1-2. a) Poukisa roun patché moun ka trouvé sa rèd pou yé fè sa-ya ki gen otorité konfyans ? b) Kisa nou ké wè annan sa artik-a ?

 JÒDLA, sa rèd pou roun patché moun krè sa-ya ki gen roun otorité. Yé ka wè ki gouvèrnman ké lalwa souvan ka protéjé sa-ya ki rich ké sa-ya ki gen pouvwar, mé yé pa djè ka idé sa-ya ki maléré. A sa menm Labib-a ka di : « Moun ka dominé moun pou yé malò » (Eccl. 8:9). Anplis di sa, roun patché chèf rélijyé ka fè mové bagaj é akoz di sa, roun patché moun pa ka fè Bondjé konfyans ankò. Donk, lò roun moun ka asèpté étidyé Labib-a ké nou, nou divèt idé li gen konfyans annan Jéova mé osi gen konfyans annan sa-ya i chwazi asou latè-a pou réprézanté li.

² A vré, a pa sa-ya ki ka étidyé Labib-a rounso ki divèt anprann fè Jéova ké so òrganizasyon konfyans. Menm nou ki annan lavérité-a dipi plizyèr lannen, nou pa divèt bliyé ki a fason Jéova ka fè ki toujou pi bon. Détan sèrten bagaj pouvé rivé nou é fè nou bliyé sa. Annan sa artik-a, nou ké palé di trwa sitiasyon ki pouvé fè nou pédi nou lafwa : 1) lò nou ka li sèrten istwè annan Labib-a, 2) lò òrganizasyon Jéova-a ka bay nou roun dirèksyon pou swiv, é 3) lò nou ké jwenn problèm dimen.

3. Kouman sèrten istwè nou ka li annan Labib-a pouvé fè nou pédi nou konfyans annan Jéova ?

 ³ Lò nou ka li Labib-a, pitèt nou ka pozé nou kò késyon parapòrta fason Jéova aji ké sèrten moun é asou sèrten désizyon i pran. Parèkzanp, annan liv Nombres, nou ka li ki Jéova fè yé tchwé roun Israyélit pas i té ranmasé bwa pannan saba-a. Mé, annan dézyèm liv Samuel, nou ka anprann ki plizyèr santenn lannen apré, Jéova pardonnen rwa David ki té fè roun adiltèr é ki té tchwé roun moun (Nomb. 15:32, 35 ; 2 Sam. 12:9, 13). Pitèt nou pouvé doumandé nou kò : « Poukisa Jéova pardonnen David ki fè roun adiltèr é ki tchwé roun moun, mé i fè yé tchwé ròt mouché-a pou roun bagaj ki ka parèt mwen grav ki sa ? » Pou nou réponn sa késyon-an, annou wè trwa bagaj nou divèt sonjé lò nou ka li Labib-a.

4. Kouman Genèse 18:20, 21 ké Deutéronome 10:17 ka fè nou gen plis konfyans annan désizyon Jéova ka pran ?

⁴ A pa tout tan Labib-a ka bay nou tout détay asou roun istwè. Parèkzanp, nou savé ki David répanti vré parapòrta sa i té fè-a (Ps. 51:2-4). Mé mouché-a ki pa rèspèkté lalwa asou saba-a, ki kalité moun i té sa ? Ès i rigrété sa i té fè-a ? Ès i té ja dézobéyi lalwa Jéova-a anvan ? Ès i pa kouté avèrtisman yé bay li ? Labib-a pa ka di nou anyen asou sa. Mé i gen roun bagaj nou pouvé sir : Jéova « pa janmen enjis » (Deut. 32:4). I toujou ka apiyé so désizyon asou tout enfòrmasyon-yan. I pa ka pézé moun ké wéy, i pa ka kouté sa moun-yan ka di ni pyès ròt bagaj ki ka anpéché moun wè roun sitiasyon kou i fika (li Genèse 18:20, 21 ; Deutéronome 10:17). Pi nou ka anprann konnèt Jéova ké so prensip, pi nou ka gen plis konfyans annan désizyon i ka pran. Menm si lò nou ka li roun istwè annan Labib-a nou ka pozé nou kò késyon é nou pa gen répons-a lanmenm, nou konnèt Jéova asé pou nou sir ki i « jis annan tousa i ka fè » (Ps. 145:17).

