1-2. (a) Ngenyi vandhu vazinji nyamasi vanovona zvecinesa maningi kuthemba vayana vanonga vecitungamirira? (b) Ngozvapi zvatiri kuda kuvona pa musoro uwu?

 NYAMASI uno, vandhu vazinji vanovona zvecinesa maningi kuthemba mundhu ari wese anonga ecitungamirira. Ngokuti ivona vanovona kuti vatungamiriri vo nyika nguva jese vanobesera vandhu vakapfuma no vandhu vanosimba kusiyapo kubesera varombo. Bhaibheri rinoticeukija kuti: “Varipo vandhu vanotonga panyezuru po vamweni, kuti vavaxuphe.” (Mucumaeri 8:9) Vatungamiriri vo zviyara vari kuita zviro zvakashata, zviro zviri kuitisa kuti vandhu vamweni vatame kuthemba Mwari. Ngo kudaro, mundhu paanotendera kujija Bhaibheri na itusu, tinodikana kumubesera kuti athembe Jehovha no kuthemba vayana vakagajwa ndiyena kuti vatungamirire.

² Zvokadi kamare, vajiji vo Bhaibheri andivopi vega vano dikano yokujijira kuthemba Jehovha no kuthemba sangano rake. Pikija tiri kushandira Jehovha ko makore akawanda, atidikani kuruza rutendo hwokuti Jehovha nguva jese anoita zviro ngo njira yaushoni. Nguva jimweni, pangava no mugariro jingaeja kuthemba kwedu Jehovha. Pa musoro uwu, tiri kuda kubhuya ngo mugariro mutatu jingaeja rutendo hwedu: (1) patinoverenga zviitiko zvimweni zvo Bhaibheri, (2) patinoashira ndhungamiriro jinovha ku sangano ra Jehovha no (3) patinozosongana no zvineso kumbejiyo.

3. Zviitiko zvimweni zvo mu Bhaibheri zvingaejesa kudini kuthemba kwatinoita Jehovha?

 ³ Patinoverenga Soko ra Mwari kangaije tingava no muvhunjo  ngo pamusoro po matajire akaita Jehovha vandhu vamweni no zvivaringo zvimweni zvaakatema. Inga muezaniso, mu bhuku ro Zviverengo, tinoverenga kuti Jehovha wakatonga kuti mwanarume umweni wo Iziraeri waidikana kufa ngokuti iyena wakaenda kopsaka huni mu njiku yo Sabudu. Mu bhuku ra Samueri wocipiri, tinoverenga kuti pa makore mazinji akatevera, Jehovha wakaregerera Mambo Dhavhidhi uwo wainga wakaita uhure no kuuraisa mundhu. (Bziverengo 15:32, 35; 2 Samueli 12:9, 13) Kangaije tingajivhunjisa kudari: ‘Ngenyi Jehovha wakaregerera Dhavhidhi wakaita uhure no kuuraisa mundhu asi kakutongera kufa mwanarume umweni wiya wainga acikazivi kuita cishaishi cakakura maningi?’ Kuti tikwanise kudavira muvhunjo uwu, ngativone zviro zvitatu zvatinodikana kurangarira patinonga teciverenga Bhaibheri.

4. Genesi 18:20, 21 na Deuteronòmio 10:17, jinovangisa kudini kuthemba kwedu Jehovha pakutonga?

⁴ Kazinji Bhaibheri arinangi zvese zvinobatanijwa paciitikoco. Inga muezaniso, tinoziva kuti Dhavhidhi wakanasa kukhauya kamare pa zviito zvake. (Nduyo 51:4-6) Asi mwanarume wakaphwanyaya mutemo wo Sabudu wainga ari mundhu womushovonyi? Kureva kuti wainga wakakhauya pa zviro zvaainga aita? Wainga acizivi kumbozwira mutemo wa Jehovha kareko? Kureva kuti wainga no mukhuva wo kuramba kana kutama kuzwira ngwajo? Bhaibheri arinangi zviri zvese ngo pamusoro pazvo. Asi tinodikana kuva no cokwadi cokuti: Jehovha ndi Mwari ‘wakarurama.’ (Deuteronòmio 32:4) Iyena anotema zvivaringo zvake akacijikira pa zvese zvinobatanijwepo, haiwa ngo kuzwa zvinonga zvecinangwa, mukheto kana ciri cese cokuti kazinji cinonyanya kupseja vandhu pakutonga. (Verenganyi Genesi 18:20, 21; Deuteronòmio 10:17.) Patinojija maningi ngo pamusoro pa Jehovha no ndhungamiriro jake, tinoengejera maningi kuthemba kwatinomuita pa manera ake okutonga. Pikija kuti patinoverenga Bhaibheri tingava no muvhunjo jiticikakwanisi kudavira pa nguva yondhoyo, catinonasa kuziva ngo pamusoro pa Mwari wedu ngo cokuti iyena “wakarurama mu makwanja ake ese.”—Nduyo 145:17.

