1-2. (a) Kubayini abantu abanengi namhlanjesi bakufumana kubudisi ukuthemba labo abasemagunyeni? (b) Sizokucoca ngani esihlokwenesi?

 NAMHLANJESI abanengi bakufumana kubudisi ukuthemba labo abasemagunyeni. Babone ukuthi urhulumende nezomthetho uvikela labo abanjingileko nabanamandla kodwana awubasizi abantu abatlhagako. IBhayibheli libetha poro ehloko nalithi: “Lapha umuntu aba negunya khona phezu komunye umuntu ngokwenza okumbi.” (UMtj. 8:9) Ukungezelela kilokho, abanye abadosi phambili bezekolo benza izinto ezingakalungi, lokhu kubangele abanye abantu bangasamthembi uZimu. Yeke nakunomuntu esimfundela iBhayibheli, siqalana nesitjhijilo sokumsiza bona athembe uJehova nalabo abadosa phambili ehlanganwenakhe.

² Kuliqiniso, akusibabantu esifunda nabo iBhayibheli kwaphela abatlhoga ukuthemba uJehova nehlanganwakhe. Ngitjho nanyana sesilotjhe uJehova iminyaka eminengi, kufuze singaphelelwa lithemba lokuthi indlelakhe yokwenza izinto ihlala iphuma phambili. Ngezinye iinkhathi, kuvela ubujamo obungalinga ukuthembela kwethu kuJehova. Esihlokwenesi, sizokucoca ngeengcenye ezintathu lapho ukuthembela kwethu kuJehova kungalingwa khona: (1) nasifunda iindaba ezithileko eziseBhayibhelini, (2) nasifumana isinqophiso esivela ehlanganweni kaJehova begodu (3) nasiqalana neentjhijilo esikhathini esizako.

3. Okhunye esikufunda eBhayibhelini kungakulinga njani ukuthemba kwethu uJehova?

 ³ Nasifunda iliZwi lakaZimu, singaba nemibuzo ngendlela uJehova asebenzelana ngayo nabanye abantu nangeenqunto azithathako. Ngokwesibonelo, encwadini kaNumeri sifunda bona uJehova wakhuphela enye indoda yakwa-Israyeli isigwebo sokufa ngokuthi beyitheza iinkuni ngeSabatha. Encwadini yesibili kaSamyela sifunda bona emakhulwini weminyaka eyalandelako uJehova walibalela iKosi uDavida ngokuziphatha kumbi ngokwamabhayi nangokubulala. (Num. 15:32, 35; 2 Sam. 12:9, 13) Singazibuza, ‘Kubayini uJehova alibalela uDavida ngokubulala nangokuziphatha kumbi ngokwamabhayi kodwana wagwebela enye indoda ukufa ngesono ebesibonakala singasi simbi kangako?’ Bona siphendule umbuzo lo, cabanga ngezinto ezintathu ekufuze sizikhumbule nasifunda iBhayibheli.

4. UGenesisi 18:20, 21; noDuteronomi 10:17 ukuqinisa njani ukuthemba kwethu izahlulelo zakaJehova?

⁴ IBhayibheli alihlali lisinikela yoke imininingwana ngendaba ethileko. Ngokwesibonelo, siyazi bona uDavida bekaphenduke kwamambala esonweni sakhe. (Rhu. 51:2-4) Beyimumuntu onjani indoda eyaphula umthetho weSabatha? Kghani yazisola ngalokho eyakwenzako? Kghani yakhe yaphula umthetho kaJehova esikhathini esadlulako? Kghani yakhe yaziphayela eqadi ezinye iinyeleliso esikhathini esadlulako? IBhayibheli alitjho. Nanyana kunjalo singaqiniseka ngalokhu, kuJehova “akukho ukungabi nabulungiswa.” (Dut. 32:4) Usekela iinqunto zakhe entweni eliqiniso ingasi entweni ayizwa ngabanye, ibandlululo namkha enye nenye into eyenza abantu bangahluleli kuhle. (Funda uGenesisi 18:20, 21; Duteronomi 10:17.) Nasilokhu sifunda ngoJehova neenkambiso zakhe sizokukhulisa ukuthemba kwethu izahlulelo zakhe. Ngitjho nanyana nasifunda iBhayibheli siba nemibuzo esingakghoni ukuyiphendula nje, siyaqiniseka bona uZimu “ulungile eendleleni zakhe zoke.”—Rhu. 145:17.