5. Kou nou pa parfè kouman sa ka aji asou fason nou ka jijé-a ? (gadé osi ti karé-a «  Kou nou pa parfè, nou pa ka rivé byen jijé »).

 ⁵ Nou pa parfè donk nou pa ka rivé byen jijé. Bondjé fè nou kou li menm (Gen. 1:26). Donk, kou li, nou lé jistis fèt pou tout moun. Mé kou nou pa parfè, nou pouvé mal jijé roun sitiasyon, menm lò nou ka pansé ki nou gen tout enfòrmasyon-yan. Parèkzanp, sonjé kouman Jonas té faché ké Jéova lò i désidé pardonnen moun Niniv (Jon. 3:10 – 4:1). Mé, sonjé sa ki pasé paské Jéova pardonnen yé. Pasé 120 000 moun sové ! Donk, finalman, a Jonas ki té mal jijé yé, a pa Jéova.

6. Poukisa Jéova pa gen pou èspliké nou poukisa i ka pran roun désizyon ?

⁶ Jéova pa gen pou randé moun kont asou désizyon i ka pran. A vré, tan-lontan Jéova pèrmèt so sèrvitèr-ya di sa yé té ka pansé asou désizyon i té pran ouben désizyon i té ka alé pran (Gen. 18:25 ; Jon. 4:2, 3). Détan, i jis èspliké poukisa i té pran roun désizyon (Jon. 4:10, 11). Mé Jéova pa gen pou èspliké nou poukisa i ka pran roun désizyon. Kou a li ki kréyé nou, i pa bézwen doumandé nou si nou dakò, ki a anvan ki a apré i fè roun bagaj (Is. 40:13, 14 ; 55:9).

7. Kisa ki pouvé rèd pou nou, é poukisa ?

⁷ Nou dakò pou di ké tout nou tchò ki Jéova ka toujou fè sa ki drèt. Mé pitèt sa rèd pou nou fè moun-yan i chwazi pou réprézanté l’ konfyans. Pitèt nou ka doumandé nou kò si sa-ya ki gen roun tibi otorité annan so òrganizasyon ka aji soulon dirèksyon Jéova ka bay ouben ès yé ka aji dapré sa yé lidé ka di yé fè. Pitèt a sa osi roun ran ki viv annan lépòk Labib-a doumandé yé kò. Annou réfléchi asou èkzanp nou wè annan  paragraf 3-a. Roun moun annan fanmi mouché-a ki pa té rèspèkté lalwa-a asou saba-a pitèt doumandé so kò si Moyiz té vréman doumandé Jéova sa i té pou fè anvan i di yé tchwé l’. É pou Ouri Itit-a, sa-la so madanm té kouché ké David, pitèt roun annan so zanmi pansé ki David profité i té rwa pou chapé anba pinisyon i té mérité-a. Nou pa pouvé di ki nou ka fè Jéova konfyans si nou pa ka fè sa-ya i chwazi asou latè-a konfyans, paské Jéova li menm ka fè yé konfyans.

8. Kouman sa nou ka li annan Actes 16:4, 5 ka sanblé ké fason asanblé krétyen-an ka maché jòdla ?

⁸ Jòdla, Jéova ka sèrvi « èsklav fidèl ké avizé-a » pou dirijé parti so òrganizasyon ki asou latè-a (Mat. 24:45). Kou kolèj santral-a annan prémyé syèk-a, sa èsklav-a ka véyé asou pèp Bondjé-a asou tout latè-a é yé ka di ansyen-yan annan asanblé-ya ki dirèksyon pou yé swiv (li Actes 16:4, 5). Ansyen-yan yé menm ka gadé si asanblé-ya ka swiv sa dirèksyon-an. Nou ka montré nou ka fè Jéova konfyans annan fason i ka fè bagaj-ya lò nou ka swiv dirèksyon òrganizasyon-an ké ansyen-yan ka bay nou.

