Jeowabara jʉrʉsi ẽbẽrarãta iyi organizasionta zokʼamarẽã akʉza kongregasionta. Maʉ̃ kʼarea dayirãba ĩjãna ẽ bʉrʉ naʉ̃ra ẽbẽra bedʼeata, jarabeda ẽ ĩjãpanʉta Jeowata.

8. ¿Kʼãrẽne abarikabʉ Hechos 16:4, 5de jarabʉta, idibema kongregasionʼʉ̃me?

⁸ Idi Jeowabara zokʼabʉ iyi organizasion nama egorodera nezokʼara jipa akʉza biʼia krĩchabʉraneba (Mat. 24:45). Zõrãrã burubia siglo nããbemane kĩrãkʼa, idibema zõrãrã burubiabara akʉbʉ Daizeze pʉwʉrʉ naʉ̃ drʉa jõmaʉ̃nẽbʉta akʉza ãya kʼãrẽta oita jarabʉ zõrãrã kongregasionebemaʼa (akʉra Hechos 16:4, 5). Zõrãrãbara akʉpanʉ Jeowa organizasionba zokʼabʉta kongregasione odamarẽã. Dayirãba ũrĩpanʉne Jeowa organizasionba zokʼabʉta akʉza zõrãrãba jarabʉta, mawũã ũdubipanʉ ĩjãbʉta jõma Jeowaba obʉra aripe obʉta.

9. ¿Kʼãrẽa dayirãitara zareabʉ ũrĩta zõrãrãba jarabʉra?

⁹ Edaʉde dayirãitara zare zõrãrãba jarabʉta ũrĩta. Aranʉweda, ʉ̃kʉrʉ kongregasionʼra ãba zesi, mawũã Daizeze Nokʼo ʉ̃rʉ bedʼea baride bia zokʼadaita. Ãya wididara dayirãta awuru kongregasionma wãmarẽã dayirãitara zarea baseabʉ dayirã mebẽrã amaeita. ¿Daizeze jaure zareabara jarasika zõrãrãʼa mebẽrã aba abaka saʉ̃ kongregasione  wãĩbarata? Mawũã ẽ. Maʉ̃ kʼarea dayirãbara krĩchaseabʉ ãya zokʼabʉra ãyi krĩchadeba obʉta, maʉ̃ba edaʉde zareabʉ ũrĩta. Jeowaba ĩjãbʉbʉrʉ ãyita, dayirãbida ĩjãnaibara ãyide. *

10. Hebreos 13:17de jarabʉdebara, ¿kʼãrẽa ũrĩbara zõrãrã kongregasionebemaba jarabʉra?

¹⁰ ¿Kʼãrẽa dayirãbara ũrĩnãibara zõrãrãba jarabʉra ãya jarabʉra dayima bʉ ẽ mina? Mawũã opanʉbʉrʉ kʼarebapanʉ Daizeze pʉwʉrʉ ãba panamarẽã (Efes. 4:2, 3). Akʉza kongregasionʼra ãba sobiapanʉ, zõrãrãba jarabʉ ũrĩbʉde (akʉra Hebreos 13:17). Adewara Jeowa ĩjãbʉta ũdubidayi, ũrĩpanʉbʉrʉ zõrãrã kongrasionba jarabʉta, naʉ̃ra ẽbẽra iya jʉrʉsi baera kongregasion akʉmarẽã (Hech. 20:28).

11. ¿Kʼãrẽba kʼarebaseabʉ zõrãrãba jarabʉ audre ĩjãita?

¹¹ Dayirãbara kʼawuapanʉ zõrãrãra Daizezeʼa yiwidʼipanʉta iyi jaure zareata diamarẽã krĩcha jidai naweda. Naʉ̃ba kʼarebabʉ dayirãba audre ĩjãita ãya jarabʉra. Adewara ãyara jʉrʉpanʉ wãrĩnu Daizeze Bedʼearadebemane akʉza Daizeze organizasionba jarabʉta. Ãyara Jeowata sobiabikĩrãpanʉ adewara bia akʉkĩrãbʉ iyi pʉwʉrʉta. Zõrãrãbara kʼawuabʉ Jeowaba akʉbʉta ãya sãwũã akʉbʉta iyi pʉwʉrʉra (1 Ped. 5:2, 3). Krĩchara naʉ̃ta: Idi ewadera ẽbẽrarã yõpanʉ politika kʼarea akʉza religion kʼarea, mamina Daizeze pʉwʉrʉra ãbapanʉ, jʉ̃zaba Daizeze wãrĩnuʼa yiwidʼita. Naʉ̃ra mawũã berabaribʉ Jeowaba akʉbʉ baera iyi pʉwʉrʉta.

