1-2. (a) Ndaŵa yanji masiku wano ŵanthu anyinji ovutika kukhulupilila ŵala ali na udindo? (b) Kansi mu nkhani ino tikambilane chinji?

 MASIKU ŵano ŵanthu anyinji ovutika kukhulupilila ŵala ali na udindo. Ove owona kuti maboma komasoti malamulo oteteza tyala ŵanthu olemela komasoti audindo, koma ŵanthu osauka oŵachitilalini chilungamo. Baibolo yunena kuti: “Munthu otamanisha munthu muyake pomutonga.” (Mla 8:9) Kuyangijila pali vamene ivi, asogoleli ayakine a vipembezo ochita vinthu viipa, vamene vachitisha ŵanthu ayakine kuti osati akokhulupilila Mulungu. Tetyo, keno tayamba kuphunzila Baibolo na munthu aliyense tufunika kumuyavya kuti aphunzile kukhulupilila Yehova pamozi na ŵala ŵechisankha kuti akosogolela gulu yake.

² Kulaŵila chendi, ni ophunzilalini Baibolo ŵeka amene ofunika kukhulupilila Yehova komasoti gulu yake. Olo kuti tatumikila Yehova kwa vyaka vinyinji tyani, tufunikalini olo patontho kuluza chikhulupililo chasu chakuti njila zakuchitilamo vinthu Yehova zunkhala zolungama nthawe zonse. Nthawe ziyakine, pangachitike vinthu viyakine vamene vingayese chikhulupililo chasu mwa Yehova. Mu nkhani ino, tikambilane vochitika vitatu vamene vingayese chikhulupililo chasu mwa Yehova: (1) keno tuŵelenga nkhani ziyakine za m’Baibolo, (2) keno talondela malangizo kufumila ku gulu ya Yehova, komasoti (3) tikazakumana na mavuto kusogolo.

3. Kansi nkhani ziyakine za m’Baibolo zingayese tyani chikhulupililo chasu mwa Yehova?

 ³ Tikoŵelenga Mawu a Mulungu, payakine tingankhale na makonsho okhuza mwechichitila vinthu Yehova na ŵanthu ayakine komasoti okhuza vosankha viyakine vechipanga. Mwachisanzo, m’buku ya Numeri, tuŵelenga kuti Yehova elamula kuti mu Isiraeli muyakine apaiwe chifukwa chotolela nkhuni pa nsiku ya Sondo. M’buku ya 2 Samueli, tuŵelenga kuti m’vyaka vakuvuli Yehova ekhululukila Mfumu Davide chifukwa chochita chigololo komasoti chifukwa cha mulandu wopaya munthu. (Num. 15:32, 35; 2 Sam. 12:9, 13) Payakine tingolikonsha kuti, ‘Ndaŵa yanji Yehova ekhululukila Davide chifukwa cha mulandu wopaya munthu komasoti chifukwa chochita chigololo pamene mwanalume muyakine epaiwa chifukwa chochita machimo atontho-atontho?’ Kuti tiyankhe konsho yamene iyi, tiyeni tikambilane mfundo zitatu zatufunika kukumbukila keno tuŵelenga Baibolo.

4. Kansi lemba ya Genesis 18:20, 21 na Deuteronomo 10:17 yutang’isha tyani chikhulupililo chasu pa mwakuchitila vinthu Yehova?

⁴ Baibolo ni nthawe zonselini payufotokoza nkhani yonse. Mwachisanzo, tuziŵa kuti Davide elapa kufumila pansi pa ntima pa vochita vake. (Sal. 51:2-4) Koma kansi wala munthu efwaya lamulo mwa kuyatolela nkhuni pa nsiku ya Sondo enze wa ntundu wanji? Kansi elimvwila chisoni chifukwa cha vechichita? Kansi enze efwayako kale malamulo a Yehova masiku akuvuli? Kansi yove enze echenjejewapo kale koma n’kukana kumvwila malamulo? Baibolo yufotokozalini. Olo n’tetyo tukaikilalini kuti: Yehova ‘ochitalini chosalungama.’ (Deut. 32:4) Yove oziŵa nkhani yonse popanga vosankha—osati pa vinthu vakunena ŵanthu ayakine vokhuza sankho, kapena chilichonse chamene chuchitisha kuti akowona vinthu m’njila yolakwika. (Ŵelengani Genesis 18:20, 21; Deuteronomo 10:17.) Keno tuphunzila vinyinji vokhuza Yehova komasoti malamulo ŵake, chikhulupililo chasu chukula pa nkhani ya mwakuchitila vinthu. Olo patuŵelenga Baibolo, keno tunkhala na makonsho amene tingakwanishelini kuŵayankha palipano, tuziŵa vokwanila vokhuza Mulungu wasu kuti tisimikijile kuti yove “ni wolungama mu njila zake zonse.”—Sal. 145:17.

