1, 2. 1) ¿Keyej miakej ouij kinkisa takuaujtamatiskej iniuan akin kipiaj tanauatil? 2) ¿Toni tikitaskej itech nejin tamachtilis?

 ITECH nejin tonalmej miakej ouij kinkisa takuaujtamatiskej iniuan akin kipiaj tanauatil. ¿Keyej? Porin kiitaj ke tanauatilmej uan política okachi kinpaleuiaj akin tominpiaj uan akin kipiaj tanauatil, sayoj ke akin amo tominpiaj kinchiuiliaj tein amo kuali. Yejua ika, Biblia kijtoua: “Taltikpaknenkej kitajyouiltiani taltikpaknenkej ika itaixyekanalis” (Ecl. 8:9). Uan no, seki taixyekananij itech taneltokalis kichiuaj tein amo kuali. Nejon kichiuani maj seki taltikpakneminij amo takuaujtamatikanok iuan Dios. Yejua ika, moneki tikinpaleuiskej akin tikinmachtiaj ika Biblia maj takuaujtamatikan iuan Dios uan no iniuan tokniuan akin yejuatsin kinixtalijtok maj techixyekanakan.

² Tein melauj, amo sayoj akin momachtijtokej Biblia moneki takuaujtamatiskej iuan Jiova uan itech inechikol, ta akin miak xiujmejya tiktekitilijtokej Jiova no moneki tiksentokaskej titakuaujtamatiskej ke yejuatsin nochipa kichiua tein kinamiki, porin kemansa seki taman uelis kichiuas maj ouij techkisa titakuaujtamatiskej iuan. Itech nejin tamachtilis tikitaskej eyi taman. Yekinika, keman tikixtajtoltiaj seki tajkuilolmej  itech Biblia. Ojpatika, keman inechikol Jiova kiixtalia seki taman. Uan expatika, keman tikpanoskej ouijkayomej satepan.

3. Keman tikixtajtoltiaj seki taman itech Biblia, ¿keyej uelis kichiuas maj ouij techkisa titakuaujtamatiskej iuan Jiova?

 ³ Keman tikixtajtoltiaj Biblia, xa timotajtaniaj keyej Jiova kiixtalij maj tataman tein kinpano seki taltikpakneminij keman tajtakojkej. Kemej neskayot, itech amatajkuilol Números tikitaj ke Jiova kiixtalij maj kimiktianij se israelita porin kitemoto kouit itech tonal sábado. Sayoj ke itech Segundo de Samuel kijtoua ke miak xiujmej satepan, Jiova kitapojpoluij tekiuaj David maski auilnenka uan temiktijka (Núm. 15:32, 35; 2 Sam. 12:9, 13). Xa timotajtaniaj: “¿Keyej Jiova kitapojpoluij David maski ueyi tajtakojka, sayoj ke kiixtalij maj kimiktianij israelita maski tein kichiujka moitayaj ke amo katka se ueyi tajtakol?”. Maj tikitakan eyi taman tein moneki tikelnamikiskej keman tikixtajtoltiaj Biblia.

4. ¿Keniuj techpaleuia tein kijtoua Génesis 18:20, 21 uan Deuteronomio 10:17 maj titakuaujtamatikan ke tein Jiova kiixtalia yejua tein okachi kuali?

⁴ Biblia amo nochipa kijtoua nochi tein panok. Kemej neskayot, tikmatij ke David yekmelauj moyolnonotsak oso moyolnemilij (Sal. 51:2-4). Sayoj ke, ¿toni tikmatij den takat akin amo moseuij itech tonal sábado kemej kijtouaya tanauatil? ¿Yekmelauj moyolnonotska? ¿Achto ipa amo kitakamatka Jiova? ¿Kinejmachtijkajya sayoj ke amo kikakik tein kiluijkaj oso amo kinekik kichiuas? Biblia amo kijtoua. Sayoj ke uelis titakuaujtamatiskej ke Jiova “amo keman kichiua tein amo kuali” (Deut. 32:4). Keman Jiova tamelaua kiita nochi tein panoua, amo kemej taltikpakneminij akin kikakij tein oksekin kijtouaj oso techikoitaj (xikonixtajtolti Génesis 18:20, 21; Deuteronomio 10:17). Komo okachi tikixmatij Jiova uan itanauatiluan, okachi titakuaujtamatiskej ke tein kiixtalia yejua tein okachi kuali. Yejua ika, komo keman tikixtajtoltiaj Biblia tikpiaj netajtanilmej tein axkan amo ueli tikajsij itanankilil, tein tikmatij de Jiova moneki techpaleuis maj titakuaujtamatikan ke yejuatsin nochipa kichiua tein melauak (Sal. 145:17).

