1-2. (a) Nkaambo nzi bantu banji mazuba aano ncocibayumina kusyoma baabo bali mubweendelezi? (b) Ino tulalanga-langa nzi mucibalo eeci?

 MAZUBA aano, bantu banji cilabayumina kubasyoma aabo bali mubweendelezi. Kayi balalibonena kuti mfwulumende alimwi amilawo zikwabilila buyo baabo bavwubide abalaanguzu, pele bacete tabalanganyizyigwi pe. Cakutainda mumbali Bbaibbele lyaamba kuti: ‘Muntu weendelezya muntunyina munzila iimuletela mapenzi.’ (Muk. 8:9) Kuyungizya waawo, basololi bazikombelo bamwi bacita zintu zibyaabi, calo cipa kuti bamwi bantu bacileke kumusyoma Leza. Aboobo ciindi notwiiya Bbaibbele amuntu umwi, atumugwasye kusyoma Jehova alimwi abaabo mbasalide kusololela aano aanyika.

² Nokuba boobo, tabali basikwiiya Bbaibbele balikke beelede kwiiya kusyoma Jehova alimwi ambunga yakwe. Nokuba kuti twamubelekela Jehova myaka minji, tatweelede kuleka kusyoma kuti lyoonse ucita ziluzi. Zimwi ziindi, kulaba bukkale bumwi bukonzya kusunka lusyomo lwesu muli Jehova. Mucibalo eeci, tulalanga-langa bukkale botatwe lusyomo lwesu molukonzya kusunkwa: (1) ciindi notubala zibalo zimwi zyamu Bbaibbele, (2) ciindi nitwatambula busolozi kuzwa kumbunga ya Jehova, mpoonya (3) ciindi twaakujana buyumuyumu kumbele.

3. Mbuti zibalo zimwi zyamu Bbaibbele mbozikonzya kusunka lusyomo lwesu muli Jehova?

 ³ Ciindi notubala Jwi lya Leza, tulakonzya kulibuzya kaambo  Jehova ncaakeendelezya bantu bamwi munzila imwi alimwi akusala kumwi nkwaakacita. Mucikozyanyo, mubbuku lya Myeelwe, tubala kuti Jehova wakalailila kuti mwaalumi muna Israyeli iwakali kutebba nkuni mu Sabata ajaigwe. Mubbuku lyabili lya Samuele, tubala kuti nikwakainda myaka minji, Jehova wakamulekelela Mwami Davida akaambo kakucita bumambe alimwi akujaya muntu. (My. 15:32, 35; 2Sam. 12:9, 13) Aboobo tulakonzya kulibuzya kuti, ‘Nkaambo nzi Jehova ncaakamulekelela Davida ciindi naakacita bumambe akujaya muntu, pele wakalailila kuti mwaalumi iwakacita cibi cilibonya kuti ncisyoonto ajaigwe?’ Kutegwa twiingule mubuzyo ooyu, tweelede kutuyeeya twaambo ootu totatwe ciindi notubala Bbaibbele.

4. Mbuti lusyomo lwesu mboluyuma kujatikizya kusala kwa Jehova ciindi notubala Matalikilo 18:20, 21 a Deuteronomo 10:17?

⁴ Talili lyoonse Bbaibbele nolyaamba makani oonse aajatikizya cibalo cimwi. Mucikozyanyo, tulizyi kuti Davida wakeempwa ncobeni kuzibi zyakwe. (Int. 51:2-4) Pele ino mwaalumi iwakatyola mulawo wa Sabata wakali buti? Sena wakeempwa ncobeni kucintu ncaakacita? Sena kuli naakatyolede milawo ya Jehova musyule? Sena kuli naakaunduluzya naa kukaka lulayo ndwaakapedwe musyule? Bbaibbele talyaambi pe. Nokuba boobo, tulisinizyide kuti Jehova ‘taciti zitaluleme.’ (Dt. 32:4) Zyoonse nzyasala kucita inga ziyeeme atwaambo twamasimpe, kutali mamvwaamvwa buyo, lusalululo, naa cintu cili coonse cikonzya kupa bantu kutasala camaano akaambo kabukkale. (Amubale Matalikilo 18:20, 21; Deuteronomo 10:17.) Ciindi notwiiya zinji kujatikizya Jehova azyeelelo zyakwe, tulakonzya kuzisyoma zintu nzyasala. Nokuba kuti zibalo zyamu Bbaibbele zimwi inga zyatupa kubuzya mibuzyo njotutakonzyi kwiingula aciindi cino, tulisinizyide kuti Leza “uliluleme munzila zyakwe zyoonse.”—Int. 145:17.