5. Ukuba nesono kwethu kuba nomthelela ongangani endleleni esahlulela ngayo? (Qala ibhoksi elithi, “ Isono Sidlala Indima Ethileko Endleleni Esiqala Ngayo Izinto.”)

⁵ Ngezinye iinkhathi asikghoni ukwahlulela kuhle ngebanga lesono. UZimu wasenza ngomfanekiswakhe, kungebangelo sifuna ukubona abantu baphathwa kuhle. (Gen. 1:26) Nanyana kunjalo, ngebanga  lokuba nesono singahlulela ngokungakalungi, ngitjho nanyana sicabanga bona sinabo boke ubufakazi. Ngokwesibonelo, khumbula bona uJona wasilingeka kangangani lokha uJehova nakaba nomusa ebantwini beNiniva. (Jona 3:10–4:1) Nanyana kunjalo, cabanga ngemiphumela eyaba khona. Kwasindiswa ukuphila kwabantu beNiniva abaphendukako abama-120 000! Ekugqineni, bekunguJona ingasi uJehova ebekufuze alungiswe.

6. Kubayini kungakafuzi uJehova angasihlathululeli iinqunto azenzako?

⁶ UJehova akasikolodi ihlathululo emalungana neenqunto azenzako. Kuliqiniso, uJehova bekabavumela abantu bakhe bona baveze indlela abazizwa ngayo ngeenqunto azenzako nalezo afuna ukuzenza. (Gen. 18:25; Jona 4:2, 3) Eenkhathini ezinengi, bekazihlathulula iinqunto zakhe. (Jona 4:10, 11) Nanyana kunjalo, uJehova akutlhogeki asihlathululele iinqunto afuna ukuzenza. NjengoMdalethu, akayitlhogi imvumo yethu ngaphambi kobana athathe isiqunto esithileko nangemva kwaso.—Isa. 40:13, 14; 55:9.

7. Ngisiphi isitjhijilo esingaqalana naso begodu kubayini?

⁷ Asizazi ngehliziyo yoke bona uJehova uhlala enza okulungileko. Nanyana kunjalo, isitjhijilo esingaqalana naso, kungaba kuthemba labo abadosa phambili ehlanganwenakhe. Singazibuza ukuthi kghani labo abadosa phambili ehlanganweni kaJehova balandela isinqophiso sakaJehova namkha sabo. Kungenzeka ngilokho abanye eenkhathini zeBhayibheli ebebakucabanga. Cabanga ngeembonelo esikhulume ngazo  esigabeni 3. Isihlobo sendoda eyaphula umthetho weSabatha kungenzeka sazibuza bona kghani uMosi umbuzile uJehova na ngaphambi kokuthi akhiphe isigwebo sokufa. Umngani ka-Uriya umHite, umkakhe owaziphatha kumbi ngokwamabhayi noDavida, bekangaphetha ngokuthi uDavida usebenzise isikhundla sakhe njengekosi bona abalekele isahlulelo esimfaneleko. Iqiniso elingenakuphikiswa ngelithi angekhe sathi siyamthemba uJehova nangabe asibathembi labo abadosa phambili ehlanganwenakhe, labo uJehova abathembako.

8. Ngikuphi ukufana okukhona phakathi kwalokho okutlolwe ku-IzEnzo 16:4, 5 nendleleni amabandla wobuKrestu enza ngayo namhlanjesi?

