1-2. (1) Tiheeni enaweeriha ancipale olelo woona okhala woovila waaroromela yaale arino olamulelo? (2) Tiheeni nnahaalaahu othokororya mmwaha yoola?

 ACHU ancipale olelo annoona okhala woovila omuroromela muchu yoowo orino olamulelo vyakala. Awo annoona wi alamuleli ni malamulo wiiliwiili anaakhapelela achu ooreela ni oovuwa, nyenya hanaakhaviherya achu oohaawa. Piipiliya onnaloca mookwakwaleya: “Muchu mukina onamulamula mukhweiye amweerelaka yoonanara.” (Ekle. 8:9) Nave tho, ahooleli a malapelo akina annapaka ichu soonanara. Ela ennaweeriha achu akina oyeleela omuroromela Muluku. Mwawiihiiha vaavaa muchu oneemereryeiye omuhuserya Piipiliya ni hiyaano, nnaphwanela omukhaviherya omuroromela Yehova ni yaale Owo aathanlileiye veelaponi yavathi.

² Mweeparipari, tahi wi oohuserya a Piipiliya pahiru tanaphwanela omuroromela Yehova ni ororomela marehereryo awe. Naamwi nimurumeelaka Yehova mu iyaakha sincipale, hannaphwanela oyeleela nroromelo nawi mukhalelo Yehova onapakeiye ichu ilukuluku soothene ti waphaama. Ilukuluku ikina, sinanwerya okhumelela mikhalelo mikina seiho sinahaala weeha nroromelo nahu. Mmwaha yoola, nnahaala othokororya mikhalelo miraru seiho sinahaala weeha nroromelo nahu: (1) vaavaa nnaalakhanyaahu saweereya ikina sa Mpiipiliyani, (2) vaavaa nnaakhelaahu ohoolela onarweela mmareheryo a Yehova, ni (3) vaavaa nnahaalaahu ohoolela makacamiho omwaahiyu.

3. Ti mwawiihai saweereya ikina sa Mpiipiliyani sineehaaya omuroromela wahu Yehova?

 ³ Vaavaa nnaalakhanyaahu Masu a Muluku, nnanwerya otikhina ntakhara heeni Yehova ahaakhaliha achu akina mmukhalelo wammoori  ni mukhalelo owo aapankeiye soolakelela sammoori. Ntoko yootakiherya, mu liivuru a Namarepela, ninnaalakhanya wi Yehova aamuthorihela okhwa Muisarayeli mmoha nthowa na ococa ikhuuni nihiku na Sapata. Mu Samuwele anaawiili, ninnahuserya wi iyaakha sincipale ohoolo waya, Yehova aamukhurumuwela Mwene Tavite nthowa na opaka mararuwo ni wiipha. (Nam. 15:32, 35; 2 Sam. 12:9, 13) Nnanwerya wiikoha: ‘Ntakhara heeni Yehova aamukhurumuwela Tavite nthowa na wiipha ni opaka mararu nyenya aamuthorihela mulopwana mukina okhwa nthowa na echu yeeyo yooneya ntoko wi yoocheka ekhaani?’ Wi naakhule nikoho nenla, hankooni nthokororye mikhalelo miraru seiho nnaphwanelaahu wuupuwelaka vaavaa nnamwaalakhanyaahu Piipiliya.

4. Ti mwawiihai Maphatxuwelo 18:20, 21 ni Malamulo 10:17 enalipihaaya nroromelo nahu vooloca sa othoriha wa Yehova?

⁴ Tahi wi Piipiliya ilukuluku soothene onnavahererya sooleeliherya soothene. Ntoko yootakiherya, ninnasuwela wi Tavite aacharuwa mweeparipari wa saweera sawe. (Sal. 51:2-4) Hanka muchu yoowo aananarinhe nlamulo na Sapata aari a mukhalelo taani? Apwanne owo aahooniherya wi aathanana wa yeeyo aapankeiye? Apwanne owo aachekela malamulo a Yehova khalai? Apwanne owo haapwacha naari okhooca olopola yoowo waavahereryiwe? Piipiliya hanaloca. Nyenya, nnaphwanela ororomela ela: Yehova ‘ilukuluku soothene tawookololowa.’ (Malam. 32:4, BNM) Soolakelela sawe sinathipeleya mu sooleeliherya soothene—ohiya wa yeeyo achu akina analocaaya, ohooxa, naari echu ekina yeeyo eneeriha wi achu ekhaleno moonelo woohiphwanelela vooloca sa mwaha. (Mwaalakhanye Maphatxuwelo 18:20, 21; Malamulo 10:17.) Vaavaa nnahuseryaahu vancipale vooloca sa Yehova ni mathoriheryo awe, ninnaaceererya ororomela wahu othoriha wawe. Naamwi vaavaa nnamwaalakhanyaahu Piipiliya nave nikhalano makoho yaawo nihinaweryaahu ophwanya maakhulo hiihaano, ninnahuserya sincipale vooloca sa Muluku ahu wi chiryene owo ‘tawookololowa mu soothene oneereiye.’—Sal. 145:17.