5. ¿Toni uelis panos porin titajtakolejkej? (Xikonita recuadro “ Tajtakol uelis kichiuas maj amo tikitakan teisa kemej kinamiki”).

 ⁵ Kemej titajtakolejkej amo nochipa tikitaj teisa kemej kinamiki. Kemej Dios techchijchiuak kemej yejuatsin, amo tikuelitaj maj mochiua tein amo melauak (Gén. 1:26). Sayoj ke, kemej titajtakolejkej xa timopoloskej keman tiknemiliaj toni kinamikia kiselis aksa maski tiknemiliskej ke tikmatij nochi tein panok. Kemej neskayot, maj tikelnamikikan tein kichiuak Jonás. Yejua semi kualanik keman Jiova kiniknelij akin nemiaj Nínive (Jon. 3:10-4:1). Sayoj ke tein Jiova kiixtalij tapaleuij maj momakixtianij panoua 120,000 akin ompa nemiaj. Nejon kinextij ke Jonás mopolojka uan amo Jiova.

6. ¿Keyej Jiova amo moneki techiluis keyej kichiua teisa?

⁶ Jiova amo moneki techiluis keyej kiixtalia seki taman. Ne uejkauj, Jiova kikauak maj seki itekitikauan kiluianij keniuj kiitayaj seki taman tein kiixtalijka oso tein yaya kiixtaliti (Gén. 18:25; Jon. 4:2, 3). Uan kemansa kijtoj keyej kiixtalijka teisa (Jon. 4:10, 11). Sayoj ke Jiova amo moneki techiluis keyej kichiua seki taman. Yejuatsin toTachijchiujkauj uan amo moneki tikiluiskej ke uelis kichiuas teisa oso ke kuali kichiuak (Is. 40:13, 14; 55:9).

7. ¿Akonimej xa ouij techkisa iniuan titakuaujtamatiskej, uan keyej?

⁷ Xa titakuaujtamatij ke Jiova nochipa kichiua tein kinamiki. Sayoj ke xa ouij techkisa titakuaujtamatiskej iniuan akin kinixtalijtok maj techixyekanakan. Xa timotajtaniaj ox kichiujtokej inintekiuj kemej Jiova kineki oso kemej yejuan kiixejekouaj. Xa yejua nejon tein kinpanok seki taltikpakneminij ne uejkauj. Maj itech titanemilikan neskayomej tein ika titajtojkej itech  párrafo 3. Xa se ichankauj israelita akin amo moseuij itech tonal sábado, motajtaniaya ox Moisés kitemoj inepaleuil Jiova achto ke kiixtaliskia maj kimiktianij ichankauj. Xa no ijkon kipanok aksa akin kuali iuan mouikaya Urías akin katka hitita. Yejua xa kinemilij ke kemej David katka tekiuaj, ika mopaleuij maj amo kitatsakuiltianij kemej kinamikia, porin auilnenka iuan inamik Urías. Jiova takuaujtamati iniuan akin kinixtalijtok maj techixyekanakan. Yejua ika, komo amo titakuaujtamatij iniuan, amo uelis tikijtoskej ke titakuaujtamatij iuan Jiova.

8. ¿Keniuj tein mochiua itech nechikolmej itech nejin tonalmej mouika ika tein kijtoua Hechos 16:4, 5?