5. Mbuti kutalondoka mbokutupa kutazibona munzila iiluzi zintu? (Amubone kabbokesi kakuti “ Kutalondoka Kutupa Kutazibona Munzila liluzi Zintu.”)

⁵ Talili lyoonse notukonzya kusala camaano nkaambo tatulondokede. Leza wakatulenga mucinkonzya cakwe, aboobo tulayanda kuti bantu kabeendelezyegwa kabotu. (Matl. 1:26)  Pele akaambo kakuti tatulondokede, tulakonzya kwiimpya mbotuzyibona zintu, nokuba kuti tulituzyi twaambo toonse tujatikizyidwe. Mucikozyanyo, amuyeeye buyo mbwaatakakkomana Jona ciindi Jehova naakasala kubafwida luse bana Nineve. (Jon. 3:10–4:1) Pele amuyeeye buyo cakazwa mpawo. Bana Nineve ibainda ku 120,000, ibakeempwa bakafwutulwa. Kumamanino, cakalibonya kuti Jona nguwatakababona munzila iiluzi bantu, ikutali Jehova.

6. Nkaambo nzi Jehova ncateelede kutupandulwida kusala kwakwe?

⁶ Jehova tayandiki kutupandulwida buya zintu nzyasala kucita. Masimpe kuti, Jehova kaindi wakali kubazumizya babelesi bakwe kwaamba mbobakali kulimvwa kujatikizya kusala nkwaakacita naa nkwaakali kuyanda kucita. (Matl. 18:25; Jon. 4:2, 3) Alimwi zimwi ziindi, wakali kubapandulwida kusala kwakwe. (Jon. 4:10, 11) Nokuba boobo, Jehova tayelede kutupandulwida pe. Mbwali Mulengi wesu, kunyina nayandika kuzumizyigwa andiswe eelyo nayanda kucita cintu cimwi naa amanizya kucicita.—Is. 40:13, 14; 55:9.

7. Mbuyumuyumu nzi mbotukonzya kujana, alimwi nkaambo nzi?

⁷ Tulazumina kuzwa ansi amyoyo yesu kuti Jehova lyoonse ucita ziluzi. Nokuba boobo, buyumuyumu mbotukonzya kujana, nkusyoma baalumi basalidwe. Tulakonzya kudooneka naa aabo basololela mbunga ya Jehova balabeleka kweelana abusolozi buzwa kuli Jehova naa mbubwabo buyo. Ambweni oobu mbobakali kuyeeya bantu bamwi ibakali kupona kaindi. Amubone zikozyanyo zyaambidwe  mumuncali 3. Munamukwasyi wamwaalumi iwakatyola mulawo wa Sabata ambweni wakali kuyeeya naa Musa wakabandika ncobeni a Jehova katanapa malailile aakuti mwaalumi ooyu ajaigwe. Awalo mulongwe wa Uriya mu Hiti, uuli amukaintu Davida ngwaakacita limwi bumambe, ambweni wakali kuyeeya kuti Davida wakabelesya nguzu zyakwe zyabwami kutegwa atajaigwi. Masimpe ngakuti, tatukonzyi kwaamba kuti tulamusyoma Jehova ikuti naa katutabasyomi baiminizi bakwe aano anyika, balo Jehova mbasyoma.