5. Ti mwawiihai ohiphaameya wahu onavolowelaaya mukhalelo ahu wa wookololowa? (Moone tho ekaaxa “ Ohiphaameya Onnaakanyerya Moonelo Ahu wa Wookololowa.”)

⁵ Ilukuluku soothene hiyaano hannathoriha mmukhalelo woophwanelela woona wi naachu oohiphaameya. Muluku onipatunxe ni mavyakelo a wooniherya mikhalelo sawe, mwawiihiiha hiyaano ninnachuna owoona achu  ekhalihiwaka mwawookololowa. (Map. 1:26) Nyenya nthowa na ohiphaameya, nnanwerya othoriha moohiphwanelela, naamwi nsuwenle sooleeliherya soothene. Ntoko yootakiherya muupuwele mukhalelo Yona aahaasiveliweiye ni yoolakelela ya Yehova ya owooniherya ikharari achu o Ninevi. (Yona 3:10–4:1) Nyenya muupuwele yeeyo yeeren’ye nthowa nawi Yehova aawooniherya ikharari yaawo. Aninevi opwaha 120.000 yaawo yaacharunwe yaavuluxiwa! Wookuchulani, aari Yona yoowo aathorinhe achu moonanara, ohiya Yehova.

6. Ntakhara heeni Yehova hanaphwanela onitharihela soolakelela sawe?

⁶ Yehova hanaphwanela othariha wa achu mathowa oothene a soolakelela sawe. Eparipari wi, Yehova aahiweemererya akapuro awe akhalai oloca moonelo aya vooloca sa soolakelela owo aapankeiye ni mukhalelo owo aapankeiye. (Map. 18:25; Yona 4:2, 3) Nave ikwaha ikina, owo aanathariha soolakelela sawe. (Yona 4:10, 11) Nyenya, Yehova hanakhinyereryeya onleela mathowa a soolakelela sawe. Ntoko Mpatuxa ahu, owo hanaweherya wi neemererye moohipwacha ahaakumve naari amanle weerano echu.—Isa. 40:13, 14; 55:9.

7. Tiheeni enahaala okhala yoovila wa hiyaano, nave ntakhara heeni?

⁷ Hiyaano hannaphwanela okhwa minikwa wi ilukuluku soothene Yehova oneera yeeyo eri yaphaama. Nyenya, onanwerya okhala woovila wa hiyo waaroromela yaale aathanlileiye. Nnanwerya okhwa minikwa waakhanle wi chiryene yaale anahoolela mmarehereryo a Yehova aneerano mwawiiwanana ni ohoolela wa Yehova naari miruku saya. Ela akhweya ti yeeyo yeeren’ye ni achu yaawo yaakhala mu elukuluku ya khalai. Muthokororye sootakiherya seiyo silociwe mu  eparakrafo 3. Amusi a mulopwana yoole aananarinhe nlamulo na Sapata yaanwerya okhwa minikwa waakhanle wi chiryene Mose aaya omukoha Yehova ahaakumve oloca wi mulopwana owo aaphwanela okhwa. Nave nthamwene a Uriya Muheti, yoowo mwaariye aapanke mararuwo ni Tavite, akhweya aanwerya wuupuwela wi Tavite aapharihela owerya wawe ntoko mwene wi asepe wiiphiwa. Yehova onnaaroromela yaale aathanlileiye wi ehooleleke mareheryo awe ni mmulokoni. Mwawiihiiha, wakhala hannaaroromela alopwana yaala, hiyaano hiniwerya oloca wi ninnamuroromela Yehova.

8. Olikanela taani orivovo variyari va yeeyo etharihiwe mu Saweriwa T’arummwa 16:4, 5 ni mukhalelo muloko Weekristu onalapaaya olelo?

