1-2. (a) Engvângin nge tûn laia mi tam takin thuneitute rin chu harsa an tih? (b) He thuziakah hian eng nge kan sawiho vang?

TUN laia mi tam tak chuan thuneitute rin chu harsa an ti a. Anni chuan sawrkârte leh dân kengkawhtute’n mi hausate leh mi thiltitheite chu an duhsakin, mi retheite chu an ṭanpui tak tak lo tih an hmu a. Bible chuan: “Mi, mi dang chungah pawi khawpin a intilal ṭhîn,” tiin dik takin a sawi a ni. (Thur. 8:9) Chu bâkah, sakhaw hruaitu ṭhenkhat chuan thil ṭha lote an tih avângin, mi ṭhenkhatin Pathianah rinna an nei tawh lo. Chuvângin, tu emawin Bible zir a duh hian, ani chu Jehova leh lei lama a aiawhtu atâna a mi ruatte ring tûra kan ṭanpui a ngai a ni.

² Ni e, Bible zirlaite chauh chu Jehova leh a inawpna pâwl ring tûra zirtîr ngai awm chhun an ni lo. Kum tam tak chhûng thutakah kan lo awm tawh a nih pawhin Jehova’n thil dik a ti reng ṭhîn tih hi kan theihnghilh ngai tûr a ni lo. Hemi chungchânga kan rinna fiahtu dinhmunte hmachhawn châng kan nei thei a. He thuziakah hian kan rinna fiah theitu dinhmun pathum sawiho a ni ang: (1) Bible-a thu ṭhenkhat kan chhiar hunah, (2) Jehova inawpna pâwl aṭanga kaihhruaina kan dawn hunah, leh (3) nakina harsatnate kan hmachhawn hunah, tihte hi.

3. Engtin nge Bible-a thu ṭhenkhatin Jehova kan rinna a fiah mai theih?

 ³ Pathian Thu, Bible kan chhiar hian Jehova’n mi ṭhenkhat a cheibâwl dân emaw, a thu tlûkna siam ṭhenkhat emaw chungchângah  hriatthiam loh kan nei thei a. Entîr nân, Numbers bu-ah hian Jehova’n Chawlhnia thing fawmtu Israel mi chu tihlum tûrin thu a pe tih kan chhiar a. Samuela pahnihna bu-ah chuan, a hnu kum zabi tam taka Jehova’n Lal Davida uirêna leh tualthahna a ngaihdam thu kan chhiar a ni. (Num. 15:32, 35; 2 Sam. 12:9, 13) ‘Engvângin nge Jehova’n Davida uirêna leh tualthahna a ngaihdam laia, chutiang tluka bawhchhiatna lian tham ni lo anga lang thil sual titu chu a tihhlum leh lawi si?’ tiin kan ngaihtuah mai thei. Chu zawhna chhâng tûr chuan, Bible kan chhiar huna kan hriat reng tûr thil pathum hi i lo ngaihtuah ang u.

4. Engtin nge Genesis 18:20, 21-na leh Deuteronomy 10:17-nain Jehova rorêl dânte ring tlat tûra min ṭanpui?

⁴Bible-in thil nih dân chipchiar takin a târ lang vek reng lo. Entîr nân, Davida chu a thiltihte avângin inchhîrna dik tak a lantîr tih kan hria a ni. (Sâm 51:2-4) A nih chuan, Chawlhni dân bawhchhetu chu eng ang mi nge a nih? A thiltih avângin inchhîrna a nei em? Tûn hmain Jehova dânte chu a lo bawhchhe tawh ṭhîn em? Vaukhânnate chu a lo ngaihthah emaw, hnâwl emaw tawh ṭhîn em? Bible-in eng mah a sawi lang lo. Mahse, hei erawh kan chiang thei a ni: Jehova chu “khawlohna nei lo” a ni tih hi. (Deut. 32:4) Ani chuan thil nih dân engkim a hria a, mi dang thusawi chhâwn te, inpâwng huatna te, a nih loh leh mihring thlîr dân tikhawlo fotu thilte ṭanchhanin ro a rêl ngai lo. (Genesis 18:20, 21; Deuteronomy 10:17 chhiar rawh.) Jehova leh a tehnate chungchâng kan hriat tam poh leh a rorêl dânte chu kan ring lehzual ang. Bible-ah hian tûna kan chhân theih rih loh thu ṭhenkhat a awm a nih pawhin, kan Pathian chu “a awm dân zawng zawngah a felin,” a dik a ni tih kan hre chiang a ni.—Sâm 145:17.