5. Kansi kusoŵa ungwilo kwasu kungakhuze tyani mwatuwonela vinthu viyakine? (Onanisoti bokosi yakuti “ Kusoŵa ungwilo kuchitisha kuti osati tikowona vinthu m’njila yoyenela.”)

⁵ Ni nthawe zonselini patingoweluza mwachilungamo chifukwa nise osoŵa ungwilo. Mulungu  etilenga na luso yakuti tikokwanisha kuwonesha minkhalidwe yake, n’chifukwa chake tufunishisha kuwona ŵanthu ochitiliwa vinthu mwachilungamo. (Gen. 1:26) Koma chifukwa chakuti tiliye ungwilo tingayambe kuweluza m’njila yolakwika olo kuti tuganiza kuti tuiziŵa nkhani yonse. Mwachisanzo, kumbukilani kuti Yona aliyekondwele Yehova pechisankha kuchitila chifundo ŵanthu aku Nineve. (Yon. 3:10–4:1) Koma ganizilani vichitika chifukwa chakuti Yehova eŵawonesha chifundo ŵanthu amene awo. Miyoyo ya ŵanthu opitilila 120.000 amene elapa epulumushiwa! Pamapeto pake, Yona niye enzefunika kuyondololewa—osati Yehova.

6. Ndaŵa yanji Yehova ofunikalini kuchita kutifokozela chifukwa chawapangila vosankha vake?

⁶ Yehova ofunikalini kuchita kuŵafotokozela ŵanthu chifukwa chapangila vosankha. N’chendi kuti Yehova elola kuti atumiki ŵake a m’nthawe yakuvuli afotokoze mwenzewonela pa vosankha venze epanga Yove olo pa vosankha venzefuna kupanga. (Gen. 18:25; Yon. 4:2, 3) Ndipo nthawe ziyakine yove enzefotokoza vosankha vake. (Yon. 4:10, 11) Olo n’tetyo, Yehova ofunikalini kuchita kutifotokozela vifukwa vachitisha kuti apange vosankha vamene ivo. Chifukwa chakuti yove ni Nyamalenga wasu, ofunikalini kuchitayembekezela kuti sewo tivomekeje pavuli pakuti wapanga kale olo akaliyepanga vosankha vamene ivo.—Yes. 40:13, 14; 55:9.

7. Kansi payakine ni vuto yotyani yatingakumane nayo, ndipo ndaŵa yanji?

⁷ Mosakaikila, sewo tuvomekeja na ntima wonse kuti Yehova nthawe zonse ochita vinthu mwachilungamo. Koma olo n’tetyo, payakine vingativute kukhulupilila analume ŵechisankha kuti akotisogolela. Payakine tingayambe kulikonsha keno ŵala ali na udindo mu gulu ya Yehova okonkheja chendi malangizo a Yehova olo ochita va mmutu mwawo. Maganizo amene aŵa, payakine niye ŵenze nawo ŵanthu ayakine a m’nthawe zakuvuli. Kumbukilani visanzo vatomolewa mu  ndime 3. Nkwake wa wala munthu efwaya lamulo ya Sondo, payakine enzelikonsha keno Mose wayamba wakonsha kwa Yehova mwanalume wamene uyo akaliyeweluziwa kuti apaiwe. Ndipo nshamwali wa Uriya Mhiti, wamene nkazi wake echita chigololo na Davide payakine eganiza kuti Davide ekatishila ntchito mphamvu zake monga mfumu kuti apewe kupasiwa chilango cha imfwa. Yehova oŵakhulupilila ŵala ŵechisankha kuti akosogolela—m’gulu yake komasoti mu mpingo. Tetyo, keno tuŵakhulupililalini analume amene aŵa, tinganenelini kuti tumukhulupilila Yehova.

8. Kansi pali kukatijana kotyani pa vililembewe pa Machitidwe 16:4, 5 na mwavuchitikila vinthu mumpingo Wachikhilisitu masiku ŵano?

