1-2. a) Bõe yĩng tɩ yaa toog ne neb wʋsg rũndã-rũndã tɩ b kɩs ned sẽn tar zu-sobend sɩda? b) Bõe yell la d na n gom sõs-kãngã pʋgẽ?

 RŨNDÃ-RŨNDÃ, yaa toog ne neb wʋsg tɩ b kɩs ned sẽn tar zu-sobend sɩda. B gũus n gesame tɩ goosneema-rãmbã la bʋʋdã zĩisẽ dãmb wae n bakda rakã-rãmbã la sẽn tar-b naamã n sõngdẽ, la b mongd naong rãmbã bʋʋm. Sɩd me, Biiblã yeelame tɩ “ninsaal tõee a to n maand-a wẽnga.” (Koɛ. 8:9) Sẽn paase, tũudmã taoor dãmb kẽer manesem pa lebd be ye. Woto kɩtame tɩ neb kẽer pa le kɩs Wẽnnaam sɩd ye. Woto yĩnga, ned sã n wa sak n na n zãms Biiblã, d segd n sõng-a lame t’a kɩs a Zeova sɩda, la a kɩs neb nins a sẽn yãk tɩ b lʋɩt d taoorã me sɩdã.

² Pa sẽn nan zãmsd-b Biiblã bal n segd n kɩs a Zeova la a siglgã sɩd ye. Baa sẽn tũud-b a Zeova na maan yʋʋm wʋsgã segd n kell n ninga b yamẽ t’a sẽn maand fãa yaa tɩrg wakat fãa. Wakat ninga, yɛl kẽer tõe n kɩtame tɩ yaa toog tɩ d kell n kɩs a Zeova sɩd zãng-zãnga. Sõs-kãngã pʋgẽ, d na n yãa bũmb a tãab sẽn tõe n kɩt tɩ yɩ toog tɩ d kɩs a Zeova sɩda: 1) D sã n wa karemd kibar Biiblã pʋgẽ, 2) a Zeova siglgã sã n wa kõ-d noor bũmb wɛɛngẽ, la 3) d sã n wa be yɛl nins sẽn wat ka la bilfã taoore.

3. Wãn to la Biiblã kibay kẽer tõe n kɩt tɩ yɩ toog tɩ y kɩs a Zeova sɩda?

 ³ D sã n wa karemd Biiblã, d tõe n sokda d meng a Zeova manesem sẽn yɩ to-to ne neb kẽerã võore, la a sẽn yãk yam  n maan bũmb kẽer me võore. Wala makre, Sõdb sebrã pʋgẽ, a Zeova ninga rao a ye taal n yeel tɩ b kʋ-a, a sẽn kẽng n tɩ wɩɩs raad vʋʋsg daarã yĩnga. Yʋʋm wʋsg rẽ poore, yiib Sãmwɛll sebrã pʋgẽ, a Zeova kõo rĩm a Davɩɩd sugri, baa ne a sẽn yo la a kʋ nedã. (Sõd. 15:32, 35; 2 Sãm. 12:9, 13) Woto tõe n kɩtame tɩ d sok d meng yaa: ‘Bõe yĩng t’a Zeova kõ a Davɩɩd sẽn kʋ ned la a yo wã sugri, n yaool n yeel tɩ b kʋ rao a ye wã, baa sẽn wõnd a sẽn maanã wẽnem pa ta a Davɩɩd sẽn maanã?’ Sẽn na yɩl n paam sok-kãngã leoore, bɩ d ges bũmb a tãab d sẽn segd n tẽege, d sã n wa karemd Biiblã.

