1-2. (a) Ngera uchul me a rebetok er chelecha el taem a meringel er tir a oumerang er a rulab a deruchall? (b) Ngera kede mo mesaod er tia el suobel?

 CHELECHA el taem e ngmeringel er a rechad oumerang er tirke el olab a deruchall. Te mla mesa el kmo, a llach me a kabelment a blechoel lomekerreu er tirke el merau me tirke el olab a klisiich e diak lolengeseu er a remechebuul. A Biblia a kmo: “A re bebil er a re chad er tial beluulchad a ngar ngii a klisichir, e a re bebil a mo chuarm er tir.” (Oli. 8:9) Me a lmuut kung, a rebebil er a remengeteklel a klechelid a meruul a kmal mekngit el tekoi e tia mla rulleterir a rebebil el mo diak loumerang er a Dios. Sei a uchul me sel lekengei a chad el mo mesuub er a Biblia e ngkired el meringel el olengeseu er ngii el mekurulii a klaumerang er ngii er a Jehovah me tirke el lousbech er tir el omekrael.

² Me nguaisei engdi ngdiak el di el tirke el mesuub er a Biblia a kirir el mo oumerang er a Jehovah me a cheldebechelel. Ngmo lmuut er tirke el mla ngar er a klemerang el betok el rak me ngdiak el kirir el obes el kmo a rolel a Jehovah a loruul a tekoi a kot el ungil. Engdi lebebil e ngmo duubech a blekeradel el melasem er a klaumerang er kid er a rolel a loruul a tekoi. Ngar tia el suobel e kede mo mesaod a edei el blekeradel el mo melasem er a klaumerang er kid: (1) sel donguiu a cheldecheduch er a Biblia, (2) sel dengai a ulekrael er a cheldebechelel a Jehovah me a (3) sel bo dechebangel a omelsemai.

3. Ngmekera bebil cheldecheduch er a Biblia e sebechel melasem er a klaumerang er kid er a Jehovah?

 ³ Sel donguiu er a Biblia e nglocha duubech a ker er a uldesued el kirel a omerellel a Jehovah el mora rebebil me a dirrek  el bebil er a omelilt er ngii. El ua tiang, a babier er a Ulecherangel a mesaod el kirel a Jehovah el kmo ngmilelsii a chad er a Israel er a kodall le ngii el mirruu a idungel er a temel a Ulengull el Sils. E betok el rak er uriul e kede menguiu el ngar er a ongeru el Samuel el kmo a Jehovah uluusubes er a David er a lebora laokreng e lebekodir a chad. (Ule. 15:32, 35; 2 Sa. 12:9, 13) Kede locha mo melatk, ‘Ngera uchul me a Jehovah uluusubes er a David er a lebekodir a chad e lebora laokreng engdi ngkilebsengii a chad el dimlak el sal oberaod a kngtil er a kodall?’ Me dosaod a edei el tekoi el kired el melatk sel donguiu er a Biblia longer tia el ker.

4. Ngmekera Genesis 18:20, 21 me a Duteronomi 10:17 e melisiich er a klaumerang er kid el kirel a kerrekerilel a Jehovah?

⁴ A Biblia lebebil e ngdiak louchais a rokui el tekoi el dilubech er a cheldecheduch. El ua tiang, kede medengei el kmo a David a kmal uluuchel a rengul e ulebult er a kngtil. (Psa. 51:2-4) Engdi ngike el chad el tilemellii a llechul a Ulengull el Sils, ngmle uangerang a blekerdelel? Nguluuchel a rengul er a omerellel? Ngmla ta el bo lak lolengesenges a llechul a Jehovah? Ngika ngultngakl me a lechub e ngdimlak lorrenges a uleklatk er a uchei? A Biblia diak louchais. Me nguaisei, engdi ngsebechel mo ulterekokl a rengud er tiang: A Jehovah a “melemalt el ngar a rokui el rolel.” (Dut. 32:4) Ngika meruul omelilt er ngii loltirakl a rokui el tekoi el dilubech, el diak loltirakl a di tekingir a rechad, omengetukel, me a lechub e ngii di el ngerang el ngii a rulleterir a rechad el mo diak lemelemalt a kerrekerilir. (Monguiu er a Genesis 18:20, 21; Duteronomi 10:17.) Sel donglou er a klemedengei er kid er a Jehovah me a rolel a loruul a tekoi e nglmuut el medechel a klaumerang er kid er a kerrekerilel. Mo lmuut me a lsekum e ngmo er ngii a kerid el kirel a cheldecheduch er a Biblia el diak el sebechel monger er chelechang, engdi klemedengei er kid el kirel a Dios er kid a uchul me kede oumerang el kmo ng “melemalt er a ikel rokui el loruul.”​—Psa. 145:17.

