1-2. (a) Mwomwo ika vatu vavavulu makumbi ano cheji kuvakaluhwilanga kufwelela vaze vali nangolo jakuyula? (b) Vyuma muka natulinangula muchihande chino?

 VATU vavavulu makumbi ano veji kuchiwananga kupwa chachikalu kufwelela vaze vali nangolo jakuyula, mwomwo vamona ngwavo jifulumende namauka ajishimbi, vyeji kukinganga vatu vaze vakwechi luheto nakuhona kukafwa vaka-kuhutwa. Mbimbiliya yahanjika hatoma ngwayo: “Mutu nashinyinyika mukwavo mutu mangana amuyanjise.” (Kwambu. 8:9) Kaha nawa vakulwane vamukwitava chamakuli veji kulinganga vyuma vyavipi. Echi chinalingisa vatu vamwe vakane kufwelela Kalunga. Shikaho nge mutu netavila kulinangula Mbimbiliya, chinahase kutukaluhwila kumukafwa mangana afwelele Yehova namalunga vaze atongola kututwaminyina hano hamavu.

² Chipwe ngocho, keshi vilongesa vyaMbimbiliya kaha vakiko vatela kufwelela Yehova naliuka lyenyiko. Nayetu tunazachila Yehova hamyaka yayivulu, twatela kufwelela ngwetu jila yize Yehova eji kulingilangamo vyuma yapwa yakwoloka. Shimbu jimwe kunahase kusoloka vyuma vimwe vize vinahase kutulingisa tuhone kufwelela Yehova. Muchihande chino natushimutwila havishina vitatu, vize vinahase kweseka lufwelelo lwetu: (1) nge tuli nakutanga mijimbu yimwe yamuMbimbiliya, (2) nge tunatambula jindongi kuliuka lyaYehova, (3) omu natukamona ukalu kulutwe.

3. Uno mijimbu yimwe yamuMbimbiliya yinahase kutulingisa ngachilihi tuhone kufwelela Yehova?

 ³ Omu natutanga Mazu aKalunga tunahase kulihulisa ovyo Yehova  alingililile vyuma vimwe kuvatu vamwe novyo asakwililile kulinga vyuma kana. Chakutalilaho, mumukanda waKulava mwatwama mujimbu uze wasolola nge Yehova ajihile kaIsalele uze vawanyine ali nakuchava jikunyi halikumbi lyaSambata. Kaha nawa mumukanda waSamwele wamuchivali mwatwama mujimbu wakusolola nge omu mwahichile myaka, Yehova akonekelele Mwangana Ndavichi hamulonga alingile waukoji nawakujiha mutu. (Kula. 15:32, 35; Samwe. 2, 12:9, 13) Tunahase kulihulisa ngwetu: ‘Mwomwo ika Yehova akonekelele Ndavichi hamulonga wakujiha mutu nawaukoji nakujiha kaIsalele uze alingile kamulonga kakandende kaha?’ Hakusaka kukumbulula chihula kana, tukekesenu vyuma vitatu vize twatela kushinganyekaho nge tuli nakutanga Mbimbiliya.

4. Uno mukanda waKuputuka 18:20, 21 naLushimbi lwamuchivali 10:17 yatukafwa ngachilihi twitavile jila eji kuyulilangamo Yehova?

⁴ Shimbu jimwe Mbimbiliya kayalumbununa mashina namasongo amijimbu yimweko. Chakutalilaho, twatachikiza ngwetu Ndavichi apihililile nakwalumuka havilinga vyenyi vyavipi. (Samu 51:2-4) Muchima muka apwile nawo uze kaIsalele ahokwele lushimbi lwaSambata? Kutala alikonekelele hachuma alingile tahi? Kutala kunyima ahokweleho jishimbi jaYehova tahi? Uno kunyima kuliko vimwe vamuhuhumwine vize ahumbwile chipwe akanyine tahi? Mbimbiliya kayahanjikahoko. Oloze twatela kutachikiza ngwetu, Yehova “keshi kuhengesa chiyuloko.” (Lushi. 32:4) Yehova eji kuyulanga kweseka naunjiho wamuchano, keshi kweseka navyuma navahanjika kaha vatu, chipwe navyuma vize vyeji kulingisanga vatu vasope mujila yakuhenga, chipwe kumona vatu ulumbiko. (Tangenu Kuputuka 18:20, 21; Lushimbi lwamuchivali 10:17.) Nge natulinangula vyavivulu hali Yehova, nahajishimbi jenyi, kaha natufwelela jila eji kuyulilangamo. Numba nge natutanga mijimbu yimwe muMbimbiliya yize nayitulingisa tulihulise vihula vize katweshi kuhasa kuwana omwo vavikumbulwilako, oloze twatela kwinjikiza chikupu ngwetu, Kalunga “apwa wakwoloka mujijila jenyi josena.”—Samu 145:17.

