ARTÍCULO ÑA̱ KAʼVIYÓ 6
¿Á kándíxayó ña̱ viíní kéʼé Jehová ndiʼi ña̱ʼa?
“Ta̱yóʼo nda̱a̱ táki̱ʼva íyo iin yu̱u̱ saá íyora, ndiʼi ña̱ kéʼéra va̱ʼaní kánaña, saáchi ndiʼi yichi̱ra ña̱ nda̱kú kúúña. Iin Ndióxi̱ ta̱ nda̱kúní-ini kúúra ta nda̱a̱ ni iin yichi̱ va̱ása sándaʼvira” (DEUT. 32:4).
YAA 3 Jehová kúú ta̱ chíndeé táʼan xíʼinyó
ÑA̱ KA̱ʼA̱NYÓ XA̱ʼA̱ *
1, 2. a) ¿Nda̱chun íxayo̱ʼvi̱ña xíʼin ku̱a̱ʼánína kandíxana na̱ chíñu? b) ¿Ndáaña ka̱ʼa̱nyó xa̱ʼa̱ nu̱ú artículo yóʼo?
KU̱A̱ʼÁNÍ na̱ yiví íxayo̱ʼvi̱ña xíʼinna kandíxana na̱ chíñu tiempo vitin. ¿Nda̱chun? Saáchi xítona ña̱ va̱ʼaníka chíndeétáʼanna xíʼin na̱ kúiká ta saátu xíʼin na̱ yiví na̱ ndáyáʼvi, ta va̱ása chíndeétáʼanna xíʼin na̱ nda̱ʼví. Ña̱kán ndixaní kúú ña̱ káʼa̱n tu̱ʼun Ndióxi̱ ña̱ ndiʼi tiempo ña̱ xa̱a̱ xáʼndachíñu na̱ yiví nu̱ú táʼan miína nina tu̱ndóʼova íyo (Ecl. 8:9). Ta saátu na̱ níʼi yichi̱ ti̱xin veʼe ñu̱ʼu ku̱a̱ʼání ña̱ va̱ása va̱ʼa kéʼéna. Xa̱ʼa̱ ña̱yóʼo, ku̱a̱ʼánína va̱ása kándíxakana Ndióxi̱. Ña̱kán xíniñúʼu chindeétáʼanyó xíʼin na̱ káʼviyó xíʼin ña̱ kandíxakana Ndióxi̱, ta saátu kandíxakana na̱ níʼi yichi̱ nu̱úyó.
2 Su̱ví nda̱saa na̱ káʼviyó xíʼin kúú na̱ xíniñúʼu sakúaʼa ña̱ kandíxakana Jehová xíʼin na̱ ñuura. Chi saátu miíyó na̱ xa̱a̱ ku̱a̱ʼání ku̱i̱ya̱ ndásakáʼnu Jehová, xíniñúʼu ndakundeéyó kandíxayó ña̱ viíní kéʼéra ndiʼi ña̱ʼa, saáchi kivi koo sava ña̱ʼa ña̱ kasi nu̱úyó ña̱ kandíxakayóra. Ta nu̱ú artículo yóʼo ka̱ʼa̱nyó xa̱ʼa̱ u̱ni̱ña. Ña̱ nu̱ú, tá káʼviyó tu̱ʼunra. Ña̱ u̱vi̱, tá káʼa̱n na̱ ñuura xíʼinyó keʼéyó sava ña̱ʼa. Ta ña̱ u̱ni̱, tá ná kixi tu̱ndóʼo nu̱úyó chí nu̱únínu.
NÁ KANDÍXAYÓ JEHOVÁ TÁ KÁʼVIYÓ TU̱ʼUNRA
3. ¿Nda̱chun kivi ixayo̱ʼvi̱ña xíʼinyó kandíxayó Jehová tá káʼviyó sava ña̱ va̱xi nu̱ú tu̱ʼunra?
3 Tá káʼviyó tu̱ʼun Ndióxi̱, sana ndákanixi̱níyó nda̱chun va̱ása inkáchi níkeʼéra xíʼin ndiʼi na̱ yiví, á nda̱chun nda̱kaxinra keʼéra sava ña̱ʼa. Tá kúú nu̱ú libro ña̱ Números, Jehová ni̱ka̱ʼa̱nra ña̱ ná kaʼnína iin ta̱ ñuu Israel xa̱ʼa̱ ña̱ ni̱xa̱ʼa̱nra nda̱kayara titu̱n ki̱vi̱ sábado. Soo nu̱ú Segundo libro ña̱ Samuel káʼa̱nña ña̱ i̱xakáʼnuva-ini Jehová xa̱ʼa̱ ta̱ rey David ni ni̱ki̱si̱ra xíʼin ñá síʼi inka ta̱a ta xa̱ʼníra ta̱ ta̱a kán (Núm. 15:32, 35; 2 Sam. 12:9, 13). Sana kivi ndakanixi̱níyó xa̱ʼa̱ ña̱yóʼo: “¿Nda̱chun i̱xakáʼnu-ini Jehová xa̱ʼa̱ ta̱ David tá ndeéní ku̱a̱chi ni̱ki̱ʼvira? Ta, ¿nda̱chun va̱ása ní ixakáʼnu-inira xa̱ʼa̱ ta̱ ta̱a ta̱ ni̱xa̱ʼa̱n nda̱kaya kuití titu̱n?”. Ná kotoyó u̱ni̱ ña̱ xíniñúʼu kiʼinyó kuenta xíʼin tá káʼviyó tu̱ʼun Ndióxi̱.
