1, 2. а) Малы тросэз адямиос кивалтӥсьёслы оскемысь дугдӥзы? б) Мае ми эскеромы та статьяын?

 ТУННЭ кивалтӥсьёслы оскыны секыт. Адямиос адӟо, кивалтӥсьёс узыр но дано муртъёсын асьсэды умоен возё, нош куанеръёсты ултӥяло шуыса. Библия шонер вера: «Адями адямиен кузёяське но солы изъян вайыса кельтэ» (Екк. 8:9). Со сяна, куддыръя религиозной кивалтӥсьёс но асьсэды шонертэм возё. Таин сэрен куд-ог адямиос Инмарлы оскемысь дугдӥзы. Соин ик, куке адями Библиез дышетыны соглаш кариське, солы юрттоно оскыны Инмарлы но соослы, кинъёс пыр со музъем вылын кивалтэ.

² Зэм но, дышетскисьёс гинэ Иеговалы но солэн организациезлы оскиськыны кулэ ӧвӧл. Соослы но, кинъёс трос аръёс ӵоже ини зэмлыкез тодо, вунэтоно ӧвӧл, Иегова котьку но самой шонер ужпумъёс кутэ шуыса. Но куддыръя Иеговалы оскиськыны секыт. Та статьяын ми эскеромы куинь удысъёсты, кудъёсаз осконмы эскериськыны быгатэ: 1) куке Библиез лыдӟиськомы, 2) куке Иеговалэн организациез кивалтэт сётэ но 3) куке шуг-секытъёсын пумиськомы бадӟым куректон азьын но со бере.

3. Малы Библиысь куд-ог учыръёс милесьтым осконмес эскерыны быгато?

 ³ Куддыръя, Библиез лыдӟыкумы, ми ум валаське, малы Иегова кыӵе ке ужпум кутӥз. Кылсярысь, Лыдпусъёс книгаын вераське израиль калыкысь пиосмурт сярысь, кудӥз суббота нуналэ пу бичаз. Со понна Иегова сое виыны косӥз. Нош Эксэйлыкъёслэн кыкетӥ книгаязы вераське Давид эксэй сярысь, кудӥз азон-калгон сьӧлыке пыриз но адямиез виыны косӥз, нош Иегова сое простить кариз (Лыд. 15:32, 35; 2 Экс. 12:9, 13). Милям юанмы кылдыны быгатэ: «Малы Иегова Давидэз простить кариз, со азон-калгон сьӧлыке пыриз но адямиез вииз ке но, нош со дыре ик виыны косӥз адямиез, кудӥз сокем секыт сьӧлык ӧз лэсьты, кадь?» Та юанлы валэктон шедьтон понна, ойдолэ эскеромы куинь малпанъёсты, кудъёссэ милемлы тодамы возёно, Библиез лыдӟыкумы.

4. Кызьы Улон-вылон 18:20, 21 но Кыкетӥ Закон 10:17 осконмес юнмато, Иеговалэн кутэм ужпумъёсыз шонересь шуыса?

⁴ Куддыръя Библия кыӵе ке учыр сярысь ваньзэ пыр-поч уг вера. Кылсярысь, ми тодӥськомы, Давид лэсьтэм янгышъёсыз понна вань сюлмысьтыз ӧпкелиз шуыса (Пс. 50:4—6). Нош мар вераны луоз адями сярысь, кудӥз суббота нуналэ пу бичаз? Ӧпкелиз-а со лэсьтэм ужез понна? Быдэсъяз-а со Иеговалэсь законъёссэ азьвыл? Пеляз понӥз-а со визь-кенешъёсты, кудъёссэ солы сётъязы, вылды? Библия та сярысь уг вера. Но ми оскыны быгатӥськомы, Иегова «бордын ӧрекчаськон ӧвӧл» шуыса (К. Зак. 32:4). Ӵем дыръя адямиос мукетъёссэ судъяло, ваньзэ тодытэк но. Нош Иегова, ужпум кутыкуз, ваньзэ лыдэ басьтэ. (Лыдӟе Улон-вылонэз 18:20, 21; Кыкетӥ Законэз 10:17.) Иегова сярысь но курон-косонъёсыз сярысь тросгес тодыса, ми эшшо но золгес оскиськомы, солэн кутэм ужпумъёсыз шонересь луо шуыса. Куддыръя, Библиез лыдӟыкумы, милям кылдо юанъёсмы, кудъёсызлы валэктон шедьтыны ум быгатӥське. Но Иегова сярысь ми тырмыт тодӥськомы. Соин ик ми оскыны быгатӥськомы: Инмар, «мар лэсьтэ, ваньзэ шонерлыко лэсьтэ» (Пс. 144:17).

