1-2. (a) Heeni atthu antxipale ahinaaroromelaaya ale arino olamula? (b) Eheeni ninrowaahu woona mwa yoosomeene yeela?

 MAHUKWAANO atthu antxipale onnavila waaroromela atthu arino olamula. Atthu awo ahoonelela weera, atthu arino olamula anapwattha ale ari oopuha, ni oowera yaahiyaka waakhavihera ale ari oohawa. Biblya onnaiwanyeiha eyo vaavo owo oneeraawe: “Mutthu onamulamulawe mukhwawe weera amuhoxe.” (Koh. 8:9) Opwaha mwa yeeyo, anamahoolela a ittiini annipaka itthu sootepa onanara sinaweriha atthu akina ohimuroromela Muluku. Emaara hiyo nimmuxuttihaahu namasomaahu a Biblya, nintthuneya oomukhavihera weera amuroromeleke Yehova ni atthu onavarelawe muteko weera yeettiheke mareherero awe.

² Khaiyene anamasomaru a Biblya antthuneya oxuttera omuroromela Yehova ni mareherero awe. Mene pooti ale epatxenre onvarela Yehova mwa iyaakha sintxipale, opatxera ohovela weera moota Yehova onipakaweno itthu weera ti wooreera. Emaara ekina, pooti okhumelela itthu sineerera nroromelo nahu wa Yehova. Mwa yoosomeene yeela, nnoorowa woona itthu ttharu sikhanle soowerera nroromelo nahu: (1) nahiiwexexaka impari sa mBiblyani, (2) naakhela miruku sinkhuma mmarehereroni mwa Yehova (3) narowaka okumanano maxupo a muhoolo.

3. Mwaha wa heeni sooweereya ikina sa mBiblyani sineereraaya omuroromela wahu Yehova?

 ³ Emaara nimmusomaahu Biblya, pooti okhumelela itthu sinneriha ohovela ni moota Yehova oneettihawe itthu naari moota ompakaawe soothanla. Mwa ntakihero, mwa ebuukhu ya Namalepela, ninnaphwanya masu ooweera Yehova, aaruma wiiviwa mulopwana aphwanyiwe aasaka ikhuuni nihiku na esaabado. Ni  ebuukhu ya 2 Samuel, ninnaphwanya masu ooweera Davidi aararuwa ni mwaara a mwaneene, ni vahoolo vaya aamwiva iyawe muthiyana ole, mene Yehova aamulevelela. (Nam. 15:32, 35; 2 Sam. 12:9, 13) Vano akina pooti wuupuwela ha: ‘heeni Yehova amulevelenlawe Davidi ararunwe ni omwiva mutthu, nto oruma wiiviwa mulopwana ahapanke etthu yootepa onanara?’ Weera niwexexe mwaha ola, nnoorowa othokorora itthu tthaaru nintthuneyaahu osuwela emaara nimusomaahu Biblya.

4. Moota heeni Ephattuwelo 18:20, 21 ni Olaleya 10:17 enlipihaaya nroromelo nahu ni mathorihelo a Yehova?

⁴ Biblya khaiyene emaara yootheene onoothaliha itthu sootheene seereñye. Mwa ntakihero, hiyo noosuwela weera Davidi aattharuwa ni murima wootheene mwa ele owo aapankaawe. (Nsal. 51:2-4) Ankha voohima sa mulopwana ole ahaiwelenle nlamulo na esaabado? Neereke owo aattharuwa mwa etthu ele owo aapankaawe? Neereke owo aatoko otupha nlamulo na Yehova khalayi? Neereke owo aatoko oleliwa ni ahitthuna wiiwelela? Biblya khaihima etthu. Mene yookhala etthu hiyo nintthuneyaahu ororomela: Yehova “ori oloka owokolola.” (Ola. 32:4) Mwa soothanla sawe onnahela mpuwa itthu sootheene—ohiya itthu soowothiwa naari mwa nthalo naari mwa itthu ikina seera simweerihe othoriha moohixariya. (Mmusome Ephattuwelo 18:20, 21; Olaleya 10:17.) Emaara nniilipiheraahu oxuttera voohima sa Yehova, ni moota onipakaawe itthu, nneereke ororomela soothanla owo onipakaawe. Nnaamwera ekhanleene empari ya mBiblyani nihiniwexexaahu, hiyo noomusuwela Yehova weera owo “toloka mwa iphiro sawe sothene.”—Nsal. 145:17.