4. Ña̱ káʼa̱n Génesis 18:20, 21 xíʼin Deuteronomio 10:17, ¿ndáa ki̱ʼva chíndeétáʼanña xíʼinyó kandíxayó ña̱ viíní íyo ña̱ ndáka̱xin Jehová keʼéra?
4Tu̱ʼun Ndióxi̱ va̱ása káʼa̱nña xa̱ʼa̱ ndiʼi ña̱ ku̱u. Ta kúú, kúnda̱a̱-iniyó ña̱ nda̱ndikóníva-ini ta̱ David xa̱ʼa̱ ku̱a̱chi ña̱ ni̱ki̱ʼvira (Sal. 51:2-4). Soo va̱ása kúnda̱a̱ví-iniyó ndáaña xi̱keʼé ta̱ ta̱a ta̱ va̱ása ní ixato̱ʼó ki̱vi̱ sábado. ¿Á nda̱ndikó-inira xa̱ʼa̱ ña̱ ke̱ʼéra? ¿Á xa̱a̱ i̱xaso̱ʼora nu̱ú Jehová savaka yichi̱? ¿Á xa̱a̱ ya̱chi̱ka ni̱ka̱ʼa̱nna xíʼinra ña̱ va̱ása va̱ʼa íyo ña̱ kéʼéra soo va̱ása níxiniso̱ʼora? Tu̱ʼun Ndióxi̱ va̱ása káʼa̱nña xa̱ʼa̱ ña̱yóʼo. Soo kivi kandíxayó ña̱ nda̱kúníva ndátiinra ku̱a̱chi (Deut. 32:4). Miíyó na̱ yiví va̱ása vií ndátiinyó ku̱a̱chi xíʼin inkana, saáchi ña̱ kíʼinkayó kuenta xíʼin kúú ña̱ káʼa̱n inkana xa̱ʼa̱na á ña̱ ndákanixi̱níyó xa̱ʼa̱na. Soo su̱ví saá kéʼé Jehová chi ña̱ kíʼinra kuenta xíʼin kúú ndiʼika ña̱ kúu (kaʼvi Génesis 18:20, 21; * Deuteronomio 10:17). * Tá ná kuxini̱kayó Jehová ta saátu ley ña̱ táxira, saá kúú ña̱ kandíxakayó ña̱ viíní íyo ña̱ ndáka̱xinra keʼéra. Ña̱kán tá káʼviyó tu̱ʼun Ndióxi̱ ta va̱ása kúnda̱a̱ káxi iniyó nda̱chun kúú ña̱ ke̱ʼéra sava ña̱ʼa, ná va̱ása kaka-iniyó, saáchi ña̱ xa̱a̱ xíni̱yó xa̱ʼa̱ra kúú ña̱ chindeétáʼan xíʼinyó kandíxayó ña̱ nda̱kúní íyo ndiʼi ña̱ kéʼéra (Sal. 145:17).
5. ¿Ndáaña kéʼéyó xa̱ʼa̱ ña̱ kúúyó na̱ yiví ku̱a̱chi? (Koto recuadro ña̱ naní “ Sava yichi̱ túviyó ña̱ va̱ása vií ndátiin Jehová ku̱a̱chi”).