5. Кызьы тырбыдэстэм луэммы валаны люкетэ, мар шонер, нош мар шонертэм луэ? (Озьы ик учке « Тырбыдэстэм луэммы сэрен, куддыръя ми ум валаське, мар шонер, нош мар шонертэм луэ» рамкаез.)

 ⁵ Куддыръя, тырбыдэстэм луэммы сэрен, ми ум валаське, мар шонер, нош мар шонертэм луэ. Инмар милемыз аслыз укшатыса кылдытӥз. Соин ик, куке кин ке но шонерлыктэм ужен пумиське, милям сюлэммы ик вӧсь луэ (Ул.-выл. 1:26). Куддыръя ми малпаськомы, ваньзэ лыдэ басьтӥмы шуыса. Но тырбыдэстэм луэммы сэрен, шонертэм йылпумъянъёс лэсьтыны быгатӥськомы. Кылсярысь, тодады вае, макем ӧз кельшы Ионалы, куке Иегова Ниневияын улӥсьёсты жаляны малпаз (Иона 3:10—4:1). Маин йылпумъяськиз та учыр? Ниневияын 120 000-лэсь тросгес улӥсьёс ӧпкелизы но улэп кылизы! Соин ик Ионалы малпаськон амалзэ тупатоно вал, Иеговалы тупатоно ӧй вал.

6. Малы Иегова милемлы валэктыны кулэ ӧвӧл, малы со кыӵе ке ужпум кутэ?

⁶ Иегова адямиослы валэктыны кулэ ӧвӧл, малы со кыӵе ке ужпум кутэ. Зэм но, азьвыл Инмар ужась-тыршисьёсызлы валэктылӥз, малы со кыӵе ке ужпум кутӥз (Ул.-выл. 18:25; Иона 4:2, 3). Куддыръя со соослы вераз, малы озьы яке тазьы лэсьтӥз (Иона 4:10, 11). Озьы ке но Иегова нокинлы валэктыны кулэ ӧвӧл, малы со кыӵе ке ужпум кутэ. Со Кылдытӥсь бере, со нокинлэсь юалляськытэк маке но лэсьтыны быгатэ (Ис. 40:13, 14; 55:9).

7. Кыӵе шуг-секытэн ми пумиськыны быгатӥськомы но малы?

⁷ Ми быдэсак оскиськомы, Иегова котьку но шонер лэсьтэ шуыса. Нош куддыръя милемлы секыт оскыны соослы, кинъёс пыр Иегова музъем вылын кивалтэ. Милям юанмы кылдыны быгатэ: «Зэм ик-а соос, кинъёслы Иегова аслаз организацияз кивалтэт сётӥз, солэн кивалтэтэзъя лэсьто яке соос ас малпамзыя лэсьто?» Таӵе юанъёссы кылдылӥзы, дыр, соослэн но, кинъёс Иеговалы вашкала дыръя ужазы-тыршизы. Тодамы ваёмы  3-тӥ абзацысь учырез. Суббота нуналэ пу бичась муртлэн куд-ог ӵыжы-выжыосыз малпаны быгатысалзы: «Зэм ик-а Моисей ужпум кутэмезлэсь азьло тодӥз, мар малпаз Иегова та пумысен?» Озьы ик Уриялэн куд-ог эшъёсыз малпаны быгатысалзы, Давид эксэй вал бере, соин ик кылкутытэмлэсь пегӟыны быгатӥз. Та учыръёсысь адӟиське: Иегова оске соослы, кинъёслы аслаз организацияз но кенешын кивалтэт сётэ. Соин ик ми но та пиосмуртъёслы оскиськомы ке, вераны луоз, Иеговалы оскиськомы шуыса.