⁸ Namhlanjesi uJehova unqophisa ihlanganwakhe yephasini ngokusebenzisa “inceku ethembekileko nehlakaniphileko.” (Mat. 24:45) Njengesihlopha esibusako sangekhulu lokuthoma, inceku le inqophisa abantu bakaZimu ephasini loke begodu inikela abadala bebandla isinqophiso. (Funda IzEnzo 16:4, 5.) Abadala bayaqinisekisa bona isinqophisweso siyalandelwa emabandleni. Sitjengisa bona siyayithemba indlela kaJehova yokwenza izinto ngokulalela isinqophiso esisifumana ehlanganweni nebadaleni.

9. Kunini lapho singakufumana kubudisi khona ukusekela isiqunto esenziwe badala begodu kubayini?

⁹ Ngasikhathi, singakufumana kusitjhijilo ukusekela iinqunto ezenziwe badala. Ngokwesibonelo, eminyakeni edlulileko amabandla amanengi neengodi kwahlelwa kabutjha. Kobunye ubujamo, abadala babawe abarhuweleli bona bafudukele kwelinye ibandla ngomnqopho wokobana kusetjenziswe kuhle amaWolo womBuso. Nange basibawa bona siye ebandleni elitjha, singakufumana kubudisi ukutjhiya abangani nemindenethu. Kghani abadala bafumana isinqophiso saphezulu sokobana  kufuze bamfake kuphi omunye nomunye umrhuweleli? Awa. Lokho kungenza kube sitjhijilo kithi ukulandela isinqophiso esisifumanako. UJehova uyabathemba abadala bona benze iinqunto ezinjengalezo, nathi kufuze sibathembe. *

10. Ngokuvumelana namaHebheru 13:17, kubayini kufuze sibambisane nabadala?

¹⁰ Kubayini kufuze sibambisane nabadala begodu sisekele iinqunto zabo ngitjho nanyana kungasingilezo esingazikhetha? Ngokwenza njalo, sisiza bona kube nokuthula phakathi kwabantu bakaZimu. (Efe. 4:2, 3) Amabandla ayaphumelela lokha boke ebandleni nabasekela ngokuzithoba iinqunto ezenziwe sihlopha sabadala. (Funda amaHebheru 13:17.) Okuqakatheke khulu, sitjengisa uJehova bona siyamthemba ngokubambisana nalabo abathembako bona basitlhogomele.—IzE. 20:28.

11. Khuyini okungasisiza siqinise ukuthemba kwethu isinqophiso esisifumana kubadala?

¹¹ Singaqinisa ukuthemba kwethu isinqophiso esisifumana kubadala ngokukhumbula bona bathandazela ummoya ocwengileko lokha nabakhuluma ngeendaba ezithinta ibandla. Babuye godu bahlolisise iinkambisolawulo ezivela eBhayibhelini neenqophiso ezivela ehlanganweni kaJehova. Abakufisa khulu kuthabisa uJehova nokwenza koke abangakwenza bona batlhogomele abantu bakhe. Amadoda athembekileko la ayazi bona azoziphendulela kuZimu ngendlela aphetha ngayo izabelo zawo. (1 Pit. 5:2, 3) Cabanga nganakhu: Ephasini elihlukaniswe buhlanga, yikolo nezepolotiki abantu bakaJehova balotjha uZimu munye weqiniso ndawonye ngokuthula. Lokhu kwenzeka kwaphela ngebanga lokuthi uJehova ubusisa ihlanganwakhe!