⁸ Masiku ŵano Yehova okatishila ntchito “kapolo wokhulupilika na wanzelu” kuti akosogolela mbali ya gulu yake pano pachalo. (Mt. 24:45) Molingana na bungwe yutonga ya m’nthawe ya atumwi, kapolo wamene uyu ololela ŵanthu a Mulungu pachalo chonse ndipo opeleka malangizo kuli akulu mu mpingo. (Ŵelengani Machitidwe 16:4, 5.) Pavuli pake, akulu nawo owoneshesha kuti okonkheja malangizo amene awo m’mipingo. Tuwonesha kuti tukhulupilila njila zakuchitilamo vinthu Yehova mwa kukonkheja malangizo ŵatulondela kufumila ku gulu yake komasoti kuli akulu.

9. Kansi ni panthawe yotyani pavingankhale vovuta kuchita vinthu mokatijana na vasankha akulu, ndipo ndaŵa yanji?

⁹ Nthawe ziyakine payakine tingowona kuti ni vovuta kuchita vinthu mokatijana na vasankha akulu. Mwachisanzo, vyaka vapita kwalombapano mipingo inyinji komasoti madela vikonzewasoti. Pa vifukwa viyakine akulu osenga ofalisa kuti akosonkhana mumpingo uyakine na cholinga chakuti mipando yonse ya mu Ng’anda zasu za Ufumu ikokatishiliwa ntchito. Keno sewo tasengewa kuti tikosonkhana mumpingo uyakine  payakine vingankhale vovuta kusiyana na azishamwali ŵasu komasoti abanja ŵasu. Kansi akulu olondela malangizo kufumila kwa Mulungu oŵauja kwangosonkhana wofalisa aliyense? Yayi. Ndipo nkhani yamene iyi payakine ingachitishe kuti vinkhale vovuta kuli sewo kukonkheja malangizo ŵatulondela. Koma Yehova oŵakhulupilila akulu pa vosankha vangapange pa nkhani yamene iyi, ndipo nase tufunika kuŵakhulupilila. *

10. Mokatijana na lemba ya Aheberi 13:17, ndaŵa yanji tufunika kuchita vinthu mokatijana na akulu?

¹⁰ Ndaŵa yanji tufunika kusankha vinthu mokatijana na vasankha akulu olo kuti vosankha vamene ivo niyelini ventenzefuna? Chifukwa keno tuchita vamene ivi tunkhala kuti tuyavya ŵanthu a Mulungu kuti akonkhala mwantendele muyake na muyake. (Aef. 4:2, 3) Mipingo yupita pasogolo keno onse ogonjela molichefya pa vosankha vayapanga bungwe ya akulu. (Ŵelengani Aheberi 13:17.) Chofunika ngako n’chakuti tuwonesha kuti tumukhulupilila Yehova mwa kuchita vinthu mokatijana na ŵala ŵakukhulupilila yove kuti akotisamalila.—Mac. 20:28.

11. Kansi n’chinji chingatiyavye kutang’isha chikhulupililo chasu pa malangizo ŵatulondela kufumila kuli akulu?

¹¹ Tingatang’ishe chikhulupililo chasu pa malangizo ŵatulondela kufumila kuli akulu, pokumbukila kuti ove oyamba apemphela kuti asenge mzimu utuŵa pokambilana nkhani zamene zukhuza mpingo. Ove oganizilasoti mosamala mfundo zothandiza za m’Baibolo zamene zukatijana na nkhani yamene iyo komasoti ofufuza malangizo ŵayupeleka gulu ya Yehova. Cholinga chawo chikulu ni kulemekeza Yehova komasoti kuchita vonse vangakwanishe kuti asamalile ŵanthu ŵake. Analume okhulupilika amene aŵa oziŵa kuti azayankhe mulandu kwa Mulungu pa mwakusamalilila ŵanthu ŵake. (1 Pet. 5:2, 3) Ganizilani mfundo iyi: M’chalo ichi choyaŵikana chifukwa chosiyana ntundu, chipembezo na nkhani za ndale, ŵanthu a Yehova olambila Mulungu mmozi wachendi pamozi mwantendele. Vamene ivi vuchitika tyala chifukwa chakuti Yehova oiyavya gulu yake!

