1-2. (a) Tipagine duhe ti ni ni mbumbuhe fu badungu aboro areme i kido kuti agu aboro du na pagbia beyo? (b) Ginipai ani nika wisigopai tipaha rogo gi kekeapai re?

AREME, si ni mbumbuhe fu badungu aboro i kido kuti ai gu boro du na pagbia beni. I bi gupai nga airangbii gbiati andiko nabanda kina airakumuko na agu aboro du na ome beyo dedede, ono i afunga bakere undo fu rungorungo aboro te. Ziazia Kekeapai nape gupai ziazia nga: “Boro nidu ni gbia ku ri kura ni ka imisa ni.” (Batu. 8:9) Kurii gure, kura abarumbatayo rogo pambori namanga gbegberẽ apai, nga gu naima sa kura aboro i zanga du na kido kuti Mbori. Sidu, ho ani awisigo Ziazia Kekeapai ni na boro, si naida ani undo ni ni wiriki wai ka kido kuti Yekova na agu aboro Ko namoi yo auru kpotosende.

² Anga kina abawiriki Ziazia Kekeapai sa nga gu yangara aboro si aida i wiriki ka kido kuti Yekova na ka kido kuti gako riigbu te. Ka si vura du nga ani aima digo niirisi Yekova tipa dungu agarã, si aidanga ani zanga idapase kuti gupai nga ga Yekova gene mangaapai ngba kisusi ti aregbo dunduko te. Ti kura aregbo, apai ima rengba ka kura nga gu rengbe ka asada gaani kido rogo gi bangiriba re. Rogo gi kekeapai re, ani nika sakapai tipa abangiriba biata nga gu rengbe gaani idapase kadu ni asadiasadihe rogoho: (1) ho ani ageda kura apangbanga ni nga ga Baibiri, (2) ho ani agbia arugapai ni be ga Yekova riigbu, na (3) ho ani nika gbia tirani ni na akpakarapai kumbatayo.

3. Waigu rengbe kura apangbanga nga ga Ziazia Kekeapai ka asada gaani kido kuti Yekova?

³ Ho ani ageda Fugo Mbori ni, ani ima rengba kadu na asanahe nibipa gu gene Yekova amangipai na kura aboro ngbaha na nibipa kura adiaberã ko amangihe. Ni kpiapai, rogo gu buku nga ga  Pa Geda Aboro, ani nageda gupai nga Yekova asaringbanga Yisaraere sa kpio tipa dungura nyake Rago Sabiti. Rogo gu buku nga ga Ue Samuere, ani nabi gupai nga fuo akama agarã kusa, Yekova ambupai fu Bakindo Davide ho ko amangi bäri ni na ki imi boro. (Geda 15:32, 35; 2 Sam. 12:9, 13) Ani ima rengba kaa baka bangirani nga, ‘Tipagine Yekova ambupai ti ni fu Davide ho ko aimi boro ni na ki mangi bäri ono ki saringbanga gu kumba sa kpio namangi gupai naangeranga wa bakere ingapai ya?’ Tipa ka karagapai kuti gi sanahe re, oni bingo apai biata nga gu si aida ani tingidihe ho ani ageda Baibiri ni.

4. Wai du Bambata Pai 18:20, 21 na Pa Fu Rugute ni Ue he 10:17 anyakasa gaani kido kuti ga Yekova asarangbanga?

⁴Ziazia Kekeapai ti aregbo dunduko apekanga gu futufutuapai dunduko du tipa pangbanga te. Ni kpiapai, ani ini gupai nga Davide aima manga ndikidi saberã tipa gako mangaapai. (Tam. 51:2-4) Ono gini ngbatunga boro nangia gu kumba nakuo gu ndiko nga ga Rago Sabiti re? Ya mo rago agberẽ tiko tipa gupai ko amangihe re? Ya mo ko aima basasangba ga Yekova andiko mbata kusayo? Ya mo i afu azahe mbata kusayo fuko ka ko aidanga ka berã paha ya watadu zavura ko ki káha aká? Ziazia Kekeapai afuranga tipaha te. Ono tie, ani rengbe kadu na kido kuti gupai nga: Yekova “zanga irairapai.” (Pa Rug. 32:4) Ko namanga gako adiaberã rii mburu agu arengo dunduko duho, angianga rii mburu agu apai kura aboro agumbaha, iraira bipai tipa kura aboro, watadu ai gu kurapai rengbe ka sa wiri aboro i du na iraira bipai tipa pai ya. (Oni gedi Bambata Pai 18:20, 21; Pa Fu Rugute ni Ue he 10:17.) Kina wai ani nikaa wirikapai tipa Yekova na gako arugute ni bakerehe, kinawo a ani nikaa sonosa kido ni bakerehe kuti gako asarangbanga. Ka si vura du nga ani nageda Baibiri na kidu na asanahe nga gu ka ani agbianga akaragapai kutini awere ya, ani ima ino badungu apai tipa gaani Mbori nga gu nasa rani ani du na kido nga Yekova “du ni ruru ko rogo gako apai dunduko.”​—Tam. 145:17.