5Xa̱ʼa̱ ña̱ kúúyó na̱ yiví ku̱a̱chi sava yichi̱ túviyó ña̱ va̱ása vií ndátiin Jehová ku̱a̱chi. Xa̱ʼa̱ ña̱ i̱xava̱ʼara miíyó táki̱ʼva íyora, kútóoyó ña̱ nda̱kú ná ndatiinna ku̱a̱chi xíʼin inkana (Gén. 1:26). Soo xa̱ʼa̱ ña̱ kúúyó na̱ yiví ku̱a̱chi, sava yichi̱ ndákanixi̱níyó ña̱ va̱ása nda̱kú ndátiin Jehová ku̱a̱chi xíʼin iinna, saáchi túviyó ña̱ kúnda̱a̱-iniyó xa̱ʼa̱ ndiʼi ña̱ ku̱u. Ná ndakaʼányó xa̱ʼa̱ ña̱ ndo̱ʼo ta̱ Jonás. Ta̱yóʼo ni̱sa̱a̱níra tá i̱xakáʼnu-ini Jehová xa̱ʼa̱ na̱ ñuu Nínive (Jon. 3:10–4:1). Soo xa̱ʼa̱ ña̱ i̱xakáʼnu-ini Jehová xa̱ʼa̱ na̱ ñuu Nínive, yáʼaka 120,000 na̱ yiví ni̱ka̱ku. Ña̱kán viíva nda̱tiin Jehová ku̱a̱chi xíʼin na̱yóʼo, soo ta̱ Jonás va̱ása vií níndakanixi̱níra xa̱ʼa̱na.
6. ¿Nda̱chun va̱ása xíniñúʼu natúʼunví Jehová xíʼinyó nda̱chun kéʼéra iin ña̱ʼa?
6Va̱ása xíniñúʼu ka̱ʼa̱nví Jehová xíʼinyó nda̱chun kéʼéra sava ña̱ʼa. Ña̱ nda̱a̱ kúúña, tiempo xi̱naʼá Jehová xi̱taxira ña̱ ná ka̱ʼa̱n na̱ xi̱kachíñu nu̱úra ndáaña ndákanixi̱nína xa̱ʼa̱ ña̱ ke̱ʼéra á ña̱ sa̱kán keʼéra (Gén. 18:25; Jon. 4:2, 3). Ta sava yichi̱ ni̱ka̱ʼa̱nra xíʼinna nda̱chun kúú ña̱ nda̱kaxinra keʼéra sava ña̱ʼa (Jon. 4:10, 11). Soo va̱ása xíniñúʼu ka̱ʼa̱nví Jehová xíʼinyó xa̱ʼa̱ ña̱ ndáka̱xinra keʼéra. Saáchi xa̱ʼa̱ ña̱ kúúra ta̱ i̱xava̱ʼa miíyó, va̱ása xíniñúʼuví nda̱ka̱tu̱ʼunra miíyó tá kúma̱ní keʼéra iin ña̱ʼa á tá xa̱a̱ ke̱ʼéraña (Is. 40:13, 14; 55:9).
NÁ KANDÍXAYÓ ÑA̱ KÁʼA̱N NA̱ ÑUU JEHOVÁ XÍʼINYÓ
7. ¿Ndáaña kivi kundoʼoyó xíʼin na̱ nda̱kaxin Ndióxi̱ kuniʼi yichi̱ nu̱úyó, ta nda̱chun?
7 Kándíxavayó ña̱ viíní íyo ndiʼi ña̱ ndáka̱xin Jehová keʼéra. Soo sana íxayo̱ʼvi̱ña xíʼinyó kandíxayó na̱ nda̱kaxinra kuniʼi yichi̱ nu̱úyó. Ta sana nda̱a̱ kivi xa̱a̱yó ndakanixi̱níyó ña̱ va̱ása kéʼéna ña̱ kúni̱ Jehová chi kéʼéna ña̱ kúni̱ miívana. Ta sana ña̱yóʼo kúú ña̱ nda̱kanixi̱ní sava na̱ yiví na̱ xi̱ndoo xi̱naʼá. Ná ndakanixi̱níyó xa̱ʼa̱ na̱ ni̱ka̱ʼa̱nyó xa̱ʼa̱ nu̱ú párrafo u̱ni̱. Sana iin na̱ veʼe ta̱ ta̱a ta̱ va̱ása ní ixato̱ʼó ki̱vi̱ sábado, nda̱kanixi̱nína ña̱ sana va̱ása nínda̱ka̱tu̱ʼunví ta̱ Moisés Jehová tá kúma̱ní ndatiinra ku̱a̱chi xíʼin ta̱ ta̱a kán. Ta sana saátu nda̱kanixi̱ní iin ta̱ xi̱kuu migo ta̱ Urías, sana nda̱kanixi̱níra ña̱ xa̱ʼa̱ ña̱ xi̱kuu ta̱ David rey va̱ása níndakiʼinra castigo ña̱ xi̱niñúʼu ndakiʼinra. Jehová kándíxaníra na̱ nda̱kaxinra kuniʼi yichi̱ nu̱ú na̱ ñuura, ña̱kán va̱ása kivi ka̱ʼa̱nyó ña̱ kándíxayó Jehová tá va̱ása kándíxayó na̱yóʼo.
8. ¿Ndáa ki̱ʼva kítáʼan ña̱ káʼa̱n Hechos 16:4, 5 xíʼin ña̱ kéʼé na̱ níʼi yichi̱ nu̱úyó tiempo vitin?