5. Ohimalela wahu onnanariha hayi mukhalelo ahu wa othoriha mooreerela? (Nwehe tho equadru eneera “ Ohimalela wahu khonnihiya woona itthu ntoko Yehova onoonelaawe.”)

⁵ Hiyo naatthu ohimalela ni khaninwera othoriha mooreerela. Nave hiyo nipakiwe mwa enenero ya Muluku mwa yeeyo, ninnatthuna waakosoopa atthu akina mwa exariya. (Eph. 1:26) Mene mwaha woohimalela wahu, naari nisuwenlene itthu sootheene sinhela mpuwa, hiyo ninnathoriha moohireerela. Tiyeeyo yaakhumelenle ni Yona. Apaale pooti weera nyuwo munnupuwelela weera Yona khasivelinwe ni yoothanla ya Yehova yoowamorela ikharari atthu oNinive. (Yona 3:10–4:1) Vano nkuupuwelani nnene, okhwipi waya, atthu oopwaha 120.000 a oNinive yattharuwa ni yaavuluxiwa.  Vano taani aatthuneya wookololiwa? Yona—kapena Yehova?

6. Mwaha wa heeni Yehova ohintthuneyaawe onileela soothanla sawe?

⁶ Hiyo khaninwera omukhanyerera Yehova weera anleele mathowa emweerihe opaka yoothanla. Ettitthu weera ikwaha ikina Yehova ahahiya arumeyi awe weera emuleele wakhala weera yannakhulela yoothanla awe. (Eph. 18:25; Yona 4:2, 3) Mene ikwaha ikina mpaka owo ahaalela mwaha wa heeni aapankaawe yoothala eyo. (Yona 4:10, 11) Ti wooreera wuupuwela weera Yehova khankhanyereriwa onileela soothanla sawe. Mwaha wookhala mpattuxa ahu hiyo khanintthuneya omuleela etthu yoopaka naari onvaanya mwaha wa heeni opankaawe yoothanla eyo.—Yes. 40:13, 14; 55:9.

7. Eheeni ekhanle yoonixupa ni mwaha wa heeni?

⁷ Hiyo khanihovela weera Yehova ehuhu yootheene owo ompaka itthu sooreera. Mene pooti okhala woovila waaroromela atthu Yehova aathanliyaawe weera yaakosoopeke atthu awe. Hiyo pooti oopatxera ohovela wakhala weera alopwana awo, annatthara miruku sa Yehova naari anamweera wiipakela miruku awo anhimaaya. Pooti weera tho eyo yaahereya khalai. Muupuwele ntakihero nenle noonnaahu va  eparagrafu 3. Apaale amusi a mulopwana ole aatumphe nlamulo na esaabado yanniikoha: ‘Neereke Mose omukoha Yehova ahinaakuve ohima weera mmosi ahu iiviwe?’ Naari nthamwene a mulopwana ole aiviwe Urias, iyawe Bathixeba pooti anwera ohima-tho ha: ‘Mweekhaikhai Davidi ohivinwe mwaha wooweera owo mwene.’ Ekhaikhai ti yooweera hiyo khaninwera omuroromela Yehova wakhalawe weera khannaaroromela—alopwana owo athanlalaawe weera yaaholeleke atthu awe.

8. Mareherero a Yehova mahukwaano anoonihera hayi weera annitthata masu alempwale va Miteko 16:4, 5?

⁸ Mahukwaano Yehova onnanvarela muteko “kaporo ororomeleya ni amiruku” weera ahooleleke mareherero elapo ela ya vathi. (Math. 24:45) Kaporo owo ororomeleya, ontthara ntakihero na Mukuttula Woolamulela wa akristu a sekulu yoopatxera. Awo annakosoopa atthu a Muluku a elapo yootheene ni annaavaha miruku asitokweene a mmulokoni. (Mmusome Miteko 16:4, 5.) Ni asitokweene a mmulokoni, annakosoopa miloko weera itthareke miruku sinvahiwaaya. Naattharaka miruku ninvahiwaahu ni mareherero a Yehova nave ninvahiwaahu ni asitokweene a mmulokoni ninnoonihera weera ninnaroromela moota Yehova onipalaawe itthu.

