1. Sa anong mga paagi puwedeng mag-ako kita nin konseho, asin taano ta gabos kita nangangaipo nin konseho?

GABOS kita nangangaipo nin konseho sa pana-panahon. Kun minsan, tibaad kaipuhan tang makiulay sa saro na irinerespeto ta para maghagad nin sadol. Sa ibang pagkakataon man, tibaad may sarong tugang na magdulok sa sato asin patanidan kita na ‘mapapasala kita nin lakad,’ na puwedeng pagbasulan ta. (Gal. 6:1) Panghuri, puwedeng mag-ako kita nin konseho bilang pagtatanos pagkatapos na makagibo kita nin seryosong pagkakasala. Sa ano man iyan na paagi, dapat na magdangog kita sa konseho. Para iyan sa ikakarahay ta asin makakapagligtas iyan kan satong buhay!—Tal. 6:23.

2. Kauyon kan Talinhaga 12:15 asin nota sa ibaba, taano ta dapat kitang magdangog sa konseho?

² Dinadagka kita kan satong temang teksto na “magdangog . . . sa mga tataramon kan mga madunong na tawo.” (Tal. 22:17) Mayong tawo na nakakaaram kan gabos; igwa pirmi nin saro na mas may aram o mas may eksperyensiya kisa sa sato. (Basahon an Talinhaga 12:15 asin nota sa ibaba.) Kaya an pagdangog sa konseho tanda nin kapakumbabaan. Nagpapahiling iyan na aram ta an satong mga limitasyon asin na kaipuhan ta an tabang kan iba para maabot an satong mga pasuhan. Pinasabngan an madunong na si Hading Solomon na magsurat: “May nahahaman pag may dakul na parakonseho [o “parataong sadol,” nota sa ibaba].”—Tal. 15:22.

3. Sa anong mga paagi kita tibaad makaresibi nin konseho?

³ Tibaad makaresibi kita nin direkta asin bakong direktang konseho. Arin an inaapod tang bakong direktang konseho? Tibaad may mabasa kita sa Bibliya o sa satong publikasyon asin mapag-isip-isip ta an manungod sa ginigibo ta tapos napahiro kita kaiyan  na gumibo nin mga pagbabago. (Heb. 4:12) Puwede ta iyan apudon na bakong direktang konseho. Arin an inaapod tang direktang konseho? Tibaad sabihan kita nin sarong elder o iba pang kuwalipikadong brother manungod sa sarong bagay na kaipuhan tang pauswagon. Puwede ta iyan apudon na direktang konseho. Kun may saro na pinahiro kan saiyang pagkamuot na tawan kita nin konseho hali sa Bibliya, dapat tang ipahiling an satong pagpapahalaga paagi sa pagdangog sa sinasabi niya asin pag-aplikar kaiyan.

4. Uyon sa Eclesiastes 7:9, ano an dapat tang likayan pag tinawan kita nin konseho?

⁴ Totoo, puwedeng madipisilan kita na akuon an direktang konseho. Puwede pa nganing magkulog an satong buot. Taano? Maski ngani madali tang akuon na bako kitang perpekto, tibaad masakitan kitang akuon an konseho pag may nagsabi sato kan sala na nagibo ta. (Basahon an Eclesiastes 7:9.) Tibaad mangatanusan kita. Tibaad kuwestiyunon ta an motibo kan nagtatao nin konseho o magkulog an satong buot sa paagi niya nin pagkonseho sa sato. Tibaad hanapan ta pa ngani siya nin sala, asin isipon ta: ‘Si’say man siya para tawan ako nin konseho? Siya ngani nasasala man!’ Ultimo, kun dai ta gusto an itinaong konseho, tibaad baliwalaon ta iyan o sa iba kita maghagad nin konseho na mas magugustuhan ta.

5. Ano an pag-uulayan ta sa artikulong ini?

⁵ Sa artikulong ini, pag-uulayan ta an mga halimbawa sa Kasuratan kan mga dai nag-ako nin konseho asin kan mga nag-ako kaiyan. Pag-uulayan ta man kun ano an makakatabang sa sato para akuon an konseho asin makinabang diyan.

