1-2. (a) Wuarom es daut vondoag dän Dach fa väle schwoa, opp soone to vetruen, waut een Aumt haben? (b) Äwa waut woa wie en disen Artikjel räden?

 VONDOAG dän Dach es daut fa väle nich leicht, opp soone to vetruen, waut een Aumt haben. Dee haben jeseenen, daut de Rejierungen un de Jesazen dolla soone Menschen unjastetten, waut rikj sent un Macht haben aus soone, waut oam sent. En de Schreft sajcht daut, daut “de Mensch äwa dän Mensch toom Schoden jeharscht haft” (Liera 8:9, NW). Buta daut fieren eenje Gloowesleidasch een schlajchtet Läwen, un daut haft eenje bat doa jebrocht, daut dee nich mea opp Gott vetruen. Soo, wan wie met wäm de Bibel studieren, dan mott wie dän halpen, daut dee opp Jehova un opp deejanje vetrut, waut Jehova hia oppe Ieed aunjestalt haft.

² Nich bloos de Bibelschiela motten daut lieren, opp Jehova un siene Organisazion to vetruen. Mau rajcht soone, waut Jehova aul fa väl Joaren deenen, motten wieda doaropp vetruen, daut hee emma daut deit, waut rajcht es. Oba eenjemol komen doa Sachen opp, waut ons Vetruen oppe Proow stalen kaun. En disen Artikjel woa wie von dreeatlei räden, waut daut kunn sennen. 1. Wan wie von jewesse Menschen enne Bibel läsen. 2. Wan wie Aunwiesungen von Jehova siene Organisazion kjrieen. 3. Wan wie mol Schwierichkjeiten haben.

3. Woo kaun ons Vetruen opp Jehova oppe Proow jestalt woaren, wan wie von jewesse Menschen enne Bibel läsen?

 ³ Wan wie Gott sien Wuat läsen, dan komen ons veleicht eenjemol Froagen opp, woo Jehova met jewesse Menschen  jehaundelt haft un woo hee jewesse Sachen jedonen haft. Biejlikj kjenn wie en daut vieede Buak Mose von eenen Israelit läsen, dän Jehova toom Doot veuadeeld, wäajen hee aum Sabat Holt toopläsd. En daut tweede Buak Samuel kjenn wie läsen, daut Jehova hundade Joaren lota dän Kjennich David vejeef, wan hee uk Ehebruch un Mort begonen haud (4. Mo. 15:32, 35; 2. Sam. 12:9, 13). Nu wunda wie veleicht: “Wuarom vejeef Jehova David, waut eenen aundren dootmoaken leet un de Ehe bruak, un oba dän Maun von Israel toom Doot veuadeeld, waut nom loten no eene väl kjlandre Sind begonen haud?” Toom dise Froag beauntwuaten, unjasieekj wie mol dreeatlei, waut wie motten em Denkj hoolen, wan wie de Bibel läsen.

4. Woo stoakjen 1. Mose 18:20-21 un 5. Mose 10:17 ons daut Vetruen opp Jehova, daut hee Sachen emma rajcht entscheiden deit?

⁴ Enne Bibel stonen nich emma aule Eenselheiten äwa eene jewesse Jeschicht. Wie weeten biejlikj, daut David opp iernst een Leetsennen haud äwa siene Sind (Psa. 51:4-6). Oba waut wia daut fa een Mensch, waut dän Sabat bruak? Haud dee werkjlich een Leetsennen äwa daut, waut hee deed? Haud dee ea aul jäajen Jehova sien Jesaz jehaundelt? Haud dee dän Rot, waut se am ea jeewen, nich aunjenomen? De Bibel sajcht daut nich. Oba eent weet wie gaunz secha: Jehova “deit emma waut rajcht es” (5. Mo. 32:4). Wan hee waut entscheiden deit, dan weet hee doa gaunz om. Hee recht sikj nich no daut, waut aundre sajen, un hee moakt uk kjeenen Unjascheet ooda irjentwaut aundret, waut aul väle bat doa jebrocht haft, eene Sach orrajcht to beuadeelen (läs 1. Mose 18:20-21; 5. Mose 10:17). Je mea wie äwa Jehova un äwa daut lieren, waut hee fa rajcht talt, je dolla woa wie doaropp vetruen, daut hee Sachen rajcht entscheiden deit. Soo, wan wie de Bibel läsen un ons eenje Froagen oppkomen, hab wie oba doawäajen jenuach Bewies, daut Gott en “aul siene Wäaj jerajcht” es (Psa. 145:17).