12. Kansi ni vinthu votyani vakufunikila kuganizila akulu kuti awone keno munthu wamene wachita chimo walapa chendi?

¹² Yehova epeleka udindo kuli akulu wowoneshesha kuti mpingo ni utuŵa. Keno Mkhilisitu wachita chimo ikulu, Yehova oyembekezela kuti akulu awone keno munthu wamene uyo angapitilije kunkhala mu mpingo. Ndipo nthawe ziyakine, ove angafunike kuwoneshesha kuti munthu wamene uyo ali na ntima wolapa pa vinthu vechichita. Payakine yove anganene kuti walapa, koma kansi onyansiwa na vinthu vechichita? Kansi wasimikijila mu ntima mwake kuti azawelejelelinisoti chimo yamene iyo? Keno azishamwali ŵake aiipa niye echitisha kuti achite chimo yamene iyo, kansi ni wokonzeka kuleka kukatijana nawo? Akulu oipemphelela nkhani yamene iyo, kufufuza mfundo za m’Malemba komasoti kuwona mwakumvwila munthu wamene uyo pa vinthu vechichita. Pavuli pake, ove osankha keno munthu wamene uyo angapitilije kunkhala mumpingo. Ndipo pa vifukwa viyakine, yove angafunike kuchosewa mumpingo.—1 Akor. 5:11-13.

13. Kansi tingayambe kuganiza vinthu votyani keno nshamwali wasu olo wachibale wasu wachosewa?

¹³ Kansi chikhulupililo chasu payakine chingayesewe tyani pa vosankha vangapange akulu? Keno munthu wamene wachosewa ni nshamwali wasulini olo wachibale, vingankhale vosavuta kukatijana na vasankha akulu. Koma tiyelekezele kuti munthu wamene wachosewa ni nshamwali wasu wapantima. Payakine tingayambe kuganizila kuti akulu aliyeiganizile nkhani yonse, olo payakine tingayambe kulikonsha keno akulu aweluza mwachilungamo monga ni mwangaweluzile Yehova. Kansi n’chinji chingatiyavye kuti  tipitilije kunkhala na maganizo aweme pa chosankha changapange akulu?

14. Kansi n’chinji chingatiyavye keno akulu asankha kuti mmozi mwa azishamwali ŵasu olo wachibale wasu achosewe?

¹⁴ Tufunika kukumbukila kuti kuchosa munthu mu mpingo ni makonzedwe a Yehova komasoti kupindulisha mpingo ndipo payakine kungapindulishesoti wala wachita chimo. Keno munthu wosalapa, wamene wachita chimo angalolewe kupitilija kunkhala mu mpingo angachitishe ŵanthu ayakine kuchitasoti machimo. (Aga. 5:9) Kuyangijila pali vamene ivi, yove angaziŵelini kukula kwa chimo yake ndipo angaŵeve vifukwa vinyinji vochinjila kaganizidwe kake, na vochita vake kuti ankhalesoti pa ushamwali na Yehova. (Mlal. 8:11) Tingankhale osimikijila kuti posankha kuti munthu achosewe akulu ounyalanyazalini udindo wawo. Ove oziŵa kuti molingana na oweluza a m’nthawe ya Isiraeli, ‘oweluzilalini munthu yayi koma oweluzila Yehova.’—2 Mbiri 19:6, 7.

15. Ndaŵa yanji tufunika kukhulupilila malangizo a Yehova palipano kupambana kale yonse?

¹⁵ Patuvwendelelana na mapeto a ichi chalo chiipa, tufunika kukhulupilila ngako njila zakuchitilamo vinthu Yehova kupambana kale yonse. Ndaŵa yanji? Nkati mwa chisauso chikulu payakine tingazalondela malangizo owoneka achilwendo, osayavya olosoti osamvwishishika. Kulaŵila chendi, Yehova azalaŵilelini nase mwasitiliti. N’voziŵikilatu kuti yove azapeleke malangizo kupitila muli abale audindo. Yamene iyo izankhalelinisoti nthawe yoganizila olo yokaikila, nolikonsha kuti, ‘Kansi malangizo amene aŵa afumila chendi kwa Yehova olo payakine abale amene aŵa osogolela angopanga va mmutu mwawo?’ Kansi mwewo muzamukhulupilile Yehova pamozi na gulu yake pa nthawe yovuta yamene iyo? Kuganizila vamuchita mukalondela malangizo ofumila ku gulu ya Yehova palipano kungakuyavyeni kuziŵa yankho ya konsho yamene iyi. Keno mwewo mukhulupilila malangizo ŵatulondela masiku ŵano noŵamvwila mokulumija, mosakaikila muzakwanishe kuchitasoti vamene ivi nkati mwa chisauso chikulu.—Lk. 16:10.