5. Kid el diak demecherrungel ngmekera choudur a uldesued el kirel a llemalt? (Dirrek el momes er a baks el “ Kid el Diak Demecherrungel a Choudur a Uldesued el Kirel a Llemalt.”)

⁵ A uldesued el kirel a llemalt a mo cheleuid  le ngdiak demecherrungel. A Dios a milebid lokesiul a uchul me ngsoad a rechad a lemelemalt omeruul el mo er tir. (Gen. 1:26) Engdi kid el diak demecherrungel a uchul me a lebebil e ngmo diak lemelemalt a uldesued, mo lmuut er aike el taem el domdasu el kmo kede medengei a rokui el tekoi. Molatk er a Jona el dimlak el deu a rengul er sel taem el Jehovah a ulechotii a klechubechub el mora rechad er a Ninive. (Jon. 3:10–4:1) Engdi ka molatk a dilubech le Jehovah ulechotii a klechubechub. Te betok er a 120,000 el chad er a Ninive a ulebult e silobel! Nguaisei ng Jona mle kirel mesmechokl er a uldesuel el diak el Jehovah.

6. Ngera uchul me a Jehovah a diak a belkul losaod omelilt er ngii er kid?

⁶ A Jehovah a diak a belkul losaod omelilt er ngii er a rechad. Ngklemerang el Jehovah milechititerir a remesiungel er a ngar er a mong me louchais a uldesuir el kirel a omelilt el bla leruul me a lechub e ngmo meruul. (Gen. 18:25; Jon. 4:2, 3) E mla er ngii aike el taem losaod er a uchul a omelilt el lengileltii. (Jon. 4:10, 11) Me nguaisei engdi a Jehovah a diak a belkul a losaod omelilt er ngii er kid. Ngii a Ulemeob me ngdiak lousbech er a kengei er kid er a uchei me a lechub e nguriul er a loruul er a tekoi.​—Isa. 40:13, 14; 55:9.

7. Ngera el tekoi a sebechel mo meringel er kid, e ngera uchul?

⁷ Ngkmal diak doumededenger el kmo a Jehovah a meruul a llemalt. Engdi a tekoi el sebechel mo meringel er kid, a mo oumerang er a rechad el lousbech er tir a Jehovah lomekrael. Kede locha mo omdasu el kmo tirke el olab a ngerachel er a cheldebechelel a Jehovah te mera el otirakl a ulekrael er ngii ada te olab a di uldesuir. Tirke el kiliei er a taem er a Biblia mle sebechir el mo uaisei a uldesuir. Molatk aike el losaod a  3 el parakurab. A chedal ngike el tilemellii a llechul a Ulengull el Sils a locha mo melatk el kmo, a Moses ngmera el mlora Jehovah el kirel a ulekrael er a uchei er a lebelsii er a kodall. E a sechelil a Hitait el Uria el bechil a mlora laokreng lobengkel a David a mle sebechel mo omdasu el kmo, a David a uluusbech er a deruchellel el king el oibngii er a blals er a kodall. A Jehovah oumerang er tirke el lousbech er tir el omekrael. Me ngdiak el sebeched el kmo kede oumerang er a Jehovah a lsekum e ngdiak doumerang er tirka el chad.

8. Ngera el osisiu el tekoi a donguiu er a Rellir 16:4, 5 me a rolel a ongdibel er a Rekristiano a meketmokl er chelechang?