5. Uno kuhona kukupuka chinahase kutulingisa ngachilihi tuhone kuyula mwachiyulo? (Talenu nawa lipwata lyakwamba ngwavo, “ Kuhona Kukupuka Chinahase Kutulingisa Tumone Vyuma Mujila Yakuhenga.”)

⁵ Hakuwana nge katwakupukako, ngocho katweshi kuhasa kuyula mujila yakwoloka lwola lwosenako. Kalunga nawa atutenga muchifwanyisa chenyi, ngocho tweji kusakanga vatu  vasololenga vilinga vyamwaza kuli vakwavo. (Kupu. 1:26) Kuhona kukupuka cheji kutulingisanga tumone vyuma mujila yakuhenga numba natushinganyeka ngwetu tuli naunjiho wamuchano. Achishinganyekenu kupihya evwile Yona omu Yehova atetelelele vaka-Nyineve. (Yona 3:10–4:1) Achishinganyekenu nawa havyuma vyasolokele omu Yehova atetelelele vaka-Nyineve. Vatu vakuzomboka 120,000 vaze vapihililile nakwalumuka vavayowele. Natukukulula ngwetu ngachilihi? Yona amwene vatu kana mujila yakuhenga, oloze Yehova keshi mukiko avamweneko.

6. Mwomwo ika Yehova kasakiwa kutulumbunwina vyuma ali nakusaka kulingako?

⁶ Shimbu jimwe Yehova kalumbunwina vatu ovyo nalingila vyuma vimweko. Yehova etavishile vangamba jenyi kunyima vahanjike omwo vapwile nakwivwa kutalisa kuvyuma alingile navize ashinganyekele kulinga. (Kupu. 18:25; Yona 4:2, 3) Kaha shimbu jimwe nawa alumbunwinyinenga vangamba jenyi vyuma apwile nakusaka kulinga. (Yona 4:10, 11) Chipwe ngocho, echi kacheshi nakulumbununa nge Yehova atela kutulumbunwina lwola lwosena ovyo mwalingila vyuma vimweko. Hakuwana nge ikiye Tengi yetu, ngocho katela kuvandamina tumwitavise numba alinge chuma chimweko.—Isa. 40:13, 14; 55:9.

7. Ukalu muka uze tunahase kumona, kaha mwomwo ika?

⁷ Twatachikiza ngwetu Yehova eji kulinganga vyuma lwola lwosena mujila yakwoloka. Oloze chinahase kutukaluhwila kufwelela vaze atongola kututwaminyina. Tunahase kuhuhwasana numba nge vaze vali nakututwaminyina muliuka lyaYehova veji kukavangizanga jindongi jaYehova, nyi veji kupendaminanga hachinyingi chavo. Omu pamo mukiko vashinganyekelenga navatu vamwe kushikulu. Achishinganyekenu hachakutalilaho chize twashimutwilanga  mupalangalafu 3. Pamo kausoko kauze lunga ahokwele lushimbi lwaSambata ahuhwasanyine numba nge Mose avangililile kuhulisa Yehova shimbu kanda alweze vatu vajihe uze kausoko kenyi. Kaha nawa pamo sepa lyaUliya kaHete uze ukwechi puwenyi alingile ukoji naNdavichi, akukulwile ngwenyi Ndavichi azachishile ngolo jenyi hakupwa mwangana mangana vahone kumujiha. Yehova afwelela malunga vaze vali nakutwaminyina muliuka namuchikungulwilo. Shikaho nge katweshi kufwelela malunga kanako, kaha chili nakulumbununa nge katwafwelelele Yehovako.

