1-2. (a) Tanbasá ohin loron ema barak sente susar atu tau fiar ba autoridade sira? (b) Iha lisaun neʼe, ita sei aprende saida?

OHIN loron ema barak sente susar atu tau fiar ba autoridade sira. Sira dehan katak sistema legál no polítika apoia deʼit ema neʼebé riku no iha kbiit, no la hatudu justisa ba ema kiak. Bíblia hatete: “Ema mak domina ema seluk, no neʼe lori deʼit susar.” (Ecle 8:9) Ulun-naʼin relijiaun balu mós halo hahalok aat, no neʼe halo ema lakon fiar ba Maromak. Tan neʼe, se ita estuda Bíblia ho ema ida, ita presiza ajuda nia atu tau fiar ba Jeová no mós ba sira neʼebé Jeová hili atu dirije ita.

² Klaru katak, laʼós estudante Bíblia deʼit mak presiza aprende atu tau fiar ba Jeová no ninia organizasaun. Maski ita serbí Jeová ba tinan barak ona, ita mós tenke hametin nafatin ita-nia fiar katak Jeová nia dalan atu halo buat ruma mak sempre loos. Dala ruma, situasaun balu bele mosu no koko ita-nia fiar ba Jeová. Iha lisaun neʼe, ita sei aprende situasaun tolu neʼebé bele koko ita-nia fiar: (1) bainhira ita lee istória ruma iha Bíblia, (2) bainhira ita simu matadalan husi Jeová nia organizasaun, no (3) bainhira ita hasoru susar iha futuru.

3. Oinsá mak istória balu iha Bíblia bele koko ita-nia fiar ba Jeová?

 ³ Bainhira lee Bíblia, dala ruma ita duvida ho dalan neʼebé Jeová trata ema balu no mós ninia desizaun balu. Porezemplu, iha livru Números, ita lee kona-ba Jeová fó kastigu-mate ba mane Izraél ida neʼebé halibur ai iha loron Sábadu.  Tinan barak liutiha, livru Segundu Samuel konta katak Jeová fó perdua ba Liurai David neʼebé halo sala seksuál no mós oho ema. (Núm 15:32, 35; 2 Sam 12:9, 13) Karik ita hanoin: ‘Tanbasá Jeová fó perdua ba David neʼebé oho ema no halo sala seksuál, maibé fó kastigu-mate ba mane ida neʼebé ninia sala haree ladún sériu?’ Atu hatán ba pergunta neʼe, mai ita koʼalia kona-ba buat tolu neʼebé ita presiza hanoin-hetan bainhira ita lee Bíblia.

4. Oinsá Génesis 18:20, 21 no Deuteronómio 10:17 hametin ita-nia fiar ba Jeová nia desizaun sira?

⁴ Dala barak Bíblia la temi informasaun hotu husi akontesimentu ruma. Porezemplu, ita hatene katak David arrepende an husi laran. (Sal 51:2-4) Maibé mane neʼebé kontra ukun-fuan kona-ba loron Sábadu mak ema hanesan saida? Nia arrepende ninia sala ka lae? Antes neʼe, nia mós kontra Jeová nia ukun-fuan ka lae? Nia hatudu ona katak nia lakohi simu konsellu ka lae? Bíblia la fó sai kona-ba neʼe. Maibé, ita bele fiar katak Jeová “sempre hatudu justisa”. (Deut 32:4) Bainhira nia halo desizaun, nia sempre haree ba faktu hotu no la rona deʼit ba buat neʼebé ema hatete, la todan ba sorin, no la husik buat seluk tan atu fó influénsia ba ninia desizaun. (Lee Génesis 18:20, 21; Deuteronómio 10:17.) Bainhira ita aprende liután kona-ba Jeová no ninia matadalan sira, ita sei iha konfiansa liután ba Jeová nia desizaun sira. Maski ita sente duvida ho istória ruma iha Bíblia no labele hetan resposta agora, maibé iha ona informasaun barak neʼebé bele ajuda ita atu fiar metin katak ita-nia Maromak “nia dalan sira hotu mak loos”.​—Sal 145:17.

5. Tanba la perfeitu, oinsá mak ida-neʼe afeta ita-nia hanoin kona-ba justisa? (Haree mós kaixa “ Tanba la perfeitu, ita iha hanoin neʼebé la loos kona-ba justisa”.)

