1. On ten taawan sa poti wi a pasi? Saide ala wi abi a sani ya fanowdu ten na ten?

 ALA wi e abi taawan fanowdu fu e poti wi a pasi. Son leisi a useefi e go akisi wan baala efuso sisa di wi e lesipeki, fa u mu du son sani. A kan tu taki a den si wan sani a wi, neen den kon taki anga u fu wi á du sani di o meke wi anga Yehofa poli (Gal. 6:1). Ma son leisi a baka te u du wan sani di Yehofa á lobi, da taawan e poti wi a pasi. A omen wini yu o fende te yu e wooko anga san taawan e taigi i. Kande na a teke di yu o teke a taki fi i baala efuso sisa o yeepi i fu tan a libi.​—Odo 6:23.

2. Enke fa Odo 12:15 e soi, da saide u mu e aliki te taawan e poti wi a pasi?

² A tekisi di e holibaka gi a artikel ya, e gi u taanga-sikin fu ‘aliki san den koniman e taki’ (Odo 22:17). Sama á de a goontapu ya di sabi ala sani. (Leisi Odo 12:15.) Te wi e aliki te taawan e poti wi a pasi, wi e soi taki wi abi sakafasi. Wi e soi tu taki wi e holi a pakisei taki wi á poi du ala sani, wi abi taawan fanowdu fu e yeepi u. Santa yeye be meke Kownu Salomo sikiifi taki: ‘Te sama nai taki kiin anga denseefi, ala sani e buuya, ma te omen sama e taki fu seeka wan toli, sani e waka bun.​—Odo 15:22.

3. Fa Yehofa e poti wi a pasi?

³ Son leisi kande a wan owluman, efuso wan taa baala di abi ondoofeni e kon taki anga i fu di ai booko en ede anga i. Efu wan sama teke en ten soi yu aini Beibel fa i sa du son sani moo bun, a be o bun fu aliki en, da i meke moiti wooko anga san a taigi i. Ma a ná ala yuu a wan baala efuso sisa o kon taki anga u. Son leisi a wan sani yu o leisi aini Beibel efuso wan fu den taa buku fu a olikanisâsi di o yeepi i fu si fa i sa du sani moo bun.​—Heb. 4:12.

4. Enke fa Peleikiman 7:9 e soi, da san wi á mu du te taawan e poti wi a pasi?

 ⁴ A ná ala yuu a makiliki fu aliki te wan sama soi u wan sani di u nai du bun. Kande yu ati o boon na a sama te a kon taki anga i. Winsi fa u sabi taki wi e meke fowtu fu di wi abi sondu, toku u nai fii bun te taawan soi u wan sani di u nai du bun. (Leisi Peleikiman 7:9.) Kande yu o suku fu soi taki yu á fowtu, efuso kande yu e bigin suku fowtu na a sama di kon taki anga i. Kande yu e bigin denki taki: ‘San a sama e denki seefi? A omen fowtu enseefi e meke, da a wani kon taigi mi fa mi mu du sani?’ Efu wi e denki so, u ná o wooko anga a sani di a sama taigi u. Kande wi o go taki a taki anga taa sama di u si enke o taigi u san u wani yee.

5. San wi o luku aini a artikel ya?

⁵ Aini a artikel ya, wi o luku wantu toli aini Beibel fu sama di á be e teke taki. Baka dati wi o taki fu wantu sama di be soi taki den abi sakafasi, anga sowtu wini wi o fende te wi e wooko anga san taawan e taigi u.

