1-2. (a) Buakinyi lelo uno bantu be bungi t’abamonaa’shi mbalombene kukulupila baaba be na matalua? (b) Nkinyi kiatuisambila mu uno muisambo?

 LELO uno, bantu be bungi t’abamonaa’shi mbalombene kukulupila muntu ooso e na matalua nya. Mbamone’shi mbulamatadi na miya, abikaluila nka penda ba mpeta na bantu be bukome, anka t’abikamba kukaluila bantu balanda nya. Bible aakula patooka’shi: ‘Bangi mbatonte ben’abó na kwibamwesha malwa.’ (Mul. 8:9, EEM) Kukatusha biabia, bangi bakata ba bipuilo, bakuete kukitanga mianda i bubi. Bino mbikitshishe bua’shi bangi bantu bashimishe lukumiino luabo mui Efile Mukulu. Ngi buakinyi, p’atulongo Bible na muntu, tui na mudimo wi bukopo bua kumukuasha, bua’shi akulupile mui Yehowa na mui baaba abalesha mpala yaye pano pa nsenga.

² Eyendo’shi, t’anka penda balongi ba Bible ngi be na lukalo, lua kulonga bia kukulupila mui Yehowa, na mui ndumbuluilo aaye nya. Sunga atue booso batabadi mu bia binyibinyi mund’a bipua bi bungi, t’abitungu tushimishe lukumiino’shi Yehowa akitaa nka bi buwa nya. Ingi nsaa, kui kukitshika muanda autompo lukulupilo luetu mui Yehowa. Mu uno muisambo atuisambila mianda isatu, ilombene kutompa lukumiino luetu: (1) nsaa y’atubadika miisambo kampanda ya mu Bible, (2) nsaa y’atupete buludiki abutukila mu ndumbuluilo a Yehowa, na wa (3) nsaa y’atukapete nkalakashi mu mafuku aafiki.

3. Ingi miisambo ya mu Bible ngilombene kutompa lukulupilo luetu mui Yehowa naminyi?

 ³ Nsaa y’atubadika Bible, tui kuiyipusha buakinyi Yehowa baadi mukitshiine bangi bantu mianda mu mushindo kampanda, na  pabitale bingi bitshibilo bibaadi muate. Bu kileshesho, mu mukanda wa Mbadiko, atubadika’shi Yehowa baadi mutshibile ungi muina Isaleele, baadi mukasangule nteete muifuku dia Sabaato, kibawe kia lufu. Mu mukanda wa kabidi wa Samwele, tubalongo’shi kunyima kua siekele ibungi, Yehowa baadi mufuile Mfumu Davide lusa aye baadi mukite muluisho wa kutambuka lusandi na kuipayishena. (Mb. 15:32, 35; 2 Sam. 12:9, 13) Tui kuiyipusha’shi, ‘Buakinyi Yehowa baadi mufuile Davide lusa ku muluisho wa kutambuka lusandi na kuipayishena, kadi atshibila ungi muntu kibawe kia lufu, bua muluisho aumueka bu ushi ukambe bukata?’ Bua kualuula ku luno lukonko, tutaleyi mianda isatu, yatudia kutuula mu binangu bietu nsaa y’atubadika Bible.

4. Mmushindo kinyi aunyingisha mukanda wa Kibangilo 18:20, 21 na wa Miiya Ikituulwe 10:17, lukulupilo luetu mu bitshibilo bia Yehowa?

⁴ Bible t’apatuuleyaa nka ka muanda na ka muanda kooso ke mu muisambo nya. Bu kileshesho, atuuku’shi Davide baadi muilangie binyibinyi ku bikitshiino biaye. (Mis. 51:2-4) Anka, yawa muntu baadi muipee muiya wa Sabaato baadi a mushindo kinyi? Baadi namu muinyongole bua bubi bubaadi mukite su? Ta baakutshilue kukookiela dingi miya ya Yehowa su? Baadi mulenguule sunga kupela kukookiela bibaabadi bamudimushe kumpala su? Bible t’ebiakula nya. Anka, tui balombene kushinkamisha bino: Yehowa ‘t’akitaa bi bubi.’ (Miy. 32:4) Bitshibilo biaye mbimeene pa bishinkamiisho​—kushi abiakula bantu, kushi mpuandikishi, sunga kintu kioso kiakia kilombene kutakula muntu, mu kuikala na mueneno e bubi a muanda. (Badika Kibangilo 18:20, 21; Miiya Ikituulwe 10:17.) P’atunyisha kulonga pabitale Yehowa na miya yaye, atunyisha kutamisha lukulupilo luetu mu bitshibilo biaye. Sunga biekala’shi muisambo wa mu Bible awibuesha nkonko yatushi na ngaluulo binobino, atushinguula kalolo pabitale Efile Mukulu’shi, ‘mashinda aaye ooso ngalulame.’​—Mis. 145:17.

