1-2. (1) No te aha e ere i te mea ohie no e rave rahi taata ia tiaturi i te feia mana? (2) Eaha ta tatou e hiˈopoa i roto i teie tumu parau haapiiraa?

 I TEIE mahana, e ere i te mea ohie no e rave rahi taata ia tiaturi i te feia mana. Ua ite ratou e pinepine te mau tia faatere e te ture i te paruru i te feia moni e i te haafaufaa ore i te feia riirii. Te haapapu ra hoi te Bibilia i te reira ma te parau e te faatere ra “te taata i te taata no to ˈna iho ati.” (Koh. 8:9) Hau atu, te rave ra vetahi tia haapaoraa i te ohipa ino e na te reira e turai ra i te taata ia ore e tiaturi faahou i te Atua. No reira, ia farii te hoê taata i te haapii i te Bibilia, e ere i te mea ohie no tatou ia haapii ia ˈna ia tiaturi ia Iehova e i te feia ta ˈna i faatoroa i nia i te fenua.

² Papu maitai, e ere o te mau piahi Bibilia anaˈe te hinaaro ra i te tauturu no te haapii ia tiaturi ia Iehova e i ta ˈna faanahonahoraa. Noa ˈtu mea maoro tatou i roto i te parau mau, eiaha roa ˈtu e moˈehia ia tatou e o ta Iehova huru raveraa te mea maitai roa ˈˈe. I te tahi taime, e faaruru paha tatou i te tahi mau tupuraa o te tamata i to tatou tiaturi ia Iehova. I roto i teie tumu parau haapiiraa, e hiˈopoa tatou e toru tuhaa e nehenehe ai to tatou faaroo e tamatahia: (1) ia taio tatou i te tahi mau aamu Bibilia, (2) ia horoahia mai te hoê aratairaa na roto i ta Iehova faanahonahoraa e (3) ia faaruru tatou i te mau fifi a muri aˈe.

3. Eaha te tahi mau aamu Bibilia e nehenehe ai to tatou tiaturi ia Iehova e tamatahia?

 ³ A taio ai i te Bibilia, e ui paha tatou no nia i te tahi mau huru raveraa e faaotiraa a Iehova. Ei hiˈoraa, i roto i te  buka o te Numera, te taiohia ra e ua faautua pohe Iehova i te hoê Iseraela no to ˈna haaputuraa i te vahie i te mahana Sabati. I roto i te piti o te buka a Samuela, te itehia ra e ua faaore Iehova i te hara a te arii Davida tei faaturi e tei haapohe i te taata. (Num. 15:32, 35; Sam. 2, 12:9, 13) E ui paha tatou: ‘No te aha Iehova i faaore ai i te hara a Davida e i faautua pohe ai i te Iseraela, e au ra hoi e aita o ˈna i rave i te ohipa ino roa?’ No te pahono i tera uiraa, e hiˈopoa anaˈe e toru ohipa te titauhia ia haamanaˈo a taio ai i te Bibilia.

4. E nafea te Genese 18:20, 21 e te Deuteronomi 10:17 e haapuai ai i to tatou tiaturi i ta Iehova mau faaotiraa?

⁴ Aita te Bibilia e horoa ra pauroa te mau haamaramaramaraa o te hoê aamu. Ei hiˈoraa, ua ite tatou e ua tatarahapa mau o Davida no ta ˈna i rave. (Sal. 51:2-4) Eaha mau na râ te huru o te taata tei ofati i te ture i te mahana Sabati? Ua tatarahapa anei o ˈna no ta ˈna i rave? Ua faaroo ore aˈena anei o ˈna i te mau ture a Iehova? Ua faaarahia anei o ˈna e aita o ˈna i faaroo aore ra i farii i te reira? Aita te Bibilia e pahono ra i tera mau uiraa. Te mea papu râ no nia ia Iehova, “aita roa ˈtu to ˈna e parau-tia ore.” (Deut. 32:4) E niu o ˈna i ta ˈna mau faaotiraa i nia i tei tupu, eiaha râ i nia i ta vetahi i parau, i te hoê manaˈo oti noa aore ra i nia i te tahi mea o te taviri i te manaˈo o te taata no nia i te hoê tupuraa. (A taio i te Genese 18:20, 21; Deuteronomi 10:17.) Rahi atu tatou i te haapii no nia ia Iehova e ta ˈna mau ture aveia, rahi atu â tatou i te tiaturi i ta ˈna mau faaotiraa. Mai te peu e taio tatou i te hoê aamu Bibilia e e uiraa ta tatou aita e pahonoraa i teie nei, ua navai ta tatou e ite ra no nia i te Atua no te haapapu “e parau-tia ta Iehova i ta ˈna mau ohipa atoa.”​—Sal. 145:17.