⁸ Itech nejin tonalmej, Jiova kiixtalijtok “takeual takuaujtamach uan tamatkej” maj kiixyekana inechikol tein moajsi nikan taltikpak (Mat. 24:45, TNM). Ijkon kemej tokniuan oloch taojtokaltianij itech yekinika siglo, nejin takeual kiixyekana tekit tein kichiuaj itekitikauan Jiova itech nochi taltikpak, uan kiniluia tokniuan tayekananij toni moneki mochiuas (xikonixtajtolti Hechos 16:4, 5). Uan tayekananij kiitaj maj mochiua itech nechikolmej nejon tein moixtalij. Komo tiktakamatij “takeual takuaujtamach uan tamatkej” uan tikintakamatij tokniuan tayekananij, tiknextiskej ke titakuaujtamatij ke Jiova nochipa kichiua tein kinamiki.

9. ¿Kemanian xa ouij techkisas tikintakamatiskej tokniuan tayekananij, uan keyej?

⁹ Kemansa xa ouij techkisa tikchiuaskej tein kiixtaliaj tokniuan tayekananij. Kemej neskayot, itech xiujmej tein panouanij kinxelouanij miakej nechikolmej uan circuitos. Kemansa tayekananij kiniluianij seki tokniuan maj mosentilikan itech okse nechikol porin nejon tapaleuis maj kuali mokuikan Kalmej kampa tiMosentiliaj. Komo tejuan techiluiskiaj maj tikchiuakan nejon, xa ouij techkisaskia tikinkauaskej tochankauan uan akin kuali iniuan  timouikaj. ¿Kiniluia Jiova tayekananij itech katiyejua nechikol moneki yaskej tokniuan? Amo. Uan xa yejua ika ouij techkisa tikintakamatiskej. Sayoj ke Jiova iniuan takuaujtamati, uan tejuan no moneki iniuan titakuaujtamatiskej. *

10. Kemej kijtoua Hebreos 13:17, ¿Keyej moneki tikintakamatiskej tokniuan tayekananij?

¹⁰ ¿Keyej moneki tikintakamatiskej tokniuan tayekananij maski kemansa amo tikuelitaj tein kiixtaliaj? Porin keman tikchiuaj titapaleuiaj maj itech inechikol Jiova amo tixexeliujtokan (Efes. 4:2, 3). Uan no, tinochin techpaleuia itech nechikol keman tiyolyemankej uan keman tiktakamatij tein kiixtaliaj tokniuan tayekananij (xikonixtajtolti Hebreos 13:17). Uan tein okachi moneki, porin ijkon tiknextiliaj Jiova ke iuan titakuaujtamatij porin yejuatsin kinixtalij tokniuan tayekananij maj techyekpiakan (Hech. 20:28).

11. ¿Toni uelis techpaleuis maj okachi titakuaujtamatikan iniuan tokniuan tayekananij?

¹¹ ¿Toni uelis techpaleuis maj okachi titakuaujtamatikan iniuan tokniuan tayekananij? Komo tikelnamikij ke yejuan kitajtaniaj Jiova iyektikatsin espíritu keman kiixpejpenatij teisa itech nechikol. No kiitaj toni tayolmajxitia Biblia uan toni moixtaliani itech inechikol Jiova. Kinekij kiyolpaktiskej yejuatsin uan kuali kinyekpiaskej tokniuan. Yejuan kimatij ke Dios kiita ox kuali kichiujtokej tekit tein kinmakatok (1 Ped. 5:2, 3). Maj itech titanemilikan nejin: axkan taltikpakneminij motauelitaj porin seseko kayomej, porin tataman taneltokalis kipiaj uan porin kinpaleuiaj tataman tekiuajyomej, sayoj ke tejuan amo tixexeliujtokej, ta tiksentekitiliaj Dios akin melauak. Nejin kinextia ke Jiova kitatiochiuia inechikol.

12. ¿Keniuj uelis kimatiskej tokniuan tayekananij ox se tokniuj yekmelauj moyolnonotsa?