5. Waigu du gaani zangarengba na maapai kurii gaani bipai tipa ruru sarangbanga? (Oni bi gu sanduki a nga, “ Zangarengba Nasa Rani Ani du na Iraira Bipai Tipa Ruru Sarangbanga.”)

⁵Mbiko gupai nga ani nga kpakpa aboro, ani arengbanga kaa sarangbanga ni ruruhe ti aregbo dunduko te. Mbori akusi rani rogo kpiako yo, sidu, ani na nyemu gupai nga kaa bi gupai nga i naamangapai na aboro ngba ruru gene. (Bam. P. 1:26) Ono mbiko gupai nga ani nga kpakpa aboro, ani ima rengba ka sarangbanga ni  irairaha tipa apai, zavura ho ani aberãha ni nga arengo dunduko kina be rani tipaha. Ni kpiapai, oni tingidinga pa wai Yona adu na gberãrago na ga Yekova diaberã ka yugo inapai fu aboro Nineve. (Yona 3:10–4:1) Ono tie, oni berẽnga pa gupai namangi, bambiko Yekova ayugu inapai fuyo. Aboro Nineve bangeyo aima susa 120,000 nga aguyo naima saberã yo abati! Ti digidoho, Yona du nasaringbanga aboro ni irairaha angianga Yekova ya.

6. Tipagine si aidanga Yekova naasaka rogo gako adiaberã yo asaka ti ni furani ya?

⁶Si aidanga Yekova naasaka rogo gu nduapai yo asaka fu aboro ko amanga gako adiaberã ti ni te. Rengo ngaha nga, Yekova aima mbu gene fu gako amoyambu bakuru kusayo i peke gayo aberãpai nibipa agu adiaberã si aaida ko mangihe watadu ko aaida ka mangaha. (Bam. P. 18:25; Yona 4:2, 3) Na ti kura aregbo, ko anaasaka rogo ndu gupai yo asaka ko amanga adiaberã ti ni. (Yona 4:10, 11) Ono tie, anga si naida gupai nga Yekova naasaka rogo gu nduapai yo furani ko amanga gako adiaberã ti ni te. Wa du ko ni Bakusirani, si aidanga ko sana rani asana mbata ho ko aida ka mangapai ni watadu tingbafuo manga ko pai te.​—Yes. 40:13, 14; 55:9.

7. Gini kpakarapai rengbe ani ka gbia tirani, na ni na tipagine?

⁷ Zanga kapa, ani ima ida kuti gupai na kpotoraniyo dunduko nga, Yekova ti aregbo dunduko namanga gupai du ni ruruhe. Ono tie, gu kpakarapai rengbe kadu furani nga, kadu na kido kuti gu wiri aboro ko namoi yo i naarukuba ko. Ani ima rengba kaa baka bangirani singia agu aboro du na bete pagbia beyo rogo ga Yekova riigbu namangapai nzunzu ringbisihe kuti ga Yekova arugapai watadu i namangaha ringbisihe kuti gayo. Gure nga gu berãpai gu kura aboro naraki ti agu aregbo i aakeka Ziazia Kekeapai ti ni arengbe kadu na ni. Oni berẽnga pa agu akpiapai i nifura tipaha rogo genewaraga 3. Gume gu kumba nakuo gu ndiko nga ga Rago Sabiti aima rengba ka baka bangiriko singia Moize aima sana Yekova nzunzu mbata fu i saringbanga gu kumba re sa kpio. Na bakurea Uria boro Eto nga guko diako amangi bäri na Davide aima rengba kada kuti gu digisopai nga Davide amangisunge na gako bangiriba ni bakindo tipa ka ne gu mbusa nga gu ko aima rẽ na ni wenengai. Gu rengo duho ziazia nga, ani arengbanga ka ya ani ima du na kido kuti Yekova ka si du nga ani akidongo kuti agu aboro narukuba ko auru kpotosende, nga aguyo ko naima du na kido kuti yo te.

8. Gini wiratise duho dagba gupai i nakepai tipaha rogo Amokedi 16:4, 5 na wai gu dungurati nga ga aKristano amangasunge areme?