⁵ Tanba la perfeitu, dala barak ita-nia hanoin kona-ba buat neʼebé justu la loos. Maromak kria ita tuir ninia ilas, tan neʼe ita hakarak ema hotu hetan justisa. (Gén 1:26) Maibé tanba la perfeitu, ita bele komprende sala situasaun, maski ita hanoin katak ita iha faktu hotu.  Porezemplu, Jonas la kontente ho Jeová nia desizaun atu hatudu laran-sadiʼa ba ema Nínive. (Jonas 3:10–4:1) Maibé hanoin toʼok kona-ba rezultadu husi Jeová nia desizaun neʼe. Ema Nínive naʼin-120.000 liu arrepende an no hetan salvasaun. Ikusmai, Jonas mak tenke troka ninia hanoin, laʼós Jeová.

6. Tanbasá Jeová la presiza esplika ninia desizaun sira?

⁶ Jeová la presiza esplika ninia desizaun sira. Maski nuneʼe, iha tempu uluk Jeová fó duni oportunidade ba ninia atan atu fó sai sira-nia hanoin kona-ba desizaun neʼebé nia atu halo ka halo ona. (Gén 18:25; Jonas 4:2, 3) No dala ruma mós Jeová esplika razaun ba ninia desizaun sira. (Jonas 4:10, 11) Maibé tuir loloos, Jeová la presiza esplika ba ita razaun husi ninia desizaun sira. Nia mak ita-nia Kriadór, nia la presiza husu ita-nia lisensa antes ka depois nia halo buat ruma.​—Isa 40:13, 14; 55:9.

7. Karik susar ba ita atu halo saida, no tanbasá?

⁷ Ita hotu hatene ho klaru katak Jeová sempre halo buat neʼebé loos. Maibé dala barak susar ba ita atu tau fiar ba ema neʼebé Jeová hili atu dirije ita. Dala ruma karik ita duvida se sira halo tuir duni Jeová nia matadalan ka sira halo tuir deʼit sira-nia hanoin. Karik ema iha Bíblia nia tempu mós hanoin hanesan neʼe. Hanoin toʼok kona-ba ezemplu neʼebé temi iha  parágrafu 3. Família husi mane neʼebé kontra ukun-fuan kona-ba loron Sábadu, karik bele hanoin: ‘Moisés husu ona Jeová ka lae antes fó sai desizaun kona-ba kastigu-mate?’ No Urias nia belun sira, karik bele hanoin: ‘David aproveita ninia podér nuʼudar liurai atu hasees an husi kastigu neʼebé nia merese atu hetan.’ Jeová konfia ema sira neʼebé nia hili atu dirije ninia organizasaun no kongregasaun. Tan neʼe, se ita la tau fiar ba mane sira-neʼe, ita labele dehan katak ita fiar Jeová.

8. Tuir Apóstolu 16:4, 5, saida mak hanesan entre kongregasaun iha tempu uluk no ohin loron?

⁸ Ohin loron, Jeová dirije ninia organizasaun parte rai nian liuhusi “atan laran-metin no matenek”. (Mt 24:45) Hanesan grupu administradór iha apóstolu sira-nia tempu, atan laran-metin mós tau matan Maromak nia povu iha mundu tomak no fó matadalan ba katuas sira. (Lee Apóstolu 16:4, 5.) Tuirmai, katuas sira implementa matadalan neʼe. Ita hatudu katak ita tau fiar ba Jeová liuhusi halo tuir matadalan neʼebé ita simu husi organizasaun no katuas sira.

9. Saida mak bele halo susar ba ita atu halo tuir katuas sira-nia desizaun, no tanbasá?

⁹ Dala ruma ita sente susar atu halo tuir desizaun husi katuas kongregasaun. Porezemplu, durante tinan balu nia laran, organizasaun halo mudansa oioin iha kongregasaun no área sira. Organizasaun hakarak atu uza didiʼak Reuniaun-Fatin sira, tan neʼe dala ruma katuas sira husu haklaken-naʼin sira atu muda ba kongregasaun seluk. Se katuas sira husu ita atu muda ba kongregasaun seluk, karik ita sente susar atu husik ita-nia belun no família sira. Ita hatene katak laʼós Jeová mak fó-hatene katuas sira kona-ba haklaken-naʼin ida-neʼebé mak tenke muda ba kongregasaun foun. Tan neʼe, karik ita sente susar atu halo tuir matadalan neʼebé ita simu. Maibé Jeová tau fiar  ba katuas sira atu halo desizaun, no ita mós presiza tau fiar ba sira. *

10. Tuir Ebreu 13:17, tanbasá ita presiza apoia katuas sira?

¹⁰ Tanbasá ita presiza apoia no halo tuir katuas sira-nia desizaun maski ita la gosta? Hodi halo nuneʼe, ita sei haburas unidade iha Maromak nia povu nia leet. (Éf 4:2, 3) Kongregasaun sei iha dame no unidade bainhira ita hotu halo tuir desizaun husi grupu katuas. (Lee Ebreu 13:17.) Importante liu mak, ita hatudu ba Jeová katak ita tau fiar ba nia liuhusi apoia ema neʼebé nia hili ona atu tau matan ita.​—Após 20:28.