5. Wuarom kjenn wie Sachen eenjemol nich rajcht beuadeelen? (See uk dän Kausten “ Wäajen de Onvolkomenheit see wie de Sachen nich emma rajcht”.)

⁵ Wie kjennen Sachen nich emma rajcht beuadeelen, wäajen wie onvolkomen sent. Gott haft ons soo jemoakt, daut wie siene Ieejenschoften nodoonen kjennen. Doawäajen hab wie  uk daut Velangen, daut Menschen rajcht behaundelt woaren (1. Mo. 1:26). Oba wäajen wie onvolkomen sent, kjikj wie eenjemol aun eene Sach orrajcht naun, wan wie uk denkjen, wie weeten doa gaunz om. Denkj wie mol doaraun, woo veoajat Jona wia, daut Jehova de Menschen en Ninive sien Erboarmen wees (Jona 3:10–4:1). Woo kjeem daut ut? Äwa 120 000 Niniviten, waut een Leetsennen hauden, worden jerat! Tolatst wia daut Jona, waut orrajcht äwa de Menschen docht un nich Jehova.

6. Wuarom es Jehova daut nich schuldich, ons daut uttolajen, wuarom hee jewesset entscheiden deit?

⁶ Jehova es daut nich schuldich, de Menschen siene Entscheidungen uttolajen. En de Vegonenheit leet Jehova too, daut siene Deena sajen kunnen, woo see doaräwa feelden, waut hee entschieden haud ooda entscheiden wudd (1. Mo. 18:25; Jona 4:2-3). Un eenjemol säd hee an uk, wuarom hee jewesset deed (Jona 4:10-11). Oba Jehova es nich bemott, ons daut uttolajen. Wäajen hee ons Schepfa es, brukt hee ons nich froagen, aus wie doamet envestonen sent, ea hee waut deit ooda nodäm hee waut deed (Jes. 40:13-14; 55:9).

7. Waut kaun ons schwoa faulen, un wuarom?

⁷ Secha vetru wie met ons gaunzet Hoat doaropp, daut Jehova emma daut rajchte deit. Oba veleicht felt ons daut schwoa, opp dee to vetruen, waut Jehova aunjestalt haft. Veleicht wunda wie, aus dee werkjlich no Jehova siene Aunwiesungen haundlen ooda aus dee daut no äare ieejne doonen. Daut kaun sennen, daut eenje en de Bibeltiet soo dochten. Räd wie mol äwa daut Biespel, waut wie aul em  Varsch 3 sagen. Een Vewaunta von dän Maun, waut sikj nich aun dän Sabat hilt, haft veleicht jewundat, aus Moses werkjlich met Jehova doaräwa räd, ea dis Maun toom Doot veuadeelt wort. Un een Frint von Uria, dän Hetita, dän siene Fru met David de Ehe bruak, haft veleicht jedocht, daut David siene Macht aus Kjennich brukt, om de Strof utem Stich to gonen, waut hee sikj vedeent haud. Jehova vetrut opp deejanje, waut hee äwa siene Organisazion aunjestalt haft. Wan wie daut nich doonen, dan kjenn wie nich sajen, daut wie opp Jehova vetruen.

