1-2. a) Bwabiny baat bavul leeloow biibakaakasakeen bwa kuteekel baat bady ni bukookesh micim? b) I biny bitwiiyiiy kutal mu ciin bwaal eecy?

LEELOOW baat bavul bataatal neey: i bikasakan bwa kuteekel muut udy ni bukookesh micim. I batal neey: biin cidiidy baluulumbulwiish myand ya ba het ni baat bady ni diiy dya bukookesh mu mushind mulengel ni balumbulwiish balam-lam mu mushind ukiish muwaakan. Bibl uleeleeb biin-biin nook: ‘Muut udyaadyaatakany mukwaabw bwa kumushiy mu mal.’ (Mul. 8:9) Cikwaabw, bilong bya bafumw ba bitendeleel bakwaabw bileeleej mudyobw bakat bikasakan kudyaatakany bakwaabw. Kudy kulong bwa baat bakwaabw, balek kuteekel Mawej micim. Ki bwaabingany hady muut wiitab bwa kulongey neet Bibl, tudyaakal tuhet lutat bwa kumwambulwiish bwa ateekel Yehow micim ni baat Bindiy badyey muteek ha bulab bwa kwiitulombol.

² Biin-biin, kabiin teng balony ba Bibl bakaakaam bwa kuteekel Yehow ni bulongolody bwindiy micim. Ning woos wa kutudy ukaady ni mivw yivul mu bulongolody bikaam amanyik neey: Yehow uloolong teng myand mu mushind muwaakan. Hahiihit mafuk, myand yikwaabw yidy mwa kuteet diitabij diitut. Mu ciin bwaal eecy, twiiyiiy kwiisambil ha mishind yisat yidy mwa kwiitwambulwiish bwiitut kukontonon diitabij diitut: 1) Hatubaabal miisamb yikwaabw ya mu Bibl, 2) Hakuteekel Yehow ni bulongolody bwindiy micim, hakulond buludik bwa bulongolody bwa Yehow, ni 3) hatwiikal mwa kutwiilangan ni makab.

3. I mushind kaay udy myand yikwaabw yitubaabal mu Bibl mwa kwiitwambulwiish bwiitut kukontonon diitabij diitut kudy Yehow?

 ³ Hatubaabal Diiy dya Mawej, tudy mwa kwiiyihanguj bwa mushind waakady Yehow mulongel baat bakwaabw myand ni mahangadik  maakadyey mwangat. Cileejel, mu mukand a Kubal kwa baat, tubaabalomw neey: Yehow waakady munyook mwiin Izaleel waakady ucibul kuny diifuk dya Sabaat. Mu mukand mwiibiidy wa Samweel, baleeleejomw neey: Yehow waakady muvulamin buyiil mpekaat a masandy ni wa kuzuhangan ulongel Mukaleng Davih. (Kkb. 15:32, 35; 2 Sam. 12:9, 13) Tudy mwa kwiiyihanguj neey: ‘Bwabiny Yehow waakady mufwiil Davih lus bwa mpekaat ulongeley wa kuzuhangan ni wa kwend masandy ni munyook muut mukwaabw bwa bamuzuh bwa bwaal bwaakady bumweek neey: kabwaakadyoh bend mpekaat mutam?’ Bwa kwaalabul dijooj eedy, tukontononaay myand yisat yitudy mwa kulam mu meej hatubabal Bibl.

4. Mukand a Kutang kwa Bwanjil 18:20, 21 ni May Mumbulul 10:17 Yikaakashish diitabij diitut bish bwa mahangadik mangangat Yehow?