¹² Jiova kineki maj tokniuan tayekananij kiitakan maj nechikol moajsi chipauak. Yejua ika, komo se tokniuj kichiua se ueyi tajtakol, Jiova kichia maj tayekananij kiixejekokan ox uelis kisentokas itech nechikol. Kemej neskayot, moneki kiitaskej ox tokniuj yekmelauj moyolnonotsa. Moneki motajtaniskej nejin: maski tokniuj kijtoua ke moyolnonotsa, ¿yekmelauj amo kuali kiita tein kichiuak? ¿Yekmelauj amo kineki oksepa kichiuas nejon ueyi tajtakol? Komo akin iniuan mouika kichiujkej maj tajtako, ¿kiixtalijtok amo iniuan mouikasok? Tokniuan tayekananij kitataujtiaj Jiova, kiitaj tein panok, tein kijtoua Biblia uan no keniuj kiita nejon tokniuj tein kichiuak. Ompa kiixejekouaj ox uelis kisentokas kemej se itaixpantijkauj Jiova. Komo amo, xa monekis kikalankixtiskej itech nechikol (1 Cor. 5:11-13).

13. ¿Toni xa timotajtaniskej komo kikalankixtiaj itech nechikol se tochankauj oso se totasojikniuj?

¹³ Komo akin kikalankixtiaj itech nechikol amo se totasojikniuj oso amo tochankauj, xa niman tiktakamatij tein kiixtaliaj tokniuan tayekananij. Sayoj ke, komo kikalankixtiaj se tochankauj oso se totasojikniuj xa ouij techkisas titakuaujtamatiskej iniuan tayekananij. Xa timotajtaniskej ox kiitakej nochi tein panok oso ox kimelaujkej kemej Jiova kineki. ¿Toni techpaleuis maj tikitakan kemej kinamiki tein kiixtaliaj tokniuan tayekananij?

14. ¿Toni moneki tikelnamikiskej komo tokniuan tayekananij kikalankixtiaj itech nechikol se tochankauj oso se totasojikniuj?

¹⁴ Moneki tikelnamikiskej ke Jiova kiixtalij maj kikalankixtikan itech nechikol akin tajtakolchiua porin nejon kinpaleuia okseki  tokniuan uan no kipaleuia yejua. Komo amo kikalankixtiskiaj akin amo moyolnonotsa ueliskia kichiuas maj okseki tokniuan no tajtakolchiuakan (Gál. 5:9). Uan no, xa amo kiita ke kichiuak se ueyi tajtakol uan ke moneki kipatas kemej tanemilia uan tein kichiua komo kineki oksepa kuali mouikas iuan Jiova (Ecl. 8:11). Uelis titakuaujtamatiskej ke tokniuan tayekananij kiitaj ke semi moneki kuali kiixejekoskej ox kikalankixtiskej itech nechikol se tokniuj. Ijkon kemej tamelauanij itech xolal Israel, yejuan kimatij ke amo tamelauaj “inintokaykopa takamej, ta itokaykopa Jiova” (2 Crón. 19:6, 7).

15. ¿Keyej axkan okachi moneki titakuaujtamatiskej ke Jiova nochipa kichiua tein kinamiki?

¹⁵ Amo uejkaua ixpoliuisya tein amo kuali. Yejua ika, axkan okachi moneki titakuaujtamatiskej ke Jiova nochipa kichiua tein kinamiki. ¿Keyej? Porin itech okachi ueyi tajyouilis xa techiluiskej maj tikchiuakan seki taman tein amo tikajsikamatiskej, tein tiknemiliskej ke amo taixejekol oso tein ouij techkisas tikchiuaskej. Sayoj ke Jiova amo technojnotsas, ta xa kichiuas maj techiluikan toni moneki tikchiuaskej akin kinixtalijtok maj techixyekanakan. Ijkuak amo monekis timotajtaniskej ox yekmelauj Jiova kineki maj tikchiuakan nejon oso tokniuan akin techixyekanaj. ¿Titakuaujtamatiskej iuan Jiova uan itech inechikol? Komo axkan titakuaujtamatij itech inechikol Jiova uan niman tiktakamatij tein kiixtaliaj, xa no ijkon tikchiuaskej itech okachi ueyi tajyouilis (Luc. 16:10).