8. Мар огкадез вань солэн, мар гожтэмын Апостолъёслэн ужъёсазы 16:4, 5, но солэн, кызьы туннэ христиан кенеш радъямын?

⁸ Туннэ Иегова музъем вылысь организациеныз кивалтэ «оскиськымон, визьмо ляльчи» пыр (Матф. 24:45). Нырысетӥ даурысь кивалтӥсь кенеш сямен, та «ляльчи» быдэс дунне вылысь Инмарлэн калыкез сярысь сюлмаське но тӧроослы кивалтэт сётэ. (Лыдӟе Апостолъёслэсь ужъёссэс 16:4, 5.) Нош тӧроос та кивалтэтэз кенешъёсын уже куто. Ми возьматӥськомы, Иеговалы оскиськомы шуыса, куке кылзӥськиськомы кивалтэтлэсь, кудзэ Иеговалэн организациез но тӧроос пыр басьтӥськомы.

9. Кыӵе учыръёсы тӧроослэсь кылзӥськыны секыт но малы?

⁹ Куддыръя тӧроослэн кутэм ужпумъёссылэсь кылзӥськыны секыт. Кылсярысь, берло аръёсы кенешъёс но ёросъёс воштэмын  вал. Куд-ог учыръёсын ивортӥсьёсты куризы мукет кенеше потыны. Та юрттӥз Эксэйлык юртъёсты эшшо но визьмогес кутыны. Тӥледыз но куризы ке мукет кенеше потыны, эшъёсыныды но ӵыжы-выжыосыныды люкиськыны секыт луоз, дыр. Валамон, тӧроослы инмысен нокин уг вера, кыӵе кенеше котькуд ивортӥсез лэзёно. Соин ик милемлы тӧроослэсь кылзӥськыны секыт луэ. Но Иегова тӧроослы оске бере, милемлы но соослы осконо b.

10. Еврейёслы 13:17 верамъя, малы милемлы тӧроослэсь кылзӥськыны кулэ?

¹⁰ Малы тӧроослэсь кылзӥськоно, милемлы кутэм ужпумъёссы уг кельшо ке но? Озьы ми юрттӥськомы Инмарлэн калыкезлы огкылысь улыны (Еф. 4:2, 3). Вын-агайёс но сузэр-апайёс тӧроослэсь кылзӥськизы ке, кенеш тупаса но шумпотыса улоз. (Лыдӟе Еврейёслы 13:17.) Нош тужгес но кулэез, тӧроослэсь кылзӥськыса, ми возьматӥськомы, Иеговалы оскиськомы шуыса, малы ке шуоно со тӧроосты куриз ми сярысь сюлмаськыны (Ап. уж. 20:28).

11. Мар юрттоз милемлы эшшо но золгес оскыны тӧроослэн кутэм ужпумъёссылы?

¹¹ Мар юрттоз милемлы эшшо но золгес оскыны тӧроослэн кутэм ужпумъёссылы? Тодады возе: куке тӧроос кенеш пумысен кыӵе ке ужпум куто, соос котьку но святой духез курыса вӧсясько. Озьы ик соос сак эскеро Библиысь возетъёсты но кивалтэтэз, кудзэ сётэ Иеговалэн организациез. Со сяна, тӧроослэн потэ Иеговаез шумпоттэмзы но Иеговалэн калыкез понна самой умойзэ лэсьтэмзы. Тӧроос тодо, ужам-тыршемзы понна Иегова азьын кыл кутозы шуыса (1 Пётр 5:2, 3). Малпаське: дунне люкиськемын адямиослэн кыӵе калыкысь потэмзы сэрен, религия но политика сэрен. Нош Иеговалэн калыкез одӥг гинэ зэмос Инмарлы огкылысь йыбыртъя. Та луыны быгатэ Иеговалэн бакель каремезлы луыса гинэ!