8 Tiempo vitin Jehová ta̱xira chiñu ndaʼa̱ na̱ esclavo na̱ nda̱kúní-ini na̱ ndíchiní ña̱ va̱ʼa kuniʼina yichi̱ nu̱ú na̱ ñuura (Mat. 24:45). Nda̱a̱ táki̱ʼva ke̱ʼé na̱ cuerpo gobernante na̱ ni̱xi̱yo tá siglo nu̱ú, saátu na̱yóʼo níʼina yichi̱ nu̱ú na̱ ñuu Ndióxi̱ tiempo vitin ta káʼa̱nna xíʼin na̱ anciano ndáa ki̱ʼva kundaana na̱ congregación (kaʼvi Hechos 16:4, 5). Ta na̱ anciano kúú na̱ chíndeétáʼan xíʼin na̱ congregación ña̱ kundiku̱nna ña̱ káʼa̱n na̱yóʼo. Tá ná kundiku̱nyó ña̱ káʼa̱n na̱ ñuu Ndióxi̱ xíʼinyó ta saátu ña̱ káʼa̱n na̱ anciano, saá kúú ña̱ náʼa̱yó ña̱ kándíxaníyó ña̱ viíní íyo ña̱ ndáka̱xin Jehová keʼéra.
9. ¿Ama kúú ña̱ kivi ixayo̱ʼvi̱ña xíʼinyó kandíxayó na̱ anciano, ta nda̱chun?
9 Sava yichi̱ kivi ixayo̱ʼvi̱ña xíʼinyó kundiku̱nyó ña̱ ndáka̱xin na̱ anciano keʼéna. Tá kúú, tiempo vitin na̱ anciano ndáchitáʼanna ku̱a̱ʼání na̱ congregación, ta xa̱ʼa̱ ña̱yóʼo ku̱a̱ʼání na̱ hermano ndáya̱ʼana ti̱xin inka circuito. Xa̱ʼa̱ ña̱ kúni̱ na̱ anciano vií kuniñúʼuna veʼe nu̱ú ndátakayó, káʼa̱nna xíʼin sava na̱ hermano ná nasa̱mana inka congregación. Tá ná ka̱ʼa̱nna xíʼinyó keʼéyó ña̱yóʼo, sana ixayo̱ʼvi̱ña xíʼinyó sandákooyó na̱ veʼeyó xíʼin na̱ migoyó. ¿Á káʼa̱n Jehová xíʼin na̱ anciano ndáa congregación ku̱ʼu̱n iin tá iin na̱ publicador? Va̱ása, ta sana xa̱ʼa̱ ña̱yóʼo kúú ña̱ kivi ixayo̱ʼvi̱ña xíʼinyó kundiku̱nyó ña̱ káʼa̱nna xíʼinyó. Soo kúnda̱a̱va-ini Jehová ña̱ viíní íyo ña̱ ndáka̱xin na̱ anciano keʼéna, ta saátu miíyó xíniñúʼu kandíxayó ña̱ viíní íyo ña̱ ndáka̱xinna keʼéna. *
10. Nda̱a̱ táki̱ʼva káchi Hebreos 13:17, ¿nda̱chun xíniñúʼu kundiku̱nyó ña̱ ndáka̱xin na̱ anciano keʼéna?
10 ¿Nda̱chun xíniñúʼu kundiku̱nyó ña̱ ndáka̱xin na̱ anciano keʼéna ni tá va̱ása kútóoyóña? Saáchi tá kéʼéyó ña̱yóʼo saá kúú ña̱ chíndeétáʼanyó xíʼin na̱ ñuu Ndióxi̱ ña̱ vií kutáʼanna (Efes. 4:2, 3). Ta saátu ku̱a̱ʼání ña̱ va̱ʼa ndákiʼin na̱ congregación tá vitá íyo iniyó ta ndíku̱nyó ndiʼi ña̱ ndáka̱xin na̱ anciano keʼéna (kaʼvi Hebreos 13:17). Ta saátu tá kándíxayó na̱ anciano saá náʼa̱yó ña̱ kándíxayó Jehová chi ta̱yóʼo kúú ta̱ nda̱kaxinna ña̱ kundaana miíyó (Hech. 20:28).
11. ¿Ndáaña kivi chindeétáʼan xíʼinyó kandíxayó ña̱ viíní íyo ña̱ ndáka̱xin na̱ anciano keʼéna?
