1-2. (a) Kay ano nga damu yana an nakukurian pagsarig ha mga may awtoridad? (b) Ano an aton hihisgotan hini nga artikulo?

 YANA, damu an nakukurian pagsarig ha bisan hin-o nga may awtoridad. Naoobserbaran nira nga kaurogan na nga mas ginpapaboran han mga gobyerno ngan han mga balaud an mga riko ngan an maimpluwensya nga mga tawo ngan diri gintatagan hin hustisya an mga pobre. Husto gud an ginsisiring han Biblia: “Ginmamandoan han tawo an iya igkasi-tawo ha iya ikakadaot.” (Ecles. 8:9) Dugang pa, an pipira nga lider han mga relihiyon maraot an ginbubuhat; tungod hito, an iba nga mga tawo nawad-an hin pagsarig ha Dios. Salit kon an usa nga tawo naruruyag pagpa-Bible study, diri masayon para ha aton nga buligan hiya nga sumarig kan Jehova ngan ha iya mga representante ha tuna.

² Syempre, diri la an mga Bible study an kinahanglan mahibaro pagsarig kan Jehova ngan ha iya organisasyon. Bisan adton maiha na ha kamatuoran kinahanglan nga diri gud mawara an ira pagsarig nga an paagi ni Jehova ha pagbuhat han mga butang amo pirme an pinakamaopay. Usahay, may mga sitwasyon nga mahimo magsari han aton pagsarig kan Jehova. Hini nga artikulo, hihisgotan naton an tulo nga sitwasyon diin an aton pagtoo mahimo masarihan: (1) kon may ginbabasa kita nga pipira nga asoy ha Biblia, (2) kon may nakakarawat kita nga giya tikang ha organisasyon ni Jehova, ngan (3) kon makaeksperyensya kita hin mga kakurian ha tiarabot.

3. Kay ano nga an pipira nga asoy ha Biblia mahimo magsari han aton pagsarig kan Jehova?

 ³ Samtang ginbabasa naton an Pulong han Dios, bangin magkaada  kita mga pakiana mahitungod han paagi ni Jehova ha pagtratar ha pipira nga tawo ngan mahitungod ha pipira nga desisyon nga iya ginhimo. Pananglitan, ha libro han Numeros, mababasa naton nga ginsentensyahan ni Jehova an usa nga Israelita hin kamatayon tungod ha pangahoy ha adlaw han Sabbath. Paglabay hin mga siglo tikang hito, ginpasaylo ni Jehova hi Hadi David ha iya ginbuhat nga pag-adulteryo ngan pagpatay sugad han aton nahibaroan ha ikaduha nga libro han Samuel. (Num. 15:32, 35; 2 Sam. 12:9, 13) Bangin maghunahuna kita, ‘Kay ano nga ginpasaylo ni Jehova hi David ha pagpatay ngan pag-adulteryo, pero ginsentensyahan niya hin kamatayon an usa nga tawo nga nakabuhat hin sala nga baga hin diri man sugad kaseryoso?’ Basi mabaton ini nga pakiana, hisgotan naton an tulo nga butang nga dapat naton hinumdoman kon ginbabasa naton an Biblia.

4. Paonan-o an Genesis 18:20, 21 ngan Deuteronomio 10:17 nagpaparig-on han aton pagsarig ha mga desisyon ni Jehova?

⁴ Usahay, diri iginhahatag han Biblia an ngatanan nga detalye han usa nga asoy. Pananglitan, maaram kita nga hi David sinsero nga nagbasol ha iya nabuhat nga mga sala. (Sal. 51:2-4) Pero ano nga klase hin tawo an usa nga nagtalapas han balaud han Sabbath? Nasubo ba hiya ha iya ginbuhat? May gintalapas na ba hiya hadto nga mga balaud ni Jehova? Ginbalewaray ba niya o ginsalikway pa ngani an mga pahamangno hadto ha iya? Waray ginsisiring an Biblia. Pero makakasiguro kita hini: Hi Jehova “diri gud nagbubuhat hin kawaray-hustisya.” (Deut. 32:4) An iya mga desisyon iginbabasar ha ngatanan nga tinuod nga impormasyon​—diri ha ginsisiring han iba, ha negatibo nga opinyon han iba, o ha bisan ano nga kaurogan na nga nagigin hinungdan nga an mga tawo magkaada sayop nga panhunahuna ha usa nga sitwasyon. (Basaha an Genesis 18:20, 21; Deuteronomio 10:17.) Samtang mas nahibabaro kita mahitungod kan Jehova ngan ha iya mga suruklan, mas nasarig kita ha iya mga desisyon. Bisan kon may nabangon nga mga pakiana ha aton nabasa nga asoy ha Biblia nga diri naton yana mababaton, kilala gud naton an aton Dios salit sigurado kita nga “matadong [hiya] ha ngatanan nga iya paagi.”​—Sal. 145:17.