6. Anong leksiyon an manunudan ta ki Hading Rehoboam sa kun paano siya naghimati sa konseho?

⁶ Pag-isipan an halimbawa ni Rehoboam. Kan magin hadi siya kan Israel, nagdulok saiya an mga nasasakupan niya. Nakiulay sinda sa saiya na pagianon an ipinapagibo sainda kan ama niyang si Solomon. Marahay man ta nagdulok si Rehoboam sa kamagurangan kan Israel para maghapot kun ano an sasabihon niya sa mga tawo. Sinabi ninda sa hadi na kun papaonrahan niya an hinahagad kan mga tawo, padagos sindang maglilingkod sa saiya. (1 Ha. 12:3-7) Minalataw na dai naugma si Rehoboam sa suhestiyon ninda, kaya kinonsulta niya an mga hoben na lalaking kagurubay niya. Posibleng mga nasa 40 anyos sinda, kaya siguradong igwa na man sinda nin eksperyensiya sa buhay. (2 Cron. 12:13) Pero sa pagkakataon na idto, bakong magayon an sadol ninda ki Rehoboam. Sinabi ninda sa saiya na mas pagabatan pa an mga tawo. (1 Ha. 12:8-11) Magkalain an nakuang suhestiyon ni Rehoboam, kaya puwede kutang nagdulok siya ki Jehova sa pamibi para maghapot kun arin an dapat niyang sunudon. Kaso, pinili niya an sadol na mas gusto niya asin sinunod an mas hoben na mga lalaki. Kapaha-pahamak an nagin resulta kaiyan ki Rehoboam asin sa mga Israelita. Sa parte man niyato, bako sa gabos na pagkakataon magugustuhan ta an sadol na itinatao sa sato. Pero, kun base iyan sa Tataramon nin Diyos, dapat tang akuon iyan.

7. Ano an itinutukdo sa sato kan halimbawa ni Hading Uzias?

⁷ Dai inako ni Hading Uzias an konseho. Naglaog siya sa parte kan templo ni Jehova na mga saserdote sana an tinutugutan na maglaog, asin pinurbaran niyang magdulot nin insenso. Sinabi sa saiya kan mga saserdote ni Jehova: “Uzias, dai ka puwedeng magtutong nin insenso para ki Jehova! Mga saserdote sana an dapat na magtutong nin insenso.” Ano an nagin reaksiyon ni Uzias? Kun mapakumbaba niya kutanang inako an konseho asin naghali tulos sa templo, tibaad pinatawad siya ni Jehova. Alagad, “naanggot na marhay si Uzias.” Taano ta dai niya inako an konseho? Posibleng marhay na inisip niya na huling hadi siya, may deretso siyang gibuhon an ano man na gusto niya. Pero dai iyan  nagustuhan ni Jehova. Dahil sa kapangahasan ni Hading Uzias, nagkaigwa siya nin leproso asin “nagdanay na may leproso . . . sagkod sa aldaw na siya magadan.” (2 Cron. 26:16-21) Itinutukdo sa sato kan halimbawa ni Uzias na, siisay man kita, kun dai ta aakuon an basado sa Bibliyang konseho, maiwawara ta an pag-uyon ni Jehova.

8. Ano an nagin reaksiyon ni Job sa konseho?

⁸ Kabaliktaran kan tinukar pa sanang bakong marahay na mga halimbawa, nagtatao an Bibliya nin marahay na mga halimbawa kan mga nagkamit nin bendisyon huling inako ninda an konseho. Pag-isipan an halimbawa ni Job. Dawa ngani saro siyang tawong may takot sa Diyos, bako siyang perpekto. Kan nasa grabeng panggigipit, nagkaigwa siya nin salang mga kaisipan kaya nakapagtaram siya nin sala. Huli kaiyan, nag-ako siya nin direktang konseho, hali ki Elihu saka ki Jehova. Ano an nagin reaksiyon ni Job? Mapakumbaba niyang inako an konseho. Sinabi niya: “Dawa dai ko nasasabutan, nagtaram ako . . . kaya binabawi ko na an sinabi ko, asin matukaw ako sa alpog asin abo para ipahiling an pagsulsol ko.” Binendisyunan ni Jehova si Job sa saiyang kapakumbabaan.—Job 42:3-6, 12-17.