6. San a toli fu Kownu Rehabeyam e leli u?

⁶ Luku a toli fu Rehabeyam. Di a toon kownu fu Islayeli, a foluku kon akisi en efu a be sa lekiti a wooko di en dda Salomo be e meke den du. Di den taki anga Rehabeyam, a go suku yeepi a den moo gaanwan fu Islayeli. Den taigi en taki efu a du san a foluku akisi en, den be o lobi en, den be o holibaka gi en tu (1 Kow. 12:3-7). Ma a gei enke Rehabeyam á be lobi a sani di den gaanwan be taigi en, neen meke a go akisi den supee fi en san a be mu du. Den man ya a ná be pikinnengee moo, bika son wan fu den be pasa 40 yali kaba (2 Kolon. 12:13). Ma a sani di den taigi Rehabeyam fu du a be wan don sani. Den taigi en taki a be mu meke a foluku wooko moo taanga (1 Kow. 12:8-11). Baka di Rehabeyam yee na ala den tu se, a be sa akisi Yehofa san a be mu du, ma a á du a sani de. A wooko anga san den supee fi en taki, bika a dati be kai anga en. A omen takuu bakapisi a sani ya tyai gi Rehabeyam anga a hii foluku. Aini a ten ya, kande te taawan e poti wi a pasi, u ná o lobi a sani di den taigi u. Ma efu a sani di den soi wi e kai anga san sikiifi aini Beibel, da u mu aliki den.

7. San a toli fu Kownu Usiya e leli u?

⁷ Kownu Usiya á be wani teke taki. A kownu ya go aini a santa peesi fu a tempel fu Yehofa fu boon ofaandi gi en, winsi fa a be sabi taki a den pilisite wawan be mu du a sani ya. Den pilisite bali en te den weli. Den taigi en taki: ‘Usiya, a ná yu abi a wooko fu boon sumee switi ofaandi gi Yehofa. A den pilisite di Gadu santa wawan abi a gaandi de.’ San Usiya du di den pilisite taki anga en? Efu a be aliki den pilisite, kande Yehofa be o gi en paadon. Ma a á du a sani de. Beibel taki Usiya ati boon a den pilisite. Saide a á be wani aliki den? Kande a be e fii enke fu di en a be kownu, da a be abi a leti fu du san a wani. Ma a ná so Yehofa e wooko. Fu di Usiya á teke taki, meke kokobe kisi en. Anga a siki ya a de fu te enke a dede (2 Kolon. 26:16-21). A toli fu Usiya e leli u taki winsi sama a wi, efu u nai teke taki, wi anga Yehofa o poli.

8. San Yopu du di Yehofa anga Elihu soi en taki a á be denki bun?

⁸ Aini den paragraaf di pasa, u taki fu wantu sama di á be e aliki te taawan be e  poti den a pasi. Ma a omen toli de aini Beibel fu sama di be e teke taki. Luku a toli fu Yopu. Winsi fa a man ya be e lesipeki Gadu, toku a be e meke fowtu. Wan pisiten, sani be miti Yopu di be meke a taanga gi en fu denki enke fa Yehofa e denki. Di Yopu taki sani di a á be mu taki, Elihu anga Yehofa poti en a pasi. San Yopu du di den poti en a pasi? A taki: ‘Mi taki sani sondee fu mi denki, neen meke mi e begi i gaantangi, feegete san mi be taki baa. Luku fa mi sidon a doti aini asisi fu soi i taki a sani di mi du e hati mi.’ A di Yopu be abi sakafasi meke a be poi kengi a fasi fa a be e denki. Na a sani ya meke Yehofa belesi en.​—Yopu 42:3-6, 12-17.

9. San Mosesi du di Yehofa puu kaasi gi en? Fa u sa waka neen baka?

⁹ U sa waka a Mosesi baka tu te u luku fa a tyai enseefi di Yehofa puu kaasi gi en. Wan leisi, Mosesi ati be boon a den Islayelisama te neen a teke wan gaandi di a be mu gi Yehofa. A sani di a du ya meke Yehofa ati boon neen, neen meke a taigi en taki a ná o go aini a Paamisi Kondee (Num. 20:1-13). Di Mosesi e begi Yehofa naamo fu a meke a go aini a Paamisi Kondee, Yehofa taigi en taki: ‘Noiti moo i mu kon a mi anga a taki ya’ (Deit. 3:23-27). Mosesi ati á boon a Yehofa. Fu di a saka enseefi, meke Yehofa be poi koboloiki en ete fu tii a foluku fi en te enke a dede (Deit. 4:1). Ala u sa meke moiti fu waka a Yopu anga Mosesi baka te taawan e poti wi a pasi. Yopu á be e suku fu soi taki a abi leti, ma a kengi a fasi a fa a be e denki wantenwanten. Mosesi tan dini Yehofa anga en hii ati winsi fa a be lasi wan gaandi di a be lobi.