⁸ Olelo Yehova onnahoolela marehereryo awe veelaponi ya vathi moorweela wa “namuteko oororomeleya ni a miruku.” (Mat. 24:45) Ntoko nikhuuru noolamulela na mu nsana noopacerya, namuteko yoola onnaavareryela achu a Muluku orukurerya elapo yoothene nave onnavahererya ohoolela wa atokweene a mmulokoni. (Mwaalakhanye Saweriwa T’arummwa 16:4, 5.) Ntoko namuteko yoola, atokweene a mmulokoni, annavahererya ohoolela mmilokoni. Hiyaano ninnooniherya wi ninnaroromela mukhalelo Yehova oneereiyeno ichu moorweela wa wiiwelela ohoolela yoowo nnaakhelaahu orweela mmarehereryo ni wa atokweene.

9. Ti liini onahaalaaya okhala woovila okhaviherya soolakelela seiho atokweene anapakaaya, nave ntakhara heeni?

⁹ Ikwaha ikina, onanwerya okhala woovila wa hiyo okhaviherya soolakelela seiho atokweene anapakaaya. Ntoko yootakiherya, mu iyaakha sa hiihaanoru miloko mincipale ni ikulucu soorehereryiwa wanaawiili. Mmikhalelo mikina, atokweene yaahaaveka alaleeryi wi yathukumaneke mmuloko woohiyana ni yoolakelela yawi Empa ya Omwene esareiweke. Waakhanle wi noovekiwa wi n’ye mmuloko muvyaani, waahaala okhala woovila waahiya asinthamwene ni amusi. Apwanne atokweene annaakhela ohoolela woomuluku wi emuleele mulaleeryi ti mulaleeryi muloko yoowo onahaaleiye oyawo? Hooye. Nave mmukhalelo  yoola onanwerya okhala woovila wa hiyo ochariha ohoolela yoowo naakhenlaahu. Nyenya Yehova onnaaroromela atokweene wi epakeke soolakelela nave hiyaanotho nnaphwanela waaroromela yaawo. *

10. Mwawiiwanana ni Ahebri 13:17, ntakhara heeni ninnaphwanela waakhaviherya atokweene?

¹⁰ Ntakhara heeni ninnaphwanela okhaviherya soolakelela sa atokweene naamwi sihiri seiho naachunaahu? Nthowa nawi weerano hiiha, enahaala okhaviherya okhapelela murecele variyari va achu a Muluku. (Éfe. 4:2, 3) Miloko sinnalipa vaavaa oothene mwawiiyeviha aniiwelelaaya soolakelela seiho sinapakiwa ni nikhuuru na atokweene. (Mwaalakhanye Ahebri 13:17.) Opwaha soothene, ninnamooniherya Yehova wi ninnamuroromela moorweela wa waakhaviherya yaawo onaaroromeleiye wi enikhapelele.—Saw. 20:28.

11. Tiheeni enahaala onikhaviherya olipiha ororomela wahu yoowo nnaakhelaahu orweela wa atokweene a mmulokoni?

¹¹ Nnawerya olipiha ororomela wahu ohoolela yoowo nnaakhelaaahu orweela wa atokweene moorweela wa wuupuwelela wi awo annavekela evekaka munepa waweela vaavaa anathokororyaaya miyaha sa mmulokoni. Awo tho moopwacha annathokororya malakiheryo a Mpiipiliyani nave annaavya ohoolela onarweela mmarehereryo a Yehova. Awo anachuna wi emuhakalalihe Yehova ni ovahererya okhapelela woophwanelela wa achu awe wakhala wooweryeya. Alopwana yaala oororomeleya aasuwela wi Muluku onnapwacha vancipale mukhalelo awo anaathokororyaaya achu awe. (1 Ped. 5:2, 3) Muupuwele ela: Elapo eri yookawanyeya orweela wa mahimo, malapelo ni ipoliitika, nyenya achu a Yehova ari awiiwanana emulapelaka Muluku mmoharu eeparipari. Ela enneereya pahiru nthowa nawi Yehova onnakhaviherya marehereryo awe!

12. Tiheeni atokweene a mmulokoni anaphwanelaaya wuupuwela moopwacha vaavaa analakelelaaya osuwela waakhanle wi muchu oocharuwa mweeparipari?