⁴ Bibl kiin teng umvwiij myand yoos ya bwaal butusaasanganomw. Cileejel, tudy bamanyik neey: Davih waakady mwiifwiij naay bwa myand yibiih yilongeley. (Mus. 51:2-4, NWT) Ki tudy mwa kuleeb bicy bwa muut waakady muzuh mukenj a Sabaat? Waakadyok mwiifwiijok naay bwa bwaal bulongeley eeny? Waakady mukufwaabeel mikenj ya Yehow hakal eeny? Kaakadyoh bend mumanyik eecy waakady mulek kulond madyumwiish mamwaakishilobw eeny? Bibl kiin muleeboh bend. Twiikal batwiishiibw neey: Yehow “kiishoh bend ulumbulwiish bilumb bibiih.” (Mmu. 32:4) May mindiy moos maswiiswiikey​—kamiin mashimatil habileeleeb baat, ha bwaal budyobw bamukwaacil baleeb bibiih bwa muut mukwaabw kakuy bijaadik, eecy ha bwaal bukwaabw buloolong bwa bakwaabw baleeb bibiih bwa muut mukwaabw. (Bal Kutang kwa Bwanjil 18:20, 21; May Mumbulul 10:17.) Hatuloolong bwa kumanyik Yehow bikasakan ni mikenj yindiy, twiiyiiy kumuteekel micim bwa mushind udyey ulumbulwiish myand. Ning tut tubal Bibl ni tuhet majooj matudy katuy mwa kwaalabul kaabaak, tudy bamanyik neey: Mawej iitut “i muwaakan mu njil yindiy yoos.”​—Mus. 145:17.

5. I mushind kaay udy kwiikal baat bakiish bawaakan kulong bwa tulumbulwiish myand misang yikwaabw mu mushind ukiish muwaakan? (Tal cikwaabw kazubw ka neey: “ Bu Mutudy Baat Bakiish Bawaakan, Katwiin mwa Kumvw Teng Myand mu Mushind Muwaakan.”)

⁵ Mushind iitut a kulumbulwiish kiin mwa kwiikal teng muwaakan, bwaal katwiish baat bawaakan. Mawej i mwiituhang mu cifwany cindiy, ki bwabiny tudy bakat bwa baat biitulongel myand mu mushind mulengel. (Kbwa. 1:26) Ki bu mutudy baat bakiish bawaakan, tudy mwa  kulumbulwiish myand mu mushind mubiih, ning hatulaalang neey: tudy ni bijaadik byoos. Vuluk cileejel cya mwaakady Jonas mufulul mund, haakady Yehow mwangat diihangadik dya kufwiil biin Niniiv lus. (Jon 3:10–4:1) Ki, tutalaay cihet cimweekel haakady Yehow mwiibafwiil lus. Biin Niniiv bahit 120 000 balabwiil micim yaabab ni biiyil kwiibakuloh! Ku bulekel kwa byoos, bimweekel neey: i Jonas​—waakady ukaam kulumbulwiish baat bibiih​—ki kiin Yehow.

6. Bwabiny Yehow kiin mwa kwiitumvwiij mahangadik moos mangangatey?

⁶ Yehow kiin ukaam teng bwa kumvwiij baat tubingil tudyey naat bwa mahangadik mangangatey. Cya biin, Yehow wiitabil bwa biin mudimw bindiy ba ha kal bamwambil myand yaakadyobw naay mu micim yaabab habitaatal mahangadik maakadyey mwangat eecy bwa cyaakadyey mwa kulong. (Kbwa. 18:25; Jon. 4:2, 3) Ni misang yikwaabw, waakady mumvwiij dihangadik dyaakadyey mwangat. (Jon. 4:10, 11) Ning naak, Yehow kiin teng mwa kwiitumvwiij myand yoos. Bu mudyey cyakahang iitut, kiin ukaam teng dyanyish diitut kuuhal eecy kuunyim kwa kulongey bwaal.​—Ye. 40:13, 14; 55:9.

