1. Amkam solʼlo koso mellonk xokta ani amkam tachi kiteak goroz asa?

AMKAM sogleank kednam-na-kednam solʼleachi goroz asta. Thodde pavtti ami svota zaun dusream lagim solʼlo magtat. Punn thoddea vellar amchi kallji korpi ek bhav ami ‘guneanv vo chuk’ korchea poilim amkam solʼlo diunk xokta. (Gal. 6:1) Tea bhair, ami ek gombhir chuk kelea uprant, vhoddil amkam xist vo solʼlo ditat. Tor amkam solʼlo koso-i mellom, ami to apnnaunk zai. Karonn oxem kelem zalear amkanch faido zatolo ani amcho jiv pasun salvar zaunk xokta!​—Mho. 6:23.

2. Mhonnʼnneo 12:15 pormonnem, ami solʼlo kiteak apnnaunk zai?

² Khoinchea-i munxak soglench khobor asona. Karonn amchea poros dusreank chodd ginean vo onubhov asonk puro. (Mhonnʼnneo 12:15 vachat.) Ani heach pasot, amchem mukhel vers “budvontachim utram aik” mhunn amkam urba dita. (Mho. 22:17) Tor ami solʼlo apnnaitat tednam ami khaltim asat, amkam oskotai-o asat mhunn ami vollkhon ghetat, ani amche dhei melloun gheunk amkam modotichi goroz asa mhunn ami dakhoun ditat. Raza Solomonak pasun Devan oxem borounk prerit kelo: “Zaiteacheo budhi ghetloleo ievzonneo folladik zatat.”​—Mho. 15:22.

3. Amkam khoinchea don toren solʼlo mellonk xokta?

³ Tor amkam khoinchea don toren solʼlo mellonk xokta? Ek mhunnttlear, ami Bible vo Bible-acher adarit prokaxonam vachtat tednam ami amchem jivit koxem jietat tea vixim chintunk, ani ami kitem tori sarkem korinant zalear amchem chintop ani vagnnuk bodlunk amkam modot zata. (Heb. 4:12) Ani dusrem mhunnttlear, ek vhoddil vo onubhov aslolo ek bhav ami kiteacher kam korunk zai vo khoim sudharnni korunk zai tem amkam sangonk xokta. Tor konnui amkam solʼlo dita zalear to khoreanich amcho mog korta mhunn ami ugddas dovrunk zai. Ani to kitem sangta tem bore bhaxen aikon, tacho solʼlo ami apnnaunk zai.

4. Upodexok 7:9-a pormonnem, amkam solʼlo melltta tednam ami kitem korchem nhoi?

 ⁴ Ami opurnn asat ani chuki kortat hem ami manun ghetat tem khorem. Punn konnui amkam solʼlo dita tednam to solʼlo manun gheunk amkam ghoddie kotthin zaunk puro. Ani to solʼlo aikon amkam ghoddie ragui ieunk puro. Kiteak? Konnui amchi umkich chuk amkam dakhoun dita tednam tem ghoddie amkam borem lagona zait. (Upodexok 7:9 vachat.) Tor ti amchi chuk nhoi mhunn ami ghoddie nimitam diunk puro, vo solʼlo diupi bhavacher ami dubhavunk puro, vo tannem jea toren solʼlo dila tem amkam ghoddie avoddna zait. Ami ghoddie tea bhava vixim amchea monant oxem chintunk puro: ‘Mhaka solʼlo diunk to konn? To chuki korina?’ Ani amkam tacho solʼlo avoddna zalear ami ghoddie tacho solʼlo kanar gheunchim nant vo amkam borem dista tem sangtolo toslea munxa lagim solʼlo magtolim.

5. Hea lekhant ami kitem polloitolim?

⁵ Tor hea lekhant, solʼlo mellʼllo tednam to konnem apnnaunk na ani konnem apnnailo toslim thoddim Bible-antlim udharonnam ami polloitolim. Toxench solʼlo manun gheunk amkam koxi modot zatoli, ani oxem kelolean amkam koso faido zatolo tem pasun ami polloitolim.

