1-2. (a) Omolwashike vahapu kunena hava mono shidjuu okulineekela ovo ve na eenghonopangelo? (b) Oshike hatu ka kundafana moshitukulwa eshi?

KUNENA, ovanhu vahapu ohava mono shidjuu okulineekela ovo ve na eenghonopangelo. Molwaashi ovapanguli novanapolotika ohava ningile kombuda oipuna nosho yo ovo ve na eenghonopangelo nokuungaunga nonyanya neehepele. Ombiibeli oya popya oshinima osho ya ti: “Omunhu ta pangelele mukwao omupya.” (Omuud. 8:9) Kakele kaasho, ovawiliki vomalongelokalunga amwe ohave lihumbata nai. Osho ohashi ningifa ovanhu vamwe va kanife elineekelo muKalunga. Onghee hano, ngeenge hatu konakona Ombiibeli navamwe, otwa pumbwa oku va kwafela va kale ve lineekela Jehova nosho yo ovo tava kwatele komesho mehangano laye.

² Ashike ovakonakonimbiibeli havo aveke va pumbwa okulihonga okulineekela Jehova nehangano laye. Naavo twa panga efimbo lile moshili, otwa pumbwa okukala twa tomhwa kutya onghedi omo Jehova ha ningi oinima oya denga mbada. Omafimbo amwe, otashi dulika pa holoke eenghalo odo tadi dulu okuyeleka elineekelo letu. Moshitukulwa eshi, ohatu ka kundafana eenghalo dopatatu odo tadi dulu okuyeleka eitavelo letu: (1) ngeenge hatu lesha omahokololo mOmbiibeli, (2) ngeenge twa pewa omalombwelo kehangano laJehova nosho yo (3) eshi hatu ka taalela omashongo monakwiiwa.

3. Ongahelipi omahokololo onhumba Ombiibeli taa dulu okuyeleka elineekelo letu muJehova?

 ³ Eshi to lesha Eendjovo daKalunga, otashi dulika u kale u na  omalipulo e na sha nanghee Jehova a ungaunga novanhu vonhumba, ile nomatokolo onhumba, oo a ninga. Pashihopaenenwa, muNumeri, Jehova okwa li a yandja elombwelo opo omulumenhu Omuisrael, oo a ka tyava oikuni mEshabata, a dipawe. Ndele omido omafele konima yaasho, muSamuel omutivali, Jehova okwa li a dimina po ohamba David, oyo ya li ya ya moluhaelo nokudipaa. (Num. 15:32, 35; 2 Sam. 12:9, 13) Otashi dulika tu lipule kutya, ‘Omolwashike Jehova a dimina po David oo a ya moluhaelo nokudipaa, ndele okwa yandja elombwelo opo omulumenhu oo a li a ka tyava oikuni a dipawe, ofimbo enyono laye tali monika la fa inali kwata moiti?’ Opo tu nyamukule epulo olo, natu ka tale koinima itatu oyo tu na okukaleka momadiladilo, eshi hatu konakona Ombiibeli.

4. Genesis 18:20, 21 nosho yo Deuteronomion 10:17, otave tu kwafele ngahelipi tu kale twe lineekela momatokolo aJehova?

⁴Ombiibeli haalushe hai tu pe ouyelele we lixwa po mehokololo keshe. Pashihopaenenwa, otu shii kutya David okwa li e livela ombedi shili omolwomanyono aye. (Eps. 51:2-4) Ndele ongahelipi shi na sha nomulumenhu winya a nyona omhango yEshabata? Mbela okwa li e livela ombedi? Okwa li e na onghedindjikilile yokunyona eemhango daJehova? Mbela okwa kala he lipwililikile omalondwelo nokuhatambula ko omayele? Ombiibeli inai tu pa ouyelele we lixwa po moshinima osho. Ashike otu na oushili kutya Jehova “omuyuki.” (Deut. 32:4) Omatokolo aye ohaa kala e likolelela kouyelele we lixwa po, ndele hakomaudila, konhondo, ile koinima imwe i lili oyo hai dulu okupengifa etaleko lomunhu. (Lesha Genesis 18:20, 21; Deuteronomion 10:17.) Apa ngoo pe fike hatu lihongo kombinga yaJehova nomifikamhango daye, opo ngoo tapa kala pe fike okulineekela kwetu omatokolo aye. Nokuli nonande otu kale tu na omapulo e na sha nehokololo lonhumba lOmbiibeli, oo inatu monena omanyamukulo, osho tu shii nale kombinga yaKalunga oshe tu tomha tu mone kutya “omuyuki meendjila daye adishe.” — Eps. 145:17.