8. Waut es en de Christenvesaumlunk vondoag dän Dach biejlikj soo, aus daut en Aposteljeschicht 16:4-5 sajcht?

⁸ Jehova leit vondoag dän Dach daut Poat von siene Organisazion, waut oppe Ieed es, derch dän truen un weisen Kjnajcht (Mat. 24:45). Soo aus de Väastaunt bie de ieeschte Christen, soo es dis Kjnajcht äwa Gott sien Volkj oppe gaunze Welt aunjestalt un jeft de Eltestasch Aunwiesungen (läs Aposteljeschicht 16:4-5). De Eltestasch seenen dan doano, daut dise Aunwiesungen jehoolen woaren. Un wie wiesen, daut wie opp Jehova vetruen, wan wie ons aun de Aunwiesungen von siene Organisazion un de Eltestasch hoolen.

9. Wanea kaun daut fa ons schwoa sennen, de Entscheidungen von de Eltestasch to unjastetten, un wuarom?

⁹ Eenjemol kaun daut fa ons schwoa sennen, de Entscheidungen von de Eltestasch to unjastetten. En de latste Joaren haben se eenje Vesaumlungen toopjeschmäten, un doawäajen sent eenje nu en eenen aundren Kjreis. Eenjemol haben de Eltestasch de Vekjindja jefroacht, aus see wullen no eene aundre Vesaumlunk wakjslen, om de Vesaumlungshiesa daut baste uttonutzen. Wan se ons no soont froagen, dan kaun daut fa ons schwoa sennen, onse Frind un Famielje to veloten. Sajcht Jehova to de Eltestasch, wua jieda Vekjindja  krakjt deenen saul? Nä. Doawäajen kaun daut fa ons eenjemol schwoa sennen, ons aun de Aunwiesungen to hoolen, waut wie kjrieen. Oba Jehova vetrut de Eltestasch, wan dee soone Entscheidungen moaken, un wie sellen daut uk. b

10. Wuarom sell wie met de Eltestasch toopschaufen, soo aus daut en Hebräa 13:17 sajcht?

¹⁰ Wuarom sell wie de Entscheidungen von de Eltestasch unjastetten, wan daut veleicht uk nich daut es, waut wie ons wudden jewenscht haben? Doaderch halp wie met, daut en Gott sien Volkj Eenichkjeit es (Efs. 4:2-3). De Vesaumlungen jeit daut goot, wan dee deemootich met de Eltestasch toopschaufen (läs Hebräa 13:17). Noch wichtja es, daut wie Jehova wiesen, daut wie opp am vetruen, wan wie met deejanje toopschaufen, waut hee aunjestalt haft toom fa ons sorjen (Apj. 20:28).

11. Woo kjenn wie ons Vetruen opp de Eltestasch äare Aunwiesungen stoakjen?

¹¹ Wie kjennen ons Vetruen opp de Aunwiesungen von de Eltestasch stoakjen, wan wie doaraun denkjen, daut dee emma om dän heiljen Jeist bäden, wan dee äwa Sachen räden, waut met de Vesaumlunk to doonen haben. Dee rechten sikj uk no biblische Gruntsauzen un hoolen sikj aun de Aunwiesungen, waut see von Jehova siene Organisazion kjrieen. Dee wellen opp iernst Jehova jefaulen un sikj soo goot aus mäajlich om siene Deena kjemren. Dise true Mana weeten, daut see Gott doafäa Räakjenschoft jäwen motten, woo see äare Oppgowen nokomen (1. Pet. 5:2-3). Denkj mol han: Jehova sien Volkj deent am aula veeent, wan dee uk en eene Welt läwen, wua daut väl Oneenichkjeit jeft derch veschiedne Gloowes, Rejierungen un veschiedne Sorten Menschen. Dit es bloos mäajlich, wäajen Jehova siene Organisazion säajent!