12. ¿Zõrãrãbara kʼãrẽta biʼia akʉibara mebẽã abaʉba soidʉba jẽda krĩchasi kʼawuaita nemitia odata?

¹² Jeowabara jʉ̃ãbʉ zõrãrãba kongregasionta jaigʉa ẽã erbamarẽã. Maʉ̃ba, mebẽã abaʉba nemitiata osibʉrʉ, zõrãrãbara kʼawua jidadaibara, naʉ̃ mebẽãra kongregasione baseabʉ kʼawuaita. Ãyara akʉibara naʉ̃ mebẽã nemitia odara wãrĩnu soiduba jẽda krĩchabʉ kʼawuaita iya odara. Yi mebẽã nemitia odaba jarabʉbʉrʉ wãrĩnu jẽda krĩchabʉta iya nemitia odara, zõrãrãbara biʼia akʉdaibara iya wãrĩnu jʉrabʉ kʼawuaita nemitia oira, wua wãrĩnu nemitia oẽãta. Akʉza kʼawuaibara iya neũdukʼawua kayirua kʼarea nemitia osibʉrʉ maʉ̃ra wãrĩnu idubʉsi kʼawuaita. Zõrãrãra Daizezeʼa yiwidʼiyi kʼawuadaita kʼãrẽ berabaridata akʉza jʉrʉdayi kʼãrẽta jarabʉta Daizeze Bedʼeaba. Naʉ̃ba kʼarebayi zõrãrãba kʼawuaita yi nemitia odara wãrĩnu jẽda krĩchabʉ kʼawuaita iya odara. Mawũã ãya kʼawua jidaseabʉ mebẽãra kongregasioneba ãĩ bʉeita, mawũã ẽ bʉrʉ edababita (1 Cor. 5:11-13).

13. ¿Kʼãrẽta krĩchaseabʉ dayi neũdukʼawuata kongregasioneba ãĩ bʉedara? 

¹³ ¿Kʼãrẽta berabariseabʉ ẽbẽra aba kongregasioneba ãĩ bʉedara? Maʉ̃ra dayitara bedʼea neẽ, dayi neũdukʼawua bia ẽ baera. Mamina ãĩ bʉedara dayi neũdukʼawuata mawũã ẽ bʉrʉ dayi mebẽrãta, dayirãba krĩchaseabʉ, ¿wãrĩnu zõrãrãbara jõma kʼawuasika kʼãrẽ berabaridara? Mawũã ẽ bʉrʉ krĩchaseabʉ, ¿wãrĩnu osidaka Jeowaba  zokʼabʉde? Naʉ̃ta berabarira, ¿kʼãrẽba kʼarebai zõrãrãba jidadara bia akʉita?

14. Zõrãrãba kongregasioneba ãĩ bʉera ẽbẽra aba, ¿kʼãrẽta kĩrãbeibara dayirãbara?

¹⁴ Kĩrãbedaibara Jeowabara zokʼabʉta kongregasionra jaigʉa ẽã erbamarẽã. Maʉ̃ kʼarea kongregasioneba ãĩ bʉepanʉbara nebiata wẽbʉ yi ẽbẽra nemitia odaita akʉza kongregasionʼita. Mamina yi nemitia obʉta ãĩ bʉda ẽ bʉrʉ kongregasioneba, nemitia obiseabʉ wuabema mebẽrã kongregasionebʉta (Gál. 5:9). Adewara yi nemitia odata ãĩ bʉe ẽ bʉrʉ, iya krĩchaseabʉ nemitia zroma oẽ basita akʉza krĩcha ẽ bayi iya nemitia obʉra wua oẽ baita, mawũã jẽda Jeowa kʼawa baita (Ecl. 8:11). Zõrãrãba kʼawua obʉrʉdera mebẽã ʉ̃rʉ, mawũã «bari ãya kãgabʉta jida ẽ, naʉ̃ra audre yibia ãyita Jeowaita obʉ baera» (2 Crón. 19:6, 7).

15. ¿Kʼãrẽa idira audre ĩjãibara Jeowaba obʉra aripe obʉta?

¹⁵ Naʉ̃ ewari jõbodoarepanʉ baera, dayirãbara audre ĩjãnaibara Jeowaba obʉra jõma aripe obʉta. Zʉbʉria zroma zebʉrʉdera, Jeowabara iyi organizasioneba kʼawua jarayi, maʉ̃ra dayimara zareabʉ kĩrãkʼa chuayi ũrĩta, adewara krĩchaseabʉ kʼãrẽa mawũã obʉta. Mamina ũrĩnaibara, Jeowara dayirã aba abakaʉʼa bedʼea ẽ baera maʉ̃ jara ũrĩbita. Maʉ̃ ewaridera dayikʉza krĩcha ẽ baibara zõrãrãba jarabʉra, ¿wãrĩnu Jeowadeba zesika? Mawũã ẽ bʉrʉ, ¿ãya krĩchabʉta jarabʉka? ¿Bʉara ĩjãika, Jeowata akʉza iyi organizasionta zʉbʉria zroma zebʉrʉdera? Bʉa idi ũrĩbʉbʉrʉ Jeowa organizasionba jarabʉta, zʉbʉria zroma zebʉrʉdebida ũrĩñi (Luc. 16:10).