12. Ngikuphi abadala ekufuze bacabangisise ngakho kuhle nabahlolisisa ukuthi umuntu utjhugulukile namkha awa?

¹² UJehova unikeze abadala umthwalo obudisi wokutlhogomela ibandla bona lihlale lihlwengekile. Nangabe umKrestu wenze isono esimbi khulu, uJehova ulindele abadala bona baqunte ukuthi umuntu loyo angahlala na ebandleni namkha awa. Kezinye izinto ekufuze bazifumane, kukuthi umuntu loyo uzisola kwamambala na ngalokho akwenzileko. Angatjho bona utjhugulukile kodwana ukuhloya kwamambala na lokho akwenzileko? Kghani uzimisele ukungabuyeleli isonweso? Nangabe abangani abambi babe nomthelela ekutheni enze isono, kghani uzimisele ukulahla abangani bakhe labo? Abadala bathandaza kuJehova baqale amaqiniso wendaba nalokho okutjhiwo liBhayibheli begodu bahlolisise nokuthi umuntu owenze isono uzizwa njani ngalokho akwenzileko. Ngemva kwalokho, bayaqunta bona umenzi wobumbi angahlala ebandleni namkha awa. Kobunye ubujamo kufuze asuswe ekuhlanganyeleni.—1 Kor. 5:11-13.

13. Khuyini engasitshwenya nangabe umngani namkha isihlobo sisusiwe?

¹³ Ukuthemba kwethu abadala kungalingwa njani? Kungaba bulula ukwamukela isiqunto esithethwe badala nangabe umuntu osusiweko akasimngani esitjhidelene naye namkha isihlobo sethu. Kuthiwani-ke nangabe umuntu osusiweko mnganethu. Singatshwenyeka ngokuthi kghani abadala baqale boke ubufakazi, namkha singazibuza bona bahlulele ngendlela uJehova ebekangahlulela ngayo. Khuyini engasisiza sihlale sinombono omuhle ngesiqunto esithethweko?

14. Khuyini engasisiza samukele isiqunto abadala abasenzileko sokususa umnganethu namkha isihlobo sethu?

 ¹⁴ Kufuze sikhumbule ukuthi ukususwa ebandleni kulilungiselelo lakaJehova begodu kuzuzisa ibandla nesoni. Nangabe isoni esingatjhugulukiko asisuswa ebandleni, lokho kungaba nomthelela omumbi kwabanye. (Gal. 5:9) Ngaphezu kwalokho, kungenzeka angabuboni ubumbi besono asenzileko begodu angaliboni ibanga lokutjhugulula indlela acabanga ngayo nezenzo zakhe bona amukelwe nguJehova godu. (UMtj. 8:11) Singaqiniseka ukuthi abadala bawuthatha njengoqakathekileko umsebenzabo wokuqunta ukuthi umuntu kufuze asuswe namkha awa. Bayatjheja ukuthi njengabahluleli bakade bakwa-Israyeli ‘abagwebeli abantu kodwana bagwebela uJehova.’—2 Kron. 19:6, 7.

15. Kubayini kutlhogeka sithembe isinqophiso sakaJehova nje kunanini ngaphambilini?

¹⁵ Njengombana isiphelo sitjhidela nje, kutlhogeka siyithembe khudlwana indlela kaJehova yokwenza izinto kunangaphambilini. Kubayini kunjalo? Ngesizi elikhulu, kungenzeka sifumane iinqophiso ezizokubonakala zibudisi ukuzizwisisa namkha ukuzisebenzisa. Kuliqiniso, uJehova angeze akhulume nathi ngokunqophileko. Kungenzeka asinikele isinqophiso asebenzisa abajameli bakhe. Leso kuzobe kungasiso isikhathi sokuzaza isinqophiso namkha sokuzibuza ukuthi, ‘Kghani isinqophiswesi sivela kuJehova namkha mbono wabafowethu abadosa phambili?’ Kghani uzokuthemba uJehova nehlanganwakhe ngesikhatheso? Indlela othatha ngayo iinqophiso ezivela ebajamelini bakaZimu nje ingakusiza uphendule umbuzo lo. Nawuthemba isinqophiso esisifumanako namhlanjesi bewusilalele kuzokuba bulula ukuthi ngesizi elikhulu wenze okufanako.—Luk. 16:10.