11 ¿Ndáaña kivi chindeétáʼan xíʼinyó kandíxayó ña̱ viíní íyo ña̱ ndáka̱xin na̱ anciano keʼéna? Ña̱ chindeétáʼan xíʼinyó kúú ña̱ ndakaʼányó ña̱ siʼna ndúkúna espíritu santo nu̱ú Jehová tá kúma̱ní ndaka̱xinna ña̱ keʼéna xa̱ʼa̱ na̱ congregación. Ta saátu ndíku̱nna ña̱ káʼa̱n tu̱ʼun Ndióxi̱ xíʼin ña̱ káʼa̱n na̱ ñuura. Ta kúni̱na sakúsi̱ína-ini Jehová ta saátu kúni̱na viíní kundaana na̱ hermano. Saáchi kúnda̱a̱-inina ña̱ ndukú Jehová kuenta nu̱úna xa̱ʼa̱ ki̱ʼva ña̱ kéʼéna chiñuna (1 Ped. 5:2, 3). Ná ndakanixi̱níyó xa̱ʼa̱ ña̱yóʼo: nu̱ú ñuyǐví yóʼo na̱ yiví va̱ása vií kítáʼanna, xa̱ʼa̱ ña̱ kúúna inka raza, xa̱ʼa̱ ña̱ kúúna inka religión á xa̱ʼa̱ ña̱ kíʼvina xíʼin ña̱ política. Soo miíyó inkáchi kítáʼanyó ndásakáʼnuyó Ndióxi̱ ta̱ nda̱a̱. Ña̱yóʼo náʼa̱ káxiña nu̱úyó ña̱ chíndeétáʼanva Jehová xíʼin na̱ ñuura.
12. ¿Ndáaña xíniñúʼu kiʼin na̱ anciano kuenta xíʼin ña̱ va̱ʼa kunda̱a̱-inina á ndixa nda̱ndikó-ini iin na̱ ni̱ki̱ʼvi ku̱a̱chi?
12 Jehová ta̱xira chiñu ndaʼa̱ na̱ anciano ña̱ kundaana na̱ congregación nu̱ú ña̱ va̱ása va̱ʼa. Ña̱kán, tá iin na̱ hermano ni̱ki̱ʼvina ku̱a̱chi ndeé, Jehová kúni̱ra ña̱ ná koto na̱ anciano á xíniñúʼu kundika̱a̱kana ti̱xin congregación. Ta saátu xíniñúʼu kotona á ndixa nda̱ndikó-inina xa̱ʼa̱ ku̱a̱chi ña̱ ni̱ki̱ʼvina. Ña̱kán, xíniñúʼu ndakanixi̱nína xa̱ʼa̱ ña̱yóʼo: ni káʼa̱n na̱ ni̱ki̱ʼvi ku̱a̱chi kán ña̱ ndándikóní-inina xa̱ʼa̱ ña̱ ke̱ʼéna, ¿á ndixa kúndasína ña̱ ke̱ʼéna? ¿Á chi̱ka̱a̱-inina ña̱ va̱ása ndandikókana keʼénaña? Tá na̱ yiví na̱ kítáʼan xíʼinna kúú na̱ chi̱ndaʼá-ñaʼá ña̱ ke̱ʼéna ña̱ va̱ása va̱ʼa, ¿á chi̱ka̱a̱-inina ña̱ va̱ása kutáʼankana xíʼinna? Na̱ anciano siʼna káʼa̱nna xíʼin Jehová tasaá xítona ndáaña káʼa̱n tu̱ʼunra xa̱ʼa̱ ña̱ ke̱ʼé na̱yóʼo, ta saátu kíʼinna kuenta ndáaña ndákanixi̱ní na̱yóʼo xa̱ʼa̱ ña̱ ke̱ʼéna. Tasaá kúú ña̱ xítona á kundika̱a̱kana ti̱xin congregación á va̱ása. Ña̱kán, sava yichi̱ távávanana ti̱xin congregación (1 Cor. 5:11-13).
13. ¿Ndáaña kivi kixáʼayó ndakanixi̱níyó tá ki̱ta iin na̱ kúʼvi̱ní-iniyó xíniyó ti̱xin congregación?
13 Tá kíta iin na̱ hermano ti̱xin congregación, ta su̱ví na̱ veʼeyó á na̱ migoyó kúúna, sana va̱ása íxayo̱ʼvi̱ña xíʼinyó kandíxayó ña̱ nda̱kaxin na̱ anciano keʼéna. Soo, ¿ndáaña keʼéyó tá iin na̱ kúʼvi̱ní-iniyó xíniyó kúú iin na̱ ki̱ta? Sana kakava-iniyó xíʼin ña̱ nda̱kaxin na̱ anciano ke̱ʼéna. Sana kixáʼayó ndakanixi̱níyó ña̱ va̱ása níkiʼinna kuenta xíʼin ndiʼi ña̱ ku̱u á sanatu ndakanixi̱níyó ña̱ va̱ása vií níndatiinna ku̱a̱chi xíʼinna nda̱a̱ táki̱ʼva kúni̱ mií Jehová. ¿Ndáaña chindeétáʼan xíʼinyó ña̱ vií ndakanixi̱níyó xa̱ʼa̱ ña̱ ke̱ʼé na̱ anciano?
