1-2. (a) Fu san ede a muilek gi son sma fu frutrow sma di abi makti? (b) San wi o luku na ini na artikel disi?

 NA INI a ten disi, furu sma e feni en muilek fu frutrow sma di abi makti. Den kon si taki nofo tron den krutuman nanga politiekman e teki a sei fu gudusma nanga sma di abi makti èn den no wani yepi den pôtisma. Dati meki Bijbel e taki krin: „Sensi di libisma bigin tiri tra libisma, sani no waka bun gi den” (Preik. 8:9). Boiti dati, son kerki fesiman e du wan lo ogri. Dati meki son sma no e frutrow tapu Gado moro. Sobun, efu wi abi wan Bijbelstudie, dan wi musu yepi en fu leri frutrow tapu Yehovah nanga den sma di a poti fu teki fesi na grontapu.

² Ma a no Bijbelstudie wawan musu leri fu frutrow tapu Yehovah nanga en organisâsi. Awinsi wi e dini Yehovah furu yari kaba, toku noiti wi musu tapu fu bribi taki ala ten Yehovah e du sani na a moro bun fasi. Son leisi sani kan pasa di e meki taki wi bigin tweifri. Na ini na artikel disi wi o luku dri sani di kan meki en muilek gi wi fu frutrow tapu Yehovah: (1) Te wi e leisi son tori na ini Bijbel, (2) te wi e kisi son rai fu na organisâsi fu Yehovah, èn (3) te wi o kisi problema na ini a ten di e kon.

3. Fa son Bijbel tori kan meki en muilek gi wi fu frutrow tapu Yehovah?

 ³ Te wi e leisi Gado Wortu, dan son leisi wi e aksi wisrefi fu san ede Yehovah du son sani nanga son sma èn fu san ede a teki son bosroiti. Fu eksempre, na ini a buku Numeri wi e leisi taki Yehovah ben taki dati wan man fu Israel  ben musu kisi dedestrafu fu di a ben go piki udu tapu Sabat-dei. Ma hondrohondro yari baka dati, wi e leisi na ini a buku Tu Samuel taki Yehovah ben gi Kownu David pardon, aladi a ben du hurudu èn a ben meki sma kiri wan man (Num. 15:32, 35; 2 Sam. 12:9, 13). Kande wi e aksi wisrefi: ’Fu san ede Yehovah gi David pardon, ma a meki den kiri a tra man fu wan sani di no sori so ogri?’ Fu kisi piki tapu na aksi dati, wi o luku dri sani di wi musu hori na prakseri te wi e leisi Bijbel.

4. Fa Genesis 18:20, 21 nanga Deuteronomium 10:17 e meki wi de seiker taki Yehovah e krutu sani na a yoisti fasi?

⁴ A no ala ten Bijbel e taki ala finifini sani fu wan tori. Fu eksempre, wi sabi taki David ben abi trutru berow fu den sani di a du (Ps. 51:2-4). Ma fa a de nanga a man di ben trangayesi a wet fu Sabat-dei? A ben abi berow fu san a ben du? A ben trangayesi den wet fu Yehovah wan leisi kaba? A no ben poti prakseri di sma pruberi fu warskow en, noso a ben weigri srefi fu arki den? Bijbel no e taki fu den sani disi. Ma toku wi kan de seiker fu disi: Yehovah „no e du kruktudu” (Deut. 32:4). Nofo tron te libisma e krutu wan tori, dan den e luku san tra sma e taigi den, den abi wan fowtu denki fu trawan, noso den e meki tra sani abi krakti na den tapu. Dati meki nofo tron den no e krutu sani na a yoisti fasi. Ma Yehovah no de so. Te a e krutu wan tori, dan a e luku a heri tori. (Leisi Genesis 18:20, 21; Deuteronomium 10:17.) O moro wi e leri fu Yehovah èn fu a fasi fa a e si sani, o moro wi o abi a frutrow taki a e krutu sani na a yoisti fasi. Son leisi wi e leisi wan tori na ini Bijbel di e meki taki wi e bigin aksi wisrefi son sani. Kande wi no man kisi piki tapu den aksi nownow, ma wi sabi nofo fu wi Gado fu de seiker taki „ala ten a e du san reti”.​—Ps. 145:17.

5. Fa sondu kan meki taki wi no e krutu wan tori na a yoisti fasi? (Luku sosrefi a faki „ Sondu kan meki taki wi no e krutu wan sani na a yoisti fasi”.)