4. Wãn to la Sɩngr 18:20, 21 la Tõod 10:17 wã sõngd tõnd tɩ d maneg n kɩs sɩd t’a Zeova sẽn maand fãa yaa tɩrga?

⁴ Pa wakat fãa la Biiblã togsd yɛlã sẽn yɩ to-to wã zãng ye. D miime t’a Davɩɩd sɩd teka yam n kos sugri, a sẽn maan bũmb ningã yĩnga. (Yɩɩn. 51:4-6) La rao ning sẽn kɩɩs vʋʋsg daarã noorã yẽ? A sũur sãama ne a sẽn maan bũmb ningã bɩ? Sẽn deng rẽ, a ra zoe n kɩɩsa a Zeova noy bɩ? Rẽ yĩnga, b zoe n keoog-a lame t’a pa sak n deeg bɩ? Biiblã pa togs rẽ ye. La d sẽn mi bala, yaa tɩ ‘zãmb ka be a Zeova pʋgẽ ye.’ (Tõo. 32:4) A sã n na n kao bʋʋdo, a geta yɛlã sẽn yɩ to-to wã fãa. A pa tikd nebã sẽn yete, wall bũmb ning fãa sẽn kɩtd tɩ nebã kaood b taabã bʋʋd kɛgrã ye. (Karm-y Sɩngr 18:20, 21; Tõod 10:17.) D sã n bãngd a Zeova la a noyã sõma n paasdẽ, d na n maneg n kɩsa sɩd t’a kaooda bʋʋd tɩrga. Baa d sã n karem Biiblã kibar n pa wʋm bũmb a Zeova sẽn maan võore, d sẽn zoe n mi bũmb ning a Zeova zugã seka d na kɩs sɩd t’a yaa ‘tɩrlem soab a sẽn maandã fãa pʋga.’—Yɩɩn. 145:17.

5. D sẽn pa zems zãngã kɩtame tɩ d kaood bʋʋd wãn to? (Ges-y zĩ-gũbrã: “ D sẽn pa zems zãngã mi n kɩtdame tɩ d kaood bʋʋd kɛgre.”)

⁵ D sẽn pa zems zãngã yĩnga, pa wakat fãa la d tõe n kao bʋʋd tɩrg ye. Wẽnnaam sẽn naan tõnd n wõneg a mengã yĩnga, d raabã yaa nebã kaood bʋʋd tɩrga. (Sɩng. 1:26) La d sẽn pa zems zãngã yĩnga, d mi n tudgdame, baa d sã n tagsdẽ tɩ d mii yɛlã fãa vɩʋʋgo. Wala makre, tẽeg-y a Zonaas sũur sẽn pa yɩ noogo,  a Zeova sẽn yãk yam n kõ Niniiv nebã sugrã yelle. (Zon. 3:10–4:1) La a Zeova sẽn kõ-b sugrã baasa wãna? Niniiv neb sõor sẽn yɩɩd tus koabg la pisi teka yam n kos sugri, n põs sãoongã. Dẽnd yaa a Zonaas tagsgã n da pa zemse, la pa a Zeova ye.

6. Bõe yĩng tɩ pa tɩlɛ t’a Zeova togs tõnd a sẽn maand fãa võore?

⁶ Pa tɩlɛ t’a Zeova togs tõnd a sẽn maand fãa võor ye. Yaa sɩd tɩ pĩndã a Zeova basame tɩ neb sẽn da tũud-a wilg b tagsgo, bũmb a sẽn yãk yam n maane, wall a sẽn da rat n maan wɛɛngẽ. (Sɩng. 18:25; Zon. 4:2, 3) La wakat ning me, a togsa a sẽn yãk yam n maan bũmb kẽerã võore. (Zon. 4:10, 11) La pa tɩlɛ t’a Zeova togs tõnd a sẽn maand fãa võor ye. A sẽn yaa d Naandã yĩnga, nand t’a maan bũmbu, a pa baood tɩ d kõ-a sor ye. A sã n wa maan bũmb n sa me, a pa baood tɩ ta d raab ye.—Eza. 40:13, 14; 55:9.

