1. Porque kita ta ricibi consejo y porque kita todo necesita con ese?

TODO kita necesita consejo. Tiene vez, posible que kita mismo el pidi consejo con el un persona con quien kita ta respeta. Na otro maga tiempo, posible atraca kanaton el un hermano y habla que cerca ya kita hace un cosa que “malo”—un cosa que hay arripinti kita. (Gal. 6:1) O posible kita ricibi consejo por medio na un coreccion despues kita hace un serioso kamali. Maskin cosa pa el razon si porque ya dale kanaton consejo, debe kita oi con ese. Bueno este para kanaton y puede este salva con el diaton vida!—Prov. 6:23.

2. Harmonia na Proverbio 12:15 y footnote, porque kita debe oi con el consejo que ta dale kanaton?

² El texto onde yan base el diaton tema ta anima kanaton que “oi con el maga palabra del maga sabio.” (Prov. 22:17) Nuay gente quien sabe el todo; tiene gayot persona quien mas manada saber o experiencia que kanaton. (Le con el Proverbio 12:15 y footnote.) Poreso si ta oi kita consejo, ta dale se mira que humilde kita. Indicacion este que sabe kita con el diaton maga limitacion y que necesita kita con el ayuda del otro para alcanza con el diaton maga goal. Ya guia si Jehova con el un sabio rey que si Solomon para escribi: “Tiene buen exito si manada el quien ta dale consejo.”—Prov. 15:22.

3. Na cosa maga manera kita posible ricibi consejo?

³ Posible kita ricibi gendeh directa o directa consejo. Cosa quierre decir del gendeh directa consejo? Posible, tiene kita cosa ya le na Biblia o na uno del diaton publicacion que ta manda kanaton pensa acerca na maga cosas que ta hace kita y manda move kanaton para hace cambio. (Heb. 4:12) Puede kita llama con ese un gendeh directa consejo. Cosa quierre decir del  directa consejo? Un anciano o otro cualificao hermano el posible habla kanaton que tiene kita cosa necesita hace. Puede kita llama con ese un directa consejo. Si el amor del un persona ya manda move con ele para dale kanaton un consejo que estaba na Biblia, debe kita dale mira con el diaton apresacion por medio que oi con el cosa ele habla y pricura aplica con el consejo.

4. Asegun na Eclesiastes 7:9, cosa kita gendeh debe hace si ta ricibi consejo?

⁴ El deverasan, posible man dificil kita acepta un directa consejo. Baka rabia pa gane kita. Porque? Maskin pa ta admiti kita que maga imperfecto kita, posible siempre kita man dificil acepta consejo si tiene quien habla kanaton acerca na un kamali que ya hace kita. (Le con el Eclesiastes 7:9.) Baka man razon kita. Posible, cuestiona kita con el motivo del quien ya conseja kanaton o rabia si paquemodo le ya dale con el consejo. O baka busca pa gane kita mali con ese persona y pensa: ‘Cosa de suyu derecho para conseja conmigo? Ele gale tan kamali!’ Y el ultimo, si no quierre kita con el consejo que ya dale kanaton, posible kita ignora con ese o pidi con otro que dale kanaton consejo que mas favorable kanaton.

5. Cosa kita considera na este articulo?

⁵ Na este articulo, hay discuti kita maga ejemplo na Biblia de aquellos quien nuay acepta consejo y aquellos quien ya acepta con ese. Hay considera tambien kita si cosa puede ayuda kanaton para acepta consejo y beneficia con ese.