⁵ Wi no man krutu sani na a yoisti fasi fu di wi na sondusma. Gado ben meki wi leki fa en de. Dati meki wi lobi te sma e koti krutu na a yoisti fasi (Gen. 1:26). Ma fu di wi na sondusma, meki a kan taki wi no  e krutu wan tori na a yoisti fasi, awinsi wi denki taki wi sabi a heri tori. Yu sabi ete fa Yona ati bron di Yehovah bosroiti fu sori sari-ati gi a pipel fu Ninefei? (Yona 3:10–4:1) Ma luku san pasa baka dati. Moro leki 120.000 sma fu Ninefei sori berow èn den tan na libi. Sobun, a no Yehovah no ben si a tori na a yoisti fasi, ma na Yona no ben e si en bun.

6. Fu san ede Yehovah no abi fu fruteri wi fu san ede a e teki son bosroiti?

⁶ Yehovah no abi fu fruteri libisma fu san ede a e teki son bosroiti. A tru taki na ini owruten Yehovah meki son futuboi fu en fruteri fa den ben e denki fu bosroiti di a ben o teki noso bosroiti di a ben teki kaba (Gen. 18:25; Yona 4:2, 3). Èn son leisi a ben e fruteri den tu fu san ede a ben teki den bosroiti dati (Yona 4:10, 11). Ma toku Yehovah no abi fu fruteri wi nomonomo fu san ede a e teki son bosroiti. Fu di en na wi Mekiman, meki a no abi fu aksi wi efu wan bosroiti di a wani teki bun, noso efu wi feni en bun taki a du son sani.​—Yes. 40:13, 14; 55:9.

7. San kan muilek gi wi èn fu san ede?

⁷ A no de fu taki dati wi e bribi nanga wi heri ati taki ala ten Yehovah e du san reti. Ma san kan muilek gi wi, na fu frutrow den sma di e teki presi gi en. Kande wi e aksi wisrefi efu den brada di e teki fesi na ini na organisâsi fu Yehovah e du sani soleki fa Yehovah wani, noso efu den e du san den srefi wani. Kande na dati son sma ben e denki na ini Bijbel ten. Luku na eksempre di skrifi na ini  paragraaf 3. Wan famiri fu a man di ben pasa a Sabat-wet ben kan aksi ensrefi efu trutru Moses ben aksi Yehovah san fu du, fosi a bosroiti taki a man disi ben musu dede. Èn di a wefi fu a Hètsma Uria du hurudu nanga David, dan wan mati fu Uria ben kan denki taki David gebroiki a posisi fu en leki kownu fu no kisi a strafu di a ben musu kisi. Yehovah e frutrow den sma di a poti fu teki fesi na ini na organisâsi èn na ini a gemeente. Sobun, efu wi no e frutrow den man disi, dan wi no kan taki dati wi e frutrow Yehovah.

8. Fa den sani di skrifi na Tori 16:4, 5 e kruderi nanga a fasi fa sani e waka na ini a gemeente na ini a ten disi?

⁸ Na ini a ten disi, Yehovah e tiri den futuboi fu en na grontapu nanga yepi fu „a koni srafu di de fu frutrow” (Mat. 24:45). Neleki den brada di ben e teki fesi na ini a ten fu den fosi Kresten, na so a srafu disi e tiri a pipel fu Gado na heri grontapu èn a e gi den gemeente owruman rai. (Leisi Tori 16:4, 5.) Den owruman e gebroiki den rai dati na ini den gemeente. Te wi e gi yesi na den rai di wi e kisi fu na organisâsi èn fu den owruman, dan wi e sori taki wi abi a frutrow taki ala ten Yehovah e du sani na wan reti fasi.

9. O ten wi kan feni en muilek fu horibaka gi wan bosroiti di den owruman teki èn fu san ede?

⁹ Son leisi a kan taki wi feni en muilek fu horibaka gi den bosroiti di den owruman teki. Fu eksempre, na ini den yari di pasa, furu gemeente moksi kon na wán èn disi meki taki son gemeente kon de fu wan tra kring. Son leisi den owruman aksi preikiman fu go na wan tra gemeente, so taki ala Kownukondre zaal kan abi nofo sma. Efu den brada aksi wi fu go na wan nyun gemeente, dan kande wi kan feni en muilek fu gowe libi wi mati nanga wi famiri. A de so taki na Gado e taigi den  owruman na sortu gemeente den musu seni ibri preikiman? Nôno. Èn a sani dati kan meki en muilek gi wi fu gi yesi na a rai di wi kisi. Ma Yehovah e frutrow den owruman di e teki den bosroiti disi èn wi musu frutrow den tu. *

10. Fu san ede wi musu wroko makandra nanga den owruman, soleki fa Hebrewsma 13:17 e sori?

¹⁰ Fu san ede wi musu horibaka gi den bosroiti di den owruman teki, awinsi wi no lobi den bosroiti dati? Fu di na so wi e yepi fu meki wánfasi tan na mindri a pipel fu Gado (Ef. 4:2, 3). Wan gemeente e go na fesi te ala sma de klariklari fu horibaka gi den bosroiti di den owruman teki. (Leisi Hebrewsma 13:17.) Ma san moro prenspari, na fu sori Yehovah taki wi e frutrow na en tapu te wi e wroko makandra nanga den wan di a poti fu tiri a pipel fu en.​—Tori 20:28.