10. (a) Enke fa Odo 4:10-13 e soi, da sowtu wini wi e fende te wi e aliki te taawan e poti wi a pasi? (b) Fa wantu baala anga sisa soi taki den abi sakafasi di taawan poti den a pasi?

¹⁰ A omen wini wi e fende te wi e meke moiti fu du sani enke Yopu, Mosesi anga taa sama di be soi taki den abi sakafasi. (Leisi Odo 4:10-13.) Aini a ten ya, a omen baala anga sisa e meke moiti fu waka a den sama ya baka. Wan baala den e kai Emmanuel di e tan a Kongo taki: ‘Wantu baala aini a kemeente be si taki a fasi fa mi be e tyai miseefi be o meke mi anga Yehofa poli, neen meke den kon taki anga mi. Di mi meke moiti wooko anga san den taki, a omen wini mi fende. A sani ya yeepi mi fu wai pasi gi omen ogii di be sa miti mi tu.’ * Wan pionili sisa den e kai Megan di e tan a Kanada taki: ‘Te taawan be e poti mi a pasi, a ná san mi be wani yee den be e taigi mi, ma a san mi be abi fanowdu.’ Wan baala den e kai Marko di e tan a Krowasiya taki: ‘Mi be lasi wan gaandi di mi be abi aini a kemeente. A sani ya be hati mi, ma bakaten mi si taki na a poti di den baala poti mi a pasi yeepi mi fu meke en bun anga Yehofa baka.’

11. San Baala Karl Klein taki fu a poti di taawan e poti wi a pasi son yuu?

¹¹ Wan taa sama di be soi taki yu e fende wini tuutuu te yu e wooko anga san taawan taigi i, a Baala Karl Klein. En a be wan fu den baala di be e tii a wooko a hii goontapu. Aini a ondoofenitoli fu a baala ya, a taki wan leisi Baala Joseph Rutherford, be soi en taki a nai tyai enseefi bun. Den tu baala ya a be bun mati. Baala Klein taki biginbigin a á be lobi a fasi fa Baala Rutherford taki anga en. A taki: ‘A taa dei di Baala Rutherford si mi, a poolo  kon taki anga mi, ma fu di mi ati be boon neen ete, meke a te aini bee mi piki a odi fi en. Neen meke a taigi mi taki: “Karl i mu luku bun anga iseefi, Saatan e suku wan fasi fu kisi i.” Sen be kisi mi, neen meke mi taigi en taki: “Mi ati á boon a yu oo.” Ma a be sabi taki mi be mandii ete, neen meke a taigi mi ete wan leisi taki: “Da a bun, ma luku bun anga iseefi, Saatan e suku wan fasi fu kisi i.” A be abi leti bika mi be holi en na ati tuu. Te yu e holi i baala na ati fu di a wani yeepi i, a leti enke yu e kai Saatan fu a kon poli yu anga Yehofa’ (Efe. 4:25-27). Bakaten Baala Klein kisi enseefi neen en anga Baala Rutherford meke en bun baka, a wooko anga san a be taigi en tu.

12. Fa sakafasi o yeepi u fu wooko anga san taawan e taigi u? (Psalm 141:5)

¹² Wan fu den sani di o yeepi u fu wooko anga san taawan e taigi u, a te wi abi sakafasi. Te wi e holi a pakisei taki wi a sondu libisama di e meke fowtu, a o moo makiliki gi u fu wooko anga san taawan e taigi u. Enke fa u be si aini den paragraaf a fesi, da Yopu á be e denki bun wan pisiten, ma bakaten a kengi a fasi fa a be e denki, neen Yehofa belesi en. A di a be abi sakafasi meke a be poi du a sani ya. Sakafasi be yeepi Yopu tu fu aliki Elihu, winsi fa Elihu be yonkuu bunbun fasi moo en (Yopu 32:6, 7). Te wi abi sakafasi, wi o wooko anga san taawan e taigi u, winsi wi e fii enke u ná abi en fanowdu. U ná o luku taki den yonkuu moo u tu. Wan owluman aini Kanada taki: ‘U nai si useefi enke fa taawan e si u, neen meke efu den nai poti wi a pasi, da fa wi o du man go a fesi?’ Winsi on langa wi e dini Yehofa kaba, toku na ala yuu wi abi fu e meke moiti fu kon abi den manii di wan Kelesten mu abi.​—Leisi Psalm 141:5.