⁸ Areme, Yekova nangbe kumbatayo fu gu gako papara riigbu du auru kpotosende vurube “kangara moyambu.” (Mt. 24:45) Wakina gu riigbu bipasunge naadu rogo bambata sa kama agarã, gi moyambu re nangerakurii ga Mbori aboro rogo zegino dunduko na kini fu arugapai fu abaakumba rogo dungurati. (Oni gedi Amokedi 16:4, 5.) Abaakumba napekafuo agu arugapai re rogo dungurati. Ani nayugo gupai nga ani na kido kuti ga Yekova gene mangaapai nimanga ani pai kuti agu arugapai ani agbiaha be ga Yekova riigbu na be abaakumba.

9. Gini regbo rengbehe kadu ni mbumbuhe furani ani mangipai kuti gu diaberã abaakumba namangihe, na tipagine?

⁹ Ti kura aregbo, si ima rengba kadu ni mbumbuhe furani ka songoda agu adiaberã abaakumba amangaha. Ni kpiapai, vuru agu agarã susi bambeda kusayo, badungu adungurati na adagbarago nga ga badona adungurati i namangi ambakadapai tipaha berewe. Ti kura aregbo, abaakumba nasana abatungusipai tipa i naandu ku rogo kura adungurati tipa ka hiiso gu badungu abasungo du rogo gaani aBambu Kindo. Ka i sana rani ani ga ku rogo vovo dungurati, si ima  rengba kadu ni mbumbuhe furani ka mbu abakurearani na gaani aborokporo. Ya mo abaakumba nagbia rugapai agbia be Mbori nga gu nape pa gu ba fuyo si aida i kedi batungusipai ku rogoho? Oó. Na gu rengo re ima rengba ka saha furani ni mbumbuhe ani pekefuo gu rugapai ani agbiaha. Ono Yekova ima du na kido kuti abaakumba tipa i mangi ngbatunga agu adiaberã re, na si naida ani du na kido kutiyo a. *

10. Ringbisihe kuti AEbere 13:17, tipagine si aida ani naagiasangba abaakumba ti ni?

¹⁰ Tipagine si aida ani naagiasangba abaakumba ti ni na kini songodi gayo adiaberã zavura ti gu regbo agu adiaberã re adunga ni agu adiaberã ani naaidaha ya? Bambiko ho ani amangaha ni wo, ani naundo na gu kodatise du dagba ga Mbori aboro. (Ef. 4:2, 3) Adungurati nazugo azugo ho aboro dunduko airisa agu adiaberã ni ni umbasitise abaakumba amangaha. (Oni gedi AEbere 13:17.) Gu nyakipaha gbe nga, ani nayugo gupai fu Yekova nga ani ima du na kido kuti ko ho ani agiasangba agu aboro ni du ko na kido kutiyo tipa i naangera fuo rani.​—Amo. 20:28.

11. Ginipai rengbe ka undo rani ani nyakasi gaani kido kuti agu arugapai ani agbiaha be abaakumba?

¹¹ Ani rengbe ka nyakasa gaani kido kuti agu arugapai ani agbiaha be abaakumba nitingida ani gupai nga i namanga kparakpee tipa ziazia toro ho i asakapai ni tipa agu apai nabipai dungurati. Berewe a, i nawisigo agu abangua arengo nga ga Ziazia Kekeapai nga gu du na nyanyakipaha wenengai na kini biki agu arugapai ga Yekova riigbu afuhe. Gupai du yo na nyemuhe kpotoyo yo nga ka fu ngbarago fu Yekova na ka ngerafuo gako aboro ni bakerehe gbe wa rengbe omeyo na ni. Gi ruru akumba re ima ino gupai nga, Mbori nabi wai abi i amanga agu asunge ko nafuhe fuyo. (1 Pet. 5:2, 3) Oni berẽnga pa gi rengo re: Rogo gu zegino du kparakaro rogoho mbiko rangi kpotose, apambori, na agu apai nga ga birĩ-zogarago, ga Yekova aboro nairiso bangisa ndikidi Mbori kina sa rogo zereda yo. Gipai re namanga wo mbiko gupai sa nga Yekova nasongoda gako riigbu!