7. I bwaal kaay budy mwa kwiitukasakeen, ni bwabiny?

⁷ Biin-biin twiitaatab ni mucim aakaabumw neey: Yehow uloolong teng myand yiwaakan. Nook, bidy mwa kwiitukasakeen bwiitut kuteekel baat bady Yehow munoonoh bwa kwiitulombol micim. Tudy mwa kwiiyihanguj neey: baat bady ni majit mu bulongolody bwa Yehow, ning baloolong biin-biin myand yiheehetangan ni buludik bwa Yehow eecy bwaabab. Bidy mwa kwiikal mushind waakady baat bakwaabw ba mu biisang byaakadyobw bafund Bibl balang. Tukontonon bileejel bidyobw bateel mu  cikos 3. Mwaanabw ni muut waakady muzuh mukenj a Sabaat waakady mwa kwiiyihanguj ning Moyiz waakady mwiisamb biin-biin ni Yehow, kuuhal kwa kuswiikobw cibaw cya lufw. Ni mulund a Urih mwiin Hitih, mwiin mukaj waakady Davih mwend nend masandy, waakady mwa kuleeb neey: Davih ukadil mudimw ni bukookesh bwindiy bu mukaleng bwa kaay wahet cibaw cya lufw. Yehow iimuteekel baat badyey munoonoh bwa kwiitulombol mu bulongolody ni mu cisumbw micim. Nook, tut katuy tuteekel baat aab micim​—katwiin mwa kuleeb neey: tudy bateekel Yehow micim.

8. I dyumvwangan kaay didy hakacy ha myand yidyobw baleeb mu Myand yilongel Bapostol 16:4, 5 ni mushind udy cisumbw cya biin Krist cikal mudimw leeloow?

⁸ Leeloow Yehow uloolombol cituh cya bulongolody bwindiy cidy ha bulab ku dyambulwiish dya “muhik a lulamat udy mudimuk.” (Mat. 24:45, NWT) Teng bu kasumbw kaludik ka mu siyekel a kuuhal, muhik oow uloolombol baat ba Mawej ha bulab butuutul ni waakaakish bakul ba mu cisumbw may madyobw mwa kulond. (Bal Myand yilongel Bapostol 16:4, 5.) Bakul byaabw, bakaakish biin mu bisumbw may aam, bwa biimalond. Tuleeleej mutudy bateekel Yehow micim bwa myand yidyey ulong, hatukookooyel may ma kulond madyobw biitwambil kudy bulongolody ni kudy bakul.

9. I diib kaay didyeby mwa kwiitukasakeen bwiitut kut dihangadik didy bakul bangat nyam ku mikon? Bwabiny?

⁹ Misang yikwaabw, bidy mwa kwiitukasakeen bwa kut mahangadik mady bakul bangat nyam ku mikon. Cileejel, mu mivw yishaal eey baakady balongolol cikwaabw bisumbw bivul ni bijeng bivul. Mu myand yikwaabw, bakul balombel bakajaady bwa kuy kambulwiish mu cisumbw cikwaabw ni kiihacil ka kukal mudimw bilengel mu Nzubw yiitut ya Bukaleng. Bab biitulomb bwiitut kuy kambulwiish mu cisumbw cyeeny, bidy mwa kwiitukasakeen bwiitut kushiy balund biitut ni cisak ciitut. Bakul baheehetok buludik bwa Mawej bwiibambambil cyaab cidy kajaady woos mwa kuy kakadiloh mudimw eeny? Waakweeh. Bwaal oobw budy mwa kwiitukasakeen bwiitut kulond may ma kulond madyobw biitwaakish. Ki Yehow naabw i muteekel bakul micim mu mahangadik  madyobw bangat, ni tut byeet bikaam twiibateekel micim. *

10. Bilondeshel mukand a Biin Ebreh 13:17, bwabiny bikaam twiikal tut mahangadik mangangat bakul nyam ku mikon?

¹⁰ Bwabiny bikaam twiikal tut teng mahangadik mady bakul bangat nyam ku mikon ning tut tutal neey kamiin malengel? Bwaal tut balong nook, bitwambambulwiish bwiitut kulam kacyumw mukacy mwa baat ba Mawej. (Ef. 4:2, 3) Bisumbw biyaay kuuhal hadyeby bikooyel ni kwiihweekesh mahangadik mady kasumbw ka bakul kangat. (Bal Biin Ebreh 13:17.) Bwaal bwa buseeb buvul budy neey: tuleeleej mutudy bateekel Yehow micim hatutwaat mahangadik ma baat badyey muteekel micim bwa kwiitulam nyam ku mikon.​—Yil. 20:28.