6. Cosa kita puede aprende na reaccion de Rey Rehoboam na consejo que ya ricibi le?

⁶ Considera con el ejemplo de Rehoboam. Cuando ya queda le rey de Israel, tiene con ele cosa ya pidi el maga gente. Ya habla sila con ele que menora con el pesades que ya dale kanila el de suyu tata, si Solomon. Bueno el cosa ya hace si Rehoboam cuando ya consulta le con el maga anciano de Israel si cosa le contesta con el maga gente. El maga anciano ya habla con el rey que si hace le con el cosa ya pidi el maga gente, pirmi sila suporta con ele. (1 Rey 12:3-7) Ta sale que gendeh alegre si Rehoboam con ese consejo poreso ya consulta le con el maga hombre quien ya engranda junto con ele. Aquel maga hombre posible maga 40 ya el edad poreso tiene ya sila cuanto experiencia na vida. (2 Cron. 12:13) Pero na este ocasion, gendeh bueno el consejo que ya dale sila con Rehoboam. Ya habla sila con ele que omenta con el pesades que dale con el maga gente. (1 Rey 12:8-11) Ciendo ya ricibi le dos diferente consejo, puede era atraca si Rehoboam con Jehova na rezo y pregunta con Ele si cosa consejo le debe sigui. En vez, ya decidi le que sigui con el consejo que mas quierre le y ya oi con el maga mas joven hombre. Ya tiene gayot se maga mal resulta con Rehoboam y con el maga gente de Israel. Posible, el consejo que ricibi kita gendeh el consejo que quierre kita oi. Maskin pa ansina, si base ese na Palabra del Dios, debe kita acepta con ese.

7. Cosa kanaton ta enseña el ejemplo de Rey Ozias?

⁷ Si Rey Ozias nuay acepta consejo. Ya entra le na un lugar na templo de Jehova que el maga sacerdote lang el puede entra y ya atribi le ofrece incenso. El maga sacerdote de Jehova ya habla con ele: “Ozias, gendeh tu debe quema incenso para con Jehova! El maga sacerdote lang el debe quema incenso.” Cosa ya hace si Ozias? Si humilde le ya acepta con el consejo y ya sale dayun na templo, posible perdona con ele si Jehova. En vez, “si Ozias . . . ya rabia.” Porque le nuay acepta con el consejo? Posible cay rey le, ya sinti le que tiene le  derecho para hace si cosa le quierre. Pero, nuay man uyun si Jehova. Cay ya hace le un cosa que nuay le derecho para hace, ya tiene lepra si Ozias y “ya esta un leproso hasta na dia del de suyu muerte.” (2 Cron. 26:16-21) El ejemplo de Ozias ta enseña kanaton que maskin quien pa kita pero si gendeh kita acepta con el consejo estaba na Biblia, hay perde kanaton el favor de Jehova.

8. Cosa el reaccion de Job na consejo?

⁸ Gendeh igual con el maga ejemplo que nuevo lang kita ya discuti, el Biblia ta dale maga buen ejemplo de aquellos quien ya ricibi bendicion cay ya acepta sila consejo. Considera con Job. Ta ama le con Dios y quierre hace alegre con Ele pero gendeh le perfecto. Cuando ya experiencia le grabe probanza, tiene le cosa ya habla que gendeh justo. Poreso, ya ricibi le un directa consejo estaba con Elihu y con Jehova. Cosa el reaccion de Job? Humilde le ya acepta con el consejo. Ele ya habla: “Ya converza yo que nuay entendimiento . . . Ta arripinti yo na cosa yo ya habla, y ta arripinti yo na polvos y ceniza.” Ya bendici si Jehova con Job cay humilde le.—Job 42:3-6, 12-17.

9. Cosa el reaccion de Moises cuando ya ricibi le consejo y porque le un buen ejemplo para kanaton?

⁹ Un buen ejemplo si Moises de un persona quien ya acepta coreccion despues le comete un serioso kamali. Na un ocasion, ya rabia le y nuay honra con Jehova. Por causa con ese, nuay permiti con Moises que entra na Tierra Prometido. (Num. 20:1-13) Cuando ya pidi si Moises con Jehova que considera otravez con el De Suyu decision, ya habla con ele si Jehova: “No mas ya man cuento conmigo acerca con ese.” (Deut. 3:23-27) Nuay rabia si Moises. Sino, ya acepta le con el decision de Jehova y ya continua con ele usa si Jehova para guia con el Israel. (Deut. 4:1) Si Job y Moises ya acepta consejo y buen ejemplo sila para kanaton para imita. Ya cambia si Job con el de suyu mirada y nuay le man razon. Ya dale mira si Moises que ya acepta le con el consejo de Jehova cuando ya esta le fiel maskin pa ya perde el un privilegio que precioso con ele.