12. Кыӵе юанъёсты тӧроос эскерыны кулэ, адями ӧпкеле-а, уг-а шуыса валан понна?

¹² Иегова тӧроослы кулэ луись уж сётӥз — соос чакланы кулэ, кенеш чылкыт мед луоз шуыса. Христиан мурт секыт сьӧлык лэсьтӥз ке, Иегова тӧроослэсь возьма, соос ужпум кутозы, та адямиез кенешысь поттоно-а, ӧвӧл-а шуыса. Тӧроослы валаны кулэ, та адями лэсьтэм ужез сярысь жаля-а шуыса. Со вераны быгатэ, ӧпкеле шуыса, но лэсьтэм ужзэ со зэмзэ ик адӟемпотостэм каре-а? Дась-а со азьланяз таӵе сьӧлык лэсьтытэк улыны? Адями урод эшъёсыз сэрен сьӧлыказ ке, дась-а со соосын эшъяськемысь дугдыны? Тӧроос вӧсясько Иеговалы, эскеро лэсьтэм ужез но Библиысь возетъёсты, озьы ик валаны тыршо, кызьы адями учке лэсьтэм ужез шоры. Собере соос ужпум куто, сьӧлыкам муртэ кенешысь поттоно-а, ӧвӧл-а шуыса (1 Кор. 5:11—13).

13. Кыӵе юанъёсмы милям кылдыны быгато, эшмес яке ӵыжы-выжымес кенешысь поттӥзы ке?

¹³ Кыӵе учыре тӧроослэсь кылзӥськыны секыт луыны быгатэ? Кенешысь поттэм адямиен милям туж ик матысь кусыпъёсмы ӧй вал ке, тӧроослэсь кылзӥськыны туж ик секыт уз луы, дыр. Нош кенешысь матысь эшмес яке ӵыжы-выжымес поттӥзы ке? Милям таӵе юанъёсмы кылдыны быгато: «Тӧроос ваньзэ лыдэ басьтӥзы-а? Иегова сыӵе ик ужпум кутысал-а?» Мар юрттоз милемлы тӧроослэн кутэм ужпумзы шоры шонер учкыны?

14. Мар юрттоз милемлы тӧроослы оскыны, соос ужпум кутӥзы ке эшмес яке ӵыжы-выжымес кенешысь поттыны?

 ¹⁴ Милемлы вунэтоно ӧвӧл, ӧпкелисьтэм муртэ кенешысь поттыны — со Иеговалэн курон-косонэз шуыса. Со быдэс кенешлы но, сьӧлыкам муртлы но пайда вае. Сыӵе адями Инмарлэн калыкез пӧлысь поттэмын ӧз луы ке, соку кенешысь мукетъёсызлэн но сьӧлыканы мылкыдзы ӝутскоз, вылды (Гал. 5:9). Со сяна, сьӧлыкам мурт уз но вала, дыр, макем секыт сьӧлык со лэсьтӥз. Соин ик солэн мылкыдыз но уз луы воштӥськыны но Иеговаен кусыпъёссэ тупатыны (Екк. 8:11). Ойдолэ ум вунэтэ, тӧроос туж сак эскеро, адямиез кенешысь поттоно-а, ӧвӧл-а шуыса. Вашкала Израильысь судьяослы тазьы верамын вал: «Адями суд тӥ уд лэсьтӥське, Кузё-Инмарлэсь судзэ лэсьтӥськоды» (2 Пар. 19:6, 7). Тӧроос но тае валало.

15. Малы туннэ ик ини Иеговалы осконмес юнматоно?

¹⁵ Та дуннелэн пумыз матэктэмъя, милемлы эшшо но золгес Иеговалы осконо. Малы? Бадӟым куректон дыръя милемлы сётэмын луоз кивалтэт, кудӥз валантэм но быдэстонтэм потоз, вылды. Ми валаськомы, Иегова инмысен милемын уз вераськы шуыса. Кивалтэтсэ со тӧроос пыр сётоз, вылды. Соку бер луоз ини малпаськыны: «Та Иеговалэн кивалтэтэз яке вын-агайёслэн кутэм ужпумзы?» Оскоды-а тӥ Иеговалы но солэн организациезлы со кулэ луись дыре? Тӥ али ик ини тӧроос пыр сётэм кивалтэтлы оскиськоды ке, соку бадӟым куректон дыръя но солы оскоды, луоз (Лука 16:10).

