1-2. (a) Muloñadi antu amavulu makonu chichayikalilaña kuyikuhwelela antu akweti wuswa? (b) Tukuhanjekadi muchinu chibaaba?

 MAKONU antu amavulu chayikalilaña kukuhwelela muntu wejima wukweti wuswa. Anachimoni nawu jinfulumendi ninshimbi kakavulu jakiñaña antu aheta niantu akweti ñovu, ilaña hiyakwashaña atuzweñiku. Bayibolu yahosha nawu: ‘Muntu wayuulaña mukwawu muntu kulonda amukatishi.’ (Mukwa. 8:9) Kubombelahu, akulumpi amukwitiya kukwawu akoñaña yuma yatama, yinaleteshi antu amakwawu kubula kumukuhwelela Nzambi. Dichi neyi muntu neteji kumudizisha Bayibolu, twamonaña kukala hakwila tumukwashi amukuhweleli Yehova nikukuhwelela antu amwimenañaku hamaseki.

² Hela chochu, bayi neyi atudizi aBayibolu diwu atela hohu kumukuhwelela Yehova nikuloñesha kwindiku. Ninetu tunashakami yaaka yayivulu muchalala bayi tuleka kumukuhwelela Yehova netu yuma yelañayi hiyaloña mpinji yejimaku. Mpinji yikwawu yuma yinateli kumwekana yikutuletesha chitukalili kumukuhwelela. Muchinu chibaaba, tukuhanjeka hayuma yisatu yinateli kweseka chikuhwelelu chetu: (1) hampinji yitunakutaña nsañu yimu muBayibolu, (2) neyi kuloñesha kwaYehova kunatwinki nshimbi (3) nawa neyi tumona kukala kumbidi.

3. Nsañu yikwawu yamuBayibolu yinateli kutuletesha ñahi kutachika kumujinoka Yehova?

 ³ Hampinji yitunakutaña Bayibolu, tunateli kujinooka Yehova cheliliyi nawantu amakwawu ilaña amakwawu nehi  nichafuukwiliyi. Chakutalilahu, mumukanda waKuchinda twatañañamu Yehova chafuukwilihu nindi kaIsarela wayili nakuchaya nchawa haSabata amujahi. Mumukanda waSamweli wamuchiyedi, twatañañamu netu chimwahitili yaaka Yehova wamwanakeneni Mwanta Davidi hamuloña wakwila wuvumbi nikujahañana. (Kuch. 15:32, 35; 2 Sam. 12:9, 13) Tunateli kudihula netu, ‘Muloñadi Yehova chamwanakeneniyi Davidi hamuloña wakujahañana niwuvumbi, ilaña eteji kujaha ona iyala wadiña nakamuloña kanyanya?’ Hakwila twakuli ilu lwihu talenu yuma yisatu yitwatela kwanukaña neyi tunakutaña Bayibolu.

4. Indi Kutachika 18:20, 21 niKuhituluka 10:17, yatukwashaña ñahi kukuhwelela chikupu muwunsompeshi waYehova?

⁴ Bayibolu hiyashimunaña nsañu yejima hanoyu nsañuku. Chakutalilahu, tweluka netu Davidi wabalumukili chikupu mumuchima hayuma yakoñeliyi. (Mas. 51:2-4) Indi ona iyala wafumpili nshimbi yaSabata wadiña iyala wamuchidinyi? Komana watiyili kutama nayuma yakoñeliyi? Komana kunyima wadikañilihu nanshimbi jaYehova? Komana kunyima wadiwilihu kufumba hela kukaana mwamusoñamishiliwu? Bayibolu yashimuna wanyi. Hela chochu, twatela kwiluka ichi chikuma netu: Yehova “wabulaña kukoña yuma yaheña.” (Kuhit. 32:4) Wafuukulaña kushindamena hayuma yalala—bayi hayuma yahoshañawu antu, hachaambu, hela chuma chikwawu chaleteshaña antu kukunkulula mwaluwaku. (Tañenu Kutachika 18:20, 21; Kuhituluka 10:17.) Neyi tumwiluka chikupu Yehova ninshimbi jindi, tukukuhwelela chikupu wuñanji windi. Hela chakwila tukutaña Bayibolu nawa tukweti malwihu itukubula kwakula chayinu mpinji, tweluka yuma yayivulu hadi Nzambi netu yena “waloña munjila jindi jejima.”—Mas. 145:17.