10. (a) Cosa ta enseña el Proverbio 4:10-13 acerca el maga beneficio que ricibi kita si acepta kita consejo? (b) Cosa el buen custumbre que ya dale mira el cuanto cuando ya ricibi sila consejo?

¹⁰ Ta beneficia kita si ta imita kita con el ejemplo que ya dale mira el maga fiel gente igual con Job y Moises. (Le con el Proverbio 4:10-13.) Manada del diaton maga hermano y hermana el ya hace con ese. Nota si cosa ya habla el un hermano que si Emmanuel, quien ta queda na Congo, acerca na consejo que ya ricibi le: “El maga mature hermano na diamon congregacion ya puede mira que cerca ya yo hace malo con el de mio relacion con Jehova y ya pricura sila ayuda conmigo. Ya aplica yo con el diila consejo y ya ayuda este conmigo para evita manada problema.” * El un pioneer na Canada que si Megan ya habla acerca na consejo: “Gendeh este pirmi el cosa yo quierre oi pero este el cosa yo necesita oi.” Y el un hermano que estaba na Croatia que si Marko ya habla: “Ya perde el de mio privilegio. Pero si ta acorda yo con el de mio pasada, ya realiza yo que ya puede ayuda conmigo el consejo que ya ricibi yo para hace otravez fuerte el de mio relacion con Jehova.”

11. Cosa ya habla si Hermano Klein acerca si porque importante acepta consejo?

¹¹ El otro pa quien ya beneficia cay ya acepta le consejo amo si Hermano Karl Klein, quien ya sirvi como un miembro del Cuerpo Gobernante. Na de suyu istoria de vida, ya relata si Hermano Klein el tiempo cuando ya ricibi le  pesao consejo estaba con Joseph F. Rutherford que un cerca amigo de suyu. Ya admiti si Hermano Klein que del primero ya sinti le duele na consejo. Ya habla le: “Cuando yan mirajan kame otravez [de Hermano Rutherford], alegre le ya habla, ‘Hello Karl!’ Pero cay tan sentimiento pa yo, pagumot yo con ele yan greet. Ele ya contesta, ‘Karl, con cuidao. Hay cae tu na trampa del Diablo!’ Yan huya yo y ya habla, ‘Ah nuay lang quel, Hermano Rutherford.’ Pero, sabe le que tan sentimiento pa yo poreso ya repiti le con el de suyu consejo, ‘Bueno si ansina. Pero con cuidao, hay cae tu na trampa del Diablo.’ Justo le! Si ta siembra kita agrabio na un hermano, especialmente cay ya habla le un cosa que tiene le derecho para habla . . . , ta pone kita na peligro el diaton vida na maga tactica del Diablo.” * (Ef. 4:25-27) Ya acepta si Hermano Klein con el consejo de Hermano Rutherford y ya esta sila como cerca man amigo.

12. Paquemodo el humildad puede ayuda kanaton para acepta consejo? (Salmo 141:5)

¹² Cosa puede ayuda kanaton para acepta consejo? Necesita kita queda humilde y acorda que bien imperfecto kita y tan kamali tiene vez. Como ya discuti enante, gendeh justo el cosa ya pensa si Job. Pero, yan adjust le con ese y ya bendici con ele si Jehova. Porque? Cay humilde si Job. Ya dale le prueba que humilde le cuando ya acepta le con el consejo que ya dale con ele si Elihu, maskin mas joven este con ele. (Job 32:6, 7) El humildad puede tambien ayuda kanaton para aplica con el consejo maskin pa ta sinti kita que gendeh kita se necesita o si mas joven kanaton el quien ya dale con ese. El un anciano na Canada ya habla, “Ciendo gendeh kita ta puede mira con el diaton mismo cuerpo igual si paquemodo el otro ta mira kanaton, paquemodo kita progresa si nuay kanaton quien dale consejo?” Quien ba kanaton el gendeh necesita cultiva con el fruta del espiritu y queda mas bueno predicador y maestro del buen noticia?—Le con el Salmo 141:5.