9. Kitan sa pouvé rèd pou nou soutni roun désizyon ansyen-yan ka pran, é poukisa ?

⁹ Détan nou pouvé trouvé sa rèd pou nou soutni désizyon ansyen-yan ka pran. Parèkzanp, i pa gen lontan, yé chanjé fason roun patché asanblé ké sirkonskripsyon té òrganizé. É détan ansyen-yan doumandé proklamatèr-ya alé idé rounòt asanblé pou byen sèrvi tout plas i gen annan sal di Rwayonm-yan. Si yé ka  doumandé nou alé annan rounòt asanblé pitèt nou ké trouvé sa rèd pou nou lésé nou zanmi ouben nou fanmi. Ès Jéova ka fè ansyen-yan savé ki koté yé divèt voyé chak proklamatèr ? Non. A pou sa, sa pouvé rèd pou nou fè sa yé ka doumandé nou fè-a. Mé, Jéova ka fè ansyen-yan konfyans pou pran sa kalité désizyon-yan. Donk nou menm osi nou divèt fè yé konfyans *.

10. Dapré Hébreux 13:17, poukisa nou divèt soutni désizyon ansyen-yan ka pran ?

¹⁰ Poukisa nou divèt soutni ansyen-yan é swiv désizyon yé ka pran, menm si a pa sa désizyon-yan nou pi kontan ? Paské si nou ka fè sa, nou ka idé pèp Bondjé-a rété ansanm ansanm (Éph. 4:2, 3). Lò tout moun ka swiv ké imilité désizyon ansyen-yan ka pran, asanblé-a ka vin pi fò (li Hébreux 13:17). É sa ki pi enpòrtan-an, lò nou ka soutni sa-ya Jéova ka fè konfyans pou pran swen di nou, nou ka montré li ki nou ka fè li konfyans (Actes 20:28).

11. Kisa ki pouvé idé nou gen plis konfyans annan dirèksyon ansyen-yan ka bay nou ?

¹¹ Lò ansyen-yan ka palé di problèm asanblé-a ka jwenn, yé ka priyè pou Jéova bay yé lèspri sen. Si nou ka sonjé sa, nou ké gen plis konfyans annan dirèksyon yé ka bay nou. Anplis di sa, yé ka pran tan chaché prensip-ya ki ka alé ké sitiasyon-an é yé ka sèrvi konsèy òrganizasyon Jéova-a ka bay yé pou gidé yé. Sa yé lé, a fè Jéova plézi é fè tousa yé pouvé pou pran swen di so pèp. Yé savé ki yé ké gen kont pou randé Bondjé asou fason yé ka pran swen di so pèp (1 Pierre 5:2, 3). Sonjé sa : annan roun monn koté pyès moun pa ka tonbé dakò akoz di zafè ras, rélijyon ké lapolitik, sèrvitèr Jéova-ya ka adoré vré Bondjé-a yé tout ansanm annan lapè. A sèlman paské Jéova ka béni so òrganizasyon ki sa ka rivé fèt !