5. Kubula kuwanina kwatuleteshaña ñahi kutoñojoka mwaluwa? (Talenu cheñi chikasha chinakwila nawu “ Kubula Kuwanina Kwatuleteshaña Kufuukula Mwaheña.”)

⁵ Chineli twawanina wanyi kwila tufuukula mwaloña nehi. Nzambi watuleña muchifwanisha chindi, dichi twafwilaña kumona antu ejima anakuyila chochimu. (Kutach. 1:26) Ilaña, hamuloña wakwila twawanina wanyi, tunateli kufuukula mwaheña, hela chakwila tunakutoñojoka netu tukweti wunsahu wejima. Chakutalilahu, anukenu Yona  chatiyiliyi kutama chelili Yehova yeli nindi wukuyanakena antu akuNiniva. (Yona 3:10–4:1) Ilaña talenu chuma chafuminimu. ANiniva akubadika ha 120,000 abalumukili mumuchima ayipulwishili. Nkumininaku, Yona diyi wayifuukwilili antu mwaluwa, bayi Yehovaku.

6. Muloñadi Yehova chatela kubula kutulumbulwila yuma yejima yinafuukuliyi?

⁶ Yehova hatela kuleja antu chuma chinaleteshi afuukuli munoyu njilaku. Eña, Yehova kunyima wayitejeli ambuñindi kushimuna yitoñojoka yawu kutalisha hayuma yafuukwiliyi hela hayuma yakeñeleña kwilayi. (Kutach. 18:25; Yona 4:2, 3) Nawa kakavulu, walumbulwileña mwafuukwileñayi. (Yona 4:10, 11) Hela chochu, Yehova hatela kutuleja yuma yinaleteshi eli munafuukuliyiku. Chineli diyi Nleñi yetu, hatela kutwihula etu kulonda twiteji munafuukuliyi hela henohu kanda afuukuliku.—Isa. 40:13, 14; 55:9.

7. Chumanyi chinateli kutukalila, nawa muloñadi?

⁷ Chakadi nikujina, tweteja chikupu netu Yehova welaña yuma yaloña mpinji yejima. Hela chochu, chinateli kutukalila kukuhwelela antu atondayi hamaseki. Tunateli kutachika kujinooka neyi antu akweti wuswa mukuloñesha kwaYehova anakulondela munakuyilejayi Yehova indi kwiji anakuzatisha yitoñojoka yawu. Hadaha dichatoñojokeleñawu antu amakwawu kunyima. Toñojokenu hachakutalilahu chadiña  muparagilafu 3. Ntaña yamuntu wafumpili lushimbi lwaSabata hadaha wajinokeli neyi chakwila Mosi wamwihwili Yehova henohu kanda ahani lushimbi lwakumujaha. Nawa ibwambu daUriya kaHiti, wukweti ñodindi welili wuvumbi naDavidi, hadaha wakunkulwili nindi Davidi wazatishili ñovu yindi yawanta kulonda abuli kumubabesha hachuma chakoñeliyi. Yehova wayikuhwelela awa antu atondayi nindi alomboleña mukuloñesha kwindi nimuchipompelu. Dichi neyi twayikuhwelela wanyi awa amayala, kwila tuhosha netu twamukuhwelela Yehova nehi.

8. Kunuñañananyi kudihu kutalisha hansañu yasonekawu haYilwilu 16:4, 5, nachazatikaña chipompelu chawakaKristu makonu?

⁸ Makonu Yehova nakulombola kuloñesha kwindi kwaheseki kuhitila mudi “nduñu wamaana nikashinshi.” (Mat. 24:45) Kufwana izanvu dalombolaña dadiñaku mumafuku awakaKristu akusambila, iwu nduñu walombolaña antu jaNzambi mukaayi kejima nawa wahanaña nshimbi jatela kulondelawu akulumpi muchipompelu. (Tañenu Yilwilu 16:4, 5.) Akulumpi niwena azataña nañovu kulonda alondeleña iyi nshimbi muyipompelu. Twamwekeshaña netu twakuhwelela munjila mwelilañayi Yehova yuma neyi tunakutiyilila wunlomboli watwinkañawu mukuloñesha nikudi akulumpi.