7. Bõe n tõe n yɩ toog ne-do, la bõe yĩnga?

⁷ Yaa vẽeneg tɩ d sak n deega ne d sũur fãa t’a Zeova maanda sẽn yaa tɩrg wakat fãa. La wakat ninga, tõe n yɩɩ toog tɩ d kɩs neb nins a sẽn yãk tɩ b lʋɩt tõnd taoorã sɩda. D tõe n sokda d mens sẽn lʋɩt-b tõnd taoorã sã n sɩd tũuda a Zeova sẽn datã, bɩ yaa bãmb mensã tagsgo. Neb kẽer tog n da tagsda woto pĩnd wẽndẽ wã. Tẽeg-y kibay nins d sẽn gom  sull a 3 pʋgẽ wã yelle. Rao ning sẽn kɩɩs vʋʋsg daarã noorã roagd tõe n da sokda a meng a Moyiiz sã n sɩd bao n bãnga a Zeova tagsg nand tɩ b kʋ raoã. Tags-y Hɛt rao a Uuri a Davɩɩd sẽn yo ne a pagã yelle. A Uuri zoa tõe n tagsame t’a Davɩɩd tũnuga ne a naamã n põs sɩbgr ning a sẽn da segd ne wã. Togs sɩdã, d pa tõe n yeel tɩ d kɩsa a Zeova sɩda, d sã n pa kɩs neb nins a sẽn yãk tɩ b lʋɩt tõnd taoorã sɩd ye. Bala a Zeova kɩs-b-la sɩda.

8. Sẽn zems ne Tʋʋm 16:4, 5 wã, bõe n wilgd tɩ kiris-neb tigingã sẽn sigl to-to wã yaa wa pipi kiris-nebã wakatẽ wã?

⁸ Rũndã-rũndã, a Zeova tũnugda ne “tʋm-tʋmd sẽn tũud sɩd la sẽn tar yamã” n get a nin-buiidã yelle. (Mat. 24:45) Wa sẽn da yaa to-to pipi kiris-nebã wakatẽ wã, rũndã-rũndã me, tʋm-tʋmdã geta Wẽnnaam nin-buiidã yell dũniyã gill zugu, la a wilgd tigimsã kãsem-dãmb b sẽn segd n maane. Kãsem-dãmbã me modgdame n sõngd tigimsã neb tɩ b bãngd b sẽn segd n maane. (Karm-y Tʋʋm 16:4, 5.) D wilgdame tɩ d kɩsa sɩd t’a Zeova sẽn maand fãa yaa tɩrga, d sã n sakd n tũud siglgã la kãsem-dãmbã sẽn yet tõnd tɩ d maanã.

9. Wakat-bʋg la tõe n yɩ toog ne-d tɩ d tũ kãsem-dãmbã yam-yãkre, la bõe yĩnga?

⁹ Wakat ninga, tõe n yɩɩ toog ne-d tɩ d teel kãsem-dãmbã yam-yãkre. Wala makre, yʋʋma noorã, tigims la tigims sula wʋsg la b maneg n sigli. Zĩis kẽere, kãsem-dãmbã kosa koe-moondb tɩ b tɩ teel tiging a to, tigin-kãng nebã sõor sẽn yaa kar-kar yĩnga. B sã n wa kos-d tɩ d tɩ naag tiging a to, tõe n yɩɩ toog tɩ d sak n loog n bas d zo-rãmb la d zakã rãmba. La rẽ yĩnga, a Zeova vẽnegda kãsem-dãmbã tɩ b bãng b sẽn na n kɩt tɩ koe-moond fãa kẽng tiging ning bɩ? Ayo. Woto tõe n kɩtame tɩ yɩ toog tɩ d sak n tũ b sẽn yeel tɩ d maan bũmb ningã. La a Zeova kɩsa sɩd tɩ kãsem- dãmbã na n bãng n yãka yam. Dẽnd tõnd me segd n kɩs-b-la sɩda. *

10. Wa Ebre-rãmb 13:17 sẽn yetã, bõe yĩng tɩ d segd n sakd n tũud kãsem-dãmbã sẽn yetã?

¹⁰ Kãsem-dãmbã sã n wa yãk yam n na n maan bũmbu, bõe yĩng tɩ d segd n teel b yam-yãkrã, baa pa noom-do? Bala d sã n maan woto, sõngdame tɩ zems-n-taar kell n zĩnd Wẽnnaam nin-buiidã sʋka. (Efɛ. 4:2, 3) D fãa sã n sik d meng n tũ kãsem-dãmbã sẽn yãk yam ningã, nafda tigingã. (Karm-y Ebre-rãmb 13:17.) Sẽn yɩɩd fãa, d sã n sakd n tũud neb nins a Zeova sẽn yãk tɩ b get tõnd yellã sẽn yet tɩ d maan bũmb ninsã, d wilgda a Zeova tɩ d kɩs-a-la sɩda.—Tʋʋ. 20:28.