13. Cosa debe el diaton mirada na maga consejo que ta ricibi kita?

¹³Mira con el consejo como un expresion del amor del Dios. Quierre si Jehova si cosa el de con todo bueno para kanaton. (Prov. 4:20-22) Si ta conseja le kanaton por medio na de suyu Palabra, un publicacion que base na Biblia o un experienciao hermano o hermana, ta dale le mira el de suyu amor para kanaton. El Maga Hebreo 12:9, 10 ta habla: “El Dios ta diciplina canaton para el aprovecho diaton.”

14. Na cosa kita debe man focus si ta conseja kanaton?

¹⁴Man focus na consejo, gendeh si paquemodo  con ese ya dale. Tiene vez, posible ta sinti kita que nuay dale kanaton el consejo na buen manera. Siempre si ta dale consejo, ta pricura kita hace con ese na manera que facil para acepta. * (Gal. 6:1) Pero si kanaton ya conseja, mas bueno si man focus kita na mensaje—maskin pa ta sinti kita que puede era dale con ese na mas buen manera. Puede kita pregunta con el diaton mismo cuerpo: ‘Maskin no quierre yo el manera si paquemodo ya dale con el consejo, tiene ba verdad na cosa ya habla conmigo? Puede ba yo ignora ya lang con el kamali del persona y beneficia na consejo?’ Sabio kita si pricura kita busca manera para beneficia na maskin cosa consejo que ta dale kanaton.—Prov. 15:31.

15. Porque kita debe pidi consejo?

¹⁵ El Biblia ta anima kanaton que pidi consejo. El Proverbio 13:10 ta habla: “Sabio aquellos quien ta pidi consejo.” Deverasan gayot se! Mas mucho, aquellos quien ta pidi consejo y gendeh ta espera que conseja kanila mas ta puede hace maga buen decision contra con aquellos quien gendeh ta pidi consejo. Poreso, tene iniciativo para pidi consejo.

16. Na cosa maga situacion kita posible pidi consejo?

¹⁶ Cuando kita puede pidi consejo na maga hermano y hermana? Considera con el cuanto situacion. (1) El un hermana ya pidi con el un experienciao publisher que man uban con ele na Bible study y despues, ya pidi consejo si paquemodo le queda mas bueno na enseñada. (2) Quierre el un single hermana cumpra pantalon poreso ya pidi le el opinion del un mature hermana. (3) Yan assign con el un hermano para dale un publico discurso por primer vez. Ya pidi le con el un experienciao hermano que oi enbuenamente con el de suyu talk y dale con ele consejo si paquemodo mejora con ese. Maskin por manada año ya el un hermano ta dale talk, mas bueno si pidi le comento o consejo na maga experienciao hermano y despues, aplica con ese.

17. Paquemodo kita puede beneficia na maga consejo?

¹⁷ Na maga semana o mes que hay llega, todo kita hay ricibi maga consejo—directa man o gendeh. Si sucede se, acorda con el maga leccion que ya discuti kita. Esta humilde. Man focus na consejo y gendeh si paquemodo con ese ya dale. Y aplica con el consejo que ya ricibi tu. Nuay kanaton quien ya nace que sabio ya daan. Pero si “oi [kita] con el consejo y acepta disciplina,” el Palabra del Dios ta promete que hay “queda [kita] sabio.”—Prov. 19:20.