5. Paonan-o an pagin diri perpekto nakakaapekto han aton panhunahuna may kalabotan ha hustisya? (Kitaa liwat an kahon nga “ An Aton Panhunahuna ha Hustisya Apektado han Aton Pagin Diri Perpekto.”)

⁵ An aton panhunahuna may kalabotan ha hustisya apektado han aton pagin diri perpekto.  Ginhimo kita han Dios ha iya dagway, salit karuyag gud naton nga gintatratar hin patas an mga tawo. (Gen. 1:26) Pero tungod kay diri kita mga perpekto, mahimo magin sayop an aton pagsabot ha mga butang bisan kon ginhuhunahuna naton nga may-ada kita han ngatanan nga impormasyon. Pananglitan, hinumdumi nga nasubo gud hi Jonas ha desisyon ni Jehova nga kalooyan an mga tawo ha Nineve. (Jon. 3:10–4:1) Pero hunahunaa an mga resulta. Natalwas an sobra 120,000 nga mabinasulon nga mga taga-Nineve! Salit an panhunahuna ni Jonas​—diri an kan Jehova—​an kinahanglan tadungon.

6. Kay ano nga diri obligado hi Jehova nga isaysay ha aton an rason han iya mga desisyon?

⁶ Hi Jehova diri obligado nga isaysay ha mga tawo an mga rason han iya mga desisyon. Oo, gintugotan ni Jehova an iya mga surugoon hadto nga ipahayag an ira mga inaabat ha mga desisyon nga iya ginhimo o hihimoon pa la. (Gen. 18:25; Jon. 4:2, 3) Ngan usahay iginsasaysay niya an rason han iya desisyon. (Jon. 4:10, 11) Bisan pa hito, diri obligado hi Jehova nga isaysay ha aton an mga rason han iya mga desisyon. Sugad nga aton Maglalarang, diri niya kinahanglan an aton pag-uyon antes man o katapos niya himoon an iya desisyon.​—Isa. 40:13, 14; 55:9.

7. Ha ano bangin kita makurian, ngan kay ano?

⁷ Sigurado nga mauyon gud kita nga pirme tama an ginbubuhat ni Jehova. Pero bangin makurian kita pagsarig ha iya representante nga mga tawo. Bangin maghunahuna kita kon an mga may awtoridad ba ha organisasyon ni Jehova nagbubuhat gud ba uyon ha giya ni Jehova o ha ira la kalugaringon. Posible nga ito an panhunahuna han pipira nga tawo nga nabuhi ha panahon han Biblia. Tagda an mga ehemplo nga gin-unabi ha  parapo 3. An usa nga paryente han tawo nga nagtalapas han balaud han Sabbath bangin naghunahuna kon ginkonsulta gud ba ni Moises hi Jehova antes sentensyahan hin kamatayon ito nga tawo. Ngan an usa nga sangkay ni Uria nga Hiteo, nga an asawa nag-adulteryo kan David bangin naghunahuna nga gin-gamit ni David an iya gahum sugad nga hadi basi malikayan an sirot nga angayan gud ha iya. Ha pagkamatuod, diri naton masisiring nga nasarig kita kan Jehova kon diri kita nasarig ha iya mga representante dinhi ha tuna​—nga ha ira may pagsarig hi Jehova.