9. Mwa ehuhu heeni oraaya wooxupa otthara miruku ninvahiwaahu ni asitokweene a mmulokoni ni mwaha wa heeni?

⁹ Ehuhu ekina, pooti oxupa otthara soothanla sa asitokweene a mmulokoni. Mwa ntakihero, iyaakha soomalihera miloko ni isrikwiitu sintxipale soorehereriwa. Weera ipa sa Omwene ivareliweke nnene muteko, nto asitokweene akina a mmulokoni, ahaavekela anamalaleera akina weera etxentxe muloko yaathukumanaaya. Pooti okhala wooxupa othama muloko anthukumanaaya amusi anyu ni asinthamwenaanyu. Neereke Yehova onnuulumano asitokweene a mmulokoni weera emutxentxe namalaleera weera athukumaneke muloko mukina? Hooye. Nto mwaha wa yeeyo, pooti woonaka ovila otthara miruku ninvahiwaahu ni asitokweene. Yehova onnaroromela asitokweene a mmulokoni weera anoopaka soothanla sooreera nave tiyeeyo nintthuneyaahu weera hiyo tho nipakeke. *

10. Moovarihana ni Aheberi 13:17, heeni nitthuneyaahu waakhulela soothanla sa asitokweene a mmulokoni?

 ¹⁰ Heeni nintthuneyaahu waakhulelaka soothanla sa asitokweene a mmulokoni naari nihiwexexaka nnene? Mwaha wooweera naakhulelaka vale, soothanla sa asitokweene ninnakhavihera wiiraaniha muloko wa Muluku. (Aef. 4:2, 3) Wakhala weera ootheene hiyo moowiyeviha ninnakhavihera soothanla sa asitokweene a mmulokoni, muloko wootheene onnakhumela nnene. (Mmusome Aheberi 13:17.) Etthu yootepaxa otthuneya, eri yooweera hiyo ninnoonihera weera ninnamuroromela Yehova naakhulelaka soothanla sa ale yoowo athanliyaawe weera ekosoopeke muloko.—Miteko 20:28.

11. Eheeni eneera enikhavihere oororomela soothanla sa asitokweene a mmulokoni?

¹¹ Etthu eneera enikhavihere ororomela soothanla sa asitokweene a mmulokoni, ori wuupuwelela weera awo annavekela munepa woottela yaarowaka othokorora itthu sa mmulokoni. Awo tho annathokorora malamulo a mBiblyani ni otthara miruku sa mareherero ahu. Awo antthuna omuhakalaliha Yehova ni okhavihera muloko awe. Asitokweene a mmulokoni alopwana oororomeleya ni aasuwela weera anoorowa waakhula va maithoni va Yehova moota anaathokororaaya asinna ni muloko. (1 Ped. 5:2, 3) Nkuupuwelani ela: elapo ennirukurera ti yookawanyeya ni iraasa, ittiini ni ipoliitika, mene muloko wa Yehova ti woowiiraana mwaha wooweera nimmukokhorela Muluku mmoha eekhaikhai. Wiiraana iwo onwereya paahi mwaha wa Yehova oreeliha mareherero awe!

12. Eheeni asitokweene ahelaaya mpuwa weera esuwele waari weera mutthu opanke yoottheka mweekhaikhai oottharuwa?

¹² Yehova ohaavaha asitokweene a mmulokoni muritti wooweeriha muloko okhala woottela omunepani. Akhala weera mutthu oopaka yoottheka, Yehova onnaavekela asitokweene a mmulokoni weera ephuke mulatthu wa mutthu owo. Ni yoone wakhala weera mutthu owo onnaphwanela wiiraana ni muloko. Asitokweene onnatthuneya woonelela waari weera mutthu owo oottharuwa mwa etthu ele opankaawe. Mwa yeeyo, onnatthuneya wiikoha ha: ‘Mutthu ole pooti onima weera koottharuwa mene neereke onnaitta etthu ele owo opankaawe? Neereke oothanla ohitthikela opaka yoottheka emoharu? Neereke aapanke yoottheka ele mwaha wooweettha ni alolo, vano neereke oothanla oheetta ni asinthamwene awo amweerihe opaka yoottheka ele?’ Asitokweene annanvekela Yehova ni annathokorora ele Biblya onhimaawe ehelaka mpuwa itthu sootheene sikhumelenle ni moota mutthu owo onoonelaawe yoottheka ele opankaawe. Ethokoronreene itthu iya, tanoonaaya waari weera mutthu ole opanke yoottheka onnaphwanela wiiraana ni muloko. Ikwaha ikina mutthu owo onnatthuneya okumihiwa mmulokoni.—1 Akor. 5:11-13.