⁸ Chelecha el taem e a Jehovah omekrael er a meues el cheldebechel lousbech er a “blak a rengul e mellomes a rengul el mesiou.” (Mt. 24:45) Ngdi ua governing body er a taem er a rekot el Kristiano, ngika el mesiou a omekerreu er a rechedal a Dios er a beluulechad el rokir e omesterir a remechuodel er a ongdibel a ulekrael. (Monguiu er a Rellir 16:4, 5.) E a remechuodel olterekokl el kmo aika el ulekrael a loltirakl a ongdibel. Kede ochotii el kmo kede oumerang er a rolel a Jehovah a loruul a tekoi loeak sel doltirakl a ulekrael er a cheldebechel me a remechuodel.

9. Oingerang e nglocha mo meringel er kid loltirakl a omelilt el loruul a remechuodel, e ngera uchul?

⁹ A lebebil e ngmo meringel er kid a oltirakl omelilt el loruul a remechuodel. El ua tiang, ngar aika el dirk mlo merek el rak e ngbetok el ongdibel a bla lodak el mo tang el uchul me a bebil ongdibel a mla move el mora kuk ngodech el circuit. E ngar a kuk bebil er a blekeradel, e a remechuodel a olengit er a re publisher me lolukl el mora kuk ta er a ongdibel  me lsebechir el mekeek a kingall er a ongdibel. A lsekum te olengit er kid el mora kuk ta er a ongdibel e nglocha mo meringel er kid a mo diak dobengterir a resechelid me a telungalek er kid. A chedaol reng ngouchais er a remechuodel el kmo a derta el publisher te mor? Ngdiak. Sei a uchul me nglocha mo meringel er kid a oltirakl a ulekrael er tir. Engdi a Jehovah oumerang er a remechuodel el mo meruul aika el omelilt me kid me ngdirrek el kired el oumerang er tir. *

10. El ua losaod a Hebru 13:17, ngera uchul me ngkired lolengesenges er a remechuodel?

¹⁰ Ngera uchul me ngkired el olengesenges a omelilt loruul a remechuodel alta ngdiak el soad omelilt er tir? E le sel doruul el uaisei e kede melisiich er a kltarreng er a delongelir a rechedal a Dios. (Efe. 4:2, 3) A rokui el chad sel loba klengariourreng loltirakl a omelilt el loruul a chelechad er a remechuodel, e a ongdibel a meteketek. (Monguiu er a Hebru 13:17.) E sel kot el klou a ultutelel luchul me kede olengesenges er tirke el lousbech er tir a Jehovah el omekerreu er kid, a mo ochotii er a Jehovah el kmo kede oumerang er ngii.​—Rel. 20:28.

11. Ngera sebechel ngosukid el smisichii a klaumerang er kid er a ulekrael lomeskid a remechuodel?

¹¹ Ngsebeched el smisichii a klaumerang er kid er a ulekrael lomeskid a remechuodel sel lak dobes el kmo, te meluluuch el lolengit er a chedaol reng sel losaod a tekoi er a ongdibel. Te dirrek el kerekikl el omes omellach er a Biblia me a guideline er a cheldebechelel a Jehovah. A urungulir a mo odeuir a rengul a Jehovah e mo omekerreu er a rechedal el ngar sel kot lungil rolel. Tirka el blak a rengrir el odam a medengei el kmo te mo onger er a Dios el kirel a rolel a longetmokl aika el ngerechelir. (1 Pe. 5:2, 3) Molatk er tiang: Ngar tia el beluulechad el rechad er ngii a kakeakl le ngbelurir, klechelid er tir, me a balatiks a uchul, a rechedal a Jehovah ngar er a kltarreng el mesiou er a di ta el mera el Dios. Tia di sebechel meketmokl e le Jehovah omekngeltengat er a cheldebechelel!

12. Ngera el tekoi a kirir a remechuodel el kerekikl el melatk sel lomes el kmo a chad ngmera el mla obult er a tekoi el lerirellii?