11. San kan yepi wi fu kon abi moro frutrow na ini a fasi fa den owruman e tiri wi?

¹¹ Wi o kon abi moro frutrow na ini a fasi fa den owruman e tiri wi te wi e hori na prakseri taki den e begi fu a santa yeye yepi den te den musu poti prakseri na afersi di abi fu du nanga a gemeente. Den e luku bun tu sortu Bijbel gronprakseri den kan gebroiki èn sortu rai Yehovah en organisâsi e gi. Den wani du sani trutru soleki fa Yehovah wani èn den wani du ala san den man fu sorgu bun gi a pipel fu Gado. Den man disi sabi taki Yehovah e luku a fasi fa den e sorgu a pipel fu en (1 Petr. 5:2, 3). Prakseri a sani disi: Na ini a grontapu disi pe sma fu difrenti ras, kerki, nanga politiek grupu e tyari prati kon, a pipel fu Yehovah de na ini wánfasi fu di den e anbegi a wan-enkri tru Gado. Disi e pasa soso fu di Yehovah e horibaka gi den.

12. Na sortu sani den owruman musu poti prakseri te den e luku efu wan sma abi trutru berow?

¹² Yehovah gi den owruman a seryusu frantwortu fu hori a gemeente krin. Efu wan Kresten du wan seryusu sondu, dan Yehovah wani taki den owruman musu luku efu a sma dati kan de wan Yehovah Kotoigi ete. Wan fu den sani di den musu luku na efu a sma abi trutru berow fu a sani di a du. Kande a sma e taki dati a abi berow, ma a e tegu trutru gi a sani di a du? A o du ala san a man fu no du a sondu dati moro? Efu na takru mati meki taki a du a sondu dati, dan a de klariklari fu no bumui moro nanga den mati dati? Den owruman e begi Yehovah, den e luku a tori finifini, den e luku san Bijbel e taki, èn den e ondrosuku fa a sma e denki fu a sondu di a du. Baka dati den e bosroiti efu a sma disi kan tan wan Yehovah Kotoigi. Son leisi a de fanowdu taki den puru so wan sma fu a gemeente.​—1 Kor. 5:11-13.

13. San wan sma kan aksi ensrefi te den puru wan mati noso wan famiriman fu en fu a gemeente?

¹³ San kan meki en muilek gi wi fu frutrow den owruman? Efu a sma di den puru fu a gemeente no de wan bun mati noso wan famiriman, dan kande a no o muilek gi wi fu horibaka gi a bosroiti di den owruman teki. Ma kow taki dati a sma di den puru fu a gemeente na wan bun mati fu wi. Kande wi e aksi wisrefi efu den owruman luku a tori finifini, noso efu den koti krutu soleki fa Yehovah ben o du dati. San kan yepi wi fu tan horibaka gi a bosroiti di den teki?

14. San kan yepi wi te den owruman puru wan mati noso wan famiriman fu wi fu a gemeente?

 ¹⁴ Wi no musu frigiti taki na Yehovah seti sani so, taki den kan puru sma fu a gemeente. Boiti dati, a seti disi e tyari wini kon gi a gemeente èn a kan tyari wini kon tu gi a sma di du wan sondu. Efu wan sma di no abi berow fu a sondu di a du e tan wan Kotoigi, dan a kan gi trawan deki-ati fu du sondu tu (Gal. 5:9). Kande a no ben o frustan tu o seryusu a sondu de di a du. Èn kande a no o wani kenki a denki fu en èn a fasi fa a e tyari ensrefi, so taki Yehovah kan feni en bun baka (Preik. 8:11). Wi kan de seiker taki te den owruman musu bosroiti efu den o puru wan sma fu a gemeente, dan den e si a sani dati leki wan seryusu frantwortu. Neleki den krutuman na ini owruten Israel, den e frustan taki ’a no libisma poti den fu koti krutu, ma na Yehovah’.​—2 Kron. 19:6, 7.

