1, 2. ა) მუშენ უჭირს ამდღა ბრელს, ენდან თინეფს, მიდგას უფლებამოსილება უღნა? ბ) მუს გუვარჩიენთ თე სტატიას?

ამდღა ბრელს უჭირს, ენდას უფლებამოსილ ადამიანეფს. თინეფ ორწყენა, ნამდა მთავრობაშ წარმომადგენელეფ დო კანონეფ, მდიდარ დო ძალაუფლება უღუნ ფერ ხალხის იცვენს დო ვართ ხოლო ღარიბეფს. ბიბლია იჩიებ: „კოჩ კოჩის ირო ორუდ თიშ საზარალოთ“ (ეკლ. 8:9). თეს გეძინელ, მინს ნამთინე რელიგიურ ლიდერიშ გლახა მოქმედებეფქ მეუდინუ ღორონთიშ ნდობა. ათეშენ, მუჟამსით შხვეფს ბიბლიას ვოგურუანთ, თინეფს ოკო მივეხვარათ, გავითარან იეჰოვაშ დო თინეფიშ ნდობა, მით ხემძღვანელობაშო აფჷ გერნაფილ.

² მუშო ოკო რაგად, ხვალე ბიბლიაშ მაგურაფალეფს ვაფნა იეჰოვაშ დო თიშ ორგანიზაციაშ მიმართ ნდობა გავითარებელ. თინეფს ხოლო, მით ბრელ ხან რე იეჰოვას ომსახურნა, ოკო ვა გაჭყორდან, ნამდა თინა ირფელს სამართლიანო ორთჷ. მინშა შილებე იჸუას სიტუაციეფქ, მუჟამსით იეჰოვაშ მიმართ ჩქინ ნდობა გიმიცადებ. თე სტატიას სუმ თეცალ სიტუაციას გუვარჩიენთ. პირველ, მუჟამსით ნამთინე ბიბლიურ მონაკვეთის ბკითხულენთ. მაჟია, მუჟამსით იეჰოვაშ ორგანიზაციაშე მითითებეფს ბღებულენთ დო მასმა, მუჟამსით სირთულეეფს შეფხვადუთ.

3. მუჭო გიმოცადუნს ნამთინე ბიბლიურ მონაკვეთ იეჰოვაშ მიმართ ჩქინ ნდობას?

 ³ ღორონთიშ სიტყვაშ კითხირიშ დროს შილებე მიკვედან, მუშენ მიქცუ იეჰოვაქ თეშნერო. მაგალთო, წიგნ  „რიცხვეფს“ ბკითხულენთ, ნამდა იეჰოვაქ ღურათ დასაჯ პიროვნება, მით საბატონს დიშკას შაყარანდჷ. „2 სამუელს“ ბკითხულენთ, ნამდა იეჰოვაქ აპატუ მეფე დავითის მრუშობა დო კოჩიშ ჸვილუა (რიცხ. 15:32, 35; 2 სამ. 12:9, 13). შილებე მიკვედან, მუშენ აპატუ იეჰოვაქ დავითის მრუშობა დო კოჩიშ ჸვილუა, მუჟამსით შხვას ვაპატუ, ართ მეჯინათ, ნაკლებო სერიოზულ ცოდვა? თეშ პასუხ ქიგებგათინ, გუვარჩუათ სუმ მხარე, ნამუთ ბიბლიაშ კითხირიშ დროს ოკო ფშუდან.

4. მუჭო ამანგარენს იეჰოვაშ გიშაღალირ განაჩენიშ მიმართ ჩქინ ნდობას დაბადებაშ 18:20, 21 დო კანონიშ 10:17?