¹² A Jehovah mla omekngerachel er a remechuodel el mo mengikiid er a ongdibel. A lsekum a Kristiano a rullii a oberaod el klengit e a Jehovah mengerechir er a remechuodel el mo oterekeklii el kmo ngsebechel melemolem el chedal ongdibel me a lechub e ngdiak. A ta er a tekoi el dirrek el kirir el meruul er ngii a mesa el kmo a chad ngmera el ouuchel er a rengul er a tekoi el lerirellii. Ngsebechel kmo ngmla obult engdi, ngika ngmera el ouketui er a tekoi el lerirellii? Ngmla rullii er a rengul el diak el lluut el mo meruul er tia el tekoi? A lsekum a mekngit el klausechelei er ngii a uchul me ngrirebet er a klengit e ngmla torebengii tia el mekngit el klausechelei? A remechuodel a meluluuch, melatk a tekoi el dilubech, e omes aike el lolekoi a Biblia e melatk er a uldesuel ngika el chad el kirel a tekoi el lerirellii. E seikid e te mocha melilt el kmo ngsebechel dirk melemolem el chedal ongdibel. A lebebil er a taem e a chad a kirel mesuld a ngklel.​—1 Ko. 5:11-13.

13. Ngera kede mo bekikl er ngii a lsekum a chad el mesuld a ngklel a sechelid me a lechub e ngchedad?

¹³ Ngmekera klaumerang er kid er a remechuodel e measem? A lsekum a chad el mesuld a ngklel a diak lekeed el sechelid me a lechub e ngchedad e nglocha beot er kid a kongei er a omelilt er a remechuodel.  Engdi lsekum a chad el mesuld a ngklel a kmal kmeed er kid e nglocha mo meringel er kid. Kede locha mo omdasu el kmo, a remechuodel a dimlak lolatk a rokui el tekoi el dilubech me a lechub e kede mo oumededenger el kmo te dimlak lolilt el ua lsekum a Jehovah millilt. Ngera sebechel ngosukid el mo oba melemalt el uldasu el kirel a omelilt er tir?

14. Ngera sebechel ngosukid a lsekum a remechuodel a ngiltii el mo mesuld er a ngklel a sechelid me a lechub e ngchedad?

¹⁴ Ngdiak el kired el lobes el kmo a Jehovah kiltmeklii a omesuld el ngakl, e tia uchul a klungiolel a ongdibel e dirrek el sebechel mo klungiolel a chad el milsuld a ngklel. A lsekum a chad el diak lekengei el lobult a melemolem el chedal ongdibel e ngsebechel mo uchul me a rebebil a mora klengit el uai ngii. (Gal. 5:9) Me a lmuut kung, nglocha diak bo lutebengii a berredel a kngtil e diak bo lutebengii a uchul me ngkirel ngodechii a uldesuel me a omerellel me lsebechel lmuut el mo oba kengei er a Jehovah. (Oli. 8:11) Ngkmal sebechel mo ulterekokl a rengud el kmo a remechuodel omes er tia el omelilt el mesuld er a ngklel a chad me a lechub e ngdiak el kmal oberaod el ngerachel. Te mtebengii el kmo, te di ua rechad er a kerrekeriil er a Israel er a ngar er a mong el ‘diak di loukerrekeriil er a re chad e ng bai kirel a RUBAK.’​—2 Kr. 19:6, 7.

15. Ngera uchul me ngkmal kired el mo oumerang er a rolel a Jehovah a loruul a tekoi er chelechang?

¹⁵ Chelecha lolekeda ulebongel er tia el mekngit el blekeradel e ngkmal kired el mo oumerang er a rolel a Jehovah a loruul a tekoi. E ngera uchul? E le temel a kloul ringel e kede locha mo ngmai a ulekrael el ngii a kora ngodech me a lechub a uldesued el kirel a kmo, ngdiak lungil. Nguaisei el Jehovah a diak el bo longedecheduch er kid. Engdi nglocha mo meskid a ulekrael loeak tirke el bla letetketerir el omekrael. Tia diak el bo el taem el doumededenger a ulekrael me a lechub e bo dolatk el kmo, ‘Tiang ngmera el mlara Jehovah me a lechub a rudam te di olab a uldesuir?’ Me ke mo mekerang er tia el kmal klou ultutelel el taem? A uldesuem er chelechang er a rolel e tirke el bla letetketerir a omekrael, a ngosukau el onger tia el ker. A lsekum ke oumerang aike el ulekrael el mngai er chelechang e mereched el mo oltirakl e ke locha dirrek el mo meruul el uaisei er a temel a kloul ringel.​—Lk. 16:10.