5. Kukutua kuetu kua kupuidika kui na bukitshishi kinyi kuatudi pabitale mianda ya kululama? (Tala dingi kashibo akamba’shi “ Kukutua kuetu kua kupuidika akuluishaa mueneno eetu a mianda ya kululama.”)

⁵ Ta tui balombene kutshiba kiimu na kululama muanda tui bakutue kupuidika. Efile Mukulu mmuitupangie kuifuanyiko diaye, ngi buakinyi atukumiinaa kumona abakitshiina bantu bi buwa. (Kib. 1:26) Biabia, pa muanda tui bakutue kupuidika, tui balombene kutopeka  mianda kua bisumanga, sunga nsaa y’atupuandikisha’shi tui na bishinkamiisho bioso. Bu kileshesho, banda kutentekiesha, mushindo ubaadi Yoona mupushe bubi bua kitshibilo kia Yehowa kia kufuila muilo wa Ninive lusa. (Yon. 3:10–4:1) Kadi, banda kutala bipeta bibatukile. Miuwa ya bantu bakile pa 120 000, ya bena Ninive babaadi belangie ku mashimba, ibaadi ipashibue! Aku namu p’atutala kalolo, mueneno a Yoona ngi baadi atungu kulumbuulua​—kushi a Yehowa.

6. Yehowa e na kitungo kia kuitupatuluila bitshibilo biaye su?

⁶ Yehowa te na kitungo kia kupatuluila bantu bitshibilo biaye nya. Eyendo’shi, Yehowa baadi mutadiile bafubi baye ba kala, buabadia kuakula bi’abapusha, pabitale bitshibilo bibaadi muate sunga bibaadi akiebe kuata. (Kib. 18:25; Yon. 4:2, 3) Ingi nsaa, baadi mupatuule kitshibilo kiaye. (Yon. 4:10, 11) Biabia, Yehowa, te na kitungo kia kuitupatuluila tubingilo tua bitshibilo biaye nya. Bu biadi bu Mupangi eetu, te na lukalo na kukumiina kuetu nya, biabiikala kumpala sunga kunyima kua kukita muanda kampanda.​—Yesh. 40:13, 14; 55:9.

7. Nkinyi kilombene kuituikeela bukopo, na mbuakinyi?

⁷ Kushi mpaka, tuibashinkamishe na mashimba eetu ooso’shi, Yehowa akitaa nka mianda ibuwa. Anka, tui kuikadika na lukalakashi lua kukulupila, mui bantu abalesha mpala yaye pano pa nsenga. Tui kuiyipusha’shi, bano be na matalua mu ndumbuluilo a Yehowa, bakuete kukita mianda muyile buludiki bua Yehowa su mmuyile buludiki buabo abo banabene? Bantu ba kala, babaadi balombene kuikala na mueneno e bino. Tubandeyi kunangushena ku bileshesho biatudi bateemune mu  kikoso kia 3. Mukuabo na muntu baadi muipee muiya wa Sabaato, baadi mulombene kuiyipusha’shi, Moyise mmuipushe binyibinyi Yehowa kumpala kua kumutshibila kibawe kia lufu su? Na kuuku a Uriya muina Hiite, sha mukashi abaabadi batambukie naye lusandi kui Davide, baadi mulombene kuamba’shi Davide mmufubishe matalua aaye a bu mfumu, buadia kukutua kupeta dinyooka dibaadi dimulombene. Kiatudia kuuka nkuamba’shi, Yehowa mmukulupile bano booso bantu, baadi musangule bua kukunkusha ndumbuluilo aaye na tukongie. Biabia, su ta tui bakulupile​—bano booso bantu, ta tui balombene kuamba’shi tui bakulupile mui Yehowa nya.

8. Nkuipushena kinyi kui pankatshi pa muanda w’abateemuna mu Bikitshino 16:4, 5, na bikuete kufuba kakongie ka bena Kidishitu lelo uno?