5. Kutama kukwana kunopsasisa kudini mavonero edu ngo pamusoro po urungami? (Vonanyi bhokiso rinoti: “ Kutama Kukwana Kunocinja Mavonero Edu ngo Pamusoro po Urungami.”)

⁵ Kazinji atitongi ngo njira kwayo ngokuti atizivi kukwana. Mwari wakatiita ngo muezaniso wake, ngo iyo ndava tinoda kutaja vandhu  vamweni ngo njira yakarungama. (Genesi 1:26) Asi zvecivoneka kuti atizivi kukwana, tingaguma pakushaisha kutonga shwiro jimweni, pikija patinorangariraya kuti tinoziva zvese zvinobatanijwepo. Inga muezaniso, ceukijanyi kuti Jona wakanyangajwa maningi ngo civaringo cakatemwa ndi Jehovha co kuzwira pena vandhu vo Ninivhe. (Jona 3:10–4:1) Asi rangariranyi muviyo wakavepo zvecivoneka kuti Jehovha wakakhombija pena. Vandhu vanopindirija 120.000 vakakhauya voguma pakuponeswa. Asi pa kupejisira, Jona ndiyena wainga ecishaisha kutonga vamweni, kuciripi Jehovha.

6. Ngenyi Jehovha aadikani kutisanangurira thangwe ramuita kuti ateme zvivaringo zvake?

⁶ Jehovha aana dikano yo kusanangurira vandhu thangwe rinomuiita kuti ateme zvivaringo zvake. Ngo zvokadi kuti Jehovha wakatendera kuti vashandiri vake vokare vanange mazwiro avo ngo pamusoro po zvivaringo zvaainga atema no zvimweni zvaainga acada kutema. (Genesi 18:25; Jona 4:2, 3) Nguva jimweni, Jehovha wakatosanangurira vamweni thangwe rakamuita kuti ateme civaringo cakati kuti. (Jona 4:10, 11) Asi Jehovha aavangirijwi kuti atisanangurire thangwe rinomuita kuti ateme zvivaringo zvake. Inga Musiki wedu, aana dikano yokukumbira citendehwa cedu kuti aite ciro kana kutama kuciita.—Isaia 40:13, 14; 55:9.

7. Cineso capi catingasotana naco, ngenyi?

⁷ Atikani-kani kuti nguva jese Jehovha anoita zviro ngo njira kwayo. Asi tingava no cineso co kutama kuthemba vayana vakagajwa ndiyena. Kangaije tingada kuziva kuti vayana vakagajwa mu sangano ra Jehovha vanoitadi kamare mukuzwirana no ndhungamiriro jake kana vanoita mukuzwirana no mavonero avo. Zvingaita kuti vamweni vakapona mu nguva yakatahwa Bhaibheri vaingavo no murangariro uwu. Ngatimbovona muezaniso wanangwaya pa  ndima yo citatu. Zvingaita kuti ukama wo mwanarume wakaphwanyaya mutemo wo Sabudu waitokana-kana dangani Mosi wainga wakavhunjisadi Jehovha ngo pamusoro po mwanarume uwu, acito atongehwa kufa. Shamwari ja Uriya Muhiti mune wo mukaji wakaitaya uhure na Dhavhidhi, kangaije jakaguma pambhejiso yo kuti Dhavhidhi wakashandisa cigaro cake inga mambo kuti atame kupanicwa ngo zvakashata zvaainga aita. Jehovha anothemba vese vayana vaakagaja kuti vatungamirire mu sangano rake. Kudari tikatama kuthemba vanarume ava, atingazokwanisi kunanga kuti tinothembavo Jehovha.

8. Zvinonangwa mu bhuku ro Mabasa o Vapostori 16:4, 5, zvakaezana kudini no manera ari kushanda ungano yo Cikristu nyamasi uno?

