1-2. (a) Ahkaw ahkang nga ai ni hpe masha ni hpa majaw nau n kam ma ai kun? (b) Ndai sumhpa hta hpa lam bawngban na kun?

YA ATEN hta, ahkaw ahkang nga ai ni hpe masha ni nau n kam mat sai. Asuya ni, tara upadi ni gaw, sahti ni, ahkang aya kaba ai ni hpe myi man grau jaw nna, matsan ai ni hpe tara rap ra ai hku kanawn mazum ai lam n nga ai hpe shanhte chye ai. “Masha shada uphkang ai gaw, hkra machyi ai lam ni sha byin shangun ai” ngu Chyum Laika hta tsun da ai gaw grai teng ai. (Hpj 8:9, NWT) Makam masham ningbaw nkau gaw, akyang lailen n kaja ai majaw, nkau gaw, Karai hpe n kamsham mat ai. Dai majaw, marai langai ngai hte Chyum Laika hkaja ai shaloi, Yehowa hte shi a ginding aga dat kasa ni hpe kam wa hkra karum ya ra ai.

² Chyum ga sharin ni sha, Yehowa hte uhpung hpe kam ra ai n re. Tengman ai lam hta shaning grai na sai ni pyi, Yehowa a galaw ai lam ni gaw, galoi mung kaja htum re ai hpe kam ra ai. Kalang lang, dai kam ai myit chyam dinglik hkrum chye ai. Ndai sumhpa hta, masa lam 3 hpe bawngban mat na re. (1) Chyum Laika labau nkau hpe hti ai shaloi, (2) Yehowa a uhpung kaw na lam matsun lu ai shaloi, (3) Htawm hpang hta mayak mahkak ni hkrum wa ai shaloi.

3. Chyum Laika labau nkau gaw, Yehowa hpe kam ai myit hpe gara hku chyam dinglik hkrum chye ai kun?

 ³ Chyum Laika hti ai shaloi, masha nkau mi hte Yehowa kanawn mazum ai lam, dawdan lam nkau jahkrat ai lam hpe ntsen ai myit nga chye ai. Ga shadawn, Laban Nhtoi hta, hpun  hta ai Israela langai hpe Yehowa si dam jaw ai lam hpe Bu Hkawm Laika hta hti lu ai. Shaning grai na ai hpang, numshaw ai amu galaw nna, masha sat ai mara galaw ai Hkawhkam Dawi hpe Yehowa mara raw ya ai hpe, Lahkawng Samuela hta hti lu ai. (Bhk 15:32, 35; 2 Sa 12:9, 13) ‘Numshaw nna, masha sat ai Dawi hpe gaw, Yehowa mara raw ya nna, mara kachyi sha galaw hkrup ai wa hpe si dam jaw ai gaw, hpa majaw kun?’ ngu anhte myit hkrup na re. Dai ga san hpe htai na matu, Chyum Laika hti ai shaloi, matsing da ging ai lam 3 hpe bawngban yu ga.

4. Ningpawt 18:20, 21 hte Tara Jahprang 10:17 gaw, Yehowa a jeyang ai lam ni hpe kam na matu gara hku karum ya ai kun?

⁴Chyum Laika labau langai a ahkri ahkrai lam ni hpe ayan tsun dan ai n re. Ga shadawn, Dawi gaw, tinang galaw ai lam hpe teng sha myit malai lu ai lam anhte chye ai. (Shk 51:2-4) Raitim, Laban Nhtoi a tara hpe tawt lai ai wa gaw, gara zawn masha rai? Galaw wa ai lam hpe myit malai lu ai kun? Shawoi hta mung, Yehowa a ga n madat wa ai wa rai kun? Sadi jaw lam hpe hpa zawn n nawn ai wa kun? Nyet kau ai baw pyi nga wa ai kun? Chyum Laika hta n tsun da ai. Raitim, Yehowa gaw, “mara n rawng ai” Karai re ai hpe kam mai ai. (Trj 32:4) Lam yawng hpe madung tawn nna jeyang ai. Shinggyim masha ni zawn, myi man lata ai lam n nga ai. Kaga ni tsun ai hpe madat ngut ai hpang she, dawdan ra ai n re. Shinggyim masha ni a jeyang ai lam gaw, dai lam ni a majaw shut chye ai. (Ningpawt 18:20, 21; Tara Jahprang 10:17 hpe hti u.) Yehowa a lam, Karai a tsang madang ni a lam hpe grau chye wa magang, Karai a jeyang ai lam ni hpe grau kam wa magang re. Chyum Laika labau langai hta, ya mahtai n nga yang pyi, Karai a lam atsawm chye ai majaw, “lam shagu hta ding hpring nga ai” hpe kam ai.​—Shk 145:17.