9. Mpinjinyi yichinateli kutukalila kwovwahila munafuukuliwu akulumpi, nawa muloñadi?

⁹ Mpinji yikwawu, chatukalilaña kulondela munafuukuliwu akulumpi. Chakutalilahu, hadi yaaka yinahitihu yipompelu yayivulu nijiñinza anayibombi hamu. Dichi akulumpi ayilejeli akakushimwina kulonda apompeña muyipompelu yikwawu hakwila nawu yitwamu yidi muMatala etu aWanta yizatikeña nankashi. Neyi atuleja nawu tutachiki kupompela muchipompelu chikwawu, chinateli kutukalila kushiya amabwambu jetu nichisaka. Komana Nzambi diyi wayilejaña akulumpi kwatela kuyayi mukakushimwina wejima? Inehi. Nawa neyi Nzambi diyi wayilejaña wanyi chinateli kutukalila kwovwahila munatulejiwu. Ilaña Yehova wayikuhwelela akulumpi  kufuukula muniyi njila, ninetu twatela kuyikuhwelela. *

10. Kwesekeja naAHeberu 13:17, muloñadi chitwatela kuzatilaña hamu nawakulumpi?

¹⁰ Muloñadi chitwatela kwiteja munakutulejawu akulumpi nikulondela munafuukuliwu hela chakwila yuma yinafuukuliwu yinambuki nayuma yitunakukeña? Muloña neyi twila mwenimu, tukukwasha antu jaNzambi kwikala anuñañana wumu namukwawu. (Efwe. 4:2, 3) Yipompelu yayilañaku hambidi neyi antu ejima muchipompeli anakulondela mwejima munakufuukula izanvu dawakulumpi. (Tañenu AHeberu 13:17.) Chuma chasweja kulema, twamwekeshaña kudi Yehova netu twamukuhwelela neyi tuzatilaña hamu nawantu enkayi mudimu wakutulombola.—Yilw. 20:28.

11. Chumanyi chinateli kutukwasha kukuhwelela nankashi muwunlomboli wutwatambwilaña kudi akulumpi?

¹¹ Tunateli kukuhwelela chikupu nshimbi jatwinkañawu akulumpi neyi twanukaña netu alombaña spiritu yajila neyi anakuhanjeka hansañu yinakundami kuchipompelu. Cheñi ashinshikaña nakanañachima muyishina yalema yamuBayibolu nimunshimbi jatambwilañawu mukuloñesha kwaYehova. Afwilaña chikupu kumutiyisha Yehova kuwaha nikwakamena antu jindi. Awa amayala ashinshika eluka nawu akalumbulula kudi Nzambi nanochu chazatañawu nyidimu yawu. (1 Pet. 5:2, 3) Talenu ichi chikuma: Mukaayi mudi antu adambula muloña wekowa, kwitiya, nsañu jamatuña nachiyuulu, ilaña antu jaYehova adifukulaña kudi Nzambi walala wumu hohu mukunuñañana. Chumichi chazatikaña hohu muloña wakwila Yehova wakwashaña kuloñesha kwindi!