5. E nafea to tatou huru tia ore e haafifi ai i to tatou manaˈo no nia i te tahi tupuraa? (A hiˈo atoa i te tumu parau “ No to tatou huru tia ore, e nehenehe ta tatou huru hiˈoraa e hape.”)

⁵ No to tatou huru tia ore, e nehenehe to tatou manaˈo no nia i te tahi tupuraa e hape. Ua hamani te Atua ia tatou e te aravihi ia faatupu i to ˈna mau huru maitatai, no reira tatou e hinaaro mau ai ia haa te taata ma te parau-tia i nia ia  vetahi ê. (Gen. 1:26) No te mea râ mea tia ore tatou, e nehenehe tatou e hape noa ˈtu e au ra e ua ite tatou pauroa te mau haamaramaramaraa no nia i te tahi tupuraa. Ei hiˈoraa, a haamanaˈo na ia Iona tei au ore i ta Iehova faaotiraa ia faaite i te aroha hamani maitai i te nunaa o Nineve. (Iona 3:10–4:1) A feruri na râ i te faahopearaa o ta Iehova faaotiraa. Ua faaorahia hau atu 120 000 taata no Nineve tei tatarahapa mau. I te pae hopea, o Iona tei titauhia ia faatano i to ˈna huru feruriraa, e ere o Iehova.

6. No te aha eita e titauhia ia Iehova ia faataa mai te tumu o ˈna i rave ai i te tahi faaotiraa?

⁶ Eita e titauhia ia Iehova ia faataa no te aha o ˈna i rave ai i te tahi faaotiraa. Papu, ua farii Iehova ia faaite vetahi mau tavini i to ratou huru aau no nia i te mau faaotiraa ta ˈna i rave aore ra i opua i te rave. (Gen. 18:25; Iona 4:2, 3) E i te tahi taime, ua faataa o ˈna i ta ˈna mau faaotiraa. (Iona 4:10, 11) Noa ˈtu râ, eita e nehenehe e faahepo ia Iehova ia faataa i te tumu i rave ai o ˈna i te tahi faaotiraa. O ˈna to tatou Atua poiete, aita ïa o ˈna e titau ia farii tatou i ta ˈna faaotiraa hou o ˈna a ohipa ˈi aore ra i muri aˈe.​—Isa. 40:13, 14; 55:9.

7. Eaha paha te mea fifi no tatou e no te aha?

⁷ Papu maitai, e farii tatou ma te aau atoa e mea tano noa te mau huru raveraa a Iehova. Tera râ, mea fifi paha no tatou ia tiaturi i te mau taeae ta ˈna i faatoroa i roto i ta ˈna faanahonahoraa. E ui paha tatou e te haa ra anei ratou ia au i ta Iehova aratairaa aore ra ia au i to ratou iho manaˈo. Tera atoa paha ta vetahi i tahito ra i manaˈo. E feruri anaˈe na i te mau hiˈoraa o te  paratarafa 3. E ui paha te hoê fetii o te Iseraela tei ofati i te ture i te mahana Sabati e ua ani mau anei Mose i te aratairaa a Iehova hou a faautua pohe ai i tera taata. E manaˈo atoa paha te tahi hoa a Uria ati Heta e ua faaohipa Davida i to ˈna tiaraa arii ia ore o ˈna ia haapohehia no ta ˈna i rave e te vahine a Uria. Te tiaturi ra Iehova i te mau taeae ta ˈna i faatoroa i roto i ta ˈna faanahonahoraa e te mau amuiraa. Aita anaˈe tatou e tiaturi ia ratou, aita ïa tatou e nehenehe e parau te tiaturi ra tatou ia Iehova.