5. Anhte a n hkum tsup ai lam gaw, tara rap ra ai lam hpe gara hku hkra machyi shangun ai kun? (“ N Hkum Tsup Ai Gaw Tara Rap Ra Ai Lam Hpe Shai Mat Shangun” ngu ai lawk hpe yu u.)

⁵Anhte a tara rap ra ai lam gaw hkum tsup ai lam n nga ai. Anhte gaw, Karai Kasang a hkrang bung sumla hte maren hpan da hkrum ai majaw, shinggyim masha ni tara rap ra ai hku kanawn mazum hkrum ai hpe mu mayu ai. (Nin 1:26) Raitim, n hkum tsup ai ni re ai majaw, lam yawng hpe chye ai ngu shadu da yang pyi, shut ai hku jeyang hkrup chye ai. Ga  shadawn, Ninewe masha ni hpe tsawra myit madun na matu Yehowa dawdan ai shaloi, Yona grai pawt wa ai hpe myit yu u. (Yon 3:10–4:1) Raitim, Karai Kasang tsawra myit madun ai majaw, hpa akyu lu wa ai kun? Myit malai lu ai Ninewe masha 120,000 jan asak lawt wa ai. Yehowa galai shai ra ai n re ai sha, Yona mahtang galai shai ra ai.

6. Tinang a dawdan lam hte seng nna anhte hpe Yehowa hpa majaw n sanglang dan ra ai kun?

⁶Tinang a dawdan lam hte seng nna masha ni hpe sanglang dan na lit Yehowa hta n nga ai. Lai wa sai aten hta, tinang a dawdan lam hte seng nna, mayam ni a hkamsha lam hpe tsun na ahkang jaw wa ai. (Nin 18:25; Yon 4:2, 3) Kalang lang gaw, tinang a dawdan lam hte seng nna sanglang dan ai. (Yon 4:10, 11) Raitim, dai hku sanglang dan na matu Yehowa hta lit n nga ai. Hpan Madu re ai majaw, lama ma garai n galaw shi ai aten hta mung, galaw ngut ai hpang hta mung, anhte hpe ahkang n hpyi ra ai.​—Esa 40:13, 14; 55:9.

7. Anhte a matu manghkang gaw hpa rai kun? Hpa majaw kun?

⁷ Jaw ai hpe Yehowa galoi mung galaw ai hpe anhte tsep kawp kam ai. Raitim, Karai a shinggyim dat kasa ni hpe kam na matu gaw yak chye ai. Yehowa a uhpung hta, ahkang aya nga ai ni gaw, Yehowa a lam matsun hte maren galaw nga ai kun? (sh) Shanhte ra ai hku galaw nga ai kun? ngu nna myit chye ai. Chyum Laika prat hta, masha nkau mi dai zawn myit wa ai.  Laika pang 3 hta lawm ai mabyin hpe myit yu u. Laban Nhtoi a tara hpe tawt lai ai wa hpe, si dam garai n jahkrat shi yang, Yehowa hpe Mawshe teng sha san wa ai kun? ngu jinghku langai myit hkrup chye ai. Dawi hte shut hpyi ai num a madu wa Hihti masha Uria a jinghku ni mung, Dawi gaw hkawhkam ahkang aya hpe lang nna, ari n jaw hkrum na matu koi yen wa ai kun? ngu myit hkrup chye ai. Yehowa kam ai shinggyim dat kasa ni hpe n kam ai nga yang, Yehowa hpe kam ai ngu n lu tsun ai.