16. Кызьы матысь дыре Иеговалы осконмы эскериськоз?

¹⁶ Со сяна, милемлы малпаськыны кулэ, кызьы ми учкомы Иеговалэн приговоръёсыз шоры, кудъёссэ со ялоз, та лек дуннеез судъякуз. Зэм но, милям туж потэ, тросэз, озьы ик оскисьтэм ӵыжы-выжыосмы но, Иеговалы ужаны-тыршыны мед кутскозы шуыса. Но соос утиськозы-а, уз-а шуыса, ужпум кутоз Иегова Иисус пыр Армагеддон дыръя (Матф. 25:31—33; 2 Фес. 1:7—9). Ми ужпум ум кутӥське, кинэ Иеговалы жаляно, нош кинэ ӧвӧл (Матф. 25:34, 41, 46). Соглаш кариськомы-а ми Иеговалэн кутэм ужпумъёсыныз яке соглаш ум луэ но солы ужамысь-тыршемысь дугдомы? Валамон, вуонояз Иеговалы быдэсак оскон понна, милемлы туннэ ик ини Иеговалы осконмес юнматоно.

17. Кыӵе улон луоз, куке Иегова та лек дунне пумысен приговорзэ ялоз?

 ¹⁷ Пуктэ син азяды: тӥ райын. Тӥ адӟиды, кызьы Иегова вань приговоръёссэ быдэстӥз. Ӧвӧл ини зэмос луисьтэм религия, тырмостэм адямиос, политика, кудӥз трос адямиосты курадӟытыса возиз. Ӧвӧл ини висёнъёс, пересьмон но кулон. Шайтан но периос 1 000 арлы пытсамын. Ӝоген соослэн бугыръяськонзы сярысь нокин но тодаз уз ни вайы (Усьт. 20:2, 3). Ми туж шумпотомы, Иеговалы оскимы шуыса!

18. Малы дышетскыны луэ израиль калыклэсь, Лыдпусъёсты 11:4—6 но 21:5 лыдэ басьтыса?

¹⁸ Кызьы тӥ малпаськоды, капчи-а луоз выль дуннеын котьку но Иеговалэсь кылзӥськыны? Ойдолэ тодамы ваёмы, кызьы ассэ возиз израиль калык Египетысь потэмез бере. Куд-огъёсыз ӝожтӥськыны кутскизы, соос Египетысь сиёнлэсь мӧзмо шуыса. Нош манна сярысь, кудзэ Иегова соослы паймымон амалэн сётъяз, соос веразы: «Милям лулмы кӧтвеськантэм каре ини та кӧш сиёнэз». (Лыдӟе Лыдпусъёсты 11:4—6; 21:5.) Бадӟым куректон бере ми но асьмеды озьы ик возьыны ум кутске-а? Ми ум тодӥське, кӧня дыр но кужым кошкоз музъемез чылкытатон но сое райлы пӧрмытон понна. Милям трос ужмы луоз, дыр. Ум кутске-а ми но выль дуннеын ӝожтӥськыса улыны? Ми али ик ини Иеговалы тау кариськомы ке ваньмыз понна, мае со милемлы сётэ, соку выль дуннеын но солы тау карыса уломы, дыр.

19. Вакчияк вералэ та статьяысь валтӥсь малпанъёсты.

¹⁹ Иегова котьку но шонер ужпумъёс кутэ. Ми талы оскыны кулэ. Озьы ик милемлы осконо соослы, кинъёс пыр Иегова кивалтэт сётэ. Ойдолэ ноку ум вунэтэ Иеговалэсь кылъёссэ: «Каньыл сюлмын но оскиськыса улон бордын тӥляд кужымды» (Ис. 30:15, ВД).