8. Uno mujimbu watwama hali Vilinga 16:4, 5, walitombola ngachilihi najila chili nakuzachilamo chikungulwilo chavaka-Kulishitu makumbi ano?

⁸ Makumbi ano, Yehova ali nakutwaminyina chihanda chaliuka lyenyi chahano hamavu kuhichila muli “ndungo wakushishika wakuzangama.” (Mateu 24:45) Ngana muze chapwile kulizavu lyakutwaminyina lyamulikulukaji lyamyaka lyakulivanga, nandungo eji kutwaminyinanga vatu jaKalunga mukaye kosena, nakuhana jindongi kuvakulwane muvikungulwilo. (Tangenu Vilinga 16:4, 5.) Kaha nawa vakulwane veji kuzatanga nangolo mangana jindongi kana vajikavangize muvikungulwilo. Tweji kusololanga ngwetu twafwelela jila Yehova eji kulingilangamo vyuma, hakukavangiza jindongi tweji kutambulanga kuliuka nakuvakulwane.

9. Lwola muka chinahase kutukaluhwila kukavangiza vyuma navatulweza vakulwane, kaha mwomwo ika?

⁹ Shimbu jimwe tunahase kuchiwana kupwa chachikalu kwitavila vyuma navatulweza vakulwane. Chakutalilaho, mumyaka yakalinwomu vikungulwilo vyavivulu navihanda vanavipangununanga. Shimbu jimwe vakulwane vanahase kulweza vaka-kwambulula vakungulukilenga kuchikungulwilo cheka nge muchikungulwilo chavo muli vatu vavavulu chikuma. Nge vanatulweze kwalukila kuchikungulwilo cheka chinahase kutukaluhwila kuseza masepa navausoko  wetu. Uno Yehova eji kulwezanga vakulwane vatachikize kuchikungulwilo vatela kutuma muka-kwambulula himuka-kwambulula tahi? Nduma. Echi chinahase kutulingisa tuhone kukavangiza jindongi natutambula. Hakuwana nge Yehova afwelela vakulwane hakulinga chuma kana, ngocho nayetu twatela kuvafwelela. *

10. Kweseka naWavaHepeleu 13:17, mwomwo ika twatela kukavangijila vyuma navatulweza vakulwane?

¹⁰ Mwomwo ika twatela kukavangijila vyuma navatulweza vakulwane numba tuhu vyuma kana katwavizangileko? Mwomwo kulinga ngocho, nachitukafwa tupwenga vakulinunga. (Efwe. 4:2, 3) Vikungulwilo vyeji kulinunganga nge vaka-kwambulula vosena navakavangiza vyuma linakase lizavu lyavakulwane. (Tangenu WavaHepeleu 13:17.) Chuma chachilemunyi Yehova mwamona ngwenyi twamufwelela hakukavangiza vakulwane vaze nahane mulimo wakutuzakama.—Vili. 20:28.

11. Vyuma muka navitukafwa tukavangizenga jindongi navatulweza vakulwane muchikungulwilo?

¹¹ Kutachikiza ngwetu vakulwane veji kuvangilanga kulomba shipilitu yajila yivakafwe havyuma navalikasa, cheji kulingisanga tufwelele vyuma navatulweza. Veji kukavangizanga nawa jindongi jamuMbimbiliya, neji veji kutambulanga kuliuka lyaYehova. Vakulwane vasaka kwivwisa Yehova kuwaha nakuhana nawa vatu jindongi jaKalunga jize najisolola nge vavazakama. Malunga kana vatachikiza ngwavo navakalyambulula vavene kuli Kalunga hamilimo veji kuzatanga. (Petu. 1, 5:2, 3) Tachikizenu chumechi: Mukaye vatu valihandununa mwomwo yavikova, nakwitava, navihande vyamapolitiki. Oloze vatu jaYehova vapwa vakulinunga hakulemesa Kalunga umwe kaha wamuchano. Echi chasolola nge Yehova ikiye kaha ali nakukafwa vatu jenyi valinunge hamwe.