11. Bõe n tõe n sõng tõnd tɩ d maneg n kɩs kãsem-dãmbã sɩda, b sã n wa yeel tɩ d maan bũmbu?

¹¹ D sã n tẽeg tɩ kãsem-dãmbã sã n wa na n yãk yam n maan bũmb tigingã yĩnga, b rengd n pʋʋsame n kos vʋʋsem sõngã sõngre, na n sõng-d lame tɩ d kɩs sɩd tɩ b sẽn yãk yam ningã yaa sõma. B maagda b yĩng me n ges Biiblã noy la a saglse, la b karem sagls a Zeova siglgã sẽn kõ rẽ wɛɛngẽ. B raabã yaa b noog a Zeova sũuri, la b maan b sẽn tõe fãa n ges a nin-buiidã yell neere. Nin-kãensã sẽn yaa wẽn-sakdbã miime tɩ Wẽnnaam ratame tɩ b ges a nin-buiidã yell neere. (1 Pɩy. 5:2, 3) Tags-y n ges-y-yã: Dũni-kãngã pʋgẽ, nebã welga taab buudã wɛɛngẽ, tũudmã la politikã wɛɛngẽ. La a Zeova nin-buiidã yẽ naaga taab n tũud-a ne yam a yembre. Sã n pa a Zeova sẽn ningd a siglgã barkã, woto yaa bũmb sẽn da pa tol n tõe ye.

12. Bõe zug la kãsem-dãmbã segd n tagse, b sã n wa baood n na n bãng ned sã n sɩd teka yam n kot sugri?

¹² A Zeova kõo kãsem-dãmbã tʋʋm-kãsenga. Yaa tɩ b ges tɩ tigingã kell n yɩ yɩlemde. Kiris-ned sã n wa maan yel-wẽn-kãsenga, a Zeova raab yaa kãsem-dãmbã ges nin-kãng sã n tõe n kell n paa tigingã pʋga. Rẽ wɛɛngẽ, bũmb wʋsg la b segd n maane. Wala makre, b segd n bao n bãnga a soabã sã n sɩd teka yam n kot sugri. A tõe n yeelame t’a sɩd teka yam. La rẽ yĩnga, a sɩd maanda a bãngẽ ne a sẽn maan bũmb ningã bɩ? A yãka yam n na n maan a sẽn tõe fãa n da le lʋɩ a yel-wẽndã pʋgẽ bɩ? Sã n mikame tɩ yaa tũud-n-ta-wẽns n kɩt t’a maan sẽn yaa wẽngã, rẽ yĩnga a sakame n na n lak a meng ne tũud-n-ta-kãens bɩ? Kãsem-dãmbã pʋʋsda a Zeova, n bao n bãng yellã vɩʋʋgo, n ges Biiblã sẽn yet rẽ wɛɛngẽ, la b ges a soabã tagsg sẽn yaa to-to ne a sẽn maan bũmb ningã. Rẽ poore, b na n bao n bãnga a sã n tõe n kell n paa tigingã pʋgẽ. La wakat ninga, b segd n yiis-a-la tigingã pʋgẽ.—1 Kor. 5:11-13.

13. B sã n wa yiis d zoa wall d zakã ned tigingã pʋgẽ, d manesem tõe n yɩɩ wãna?

¹³ Wakat-bʋg la tõe n yɩ toog tɩ d kɩs kãsem-dãmbã sɩda? B sã n wa yiis ned tigingã pʋgẽ tɩ pa d zakã ned wall d zoa, tõe n yɩɩ nana ne-d tɩ d sak kãsem-dãmbã yam-yãkrã. La sã n mik tɩ yaa d zoa meng-menga, d tõe n tagsame tɩ kãsem-dãmbã pa bao n bãng yɛlã fãa vɩʋʋgo, bɩ n sokd d meng b sẽn kao bʋʋdã to-to wã sã n sɩd yɩɩ wa a Zeova sẽn datã. La bõe n tõe n sõng tõnd tɩ d kell n tall tagsg sẽn zemse, kãsem-dãmbã yam-yãkrã wɛɛngẽ?