⁴ბიბლიას ირო ვა რე არძა დეტალ ენწყუმილ. მაგალთო, ჩქი მიჩქნა, ნამდა დავითიქ მთელ გურით მინანუ დაშებულ (ფსალმ. 51:2—4). მარა მუშ რაგად შემლებნა თი კოჩშე, მიდგაქ საბატონიშ კანონს ვედემორჩილ? ქონარღენდუო თინა დაშებულს? წესო ხომ ვა უღუდ იეჰოვაშ კანონიშ დარღვიება? ქოღებულენდუო გაფრთხილებეფს? ბიბლია თეშ გურშენ მუთუნს ვეჩიებ. მარა შემლებნა დარწმუნებულ ვორდათ, ნამდა „იეჰოვა უსამართლოთ დღას ვექციებ“ (კან. 32:4). თინა გადაწყვეტილებეფს გიორსხუანს ფაქტეფშა დო ვართ ხოლო ჭორეფშა, წინასწარ შექმნილ აზრშა ვარდა შხვა მუდგარენშა, მუთ ადამიანეფს ოცილ, სწორას გასამართლან (წეკითხით დაბადებაშ 18:20, 21; კანონიშ 10:17). მუთ უმოსო იფჩინებაფუანთ იეჰოვაშ ნორმეფს, თით უმოსო მემანგარებნა ნდობა, ნამდა თიშ გიშაღალირ განაჩენ სწორ რე. მუჟამსით ბიბლიურ შემთხვევეფიშ გურშენ თიცალ კითხვეფ მირჩქინდუნა, ნამდგაშ პასუხ ვამღუნა, ჩქი დასაბაღშე უმოს რჩქინა მიღნა თიშა დარწმუნებელო, ნამდა „იეჰოვაშ არძა შარა სამართლიან რე“ (ფსალმ. 145:17).

5. მუჭო მოცილნა არასრულყოფილება სიტუაციაშ შეფასებას? (ქოძირით ჩარჩო  „არასრულყოფილება ოცილ სამართლიანობაშ გურშენ ჩქინ შეხედულებას“).

⁵არასრულყოფილება მოცილნა სიტუაციაშ სწორას შეფასებას. ღორონთიქ მუშ ამნახანტო გუმოჭყეს, ზუსტას თენა რე მიზეზ, მუდგაშ გურშენ ვა მობწონა უსამართლობაშ ძირაფა (დაბ. 1:26). მარა ჩქი არასრულყოფილეფ ვორეთ, ათეშენ შილებე სწორას ვეშმაფასებუან სიტუაციაქ, თიმ დროს ხოლო, მუჟამსით  ფიფქრენთ, ნამდა არძა ფაქტ მიღნა. ქიგიფშინათ იონაშ მაგალით, ნამდგას ვემეწონ იეჰოვაშ ჭყოლოფათ მეღებულ გადაწყვეტილებაქ ნინეველეფწკუმა დაკავშირებით (იონ. 3:10—4:1). მარა დეფიქრით, მუქ მაჸუნ იეჰოვაშ გიმორჩქინელ ჭყოლოფას. 120 000-შე მეტ ნინეველქ, ნამდგაქ მინანუ, გინასქიდ. თავრეშე იძირე, ნამდა აზროვნებაშ გიშასწორება იეჰოვას ვარინ, იონას ოსაჭირუდ.

6. მუშენ ვა რე იეჰოვა ვალდებულ, ემინწყან მუშ მეღებულ გადაწყვეტილებეფიშ მიზეზეფ?

⁶იეჰოვა ვა რე ვალდებულ, ადამიანეფს გეუნწყას მუშ მეღებულ გადაწყვეტილებეფიშ მიზეზეფ. ულირს მინშა იეჰოვა არზენდჷ მუშ მსახურეფს თიშ ნებას, ნამდა მუნეფიშ აზრ გეგმუხანტუდესკო თი გადაწყვეტილებეფიშ გურშენ, მუდგას იეჰოვა ღებულენდჷ ვარდა მომავალს ულამუდ მეღება (დაბ. 18:25; იონ. 4:2, 3). თინა მუშ გადაწყვეტილებეფიშ მიზეზეფს ხოლო ენწყუნდჷ (იონ. 4:10, 11). მუშო ოკო რაგად, იეჰოვა ვა რე ვალდებულ, გემინწყან თი მიზეზეფ, მუშენ ღებულენს შხვადოშხვა გადაწყვეტილებას. მუჭოთ ჩქინ გუმაჭყაფალს, იეჰოვას ვასაჭირ ჩქინ აზრიშ მორჩქილაფა გადაწყვეტილებაშ მეღებაშახ დო თიშ უკულ (ეს. 40:13, 14; 55:9).

7. მუშ კეთებაქ შილებე გამჭირდან დო მუშენ?