14. ¿Ndáaña xíniñúʼu ndakaʼányó tá ta̱vána iin na̱ kúʼvi̱ní-iniyó xíniyó ti̱xin congregación?
14 Ná ndakaʼányó chí Jehová kúni̱ra ña̱ ná kita iin na̱ ni̱ki̱ʼvi ku̱a̱chi ti̱xin congregación, saáchi kúni̱ra kundaara na̱ congregación ta kúni̱ra chindeétáʼanra xíʼin na̱ ni̱ki̱ʼvi ku̱a̱chi. Tá ná taxi Jehová kundika̱a̱kana ti̱xin congregación, kivi chindaʼána inkana ña̱ keʼéna ña̱ va̱ása va̱ʼa (Gál. 5:9). Ta saátu tá ná va̱ása kitana ti̱xin congregación, va̱ása kiʼinna kuenta ña̱ ndeéníva ku̱a̱chi ni̱ki̱ʼvina ta xíniñúʼu nasamana ki̱ʼva ña̱ ndákanixi̱nína, ta sandákoona keʼéna ña̱ va̱ása va̱ʼa tasaá kivi xa̱a̱na ndakutáʼan vií tukuna xíʼin Jehová (Ecl. 8:11). Tá xíto na̱ anciano á xíniñúʼu kita iinna ti̱xin congregación á va̱ása, ná kandíxayó ña̱ viíníva kéʼéna chiñu yóʼo. Na̱yóʼo kéʼéna nda̱a̱ táki̱ʼva ke̱ʼé na̱ Juez na̱ ni̱xi̱yo ñuu Israel, saáchi kúnda̱a̱-inina ña̱ su̱ví na̱ yiví kúú na̱ nítaxi chiñu ndaʼa̱na ña̱ ndatiinna ku̱a̱chi xíʼin inkana, saáchi Jehová kúú ta̱ ta̱xiña ndaʼa̱na (2 Crón. 19:6, 7).
TÁ NÁ KUNDAA-INIYÓ JEHOVÁ TIEMPO VITIN, SAÁTU KUNDAA-INIYÓRA CHÍ NU̱ÚNÍNU
¿Ndáaña chindeétáʼan xíʼinyó kandíxayó ña̱ ka̱ʼa̱n na̱ ñuu Ndióxi̱ xíʼinyó ti̱xin ña̱ gran tribulación? (Koto párrafo 15).
15. ¿Nda̱chun xíniñúʼu kandíxayó na̱ nda̱kaxin Jehová kuniʼi yichi̱ nu̱úyó tiempo vitin?
15 Xa̱a̱ ku̱yatinní ndiʼi-xa̱ʼa̱ ñuyǐví yóʼo. Ña̱kán ndáyáʼviní kandíxayó ña̱ viíní íyo ndiʼi ña̱ ndáka̱xin Jehová keʼéra. Saáchi tá ná kixáʼa ña̱ gran tribulación, sana ka̱ʼa̱n na̱ ñuu Ndióxi̱ xíʼinyó keʼéyó iin ña̱ʼa ña̱ kivi ixayo̱ʼvi̱ xíʼinyó keʼéyó. Saáchi va̱ása kunda̱a̱-iniyó nda̱chun kúú ña̱ káʼa̱nna xíʼinyó keʼéyóña, á sana ndakanixi̱níyó ña̱ yo̱ʼvi̱ní ña̱ ndúkúna nu̱úyó keʼéyó. Tá ná kuu ña̱yóʼo, va̱ása ka̱ʼa̱nví Jehová xíʼin iin tá iinyó ndáaña xíniñúʼu keʼéyó. Chi sana kuniñúʼura na̱ nda̱kaxinra ña̱ ka̱ʼa̱nna xíʼinyó ndáaña xíniñúʼu keʼéyó. Su̱ví iin tiempo ña̱ xíniñúʼu kaka-iniyó koo ña̱yóʼo ta kixáʼayó ndakanixi̱níyó ña̱ káʼa̱nna xíʼinyó keʼéyó ña̱ kúni̱ miína su̱ví ña̱ kúni̱ Jehová. ¿Á kandíxayó Jehová xíʼin na̱ ñuura ti̱xin ña̱ gran tribulación? Iin ña̱ chindeétáʼan xíʼinyó kunda̱a̱-iniyó xa̱ʼa̱ ña̱yóʼo kúú ña̱ kotoyó ndáa ki̱ʼva ndíku̱nyó ndiʼi ña̱ káʼa̱n na̱ ñuu Ndióxi̱ xíʼinyó tiempo vitin. Tá kándíxayó ndiʼi ña̱ káʼa̱n na̱ ñuu Jehová xíʼinyó tiempo vitin ta kama kéʼéyóña, saátu keʼéyó ti̱xin ña̱ gran tribulación (Luc. 16:10).