9. Anong marahay na halimbawa an ipinahiling ni Moises kun manungod sa pag-ako nin konseho?

⁹ Si Moises sarong marahay na halimbawa nin saro na nag-ako nin pagtatanos pagkatapos na makagibo nin seryosong pagkakasala. Sarong beses, naanggot siyang marhay saka dai niya tinawan nin onra si Jehova. Huli kaiyan, naiwara ni Moises an pribilehiyo na makalaog sa Dagang Panuga. (Bil. 20:1-13) Kan makiulay si Moises ki Jehova na pag-isipan giraray an saiyang desisyon, sinabi ni Jehova sa saiya: “Dai ka na makipag-ulay giraray sa sako manungod sa bagay na ini.” (Deu. 3:23-27) Dai nagkulog an buot ni Moises. Imbes, inako niya an desisyon ni Jehova, asin padagos siyang ginamit ni Jehova para panginutan an Israel. (Deu. 4:1) Si Job saka si Moises parehong marahay na halimbawa na puwede tang arugon kun manungod sa pag-ako nin konseho. Binago ni Job an kaisipan niya; dai siya nangatanusan. Pinatunayan man ni Moises na inako niya an konseho ni Jehova paagi sa pagdadanay na maimbod dawa kan naiwara niya an pinakamamahal niyang pribilehiyo.

10. (a) Ano an itinutukdo sato kan Talinhaga 4:10-13 kun manungod sa mga pakinabang nin pag-ako nin konseho? (b) Anong marahay na sabuot an ipinahiling kan nagkapira kun manungod sa konsehong itinao sa sainda?

¹⁰ Makikinabang kita kun aarugon ta an halimbawa kan maimbod na mga lalaki na arog ni Job asin Moises. (Basahon an Talinhaga 4:10-13.) Iyan mismo an ginibo kan dakul na tugang niyato. Mangnuhon an sinabi kan brother na si Emmanuel, na nakaistar sa Congo, manungod sa itinaong patanid saiya: “Nahiling kan maygurang na mga brother sa kongregasyon na namemeligro an espirituwalidad ko kaya tinabangan ninda ako. Sinunod ko an konseho ninda, asin talagang nakatabang iyan sa sako na malikayan an dakul na problema.” * Mapadapit sa konseho, sinabi kan sarong payunir na taga Canada na si Megan: “Bako iyan pirmi su gusto kong madangog, pero iyan su kaipuhan kong madangog.” Asin sinabi kan sarong brother sa Croatia na si Marko: “Natanggal ako sa pribilehiyo, pero kan binalikan ko an mga nangyari, napag-isip-isip ko na an konsehong itinao sa sako nakatabang sako na magkaigwa giraray nin makusog na espirituwalidad.”

11. Ano an sinabi ni Brother Karl Klein manungod sa pag-ako nin konseho?

¹¹ An saro pang halimbawa nin nakinabang sa pag-ako nin konseho iyo si Brother Karl Klein, na naglingkod bilang miyembro kan Namamahalang Grupo. Sa istorya nin buhay ni Brother Klein, sinambit niya an sarong pangyayari kan tinawan siya nin magabat na konseho ni Brother Joseph F. Rutherford, na nagin  dayupot niyang amigo. Inako ni Brother Klein na kan primero, nagkulog an buot niya sa konseho. Sinabi niya: “Kan mahiling giraray ako ni Brother Rutherford, maugma niya akong tinino, ‘Karl, kumusta?’ Pero dahil makulog pa an buot ko, nagsimbag lang ako na mayo sa buot. Kaya sabi niya sako, ‘Karl, ingat ka! ’Baad masiod ka kan Diyablo!’ Nasupog ako, sabi ko, ‘Ah, mayo man idto, Brother Rutherford.’ Pero narisa niya na makulog an buot ko saiya, kaya sinabi niya giraray sako, ‘Nasasabutan ko. Basta mag-ingat ka lang ta ’baad masiod ka kan Diyablo.’ Tama nanggad siya! Kun nagtatanom kita nin kulog nin buot sa sarong tugang dahil sa sinabi niya, lalo na kun nasa katungdan siya para sabihon iyan . . . , tinutugutan tang masiod kita kan Diyablo.” * (Efe. 4:25-27) Inako ni Brother Klein an konseho ni Brother Rutherford, asin padagos sindang nagin dayupot na mag-amigo.

12. Paano makakatabang sa sato an kapakumbabaan na akuon an konseho? (Salmo 141:5)

¹² Ano an makakatabang sa sato na akuon an konseho? Kaipuhan tang magin mapakumbaba na ginigirumdom na bako nanggad kitang perpekto asin na nagigin mangmang talaga kita kun minsan. Arog kan tinukar subago, may salang pagmansay si Job. Pero kan huri binago niya an saiyang kaisipan kaya binendisyunan siya ni Jehova. Taano? Huling mapakumbaba si Job. Ipinahiling niya iyan kan inako niya an konseho sa saiya ni Elihu, dawa ngani hoben na marhay ini saiya. (Job 32:6, 7) An kapakumbabaan makakatabang man sa sato na sunudon an konseho dawa kun sa pagmati ta dai ta man iyan kaipuhan o kun an nagtatao nin konseho mas hoben kisa sa sato. Sinabi kan sarong elder na taga Canada, “Huling dai ta nahihiling an satong sadiri arog kan paghiling sa sato kan iba, paano kita mauswag kun mayo nin mataong konseho sa sato?” Iyo, kaipuhan ta gabos na umuswag sa pagpahiling kan bunga kan espiritu asin sa pag-utob kan Kristiyanong ministeryo.—Basahon an Salmo 141:5.