⁷ მუშო ოკო რაგად, ჩქი მთელ გურით ბჯერა, ნამდა იეჰოვა მუდგას ორთჷ, ირფელ სწორ რე. ჩქინო შილებე ადვილ ვა რდას თი ადამიანეფიშ ნდობა, მით იეჰოვას ხემძღვანელობაშო აფჷ გერნაფილ. შილებე მოინტერესდან: „ქიმეჸუნანო თინეფ იეჰოვაშ მითითებეფს, დოვარ მუნეფიშ აზრით მოქმედენა?“. გუვარჩუათ  მასმა აბზაცის მოჸუნაფილ ბიბლიურ მაგალითეფ. შილებე თი პიროვნებაშ მოჯგირეს, მიდგაქ საბატონიშ კანონს ვემიაჸუნ, ოინტერესუდ, დასურო მიღჷ დო ვარ მოსექ იეჰოვაშე მითითება თიშ ღურათ დასაჯებელო. ვარდა ხეთელ ურიაშ მეგობარს შილებედ უფიქრებუდკო, ნამდა დავითიქ, მიდგაქ ურიაშ ოსურწკუმა იმრუშ, გეგმირინუ მუშ მეფობა, ნამდა ღურაშე დუდ ეუჩილითუაფუდკო. არგამა რე, ჩქი ვეშემლებნა ფთქუათ, ნამდა ვონდუთ იეჰოვას, მუჟამსით ვეგმიფრჩქინანთ ნდობას თინეფიშ მიმართ, მიდგას იეჰოვა ონდჷ დო ხემძღვანელობაშო აფჷ გერნაფილ.

8. მუჭოთ საქმეეფიშ 16:4, 5-შე იძირე, მუჭო ხემძღვანელენდეს პირველ საუკუნეს ქრისტიანულ კრებას დო ამდღა მუჭო ხემძღვანელენა?

⁸ ამდღა იეჰოვა მუშ ორგანიზაციაშ მიწიერ ნაწილს ხემძღვანელენს „ართგურ დო გონიერ მონაშ“ საშვალებათ (მათ. 24:45). პირველ საუკუნეშ ხემძღვანელ საბჭოცალო გონიერ მონა ხოლო ზედამხედველენს ღორონთიშ ხალხის მთელ მსოფლიოს დო მითითებეფს არზენა კრებაშ უხუცესეფს (წეკითხით საქმეეფიშ 16:4, 5). უხუცესეფ თე მითითებეფით ხემძღვანელენა კრებეფს. ჩქი ვოძირანთ, ნამდა ვონდუთ იეჰოვას, მუჟამსით მეპჸუნთ ორგანიზაციაშ დო უხუცესეფიშ მითითებეფს.

9. მუჟამ შილებე გამჭირდან უხუცესეფიშ მეღებულ გადაწყვეტილებეფიშ მეჸუნაქ დო მუშენ?

⁹ მინშა შილებე გამჭირდან უხუცესეფიშ მეღებულ გადაწყვეტილებეფიშ მეჸუნაქ. მაგალთო, ბოლო წანეფს ცვლილებეფქ ქუმოხვად დო ბრელ კრებაქ გეერთიან. ნამთინე შემთხვევას უხუცესეფქ თხის მაუწყებელეფს, შხვა კრებაშა გეგნურთუმდესკო, ნამდა დარბაზეფ მაქსიმალურო გონივრულო გეგმურინუაფდესკო. ახალ კრებაშა გინულა ჩქი ხოლო ქოფთხის-და, შილებე გამჭირდან ოჯახიშ დო მეგობრეფიშ ჯვეშ კრებას დოტებაქ. ღებულენანო უხუცესეფ ღორონთშე  პირდაპირ მითითებეფს, მიქ ნამ კრებაშა გინორთას? მუშო ოკო რაგად ვარ. ზუსტას თექ შილებე მეცილან მითითებაშ მეჸუნას. მარა იეჰოვა ონდჷ უხუცესეფიშ მეღებულ გადაწყვეტილებეფს დო ჩქი ხოლო ოკო მივენდათ. *

10. მუჭოთ ებრაელეფიშ 13:17-შე ბგებულენთ, მუშენ ოკო დუკინათ ხუჯ უხუცესეფს?