12. Vyuma muka veji kukekesanga vakulwane hakusaka vawane numba nge mutu nalingi shili napihilila nakwalumuka?

¹² Yehova ahana vakulwane mulimo waunene wakulama chikungulwilo kupwa chitoma. Nge muka-Kulishitu nalingi shili yayinene, Yehova asaka vakulwane vakafwe mutu kana nakumona numba nge nahase kutwama muchikungulwilo chipwe chiku. Chuma chikwavo nawa veji kufwilanga vakulwane shina kumona numba nge mutu nalingi shili napihilila nakwalumuka. Nahase kusolola muchima wakupihilila nakwalumuka, oloze kutala nahungu vyuma vyavipi alinganga tahi? Kutala nasolola ngwenyi keshi kukahilukila kulinga shili kanako tahi? Nge kulikata navatu vavapi chikiko chamulingishile alinge shili, kutala ali nakufwila kulihenda kuvatu kana tahi? Vakulwane veji kulombanga nakukekesa chihande chenyi kweseka navyuma yahanjika Mbimbiliya nakumona muchima nasolola mutu uze nalingi shili. Kufumaho, veji kumonanga numba nge mutu nalingi shili atela kutwalaho lika kupwa muchikungulwilo chipwe chiku. Shimbu jimwe mutu kana vanahase kumufumisa muchikungulwilo.—Koli. 1, 5:11-13.

13. Vishinganyeka muka tunahase kupwa navyo nge mutu vanafumisa muchikungulwilo apwa sepa lyetu chipwe kausoko ketu?

¹³ Vyuma muka vinahase kutulingisa chitukaluhwile kufwelela vakulwane? Nge mutu vanahange muchikungulwilo kapwa sepa lyetu chipwe kausoko ketuko, kaha tunahase kwitavila jila vanayulilamo vakulwane. Oloze jino ngachilihi nge mutu vanafumisa muchikungulwilo apwa sepa lyetu chipwe kausoko ketu? Tunahase kushinganyeka ngwetu vakulwane hakusopa kavakekesele unjiho wosenako chipwe kushinganyeka ngwetu vanayulu mujila yize kayalitombwele namunayi vishinganyeka vyaYehovako. Vyuma muka navitukafwa tumone vyuma mujila yamwaza kweseka najila vanayulilamo vakulwane?

14. Vyuma muka navitukafwa nge katwasuulukile najila vanayulilamo vakulwaneko?

 ¹⁴ Twatela kutachikiza ngwetu kufumisa mutu muchikungulwilo yapwa hijila yize alongesa Yehova kaha nawa yeji kunganyalisanga chikungulwilo namutu nalingi shili. Nge mutu uze nalingi shili mwatwalaho lika kupwa muchikungulwilo okunyi kapihililile nakwalumukako, kaha mwahungumwisa vakwavo valinge shili. (Ngale. 5:9) Kaha nawa keshi kuhasa kumona kutohwa chashili nalingi, novyo vyatela kumulingisa alumuneko vishinganyeka vyenyi, navilinga vyenyi mangana vamwivwile cheka uselewa kuli Yehovako. (Kwambu. 8:11) Vakulwane veji kukekesanga kanawa vamone numba nge ou mutu chinatemo kumufumisa muchikungulwilo nyi chiku. Ngana mwavaka-kuyula vavaIsalele vakushikulu, navakulwane ‘kaveshi kuyulila vatuko, oloze veji kuyulilanga Yehova.’—Miji. 2, 19:6, 7.

15. Mwomwo ika chapwila chachilemu chikuma kukavangiza jindongi jaYehova makumbi ano?

¹⁵ Omu kukuma chakatwamino kamyaka yino chinapandama kwakamwihi, twatela kufwelela chikuma Yehova hajila eji kulingilangamo vyuma. Mwomwo ika? Haluyando lwalunene tunahase kukatambula jindongi jize najikasoloka nge jajikalu kwivwishisa chipwe kujikavangiza. Tunatachikiza ngwetu Yehova keshi kukahanjika kuli yetuko, mwakatuhana jindongi jenyi kuhichila muli malunga vaze atongola kututwaminyina. Elu kalweshi kukapwa lwola lwakuhuhwasana chipwe kuhulisa ngwetu, ‘Uno jindongi kana jinafumu kuli Yehova tahi? Nyi vanalingi jakutaka kaha kuli ava vandumbwetu vali nakututwaminyina?’ Uno halwola kana namukafwelela Yehova naliuka lyenyi tahi? Kukumbulula chihula kana chinapendamina hajila tuli nakwakwilamo kujindongi vali nakutuhana oholyapwa. Nge natufwelela jindongi tuli nakutambula makumbi ano nakujikavangiza, kaha tunahase kukalinga mwomumwe nahaluyando lwalunene.—Luka 16:10.