12. Aun waut motten de Eltestasch aules denkjen toom seenen, aus wäa werkjlich een Leetsennen haft?

¹² Jehova haft de Eltestasch de wichtje Oppgow jejäft doano to kjikjen, daut de Vesaumlunk rein blift. Wan een Christ eene schwoare Sind bejeit, dan velangt Jehova von de Eltestasch, daut dee rutfinjen, aus deejanja en de Vesaumlunk bliewen kaun ooda nich. Dee motten biejlikj kjikjen, aus dänjanjen daut opp iernst leet es, waut hee jedonen haft. Veleicht sajcht dee, daut am daut leet deit. Oba haust dee daut werkjlich, waut hee deed? Es hee sikj gaunz eenich, disen Fäla nich mea to doonen? Wan daut schlajchte Frind wieren, waut am toom sindjen brochten, es hee dan reed dise Frind opptojäwen? De Eltestasch bäden to Jehova äwa de Sach, unjasieekjen sikj daut met de Schreft un kjikjen doano, woo de Sinda äwa daut denkjt, waut hee deed. Dan woaren dee entscheiden, aus dee enne Vesaumlunk bliewen kaun ooda nich. Eenjemol mott dänjanjen utjeschloten (1. Kor. 5:11-13).

13. Äwa waut wunda wie veleicht, wan een Frint ooda een Vewaunta utjeschloten woat?

¹³ Woo kaun ons Vetruen opp de Eltestasch aufjeprooft woaren? Wan doa wäa utjeschloten woat, waut nich ons gooda Frint wia ooda een Vewaunta, dan felt ons daut veleicht nich schwoa, de Entscheidunk von de Eltestasch to unjastetten. Oba saj wie mol, daut wia ons gooda Frint. Dan wunda wie veleicht, aus de Eltestasch aules krakjt unjasocht haben ooda aus dee soo entschieden haben, aus Jehova daut wudd haben. Waut kaun ons halpen, daut wie rajcht äwa dise Sach denkjen?

14. Waut kaun ons halpen, wan de Eltestasch wäm utschluten, dän wie väl räakjnen?

 ¹⁴ Daut es goot, wan wie doaraun denkjen, daut Jehova daut met dän Utschluss enjerecht haft un daut de Vesaumlunk daut togood kjemt un veleicht uk dän Sinda. Wan een Sinda, waut nich een Leetsennen haft, en de Vesaumlunk bliewen kaun, dan kunn hee uk de aundre veuasoaken to sindjen (Gal. 5:9). Un hee woat dan veleicht uk nich enwoaren, woo schlemm siene Sind wia, un uk goanich de Needichkjeit seenen, sien denkjen un sien haundlen to endren, soo daut Jehova wada eenen Jefaulen aun am haft (Liera 8:11). Wie kjennen ons secha sennen, wan de Eltestasch entscheiden motten, aus doa wäa utjeschloten saul, dan nämen dee äare Veauntwuatunk sea iernst. Dee weeten, daut daut bie an krakjt soo es aus bie de Rechta ieeschtemma en Israel. Dee “hoolen nich em Oppdrach von Menschen Jerecht,” oba “en däm HARN sienen Oppdrach” (2. Chr. 19:6-7).

15. Wuarom es daut nu needja opp Jehova siene Aunwiesungen to vetruen aus jeemols ea?

¹⁵ Je noda daut Enj von dise Welt kjemt, je dolla mott wie opp Jehova vetruen, daut hee emma daut rajchte deit. Wuarom? En de groote Triebsaul woa wie Aunwiesungen kjrieen, waut fa ons veleicht nich soo leicht to vestonen ooda notokomen sent. Un Jehova woat nich met ons perseenlich vetalen. Hee woat ons woomäajlich Aunwiesungen jäwen derch deejanje, waut hee aunjestalt haft. Daut woat dan nich de rajchte Tiet sennen, daut wie twiewlen un denkjen: “Es dit nu werkjlich von Jehova ooda es daut bloos de Breeda äare Entscheidunk?” Woascht du en dee schwoare Tiet opp Jehova un opp siene Organisazion vetruen? Daut kaun krakjt doano sennen, woo du vondoag dän Dach äwa de Aunwiesungen denkjst, waut du kjrichst. Wan du die nu aul wellich no de Aunwiesungen rechst, dan woascht du daut secha uk en de groote Triebsaul doonen (Luk. 16:10).