8. Ano an kaparihoan han gin-uunabi ha Buhat 16:4, 5 ngan ha kon paonan-o nagios yana an Kristiano nga kongregasyon?

⁸ Yana, gin-gigiyahan ni Jehova an tunan-on nga bahin han iya organisasyon pinaagi han “matinumanon ngan maaramon nga uripon.” (Mat. 24:45) Pariho han nagmamando nga lawas ha siyahan nga siglo, ini nga uripon nagmamangno han katawohan han Dios ha bug-os nga kalibotan ngan naghahatag hin giya ha mga tigurang ha kongregasyon. (Basaha an Buhat 16:4, 5.) Gin-iimplementar naman han mga tigurang ito nga mga giya ha kongregasyon. Iginpapakita naton nga nasarig kita ha paagi ni Jehova ha pagbuhat han mga butang kon ginsusugot naton an giya nga aton nakakarawat ha organisasyon ngan ha mga tigurang.

9. Ha ano nga mga sitwasyon bangin makurian kita pagkooperar ha desisyon han mga tigurang, ngan kay ano?

⁹ Usahay, bangin makurian kita pagkooperar ha mga desisyon han mga tigurang. Pananglitan, han naglabay nga mga tuig, damu nga kongregasyon ngan sirkito an gin-organisar utro. Ha pipira nga kahimtang, ginhangyo han mga tigurang an mga magwarali nga suportaran an iba nga kongregasyon basi maokuparan an mga lingkoran han aton mga Kingdom Hall. Kon ginhahangyo kita nga bumalhin ha iba nga kongregasyon, bangin makurian kita pagbaya ha aton kasangkayan ngan pamilya. Nakakakarawat ba an mga tigurang hin giya tikang ha Dios nga nagsusumat ha ira kon diin itutoka an tagsa nga magwarali? Diri. Ngan tungod hito, bangin makurian  kita pagsunod han giya nga aton nakakarawat. Pero hi Jehova nasarig ha mga tigurang ha paghimo hin sugad nga mga desisyon, salit kinahanglan liwat sumarig kita ha ira. *

10. Uyon ha Hebreo 13:17, kay ano nga kinahanglan kita magkooperar ha mga tigurang?

¹⁰ Kay ano nga kinahanglan kita magkooperar ha mga tigurang ngan suportaran an ira mga desisyon bisan kon diri naton karuyag an ira mga desisyon? Tungod kay kon bubuhaton naton ito, nabulig kita nga magpabilin nga nagkakaurosa an katawohan han Dios. (Efe. 4:2, 3) Nag-uuswag an mga kongregasyon kon an ngatanan mapainubsanon nga nagpapasakop ha mga desisyon nga ginhihimo han lawas han mga tigurang. (Basaha an Hebreo 13:17.) Ngan an mas importante, iginpapakita naton kan Jehova nga nasarig kita ha iya pinaagi ha pagkooperar ha mga gintaporan niya ha pag-ataman ha aton.—Buh. 20:28.

11. Ano an makakabulig ha aton nga maparig-on an aton pagsarig ha giya nga aton nakakarawat ha mga tigurang?

¹¹ Mapaparig-on naton an aton pagsarig ha giya nga aton nakakarawat tikang ha mga tigurang pinaagi ha paghinumdom nga nag-aampo hira para han baraan nga espiritu kon naghihisgot hira hin mga butang nga makakaapekto ha kongregasyon. Gin-uusisa liwat nira hin maopay an importante nga mga prinsipyo ha Biblia ngan ginkukonsulta an mga giya nga iginhahatag han organisasyon ni Jehova. Karuyag gud nira nga lipayon hi Jehova ngan maataman an iya katawohan ha pinakamaopay nga paagi. Maaram inin matinumanon nga kalalakin-an nga may baratunon hira ha Dios ha paagi han ira pagtuman han ira mga responsabilidad. (1 Ped. 5:2, 3) Hunahunaa ini: Ha kalibotan nga nagkakabahin-bahin tungod han lahi, relihiyon, ngan politika, an katawohan ni Jehova nagkakaurosa pagsingba ha usa nga tinuod nga Dios. Nahitatabo la ini tungod han bendisyon ni Jehova ha iya organisasyon!

12. Ano nga mga butang an kinahanglan ikonsiderar han mga tigurang kon gintuturotimbang nira kon nagbabasol ba an usa nga nakasala?