16. ¿Ama kúú ña̱ kivi ixayo̱ʼvi̱ña xíʼinyó kandíxayó ña̱ ndáka̱xin Jehová keʼéra?
16 Xíniñúʼu ndakanixi̱níyó xa̱ʼa̱ ña̱yóʼo: ¿ndáaña keʼéyó tá ná kixáʼa Jehová ndatiinra ku̱a̱chi xíʼin na̱ yiví na̱ íyo nu̱ú ñuʼú yóʼo? Tiempo vitin ndátuyó ña̱ na̱ yiví na̱ va̱ása ndásakáʼnu Jehová ta saátu na̱ veʼeyó, ná kixáʼana ndasakáʼnunara nani íyoka tiempo nu̱úna. Soo ti̱xin ña̱ Armagedón, Jehová kuniñúʼura ta̱ Jesús ña̱ ndatiinra ku̱a̱chi xíʼin na̱yóʼo (Mat. 25:31-33; 2 Tes. 1:7-9). Su̱ví miívíyó kúú na̱ ka̱ʼa̱n ndáana xíniñúʼu kundáʼvi-ini Jehová kunira ta ndáana va̱ása kundáʼvi-inira kunira (Mat. 25:34, 41, 46). ¿Á kandíxayó Jehová xa̱ʼa̱ ña̱ ndaka̱xinra keʼéra? ¿Á va̱ása ndasakáʼnukavíyora xa̱ʼa̱ ña̱ va̱ása níkutóoyó ña̱ nda̱kaxinra keʼéra? Ña̱kán xíniñúʼu kandíxaníyó Jehová tiempo vitin chi ña̱yóʼo chindeétáʼanña xíʼinyó kandíxayóra chí nu̱únínu.
17. ¿Ndáaña va̱ʼa ndakiʼinyó xa̱ʼa̱ ña̱ ndaka̱xin Jehová keʼéra?
17 Ná ndakanixi̱níyó ndáaña kundoʼoyó tá ná kuniyó ña̱ ku̱a̱ʼání ña̱ va̱ʼa ndakiʼinyó xa̱ʼa̱ ña̱ nda̱kaxin Jehová ke̱ʼéra. Va̱ása kooka veʼe-ñu̱ʼu vatá, va̱ása kooka na̱ yiví na̱ kútóoní xu̱ʼún, va̱ása kooka na̱ chíñu na̱ íxandi̱va̱ʼa xíʼin na̱ yiví. Va̱ása kooka kue̱ʼe̱, va̱ása kuchéekayó ta saátu va̱ása kuvika na̱ veʼeyó. Ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra 1,000 ku̱i̱ya̱ ndaku̱ndasina. Ndiʼi ña̱ʼa ña̱ va̱ása va̱ʼa ke̱ʼé ta̱ Ndi̱va̱ʼa va̱ása kookaña (Apoc. 20:2, 3). Kusi̱íníva-iniyó saáchi xi̱ndiku̱nyó ndiʼi ña̱ ni̱ka̱ʼa̱n Jehová.
18. ¿Ndáaña sákuaʼayó xíʼin ña̱ ke̱ʼé na̱ ñuu Israel? (Números 11:4-6 xíʼin 21:5).
18 ¿Á koo ña̱ kasi nu̱úyó ña̱ kandíxayó Jehová nu̱ú ñuyǐví xa̱á? Ná ndakanixi̱níyó ndáaña ku̱u tá ta̱vá Jehová na̱ ñuu Israel ti̱xin ñuu Egipto. Savana ki̱xáʼana káʼa̱n kúáchina saáchi xi̱ndakaʼánna xa̱ʼa̱ ña̱ʼa ña̱ xi̱xixina ñuu Egipto, ta va̱ása níchindayáʼvina maná ña̱ xi̱taxi Jehová xi̱xixina (kaʼvi Números 11:4-6; * 21:5). * ¿Á kivi kundoʼoyó táʼan ña̱yóʼo tá ná ndiʼi ña̱ gran tribulación? Sana ku̱a̱ʼání chiñu keʼéyó ña̱ va̱ʼa ndaya̱kúnyó ñuʼú yóʼo tasaá xa̱a̱ña nduliviña. Sana ixayo̱ʼvi̱vaña xíʼinyó chi koo ku̱a̱ʼání chiñu. ¿Á ka̱ʼa̱n kúáchiyó xíʼin Jehová xa̱ʼa̱ ña̱yóʼo? Tá nda̱a̱ tiempo vitin chíndayáʼviyó ndiʼi ña̱ táxi Jehová ndaʼa̱yó, saátu chindayáʼviyó ndiʼi ña̱ taxira ndaʼa̱yó chí nu̱únínu.