16. Wanea woat sikj daut utwiesen, aus wie opp Jehova vetruen?

¹⁶ Wie motten uk iernstlich doaräwa nodenkjen, waut wie doonen woaren, wan Jehova dise schlajchte Welt rechten woat. Wie wenschen ons, daut väle, waut Jehova nich deenen, wua uk onse Vewaunte met en sent, sikj noch doatoo eenich woaren. Oba en Harmagedon woat Jehova derch Jesus entscheiden, waut met dee woaren woat (Mat. 25:31-33; 2. Tess. 1:7-9). Wie woaren nich entscheiden, äwa wäm Jehova een Erboarmen haben woat un äwa wäm nich (Mat. 25:34, 41, 46). Woa wie dan doaropp vetruen, daut Jehova rajcht  rechten deit ooda woa wie opphieren am to deenen? Wie motten daut nu aul lieren, gaunz opp Jehova to vetruen, soo daut wie daut lota uk woaren.

17. Woo woat ons daut togood komen, wan Jehova dise Welt rechten woat?

¹⁷ Stal wie ons väa, woo wie ons feelen woaren, wan wie en de niee Welt sent un seenen, woo Jehova sien Jerecht utjekomen es. Doa woaren kjeene faulsche Gloowes mea sennen, kjeene bejieeje Haundelsmana, uk kjeene Rejierungen, waut de Menschen aul soo lang unjadrekjt un toojesat haben. Doa woat kjeena mea krank ooda oolt woaren un wie woaren daut uk nich mea beläwen, daut doa wäa stoaft, dän wie väl räakjenden. De Soton un de beese Jeista woaren fa dusent Joa jebungen sennen. Aul dän Schoden, waut doaderch kjeem, daut dee ojjehuarsom wieren, woat daut nich mea jäwen (Opb. 20:2-3). Woo dankboa wie nich woaren sennen, daut wie doaropp vetruden, daut Jehova emma aules rajcht deed!

18. Waut lia wie von daut, waut et en 4. Mose 11:4-6 un 21:5 äwa de Israeliten sajcht?

¹⁸ Kaun daut sennen, daut wie en de niee Welt uk woaren doaropp vetruen motten, daut Jehova emma aules rajcht deit? Denkj wie mol doaraun, waut kort nodäm passieed, aus de Israeliten aus Sklowen von Ägipten friekjeemen. Eenje fungen aun to grunzen, wäajen see sikj no daut fresche Äten bangden, waut see en Ägipten hauden, un see veachten daut Mauna, waut Jehova an jeef (läs 4. Mose 11:4-6; 21:5). Woa wie veleicht uk soo denkjen, wan de groote Triebsaul to Enj es? Wie weeten nich, woo väl Oabeit daut woat sennen, de Ieed reintomoaken un to een Paradies to moaken. Secha woat doa sea väl Oabeit sennen, un daut Läwen woat aum Aunfank veleicht nich soo leicht sennen. Woa wie dan doaräwa grunzen, waut Jehova fa ons deit? Eene Sach es gaunz secha: je dankboara wie fa daut sent, waut Jehova nu fa ons deit, je dankboara woa wie fa daut sennen, waut hee dan fa ons doonen woat.

19. Waut hab wie en disen Artikjel jelieet?

¹⁹ Jehova deit emma, waut rajcht es. Doaropp mott wie ons gaunz veloten. Wie motten uk opp dee vetruen, derch dee Jehova ons Aunwiesungen jeft. Wie wellen nienich de Wieed vejäten, waut Jehova derch dän Profeet Jesaja säd: “Wan jie . . . ruich bliewen . . . un vetruen hoolen, woa jie stoakj sennen” (Jes. 30:15).