¹² Gintaporan ni Jehova an mga tigurang hin mabug-at nga responsabilidad nga tipigan nga limpyo an kongregasyon. Kon an usa nga Kristiano nakabuhat hin seryoso nga sala, ginlalaoman ni Jehova nga tuturotimbangon han mga tigurang kon mahimo ba magpabilin ito nga indibiduwal ha kongregasyon. Upod han ira ikukonsiderar, kinahanglan hibaroan nira kon ito ba nga indibiduwal nasusubo gud ha iya ginbuhat. Bangin magsiring hiya nga nagbabasol hiya, pero nangangalas gud ba hiya ha iya ginbuhat? Determinado ba hiya nga diri na utrohon an iya sala? Kon an maraot nga mga kaupod an nagin hinungdan han iya pakasala, determinado ba hiya nga diri na makig-upod ha ira? An mga tigurang nag-aampo kan Jehova, ira ginkukonsiderar an mga impormasyon ngan kon ano an ginsisiring han Biblia, ngan ira gin-uusisa kon ano an inaabat han nakasala ha iya nabuhat. Katapos, magdidesisyon hira kon mahimo ba magpabilin ha kongregasyon an nakasala. Ha pipira nga sitwasyon, kinahanglan hiya paiwason ha kongregasyon.—1 Cor. 5:11-13.

13. Ano an bangin hunahunaon naton kon sangkay o kapamilya naton an ginpaiwas ha kongregasyon?

¹³ Paonan-o mahimo masarihan an aton pagsarig ha mga tigurang? Kon an usa nga ginpaiwas ha kongregasyon diri naton duok nga sangkay o paryente, bangin masayon la para ha aton nga karawaton an desisyon han mga tigurang. Pero kumusta man kon sangkay naton o kapamilya an ginpaiwas? Bangin maghunahuna kita nga waray ikonsiderar han mga tigurang an ngatanan nga impormasyon, o bangin maghunahuna kita kon an ira gud ba desisyon pariho han desisyon ni Jehova. Ano an makakabulig ha aton nga  matipigan an husto nga panhunahuna ha ginhimo nga desisyon?

14. Ano an makakabulig ha aton kon an mga tigurang nagdesisyon nga paiwason ha kongregasyon an usa naton nga sangkay o paryente?

¹⁴ Kinahanglan naton hinumdoman nga an pagpaiwas ha kongregasyon kahikayan ni Jehova. Nakakapahimulos hito an kongregasyon ngan mahimo mabuligan hito an nakasala. Kon an diri mabinasulon nga nakasala tutugotan nga magpabilin ha kongregasyon, mahimo hiya magin maraot nga impluwensya. (Gal. 5:9) Dugang pa, bangin diri niya masantop nga seryoso an iya sala, ngan bangin diri hiya mapagios nga bag-uhon an iya panhunahuna ngan mga buhat basi mahibalik an pag-uyon ha iya ni Jehova. (Ecles. 8:11) Makakasiguro kita nga kon an mga tigurang nagdidesisyon kon angay ba paiwason ha kongregasyon an usa nga indibiduwal, ginsiseryoso nira an ira responsabilidad. Maaram hira nga pariho han mga hukom ha kadaan nga Israel, ‘diri hira naghuhukom para ha tawo, kondi para kan Jehova.’​—2 Cron. 19:6, 7.

15. Kay ano nga labi nga kinahanglan naton sumarig yana ha giya ni Jehova?

¹⁵ Samtang nagtitikahirani an kataposan hini nga sistema, kinahanglan labi nga sumarig kita ha paagi ni Jehova ha pagbuhat han mga butang. Kay ano? Durante ha daku nga kasakitan, bangin makakarawat kita hin mga instruksyon nga baga hin makuri masabtan, diri praktikal, o makuri sugton. Syempre, hi Jehova diri makikiistorya ha aton hin personal. Posible nga maghatag hiya hin giya pinaagi han iya ginpili nga mga representante. Diri ito panahon nga pagruhaduhaan an giya o maghunahuna, ‘Tikang gud ba kan Jehova ini nga giya, o personal nga desisyon la ini han kabugtoan nga nangunguna?’ Masarig ka ba kan Jehova ngan ha iya organisasyon durante hito nga importante nga panahon? An baton hito nakadepende ha kon ano an imo panhunahuna yana ha giya tikang ha mga representante han Dios. Kon nasarig ka ha giya nga aton nakakarawat yana ngan nasugot dayon, posible nga ito liwat an imo bubuhaton ha daku nga kasakitan.​—Luc. 16:10.