8. Kasa 16:4, 5 hta lawm ai labau hte, dai ni aten na nawku hpung ni galaw ai lam hta hpa bung ai lam nga ai kun?

⁸ Dai ni aten hta, uhpung a ginding aga daw hpe “sadi ai hte myit su ai mayam” hku nna Yehowa woi awn nga ai. (Mat 24:45) Tsa ban 1 na uphkang hpung zawn, dai mayam gaw, mungkan ting na Karai a masha ni hpe woi awn nna, nawku hpung myitsu salang ni hpe lam matsun ya nga ai. (Kasa 16:4, 5 hpe hti u.) Myitsu salang ni gaw, lam matsun hte maren nawku hpung hta galaw nga ai. Uhpung hte myitsu salang ni kaw nna sa ai lam matsun ni hpe madat ai hku nna, Yehowa hpe kam ai lam anhte madun nga ai.

9. Myitsu salang ni a dawdan lam hte maren, jawm galaw na matu gara aten hta yak chye ai kun? Hpa majaw kun?

⁹ Myitsu salang ni a dawdan lam hte maren jawm galaw na matu, kalang lang yak chye ai. Ga shadawn, kade n na shi ai shaning ni hta, nawku hpung hte ninghtawn law malawng hpe bai hpawng de wa ai. Nawku Htingnu hta, masha rap ra mat hkra, hkaw tsun masha nkau hpe kaga nawku hpung de htawt na matu, hpyi shawn ai lam ni nga wa ai. Manang ni, jinghku ni hpe tawn da na matu yak chye ai. Gara hkaw tsun masha hpe gara kaw lit sha-ang u, ngu nna Karai Kasang nan myitsu salang ni hpe sa tsun ai kun? N re. Dai lam a majaw, lam matsun hpe hkan sa na matu yak ai rai na re. Raitim, dai zawn dawdan lam ni jahkrat na matu, myitsu salang ni hpe Yehowa kam ai. Anhte mung kam ra ai. *

10. Hebre 13:17 hku nga yang, myitsu salang ni hte hpa majaw jawm galaw ging ai kun?

 ¹⁰ Myitsu salang ni a dawdan lam hpe n ra yang pyi, hpa majaw jawm galaw ging ai kun? Karai a masha ni a lapran, ngwi pyaw simsa lam matut nga na matu re. (Ehp 4:2, 3) Myitsu salang hpung a dawdan lam ni hpe, shagrit shanem let yawng npu taw yang she, nawku hpung rawt jat na re. (Hebre 13:17 hpe hti u.) Grau ahkyak ai gaw, anhte hpe lanu lahku na matu, Yehowa kam nna ap da ai ni hte rau galaw ai gaw, Yehowa hpe kam ai lam madun ai re.​—Kas 20:28.

11. Myitsu salang ni a lam matsun hpe gara hku nna grau kam wa na kun?

¹¹ Myitsu salang ni gaw, chyoi pra ai wenyi lu na matu, shawng akyu hpyi ai. Ngut yang she, nawku hpung a lam ni hpe bawngban nna, dawdan ai hpe dum na nga yang, shanhte a lam matsun ni hpe grau kam wa na re. Seng ang ai npawt tara ni, Yehowa uhpung a lam matsun ni hpe mung shanhte atsawm dinglik ai. Yehowa a myi man lu na matu, masha ni hpe kaja htum lanu lahku na matu, madung tawn ai. Tinang a lit gun hpai ai hte seng nna, Karai hte jahpan dan ra ai hpe dai sadi dung ai ni chye ai. (1 Pe 5:2, 3) Ndai lam hpe myit yu u: Amyu masha, nawku htung, mung masa lam ni a majaw, mungkan ting dumbru dumbra byin nga ai shaloi, Yehowa a masha ni gaw, jet ai Karai langai hpe sha, zinlum let nawku dawjau nga ai. Uhpung hpe Yehowa shaman chyeju jaw nga ai majaw sha, dai zawn nawku lu ai re.