8. Nkukozyanya nzi kuliko akati kambungano ya Bunakristo yamumwaanda wamyaka wakusaanguna ayamazuba aano? (Mil. 16:4, 5)

⁸ Mazuba aano, Jehova ulaisololela mbunga yakwe yaanyika kwiinda ‘mumuzike uusyomeka alimwi uucenjede.’ (Mt. 24:45) Mbubwenya mbuli kabunga keendeleezya kamumwaanda wamyaka wakusaanguna, ooyu muzike nguulanganya bantu ba Leza nyika yoonse akupa busolozi kubaalu bambungano. (Amubale Milimo 16:4, 5.) Mpoonya baalu, balabikkila maano kubona kuti busolozi bwatobelwa mumbungano. Tulatondezya kuti tulamusyoma Jehova kwiinda mukutobela busolozi buzwa kumbunga akubaalu.

9. Ndilili nocikonzya kutuyumina kutobela kusala nkobacita baalu, alimwi nkaambo nzi?

⁹ Zimwi ziindi, cilakonzya kutuyumina kutobela kusala nkobacita baalu. Mucikozyanyo, myaka misyoonto yainda, mbungano zinji zyakaswaanganizyigwa, calo cakapa kuti mbungano zimwi zitolwe mubbazu limwi. Baalu bakalomba basikumwaya bamwi kuti balongele kumbungano zimwi kutegwa Maanda aa Bwami kaabelesyegwa bukkwene. Kuti naa batulomba kulongela mumbungano mpya, cilakonzya kutuyumina kusiya banamukwasyi abalongwe. Sena baalu balaambilwa cacigaminina amuuya uusalala mbobakonzya  kwaapaula basikumwaya? Peepe. Aaka kaambo kalakonzya kupa kuti cituyumine kutobela busolozi mbobatupa. Pele Jehova ulabasyoma baalu ciindi nobasala zyakucita zili boobu, andiswe tweelede kubasyoma. *

10. Kweelana aba Bahebrayo 13:17, nkaambo nzi ncotweelede kubelekela antoomwe abaalu?

¹⁰ Nkaambo nzi ncotweelede kubelekela antoomwe abaalu alimwi akutobela kusala nkobacita nokuba kuti takweendelani akuyanda kwesu? Kucita boobo, kuyootugwasya kubamba lukamantano akati kabantu ba Leza. (Ef. 4:2, 3) Mbungano zilakomena kapati kuti boonse cakulicesya kabatobela kusala kucitwa akabunga kabaalu. (Amubale Bahebrayo 13:17.) Ciyandika kapati, nkutondezya kuti tulamusyoma Jehova kwiinda mukubelekela antoomwe abaabo mbasalide kutusololela.—Mil. 20:28.

11. Ncinzi cikonzya kutugwasya kubusyoma busolozi mbotutambula kuzwa kubaalu?

¹¹ Tulakonzya kubusyoma kapati busolozi mbotutambula kuzwa kubaalu kwiinda mukuyeeya kuti inga basaanguna kulomba muuya uusalala ciindi nobalanga-langa makani aajatikizya mbungano. Alimwi cakulomya inga balalanga-langa njiisyo zyamu Bbaibbele zikonzya kugwasya akulanga malailile aazwa kumbunga ya Jehova. Balayandisisya kapati kukkomanisya Jehova alimwi akubalanganya kabotu bantu ba Leza. Baalumi basyomeka aaba balizyi kuti bayoolyaambilila kuli Leza kweelana ambobailanganya mikuli yabo. (1Pet. 5:2, 3) Amuyeeye kujatikizya kaambo aaka: Munyika eeyi yaandanizyidwe akaambo kamubala, bukombi, alimwi atwaambo twacisi, bantu ba Jehova balikamantene kukomba Leza wakasimpe omwe. Eeci cilakonzyeka akaambo kakugwasyigwa ambunga ya Jehova!