13. Fa u mu e si a poti di taawan e poti wi a pasi?

¹³ A poti di taawan e poti wi a pasi, a wan fasi fa Yehofa e soi taki a lobi u. Yehofa wani sani waka bun anga u (Odo 4:20-22). A di a lobi u meke ai koboloiki Beibel, felon, baala anga sisa, efuso taa sani fu poti wi a pasi. Hebrewsama 12:9, 10 e soi taki a di Yehofa wani sani go bun anga u meke ai poti wi a pasi.

14. San u mu holi a pakisei te taawan e poti wi a pasi?

¹⁴ Poti pakisei na a sani di a sama taigi i, ná luku na a fasi fa a taki en. Son yuu kande ai taanga gi i fu wooko anga san wan sama taigi i fu di yu e fii taki a á taki bun anga i. A tuu taki te wan sama o poti  wan taawan a pasi, a mu taki switi anga en * (Gal. 6:1). Ma efu wan sama o poti yu a pasi, da gaantangi, ná poti pakisei na a fasi fa a sama taki anga i, ma luku san a wani leli i. I sa akisi iseefi taki: ‘Winsi fa mi á lobi a fasi fa a sama taki anga mi, a sani di a taki a tuu? Mi sa fende wini fu a sani di a taki?’ A soso wini yu o fende te yu e meke moiti fu wooko anga san taawan e taigi i.​—Odo 15:31.

15. Saide u mu e akisi taawan fu poti wi a pasi?

¹⁵ Beibel e gi u taanga-sikin fu go suku yeepi a taawan. Odo 13:10 e taki: ‘Heimembee e tyai toobi, ma wan sama di e akisi fa a mu du sani e soi taki a koni.’ A sani di a tekisi ya taki a tuu. Den sama di gwenti akisi taawan fu poti den a pasi, e moo go a fesi gaw aini a dini di den e dini Yehofa. Neen meke, a be o de wan koni sani fu e akisi taawan fu soi i fa i sa du son sani moo bun.

16. On ten u sa akisi taawan fu poti wi a pasi?

¹⁶ On ten u sa akisi wan baala efuso sisa fu poti wi a pasi? (1) Wan yonkuu sisa sa akisi wan sisa di abi ondoofeni fu tyai en go a wan sutudi. Bakaten a sa akisi en san a be sa du moo bun. (2) Meke u taki wan sisa di á toow wani bai wan koosi. Kande a sa akisi wan sisa di abi ondoofeni fa ai si a koosi di a wani bai. (3) Wan baala di mu holi en fosi publikitaki sa akisi wan baala di abi ondoofeni fu aliki a lezing fi en fosi a dei doo. A baala di abi ondoofeni sa soi en fa a sa du en moo bun. Winsi a wan baala di gwenti holi lezing kaba, toku a sa akisi taa baala di abi ondoofeni fu soi en san a sa du moo bun. A mu meke moiti wooko anga san den taigi en tu.

17. San i mu du efi i wani fende wini te taawan e poti yu a pasi?

¹⁷ Aini den ten di e kon, kande wan baala efuso sisa o poti yu a pasi. Efuso kande yu o leisi wan sani aini Beibel efuso wan fu den buku fu a olikanisâsi, di o yeepi i fu si taki i mu kengi a fasi fa yu e du sani. Te a sani ya pasa, gaantangi holi den sani di u luku aini a artikel ya a pakisei. I mu abi sakafasi, ná luku na a fasi fa a sama taki anga i, ma poti pakisei a san a wani leli i, da i meke moiti wooko anga san a taigi i. Nawan fu wi á meke anga koni. Ma ‘te wi e aliki te taawan e poti wi a pasi’, da a Wowtu fu Gadu o meke u kon koni.​—Odo 19:20.