⁸ Lelo uno, Yehowa kuete akunkusha kipindi kiaye ki pa nsenga, kukiila kui “mpika a lulamato na mudimukye.” (Mat. 24:45, NWT) Nka bu bibaadi kasaka ka bakunkushi bakulu ka mu siekele a kumpala, uno mpika, kuete akunkusha muilo w’Efile Mukulu mu nsenga ishima, na kuete atuusha buludiki kui bakulu ba mu tukongie. (Badika Bikitshino 16:4, 5.) Bakulu namu ku luabo lupese, bakuete kutumikila buabua buludiki mu tukongie. Atulesha’shi tui bakulupile mu mushindo aukitaa Yehowa mianda, p’atukookiela buludiki bu’atupete mu ndumbuluilo aaye, na kui bakulu.

9. Nsaa kinyi yatudi balombene kupeta lukalakashi lua kukuatshishena bitshibilo bia bakulu, na mbuakinyi?

⁹ Ingi nsaa, tui kupeta lukalakashi lua kukuatshishena bitshibilo bia bakulu. Bu kileshesho, mu bipua bishaale, tukongie tui bungi na bifunda, bekeele bebishintuule. Kudila kua kufubisha mashibo eetu a Bufumu kalolo, bakulu babaadi batekie bangi balungudi ba mukandu wibuwa, buabadia kuenda mu kutuela mu kangi kakongie. Su betuteka bua kuenda mu kutuela mu kakongie kapia, bi kuituelela bukopo bua kuleka bakuuku betu na kifuko kietu. Bakulu abapetaa buludiki bua Yehowa abuibalesha kakongie kabadia kutuma ooso mulungudi su? Nya. Uno muanda, ngulombene kuikadika  lukalakashi kuatudi, bua kulonda buludiki bu’atupete. Sunga mbiabia, Yehowa mmukulupile mui bakulu bua bino bitshibilo, n’atue namu abitungu tukulupile muabadi. *

10. Mu kuipushena na Bena-Ebelu 13:17, buakinyi abitungu tukuatshishene bakulu?

¹⁰ Buakinyi abitungu tukuatshishene bitshibilo bia bakulu, sunga biekala’shi biabia bitshibilo t’abitusankisha? Ku muanda nsaa y’atukitshi biabia, abitukuasha bua kulama buumune, munkatshi mua muilo w’Efile Mukulu. (Ef. 4:2, 3) Kakongie akatama nsaa y’atukookiela na kuiyisha kooso, ku bitshibilo bi’abaata kui kasaka ka bakulu. (Badika Bena-Ebelu 13:17.) Ki na muulo ukata, mp’atukuatshishena baaba booso babadi bakulupile kui Yehowa bua kuitupasukila, bua kumulesha’shi tui bamukulupile.​—Bik. 20:28.

11. Nkinyi kilombene kuitukuasha bua kunyingisha lukulupilo luetu mu buludiki bu’atupete kui bakulu?

¹¹ Tui balombene kunyingisha lukulupilo luetu mu buludiki bu’atupete kui bakulu, pa kutentekiesha’shi, abatekaa kikudi kiselele nsaa y’abataluula muanda ooso utale kakongie. Na dingi, abataluulaa mayi a kulonda a mu Bible kalolo, na kutaluula buludiki abutuuku mu ndumbuluilo a Yehowa. Lukalo luabo lukata, ndua kusankisha Yehowa na kupasukila kalolo muilo waye. Bano balume baasha lulamato, abashinguula’shi Efile Mukulu atalaa kalolo mushindo wa bakuete kupasukila muilo waye. (1 Mp. 5:2, 3) Tubande kutala uno muanda: Mu ino nsenga mui bantu mbeabuule pa muanda w’ekoba, wa lulanguilo, na wa mianda ya politike, muilo wa Yehowa ukuete kulanguilanga Efile Mukulu a binyibinyi, pamune mu butaale. Bino bikuete kulombana, nka penda ku bukuashi bua miabi ya Yehowa yakuete kuelela ndumbuluilo aaye!