11. I biny bidy mwa kwiitwambulwiish bwiitut kukashish diitabij diitut bwa kulond buludik budy bakul bitwaakish?

¹¹ Tudy mwa kukashish diitabij diitut, hatuloolond bitwambambil bakul hakuvuluk neey baloolomb spirit mujilang hadyobw bakontonon myand yitaatal cisumbw. Bakookontonon cikwaabw ni meej may matam ma mu Bibl ni bangangat mahangadik hakulond may ma kulond mady bulongolody bwa Yehow butwaal. I bakat ni mucim woos bwa kusangeej Yehow ni baloolong mwaababw moos bwa kulam baat bindiy. Baat ba lulamat aab i bamanyik neey: biiyiiy kulubwiil Mawej myand bwa mushind udyobw balam baat bindiy. (1 Py. 5:2, 3) Langil ha bwaal oobw: Baat ba mu bulongolody oobw kabiin mu kaacyumw bady ni kabow bwa ciseb, bwa citendeleel, ni bwa myand ya cidiidy, ki baat ba Yehow bady mu kaacyumw mu kuhambidil Mawej aakaabumw a biin-biin. Kukumban ook i kuleej mudy Yehow kayend kend mu fiil kis bulongolody bwindiy!

12. I myand kaay yidy bakul mwa kulangiloh ni meej bwa kutal ning muut i mwaalabul micim yindiy?

¹² Yehow i muteekel bakul micim hakwiibakish bujit bwa kulam cisumbw bwa kaay cyoonyek. Hady mwiin Krist ulong mpekaat mutam, Yehow uloolomb bakul bwa kutal neey: ning muut aaw udy mwa kushaal mu cisumbw. Mu myand yikwaabw, bakaakaam kutal ning muut aaw i mwiikunying biin-biin bwa cyaakadyey mulong. Udy mwa kuleej mudyey mwaalabul micim yindiy, ki i mukinok biin-biin cyaakadyey mulong eeny? I mwiiswiikok bwa kulek kulong cikwaabw mpekaat oow eeny? Iikaleby neey i balund nend bady bamusak bwa kulong bwaal bubiih oobw, i mukat kulek kwiikal naabw mu bulund eeny? Bakul bakookontonon myand mu diisambil kudyambulwiish dya Mifund yijilang, bwa kutal mudy mulong a mpekaat ulang bwa cidy cimufikil. Kuunyim bangangat dihangadik bwa kutal ning mulong a mpekaat oow i mukumban bwa kushaaley mu cisumbw. Mu mishind yikwaabw, bady ni cya kumwiihat mu cisumbw.​—1 Kor. 5:11-13.

13. I biny bitudy mwa kulong hadyobw bihat mulund neet eecy mwaaneet wa mu cisak mu cisumbw?

¹³ I mushind kaay utudy mwa kwiiteet bwa mutudy bateekel bakul micim? Iikal muut udyobw bihat mu cisumbw kay mulund neet a ha micim eecy mwaaneet wa mu cisak, bidy mwa kwiitukooyedyel bwiitut kwiitab dihangadik didy bakul bangat. Ki lang ket neey: muut udyobw bihat mu cisumbw i mulund neet a ha micim. Tudy mwa kutwaadij kuleebakan hakutal neey: bakul kabiin bakontonon myand yoos, tudy mwa kwiiyihanguj ning i bangat diihangadik mu mushind udy Yehow mukat. I biny bidy mwa kwiitwambulwiish bwa kwiikal ni meej malengel bwa dihangadik didyobw bangat?

14. I biny bidy mwa kwiitwambulwiish hady bakul bangat diihangadik dya kwiihat umw wa ku balund neet eecy wa ku baan-beet ba mu cisak mu cisumbw?