14. Kãsem-dãmbã sã n wa yiis ned tigingã pʋgẽ tɩ pa noom-do, bõe n tõe n sõng-d tɩ d sake?

 ¹⁴ D segd n tẽegame tɩ b sẽn yiisd yel-wẽn-maandbã tigingã pʋgẽ wã yaa a Zeova n kõ noore, la tɩ nafda tigingã tõre, la tõe n sõng ned ning b sẽn yiisã me. B sã n bas ned sẽn maan yel-wẽnd n pa tek yam tigingã pʋgẽ, tõe n yɩɩ sabab tɩ neb a taab me rɩk a naoore. (Gal. 5:9) Sẽn paase, tõe n kɩtame t’a pa bãng t’a sẽn maanã yaa wẽng wʋsg ye. A tõeeme me n pa ges tɩ yaa tɩlɛ t’a toeem a yel-manesmã la a tagsa wã, n le paam n ta a Zeova yam ye. (Koɛ. 8:11) D tõe n kɩsa sɩd tɩ kãsem-dãmbã sã n wa na n ges b sã n segd n yiisa ned tigingã pʋgẽ, b maanda rẽ ne b sũur fãa. Wa pĩnd wẽndẽ Israyɛll bʋ-kaoodbã, b miime tɩ ‘ka ninsaal yĩng la b sẽn kaood bʋʋdã ye. La yaa a Zeova yĩnga.’—2 Kib. 19:6, 7.

15. Bõe yĩng tɩ d segd n kɩs a Zeova sɩd masã meng n yɩɩd pĩndã?

¹⁵ Dũni-kãngã saab sẽn ta n sa wã, d segd n maneg n kɩsa sɩd n yɩɩd pĩndã t’a Zeova sẽn maand fãa yaa tɩrga.. Bala to-kãsengã sasa, b tõe n kõ-d-la noy sẽn wõnd ka nenga, wall b tũub yaa toogo. Yaa vẽeneg t’a Zeova mengã pa na n sig n gom ne tõnd ye. A na n tũnuga ne neb nins a sẽn yãk tɩ b lʋɩt tõnd taoorã n wilg tõnd d sẽn segd n maane. D pa segd n maand sãmb-sãmb ne b sẽn na n yeel tɩ d maan bũmb ningã, wall n sokd d mens noyã sã n sɩd yita a Zeova nengẽ, bɩ yaa bãmb mensã tagsgo. Wakat-kãng sẽn na n yɩ toog sasa wã, y na n kɩsa a Zeova la a siglgã sɩd bɩ? Y sẽn na n leok to-to wã wilgda y manesem sẽn yaa to-to ne noy nins b sẽn kõt tõnd masã mengã. Y sã n kɩs sɩd ne noy nins b sẽn kõt tõnd rũndã-rũndã wã, la y yɩt tao-tao n sakdẽ, y na n tõog n maana woto ne noy nins b sẽn na n kõ-d to-kãsengã sasa wã.—Luk 16:10.