5. Engtin nge ṭhat famkim lohnain kan thu tlûkna siamah nghawng a neih? (“ Ṭhat Famkim Lohnain Rorêl Dikna Kan Thlîr Dân A Tikhawlo,” tih bâwm chu en bawk rawh.)

⁵Kan ṭhat famkim loh avângin kan thil thlîr dân chu a dik reng ṭhîn lo. Pathian anpuia siam kan nih avângin mite chuan dik taka cheibâwlna an dawn chu kan duh a. (Gen. 1:26) Mahse, thil nih dân engkim kan hre vek emaw kan tih pawhin kan ṭhat famkim loh avângin kan thil thîr dânte chu a dik lo fo va. Entîr nân, Jehova’n Ninevi khuaa mite  chunga zahngaihna a lantîr avângin Jona chu a lungni lo hle a ni. (Jon. 3:10–4:1) Mahse, a rah chhuah kha han ngaihtuah teh. Ninevi khuaa inchhîrna lantîrtu mi 1,20,000 chuangin nunna an hmuh phah a nih kha! A tâwpa insiam ṭhat ngai chu Jehova ni lovin, Jona zâwk a ni.

6. Engvângin nge Jehova’n thu tlûkna a siam chhante chu min hrilhfiah kher a ngaih loh ?

⁶Jehova’n mihringte hnênah thu tlûkna a siam chhante hrilhfiah tûrin mawhphurhna a nei lo. Ani chuan tûn hmaa a chhiahhlawhte chu a thu tlûkna siam tawhte leh siam tûrte chungchângah an ngaih dânte sawi chhuah a phalsak tih chu a dik ngei mai. (Gen. 18:25; Jon. 4:2, 3) A châng phei chuan, chutianga thu tlûkna a siam chhante chu a hrilhfiah hial a ni. (Jon. 4:10, 11) A nihna takah chuan, Jehova’n thu tlûkna a siam chhante chu min hrilhfiah kher a ngai lo. Min Siamtu a nih angin, thil a tih hmain emaw, a tih hnuah emaw kan remtihna lah a mamawh hek lo.—Is. 40:13, 14; 55:9.

7. Eng harsatna nge kan hmachhawn mai theih a, engvângin nge?

⁷ Jehova chuan thil dik a ti reng ṭhîn tih kan pawm thlap a. Mahse, min hruaitu atâna a mi ruatte rin chu kan tân a harsa thei a ni. A inawpna pâwla thuneihna eng emaw chen neitute hian a kaihhruaina ang takin thil an ti nge ni a, mahni duh dân angin an ti zâwk tiin kan ngaihtuah mai thei. Bible hun laia mi ṭhenkhatte ngaihtuahna pawh chutiang chu a ni thei a ni.  Paragraph 3-naa târ lan tâk entîrnate kha han ngaihtuah teh. Chawlhni dân bawhchhetu chhûngkhat hnai tu emaw chuan tihhlum tûr thu puan chhuah a nih hmain Mosia’n Jehova a râwn tak tak leh tak tak loh a ngaihtuah mai thei a. Davida’n a nupui a uirêsak, Hit mi Uria ṭhian pakhat chuan Davida’n a phu ngawih ngawih thihna pumpelh tûrin lal a nihna chu a hmang ṭangkai niin a ngai mai thei bawk. Thil chiang tak mai chu, Jehova’n a lei lam inawpna pâwla hma hruaitu atâna a ruatte kan rin loh chuan, Ani chu kan ring tiin kan sawi thei lo, tih hi a ni.

8. Tirhkohte 16:4, 5-a chhinchhiah thiltih dân leh tûn laia Kristian kohhrana thiltih dânahte hian eng inanna nge awm?

⁸ Tûn laiah, Jehova chuan a lei lam inawpna pâwl chu “bawih rinawm, fing tak” hmangin a kaihruai a. (Mt. 24:45) Kum zabi khatnaa governing body ang bawkin, he bâwih hian khawvêl pum huapa Pathian mite chu enkawlin kohhran upate hnênah kaihhruainate a pe a ni. (Tirhkohte 16:4, 5 chhiar rawh.) Kohhran upate chuan kaihhruaina an dawnte chu ṭha takin an zui a. Jehova inawpna pâwl leh kohhran upate hnên aṭanga kan dawn kaihhruainate zuina hmangin Jehova chuan thil dik a ti reng ṭhîn tih kan rinzia kan lantîr a ni.