12. Gini apai si aida abaakumba berẽkuriihe wenengai ho i adiaberã ni singia boro saberã ni?

¹² Yekova fu gu nyanyakipa sunge fu abaakumba nga ga banda dungurati si du ni gigirihe. Ho Kristano amanga kere ingapai ni, Yekova naida gupai be abaakumba nga i diberã singia gu boro re rengbe ka nye rogo dungurati. Pai sa dagba agu apai yo si aida i mangihe nga ka bihe singia gu boro re ima saberã ni nzunzu ti gupai ni amangihe. Ni ima rengba ka manga tini nga ni ima saberã ni, ono ya mo ni sogo gu ingapai nzunzu ni amangihe? Ya mo ni ima diaberã ka zanga manga gu ingapai re berewe? Ka si du nga gupai nga ga gbegberẽ kpamiatise du nasa ni ni mangi gu gbegberẽpai re, ya mo ni na nyemu ka mbu koda tini na gu gbegberẽ abakure re? Abaakumba namanga kparakpee fu Yekova ki wisigi agu arengo duho na gupai Baibiri apehe, na i nawisigo wai gu boro namangi ingapai re abi gupai ni amangihe. Fuo gure, i kini diberã singia gu boro namangi ingapai re rengbe ka nye rogo dungurati. Ti kura aregbo, si naida aida i kusi ni kusayo rogo dungurati.​—1 Kor. 5:11-13.

13. Gini bakabangirise rengbe ani kadu na ni ka si du nga i kusi bakurearani watadu gumerani kusayo rogo dungurati?

¹³ Waigu rengbe gaani kido kuti abaakumba kadu ni asadiasadihe? Ka si du nga gu boro i nakusi ni kusayo rogo dungurati nga mbembedi bakurearani watadu gumerani te, si ima rengba kadu furani taata ani dakuti ga abaakumba diaberã. Ono na ka si du nga gu boro i nakusi ni kusayo rogo dungurati nga mbembedi bakurearani. Ani ima rengba kaa baka bangirani nga abaakumba aawisigongo agu arengo dunduko  duho te, watadu ani rengbe kaa baka bangirani singia i asari gu ngbanga re nzunzu kina wai ka Yekova asarihe. Ginipai rengbe ka undo rani ani du na ruru bipai tipa gu diaberã re?

14. Ginipai rengbe ka undo rani ka abaakumba diberã nga si naida i kusi bakurearani watadu gumerani kusayo rogo dungurati?

¹⁴ Si naida ani tingidi gupai nga, gupai nga ga kusa boro kusayo rogo dungurati, ga Yekova mbakadapai du nga ha, na si naundo dungurati aundo, na si ima rengba ka undo gu boro mangi ingapai re. Ka i mbu gu boro ingapai asanga berãni ya ni nye rogo dungurati, ni ima rengba kadu na maapai kurii kura aboro, i ki mangi ingapai a. (Gara. 5:9) Kurigure, ni ima rengba ka zanga ino pa wai du gani ingapai ni kerehe, na ni ima rengba ka zanga bi ndu gupai si aida ni mangi ariapai ti ni rogo gani aberã na mangaapai tipa gupai nga Yekova idi na ni berewe. (Batu. 8:11) Ani rengbe kadu na gu kido nga ho abaakumba adiaberã ni singia i kusi boro kusayo rogo dungurati, i nabi gayo sunge na nyanyakipaha. I ima rugatiyo na gupai nga, wakina agu abasapungbanga naadu rogo gu ringara Yisaraere naadu mbata, i “asapa nga ngbanga tipa aboro te, ono tipa kina Yekova.”​—2 Peka 19:6, 7.

15. Tipagine si aida ani du na kido ti ni kuti ga Yekova arugapai awere kisusi gu niidu mbata?

¹⁵ Wa digido gi sino raka re ambeda, si naida ani du na kido kuti ga Yekova gene mangaapai kisusi gu niidu mbata. Tipagine? Ti regbo bakere gberãngbi, ani ima rengba ka gbia arugapai nga gu rengbe kaa ngera wa gupai du ni mbumbuhe ka giarogoyo watadu ni kpakarakpakaraha ka mangapai kutini. Anga Yekova nika fura afura furani nitiko te. Si nawira gupai nga, ko nika fu arugapai vurube agu aboro narukuba ko ko namoi yo. Anga gure nika ngia regbo tipa kadu na kapa kuti agu arugapai re te watadu ka baka bangirani nga, ‘Ya mo agi arugapai re naye nzunzu be Yekova, watadu ga agu awirina nangbe mbatayo berãpai du?’ a te. Ya mo mo adu na kido kuti Yekova na gako riigbu ti regbo gu nyanyakipa regbo re? Gupai mo aberãha tipa agu arugapai agu aboro Mbori namoi yo afuhe awere nika undo ro mo ini karagapai kuti gu sanahe re. Ka mo du na kido kuti agu arugapai ani agbiaha areme, na kidu regerege ka mangapai kutini, si nawira gupai gbe nga mo nika manga kina gu bangisapai re ti regbo bakere gberãngbi.​—Rk. 16:10.