12. Mmianda kinyi ayitungu’shi bakulu banangushene kalolo nsaa y’abataluula bua kuuka’shi su muntu mmuilangie kuishimba?

¹² Yehowa, mmupe bakulu bushito bukata, bua kulama buiselele bua kakongie. Su muina Kidishitu akita muluisho ukata, Yehowa, atekaa bakulu buabadia kuata kitshibilo kia kutaluula, su yawa muntu mmulombene kushaala mu kakongie sunga kutushiibua muanka. Dingi, abibatungaa’shi bapete bishinkamiisho bia’shi, su yawa muntu mmuilangie binyibinyi kuishimba ku muluisho waye. Pangi e kumueka bu muilangie, kadi, eyondo’shi mmushikue kiakia kiadi mukite? Mmuate kitshibilo kia kupela kukita dingi wawa muluisho? Su bakuuku be bubi ngi bafikie mu kumukitshisha wawa muluisho, akumiina kutshiba nabo kipuano su? Bakulu abatekaa Yehowa, abataluulaa mianda yooso kalolo, na akiamba Bible. Abataluulaa dingi mushindo aupusha yawa mukite bubi, pabitale muluisho waye. Akupu, ngi baate kitshibilo kia’shi su yawa muntu mmulombene kushaala mu kakongie. Mu ingi mianda, muntu mukite muluisho, mmulombene kutushibua mu kakongie.​—1 Kod. 5:11-13.

13. Tui kuiyipusha naminyi su kuuku eetu sunga muina kifuko netu atushibua mu kakongie?

¹³ Lukulupilo luetu mui bakulu ndulombene kutompibua mushindo kinyi? Su muntu batushibua mu kakongie ta nkuuku eetu sunga muina kifuko netu, paapa tui kukumiina binyibinyi kitshibilo kia bakulu. Tupuandikishe’shi muntu batushibua mu kakongie, nkuuku eetu a p’eshimba. Tui kuiyipusha su bakulu mbataluule mianda yooso, sunga’shi, bino bibaabatshibi kilumbu, ngi bibadia namu kuikitshiba Yehowa. Nkinyi kia kuitukuasha buatudia kushaala nka na mueneno eetu e buwa bua kino kitshibilo?

14. Nkinyi kilombene kuitukuasha su bakulu baata kitshibilo kia kutuusha kuuku eetu sunga muina kifuko netu mu kakongie?

¹⁴ Abitungu tutentekieshe’shi, kutuusha kua  muntu mu kakongie, nyi mpango ya Yehowa. I kuanka bua buwa bua kakongie, na ngilombene kukuasha muntu mukite muluisho. Su muntu mukite muluisho sh’elanga kuishimba bamutadiila mu kakongie, mmulombene kutakula bangi bua kukita miluisho. (Nga. 5:9) Kukatusha biabia, pangi nta mmulombene kutundula bukata bua muluisho waye nya, na ta mmulombene kumona kabingilo ka kushintula binangu na bikitshiino biaye, buadia kukuminyibua dingi na Yehowa. (Mul. 8:11) Tui balombene kushinkamisha’shi, nsaa ayitaluula bakulu su muntu mmulombene kutushibua mu kakongie, abataa buabua bushito buabadi nabo na muulo. Mbawukie’shi, nka bu bibaadi bansushi ba mu Isaleele a kala, ta ‘mmwishina dya muntu mwabatshibi kilumbu nyi mmwishina dya Yehowa.’​—2 Mya. 19:6, 7, EEM.

15. Buakinyi abitungu tukulupile mu buludiki bua Yehowa kubanga binobino kukila bibaatudi abakitshi kumpala?

¹⁵ Bu bibefubuila mfudiilo a uno ndumbuluilo a mianda, abitungu tukulupile mu mushindo aukitaa Yehowa mianda, kukila bibaatudi bakulupile kumpala. Buakinyi? Mu kipungo kia mpombo ikata, tui balombene nkapeta buludiki, abumueka bu buibukopo kupusha, sunga kutumikila. Eyendo’shi, Yehowa t’akesamba netu buludiludi nya. Akatuusha buludiki nka kui bantu baadi mutuule abalesha mpala yaye. Kino nta nkipungo kia nkekadika na mpaka, sunga kuiyipusha’shi, ‘buno nyi mbuludiki binyibinyi abutukila kui Yehowa, su mueneno a bakuetu abetukunkusha?’ Okakulupila mui Yehowa na ndumbuluilo aaye mu kiakia kipungo ki na muulo su? Lualuulo ndulombene kulesha mushindo omonaa buludiki bua teokrasi lelo uno. Su tuakulupila mu buludiki buatukuete kupeta lelo uno, na kuibutumikila lubilo lubilo, ngi bi’atukakitshi mu kipungo kia mpombo ikata.​—Luk. 16:10.