9. Eng hunah nge kohhran uapte thu tlûkna siam chu zawm harsa kan tih mai theih a, engvângin nge?

⁹ A châng chuan, kohhran upate thu tlûkna siam mila thil tih chu harsa kan ti thei a. Entîr nân, tûn hnai kumahte khân, kohhrante leh bial tam tak chu finkhâwm a ni a. Dinhmun ṭhenkhatah, upate chuan kan Kingdom Hall-tea a âwm tâwka mi kan khah theih nân tiin thuchhuahtute chu kohhran danga insawn tûrtein an hrilh a ni. Kohhran danga insawn tûra tih kan nih chuan, kan ṭhiante leh chhûngte kalsan chu harsa kan ti thei a. Kohhran upate chuan thuchhuahtu tinte chu an kohhran lawina tûr hmun hrilh tûrin Pathian kaihhruaina an dawng tihna a ni em? Ni lo. Chu tak chu a ni, kaihhruaina kan dawnte zawm a harsat chhan ni thei chu. Mahse, Jehova chuan upate chu chutiang thu tlûknate  siam tûrin a ring tâwk a, keini pawhin anni chu kan ring ve tûr a ni. *

10. Hebrai 13:17-a thu nêna inmilin, engvângin nge kohhran upate nêna kan thawhho vang?

¹⁰ Kohhran upate thu tlûkna siam chu kan duh zâwng a nih loh pawhin, engvângin nge chûngte chu kan thlâwp tlat ang? Chutianga kan thlâwpna hmangin Pathian mite zîngah inpumkhatna kan awmtîr a ni. (Eph. 4:1-3) Kohhrana unau zawng zawngin inngaitlâwm taka upate thu tlûkna siam an zawm hian kohhran chu a ṭhang chho ṭhîn. (Hebrai 13:17 chhiar rawh.) A pawimawh zâwk chu, Jehova hnênah min ngaihsak tûra a mi rinte nêna thawhhona hmangin amah kan rinzia lantîr hi a ni.—Tirh. 20:28.

11. Engin nge kohhran upate hnên aṭanga kan dawn kaihhruainate ring tlat tûra min ṭanpui thei?

¹¹ Kohhran upate’n unaute nghawng theitu tûr thute an ngaihtuah hunah thlarau thianghlim dîlin an ṭawngṭai tih hre rengin, an hnên aṭanga kan dawn kaihhruainate chu kan ring tlat thei a ni. Anni chuan an thu ngaihtuah nêna inzawmna nei Bible thu bulte ngun taka an ngaihtuah bâkah, Jehova inawpna pâwl buatsaih kaihhruainate pawh an râwn bawk. An duh ber chu, Jehova tihlâwm leh a ṭha thei ang bera a mite ngaihsak hi a ni. Chûng mi rinawmte chuan an mawhphurhnate an hlen dânah an chanchin Pathian hmaah an la sawi dâwn tih an hria a. (1 Pet. 5:2, 3) Hei hi han ngaihtuah teh: Hnam te, sakhua te, leh politics-te avânga inṭhen darhna khawvêlah hian, Jehova mite chuan inpumkhat takin Pathian dik awm chhun an bia a. Chu chu Jehova’n a inawpna pâwl mal a sâwm avâng chauhva tih theih a ni.