⁸ Mu njiku jino Jehovha ari kutungamirira divi ro sangano rake ro pasi pano ecishandisa “muranda wakagondeka no wakangwara.” (Mateu 24:45) Mukuezana no mukhumbi unotonga wo muzana ro kutanga ro makore, muranda uwu anovonerera vandhu va Mwari um nyika yese no kupa ndhungamiriro vakuru vo ungano. (Verenganyi Mabasa o Vapostori 16:4, 5.) Ngo kudaro, vakuru vanoita kuti ndhungamiriro iji jishandiswe mu ungano. Tinokhombija kuti tinothemba manera Jehovha anoita zviro ngo kuzwira ndhungamiriro jatinopuwa ngo sangano rake no vakuru.

9. Ngopapi patingavona zvecinesa kubesera zvinonga zvasungwa ngo vakuru, ngenyi?

⁹ Nguva jimweni zvinganesa maningi kubesera zvinonga zvasungwa ngo vakuru. Inga muezaniso, makore manganani aperari ungano zinji no ndharaundha zvakava no cinjo. Nguva jimweni vakuru vangakumbira vacumaeri kuti vaende kobesera ungano jakasiyana-siyana kuti tinase kushandisa Nyumba jedu  jo Umambo. Kudari tikakumbihwa kuti tiende ku ungano imweni, kangaije tingava no cineso co kusiya shamwari jedu kana vamweni vo pa ukama. Kureva kuti vakuru vanonga vaashira ndhungamiriro inovha kuna Jehovha pavanovhunja mucumaeri umwe nga umwe, ungano yaangadikana kwenda? Haiwa. Izvi zvingaita kuti tinesehwe kutevera ndhungamiriro yatinonga tapuwa. Asi Jehovha anothemba vakuru pavanotema zvivaringo zvakadari, itusuvo tinodikana kuvathemba. *

10. Mukuzwirana no Vahebheru 13:17, ngenyi tinodikana kuzwira vakuru?

¹⁰ Ngenyi tinodikana kuzwira vakuru no kubesera zvivaringo zvavanonga vasunga pikija kuti zvavasungaro andizvopi zvataida? Ngokuti tikaita kudaro, tinonga tecibesera kuti vandhu va Mwari varambe vakabatana. (Vaefeso 4:2, 3) Ungano inobudirira ushoni kudari vese varimo vakanasa kuzwira no kujidodokesa kwese zviro zvinonga zvasungwa ngo dare ro vakuru. (Verenganyi Vahebheru 13:17.) Cinosisira maningi ngo co kuvonesa kuti itusu tinothemba Jehovha ngo kuzwira vayana vaakagaja kuti vatingwarire.—Mabasa o Vapostori 20:28.

11. Ngozvapi zvingatibesera kuvangisa kuthemba kwatinoita ndhungamiriro jatinopuwa ngo vakuru?

¹¹ Tingavangisa kuthemba kwedu ndhungamiriro jatinoashira kuvha ku vakuru ngo kuceukija kuti ivona vanokumbira mujimu mucena pavanonga vecisunga zviro zvinopsasa ungano. Ngo kungwarira kwese ivona vanosota ndhungamiriro jo Bhaibheri no kunasazve kusotesesa ndhungamiriro javanopuwa ngo sangano ra Jehovha. Cido cavo ngo co kuda kudakajisa Jehovha no kutaja ushoni vandhu vake. Vanarume ava vakagondeka vanoziva kuti vanozojidavirira kuna Mwari ngo manera avanotaja vandhu vake. (1 Pedhru 5:2, 3) Amborangariranyi ngo pamusoro pa izvi: Mu nyika yakaparajana ngo ndava yo mavhumbo, manamatire no zvomatongehwe o nyika, vandhu va Jehovha vakabatana vecinamata iyena basi ngo runyararo. Zviri kuitikari zvinovonesa kuti Jehovha ari kukomborera sangano rake.