11. Saida mak bele ajuda ita atu tau fiar ba matadalan husi katuas sira?

¹¹ Ita bele tau fiar liután ba desizaun husi katuas sira se ita hanoin-hetan katak bainhira katuas sira koʼalia kona-ba asuntu ruma neʼebé afeta kongregasaun, katuas sira halo orasaun atu Jeová haraik ninia espíritu santu. Sira mós koʼalia hamutuk kona-ba Bíblia nia prinsípiu neʼebé liga ho asuntu neʼe no mós buka matadalan husi Jeová nia organizasaun. Katuas sira hakarak tebes atu halo Jeová kontente no tau matan didiʼak ba Jeová nia bibi sira. Sira hatene katak sira sei hatán ba Jeová kona-ba dalan neʼebé sira halaʼo sira-nia responsabilidade. (1 Ped 5:2, 3) Hanoin toʼok ida-neʼe: Baibain rasa, relijiaun no polítiku haketak ema, maibé Jeová nia povu adora Maromak loos ida deʼit ho unidade. Neʼe bele akontese tan deʼit Jeová haraik bensaun ba ninia organizasaun.

12. Katuas sira sei hanoin kona-ba saida atu bele deside se ema ida arrepende an duni ka lae?

¹² Jeová fó responsabilidade boot ba katuas sira atu mantein kongregasaun moos nafatin. Se ema Kristaun ida halo sala sériu, Jeová hakarak katuas sira atu deside se ema neʼe bele kontinua sai parte ba kongregasaun. Sira presiza buka-hatene se ema neʼe arrepende an duni. Karik ema neʼe dehan katak nia arrepende an, maibé nia odi buat neʼebé nia halo ka lae? Nia deside metin atu la halo fali sala neʼe ka lae? Se nia monu ba sala tanba ransu ho ema aat, nia prontu atu la ransu tan ho ema sira-neʼe ka lae? Katuas sira sei halo orasaun no hanoin kona-ba faktu sira no kompara neʼe ho eskritura, no sira mós buka-hatene ema neʼe nia sentimentu kona-ba situasaun neʼe. Tuirmai sira sei deside se ema neʼe nafatin bele sai parte ba kongregasaun ka lae. Dala ruma, kongregasaun presiza hasai ema neʼebé halo sala sériu.​—1 Kor 5:11-13.

13. Karik ita sei hanoin saida se kongregasaun hasai ita-nia família ka belun ida?

¹³ Oinsá mak ita-nia konfiansa ba katuas sira bele hetan koko? Karik fasil ba ita atu simu katuas sira-nia desizaun se ema neʼebé kongregasaun hasai laʼós ita-nia belun ka família. Maibé karik susar atu halo nuneʼe se ema neʼebé kongregasaun hasai mak ita-nia belun ka família. Karik ita hanoin: ‘Katuas sira haree ona faktu hotu ka lae? Sira tesi-lia tuir dalan neʼebé Jeová tesi-lia iha situasaun neʼe ka lae?’ Saida mak bele ajuda ita atu iha hanoin neʼebé loos kona-ba katuas sira-nia desizaun?

14. Saida mak bele ajuda ita se katuas sira deside atu hasai ita-nia belun ka família husi kongregasaun?

¹⁴ Ita presiza hanoin-hetan katak hasai ema husi kongregasaun mak Jeová nia  arranju no neʼe bele lori benefísiu ba kongregasaun no mós karik ba ema neʼebé halo sala. Se ema neʼebé la arrepende an kontinua sai parte ba kongregasaun, nia bele fó influénsia aat ba ema seluk. (Gal 5:9) Karik nia mós sei la rekoñese katak ninia sala mak sériu, no karik la sente katak nia presiza troka ninia hanoin no hahalok atu nuneʼe Jeová bele simu fali nia. (Ecle 8:11) Ita bele fiar katak kuandu katuas sira konsidera atu hasai ema husi kongregasaun, sira halo desizaun neʼe ho kuidadu. Sira rekoñese katak, hanesan juís iha Izraél antigu, sira “tesi-lia hodi Jeová nia naran, laʼós ema nia naran”.​—2 Krón 19:6, 7.