16. Kansi kukhulupilila kwasu Yehova kungazayesewa tyani pa nthawe yakuti azaweluze ŵanthu kusogolo?

¹⁶ Tufunika kuganizilasoti mosamala ngako mwatikuti tizachitile na chiweluzo chakuti azapeleke Yehova pa mapeto a chino chalo chiipa. Palipano, tuyembekezela kuti anyinji amene otumikilalini Yehova kupamikijapo achibale ŵasu amene ni Mbonilini asankhe kumutumikila mapeto akaliyefwika. Koma pa Aramagedo, Yehova kupitila muli Yesu, azapange chosankha chosilijila chokhuza sogolo yawo. (Mt. 25:31-33; 2 Ates. 1:7-9) Ni sewolini tikuti tizasankhe kuti ŵanthu amene awo azachitiliwe chifundo na Yehova  olo yayi. (Mt. 25:34, 41, 46) Kansi tizakhulupilile kuti Yehova waweluza bwino olo tizakhumudwe? Kulaŵila chendi, tufunika kutang’isha chikhulupililo chasu mwa Yehova palipano kuti tizakwanishe kumukhulupilila na ntima wonse kusogolo.

17. Kansi tizapindule tyani na chiweluzo chakuti azapeleke Yehova pa nthawe yakuti azawononge chino chalo?

¹⁷ Ganizilani tyala mwatikuti tizamvwile m’chalo chanyowani cha Mulungu tikazawona vokonkhapo va chiweluzo cha Yehova. Pazaŵevesoti chipembezo chawenye, ochita mabizinesi mwadyela olo maboma amene ankhala okandilila ŵanthu noŵaletela mavuto osaneneka kwa vyaka vinyinji. Kulwala, kukulukaja, na imfwa ya okondewa ŵasu vizankhalelinisoti mbali ya moyo wasu wa nsiku na nsiku. Satana pamozi na viŵanda vake azamangiwe kwa vyaka 1.000. Vinthu vonse viipa vamene vankhala vuchitika chifukwa cha kupanduka kwawo vizaŵepolinisoti. (Chiv. 20:2, 3) Tizatembeje nowamijiwa ngako powona kuti takhulupilila njila zakuchitilamo vinthu Yehova!

18. Kansi tingaphunzile chinji kufumila pa chisanzo cha Aisiraeli chupezeka pa Numeri 11:4-6 na 21:5?

¹⁸ Kansi m’chalo chanyowani cha Mulungu, tingazayesewasoti pa nkhani yokhulupilila njila zakuchitilamo vinthu Yehova? Mwachisanzo, ganizilani vichitika Aisiraeli pechingofuma ku ukapolo ku Iguputo. Ayakine eyamba kudandaula chifukwa choganizila vakulya viweme venzekulya ku Iguputo, ndipo enzenyoza makonzedwe a chakulya chenzeŵapasa Yehova chamene enze mana. (Ŵelengani Numeri 11:4-6; 21:5.) Kansi nase tingazankhala na maganizo monga ni amene aŵa chisauso chikulu chikazasila? Tuziŵalini kukula kwa ntchito yatingazafunikila kukata kuti tikonze chalo patontho-patontho nochichitisha kunkhala paladaiso. Mosakaikila, pazankhale ntchito ikulu yakuti tizaikate ndipo moyo payakine uzankhaleko wovuta poyamba. Kansi tizadandaule na vinthu vakuti akotipasa Yehova pa nthawe yamene iyo? Apa mfundo ni yakuti: Keno tutembeja ngako vakutipasa Yehova palipano, mosakaikila tizachitesoti chimozi-mozi pa nthawe yamene iyo.

19. Kansi mungazifotokoze tyani mwachidule mfundo zikulu-zikulu zataphunzila mu nkhani ino?

¹⁹ Njila zakuchitilamo vinthu Yehova nthawe zonse zunkhala zolungama. Sewo tufunika kukhulupilila vamene ivi. Komasoti tufunika kukhulupilila ŵala ŵanthu ŵakukhulupilila Yehova kuti akokwanisha kukonkheja malangizo ŵake. Tufunikalini kuluŵa mawu ŵechilaŵila Yehova kupitila muli mneneli wake Yesaya akuti: “Muzaŵe amphamvu mukalekachita wowa komasoti mukankhala na chikhulupililo.”—Yes. 30:15.