12. Zviro zvapi zvinodikana kusoteseswa ngo vakuru kuti vavone dangani mundhu wakhauya kana kuti haiwa?

¹² Jehovha wakapa vakuru basa rinosisira maningi ro kuita kuti ungano irambe yakacena. Kudari Mukristu akaita cishaishi cikuru, Jehovha anovetera kuti vakuru vateme civaringo cokuti iyena angadikana here kuenderera mberi ari mu ungano kana haiwa. Pavanoita izvi, vakuru vanodikana kunasa kuvona kamare kuti mundhuwo wanasa kukhauya pa zviito zvake. Kangaije iyena angananga kuti ndakhauya, asi kureva kuti ari kunyenyadi zviro zvaakaita? Wasunga kutama kuitazve cishaishi condhoco? Kudari ishamwari jakashata jakamuita kuti iyena aite cishaishi, kureva kuti wasiya kamare kutamba no shamwari iji? Vakuru vanoita mukumbiro kuna Jehovha vopsakisisa shwiroyo no kuvona kuti ngozvapi zvinonangwa ngo Bhaibheri. Vakapeja vanozosotesesa kuti ngoapi mazwiro ano mushaishi ngo pamusoro po zviro zvaakaita. Pavanopeja kuita zvese izvi ivona vanozovona kuti angadikana here kuenderera mberi ari mu ungano kana kuti haiwa. Mu shwiro jimweni, mundhu wondhowo angatodikana kujingwa.—1 VaKorinte 5:11-13.

13. Kuneseka kwapi kwatingava nako kudari umwe wo shamwari yedu kana wo ukama hwedu akajingwa?

¹³ Kuthemba kwedu vakuru kungaejeswa kudini? Kudari mundhu wajingwaya asipi shamwari yedu yo phedo kana ukama hwedu, kangaije zvingatirerukira kutendera zvasungwa ngo vakuru. Asi ngatiti wajingwaya ishamwari yedu yo phedo kamare. Kangaije  taizotanga kuneseka tecirangarira kudari, kureva kuti vakuru vanasa kupsakisisa zvese zvinobatanijwepo kana manera avatongari shwiro iyi, ndizvona zvaizoita Jehovha. Ngozvapi zvingatibesera kuti tienderere mberi tino mavonero akanaka pa zvasungwa ngo vakuru?

14. Zvicinyi zvingatibesera kudari vakuru vakatema civaringo co kujinga mundhu wainga shamwari yedu kana ukama hwedu?

¹⁴ Tinodikana kuceukija kuti kujinga, ndi imwe yo njira inoshandiswa ndi Jehovha kuti ungano irambe yakacena no kubesera mundhu waitaro cishaishi. Kudari mundhu washaisharo akatama kukhauya woenderera mberi ari mu ungano, waizoita kuti vamweni vashaishevo. (Vagaratiya 5:9) Mukuengejera, iyena akatama kujingwa zvaizomuita kuti arangarire kuti cishaishi cake acizivi kukura maningi. Waizorangarirazve kuti aana dikano yokucinja manera ake okurangarira no zviito zvake. Kudari zvikaguma pa mugariro uwu, zvaizonesa maningi kwaari kuti atendehwezve ndi Jehovha. (Mucumaeri 8:11) Tingava no cokwadi cokuti vakuru vanonasa kuzviziva kuti vano mutoro wakakura maningi wokutema civaringo cokuti mundhu angadikana kujingwa kana kuti haiwa. Vakuru vanoziva kuti inga vatongi vo mu nguva jo Vaiziraeri, ivona ‘avatongi ngo zina ro vandhu, asi ngo zina ra Tenji Mwari.’—2 Kronike 19:6, 7.

15. Ngenyi tinodikana kuthemba ndhungamiriro ja Jehovha wari uno kupinda zvataiita kare?

¹⁵ Zvecivoneka kuti kupera ko nyika ino yakashata kwaaphedo, tinodikana kuthemba manera Jehovha anoita zviro wari kupinda zvataiita kare. Ngenyi? Ngokuti pa dambujiko guru tinozoashira ndhungamiriro jokuti tinozojivona inga jinonesa kuzwisisa no kujizwira. Zvokadi, Jehovha aazobhuyi na umwe nga umwe wedu. Inga zvaari kuita wari, iyena anozoshandisa vandhu vaakagaja kuti vatipe ndhungamiriro kumbejiyo. Pa nguva iyi, auzodikani kuva mukuvo wo kukana-kana ngo ndhungamiriro jatinonga tecipuwa, kangaije ngo kujivhunjisa kudari: ‘Kureva kuti ndhungamiriro iyi iri kuvhadi ka Jehovha kana zvivaringo zvatemwa ngo hama iji jiri wari kutungamirira?’ Munozothemba Jehovha no sangano rake pa nguva iyi inosisira? Mupinguro wo muvhunjo uwu unofira pa manera amuri kuzwira ndhungamiriro wari uno. Kudari munothemba ndhungamiriro jamuri kuashira wari uno, mokasika kujizwira, zvokadi munozokwanisavo kuzviita pa dambujiko guru.—Ruka 16:10.