12. Masha langai myit malai lu ai, n lu ai hpe dawdan ai shaloi myitsu salang ni gara lam hpe myit shalawm ai kun?

¹² Nawku hpung san seng ra ai ngu ai lit kaba hpe myitsu salang ni hpe Yehowa ap da ai. Hkristan langai mara kaba galaw hkrup yang, nawku hpung hta shi hpe matut da na, n da na hpe myitsu salang ni dawdan na matu, Yehowa hpyi shawn da ai. Dai wa teng sha myit malai lu, n lu ngu ai hpe mung chye hkra galaw ra ai. Myit malai lu ai ngu tsun tim, tinang galaw hkrup ai mara hpe teng sha n ju n dawng ai kun? Mara bai kahtap n galaw hkrup hkra dawdan da ai kun? N kaja ai manaw manang ni a majaw mara galaw hkrup ai nga yang, shanhte hte n kanawn na matu shakut ai kun? Myitsu salang ni gaw, Chyum Laika hpe madung tawn nna, masa lam ni hpe atsawm chye hkra akyu hpyi nna, maram yu ai. Galaw hkrup ai lam hpe, mara galaw ai wa gara hku sawn la ai hpe mung, myit shalawm ai. Dai hpang, nawku hpung hta, shi matut nga ging ai, n nga ging ai hpe dawdan ai. Lam nkau mi hta gaw, shi hpe shapraw chye ai.​—1 Ko 5:11-13.

13. Manang (sh) jinghku langai shapraw hkrum ai shaloi, gara hku myit chye ai kun?

¹³ Myitsu salang ni hpe anhte kam ai hpe gara hku chyam dinglik hkrum chye ai kun? Shapraw hkrum ai wa gaw, anhte a manang, jinghku n re ai nga yang, myitsu salang ni a dawdan lam hpe aloi sha hkap la lu ai. Raitim, grai hkau ai manang rai yang gaw, myitsu salang ni lam yawng hpe maram yu ai kun? Yehowa jeyang ai lam hte maren jeyang ai gaw re ai kun? ngu myit hkrup chye ai. Shanhte a dawdan lam hpe jaw ai hku mu na matu hpa gaw karum ya lu ai kun?

14. Tinang a manang, jinghku langai hpe shapraw na matu, myitsu salang ni dawdan ai shaloi, anhte hpe hpa gaw karum ya lu ai kun?

¹⁴ Shapraw ai lam gaw Yehowa a lamang re. Nawku hpung hte mara galaw ai wa hpe akyu shabyin ya ai hpe dum ging ai. Myit malai n lu ai mara galaw ai wa hpe, nawku hpung hta matut nga na ahkang jaw yang, kaga ni a ntsa n kaja ai shingkang ka-up wa chye ai. (Gal 5:9) Dai sha n-ga, galaw hkrup ai mara kade daram  kaba ai hpe shi chye sana n re. Yehowa a myi man bai lu na matu, tinang a myit mang ai lam hte galaw ai lam hpe galai shai n ra ai ngu nna pyi shadu mat chye ai. (Hpj 8:11) Masha langai hpe shapraw ging ai, n ging ai hpe dawdan ra ai lit hpe myitsu salang ni ahkyak shatai sawn la ai. Moi Israela tara agyi ni zawn, “Yehowa amu hpe tara dara” nga ai hpe myit dum ai.​—2 Hl 19:6, 7.

15. Moi na hta grau nna ya aten hta Yehowa a lam matsun hpe hpa majaw kam ra ai kun?

¹⁵ Ndai nhkru ai mungkan htum wa magang, moi na hta grau nna Yehowa hpe kam ra magang re. Hpa majaw kun? Ru tsang kaba laman, laklai nna, tatut n re ai, lachyum n nga ai zawn re ai lam matsun ni lu wa chye ai majaw re. Anhte hpe Yehowa ding tawk ga sa shaga na n re. Aya ap da ai dat kasa ni kaw nna lam matsun jaw wa na re. Dai aten gaw, lam matsun hpe ntsen ai myit nga ra na aten, mara shagun ra na aten, ‘ndai lam matsun gaw, gaja wa nan Yehowa kaw na sa ai kun?’ ngu nna myit ra na aten n re. Masha labau hta ahkyak htum ai aten hta, Yehowa hte uhpung hpe nang kam na kun? Mahtai gaw, Karai a dat kasa ni a lam matsun hpe ya gara hku myit ai hta madung na re. Ya aten hta, kam nna, sharawng awng let madat na nga yang, ru tsang kaba laman hta mung madat lu na re.​—Luk 16:10.