¹⁰ მუშენ ოკო დუკინათ ხუჯ უხუცესეფიშ მეღებულ გადაწყვეტილებეფს, თიმ დროს ხოლო, მუჟამსით ჩქინო ვა რე მოხუჯურ? თეთ ხეს უნწყუნთ ღორონთიშ ხალხ შქას ართობას (ეფეს. 4:2, 3). კრებეფ სულიერო მეურს წიმი, მუჟამსით არძა თანდაბლურო უკინენს ხუჯის უხუცესეფიშ მეღებულ გადაწყვეტილებეფს (წეკითხით ებრაელეფიშ 13:17). მუთ არძაშ უმოს მნიშვნელოვან რე, ჩქი ვოძირანთ, ნამდა ვონდუთ იეჰოვას, მუჟამსით ხუჯის უკინენთ თინეფს, მით იეჰოვას ხემძღვანელობაშო აფჷ გერნაფილ (საქ. 20:28).

11. მუ მიმეხვარებნა უხუცესეფიშ მიმართ ნდობაშ გამანგარებას?

¹¹ ჩქინ ნდობა უმოსო იმანგარებ, მუჟამსით ფიფქრენთ, ნამდა უხუცესეფ ლოცულენა დო იეჰოვას თხინა ხემძღვანელობას თიცალ გადაწყვეტილებეფიშ მეღებაშ დროს, ნამუთ კრებაშა იმოქმედენს. თეს გეძინელ, თინეფ მთელ გურით ირკვიენა ბიბლიურ პრინციპეფს დო მეჸუნა იეჰოვაშ ორგანიზაციაშ მითითებეფს. უხუცესეფს მანგარო ოკონა, გურ გუხარან იეჰოვას დო ჸოროფათ ქიზრუნან თიშ ხალხშე. თე ართგურ ქომოლკათას უჩქჷ, ნამდა თინეფ ანგარიშვალდებულეფ რენა ღორონთიშ წოხოლე (1 პეტ. 5:2, 3). მორთ დეფიფქრათ თეშ გურშენ. მთელ მსოფლიო რასობრივო, რელიგიურო დო პოლიტიკურო გორთილ რე, მარა იეჰოვაშ ხალხ გაერთიანებულ რე ართ ჭეშმარიტ ღორონთიშ თაყვანიშცემას. თენა თიშ გურშენ ხვადუ, ნამდა იეჰოვა ხუჯის უკინენს მუშ ორგანიზაციას.

12. მუ ოკო გეთვალისწინან უხუცესეფქ, ნამდა ქოძირან, დასურო ნარღენს დო ვარ პიროვნება?

¹² იეჰოვაქ უხუცესეფს კრებაშ სიწმინდეშ დაცვებაშ მნიშვნელოვან პასუხიშმგებლობა მიანდჷ. ქრისტიან სერიოზულ ცოდვას ჩედინენს-და, იეჰოვა ითხინს უხუცესეფშე, ნამდა გეგმირკვიან, ქორე დო ვარ შეიოლებერ, თე პიროვნებაქ კრებას ქუდოსქიდას. თინა შილებე იჩიებდას, ნამდა ნარღენს. მარა მართალო ქოჯოგნო, მუთ აკეთ? გინოჭყვიდილ ქაფუნო, ნამდა ვეგემეორას თე ცოდვა? ურთიერთობა გლახა საზოგადოებაწკუმა ქოუღუდ-და, ქორენო მზათ თიშ მიოტებელო? უხუცესეფ ლოცვათ თხინა იეჰოვას მოხვარას, გიმირკვიენა ფაქტეფს დო თის, მუს იჩიებ ბიბლია თეშ გურშენ, ოკვირნა, მუ დამოკიდებულება უღჷ შემცოდველს მუშ ცოდვაშ მიმართ დო თეშ უკულ გინოჭყვიდნა, დოსქიდას დო ვარ შემცოდველქ კრებას. ნამთინე შემთხვევას თიქ ოკო გერიცხას (1 კორ. 5:11—13).

13. მუ კითხვეფ შილებე მიღდან, მუჟამსით ჩქინ ხოლოშიან პიროვნება ირიცხებ?

¹³ მუჭო შილებე იძირას, ვონდუთ დო ვარ უხუცესეფს? მუჟამსით გარიცხულ პიროვნება ვა რე ჩქინ ხოლოშიან მეგობარ ვარდა ნათესე, ჩქი ალბათ ადვილო მიბღენთ უხუცესეფიშ გადაწყვეტილებას. მარა შილებე თექ გვალო შხვანერო მოხვადას, მუჟამსით გარიცხულ ჩქინ ხოლოშიან პიროვნება რე. ჩქი შილებე მოინტერესდან, გეგმირკვის დო ვარ უხუცესეფქ არძა ფაქტ ვარდა დასურო თეშ გეგნოჭყვიდესო საკითხეფ, მუჭოთ იეჰოვა გინოჭყვიდუნდჷ. მუ მიმეხვარებნა, სწორ დამოკიდებულება მიღდან?