6. Raza Rehoboamak solʼlo mellʼllo tednam tannem kitem kelem tantuntlean ami kitem xiktat?

⁶ Ami Rehoboamachea udharonnacher dhean dium-ia. To Israelacho raza zalo tednam porjen tachea lagim ieun, tachea bapain Solomonan tancher ghatlolo kamacho bhar unno kor mhunn sanglem. Hea vixim Rehoboaman zanntteam lagim solʼlo ghetlo. Ani oxem korun tannem ekdom borem kelem. Tea vellar, zanntteanim Rehoboamak solʼlo diun sanglem ki tannem lokanchem aikolem zalear te sodankal tachi seva kortole. (1 Raz. 12:3-7) Punn Rehoboamak tancho solʼlo avddonk na dekhun aplea sangata vaddlolea ixttam koddlean tannem solʼlo ghetlo. Te chodd korun challis vorsanche asle astole. (2 It. 12:13) Tor tankam jivitant thoddo onubhov aslo astolo. Punn hea vellar tannim Rehoboamak ek vaitt solʼlo dilo. Tem mhunnttlear, tannim taka lokancher ghatlolo kamacho bhar unno korchea bodlek anik vaddounk sanglem. (1 Raz. 12:8-11) Tor atam khoincho solʼlo apnnauncho tea vixim Rehoboaman Jehova lagim magnnem korunk zatalem. Punn oxem korchea bodlek, Rehoboaman tachea ixttancho solʼlo apnnailo. Karonn taka tancho solʼlo avoddlo. Punn tacho vaitt porinnam Rehoboamak ani Israelachea lokank bhogcho poddlo. Tor aiz amkam pasun avoddna toslo solʼlo mellonk xokta. Punn to Devachea Utra pormonnem asa zalear ami to apnnaunk zai.

7. Raza Uzziachea udharonnantlean ami kitem xiktat?

⁷ Atam ami Raza Uzzia vixim polloum-ia. Taka pasun solʼlo mellʼllo tednam, tannem to apnnaunk na. Jehovachea mondirant fokot iadnikamnim vochonk zatalem tea zagear vochon tannem dhump lasunk proitn kelo. Tea vellar iadnikamnim taka oxem sanglem: “Sorvesporak dhump lasunk tum iukt nhoi; punn fokot dhump zollunk sonvskarlolea Aaronachea kulliechea iadnikank ho hokʼkh dilʼlo asa.” Tea vellar, “Uzzia ragan bhorlo.” Kiteak? Apunn raza zalolean apnnak kitem-i korunk odhikar asa oxem taka dislem astolem. Punn Jehovache nodren tachem hem chintop chukichem aslem. Tor Uzzia Razan apnnank korunk odhikar naslem tem kam kelem dekhun Jehovan tacher koddachi pidda dhaddli ani ‘moro porian hi pidda taka asli.’ (2 It. 26:16-21) Punn Uzzia Razak iadnikamnim solʼlo dilʼlo tednam tannem khaltikaien to manun ghetlolo, ani thoinchean to bhair soron gelʼlo zalear Jehova ghoddie taka bhogxitolo aslo. Tor Raza Uzziachea udharonnantlean ami kitem xiktat? Amkam kosli-i zobabdari asum, Bible-antlean  solʼlo melltta tednam ami to apnnainant zalear ami Jehovachi maniotai hogddaitolim.

8. Jobak solʼlo mellʼllo tednam tannem kitem kelem?

⁸ Bible-ant amkam oslea-i munxanchim udharonnam mellttat, zannim solʼlo apnnailo ani tankam zaitim besanvam mellʼlim. Tantuntlem ek udharonn mhunnttlear Jobachem. To Jehova Devacho khub mog kortalo ani taka manta tem korunk sodhtalo. Punn to opurnn aslolean, tacher eka-fattlean-ek tras aile tednam to aplea chintnamnim chuklo. Punn uprant, taka Jehova koddlean ani Elihu koddlean solʼlo mellʼllo tednam tannem to khaltikaien apnnailo. Tannem mhunnttlem: “Mhojea gineanank atthapunk zaina tosleo vostu hanv uloilom . . . hanvem mhonnlolem tem sorv pattim ghetam, ani dhulʼlint ani gobrant, mhaka poschetap zata.” Tor Joban khaltikai dakhoili mhunn Jehovan taka zaitim besanvam dilim.​—Job 42:3-6, 12-17.