16. Lukulupilo luetu mu bitshibilo bia Yehowa lui nkatompibua naminyi mu mafuku aafiki?

¹⁶ Abitungu tunangushene kalolo, mushindo w’atukakitshi pabitale bitshibilo bia Yehowa, ku mfudiilo kua uno ndumbuluilo a mianda e bubi. Lelo uno, tukuete kukulupila’shi, be bungi bash’abafubila Yehowa mpa na bena kifuko netu bashi ba Temue, abakaata kitshibilo kia kumulanguila kumpala kua’shi mfudiilo ifikie. Ku Armagedone, Yehowa, kukiila kui Yesu, ngi akaata kitshibilo kia mfudiilo pabitale mafuku aabo aafiki. (Mat. 25:31-33; 2 Tes. 1:7-9) Ta natue abakaata kitshibilo kia muntu abakafuila lusa, sunga abash’abafuila lusa kui Yehowa nya. (Mat. 25:34, 41, 46) Atukakulupila mu bitshibilo bia Yehowa, su atukalekie kumufubila muanda wa’shi t’atusangeela bitshibilo bibaata? Eyendo’shi, abitungu tunyingishe lukulupilo luetu mui Yehowa kubanga binobino, bua’shi  tukamukulupile n’eshimba dietu dioso mu mafuku aafiki.

17. Bitshibilo bia Yehowa abiketukuasha naminyi ku mfudiilo kua uno ndumbuluilo a mianda?

¹⁷ Tubande kunangushena, mushindo w’atukapusha mu nsenga ipia y’Efile Mukulu, nsaa y’atukamono bipeta bia bitshibilo bia Yehowa. T’akukekala’nyi lulanguilo lua madimi su ndumune, sunga mianda ya busunga na ndubuluilo a bena politike ayikiengiesha bantu, na kuibafuishiisha mpombo, taikekala nyi kuanka. Mu nshalelo eetu, t’atukekala na mikumbo, bununu, sunga kufuisha kua muntu atudi bafule. Satana na ba demo, t’abakekadika na bukitshishi kui bantu munda a bipua kinunu. Mianda i bubi i kuanka pa muanda w’etombo diabo, ayikashimina. (Kibaf. 20:2, 3) Atukekala dingi na lutumbu lukata, p’atue kukulupila mu mushindo aukitaa Yehowa mianda!

18. Mmalongiesha kinyi atudi balombene kupetela ku kileshesho kia bena Isaleele, muyile mukanda wa Mbadiko 11:4-6 na Mbadiko 21:5?

¹⁸ Nshalelo a mu nsenga ipia y’Efile Mukulu, a kekala na ingi nkalakashi ilombene kutompa lukulupilo luetu, mu mushindo aukitaa Yehowa mianda su? Bu kileshesho, banda kunangushena kibakitshikile, kunyima kua mafuku apeela na bena Isaleele kutushibua mu bupika mu Ejipitu. Bangi babaabangile kuidiladila, pa muanda wa bidibua bibishi bibaabadi abadi muanka. Na babanga kubepuula maana abaadi Yehowa ebapa. (Badika Mbadiko 11:4-6; 21:5.) Tui nkekala na uno mueneno e mumune kunyima kua mfudiilo a mpombo ikata su? T’atuuku mudimo bukata aukatungu bua kusuula nsenga, na kuenda na kuiyikasha mpaladiiso nya. Pangi, akukekadika mudimo ukata. Na ku mbangilo, akukekadika ingi mianda yatush’abasangeela. Atukedidi ku ki’abaketupa kui Yehowa mu kiakia kipungo su? Kiatudia kuuka nkino: Su tubanyiisha kuikala na lutumbu ku akitupa Yehowa lelo uno, atukanyiisha nkekala na lutumbu, ku bi’aketupa mu aa mafuku.

19. Lesha mu kikoso mianda ikata i mu uno muisambo.

¹⁹ Yehowa, akitaa nka mianda ibuwa. Abitungu, tushinkamishe bianka. Abitungu dingi, tuikale na lukulupilo mui baaba, babadi bakulupile kui Yehowa bua kutuusha buludiki buaye. T’olubanga mayi abaadi Yehowa muakule, kukiila kui mutemuki aaye Yeshaya’shi: “Bukome buenu, bui mukushaala baumiine na mu kulesha lukulupilo.”​—Yesh. 30:15, NWT.