12. Kohhran upate chuan thil sual tituin inchhîrna a neih leh neih loh hriat an tum hunah engte nge a ngaihtuah?

¹² Jehova chuan kohhran upate chu thianghlim taka kohhran a awm reng theih nâna enkawl tûrin mawhphurhna rit tak a pe a. Kristian tu emawin thil sual lian tak a ti a nih chuan, ani chu kohhran chhûnga a awm zawm theih dâwn leh dâwn loh chungchânga a chungthu rêl tûrin anni chu a beisei a ni. Anni chuan thil dangte bâkah, thil sual titu chuan a thiltihah inchhîrna dik tak a neih leh neih loh an hriat a ngai a. Ani chuan a inchhîr thu a sawi pawh a ni thei; mahse, a thiltih chu a haw tak tak em? A thil sual tih chu tihnawn tawh loh a tum tak tak em? A thil sual tih chhan chu a ṭhian kawmte vâng a nih chuan, anni chu kawm tawh loh a inhuam em? Kohhran upate chuan thil sual tituin a thiltihte a thlîr dân hre chiang tûrin Bible chângte râwnin, ṭawngṭaina nên ngun takin an ngaihtuah a. Chumi hnuah, thil sual titu chu kohhrana a awm zawm theih dâwn leh dâwn loh chungchângah thu tlûkna an siam a ni. Dinhmun ṭhenkhatah chuan, ani chu hnawhchhuah a ngai ang.—1 Kor. 5:11-13.

13. Hnawhchhuah tâwktu chu kan ṭhian emaw, chhûngkhat laina emaw a nih chuan, eng thilte nge kan ngaihtuah mai theih?

¹³ Engtin nge kohhran upate kan rinna chu fiah a nih theih? Hnawhchhuah tâwktu chu kan ṭhian hnai emaw, chhûngkhat laina emaw a nih loh chuan, upate thu tlûkna siam chu pawm a awlsam thei a. Mahse, ani chu kan ṭhian hnai tak ni ta se, engtin nge ni ang? Upate chuan kimchang taka thil nih dânte an ngaihtuah loh kan hlauthâwng thei a, a nih loh leh Jehova duh zâwng mila thu tlûkna an siam leh siam loh pawh kan ngaihtuah mai thei bawk. Upate thu tlûkna siam chunga rilru put hmang dik nei reng tûrin engin nge min ṭanpui thei?

14. Thil sual titu chunga upate thu tlûkna siamin mi mal taka min nghawng a nih chuan engin nge min ṭanpui thei?

 ¹⁴ Hnawhchhuahna hi Jehova ruahmanna a ni tih leh chu chu kohhranin a hlâwkpui bâkah, thil sual titu pawhin a hlâwkpui thei tih kan hre ṭheuh tûr a ni. Inchhîrna nei lo thil sual titu chu kohhran chhûnga a awm zawm zêl phalsak a nih chuan, ani chuan unau dangte chungah nghawng ṭha lo tak a nei thei a. (Gal. 5:9) Chu bâkah, a thil sual tih pawizia hre lo leh Jehova duhsakna a dawn leh theih nâna a ngaihtuahnate thlâk danglam tum lovin a awm thei bawk. (Thur. 8:11) Upate chuan mi chu hnawhchhuah a nih dâwn leh dâwn loh chungchânga thu tlûkna an siam hunah an mawhphurhna chu an ngai pawimawh hle tih kan ring tlat thei a. Anni chuan hmân lai Israel rama rorêltute angin, ‘mihring tâna rorêl ni lovin, LALPA tân a ni zâwk,’ tih an hria a ni.—2 Chro. 19:6, 7.

15. Engvângin nge tûna Jehova kaihhruaina kan dawnte chu tûn hma zawng aia kan rin lehzual a ngaih?

¹⁵ He khawvêl tâwpna kan hnaih telh telh rual hian, Jehova chuan thil dik a ti reng ṭhîn tih tûn hma zawng aia kan rin lehzual a ngai a. Engvângin nge? Hrehawm nasa tak chhûnga kaihhruaina kan dawnte chu danglam tak, ṭangkai lo tak, leh inâwm lo tak angin a lang thei a. Ni e, Jehova chuan mi mal takin min be lo vang. Chu aiin, ani chuan a mi ruatte hmangin kaihhruainate min pêk a rinawm a ni. Chu hun chu, ‘Hei hi Jehova hnên aṭanga lo kal a ni tak tak em? A nih loh leh, mawhphurhna nei unaupate hian an ngaih dânin thil an ti em?’ tia rinhlelhna neih hun a ni lo. Chu hun pawimawh tak chhûng chuan, engtin nge Jehova leh a inawpna pâwl chunga rinna i neih tlat theih ang? A chhânna chu tûna theocratic kaihhruaina i thlîr dânah a innghat thei a ni. Tûn laia kaihhruaina kan dawnte ring a, inhuam taka i zâwm ṭhîn a nih chuan, hrehawm nasa tak chhûngah pawh chutianga i tih ngei chu a rinawm a ni.—Lk. 16:10.