¹⁴ Tuloolong bilengel bwa kuvuluk neey: kwiihat kwa muut mu cisumbw, i bulongolody budy Yehow muteek ni kuloolongel cisumbw bilengel, ni kudy mwa kwambulwiish mulong a mpekaat. Iikaleby neey, mulong a mpekaat kiin mwaalabul biin-biin mucim indiy ni bamwiitabil bwa  kushaaley mu cisumbw, udy mwa kusak baat bakwaabw bwa kulongobw byaabw mpekaat. (Kal. 5:9) Cikwaabw, udy mwa kwiiy kutal neey: mpekaat udyey mulong kiin mutam menmen, ni udy mwa kutal neey: kakwiin kabingil kady mwa kulong bwa aalabul mushind indiy a kulang ni bilong bindiy bwa kudy cikwaabw bulund ni Yehow. (Mul. 8:11) Tudy mwa kwiikal batwiishibw neey: hadyobw bangat diihangadik dya kwiihat muut mu cisumbw, bakul baloolong myand hadyobw bangat bujit bwaababw oobw mu mushind udyeby bikaam. I bamanyik neey: teng bu ba zuj ba mu Izaleel wa kal, ‘kabiishoh bend balumbulwiish mu diijin dya baat, ki baluulumbulwiish mu diijin dya Mawej.’​—2 Cif. 19:6, 7.

15. Bwabiny bikaam tulond menmen buludik bwa Yehow butuheehet leeloow?

¹⁵ Bu mukaady bulongolody bwa myand oobw bwend buy ku bulekel, bikaam tuteekel Yehow micim menmen bwa mushind udyey ulong myand. Bwabiny? Mu ciisang cya mal miimiin meeh, tudy mwa kuhet may ma kulond matukanjil a kuhetoh, mady mwa kumweek makasakan bwa kumvw, eecy makasakan bwa kukooyel. Biin-biin, katwaakwiisamboh bend ni Yehow baatalangan nook. Misang yikwaabw, wiiyiiy kwiitwaakish may ma kulond kudyambulwiish dya baat bindiy badyey muteek bwa kwiitulombol. Ciiyiiy kwiikal ciisang cikasakan cidy bamw mwa kweelakan eecy bikal ni miland ni biyihanguj neey: ‘may ma kulond aam malaaluk biin-biin kudy Yehow, eecy i mahangadik mady baan-beet biituloolombol bangat kayaabw eeny?’ Wiiyiiy kuteekelok Yehow ni bulongolody bwindiy micim mu ciisang cikasakan eecy eeny? Bwa kuhet dyaalabul, udy mwa kulangil ha may makulond madyobw bitwaakish leeloow kudy baat biituloolombol bateek kudy Mawej. Uw mwiitabij may ma kulond matuheehet leeloow ni wiimakooyel musang umw, wiiyiiy kulong cikwaabw nook mu ciisang cya mal miimiin meeh.​—Luuk 16:10.

16. I mushind kaay wiikalobw mwa kuteet diitabij diitut bwa mahangadik miikal Yehow mwa kwangat kuuhal ook?

¹⁶ Kudy bwaal bukwaabw butwiiyiiy kukontonon​—kulumbulwiish kwa Yehow ku bulekel kwa bulongolody bubiih bwa myand oobw. Tudy batakamin neey: baat bavul bakiish bakadil Yehow mudimw kaabaak ni baan-beet bakiish batemw, biiyiiy kwangat diihangadik dya kumukadil mudimw kuuhal kwa bulekel kwiiyebw. Ki ku Harmakedon, Yehow, wiiyiiy ukal mudimw ni Yeez, bwa kwangatey diihangadik dya bulekel bwa shikacil aabab wa mafuk maciiyiiy. (Mat. 25:31-33; 2Tes. 1:7-9) Kiin tut bikal mwa kwangat diihangadik dya neey: Yehow wiiyiiy wiitufwiil lus eecy kakwiiy kwiitufwiil lus. (Mat. 25:34, 41, 46) Twiiyiiy kuteekelok Yehow micim bwa mahangadik miikaley mwa kwangat, eecy twiiyiiy kulek kukadil Yehow mudimw hakulek kwiitab mahangadik mindiy? Biin-biin, bikakaam tukashish diitabij diitut  kudy Yehow teng kabaak ni kihacil kiitut kwiiy kulong nook mu mafuk maciiyiiy.