13. Maxupo heeni akhanle ookhumelela emaara nthamwene ahu naari mmusi ahu onkumihiwaawe mmulokoni?

¹³ Eheeni eneera yeerere nroromelo nahu noowaaroromela asitokweene? Mutthu okumihiwe mmulokoni, aahikhala mmusi naari nthamwene ahu hiyo pooti onikhweela waakhulela soothanla sa asitokweene a mmulokoni. Vano ankha akhala nthamwene ahu naari mmusi ahu? Nto hiyo pooti oopatxera wiikoha neereke asitokweene aahela mpuwa itthu sootheene seereñye, emuthorihaka ni neereke aamuthoriha ntoko Yehova eeraawe amuthorihe. Eheeni eneera enikhavihere waakhulela soothanla sa asitokweene?

14. Asitokweene yathanla omukumiha mmusi ahu naari nthamwene ahu mmulokoni eheeni nitthuneyaahu ororomela?

¹⁴ Ninnatthuneya wuupuwelela weera okumihiwa mmulokoni mukhalelo mmoha Yehova onrehereraawe muloko awe, ni waakhavihera  atthu ale apanke yoottheka. Waari weera mutthu oottheka ni khattharunwe nave onnavirelela wiiraana ni muloko, aanweeriha atthu akina opaka yoottheka emoharu. (Agal. 5:9) Mutthu owo ahikumihiwa mmulokoni, pooti woonaka weera yoottheka opankaawe khaiyono ti yootepaxa onanara, ni aarowa woonaka weera khontthuneya opaka matxentxo a moota onuupuwelaawe ni ipakelo sawe itthu. Mwa yeeyo, waamukhala woovila, mutthu owo otthikela waakhuleliwa ni Yehova. (Koh. 8:11) Ninnatthuneya ororomelaka etthu omoha, asitokweene a mmulokoni aakhalano muritti woothanla waari weera mutthu onnatthuneya okumihiwa mmulukoni. Awo aasuwela weera ntoko hiiho aphuki a israeli akhalayi, awo “khamphuka milatthu mwa nsina natthu, mene mwa nsina na Yahvéh.”—2 Sow. 19:6, 7.

15. Eheeni nintthuneyaahu ororomelaka miruku ninvahiwaahu sa Yehova vaanaano vaava opwaha khalai?

¹⁵ Okhwipi wa elapo ela yoonanara ori vakhiviru; mwa yeeyo ninatthuneya ororomela moota Yehova onipakaawe itthu vaanaano vaava opwaha khalayi. Mwaha wa heeni? Mpuwa mwa yoohooxa etokotoko, pooti weera hiyo nnimwaakhelaka miruku seiyo hiyo nihiniiwexexaahu ni sooxupa otthara. Nave tho ekhaikhai weera Yehova khanrowa wuuluma ni hiyo niitho-niitho. Nto apaale Yehova onrowa waavarelaka muteko alopwana anihoolela mareherero awe weera anivahe miruku. Mwa ehuhu ene yeeyo, naakhela miruku khuntthuneya wiikohaka makoho ntoko ala: ‘Neereke miruku iya ti sa Yehova tthiri? Naari yoothanla ya asinna annihoolela?’ Nyuwo moothanla omuroromela Yehova ni mareherero awe vaanaano vaava? Waakhula wa nikoho nla, onlipa ni moota munttharaanyu miruku ninvahiwaahu vaanaano vaava. Nyuwo mwaaroromelaka miruku ninvahiwaahu mahukwaano, ni munatthara, muhuupuwenle imaara veeli, eyo enoonihera weera munrowa opakaka etthu emoharu mpuwa mwa yoohooxa etokotoko.—Luka 16:10.