16. Kuthemba kwedu Jehovha kungaejeswa kudini kumbejiyo?

¹⁶ Tinodikana kunasa kurangarira kuti tinozoitisa kudini Jehovha paanonga ecitonga nyika iyi yakashata. Wari uno kamare, itusu tinovetera  kuti vandhu vazinji vacikashandiri Jehovha, kubatanijavo no ukama hwedu vangazosana kumushandira mugumo ucito waguma. Asi pa hondo yo Armagedhoni, Jehovha na Jesu, ndivona vanozosana kuti ndiyani anozoponeswa. (Mateu 25:31-33; 2 Vatesaronika 1:7-9) Itusu atizosani kuti ndiyani anodikana kuashira unyasha hwa Jehovha no acikadikani. (Mateu 25:34, 41, 46) Tinozotenderana no matongero a Jehovha kana tinozoima kumushandira ngokuti tinonga ticikawirirani no zvaanonga aita? Zvakajeka kamare kuti tinodikana kuvangisa kuthemba kwedu Jehovha wari uno kuti tizokwanise kuzviita kumbejiyo.

17. Tinozobesereka kudini ngo kutonga ka Jehovha pa hondo yo Armagedhoni?

¹⁷ Makamborangarira kuti tinozojizwa kudini patinonga tiri mu nyika imbza tecivona muviyo wo kutonga ka Jehovha pa Armagedhoni. Zviyara zvokunyepa azvizowaniki, zvokutegeserana no zvomatongehwe o nyika zviri kutambujari maningi vandhu wari uno, zvinozopera. Kuhwaja, ukarahwa no kufa ko vadiwa vedu akuzowanikizve. Sathana no madhimoni ake vanozosungwa ko ciuru co makore. Zviro zvese zvakashata zvaakavoneka eciita azvizowanikizve. (Apokaripsi 20:2, 3) Tinozozwisisa kuti zvinosisira maningi kuthemba manera anoita Jehovha zviro.

18. Tingajijenyi ngo muezaniso wo Vaiziraeri, inga zvakatahwa pa bhuku ra Bziverengo 11:4-6 no 21:5?

¹⁸ Mu nyika imbza mungava no zvineso zvingazoeja kuthemba kwedu Jehovha mu njira yaanoita zviro? Inga muezaniso, amborangariranyi zvakaitika pa nguva shomani basi Vaiziraeri pavakasiya kuva varanda mu nyika yo Ejipita. Vamweni vakatanga kun’gun’guta ngokuti vainga avacisinazve zvokuha zvavainga nazvo ku Ejipita votanga kushora manaa avainga vecipuwa ndi Jehovha. (Verenganyi Bziverengo 11:4-6; 21:5.) Kureva kuti zvingazoitikavo kwatiri kutanga kun’gun’guta ngo pamusoro pa Jehovha pasure po hondo yo Armagedhoni? Atizivi kuti ibasa ro mushovonyi ratizova naro patinonga tecicenesa nyika no kuita kuti iyona ive paradhiso. Kangaije kunozova no basa rakakura maningi ratingadikana kuita. Cimwenizve, upenyu unozonesa maningi pa kutanga. Kureva kuti tinozon’gun’guta ngo zviro zvatinonga tecipuwa ndi Jehovha panguva yondhoyo? Cokwadi ciripo nga ici: Kudari tinodakara ngo zviro zvatinopuwa ndi Jehovha wari uno, zvinozotirerukiravo kudakara ngo zvaanozotipa kumbejiyo.

19. Ngozvapi zvatajija pa musoro uwu?

¹⁹ Pa musoro uwu, tavona kuti Jehovha anoita zviro ngo njira yaushoni. Tinodikana kukhohwa kuti ngaizvona zvaanoita. Tavonazve kuti tinodikana kuthemba vandhu vakagajwa ndi Jehovha kuti vatungamirire vandhu vake. Narini mucadokanganwa zvakananga Jehovha ecishandisa muporofita Isaya, paakati: ‘Simba renyu rinozovha pakuramba makagajana no kundithemba.’—Isaia 30:15, Sandujo yo Nyika Imbza, mu Cishona.