12. Kisa ansyen-yan divèt gadé lò yé ka chaché savé si roun moun ka répanti ?

¹² Jéova bay ansyen-yan roun rèsponsabilité. Yé divèt fè asanblé-a rété pròp. Lò roun krétyen ka fè roun péché grav, Jéova ka doumandé ansyen-yan désidé si sa moun-an pouvé rété annan asanblé-a. Roun bagaj yé divèt chaché savé, a si moun-an ka répanti vré pou sa i fè-a. Pitèt i ka di i ka répanti, mé ès i vréman rayi sa i fè-a ? Ès i byen désidé pa roukoumansé sa péché-a ? Si a mové zanmi ki fè l’ fè sa, ès i paré pou arété maché ké yé nèt ? Ansyen-yan ka priyè, é yé ka chaché annan Labib-a toupannan yé ka byen gadé tout enfòrmasyon yé gen é yé ka gadé osi kisa moun-an ki péché ka rousanti parapòrta sa i fè-a. Apré sa, yé ka désidé si i pouvé rété annan asanblé-a. Détan, yé divèt mété l’ dèrò (1 Cor. 5:11-13).

13. Kisa nou pouvé doumandé nou kò si yé ka mété roun zanmi ouben roun moun annan nou fanmi dèrò di asanblé-a ?

¹³ Kisa ki pouvé anpéché nou fè ansyen-yan konfyans ? Lò moun-an yé mété dèrò-a, a pa roun bon zanmi ouben roun moun annan nou fanmi, pitèt sa fasil pou nou asèpté désizyon ansyen-yan pran. Mé si aprézan moun-an yé mété dèrò-a, a nou bon moun, pitèt nou pouvé pè ki ansyen-yan pa tchenbé kont di tousa ki pasé ouben pitèt nou pouvé doumandé nou kò si yé vréman jijé sitiasyon-an kou Jéova té ké fè l’. Kisa ki  pouvé idé nou wè sitiasyon-an kou nou divèt wè l’ ?

14. Kisa ki pouvé idé nou byen réyaji si ansyen-yan ka désidé mété roun zanmi ouben roun moun annan nou fanmi dèrò di asanblé-a ?

¹⁴ Nou divèt sonjé ki a Jéova ki prévwè èskominikasyon-an é ki sa ka poté bon bagaj, ki pou asanblé-a ki pou moun-an ki péché-a. Si yé té ka pèrmèt roun moun ki péché rété annan asanblé-a, sa moun-an té ké pouvé fè ròt-ya péché osi (Gal. 5:9). Anplis di sa, pitèt i pa té ké rékonnèt ki i fè roun péché ki grav. É pitèt i pa té ké wè poukisa i divèt chanjé fason i ka pansé ni fason i ka aji pou i viré byen ké Jéova (Eccl. 8:11). Nou pouvé sir ki, lò yé ka désidé si yé divèt mété roun moun dèrò di asanblé-a, ansyen-yan pa ka jwé ké sa rèsponsabilité-a. Yé savé ki, kou jij-ya annan Israyèl tan lontan-an, ‘a pa pou moun yé ka jijé, mé a pou Jéova’ (2 Chron. 19:6, 7).

15. Poukisa nou bézwen gen konfyans annan dirèksyon Jéova ka bay nou aprézan plis pasé anvan ?

¹⁵ Kou lafen sa monn-an pròch rivé, nou divèt fè Jéova konfyans annan fason i ka fè bagaj-ya plis pasé anvan. Poukisa ? Paské, pannan gran tribilasyon-an, pitèt yé ké di nou fè bagaj ki ké parèt nou dròl, difisil pou obéyi, ouben nou ké pansé ki sa bagaj-ya pa gen sans. Jéova pa ké vini palé pou nou chak. I ké dirijé nou gras a sa-ya i chwazi pou réprézanté li. A pa la nou ké divèt gen dout asou dirèksyon yé ké bay nou ouben doumandé nou kò : « Ès sa dirèksyon-an ka vréman vini di Jéova ouben ès a roun désizyon frè-ya ki ka dirijé òrganizasyon-an pran yé menm konsa ? » Ès to ké fè Jéova ké so òrganizasyon konfyans pannan sa lépòk enpòrtan-an ? Fason to ka wè dirèksyon òrganizasyon Jéova-a ka bay to jòdla ké idé to réponn sa késyon-an. Si to gen konfyans annan dirèksyon to ka rousouvwè jòdla é to pa ka pédi tan pou obéyi, a sa to ké fè osi pannan gran tribilasyon-an (Luc 16:10).