12. Ntwaambo nzi ntobalanga-langa baalu ciindi nobayanda kuzyiba naa muntu weempwa ncobeni?

¹² Jehova wakapa baalu mukuli mupati wakubona kuti mbungano ilasalala. Kuti naa Munakristo wacita cibi cipati, Jehova uyanda kuti baalu bamulange-lange muntu ooyo akubona naa uleelela kuzumanana kuba mumbungano. Akati kazintu nzyobalanga-langa, inga bayanda kubona naa muntu ooyo weempwa ncobeni kucibi ncaakacita. Ulakonzya kulitondezya mbuli kuti weempwa, pele sena masimpe ulicisulide cibi ncaakacita? Sena ulikanzide kutaciinduluka cibi eeco? Kuti naa nkuyanzana abalonge babyaabi nkokwakapa kuti abisye, sena ulilibambilide kucileka kumvwana ambabo? Baalu balapaila kuli Jehova, balatulanga-langa twaambo alimwi ancolyaamba Bbaibbele, kumane balalanga-langa kubona sikubisya mbwalimvwa kujatikizya cibi ncaakacita. Mpoonya balasala naa muntu ooyo inga wazumanana kuba mumbungano. Zimwi ziindi, weelede kugusyigwa mumbungano.—1Kor. 5:11-13.

13. Nkulibilika kuli buti nkotukonzya kuba ankuko kuti munamukwasyi naa mulongwe wagusyigwa mumbungano?

¹³ Mbuti lusyomo lwesu mubaalu mbolukonzya kusunkwa? Kuti muntu iwagusyigwa mumbungano katali munamukwasyi naa mulongwe wesu, inga catuubila kukuzumina kusala kwabaalu. Pele ino mbuti kuti ooyo iwagusyigwa mumbungano mulongwe wesu? Tulakonzya kutalika kuyeeya kuti baalu tiibakatulanga-langa twaambo toonse, naa tulakonzya kudooneka kuti bakasala kweelana ambwakonzya kucita Jehova. Ncinzi cikonzya kutugwasya kuzumanana kukubona munzila iiluzi kusala kwakacitwa?

14. Ncinzi ncomukonzya kucita kuti baalu basala kuti munamukwasyi naa mulongwe agusyigwe mumbungano?

 ¹⁴ Tweelede kuyeeya kuti kugusya muntu mumbungano mbubambe bwa Jehova, bugwasya mbungano alimwi asikubisya. Ikuti sikubisya uuteempwi walekelwa kuzumanana mumbungano, ulakonzya kuyunga bamwi kucita cibi. (Gal. 5:9) Kuyungizya waawo, takonzyi kuzyiba mbocili cipati cibi ncaakacita, alimwi inga camwaalila kubona kuti uyandika kucinca mbwayeeya amicito kutegwa atalike kukkomaninwa a Jehova. (Muk. 8:11) Tweelede kuba alusyomo lwakuti ciindi nobalanga-langa kubona naa muntu weelede kugusyigwa mumbungano, baalu balaubikkila maano kapati mukuli wabo. Balizyi kuti, mbubwenya mbuli babetesi bamu Israyeli yansiku, ‘tababetekeli muntu pe, babetekela Jehova.’—2Mak. 19:6, 7.

15. Nkaambo nzi ncotuyandika kusyoma busolozi bwa Jehova lino kwiinda kaindi?

¹⁵ Mamanino anyika eeyi mbyaabi ali afwaafwi, aboobo tweelede kusyoma nzila Jehova mbwacita zintu lino kwiinda kaindi. Nkaambo nzi? Lyamapenzi mapati, tuyootambula malailile aayoolibonya mbuli kuti alakatazya kumvwisya naa kutobela. Masimpe ngakuti, Jehova takabandiki andiswe cacigaminina. Kulangilwa kuti uyootupa malailile kwiinda mubaiminizi bakwe. Eeco tacinooli ciindi cakudooneka naa kutalika kulibuzya kuti, ‘Mwati malailile aaya azwa kuli Jehova, naa mizeezo buyo yabakwesu beendelezya?’ Sena muyoomusyoma Jehova alimwi ambunga yakwe muciindi cikatazya eeco? Mbomububona busolozi buzwa kubaiminizi ba Leza lino kulakonzya kumugwasya kujana bwiinguzi bwamubuzyo ooyu. Kuti kamubusyoma busolozi mbomutambula mazuba aano alimwi akufwambaana kubutobela, ciyoomuubila kucita oobo lyamapenzi mapati.—Lk. 16:10.