16. Engtin nge nakin lawkah Jehova rorêlna chunga kan rinna chu fiaha a awm theih?

¹⁶ Kan zaa kan ngaihtuah ngai thil dang pakhat leh chu he khawvêl suaksual tak tâwp lama Jehova rorêlna kan chhân lêt dân tûr hi a ni. Ring lotu kan chhûngte pawh tiamin, tûna Jehova rawng la bâwl lotu mi tam takte chu tâwpna a thlen hmain a rawngbâwltute an rawn nih kan beisei tlat a. Mahse, Armageddon-ah chuan, Jehova’n Isua hmangin an nakin hun chungchângah thu tlûkna hnuhnûng ber a siam ang. (Mt. 25:31-33; 2 Thes. 1:6-10) Jehova zahngaihna  dawngtu tûr leh dawng lotu tûrte chu keini lo rêl tûr a ni lo. (Mt. 25:34, 41, 46) Jehova thu tlûkna siamte chu kan ring tlat ang em? Nge ni a, anni chu kan tâna tlûkna tûr an ni zâwk dâwn? Nakin hunah Jehova chunga rinna pumhlûm kan neih theih nân, tûn aṭanga amah kan rinna kan tihngheh a ngai tih a chiang a ni.

17. Engtin nge he khawvêl suaksual tak chunga Jehova rorêlna chu kan hlâwkpui ang?

¹⁷ Khawvêl thara Jehova rorêlnain a rah chhuahte kan hmuh huna kan awm dân tûr chu han mitthla teh. Sakhaw dik lote chu a awm tawh lo vang a, duhâmnaa khat sumdâwnna bâkah, mite hnehchhiaha an chunga harsatna thlen ṭhîntu mihring sawrkârte pawh a awm tawh hek lo vang. Hrisêl lohna te, tarna te, leh thihnaa hmangaih tak chânnate chu kan tawng leh tawh ngai lo vang. Setana leh a ramhuaite chu kum sâng khat chhûng phuar an ni ang a. An helna sawhkhâwkte chu a awm tawh lo vang. (Thup. 20:2, 3) Chutih hunah chuan, Jehova’n thil dik a ti reng ṭhîn tih kan rin tlat avângin kan va lâwm dâwn tak êm!

18. Numbers 11:4-6-na leh 21:5-naa chhinchhiah Israelte entîrna aṭangin eng zir tûrte nge kan neih?

¹⁸ Khawvêl thara nun chuan Jehova’n thil dik a ti reng ṭhîn tih kan rinna fiahtu harsatna ṭhenkhat a thlen thei ang em? Entîr nân, Israel mite Aigupta bâwih aṭanga an zalên hnu lawka thilthleng kha han ngaihtuah teh. An zînga ṭhenkhat chuan chuta an thil ei tharlâm tak takte chu an ngai a, Jehova pêk mannaah chuan an lungawi tâwk lo a ni. (Numbers 11:4-6; 21:5 chhiar rawh.) Hrehawm nasa tak zawhah chutiang rilru put hmang chu kan la nei ang em? Tihchhiatnain a nghawngte thenfainaah leh zawi zawia lei paradis chantîrnaah engtiang khawpin nge hna kan thawh dâwn tih kan hre lo. Thawh tûr a tam hlein, a tîr lamah phei chuan nun chu a awlsam lo pawh a ni thei. Chutih huna Jehova thil min pêkte chungah kan phunnawi ang em? Thil pakhat chiang tak mai chu: Tûna Jehova thil min pêkte kan ngaihhlut poh leh nakina min pêk tûrte chungah ngaihhlutna kan neih lehzual ngei a rinawm tih hi a ni.

19. Engtin nge he thuziakin a sawi tum ber chu i khaikhâwm ang?

¹⁹ Jehova chuan thil dik a ti reng ṭhîn a. Chu chu kan rin tlat a ngai a ni. A kaihhruainate kengkawh tûra a mi ruatte pawh kan rin tlat a ngai bawk. Zâwlnei Isaia hnêna: ‘Muang taka awm leh Pathian rinchhana awm chu in chakna a ni ang,’ tia a sawi hi i hre reng ang u.—Is. 30:15.