5. Okuhawanenena ohaku kumu ngahelipi etaleko letu li na sha naasho shi li mondjila naasho sha puka? (Tala yo oshimhungu “ Okuhawanenena ohaku pengifa etaleko letu li na sha naasho shi li mondjila, ile naasho sha puka.”)

⁵Etaleko letu li na sha naasho sha puka, ile shi li mondjila otali dulu okunwefwa mo  kokuhawanenena. Molwaashi otwa shitwa oshifeka shaKalunga, ohatu kala twa hala ovanhu va ungaungiwe navo pauyuki. (Gen. 1:26) Ndele omolwokuhawanenena, etaleko letu li na sha naasho shi li mondjila, ile sha puka otali dulu okupengifwa, nokuli nonande otu na ouyelele we lixwa po. Diladila pashihopaenenwa kunghee Jona a li a handuka, eshi Jehova a fila onghenda Ovaninive. (Jona 3:10–4:1) Omolwefilonghenda olo, Ovaninive ve dule 120 000, ovo va li ve livela ombedi, ova xupifwa. Osha yela kutya Jona oye a li a puka, ndele haJehova.

6. Omolwashike Jehova ehe na oku tu yelifila eenghatu odo ta katuka?

⁶Jehova ina pumbwa okuyelifila ovanhu kutya omolwashike a katukila eenghatu donhumba. Oshoshili kutya pefimbo lonale, Jehova okwa li ha pitike ovapiya vaye va holole omadiladilo avo e na sha neenghatu odo a katuka, ile a li pokukatuka. (Gen. 18:25; Jona 4:2, 3) Nopeemhito dimwe, okwa li he va yelifile omatomheno oo a kwatelwa mo. (Jona 4:10, 11) Ndele paulelalela Jehova ina pumbwa oku tu yelifila omatomheno e na sha neenghatu daye. E li Omushiti wetu, ina pumbwa epitikilo letu ofimbo ina katuka eenghatu donhumba, ile a pewe oushima omolweenghatu odo a katuka. — Jes. 40:13, 14; 55:9.

7. Eshongo lilipi tashi dulika tu kale twa taalela, nomolwashike?

⁷ Kape na omalimbililo kutya otwa tomhwa kutya Jehova oha longo alushe osho sha yuka. Ndele eshongo olo twa taalela, okukala twe lineekela ovo tava kwatele komesho mehangano laye. Otashi dulika tu lipule kutya ovo hava kwatele komesho ohava katuka ngoo shili metwokumwe newiliko laJehova, ile ohava ningi ashike oinima momitwe davo vene. Vamwe pefimbo lOmbiibeli otashi dulika va li ve na omalipulo a tya ngaho. Diladila koihopaenenwa oyo ya tumbulwa  mokatendo 3. Omupambele womulumenhu oo a li a nyona omhango yEshabata, otashi dulika a li te lipula kutya Moses okwa ka kongele tuu shili ewiliko kuJehova, ofimbo ina yandja elombwelo kutya omulumenhu oo na dipawe? Eshi David a li a ya moluhaelo nomukulukadi waUria Omuheti, kaume kaUria otashi dulika a li a fika pexulifodiladilo kutya David okwa longifa eenghonopangelo daye e li ohamba, opo a henuke ehandukilo olo a li e lilongela. Oushili oyoo kutya itatu dulu okutya otwe lineekela Jehova, ngeenge inatu lineekela ovo e lineekelela oshinakuwanifwa shokukwatela komesho mehangano laye.