16. Ukuthemba kwethu izahlulelo zakaJehova kungalingwa njani esikhathini esizako?

¹⁶ Kufuze sicabangisise kuhle nangokuthi sizozithatha njani izahlulelo zakaJehova lokha nakaqeda iphasi elimbeli. Sithemba ukuthi abanengi abangamlotjhiko uJehova kuhlanganise nemndenethu bazokuqunta ukumlotjha ngaphambi kokuthi kufike isiphelo. Nge-Arimagedoni uJehova asebenzisa uJesu uzokwenza isiqunto samaswaphela malungana nekusasa labo. (Mat. 25:31-33; 2 Thes. 1:7-9) Angeze siziquntele thina bona ngubani ozokufumana umusa kaZimu nongekhe awufumane. (Mat. 25:34, 41, 46) Kghani sizozithemba izahlulelo zakaJehova namkha sizokulisa  ukumlotjha ngebanga lokuthi asivumelani neenqunto zakhe? Kuhlekuhle kufuze siqinise ukuthembela kwethu kuJehova nje khona sizokwazi ukumthemba ngokupheleleko esikhathini esizako.

17. Sizokuzuza njani ezahlulelweni zakaJehova nakufika isiphelo?

¹⁷ Akhe ucabange bona sizozizwa njani ephasini elitjha lakaZimu lokha nasibona imiphumela yezahlulelo zakaJehova. Ikolo yamala izabe ingasekho, kunye nezerhwebo ezimarhamaru naborhulumende ebebagandelela abantu babatlhagisa iminyaka eminengi. Ukugula, ukuluphala nokuhlongakalelwa babantu esibathandako angekhe kusaba zizinto ezisitshwenyako. USathana namadimoni bazokubotjhwa iminyaka eyikulungwana. Iimphumela yokuvukela kwabo izobe ingasekho. (IsAm. 20:2, 3) Kuzosithabisa khulu ngesikhatheso ukuthi sikhethe ukuthemba indlela kaJehova yokwenza izinto!

18. Ngiziphi iimfundo esizifunda esibonelweni sama-Israyeli esitlolwe kuNumeri 11:4-6 no- 21:5?

¹⁸ Kghani ukuphila ephasini elitjha lakaZimu kungaletha iintjhijilo ezizokulinga ukuthemba kwethu indlela kaJehova yokwenza izinto? Ngokwesibonelo, cabanga ukuthi kwenzekani msinyana ngemva kokobana ama-Israyeli atjhatjululwe ekugqilazweni eGibhide. Abanye bathoma ukunghonghoyila ngebanga lokuthi bakhumbule ukudla ebebakuthabela eGibhide bebanyaza nelungiselelo lakaJehova lokubatlhogomela ngemana. (Funda uNumeri 11:4-6; 21:5.) Kghani nathi singaba nomkhumbulo ofanako ngemva kokuthi kuphele isizi elikhulu? Asazi ukuthi uzoba ngangani umsebenzi wokuhlwengisa umonakalo owenziwe ephasini nokwenza iphasi libe yipharadesi. Kungenzeka kube nomsebenzi omnengi ekufuze siwenze nokuthi ipilo ingabi bulula ekuthomeni. Kghani singathoma singhonghoyile ngalokho uJehova azabe asenzela khona ngesikhatheso? Nangabe siyawathabela amalungiselelo kaJehova nje, sizowathabela nangesikhatheso.

19. Ungawarhunyeza njani amaphuzu ayihloko wesihlokwesi?

¹⁹ Indlela kaJehova yokwenza izinto ihlala ilungile. Kufuze siqiniseke ngalokho. Kufuze sithembe nalabo uJehova abathembako ukuthi bazozidlulisela kuhle iinqophiso zakhe. Singawakhohlwa amezwi kaJehova awakhuluma ngomphorofidi u-Isaya athi: “Amandlenu azakuba sekuzithobeni nethembeni.”—Isa. 30:15