13. Paano ta dapat mansayon an konsehong itinatao sa sato?

¹³Mansayon an konseho bilang kapahayagan nin pagkamuot nin Diyos. Gusto ni Jehova an pinakamarahay para sa sato. (Tal. 4:20-22) Pag tinatawan niya kita nin konseho paagi sa saiyang Tataramon, sa sarong basado sa Bibliyang publikasyon, o sa sarong maygurang na kapagtubod, pagpahiling iyan kan saiyang pagkamuot sa sato. “Ginigibo niya iyan para sa satong kapakinabangan,” an sabi kan Hebreo 12:9, 10.

14. Sa ano kita dapat magpokus pag tinatawan kita nin konseho?

¹⁴Magpokus sa sinasabi, bako sa paagi nin pagsabi. Kun minsan, puwedeng mamati ta na bakong marahay an paagi nin pagtao sa sato nin konseho. Siyempre, dapat na hinguwahon na marhay kan siisay man na nagtatao nin konseho  na sagkod sa mapupuwede pasil iyan akuon. * (Gal. 6:1) Pero kun kita an tinatawan nin konseho, marahay na magpokus kita sa mensahe kaiyan—dawa pa sa pagmati ta mas magayon kun itinao iyan sa mas marahay na paagi. Puwede tang haputon an satong sadiri: ‘Dawa dai ko gusto an paagi nin pagtao niya sako nin konseho, may manunudan daw ako sa sinabi niya? Puwede ko daw palampason an pagkabakong perpekto kan nagtao nin konseho asin makanuod sa saiyang konseho?’ Magigin madunong nanggad kita kun mahanap kita nin paagi para makanuod sa konsehong itinatao sa sato.—Tal. 15:31.

15. Taano ta dapat kitang maghagad nin konseho?

¹⁵ Dinadagka kita kan Bibliya na maghagad nin konseho. An Talinhaga 13:10 nagsasabi: “May kadunungan sa mga naghahagad nin sadol.” Totoo nanggad iyan! An mga naghahagad nin konseho asin dai sana naghahalat na tawan kaiyan, sa parati mas nag-uuswag sa espirituwal kisa duman sa mga dai naghahagad nin sadol. Kaya ika na an mag-inot na maghagad nin konseho.

16. Sa anong mga sitwasyon puwede kitang maghagad nin konseho?

¹⁶ Nuarin kita puwedeng maghagad nin konseho sa satong mga kapagtubod? Pag-isipan an nagkapirang sitwasyon. (1) Sarong sister an nakiulay sa sarong eksperyensiyadong parahayag na ibanan siya sa pag-Bible study asin pagkatapos naghagad siya nin sadol kun paano niya pa mapapauswag an saiyang paagi nin pagtutukdo. (2) Sarong daing agom na sister an gustong magbakal nin bado, kaya hinapot niya an sarong maygurang na sister kun ano an masasabi kaini sa napili niyang bado. (3) Sarong brother an naasignaran na magtao kan saiyang primerong pampublikong pahayag. Nakiulay siya sa sarong eksperyensiyadong ispiker na subaybayan siya sa saiyang pahayag dangan tawan siya nin konseho kun ano an puwede niyang pauswagon. Makakatabang dawa sa sarong brother na haloy nang nagpapahayag na maghagad nin konseho sa eksperyensiyadong mga ispiker asin sunudon iyan.

17. Paano kita makikinabang sa konseho?

¹⁷ Sa masurunod na semana o bulan, gabos kita makakaresibi nin konseho—iyan man direktang konseho o bakong direktang konseho. Pag mangyari iyan, girumdumon an mga punto na napag-ulayan ta. Magdanay na mapakumbaba. Magpokus sa mensahe, bako sa paagi nin pagtao kan mensahe. Asin sunudon an itinaong konseho. Mayo sato nin namundag na madunong. Pero kun ‘magdadangog kita sa konseho asin aakuon an disiplina,’ nangangako an Tataramon nin Diyos na kita ‘magigin madunong.’—Tal. 19:20.