16. Waigu rengbe gaani kido kuti ga Yekova asarangbanga kadu ni asadiasadihe barambeda kumbatayo?

¹⁶ Si naida aida a ani berẽ wenengai kuriipa wai ani nika mangapai kuti ga Yekova asapangbanga ti digido gi gbegberẽ zegino re. Awere, ani na gu maabangirise nga gu badungu aboro airisongo Yekova ya kodihe na agu agumerani angianga aDezire Yekova ya nika diaberã adia ka iriso ko mbata digido gi zegino re da. Ono ti regbo Aramegido, Yekova nika manga yangara diaberã vurube Yesu nibipa gayo raka kumbatayo.  (Mt. 25:31-33; 2 Tesa. 1:7-9) Anga ani du nika diaberã tipa agu aboro nika gbia ga Yekova inapai na aguyo nikaa gbianga ha ya te. (Mt. 25:34, 41, 46) Ya mo ani adu na rengba ka kido kuti ga Yekova asapangbanga, watadu si nika du ni mbia kota furani? Si tie ziazia nga, si naida ani nyakasi gaani kido kuti Yekova awere tipa gupai nga kadu na kido kuti ko na kpotoraniyo dũ kumbatayo.

17. Waigu ani nika gbia undo ti ga Yekova asapangbanga ti digido gi zegino re?

¹⁷ Oni berẽnga pa wai ani nika du rogo ga Mbori vovo zegino ho ani nika bi asangbana ga Yekova asapangbanga ni. Ziree pambori adunga berewe te, na gu sino bagaahe nga ga ngbaduse gbiati agu azogarago nambusa aboro na kini sa yo i rungo adunga berewe te. Ani agbianga tirani berewe na akaza, gbinza gbiati gupai nga ga kpio gaani aboro te. Satana gbiati adaimona adunga na rengba berewe ka manga aboro na pai te tipa agarã kutu. Gu gbegberẽ apai dunduko mangi mbiko gayo samungu adunga berewe te. (Yugo. 20:2, 3) Nairiwo wai ani nika du na bakere tambuahe ti gu regbo re nga ani akido kuti ga Yekova gene mangaapai!

18. Gini apai rengbe ani ka wirikaha ti ga aYisaraere kpiapai, a wa duhe ni kekehe rogo Pa Geda Aboro 11:4-6 na 21:5?

¹⁸ Ya mo raka rogo ga Mbori vovo zegino rengbe ka kusa kura akpakarapai nga gu rengbe ka asada gaani kido kuti ga Yekova gene mangaapai? Ni kpiapai, oni bingo gupai namangi ngbutuko tingbafuo i kusi aYisaraere kusayo Ezipeta yo tiibe sunge akanga. Agu akurayo atona kaa kpakanahe bambiko i aazingo tipa gu wene ariahe i anaarihe yo, na i aasoga gu ga Mbori gamunihe asoga nangia Manu. (Oni gedi Pa Geda Aboro 11:4-6; 21:5.) Ya mo ani rengbe kadu na ngbatunga agu aberãpai re tifuo bakere gberãngbi digi? Ani ainongo bakio sunge wai si nika ida ani mangihe tipa ka giriso kpotosende na ka saha yeeye tipa si da ni paradizo te. Si nawira gupai nga, si nika ida ani mangi bakere sunge, na raka ima rengba ka zanga du taata ti tonatonaha. Ya mo ani akpakanahe nibipa guhe Yekova nikaa fuhe furani ti gu regbo re? Pai sa nga rengo nga: Ka ani du na bakere tambuahe tipa ga Yekova agamunihe awere, ani nika du a na bakere tambuahe tipa guhe ko nikaa fuhe furani ti gu regbo re.

19. Waigu rengbe mo ka peka gu memeapai du rogo gi kekeapai re?

¹⁹ Ga Yekova gene mangaapai ti aregbo dunduko ni ruruhe. Si naida ani du na kido kuti gipai re. Si naida a ani du na kido kuti agu aboro du Yekova na kido kuti yo tipa i naafu gako arugapai fu aboro. Ka bangironi gonga ti agu afugo Yekova agumbaha vurube gu gako nebi nangia Yesaya ya, ko aya: “Rogo du zezeredi na du [na kido] si oni ka du ti ni na ome.”​—Yes. 30:15.