16. Nroromelo nahu wa Yehova ninrowa weereriwa hayi muhoolo?

¹⁶ Nave ninnatthuneya wuupuwela nnenesene moota ninrowaahu woonelaka othoriha wa—Yehova okhwipi wa elapo ela yoonanara. Hiyo nookhalano yooweherera yooweera atthu ale ahimmukokhorela Yehova, waahela mpuwa amusi ahu anoothanla omukokhorela Yehova nihinaakuve ophiya okhwipi wa elapo ela. Wa Harmagedon, khohiyono hiyo ninrowa waathanlaka atthu emphwanela omoreliwa ikharari ni Yehova. (Math. 25:34, 41, 46) Onrowa okhala Yehova moorwela mwa Yesu, onrowa othanlaka tiivi eri yooweherera ya muhoolo ya atthu ala. (Math. 25:31-33; 2 Ates. 1:7-9) Neereke  nnoororomela othoriha wa Yehova naari nnamweemexera onvarela muteko mwaha wooweera khannakhulela soothanla sawe? Moohihovela nintthuneya olipiha nroromelo nahu wa Yehova vaanaano vaava, weera niwere omuroromela moomalela muhoolo.

17. Itthu heeni sooreera sinrowa weereya mwaha wa othoriha wa Yehova mwa ekottho ya Harmagedon?

¹⁷ Mootoko wuupuwelela moota ninrowaahu woonela elapo enyowani mwa sookhumelela mwaha wa othoriha wa Yehova mpuwa mwa ekhotto ya Harmagedon? Ittiini soowootha, elapo ya nakoso ni ipolitika itthu seiyo sinaweriha atthu ohaawa mene itthu iyo khasinrowa okhala. Maxupo a ekumi, wuuluvala ni okhwa wa atthu ale nnasivelaahu, sinrowa okhala itthu sakhalai. Satana ni mademoniyu awe anoorowa otthukiwa mwa iyaakha mil. Itthu sootheene awo anipakaaya, khasinrowa okhala-tho. (Apok. 20:2, 3) Nnoorowa woonelela weera vooreera ororomela moota Yehova onipakaawe itthu!

18. Ninxuttera eheeni ni ele yeereñye ni ana a israeli? (Namalepela 11:4-6; 21:5)

¹⁸ Neereke elapo enyuwani nnookhalano maxupo anrowa weerera omuroromela wahu Yehova? Nrowe nuupuwele ele yaakhumelenle ni ana a israeli ekhumakaru elapo awo yaaraaya akaporo wixipitu. Akina yaapatxera okhupanya mwaha wooweera khayakhanleno yootxa yaatxaya wixipitu, awo yannaikhupanyera mwaha wooweera Yehova aavaha emana. (Mmusome Namalepela 11:4-6; 21:5.) Yavira ekhotto ya Harmagedon, neereke hiyo nnokhalano muupuwelo mmoha yaarayano ana a Israeli? Hiyo khanisuwenle, miteko mikavi ninrowaahu okhalano weera nreherere elapo ni ihuhu ikavi ninroowaahu oviriha weera elapo ethatuwe eparadiso. Pooti weera hiyo nnookhalano muteko muntxipale weera nivare, mene itthu khasinrowa okhala soomalela woopatxeranru. Vano neereke nnookela wiikhupanyera mwa itthu Yehova onrowaawe onivahaka? Etthu ninsuwelaahu tiila: naahelaka mwiitti soovaha sa Yehova vaanaano vaava, onoorowa onikhweela ohela mwiitti muhoolo.

19. Muxuttenre eheeni voohima sa mwaha ola?

¹⁹ Mwa yoosomeene yeela nohoona weera Yehova, onapaka itthu ni mukhalelo wooreera. Hiyo ninatthuneya waakhulela eyo. Nave hiyo noohoona weera ti wootthuneya waaroromela alopwana Yehova athanlalaawe weera ekosoopeke muloko awe. Muhitthiwale masu a Yehova amuupuxenraawe mprofeti Yesaya olepa: ‘Mwiitthuwa ni mwavirelela okhala owiiwelela monoolipa.’—Yes. 30:15.