16. Jeowaba kʼawua oi ewari zebʉrʉdera, ¿kʼãrẽta krĩchaseapanʉ?

¹⁶ Dayirãra kʼãrẽta sãwũã odai, Jeowaba kʼawua oi ewari zebʉrʉdera. Dayirãba kãgabʉmina dayirã mebẽrãta akʉza wuabema ẽbẽrata Jeowa ʉ̃rʉ Kʼawuabipanʉrã bamarẽã, Daizeze yõ ewari zebʉrʉdebʉrʉ Jeowaba Jesudeba kʼawua jidayi kʼãrẽta berabarita ãyira (Mat. 25:31-33; 2 Tes. 1:7-9). Dayirãbara kʼawua jarabe ẽ kʼaita Daizezebara so borekea akʉibarata akʉza kʼaita mawũã akʉbe ẽãta (Mat. 25:34, 41, 46). ¿Dayirãbara ĩjãika Jeowaba kʼawua jidabʉra? Mawũã ẽ bʉrʉ, ¿Jeowara idubʉika  iya kʼawua jidada kʼarea? Maʉ̃ kʼarea, idi ewaridera audre ĩjãnaibara Jeowata, mawũã opanʉbʉrʉ ʉ̃ra zeide iya jõma obʉra ĩjãnañi.

17. ¿Kʼãrẽ nebiata ũdudayi Jeowata ĩjãpanʉbʉrʉ?

¹⁷ Krĩchara sãwũã panaita ẽjũã biade. Neẽbayi politikorata akʉza religion zeri ẽãba ẽbẽra mejãcha zʉbʉria obibʉta. Wua kayakabayi, zõna ba ẽ bayi akʉza beika bayi, dayirãta adewara dayirã mẽbẽrata. Diaruta adewara iyi kaidu panʉrasida neẽbayi. Maʉ̃ba ãya nemitia obadara wua ũduda ẽ bayi (Apoc. 20:2, 3). Dayirãbara naʉ̃ta jõma ũdudayi ĩjãsida baera Jeowaba obʉra, jõma aripe obʉta.

18. Números 11:4-6 akʉza 21:5 nama jarabʉ israelitara ʉ̃rʉ, ¿kʼãrẽta kʼawuapanʉ ãyi yizadeba?

¹⁸ Ẽjũã bia zebʉrʉdera, ¿dayirãitara zarea baseabʉka ĩjãita Jeowaba aripe obʉra? Krĩchara naʉ̃ta: ¿Kʼãrẽta berabarisi israelitara Egiptodeba ẽdrʉda tẽãra? Ʉ̃kʉrʉra imitia bedʼeasida, Egiptode yiko bada kĩrãkʼabʉta neẽ baera, adewara igara akʉ jʉ̃drʉsida Daizezeba mana diadara (Akʉra Números 11:4-6; 21:5). ¿Abarika berabariseabʉka zʉbʉria zroma berabarida tẽã? Dayirãbara kʼawua ẽ sãwũã trajadaibarata naʉ̃ drʉa ara odaita, mawũã ẽjũã bia babita. Mawũã oira nããrara zarea baseabʉ maʉ̃ ewaridera. ¿Imitia bedʼea jʉ̃drʉdaika Jeowaba dayirãʼa nekʼãrẽ diabʉ kʼarea? Dayirãba maʉ̃ ewaride sãwũã bʼaita jõma kʼawua ẽ mina, kʼawuapanʉ idi dayirãba Jeowa biga diabʉ iya dayirã nekʼarẽ diabʉ kʼãrẽa, maʉ̃ ewari zebʉrʉdera audre biga diadayi Jeowaba nekʼãrẽ dayirãʼa diai kʼarea.

19. ¿Kʼãrẽta kʼawuasida naʉ̃ artikulodera?

¹⁹ Dayirãbara ewari jõmaʉ̃nẽ ĩjãibara Jeowaba obʉra jõma aripe obʉta. Adewara ĩjãnaibara Jeowaba ẽbẽra jʉrʉdabara iya krĩchabʉ aripe oita. Kĩrãdua ẽ baibara Jeowaba Isaíasʼa jaradata: «Marara zarea panañi aduʼapanʉbʉrʉ akʉza ĩjãbʉta ũdubidara» (Is. 30:15).