8. Oilonga 16:4, 5 otai tu kwafele ngahelipi tu mone nghee eongalo lopaKriste hali longo kunena?

⁸ Kunena, Jehova oha wilike oshitukulwa shehangano laye shokombada yedu okupitila ‘momupiya omudiinini nomunaendunge.’ (Mat. 24:45) Ngaashi olutuwiliki lopefimbo lovayapostoli vaJesus, omupiya omudiinini oha pashukile oshiwana shaKalunga mounyuni aushe nokuyandja ewiliko kovakulunhuongalo. (Lesha Oilonga 16:4, 5.) Ovakulunhuongalo ohava shikula ewiliko olo hava pewa komupiya omudiinini. Fye ohatu ulike kutya otwe lineekela onghedi yaJehova yokuninga oinima mokuliufa komalombwelo, oo hatu pewa kehangano nokovakulunhuongalo.

9. Onaini hashi kala shidjuu okutambula ko etokolo lovakulunhuongalo, nomolwashike?

⁹ Omafimbo amwe, otashi dulika shi kale shidjuu okutambula ko omatokolo oo a ningwa kovakulunhuongalo. Pashihopaenenwa, omido opo da di ko, ovaudifi vahapu ova li va pulwa va tembukile komaongalo onhumba, ile koikandjo yonhumba. Peemhito dimwe, ovakulunhuongalo ova li va pula ovaudifi va ka yambidide eongalo  lonhumba, opo ku longifwe pauyadi Omalupale Ouhamba. Ngeenge omuudifi okwa tuminwa keongalo limwe, otashi dulika a mone shidjuu okufiya po ookaume kaye novapambele. Mbela ovakulunhuongalo ohava lombwelwa kondadalunde kutya ovaudifi velipi ve na okuya komaongalo onhumba? Hasho nandenande. Naasho osho nee hashi shi ningifa eshongo kufye okutambula ko ewiliko lavo. Ndele Jehova okwe ve lineekelela omatokolo a tya ngaho, nafye otu na okukala twe ve lineekela. *

10. Metwokumwe nOvaheberi 13:17, omolwashike tu na okulongela kumwe novakulunhuongalo?

¹⁰ Omolwashike tu na okulongela kumwe novakulunhuongalo nokuyambidida omatokolo avo, nonande hao twa li twa teelela? Omolwaashi ngeenge hatu ningi ngaho, ohatu xumifa komesho oukumwe mokati koshiwana shaKalunga. (Ef. 4:2, 3) Omaongalo ohaa xumu komesho, ngeenge atushe otwa yambidida nelininipiko omatokolo oo taa ningwa kolutu lovakulunhuongalo. (Lesha Ovaheberi 13:17.) Osho sha fimanenena unene oshosho kutya ngeenge ohatu longele kumwe naavo Jehova a nangeka po ve tu file oshisho, ohatu ulike kutya otwe mu lineekela yo. — Oil 20:28.

11. Oshike tashi dulu oku tu kwafela tu kale twe lineekela filufilu ewiliko olo hatu pewa kovakulunhuongalo?

¹¹ Ohatu dulu okulineekela filufilu ewiliko olo hatu pewa kovakulunhuongalo, ngeenge otwa dimbuluka kutya ohava ilikana va pewe omhepo iyapuki, eshi tava ningi omatokolo a pamba eongalo. Ohava konakona noukeka omafinamhango opaMbiibeli oo a kwatelwa mo nosho yo ouyelele oo wa dja kehangano laJehova. Ohava kala va halelela okuhafifa Jehova nokufila oshisho eedi daye. Ove shii kutya otave ke lihokolola kuKalunga shi na sha nonghedi omo tava wanifa po oinakuwanifwa yavo. (1 Pet. 5:2, 3) Diladila yo kwaashi: Nonande otu li mounyuni oo wa tukauka pamihoko, palongelokalunga nopapolotika, ohatu longele Kalunga kashili twa hangana. Osho otashi ulike kutya Jehova ota nangeke noupuna ehangano laye.