8. Eaha te tuatiraa i rotopu i te Ohipa 16:4, 5 e te faanahoraa a te amuiraa Kerisetiano i teie mahana?

⁸ I teie mahana, te aratai ra Iehova i te tuhaa i nia i te fenua o ta ˈna faanahonahoraa na roto i “te tavini haapao maitai e te paari.” (Mat. 24:45) Mai te Tino aratai o te senekele matamua, te haapao ra tera tavini i te nunaa o te Atua na te ao nei e te horoa ra i te aratairaa i te mau matahiapo. (A taio i te Ohipa 16:4, 5.) I muri iho, e haapao taua mau matahiapo ra e te peehia ra tera aratairaa i roto i te mau amuiraa. Te faaite ra tatou e te tiaturi ra tatou i ta Iehova huru raveraa ma te pee i te mau aratairaa ta te faanahonahoraa e te mau matahiapo e horoa mai.

9. I roto i teihea tupuraa e manaˈo ai tatou e mea fifi ia turu i te hoê faaotiraa a te mau matahiapo e no te aha?

⁹ A mairi ai te tau, e mea fifi paha no tatou ia turu i te hoê faaotiraa a te mau matahiapo. Ei hiˈoraa, aita i maoro aˈenei, ua faanaho-faahou-hia e rave rahi amuiraa e tuhaa haaati. I te tahi taime, ua ani te mau matahiapo i te mau taata poro ia turu i te hoê amuiraa ê no te faaohipa maitai aˈe i te mau Piha a te Basileia. Ia anihia tatou ia haere i roto i te hoê amuiraa apî, e ere paha i te mea ohie ia faarue  i te mau hoa aore ra fetii. Na te Atua anei i parau roa ˈtu i te mau matahiapo ihea tera e tera taata poro e haere ai? E ere. E nehenehe tera manaˈo e tapea ia tatou ia pee i te aratairaa horoahia mai. Tera râ, te tiaturi ra Iehova i te mau matahiapo tei rave i tera faaotiraa. E titau-atoa-hia ia tatou ia tiaturi ia ratou. *

10. Ia au i te Hebera 13:17, no te aha mea faufaa ia turu tatou i te mau matahiapo?

¹⁰ No te aha mea faufaa ia turu i te mau faaotiraa a te mau matahiapo noa ˈtu aita tatou i au i tera faaotiraa? No te mea a na reira ˈi, te ohipa ra tatou ia vai te auhoêraa i roto i te nunaa o te Atua. (Eph. 4:2, 3) E puai mai te mau amuiraa ia faaite te mau mero atoa i te haehaa ma te turu i te mau faaotiraa a te tino matahiapo. (A taio i te Hebera 13:7.) Hau atu, te faaite ra tatou ia Iehova e te tiaturi ra tatou ia ˈna ma te turu i te feia ta ˈna i faatoroa no te aupuru ia tatou.​—Ohi. 20:28.

11. Eaha te tauturu mai ia haapuai i to tatou tiaturi i te aratairaa ta te mau matahiapo e horoa?

¹¹ E nehenehe tatou e haapuai i to tatou tiaturi i te aratairaa a te matahiapo ma te haamanaˈo e ua ani ratou i te varua moˈa o Iehova hou a tauaparau ai no nia i te mau fifi o te amuiraa. Hau atu, e hiˈopoa maite ratou i te mau faaueraa Bibilia tano e e hiˈo ratou i te mau aratairaa ta te faanahonahoraa a Iehova i horoa. Te hinaaro mau nei ratou e faaoaoa ia Iehova e e aupuru maitai i to ˈna nunaa. Ua taa i taua mau taeae haapao maitai ra e no te Atua, mea faufaa ta ratou huru raveraa i nia i to ˈna nunaa. (Pet. 1, 5:2, 3) A feruri na: Te ora ra tatou i roto i te hoê ao amahamaha i te pae fenua, faaroo e poritita. Tera râ, ei nunaa no Iehova, te haamori amui nei tatou i te Atua mau hoê roa. E tupu te reira no te mea noa te haamaitai ra Iehova i ta ˈna faanahonahoraa!