16. ¿Keniuj monekis tiknextiskej amo uejkaua ke titakuaujtamatij itech tein Jiova kiixtalia?

¹⁶ No moneki itech titanemiliskej keniuj tikitaskej tein Jiova kiixtalis keman kinmelauas taltikpakneminij. Axkan tikchiajok maj miakej kiixtalikan kitekitiliskej Jiova achto ke ixpoliuis tein amo kuali, sekin xa tochankauan. Sayoj ke itech Armagedón, Jiova, itechkopa Jesús, kiixtalis toni panos iniuan (Mat. 25:31-33; 2 Tes. 1:7-9). Amo tejuan tikixtaliskej akoni moneki maj Jiova kiikneli uan akoni amo (Mat. 25:34, 41, 46). ¿Titakuaujtamatiskej iuan Jiova oso amo tiktekitiliskejok porin amo tikuelitaskej tein kiixtalij? Yejua ika, axkan moneki tikchikauaskej totakuaujtamatilis iuan Jiova porin nejon techpaleuis maj satepan senkis titakuaujtamatikan iuan.

17. ¿Keniuj tapaleuis tein Jiova kichiuas satepan?

¹⁷ Xikonnemili keniuj timomachiliskej itech yankuik taltikpak keman mochiuas tein kuali porin Jiova nochipa kiixtalia tein kinamiki. Amo onkasok taneltokalis tein amo melauak, tanamakanij akin sayoj kitemouaj motomintiskej nion tekiuajyomej akin semi  kintajyouiltiaj taltikpakneminij. Amo onkasok kokolismej oso kokoxkayot, amo akinok ueuentsintias nion momikiliskejok akin tikintasojtaj. Satanás uan iamokuali ejekauan tsaktoskej 1,000 xiujmej. Uan ixpoliuis nochi tein amo kuali tein onkak porin taixnamikkej (Apoc. 20:2, 3). ¡Semi tiyolpakiskej porin titakuaujtamatkej ke Jiova nochipa kichiua tein kinamiki!

18. Kemej kijtoua Números 11:4-6 uan 21:5, ¿toni techmachtia tein kichiujkej israelitas?

¹⁸ ¿Tikpanoskej seki taman itech yankuik taltikpak tein kichiuas maj ouij techkisa titakuaujtamatiskej ke Jiova nochipa kichiua tein kinamiki? Maj tiknemilikan tein panok tepitsin satepan ke Jiova kinkixtij israelitas ompa Egipto. Sekin peuak kualanij porin kinekiaj kikuaskej tein ompa kikuayaj uan kiixtopeujkej maná tein yejuatsin kinmakaya (xikonixtajtolti Números 11:4-6; 21:5). ¿No uelis techpanos nejon satepan ke panos okachi ueyi tajyouilis? Amo tikmatij ox monekis semi titekitiskej keman titachipauaskej uan tikchiujtiaskej nejin taltikpak se xochital. Xa onkas miak tekit uan yekinika xa tikpanoskej seki ouijkayomej. ¿Amo no tikuelitaskej tein Jiova techmakas ijkuak? Komo axkan semi tiktasojkamatij tein Jiova techmaka, satepan no semi tiktasojkamatiskej.

19. ¿Katiyejua tanemililmej tayekantokej itech nejin tamachtilis?

¹⁹ Moneki titakuaujtamatiskej ke Jiova nochipa kichiua tein kinamiki. No moneki titakuaujtamatiskej iniuan akin kinixtalijtok maj kiitakan maj mochiua tein yejuatsin kineki. Maj amo keman tikelkauakan tein Jiova kiluij tanauatijkej Isaías maj kitematiltiani: “Nankipiaskej chikaualis komo nanyolseujtokej uan komo nantakuaujtamatij” (Is. 30:15).