16. Ka la bilfu, a Zeova sã n wa na n kao nebã bʋʋdo, bõe n tõe n kɩt tɩ yɩ toog tɩ d kell n kɩs-a sɩda?

¹⁶ D segdame me n tags n ges d manesem sẽn na n yɩ to-to, a Zeova sã n wa na n kao nebã bʋʋd dũni-wẽn-kãngã saab sasa. D saagdame tɩ neb wʋsg sẽn pa tũud a Zeova, d roagdb sẽn naage, na n yãka yam n sɩng a tũub nand tɩ dũni-kãngã sãoong ta. La Armagedõ sasa, ne a Zeezi maasem, a Zeova na n kaoo b ned kam fãa bʋʋdo. (Mat. 25:31-33; 2 Tes. 1:7-9) Pa tõnd n yãkd a Zeova sẽn na n zoe a soab nimbãanega, la a sẽn pa na n zoe  a soab nimbãaneg ye. (Mat. 25:34, 41, 46) D na n kɩsa sɩd t’a Zeova bʋ-kaoorã zemsame bɩ, bɩ d na n basa a tũub tɩ bala a sẽn yãk yam ningã pa noom-do? Vẽenega, d segd n maneg n kɩsa a Zeova sɩd masã menga, tɩ sõng-d tɩ d wa tõog n kɩs-a sɩd zãng-zãng beoog sẽn wate.

17. Dũni-kãngã saab sasa, wãn to la a Zeova bʋ-kaoorã na n naf tõndo?

¹⁷ Mams-y n ges-y d manesem sẽn na n yɩ to-to dũni-paalgã pʋgẽ, d sã n wa ne a Zeova bʋ-kaoorã sẽn wa ne nafa ninsã. Ziri tũudmã ne leebgã siglsã sẽn naag ne yão-beedã, n paas goosneema-rãmb sẽn weoog nin-buiidã la b nams-b na maan yʋʋm wʋsgã fãa pa na n le beẽ ye. Bãasã la kʋʋlmã pa na n le beẽ, d ned kõn le maan kaalem me ye. B na n paga a Sʋɩtãan ne a zĩn-dãmbã bog-zulung pʋgẽ yʋʋm tusri, tɩ b pa le tõe n nams ninsaalbã ye. Wakat-kãng tɩ b kɩɩsgã sẽn wa ne zu-loees ninsã fãa saame. (Vẽn. 20:2, 3) D sũur na n yɩɩ noog wʋsgo, d sẽn kell n kɩs sɩd t’a Zeova sẽn maand fãa yaa tɩrgã yĩnga.

18. Wa Sõdb 11:4-6 la 21:5 wã sẽn wilgdã, yam-bʋg la d tõe n dɩk Israyɛll nebã kibarã pʋgẽ?

¹⁸ Vɩɩmã sẽn na n yɩ to-to dũni-paalgã pʋgẽ wã tõe n wa kɩtame tɩ yɩ toog tɩ d kell n kɩs sɩd t’a Zeova sẽn maand fãa yaa tɩrg bɩ? Wala makre, tẽeg-y bũmb ning sẽn maane, Israyɛll nebã sẽn wa n yi yembd Ezɩptã poor bilfã. B neb kẽer sɩnga yẽgengo, n le rat rɩɩb ning b sẽn da paamd Ezɩptã. B pʋd n sãbsa mannã a Zeova sẽn da kõt-bã. To-kãsengã saab poore, tõnd me tõe n wa tara manesem a woto bɩ? D pa mi tʋʋm nins fãa d sẽn na n tʋm n yɩlg tẽngã, la d maneg-a bilf-bilf t’a wa lebg arzãnã ye. Wõnda d na n tʋma tʋʋm wʋsgo. Tõe meng tɩ sɩngrẽ wã, vɩɩmã pa na n yɩ nana ne-d ye. La rẽ yĩnga, d na n saag n yẽgma bũmb nins a Zeova sẽn na n kõ-d wakat-kãnga yĩng bɩ? D sũur sã n zoe n noom ne bũmb nins a Zeova sẽn maand n kõt-d masã wã, d sũur na n maneg n yɩɩ noog ne bũmb nins a sẽn na n wa maan n kõ-dã.

19. Bõe la d bãng sõs-kãngã pʋgẽ?

¹⁹ D segd n kɩsa sɩd t’a Zeova sẽn maand fãa yaa tɩrg wakat fãa. Sẽn paase, d segd n kɩsa sɩd ne neb nins a sẽn yãk tɩ b taasd tõnd a noyã la a saglsã. D ra tol n yĩm a Zeova sẽn tũnug ne no-rɛɛs a Ezayi n yeel bũmb ningã ye. A yeelame: “Yaa y sã n kell n pa sɩɩ la y teeg maam, la y na n paam pãnga.”—Eza. 30:15, MN.