12. Yikumanyi yashinshikañawu akulumpi neyi anakukeña kwiluka neyi muntu nabalumuki chikupu mumuchima?

¹² Yehova wayinka akulumpi mudimu weneni wakuhemba chipompelu chakadi majilu. Neyi mukaKristu nakoñi nshidi yeneni, Yehova wakeñaña nindi akulumpi ashinshikihu kulonda amoni neyi owu muntu watela kutwalekahu kwikala muchipompelu. Hakachi kayuma yikwawu yashinshikañawu, ashinshikaña chikupu kulonda amoni neyi iwu muntu nabalumuki chikupu mumuchima nayuma yeliliyi hela nehi. Nateli kuhosha nindi nabalumuki mumuchima, komana naheli chikupu yuma yeliliyi? Komana nadishiñi nindi hamba kafuntishahu cheñi nshidiku? Neyi kudikunda nawantu atama dikwamuletesheli kukoña nshidi, komana naleki kudikunda nawu? Akulumpi alombaña kudi Yehova, asandujolaña chikupu chahosha Bayibolu nawa amonaña neyi iwu muntu natiyi kutama nachuma chakoñeliyi. Nkumininaku afuukulañahu neyi chakwila iwu muntu nateli kutwalekahu kwikala muchipompelu. Mpinji yikwawu, anateli kumuhaña.—1 Kor. 5:11-13.

13. Yitoñojoka yamuchidinyi yitunateli kwikala nayu neyi ibwambu detu hela ntaña yetu anamuhañi?

¹³ Chumanyi chinateli kuletesha chitukalili kuyikuhwelela akulumpi? Neyi muntu anahañiwu hibwambu detu wanyi hela ntaña yetu wanyi, chaswayi kwiteja munafuukuliwu akulumpi. Twili netu muntu anahañiwu hiibwambu detu nankashi. Hadaha tunateli kutoñojoka netu akulumpi ashinshikili wanyi hawunsahu wejima, hela netu afuukwili wanyi kwesekeja nachinateli kufuukulayi Yehova. Chumanyi chinateli kutukwasha kwiteja munafuukuliwu akulumpi?

14. Chumanyi chinateli kutukwasha neyi akulumpi afuukula nawu ntaña yetu hela ibwambu detu watela kuhañewa?

 ¹⁴ Twatela kwanukaña netu Yehova diyi washaku ntanjikilu yakuhaña muntu muchipompelu nawa yakwashaña chipompelu kushilahu nimuntu wunavulumuni. Neyi muntu wunabuli kubalumuka mumuchima abula kumufumisha muchipompelu, wukuluwañesha antu adi muchipompelu niwena akukoña nshidi. (Ñal. 5:9) Kubombelahu, nateli kudiwula nshidi yinakoñiyi, nawa wukuhimpa wanyi yitoñojoka yindi niyilwilu yindi kulonda Yehova yekali cheñi ibwambu dindi. (Mukwa. 8:11) Twatela kwiluka chikupu netu, akulumpi azataña nañovu kulonda amoni neyi muntu watela kuhañewa hela nehi. Eluka chikupu nawu kufwana ansompeshi adiñaku muIsarela ‘hiyasompelaña muntuku, ilaña asompelaña Yehova.’—2 Kushi. 19:6, 7.

15. Muloñadi chitwatela kukuhwelela chikupu wunlomboli waYehova kubadika kunyima?

¹⁵ Chineli kukuma kwanshakaminu yamakonu kunakuswina mukamwihi, twatela kukuhwelela chikupu munjila yelilañamu Yehova yuma kubadika kunyima. Muloñadi? Hampinji yalukadi lwasweja, hadaha tukatambwila nshimbi jikamwekana neyi jakala kutiyisha hela kujovwahila. Hela chochu, Yehova hakahoshaña nanetu hamuntu-hamuntuku. Hamwaha wakatwinkaña nshimbi kuhitila mudi antu amwimenañaku. Kwakekala wanyi mpinji yakujinoka wunlomboli hela kutoñojoka netu, ‘Komana yuma yinakutulejawu yinakufuma kudi Yehova tahindi hiyitoñojoka yawamanakwetu anakulombola?’ Komana mwakamukuhwelela Yehova nikuloñesha kwindi haniyi mpinji yakala mukuhanda kwawantu? Neyi mwalondelaña wunlomboli wafumaña kudi antu amwimenañaku Nzambi chayinu mpinji, chikuyikwasha kwakula ilu lwihu. Neyi mwovwahilaña nshimbi yitwatambwilaña makonu, chakadi nikujina mwakela chuma chochimu nihalukadi lwasweja.—Luka 16:10.