16. Htawm hpang hta Yehowa a dawdan lam hpe kam ai myit gara hku chyam dinglik hkrum wa na kun?

¹⁶ Ndai nhkru ai mungkan htum ai aten hta, Yehowa tara jeyang ai lam hpe gara hku bai htang na ngu ai hpe mung atsawm myit ra ai. N kamsham ai jinghku ni hte hpawn, Yehowa hpe n nawku ai ni law law gaw, jahtum garai n du shi yang, Karai hpe nawku wa na ngu anhte myit mada ai. Raitim, Hara Magedon hta, shanhte a htawm hpang hpe Yesu hku nna Yehowa hpang jahtum dawdan na re. (Mat 25:31-33; 2 Ht 1:6-8, 10) Kadai gaw matsan dum hkrum na, n hkrum na hpe anhte n dawdan ra ai. (Mat 25:34, 41, 46) Yehowa a dawdan lam hpe kam na kun? (sh) Ahtu kataw mat na kun? Htawm hpang hta, Yehowa hpe tsep kawp kam na matu, ya kaw nna kam ai myit hpe ngang kang hkra galaw da ra ai.

17. Ndai nhkru ai mungkan jahtum hta, Yehowa a dawdan lam kaw nna anhte gara hku akyu lu na kun?

¹⁷ Mungkan nnan hta, Yehowa a dawdan lam a majaw, lu la ai akyu ni hpe anhte mu ai shaloi, gara hku hkamsha na hpe shingran yu u. Shut shai ai nawku htung n nga sai. Shaning ni laman, masha ni hpe adip arip di ai mung masa lam, lawhpa ai hpaga lam ni n nga sai. Hkamja lam manghkang, asak kaba wa ai lam, tsawra ai marai langai si mat ai lam ni hkrum ra sana n re. Satan hte nat ni shaning hkying  mi sharen da hkrum na. Ninghkap ai majaw byin wa ai, n kaja ai lam ni nga sana n re. (Shr 20:2, 3) Yehowa galaw wa ai lam ni hpe kam wa ai majaw, anhte grai kabu na re.

18. Bu Hkawm 11:4-6 hte 21:5 hta lawm ai Israela ni a mabyin kaw na hpa sharin la lu ai kun?

¹⁸ Mungkan nnan hta mung, Yehowa hpe kam ai myit chyam dinglik naw hkrum na kun? Ga shadawn, Israela ni, Egutu mayam prat kaw na lawt wa ai hpang, kade n na yang, byin wa ai lam hpe myit yu ga. Egutu mung hta, sha lu wa ai malu masha kaja ni hpe bai dum ai majaw, nkau aput angun tsun ma ai. Yehowa jaw sha ai mana muk hpe gaw, matsat shabat ngu nna sawn la ma ai. (Bu Hkawm 11:4-6; 21:5 hpe hti u.) Ru tsang kaba ngut mat ai hpang, anhte hta dai zawn myit ni shang wa na kun? Mungkan ga hpe jasan jaseng galaw na matu, hparadisu byin hkra galaw na matu, kade daram bungli law na hpe anhte n chye ai. Raitim, bungli ram ram law na masa nga ai. Nnan hta gaw loi yak na re. Dai aten hta, Yehowa lajang ya ai lam ni hpe aput angun tsun na kun? Chye lu ai gaw, ya kaw nna Yehowa lajang ya ai lam ni hpe manu shadan na nga yang, dai aten hta mung manu shadan chye na re.

19. Ndai sumhpa hta lawm ai madung lam ni hpe kadun dawk tsun dan u.

¹⁹ Yehowa galaw ai lam ni gaw galoi mung jaw ai. Dai hpe kam ra ai. Lam matsun jaw na matu, Yehowa kam nna, ap da ai ni hpe mung kam ra ai. “Asim sha nga let kam sham ai hte nanhte n-gun lagaw lu la na myit dai” ngu myihtoi Esaia kaw nna Yehowa tsun wa ai ga ni hpe galoi mung dum nga ga.​—Esa 30:15.