14. მუშ გურშენ ოკო დეფიფქრათ, მუჟამსით უხუცესეფ, ჩქინ ხოლოშიან პიროვნებაშ გარიცხვას გინოჭყვიდნა?

 ¹⁴ ჩქი ჯგირო ოკო ფშუდან, ნამდა გარიცხვა იეჰოვაშ ღონისძიება რე, ნამდგას ჯგირობუა მოუღ ქოთ კრებაშა დო ქოთ გარიცხულშა. მოუნანიებელ პიროვნებას კრებას ქიდიტენან-და, თიქ შილებე გლახათ იმოქმედას კრებაშა (გალ. 5:9). თეს გეძინელ, თის შილებე სერიოზულო ვემიორჩქუდას მუშ ცოდვა დო ვა უღდას სურვილ, დითირუას აზროვნება დო საქციელ, ნამდა იეჰოვაწკუმა კინ ჯგირ ურთიერთობა უღდას (ეკლ. 8:11). ჩქი შემლებნა დარწმუნებულ ვორდათ, ნამდა, მუჟამსით უხუცესეფ ღებულენა პიროვნებაშ გარიცხვაშ გადაწყვეტილებას, თე პასუხიშმგებლობას მანგარ სერიოზულო უჯინენა. თინეფს შეგნებულ აფნა, ნამდა ჯვეშ ისრაელიშ მსაჯულეფცალო, მუნეფ ხოლო „ადამიანიშ სახელით ვარინ, იეჰოვაშ სახელით ასამართლენა“ (2 მატ. 19:6, 7).

15. მუშენ მოსაჭირნა განსაკუთრებულო ასე, ვენდათ იეჰოვაშ ხემძღვანელობას?

¹⁵ მუთ უმოს ხოლოს ვორეთ თე უბადო ქვეყნიერებაშ აღსასრულწკუმა, თით უმოსო ოკო მივენდათ იეჰოვას. თენა მანგარ მნიშვნელოვან რე, მუშენდა დიდ გასაჭირიშ დროს, შილებე თიცალ მითითებეფ მიბღათ, ნამუთ იშენდოიშენ ჭკვერულო ვა მაძირედან დო ათეშენ თიშ მეჸუნაქ გამჭირდან. მუშო ოკო რაგად, იეჰოვა პირადო ვა დომრაგადუანა. ღორონთ მითითებეფს თინეფიშ საშვალებათ ქომჩანა, მით ხემძღვანელო აფჷ გერნაფილ. თიმ დროს ვეჸუაფ ეჭვიშ მიშაღალაშ დო თიშე ფიქრიშ დრო, დასურო ქუმურსო თე მითითებეფ იეჰოვაშე დო ვარ ხემძღვანელ ჯიმალეფიშ პირად გადაწყვეტილება რე. ქიმვენდებუთო იეჰოვას დო თიშ ორგანიზაციას თე მნიშვნელოვან პერიოდის? თიშე ფიქრ, ამდღა მუჭო მეპჸუნთ ხემძღვანელობას, ქიმმეხვარებნა თე კითხვეფშა პასუხიშ მეჩამას. ამდღა ბღებულენთინ თი ხემძღვანელობას ქანდუთ დო ქიმეჸუნთ-და, დიდ გასაჭირს ხოლო ვა გაიჭირდუნა თეშ კეთება (ლუკ 16:10).

16. მუჭო შილებე გიმიცადას იეჰოვაშ მიმართ ჩქინ ნდობაქ?