12. Ovakulunhuongalo ohava tale kushike, opo va ufe kutya omunhu okwe livela ombedi, ile hasho?

¹² Jehova okwe lineekelela ovakulunhuongalo oshinakuwanifwa sha kwata moiti shokukaleka eongalo la koshoka. Ngeenge Omukriste okwa nyono enyono la kwata moiti, Jehova okwa teelela ovakulunhuongalo va tokole, ngeenge omunhu oo okwa wana okukala meongalo, ile hasho. Peemhito da tya ngaho, ova pumbwa okutala ngeenge omunhu okwe livela tuu ombedi shili omolwenyono laye. Ota dulu okutya okwe livela ombedi, ndele mbela okwa uda ngoo nai shili kwaasho sha ningwa po? Mbela okwa tokola ngoo okuhaendulula oshinima osho? Ngeenge osha etifwa keendafano lii, mbela okwa tokola ngoo okweefa po eendafano la tya ngaho? Ovakulunhuongalo ohava ilikana nokukonakona ashishe osho sha kwatelwa mo, okutala omishangwa nokutala kutya omunyoni okwa tala ko ngahelipi enyono laye. Opo nee otava dulu okutokola kutya omunyoni ota dulu okukala meongalo, ile pamwe okwa pumbwa okukondwa mo. — 1 Kor. 5:11-13.

13. Omalipulo elipi tashi dulika tu kale tu na, ngeenge kaume ketu, ile omupambele wetu okwa kondwa?

¹³ Onghalo ilipi tashi dulika i yeleke elineekelo letu movakulunhuongalo? Ngeenge omunhu oo a kondwa ke fi kaume ketu, ile omupambele wetu, otashi dulika tu tambule ko noupu etokolo lovakulunhuongalo. Ndele ngeenge omunhu oo a kondwa okaume ketu kopofingo, otashi dulika tu lipule kutya ovakulunhuongalo ova tala ngoo ouyelele aushe oo wa kwatelwa mo? Ile ova tokola ngoo shili  metwokumwe nehalo laJehova? Oshike tashi ke tu kwafela tu tambule ko etokolo lavo tuhe na omunyengutima?

14. Oshike tashi dulu oku tu kwafela, ngeenge etokolo olo la ningwa kovakulunhuongalo ole tu kuma neenghono pauhandimwe?

¹⁴ Oshiwa okudimbuluka kutya okukonda mo omunyoni meongalo, oshi li elongekido laJehova lokweetela eongalo ouwa, ile oo a nyona. Ngeenge omunyoni oo ine livela ombedi okwa pitikwa okukala meongalo, ota dulu okukala enwefemo lii. (Gal. 5:9) Kakele kaasho, otashi dulika a kale a dina enyono laye noita ka ninga lela eenghendabala da mana mo a lundulule okudiladila kwaye neenghatu daye, opo a kale a hokiwa kuJehova. (Omuud. 8:11) Natu kale yo tu shii kutya ovakulunhuongalo ove shi tala ko shi li oshinakuwanifwa sha kwata moiti okutokola kutya omunyoni na kondwe mo, ile hasho. Ngaashi ovatokoli vomuIsrael shonale, ovakulunhuongalo ove shi shii kutya omatokolo oo tava ningi kae fi “omatokolo ovanhu, ndelenee omatokolo Omwene.” — 2 Omaf. 19:6, 7.

15. Omolwashike twa pumbwa okulineekela ewiliko laJehova paife shi dulife nale?

¹⁵ Eshi exulilo lounyuni tali ehene popepi, otwa pumbwa ewiliko laJehova shi dulife nale. Omolwashike mbela? Omolwaashi pefimbo loudjuu munene, otashi dulika tu ka pewe omalombwelo, oo tashi dulika e tu limbililike tu kale tu wete a fa itaa longo, ile ehe li pandunge. Osha yela kutya Jehova ita ka popya nafye odikilila. Otashi dulika te ke tu pa ewiliko okupitila mwaavo tava kwatele komesho. Olo halo efimbo lokukala twa dina, ile twa limbililwa ewiliko la tya ngaho, hatu lipula kutya ‘otali di ngoo shili kuJehova, ile ovamwatate otava ningi ashike oinima momitwe davo?’ Mbela oto ke shi endifa ngahelipi pefimbo olo tali ka kala la dundakana mondjokonona? Shihapu oshe likolelela kunghee hatu tale ko ewiliko laJehova paife. Ngeenge ohatu tambula ko ewiliko la tya ngaho paife nopehe na okwoongaonga, ohatu dulu okukala nelineekelo kutya ohatu ka ninga sha faafana poudjuu munene. — Luk 16:10.