16. Ngmekera sebechel mo measem a klaumerang er kid er a kerrekerilel a Jehovah er a ngar medad?

¹⁶ Ngdirrek el kired el melatk er a kerrekeriil el bo loruul a Jehovah er a ulebengelel tia el mekngit el blekeradel. Chelecha e ngomeltked el kmo tirke el diak lodengelii a Jehovah el uldimukl  er a rechedad el diak el ngar er a klemerang, lengiltii el mo mesiou er a Jehovah er a uchei er a lemei a ulebongel. Engdi a temel a Armakedon e a Jehovah el oeak a Jesus a mo oterekeklii a mo duubech el mo er tir. (Mt. 25:31-33; 2 Th. 1:7-9) Ngdiak el kid a mo melilt el kmo, ngtecha mo suobel me a diak. (Mt. 25:34, 41, 46) Me kede mo oumerang er a kerrekerilel a Jehovah ada kede mo mesibas? Ngkmal kired el melisiich er a klaumerang er kid er a Jehovah er chelechang me bo lecherrungel a klaumerang er kid er ngii er a ngar medad.

17. Ngera el klungiaol a bo dengai er a kerrekerilel a Jehovah er a ulebongel er tia el mekngit el blekeradel?

¹⁷ Molebedebek er sel taem el dengar er a beches el blekeradel e domes a mla meketmokl loeak a kerrekerilel a Jehovah. Ngdiak a klsuul klechelid, e diak tirka el merechorech a rengrir el chad er a siobai me a lechub e ngkabelment el mla omekringel er a rechad el betok el telael el rak. Secher, cheluodel, me a kodall a mo diak. Satan me a remekngit el anghel a mo kelebus el ta el telael el rak. Ngmo diak aika el rokui el mekngit el ngar ngii le tir el mlo omtok. (Och. 20:2, 3) Ngkmal mo dmeu a rengud el uluumerang er a rolel a Jehovah a loruul a tekoi!

18. El ua lolekoi a Ulecherangel 11:4-6 me a 21:5, ngngera sebeched el suub er a rechad er a Israel?

¹⁸ Ngsebechel a klengar er a beches el blekeradel el mo uchul e ngmeasem a klaumerang er kid er a rolel a Jehovah a loruul a tekoi? Ka molatk er a dilubech el mora rechad er a Israel er a kedeb el taem er uriul er a bo lemimokl er a klsibai er a Ekipten. A rebebil a mlo mengeremrum e le te mlo oureng a kall er a Ekipten, e mlo diak loba omereng el saul el kirel a mana el lebilsterir a Jehovah. (Monguiu er a Ulecherangel 11:4-6; 21:5.) Kid, ngsebeched el mo olab a osisiu el uldasu er a ulebongel er a kloul ringel? Ngkmal diak dodengelii a klungel a ureor el mo er ngii el mengetmokl er tia el beluulechad e mekekokid el meruul er ngii el mo baradis. Nglocha kmal mo betok a ureor me a klengar a diak bo lebeot er a uchelel. Kede mo mengeremrum el kirel a tekoi el bo lebeskid a Jehovah er seikid el taem? A ta el tekoi a ulterekokl: A lsekum e kede melechel omereng el saul er kid el kirel aike lomeskid a Jehovah er chelechang, e kede dirrek el mo oba omereng el saul er seikid el taem.

19. Kam summarize aike el meklou a ultutelel tekoi el desiluub er tia el suobel.

¹⁹ A Jehovah di melemalt a rolel a loruul a tekoi. Ngkmal kirel mo ulterekokl a rengud er tiang. Ngdirrek el kired el mo oumerang er tirke el loumerang er tir a Jehovah el oltaut a ulekrael er ngii. Lak dobes a tekingel a Jehovah el ledilu Isaia: “Di mchelellakl el oumeral ulsirs er ngak. Isei e kom mo mesisiich e selebechakl.”​—Isa. 30:15.