16. Kisa ki ké rivé dimen ki ké pouvé fè nou arété fè Jéova konfyans ?

¹⁶ I gen rounòt bagaj nou divèt panga : a fason nou ké réyaji lò Jéova ké jijé a lafen sa monn-an. Jòdla, nou ka èspéré ki roun patché moun ki pa ka sèrvi Jéova ké désidé sèrvi li anvan lafen-an rivé. Annan sa-ya i gen nou fanmi osi. Mé lò Armagédon ké rivé, Jéova ké itilizé Jézi pou désidé kisa i ké fè ké yé (Mat. 25:31-33 ;  2 Thess. 1:7-9). A pa nou ki ké gen pou désidé kimoun Jéova ké sové ni kimoun i pa ké sové (Mat. 25:34, 41, 46). Ès nou ké gen konfyans annan désizyon i ké pran ouben ès nou ké arété adoré l’ paské nou pa ké dakò ké désizyon i pran-an ? A aprézan pou nou fè nou konfyans annan Jéova vin pi fò, konsa nou ké rivé fè l’ konfyans dimen annan tout bagaj.

17. Lò lafen sa monn-an ké rivé kouman nou ké profité di tout désizyon Jéova pran ?

¹⁷ Imajiné kisa nou ké rousanti annan monn nouvo-a lò nou ké wè kisa ki rivé gras a tout désizyon Jéova pran. Fo rélijyon-an pa ké la ankò é i pa ké gen pyès sistèm komèrsyal ankò ki la yenki pou fè soumaké ni pyès sistèm politik ki profité anlè moun é ki fè yé soufri. I pa ké gen moun malad ankò, moun pa ké vin vyé ankò é moun nou kontan pa ké mouri ankò ! Yé ké fronmen Satan ké so démon pannan mil lannen. Tout mové bagaj ki rivé akoz di yé ké disparèt (Rév. 20:2, 3). A pa ti kontan nou ké kontan sa jou-a paské nou fè Jéova konfyans !

18. Kisa èkzanp Israyélit-ya nou ka jwenn annan Nombres 11:4-6 ké 21:5 ka anprann nou ?

¹⁸ Ès i ké gen bagaj annan monn nouvo-a ki ké pouvé fè nou arété fè Jéova konfyans ? Gadé sa ki rivé parèkzanp roun ti moman apré Israyélit-ya soti Éjip. Roun ran koumansé plenn yé kò pas yé pa té gen manjé yé té gen an Éjip, é yé koumansé méprizé lamann Jéova té ka bay yé-a (li Nombres 11:4-6 ; 21:5). Ès nou ka riské fè kou yé apré gran tribilasyon-an ? Nou pa savé ki kantité travay i ké gen pou nétwayé latè-a é pou fè l’ divini piti piti roun paradi. Pitèt nou ké gen bokou travay pou fè, é pitèt lavi-a pa ké fasil o koumansman. Ès nou ké plenn nou kò pou sa Jéova ké bay nou ? Ès nou ké gen sa toupé-a ? I gen roun bagaj nou pouvé sir : pi nou kontan sa Jéova ka bay nou aprézan, pi nou ké kontan sa i ké bay nou dimen.

19. Ki bagaj enpòrtan nou wè annan sa artik-a ?

¹⁹ Fason Jéova ka fè bagaj-ya toujou bon. Nou divèt sir di sa. Nou divèt mété nou konfyans osi annan sa-ya Jéova ka sèrvi pou di nou sa pou nou fè. Pa janmen bliyé sa Jéova fè profèt Izayi di : « Men sa ki ké sa zòt fòrs : rété kalm é fè mo konfyans » (Is. 30:15).