¹⁶ ჯგირო ოკო დეფიფქრათ, მუნერ რეაქცია მაღვენუნა იეჰოვაშ გიშაღალირ განაჩენშე თე უბადო ქვეყნიერებაშ აღსასრულს. მუშო ოკო რაგად, იმენდ მიღნა, ნამდა თინეფ, მით ვამსახურნა იეჰოვას, თინეფ შქას ჩქინ ნათესეეფ, თე ქვეყნიერებაშ აღსასრულშახ გეგნოჭყვიდნა, ემსახურან თის. მარა არმაგედონს  იეჰოვა იესოშ საშვალებათ, საბოლათ გეგნოჭყვიდუნს თინეფიშ მომავალს (მათ. 25:31—33; 2 თეს. 1:7—9). ჩქინდა ვა რე დამოკიდებულ, მი მიღენს იეჰოვას ჭყოლოფას დო მი — ვარ (მათ. 25:34, 41, 46). ხომ ვემვოტენთ იეჰოვაშ მსახურებას, მუშენდა ვა ვოთანხმუთ თიშ მეღებულ გადაწყვეტილებეფს? არგამა რე, ასეშე ოკო გუვამანგარათ ჩქინ ნდობა იეჰოვაშ მიმართ, ნამდა მომავალს ხოლო ბოლოშა ვენდათ თის.

17. მუ კურთხევეფს მიბღენთ თე ქვეყნიერებაშ ბოლოს იეჰოვაშ გიშაღალირ განაჩენშე?

¹⁷ წერმიდგინით, მუჭო იბგინანთ დუდის, მუჟამსით ახალ ქვეყნიერებას ქობძირუნთ იეჰოვაშ გიშაღალირ განაჩენიშ შედეგეფს. ვეჸუაფ ტყურა რელიგია, ჰარამ კომერციულ დო პოლიტიკურ სისტემა, ნამდგაქ ხალხიშ ჩაგრებას დო ტანჯებას შეუნწყუ ხე მთელ კაცობრიობაშ ისტორიაშ დინახლე. ლახალა, სირჩინუე დო საჸოროფო ადამიანიშ ღურა ვეჸუაფ ჩქინ ირდღაშიან ცხოვრებაშ ნაწილ. სატანა დო თიშ დემონეფ ანთას წანას იჸუაფნა ბორკილ. ართ დო სამუდამოთ მისპუ თი გლახა შედეგეფ, მუდგაქ სატანა დო დემონეფიშ ბუნტის მაჸუნ (გამოცხ. 20:2, 3). მუ მარდულეფ იპჸუაფუთ, ნამდა ირიათო ვონდუდით იეჰოვას.

18. მუშ გურაფა შემლებნა ისრაელეფიშ მაგალითშე, მუჭოთ თენა რიცხვეფიშ 11:4—6 დო 21:5-ის რე ინოჭარილ?

¹⁸ ახალ ქვეყნიერებას ხოლო შილებე გეგმიცადას ჩქინ ნდობაქ იეჰოვაშ მიმართ. მაგალთო, გუვარჩუათ, მუქ მოხვად ისრაელეფიშ ეგვიპტეშ მონობაშე გათავისფალებაშ უკულ. ნამთინექ ხეთეშე ქიდიჭყჷ წუხება, ნამდა ვა უღდეს ოჭკუმალ, ნამდგას ეგვიპტეს ჭკუმუნდეს დო ვა მოწონდეს იეჰოვაშ სასწაულებრივო მეჩამილ მანანა (წეკითხით რიცხვეფიშ 11:4—6; 21:5). შილებენო თეცალ ფიქრეფქ გომრჩქინდან დიდ გასაჭირიშ თებაშ უკულ? ჩქი ვამჩქუნა, მუსხი მაჸინა ომუშებელ, სოიშახ დედამიწა ჭიე-ჭიეთ სამოთხეთ გინირთუ. შილებე ბრელქ მაჸუან ომუშებელქ დო დუდშე თექ ადვილქ ვეჸუას ჩქინო. თე დროს წუხებას ხომ ვედიბჭყანთ? იეჰოვა მუდგას ჩქინო ორთუნ თიშე მარდულ ამდღა ქუვორეთ-და, მომავალს ხოლო მარდულ იჸუაფუთ ირფელშე, მუდგას ჩქინო გაკეთენს.

19. მუ რე თე სტატიაშ მთავარ აზრეფ?

¹⁹ ჩქი მოსაჭირნა თიშე დარწმუნება, ნამდა იეჰოვა ირფელს სწორას ორთჷ. თეს გეძინელ, მოსაჭირნა, მივენდათ თინეფს, მიდგას იეჰოვა ონდჷ. დღას ოკო ვაგმოჭყორდან სიტყვეფქ, ნამუთ იეჰოვაქ ესაია წინასწარმეტყველიშ საშვალებათ თქუ: „თქვან ძალა მშვიდას რინას დო მენდებას იჸუაფ“ (ეს. 30:15).