17. I myand kaay yilengel yitwiikal mwa kuhet kumahangadik miikal Yehow mwa kwangat ku bulekel kwa bulongolody bubiih myand oobw?

¹⁷ Lang ket bwa muwiikal mwa kwiiyumvw mu bulongolody bwa Mawej buhyaabuhy hatutaatal bidy bilongek bwa mahangadik mady Yehow mwangat. Biiyiiy kubutul citendeleel cya makos, ni cikwaabw bulongolody bwa bangend a mushing balongavy haakaabumw ni biin myand ya cidiidy bakaakabish baat leeloow. Myand yitaatal makand ma nyeet, bunun, ni kufwiish kwa baat batudy bakat kabyaakwiikalok bend. Biiyiiy kuswiik Sataan ni ba demon bwa mivw cinun. Myand yibiih yidyok leeloow eey bwa mudyobw bakufwaabeel Mawej kayakwiikalok bend. (Yis. 20:2, 3) Nook, i musangal kaay utwiikal nend bwa kufwiijok bikasakan Yehow bwa kumuteekel kwiitut kwa micim bwa myand yiloolongey!

18. Bilondeshel may matusaasangan mu mukand a Kubal kwa Baat 11:4-6 ni 21:5, i malongweesh kaay matudy mwa kuhetel ku cileejel cya biin Izaleel?

¹⁸ Shikacil iitut mu bulongolody buhyaabuhy bwa Mawej wiiyiiy kwiikalok ni makab miikal mwa kuteet diitabij diitut kudy Yehow bwa mushind udyey ulong myand eeny? Tukontonon cileejel eecy, i biny bilongekel mafuk makeeh biin Izaleel baman kuhatuk mu buhik mu Ejipit. Bakwaabw bakady batwaadij kudilakan bwa byaakudy bilengel byaakadyobw bashiy byaakadyobw bakat bikasakan, ni baakady balengulul man byaakudy byaakady Yehow mwiibakish. (Bal Kubal kwa Baat 11:4-6; 21:5.) Ki bikal mwa kwiitufikilokoh byeet kuunyim kwa bulekel bwa mal miimiin meeh eeny? Katwiin bamanyik mudimw utwiikal mwa kulong bwa kuful myand yibiih ni kulong myand ku bikeeh ku bikeeh teng ni mwiikal bulab mwa kushaal paradiiz. Misang yikwaabw, kwiiyiiy kwiikal midimw yivul ya kulong ni kabyah kwiikaloh biheehel misang yikwaabw ku butambwiil bwa shikacil kwiikaley mulengel menmen. Twiiyiiy kudilakanok bwa cikal Yehow mwa kwiitwaakish diib aady eeny? Kudy bwaal bumw bwa biin-biin butudy mwa kumanyik: Hatufwiifwiijok Yehow bikasakan bwa bidyey wiitwaakish leeloow, twiiyiiy kwanyish cikwaabw bikasakan biikaley mwa kwiitulongel diib aady.

19. I myand kaay yitam yiwudy mukwaat mu ciin bwaal eecy?

¹⁹ Yehow uloolong myand teng yiwaakan. Bikaam twiikal batwiishibw bwa bwaal oobw. Cikwaabw bikaam tuteekel baat biituloolombol micim bwaal Yehow i mwiibateekel micim hadyobw bitwaakish may mindiy bwiitut kwiimalond. Kuvulaminoh bend may maleebel Yehow kudyambulwiish dya muprofet indiy Yeshaay ma neey: “Diikand diinun i kubatamij micim mund ni kutakamin kunady.”​—Ye. 30:15.