15. Tanbasá importante atu tau fiar ba Jeová nia matadalan agora?

¹⁵ Nuʼudar sistema neʼe nia rohan besik daudaun, ita presiza tau fiar liután ba dalan neʼebé Jeová halo buat ruma. Tanbasá? Durante terus boot, karik ita sei simu matadalan neʼebé oin-seluk, no susar ba ita atu komprende ka aplika. Klaru katak Jeová sei la koʼalia kedas ba ita. Nia sei fó matadalan liuhusi mane sira neʼebé nia hili atu dirije ita. Neʼe laʼós tempu atu duvida kona-ba matadalan neʼebé ita simu ka husu: ‘Matadalan neʼe mai duni husi Jeová, ka neʼe mak irmaun sira-nia hanoin?’ Ita sei tau fiar ba Jeová no ninia organizasaun durante tempu importante neʼe ka lae? Atu hetan resposta ba pergunta neʼe, ita presiza analiza ita-nia hanoin kona-ba matadalan neʼebé ita simu agora. Se ita tau fiar ba matadalan neʼebé ita simu agora no prontu atu halo tuir, ita bele fiar katak ita mós sei halo nuneʼe durante terus boot.​—Lc 16:10.

16. Oinsá mak ita-nia fiar ba Jeová nia desizaun bele hetan koko iha futuru?

¹⁶ Ita mós presiza hanoin kona-ba saida mak ita sei halo bainhira Jeová tesi-lia iha mundu aat neʼe nia rohan. Agora daudaun, ita-nia hakarak mak ema barak neʼebé seidauk serbí Jeová, inklui ita-nia família, atu deside serbí Jeová antes mundu nia rohan mai. Maibé iha Armagedon, liuhusi Jesus, Jeová sei halo desizaun ikus kona-ba sira-nia futuru. (Mt 25:31-33; 2 Tes 1:7-9) Iha tempu neʼebá, laʼós ita mak sei deside kona-ba sé mak merese simu Jeová nia laran-sadiʼa no sé mak la merese. (Mt 25:34, 41, 46) Ita sei tau fiar ba Jeová nia desizaun ka ita sei para atu serbí Jeová tanba ita la konkorda ho ninia desizaun? Ita presiza hametin ita-nia fiar ba Jeová agora atu nuneʼe ita bele tau fiar tomak ba nia iha futuru.

17. Ita sei hetan benefísiu saida husi Jeová nia desizaun iha sistema neʼe nia rohan?

 ¹⁷ Imajina toʼok saida mak ita sei sente iha mundu foun bainhira ita haree rezultadu diʼak husi Jeová nia desizaun. Relijiaun falsu sei la iha tan. Sistema komersiál no polítiku neʼebé kaan-teen, hanehan ema no hamosu susar mós sei la iha tan. Ita sei la moras tan, la sai idade, no mós mate sei la iha tan. Satanás no anju aat sira sei la fó influénsia tan ba ema durante tinan rihun ida. Konsekuénsia aat tanba sira kontra Maromak, sei lakon tiha. (Apok 20:2, 3) Klaru katak ita sei agradese tebes tanba ita tau fiar ba Jeová nia dalan atu halo buat ruma.

18. Ita bele aprende lisaun saida husi ema Izraél hanesan hakerek iha Números 11:4-6 no 21:5?

¹⁸ Iha mundu foun, sei iha situasaun ruma neʼebé bele koko ita-nia fiar kona-ba Jeová nia dalan atu halo buat ruma ka lae? Karik. Hanoin toʼok buat neʼebé akontese lakleur depois ema Izraél sai livre husi rai-Ejitu. Ema balu komesa muramura tanba hanoin kona-ba ai-han iha rai-Ejitu, no sira komesa hakribi maná neʼebé Jeová fó ba sira. (Lee Números 11:4-6; 21:5.) Ita mós sei iha hanoin hanesan neʼe depois terus boot remata ka lae? Ita seidauk hatene ho loloos kona-ba serbisu neʼebé ita sei halo atu hamoos rai no neineik-neineik halo rai neʼe sai paraízu. Klaru katak sei iha serbisu barak atu halo no karik foufoun la fasil atu halaʼo ita-nia moris. Ita sei brani atu muramura kona-ba buat neʼebé Jeová fó ba ita iha tempu neʼebá ka lae? Importante atu hanoin-hetan: Se ita hatudu agradese ba buat neʼebé Jeová fó ba ita agora, ita mós sei hatudu agradese ba buat neʼebé Jeová sei fó ba ita iha tempu neʼebá.

19. Esplika toʼok pontu importante neʼebé ita aprende husi lisaun neʼe.

¹⁹ Jeová nia dalan atu halo buat ruma mak sempre loos. Ita presiza fiar ida-neʼe. Ita mós presiza tau konfiansa ba ema sira neʼebé Jeová hili atu dirije ita. Labele haluha Jeová nia liafuan neʼebé nia fó sai liuhusi profeta Isaias: “Imi sei iha forsa se imi kalma nafatin no tau fiar ba haʼu.”​—Isa 30:15.