16. Mbuti kusala kwa Jehova mbokuyoosunka lusyomo lwesu kumbele?

¹⁶ Alimwi tweelede kuyeeyesya kapati kujatikizya mbotuyoocita kukusala Jehova nkwayoocita kumamanino aanyika eeyi mbyaabi. Calino, tulombozya kuti bantu banji ibatamubelekeli Jehova, kubikkilizya abanamukwasyi batali Bakamboni, basale kumubelekela naatanasika mamanino. Pele lya Amagedoni, Jehova, kwiinda muli Jesu, nguuyoosala cakucita kujatikizya buumi bwabo. (Mt. 25:31-33; 2Tes. 1:7-9) Tatuli ndiswe tuyoosala naa nguni uuyakweelela autakeeleli kutambula luse lwa Jehova. (Mt. 25:34, 41, 46) Sena  tuyoocikonzya kukusyoma kusala kwa Jehova, naa tuyoocileka kumubelekela nkaambo tatukuzumini kusala kwakwe? Cilisalede kuti, lino tweelede kumusyoma kapati Jehova kutegwa cikatuubile kumusyoma cakumaninina kumbele.

17. Mbuti mbotuyoogwasyigwa akaambo kakusala kwa Jehova kumamanino abweende bwazintu oobu?

¹⁷ Amweezyeezye buyo mboyootulimvwa munyika mpya kubona zintu zinoocitika akaambo kakusala kwa Leza. Kunoonyina zikombelo zyakubeja, mbunga zyamakwebo izilida bantu masuku amutwe alimwi amfwulumende izyapenzya kapati bantu. Takukabi limbi kuciswa, kucembaala, alimwi akufwidwa bayandwa besu. Saatani amadaimona aakwe bayakwaangwa myaka iili cuulu. Zintu zibyaabi izicitika akaambo kabuzangi bwabo tazinooliko. (Ciy. 20:2, 3) Eelo kaka tuyoolumba kapati kuti twakasyoma nzila ya Jehova yakucita zintu!

18. Kweelana a Myeelwe 11:4-6 alimwi a 21:5, nziiyo nzi nzyotukonzya kwiiya kucikozyanyo cabana Israyeli?

¹⁸ Sena munyika mpya ya Leza tuyooba abuyumuyumu bwakusyoma nzila ya Jehova yakucita zintu? Mucikozyanyo, amubone cakacitika ciindi cisyoonto buyo bana Israyeli nobakazwa mubuzike mu Egepita. Bantu bamwi bakatalika kutongooka akaambo kakuyeeya zyakulya zibotu nzyobakali kukkomanina okuya, alimwi bakatalika kutongooka mana, cipego icakali kuzwa kuli Jehova. (Amubale Myeelwe 11:4-6; 21:5.) Sena andiswe tunoojisi mizeezo iikozyenye aakwiinda mapenzi mapati? Tatuzyi naa kunooli mulimo mupati buti wakugwisya zintu izyakanyonyooka alimwi asyoonto-syoonto kubambulula nyika kuba paradaiso. Kulangilwa kuti, kumatalikilo kunooli mulimo mupati alimwi buumi tabunooli buuba-uba pe. Sena tuyootongooka akaambo kazintu Jehova nzyayootupa aciindi eeco? Kuti katulumba lino, tuyoolumba kapati zintu nzyayootupa ciindi eeco.

19. Ntwaambo nzi tupati-pati ituli mucibalo eeci?

¹⁹ Nzila ya Jehova yakucita zintu lyoonse ililuzi. Tweelede kusyoma oobo. Alimwi tweelede kubasyoma aabo Jehova mbasyoma kutupa malailile. Tatweelede kwaaluba majwi Jehova ngaakaamba kwiinda mumusinsimi wakwe Isaya aakuti: “Mulaba anguzu kufwumbwa buyo kuti mubatame akuba alusyomo.”—Is. 30:15.