¹² Yehova ohaavaha atokweene a mmulokoni murici woochuneyaxa wi muloko otitelele okhala waweela. Wakhala wi Mukristu oopaka yoocheka etokweene, Yehova onaweherya wi atokweene alakelele waakhanle wi muchu owo onahaala otitelela opaka makupa mmulokoni. Opwaha soothene, awo anaphwanela osuwela waakhanle wi muchu oocharuwa mweeparipari wa yeeyo eenreiye. Owo akhweya onanwerya oloca wi oocharuwa, nyenya apwanne owo mweeparipari onniica yeeyo opankeiye? Apwanne owo ori oolakelela ohipaka yoocheka emohamoha? Waakhanle wi onthamwene woonanara onnamweeriha opaka yoocheka, apwanne ori oolakelela okwatelela onthamwene yoowo? Atokweene annavekela wa Yehova, annathokororya ichu soothene sinavolowelavo ni yeeyo Piipiliya onaloceiye, nave annaalikhela mukhalelo namacheka oniisooneiye vooloca sa yeeyo opankeiye. Voocharela awo annalakelela waakhanle wi namacheka onanwerya otitelela okhala mmulokoni. Ikwaha ikina owo onanwerya wiikariwa mmulokoni.—1 Kor. 5:11-13.

13. Moonelo taani nnaphwanelaahu okhalano vaavaa nthamwene ahu naari mmusi oniikariweiye mmulokoni?

¹³ Ti mwawiihai waaroromela wahu atokweene oneeraaya weehiwe? Wakhala wi muchu yoowo iikariwe mmulokoni tahi nthamwene ahu awaacameleya naari mmusi, nnanwerya weemererya yoolakelela ya atokweene. Nyenya onamukhala woovila wakhala muchu yoowo iikariwe mmulokoni nthamwene ahu awaacameleya. Akhweya nnanwerya okhwa minikwa waakhanle wi atokweene aathokororya ichu soothene inavolowelavo, naari waakhanle wi awo aathoriha mwaha mmukhalelo Yehova aahaaleiye othoriha. Tiheeni enahaala onikhaviherya okhalano moonelo woophwanelela vooloca sa yoolakelela yeela?

14. Tiheeni enahaala onikhaviherya wakhala wi atokweene aalakelela wi mmoha a asinthamwene naari amusi ahu onaphwanela wiikariwa mmulokoni?

 ¹⁴ Ti waphaama wuupuwela wi wiikariwa mmulokoni marehereryo a Yehova nave annaruuha mphurelo mmulokoni ni wa namacheka. Wakhala wi namacheka yoowo ohicharunwe onneemereryiwa opaka makupa mmuloko, owo onanwerya oweeriha akina opaka yoocheka. (Gal. 5:9) Ohiya yeeyo, owo onanwerya ohisuwela mukhalelo yoocheka awe ekhanlaaya etokweene, ni ohoona mathowa a otoroka muupuwelo awe ni saweera sawe seiho sinahaala weeriha weemereriwa ni Yehova wanaawiili. (Ekle. 8:11) Nnaphwanela ororomela wi vaavaa enapakiwaaya yoolakelela waakhanle wi muchu onnaphwanela wiikariwa mmulokoni, atokweene annapharihela murici aya moophwanelela. Awo annasuwela wi hiihaa ntoko athoriha a mmahiku a Aisarayeli, awo ‘hanathoriha mwa achu nto mwa Apwiya.’—2 Math. 19:6, 7.

15. Ntakhara heeni ninnaphwanela ororomela ohoolela wa Yehova hiihaano opwaha khalai?

¹⁵ Vaavaa mukhalelo ola wa ichu onaacamelaaya omakuchuwelo, nnaphwanela ororomela mukhalelo Yehova onapakeiye ichu opwaha khalai. Ntakhara heeni? Variyari va yoohooxa etokotoko, hiyaano nnanwerya waakhela ohoolela yoowo nnahaalaahu woonaka ohikhala wamphurelo, woohiphariheleya muteko naari woovila ochariha. Mweeparipari, Yehova harwa aloca ni hiyaano aneene mukhatiihu. Owo onahaala ovahererya ohoolela orweela wa achu yaawo aathanlileiye. Ela herwa ekhala elukuluku ya okhwa minikwa ohoolela naari wiikoha, ‘Ola ohoolela onarweela wa Yehova, naari moonelo wa anna yaawo anahoolela?’ Apwanne nyuwaano munahaala omuroromela Yehova ni marehereryo awe variyari va elukuluku yeeyo yoochuneya? Mukhalelo munoonaanyu vooloca sa ohoolela onarweela wa yaawo anamweemelela Muluku hiihaano onahaala wookhaviheryaani osuwela naakhulo na nikoho nenla. Waakhanle wi munnaroromela ohoolela yoowo nnaakhelaahu olelo ni okhala ooreheryeya wiiwelela, ti yawooneya wi munahaala weerano emohamoha variyari va yoohooxa etokotoko.—Luka 16:10.