16. Chumanyi chikaletesha chikutukalila kukuhwelela muwunsompeshi waYehova kumbidi?

¹⁶ Kudi cheñi chuma chikwawu chitwatela kutoñojokahu, chitwakela nawunsompeshi waYehova hanyima yakukuma kwakaayi katama. Chayinu mpinji twatoñojokaña netu, antu amavulu abulaña kumukalakela Yehova kushilahu niantaña jetu abula kwikala akakwitiya akafuukulahu kumukalakela henohu kukuma kanda kwinzi. Ilaña haAmagedoni, Yehova, kuhitila mudi Yesu, wakafuukulahu chakekala mbidi yawu. (Mat. 25:31-33; 2 Tes. 1:7-9) Etu tukweti wanyi wuswa wakufuukulahu  muntu atela kutiyilawu luwi kudi Yehova hela nehi. (Mat. 25:34, 41, 46) Komana twaketeja mwakafuukulayi Yehova, tahindi twakaleka kumukuhwelela muloña wakwila tuneteji wanyi munafuukuliyi? Mwamweni, twatela kumukuhwelela Yehova chayinu mpinji kulonda twakamukuhweleli chikupu nikumbidi.

17. Yumanyi yayiwahi yakafumamu muwunsompeshi waYehova hakukuma kwakanu kaayi katama?

¹⁷ Fwikijenu chitwakatiya mwituña dadiha hakumona yuma yikafuma muwunsompeshi waYehova. Kwitiya kwakutwamba kwakekalaku wanyi nawa akwakulanda nakulandulula akwalwisu akekala kwosi hela nfulumendi yawantu yinakabishi antu hadi yaaka yayivulu. Kwakekala kwosi kukatakata, wushinakaji nikufwisha antaña jetu itwakeña. Satana hamu niandemoni jindi akayikasa hadi yaaka ikombakaji. Yuma yatama yamwekanaña hamuloña wakudikaña kwawu yakajiya. (Chim. 20:2, 3) Twakatiya kuwaha hakwiluka netu twakuhweleleli munjila mwelilañayi Yehova yuma!

18. Yumanyi yitunakudizila kudi aIsarela neyi chinasonekiwu haKuchinda 11:4-6 ni 21:5?

¹⁸ Komana chihandilu mwituña daNzambi dadiha chikekala chakala chakwila chakaleteshi twakatachiki kujinooka njila yelilañamu Yehova yuma? Chakutalilahu, talenu chuma chamwekeni hanyima yakwila aIsarela anayifumishi muwuduñu muEjipitu. Amakwawu atachikili kutooba muloña anukili yakuda yadileñawu kwenakuna, nawa atachikili kudiwula manina ayinkeleñawu kudi Yehova. (Tañenu Kuchinda 11:4-6; 21:5.) Komana diyi yitoñojoka yitwakekala nayu hanyima yakwila lukadi lwasweja lunamani? Tuneluki wanyi kutoha kwamudimu wutwakekala nawu wakufumisha majilu nakwilisha iseki paradisa chovu-chovu. Chakadi nikujina, twakekala namudimu weneni wakuzata. Komana chihandilu chakekala chapela wanyi kumatachikilu? Komana twakatoobaña nayuma yakatwinkañayi Yehova hayina mpinji? Chuma chimu chitwatela kwiluka dichichi: Neyi twasakililaña hayuma yatwinkañayi Yehova chayinu mpinji, chakekala chaswayi kumusakilila hayina mpinji.

19. Mukulumbulula ñahi muwihi yikuma yidi muchinu chibaaba?

¹⁹ Njila mwelilañayi Yehova yuma mpinji yejima yaloña. Twatela kwiluka ichi chuma. Twatela cheñi kukuhwelela antu enkayi Yehova mudimu nindi atulomboleña. Anukenuña awa mazu ahosheliyi Yehova mudi kaprofwetu kindi Isaya nindi: “Mwakekala nañovu neyi mudiwunjika nikunkuhwelela.”—Isa. 30:15.