16. Paonan-o mahimo masarihan ha tiarabot an aton pagsarig ha mga desisyon ni Jehova?

¹⁶ May usa pa nga butang nga kinahanglan naton ikonsiderar​—kon ano an aton magigin reaksyon ha mga desisyon ni Jehova ha kataposan hini nga maraot nga kalibotan. Yana, naglalaom kita nga damu hadton diri nag-aalagad kan Jehova, upod na an aton diri tumuroo nga mga paryente, an magdidesisyon nga mag-alagad ha iya antes umabot an kataposan. Pero ha Armagedon, hi Jehova, pinaagi kan Jesus, maghihimo hin pinal nga desisyon mahitungod han ira kabubuwason. (Mat. 25:31-33; 2 Tes. 1:7-9) Diri kita  an magdidesisyon kon hin-o an makakakarawat han kalooy ni Jehova ngan kon hin-o an diri. (Mat. 25:34, 41, 46) Masarig ba kita ha mga desisyon ni Jehova, o magigin hiparakdolan ito ha aton? Klaro nga kinahanglan naton parig-unon an aton pagsarig kan Jehova yana basi sumarig kita ha iya hin bug-os ha tiarabot.

17. Paonan-o kita magpapahimulos ha mga desisyon ni Jehova ha kataposan hinin maraot nga kalibotan?

¹⁷ Imadyina an aton aabaton ha bag-o nga kalibotan han Dios kon makita na naton an mga resulta han mga desisyon ni Jehova. Mawawara na an buwa nga relihiyon ngan an hakog nga komersyo, pati na an politikal nga sistema nga nagraraugdaog ha mga tawo ngan nagigin hinungdan han ira pag-antos ha bug-os nga kasaysayan. Diri na magigin bahin han aton adlaw-adlaw nga pagkinabuhi an sakit, kalagas, ngan an kamatayon han aton mga hinigugma. Hi Satanas ngan an mga demonyo piprisuhon hin usa ka yukot ka tuig. Mawawara na an mga resulta han ira pagrebelde. (Pah. 20:2, 3) Magigin mapasalamaton gud kita hito nga panahon nga sinarig kita ha paagi ni Jehova ha pagbuhat han mga butang!

18. Ano nga mga leksyon an aton mahibabaroan ha ginbuhat han mga Israelita nga nakarekord ha Numeros 11:4-6 ngan 21:5?

¹⁸ Posible ba nga ha bag-o nga kalibotan han Dios may mga sitwasyon nga mahimo magsari han aton pagsarig ha paagi ni Jehova ha pagbuhat han mga butang? Pananglitan, tagda an nahitabo waray pag-iha katapos makagawas an mga Israelita ha pagkauripon ha Ehipto. An iba nagtikang pagreklamo tungod kay diri na nira nakakaon an presko nga mga pagkaon nga ira napahimulosan didto, ngan gintamay nira an tagana ni Jehova nga manna. (Basaha an Numeros 11:4-6; 21:5.) Posible ba nga magkaada kita pariho nga panhunahuna katapos han daku nga kasakitan? Diri kita maaram kon ano kadaku nga buruhaton an aton hihimoon ha paglimpyo han tuna ngan ha hinay-hinay nga paghimo hito nga paraiso. Posible nga damu an buruhaton, ngan ha siyahan bangin diri masayon an kinabuhi. Magrireklamo ba kita han mga tagana ni Jehova hito nga panahon? Usa nga butang an sigurado: Samtang mas gin-aapresyar naton an mga tagana ni Jehova yana, posible gud nga ito liwat an aton bubuhaton hito nga panahon.

19. Isumaryo an nangunguna nga mga punto hini nga artikulo.

¹⁹ Pirme gud tama an paagi ni Jehova ha pagbuhat han mga butang. Kinahanglan magin kombinsido kita hito. Kinahanglan liwat sumarig kita ha mga gintataporan ni Jehova ha pagpatuman han iya mga instruksyon. Diri gud naton hingalimtan an ginsiring ni Jehova pinaagi han iya propeta nga hi Isaias: “Magigin makusog kamo kon magpapabilin kamo nga kalmado ngan masarig kamo.”—Isa. 30:15.