12. Eaha te mea titauhia i te mau matahiapo ia hiˈopoa no te ite te tatarahapa mau ra anei te tahi Kerisetiano tei hara?

¹² No to ˈna tiaturi i te mau matahiapo, ua horoa Iehova ia ratou i te hopoia rahi ia vai viivii ore noa te amuiraa. Mai te peu e hara te tahi Kerisetiano, te titau ra Iehova i te mau matahiapo ia hiˈopoa e nehenehe anei o ˈna e faaea i roto i te amuiraa. Hau atu, e mea faufaa ia ite ratou e ua tatarahapa mau anei o ˈna no ta ˈna i rave. E parau paha o ˈna e te tatarahapa ra o ˈna. Tera râ, mea hae anei na ˈna te ohipa ino ta ˈna i rave? Ua faaoti papu anei o ˈna eiaha e tapiti faahou i tera hara? Mai te peu na te mau amuimuiraa iino i turai ia ˈna ia hara, te hinaaro mau ra anei o ˈna e haapae i taua mau amuimuiraa ra? E pure te mau matahiapo ia Iehova, e hiˈopoa ratou i tei tupu e i ta te Bibilia e parau ra. I muri iho, e hiˈo ratou i te huru o te Kerisetiano tei hara i mua i te ohipa ino ta ˈna i rave. I reira ratou e faaoti ai e faaea anei o ˈna i roto i te amuiraa. I roto râ i te tahi mau tupuraa, e mea titauhia ia tiavaruhia o ˈna.​—Kor. 1, 5:11-13.

13. Eaha paha te fifi ta tatou e faaruru mai te peu ua tiavaruhia te hoê hoa piri aore ra fetii?

¹³ E nafea to tatou tiaturi i te mau matahiapo e nehenehe ai e tamatahia? Mai te peu e ere te taata tiavaruhia i te hoê hoa piri aore ra fetii, oioi paha tatou i te farii i te faaotiraa a te mau matahiapo. Mea ê râ paha to tatou huru mai te peu e hoa piri tei tiavaruhia. Peneiaˈe e ui tatou: ‘Ua hiˈopoa mau anei te mau matahiapo i te  mau tupuraa atoa? Ua faaoti anei ratou ma te pee i te huru raveraa a Iehova?’ E hinaaro iho â tatou e tapea i te haerea maitai i mua i taua faaotiraa ra. Eaha râ te tauturu mai?

14. Ia faaoti te mau matahiapo e tiavaruhia te hoê hoa piri aore ra fetii, eaha te tauturu ia tatou ia tapea i te haerea maitai?

¹⁴ Mea faufaa ia haamanaˈo tatou e faanahoraa te tiavaruraa no ǒ mai ia Iehova ra e e faufaahia te amuiraa e te taata tei hara i te reira. Mai te peu e farii-noa-hia te taata tei hara e tei ore i tatarahapa i roto i te amuiraa, e nehenehe o ˈna e turai i te tahi atu ia hara atoa. (Gal. 5:9) Hau atu, e manaˈo paha o ˈna e ere i te mea ino roa te hara ta ˈna i rave e eita o ˈna e faatano i to ˈna huru feruriraa aore ra haerea no te fanaˈo faahou i te farii maitai a Iehova. (Koh. 8:11) Te mea papu, ia faaoti te mau matahiapo e tiavaruhia te hoê taata, e ere i te ohipa hauti no ratou. Ua taa ia ratou e mai te mau haava Iseraela i tahito ra, aita ratou “e haava ra no te taata, no Iehova râ.”​—Par. 2, 19:6, 7.

15. No te aha e mea faufaa roa ia tiaturi i ta Iehova aratairaa i teie nei â?

¹⁵ A piri mai ai te hopea o teie nei ao, mea faufaa ia tiaturi tatou i te huru raveraa a Iehova i teie nei â. No te aha? Ia tupu te ati rahi, e fanaˈo paha tatou i te mau aratairaa e au ra e mea fifi ia taa aore ra ia pee. Papu, eita Iehova e paraparau roa ˈtu ia tatou. E faaohipa râ o ˈna i te mau taeae ta ˈna i faatoroa. E ere roa ˈtu ïa te taime no te feaa e no te ui ia tatou iho: ‘No ǒ mai iho â anei tera aratairaa ia Iehova aore ra te haa ra te mau taeae faatoroahia ia au i to ratou iho manaˈo?’ E tiaturi anei outou ia Iehova e i ta ˈna faanahonahoraa i taua taime faufaa roa? E ite tatou i te pahonoraa a hiˈopoa ˈi i to tatou huru i mua i te aratairaa i teie nei â. Mai te peu e tiaturi tatou i te aratairaa horoahia i teie mahana e e pee oioi tatou i te reira, papu maitai e na reira atoa tatou i te roaraa o te ati rahi.​—Luka 16:10.