16. Elineekelo letu momaudaneko aJehova otashi dulika li ka yelekwe ngahelipi monakwiiwa?

¹⁶ Omatokolo oo Jehova ta ka ninga pexulilo lounyuni nao otaa ka yeleka elineekelo letu muye. Ohatu ningi eenghendabala tu udifile ovanhu vahapu, opo va ka xupifwe, mwa kwatelwa novapambele vetu, ovo vehe fi Eendombwedi. Ndele puArmagedon, Jehova oye ta ka ninga etokolo laxuuninwa li na sha nonakwiiwa yavo okupitila muJesus. (Mat. 25:31-33; 2 Tes. 1:7-9) Hafye hatu ka ufa kutya olyelye e na okufilwa onghenda kuJehova.  (Mat. 25:34, 41, 46) Mbela ohatu ke lineekela ngoo omatokolo oo Jehova ta ka ninga, ile ohatu ka efa po oku mu longela? Osha yela kutya otwa pumbwa okukala twe lineekela Jehova filufilu paife, opo tu twikile oku mu lineekela nomonakwiiwa.

17. Ouwa ulipi hatu ka mona, konima eshi Jehova a tokola ounyuni ou?

¹⁷ Diladila kunghee hatu ka kala tu udite mounyuni mupe, konima eshi Jehova a tokola ounyuni ou. Omalongelokalunga oipupulu itaa ka kala po vali nomapangelo opapolotika, oo a kala taa hepeke ovanhu noku va monifa oixuna mondjokonona itaa ka kala po vali. Okuhenoukolele, oukulupe nosho yo efyo itai ka kala po vali. Satana neendemoni daye otava ka mangwa oule womido eyovi. Oilanduliko oyo ya etifwa kounashibofa wavo itai ka kala po vali. (Eh. 20:2, 3) Itatu ka kala tuu twa hafa, eshi twa kala twe lineekela onghedi omo Jehova ha ningi oinima!

18. Oilihongomwa ilipi hatu lihongo moshihopaenenwa shOvaisrael, ngeenge hatu tale muNumeri 11:4-6 nosho yo 21:5?

¹⁸ Mbela elineekelo letu monghedi omo Jehova ha ningi oinima otali ka yelekwa mounyuni mupe? Diladila kwaasho sha li sha ningwa kOvaisrael, eshi va li va mangululwa moupika waEgipiti. Ova li va hovela okungongota shi na sha nomanna, oo va li tava pewa kuJehova, molwaashi ova li tave lipula shi na sha noikulya oyo va li hava li muEgipiti. (Lesha Numeri 11:4-6; 21:5.) Mbela ohatu dulu okuningilwa oshinima sha faafana konima youdjuu munene? Katu shii kutya otapa ka kala oilonga ihapu shi fike peni, konima eshi ounyuni ou wa hanaunwa po naashi ovanhu tava ka enda tava ningi edu oparadisa mokweendela ko kwefimbo. Otashi dulika potete tu ka mone oilonga ya fa ihapu noidjuu. Mbela ohatu ka ngongota shi na sha nomafiloshisho oo Jehova te ke tu pa pefimbo olo? Osho sha yela oshosho kutya: Ngeenge otu na olupandu omolwomafiloshisho aJehova paife, otashi ke tu kwafela yo tu ka kale tu na olupandu pefimbo olo.

19. Oku shi ngonga pauxupi, oshike twe lihonga moshitukulwa eshi?

¹⁹ Otwa pumbwa okukala twa tomhwa kutya onghedi omo Jehova ha ningi oinima, ohai kala alushe ya yuka. Otwa pumbwa yo okulineekela ovo Jehova a nangeka po va kwatele komesho mehangano laye. Inatu dimbwa yo eendjovo odo Jehova a lombwela omuprofeti Jesaja a ti: ‘Mokulimwenenena nomokulineekela omo tamu di eenghono deni.’ — Jes. 30:15.