19. ¿Ka̱ʼa̱n xa̱ʼa̱ mií ña̱ ndáyáʼvi va̱ʼaka sa̱kúaʼayó nu̱ú artículo yóʼo?
19 Ndiʼi tiempo viíní íyo ña̱ ndáka̱xin Jehová keʼéra, ta xíniñúʼu kandíxayóña. Ta saátu ná kundiku̱nyó ña̱ káʼa̱n na̱ nda̱kaxinra kuniʼi yichi̱ nu̱úyó. Ta ná va̱ása nandósóyó ña̱ ni̱ka̱ʼa̱n Jehová nu̱ú Isaías 30:15 tá ka̱chira: “Xa̱a̱ndó ndakú koo inindó tá kándíxandó yi̱ʼi̱ ta táxi̱n íyo inindó”.
YAA 98 Tu̱ʼun Ndióxi̱ kúú Biblia
^ párr. 5 Artículo yóʼo chindeétáʼanña xíʼinyó kandíxakayó Jehová ta saátu kandíxakayó na̱ nda̱kaxinra kuniʼi yichi̱ nu̱úyó. Ta kotoyó ndáaña va̱ʼa ndakiʼinyó tá kándíxayóna tiempo vitin, ta ña̱yóʼo ixatu̱ʼvaña miíyó ña̱ kandíxayóna chí nu̱únínu.
^ párr. 4 Génesis 18:20, 21: “Jehová ni̱ka̱ʼa̱nra ña̱yóʼo: ‘Ndeéní káʼa̱n kúáchi na̱ Sodoma xíʼin na̱ Gomorra, ta ndeéní ku̱a̱chi ku̱a̱kiʼvina. 21 Ku̱ʼi̱n kotoi̱ á ña̱ ndixa kúú ña̱ káʼa̱nna xíʼi̱n, ta á ndixa kininí íyo ña̱ kéʼéna. Soo tá su̱ví ña̱ ndixa kúúña, kunda̱a̱va-inii̱’”.
^ párr. 4 Deuteronomio 10:17: “Saáchi Jehová Ndióxi̱ndó kúúra Ndióxi̱ nu̱ú inkaka ndióxi̱, ta kúúra táta nu̱ú inkaka na̱ táta, iin Ndióxi̱ ta̱ káʼnuní kúúra, ta íyoní ndee̱ra, ta viíní kéʼéra xíʼin ndiʼi na̱ yiví, ta nda̱kúní ndátiinra ku̱a̱chi”.
^ párr. 9 Sava yichi̱ va̱ása kívi nasa̱ma na̱ hermano inka congregación, ¿nda̱chun? Koto táʼví ña̱ naní “Sección de preguntas” ña̱ ka̱na nu̱ú Nuestro Ministerio del Reino tá noviembre ña̱ ku̱i̱ya̱ 2002.
^ párr. 18 Números 11:4-6: “Ta na̱ yiví na̱ inka ñuu na̱ xi̱ndoo xíʼin na̱ ñuu Israel ki̱xáʼana káʼa̱nna xa̱ʼa̱ ña̱ʼa ña̱ kúni̱na. Ta saátu na̱ ñuu Israel ki̱xáʼana xáku tukuna ta ki̱xáʼana káʼa̱nna ña̱yóʼo: ‘¿Ndáana taxi ku̱ñu kuxundi̱? 5 Ndákaʼánníndi̱ xa̱ʼa̱ ti̱a̱ká tí xi̱xixindi̱ ñuu Egipto ta va̱ása níxi̱chaʼvindi̱ xa̱ʼa̱rí, ta saátu ndákaʼánníndi̱ xa̱ʼa̱ pepino, xa̱ʼa̱ sandía, xa̱ʼa̱ puerro, xa̱ʼa̱ ti̱kumi xíʼin xa̱ʼa̱ ajo. 6 Soo vitin xa̱a̱ va̱xi ndíʼi ndee̱ndi̱. Chi iinlá maná xíxindi̱’”.
^ párr. 18 Números 21:5: “Nda̱kundeéna ni̱ka̱ʼa̱n kúáchina xíʼin Ndióxi̱ ta saátu xíʼin ta̱ Moisés. Ta xi̱ka̱ʼa̱nna: ‘Nda̱chun ta̱vándó ndi̱ʼi̱ ti̱xin ñuu Egipto? ¿Á xa̱ʼa̱ ña̱ kúni̱ndó kuvindi̱ nu̱ú ñuʼú yi̱chí yóʼova kúúña? Kǒo miíví ña̱ kuxundi̱ ni ti̱kui̱í koʼondi̱, ta xa̱a̱ ku̱kini-inindi̱ xíʼin si̱táva̱ʼa yóʼo’”.