15. Fu san ede wi musu kon abi moro frutrow now na ini a fasi fa Yehovah e du sani?

¹⁵ Now di a grontapu disi e kon na wan kaba, wi musu abi moro frutrow na ini a fasi fa Yehovah e du sani. Fu san ede? Na a ten fu a bigi banawtu, a kan taki wi e kisi rai di no makelek fu frustan noso kande wi o feni en muilek fu gi yesi na den rai dati. A no de fu taki dati Yehovah no o kon langalanga fu taki nanga wi. A musu de so, taki a o gi wi rai nanga yepi fu den wan di a poti fu teki fesi. Na a ten dati wi no musu tweifri na a rai di wi o kisi. Èn wi no musu aksi wisrefi: ’A sani disi e komoto fu Yehovah, noso den brada di e teki fesi e du san den srefi wani?’ Yu o frutrow tapu Yehovah nanga na organisâsi fu en na a prenspari ten dati? A bun fu luku fa yu e denki fu a tiri di yu e kisi fu Yehovah en organisâsi now. Efu yu e frutrow den rai di wi e kisi na ini a ten disi èn efu yu de klariklari fu gi yesi na den, dan a o moro makriki gi yu fu du dati na a ten fu a bigi banawtu.​—Luk. 16:10.

16. San kan meki en muilek gi wi na ini a ten di e kon fu frutrow a fasi fa Yehovah e du sani?

¹⁶ Ete wan sani de di wi musu hori na prakseri: Yehovah o krutu sma na a kaba fu a grontapu disi. Nownowde wi e howpu taki furu sma di no e dini Yehovah ete, sosrefi den famiriman fu wi, o bosroiti fu dini en fosi a kaba doro. Ma na Armagedon, Yehovah o meki Yesus bosroiti san o pasa nanga den sma disi (Mat. 25:31-33;  2 Tes. 1:7-9). A no wi o bosroiti gi suma Yehovah o sori sari-ati èn gi suma a no o du dati (Mat. 25:34, 41, 46). Wi o man horibaka gi den bosroiti di Yehovah teki, noso den o meki wi naki futu? A no de fu taki dati wi musu kon abi moro frutrow na ini Yehovah now, so taki wi o man frutrow na en tapu nanga wi heri ati na ini a ten di e kon.

17. Fa wi o kisi wini fu den bosroiti di Yehovah o teki na a kaba fu a grontapu disi?

¹⁷ Prakseri fa wi o firi na ini a nyun grontapu, baka te Yehovah krutu libisma. Wan kaba o kon na falsi bribi, na den gridi bisnis, èn na den politiek makti di kwinsi libisma èn di meki den pina hondrohondro yari langa. Boiti dati, sma no o siki moro, den no o owru, èn nowan lobiwan fu wi o dede. Wán dusun yari langa, Satan nanga den ogri yeye fu en no o man pina libisma moro. Wan kaba o kon na den bakapisi fu den ogri di den e du (Openb. 20:2, 3). Na a ten dati wi o breiti srefisrefi taki wi ben abi a frutrow taki ala ten Yehovah e du san reti.

18. San wi kan leri fu a fasi fa den Israelsma ben e tyari densrefi, soleki fa skrifi na Numeri 11:4-6 èn 21:5?

¹⁸ Ma te wi de na ini a nyun grontapu fu Gado, yu denki taki son sani kan meki en muilek gi wi fu abi a frutrow taki ala ten Yehovah e du san reti? Luku san pasa syatu baka di den Israelsma komoto na ini katibo na Egepte. Wan tu fu den bigin kragi taki den ben e misi a switi nyanyan di den ben abi drape èn den ben e tegu gi a mana di Yehovah ben gi den. (Leisi Numeri 11:4-6; 21:5.) Na so wi o denki tu baka a bigi banawtu? Wi no sabi o furu wroko wi o abi fu du fu krin grontapu èn fu meki a tron wan paradijs safrisafri. A no de fu taki dati wroko o lai èn a libi no o makelek na a bigin. Wi o kragi fu den sani di Yehovah o gi wi na a ten dati? Wán sani wi sabi seiker: Efu wi e warderi den sani di Yehovah e gi wi now, dan wi o abi moro warderi gi den sani di a o gi wi na a ten dati.

19. San na den prenspari sani di wi leri na ini na artikel disi?

¹⁹ Ala ten Yehovah e du san reti. Wi musu bribi dati. Wi musu abi frutrow tu na ini den wan di Yehovah poti fu teki fesi. Noiti wi musu frigiti den wortu disi di Yehovah ben meki a profeiti Yesaya taki: „Efu unu wani de tranga, dan a wan-enkri sani di un musu du na fu tan tiri èn frutrow na mi tapu.”​—Yes. 30:15.