16. Mwomwo ika chinahase kukatukaluhwila kufwelela kusopesa chaYehova kulutwe?

¹⁶ Twatela nawa kushinganyeka kanawa omwo natukakulako halwola Yehova mwakanongesa katwamino kamyaka yino. Twatela kufwelela ngwetu, vatu vavavulu vaze kaveshi nakuzachila Yehova kuhakilako navausoko wetu vaze kavapwa Vinjihoko, kulutwe vatela kusakula kuzachila Yehova shimbu kanda kukuma chizenga. HaAlamangetone, Yehova kuhichila muli Yesu mwakatachikiza mwakusopesela vatu kana. (Mateu 25:31-33; Teso. 2, 1:7-9) Kaweshi kukapwa mulimo wetu wakusaka kutachikiza iya vatela kwivwila keke kuli Yehova nowo kavatela kwivwilako. (Mateu 25:34, 41, 46) Uno natukafwelela kusopesa chaYehova tahi? Nyi natukalitwamina kumuzachila mwomwo yajila  mwakasopelamo? Chikupu vene, twatela kufwelela chikuma Yehova oholyapwa, kahechi nachikatukafwa nakulutwe tukamufwelele.

17. Uno natukanganyala ngachilihi kukusopesa chaYehova, omu mwakanongesa katwamino kamyaka yino?

¹⁷ Achishinganyekenu omu natukevwa mulifuchi lyalihya hakumona vyuma vyamwaza navikafuma hakusopesa chaYehova. Kamweshi kukapwa kwitava chamakuliko, nakusekasana chamuno mukaye, navaka-mapolitiki vaze vanashinyinyikanga vatu hamyaka yayivuluko. Kamweshi kukapwa misongo, naushinakaji, chipwe kufwisa vatu twazangako. Vyuma vyosena evi kavyeshi kukapwamoko. Satana navandemone navakavakasa hamyaka 1,000. Ukalu wosena uze unapungako mwomwo yakulikanga chavo, kaweshi kukapwamoko. (Kuso. 20:2, 3) Natukawahilila chikuma mwomwo twafwelelele Yehova hajila eji kulingilangamo vyuma.

18. Vyuma muka natulinangula kuli vaIsalele vize vasoneka hali Kulava 11:4-6; 21:5?

¹⁸ Uno mulifuchi lyalihya namukapwa vyuma vize navikatulingisa tukachiwane kupwa chachikalu kufwelela Yehova hajila eji kulingilangamo vyuma tahi? Chakutalilaho, achishinganyekenu vyuma vyasolokele omu vaIsalele vafumine muundungo muEjipitu? Vamwe vaputukile kuyayavala mwomwo yakwanuka vyakulya vize valilenga nakumona mana yize avahanyine Yehova kupwa kulya chamokomoko. (Tangenu Kulava 11:4-6; 21:5.) Kutala tunahase kukapwa navishinganyeka vyovimwe hanyima yaluyando lwalunene tahi? Katwejivile kutohwa chamulimo natukapwa nawo wakuwahisa mavu palanga nomu nawakapwa palachiseko. Pamo kumaputukilo nakukapwa milimo yayivulu chikuma. Kutala natukayayavala havyuma mwakatulingila Yehova halwola kana tahi? Nge natusakwilila Yehova havyuma anakutulingila oholyapwa, kaha pamo mukiko natukalinga nakulutwe nawa.

19. Namulumbununa ngachilihi mukavatu vishina vyavinene tunalinangula muchihande chino?

¹⁹ Shimbu yosena Yehova eji kulinganga vyuma mujila yakwoloka. Nayetu twatela kufwelela vene ngocho. Twatela kufwelela nawa malunga vaze Yehova nahane mulimo wakututwaminyina. Kanda natuvulyama mazu aYehova aze alwezele kapolofweto kenyi Isaya akwamba ngwawo: “Namukwata ngolo kachi nge namuunda nakungufwelela.”—Isa. 30:15.