16. E nafea to tatou tiaturi i ta Iehova mau haavaraa e tamatahia ˈi a muri aˈe?

¹⁶ E mea faufaa atoa ia feruri maite tatou i to tatou huru i mua i ta Iehova mau haavaraa i te hopea o teie nei ao ino. Te hinaaro ra tatou ia faaoti te taata atoa, oia atoa te mau fetii e ere i te Ite no Iehova, i te tavini i te Atua hou te hopea o teie nei ao. Tera râ, i Aramagedo, e rave Iehova na roto ia Iesu i te faaotiraa hopea no to ratou a muri aˈe. (Mat. 25:31-33; Tes. 2, 1:7-9) E ere na tatou e faaoti o vai te fanaˈo  i te aroha hamani maitai o Iehova aore ra eita. (Mat. 25:34, 41, 46) E tiaturi anei tatou i ta Iehova mau haavaraa aore ra e faaea tatou i te tavini ia ˈna no ta ˈna i faaoti? E mea faufaa ïa ia haapuai i to tatou tiaturi ia Iehova i teie nei â a tiaturi faahope roa ˈi tatou ia ˈna a muri aˈe.

17. E nafea tatou e faufaahia ˈi i ta Iehova mau haavaraa i te hopea o teie nei ao?

¹⁷ E feruri anaˈe na eaha to tatou huru i roto i te ao apî a te Atua a ite ai eaha te tupu i muri aˈe i ta Iehova mau haavaraa. Aita faahou te haapaoraa hape, oia atoa te faanahoraa tapihooraa nounou e te mau faatereraa o tei haamauiui i te taata i te roaraa o te tau. E ore atoa te maˈi, te ruhiruhiaraa e te pohe o tei herehia. Eita o Satani e ta ˈna mau demoni e haafifi faahou i te taata hoê tausani matahiti i te maoro. E ore roa te faahopearaa ino o to ratou orureraa hau. (Apo. 20:2, 3) Auê ïa tatou i te oaoa no te mea ua tiaturi tatou i ta Iehova mau huru raveraa!

18. Eaha te haapiiraa ta tatou e huti mai i te hiˈoraa o Iseraela faahitihia i roto i te Numera 11:4-6 e 21:5?

¹⁸ I roto i te ao apî, e ite anei tatou i te tahi mau tupuraa o te nehenehe e tamata i to tatou tiaturi i ta Iehova mau huru raveraa? Ei hiˈoraa, a feruri na eaha tei tupu tau taime i muri iho i to Iseraela tiamâraa mai i te faatîtîraa i Aiphiti. Ua haamata vetahi i te amuamu no te mea ua mihi ratou i te maa ta ratou i amu i Aiphiti. Ua haafaufaa ore ratou i te mâna ta Iehova i horoa ia ratou. (A taio i te Numera 11:4-6; 21:5.) E manaˈo atoa anei tatou mai tera i muri aˈe i te ati rahi? Aita tatou e ite eaha te ohipa e tiai mai ra no te tamâ e no te faariro i te fenua ei paradaiso. Mea rahi te ohipa ta tatou e rave e i te omuaraa, e ere paha i te mea ohie no tatou. E amuamu anei tatou no ta Iehova e horoa i taua taime ra? Te mea papu, rahi atu tatou i te faaite i te mauruuru no ta Iehova e horoa ra i teie nei â, rahi atu â tatou i te na reira a muri aˈe.

19. Eaha te mau manaˈo faufaa ta tatou i ite i roto i teie tumu parau haapiiraa?

¹⁹ Mea tano noa ta Iehova mau huru raveraa. Mea faufaa ia papu ia tatou i te reira. Mea faufaa atoa ia tiaturi tatou i te feia ta Iehova e tiaturi ra e e faatoroa no te horoa i ta ˈna mau aratairaa. Eiaha roa ˈtu e haamoˈe i ta Iehova i parau na roto i te peropheta Isaia: “Tei te vai-hau-noa-raa e te tiaturiraa to outou puai.”​—Isa. 30:15.