16. Ti mwawiihai ororomela wahu othoriha wa Yehova onahaalaaya weehiwa omwaahiyu?

¹⁶ Nnaphwanela tho wuupuwela mwawiiseela vooloca sa mukhalelo nnahaalaahu woona mathorihelo a Yehova omakuchuwelo wa elapo yeela yoonanara. Hiihaano, ninnawehererya wi ancipale yaawo ahinamurumeela Yehova, ophitaanyerya amusi ahu yaawo ahiri Anamoona a Yehova, anahaala olakelela omurumeela yoowo makuchuwelo ehaakumve ophiya. Nyenya mu Armaketo, Yehova, moorweela wa Yesu, anahaala opaka yoolakelela yookuchula vooloca sa omwaahiyu aya. (Mat. 25:31-33; 2 Tes. 1:7-9) Tahi hiyaano nnahaala olakelela taani onahaala waakhela ikharari sa Yehova naari taani ohinahaala waakhela. (Mat. 25:34, 41, 46) Apwanne munahaala ororomela  othoriha wa Yehova naari munahaala ohiya omurumeela Yehova nthowa nawi hamuneemererya yoolakelela awe? Mweeparipari, nnaphwanela olipiha nroromelo nahu mwa Yehova hiihaano nave neerano hiihaa nnahaala omuroromela yoowo moomalela omwaahiyu.

17. Ti mwawiihai nnahaalaahu ophura orweela wa othoriha wa Yehova omakuchuwelo wa mukhalelo yoola wa ichu?

¹⁷ Mwaanyiherye mukhalelo munahaalaanyu wiisoona mu elapo evyaani ya Muluku vaavaa munahaalaanyu woona sookhumelela sa othoriha wa Yehova. Malapelo oowoka herwa tho ekhalavo, nave alipa a nakoso ni alamuleli oohaakhwaneliwa yaawo anaahooxa ni waahasula achu herwa tho ekhalavo. Wiiceliwa, wuuluvala ni okhwa wa achu yaawo nnaasivelaahu, hirwa tho ipaka makupa a okumi ahu wa nihiku ti nihiku. Satana ni masololo anahaala owaleliwa mu iyaakha 1.000. Ichu soothene soonanara ineereya nthowa na omwareya wa Satana ni masololo hirwa tho ikhalavo. (Wup. 20:2, 3) Hiyaano nnahaala othamalela vancipale nthowa na ororomela mukhalelo Yehova oneereiye ichu!

18. Mahusiheryo taani nnahuseryaahu orweela wa yootakiherya ya Aisarayeli ntoko enalociwaaya mu Namarepela 11:4-6 ni 21:5?

¹⁸ Apwanne mu elapo evyaani ya Muluku anahaala okhalamo makacamiho makina yaawo anahaala weeha ororomela wahu mukhalelo Yehova onapakeiye ichu? Ntoko yootakiherya, muthokororye yeeyo yeeren’ye elukuluku vakhaani Aisarayeli emanle otaphuliwa wookapuroni o Yikuputu. Akina yaapacerya oceenya nthowa na okhalano munkhela wa yoolya yeeyo yaalyaaya weiwo, nave awo yaanoona mana, yoolya yeeyo Yehova aavanheiye okhala yoohiphwanelela. (Mwaalakhanye Namarepela 11:4-6; 21:5.) Apwanne hiyaano nnahaala okhalano muupuwelo mmohamoha emanle ovira yoohooxa etokotoko? Hiyaano hannasuwela waaca wa muteko yoowo nnahaalaahu okhalano wi nrehererye elapo nave vakhaani-vakhaani weeriha eyo okhala parataiso. Ti yawooneya wi onahaala okhalavo muteko muncipale nave akhweya woopaceryani okumi onahaala okhala woovila. Apwanne nnahaala oceenya vooloca sa yeeyo Yehova onahaaleiye ovahereryaka mu elukuluku yeeyo? Nyenya echu emoha ti yeeparipari: Waakhanle wi ninnathamalela soovaha sa Yehova hiihaano, nnahaala weerano tho emohamoha muhoolo.

19. Ti mwawiihai mwaahaalaanyu opaka mukwasu wa iponto soochuneya sa mwaha yoola?

¹⁹ Mukhalelo Yehova oneereiye ichu ilukuluku soothene ti waphaama. Nnaphwanela olekecheya ni yeela. Nnaphwanela tho waaroromela yaale Yehova aavanheiye murici wa onihoolela. Nihirwe ncuwale masu yaawo Yehova aalonceiye orweela wa mulipa a miririmu awe Isaiya: “Ikuru sanyu inii ikhale moorweela wa otitelela omaaleleya ni okhalano nroromelo.”—Isa. 30:15, TNM.