9. Solʼlo manun gheunchea vixim Moizes amkam ek borem udharonn koso zaun asa?

⁹ Dusrem udharonn mhunnttlear Moizesachem. Ek pavtti to Israel porjecher khub ragar zalo ani Jehova Devak mhoima diunk chuklo. Ani hea pasot Jehovan taka xist dili. Tem mhunnttlear, taka Bhasailʼlo Des pollounk mellchona mhunn Jehova taka sanglem. (Lok. 20:1-13) Uprant, Moizesan Jehova lagim apleak to des pollounk di mhunn vinoti keli tednam, Jehovan oxem mhunnttlem: “Hea vixim mhaka tuji gozaluch naka!” (D.S. 3:23-27) Punn Jehovacher ragar zaunchea bodlek, Moizesan khaltikaien tacho nirnnoi manun ghetlo. Ani haka lagon Jehova Moizesak Israel porjecho fuddari mhunn uzar korit ravlo. (D.S. 4:1) Tor solʼlo melltta tednam to manun gheunchea vixim amkam Job ani Moizesachem ek borem udharonn asa. Jobak solʼlo mellʼllo tednam tannem nimitam diunk nant punn aplem chukichem chintop sarkem kelem. Ani Moizesak vochonk khub itsa asli tea Bhasailʼlea Desant Jehovan vochonk diunk na tednam pasun to Jehovak visvaxi ravlo. Ani oxem korun tannem khaltikaien Jehovacho solʼlo manun ghetlo mhunn dakhoilem.

10. (a) Mhonnʼnneo 4:10-13 pormonnem, solʼlo apnnailolean amkam koso faido zata? (b) Thoddea bhav-bhoinnank solʼlo mellʼllo tednam tannim kitem kelem?

¹⁰ Tor Job ani Moizesa bhaxen, ami solʼlo apnnaitat tednam amkam faido zata. (Mhonnʼnneo 4:10-13 vachat.) Ani oxench amchea zaiteam bhav-bhoinnamnim kelʼlem asa. Tea vixim thoddim bhav-bhoinnam kitem sangtat tem polloum-ia. Congo-nt ravpi bhav Emmanuel oxem mhunntta: “Jehova sangata mhoji ixttagot piddʼddear zata toslem ek pavl hanv gheunk voitam mhunn onubhov aslolea bhavank kollʼlem tednam tannim mhaka solʼlo dilo. Ani to solʼlo apnnailolean hanv trasant poddpacho vanchlo.” * Toxench Canada-nt ravpi, Megan nanvachi ek pioneer bhoinn oxem sangta: “Mhaka mellttalo to solʼlo mhaka sodanch avoddnaslo. Punn tea solʼleachi mhaka khoreaninch goroz asli.” Tea bhair, Croatia-nt ravpi bhav Marko sangta: “Mhaka asloli zobabdari hanvem hogddaili. Punn atam hanv tea vella vixim chintʼta tednam Jehova sangata mhoji ixttagot porot ghott korunk mhaka mellʼllolea solʼlea thaun modot zali mhunn mhaka kollon ailem.”

11. Solʼlo manun gheunchea vixim Bhav Karl Klein-an kitem sanglem?

¹¹ Toxench solʼlo apnnailolean Bhav Karl Klein-akui faido zalo. Bhav Klein, Soncholan Monddollacho ek sodoxia zaun aslo. Aplea jivitache kannient tannem sanglem, ki ek pavtt taka tacho ghott ixtt, Bhav Rutherford-an khor solʼlo dilo. Ani survatek taka hea vixim khub vaitt dislem. To mhunntta: “Bhav Rutherford mhaka porot mellʼllo tednam tannem mhaka bore toren, ‘Hello Karl!’ mhunn zap keli.  Punn hanv tacher ragar aslo dekhun hanvem taka voilea-voiruch zap keli. Tednam tannem mhunnttlem: ‘Karl, chotur rav! Soitan tuka fosounk sodhta.’ Mhaka loz bhogli ani hanvem mhunnttlem: ‘Na Bhav Rutherford, toxem kainch na.’ Punn hanv bejar asa mhunn Bhav Rutherford zannam aslo. Ani tannem mhaka portun sanglem: ‘Tem borem asa. Punn chotur rav! Soitan tuka fosounk sodhta.’ Tachim utram kitlim khorim aslim! Tor khoincho-i bhav amkam solʼlo dita mhunn ami tacher ragar zatat zalear . . . ami Soitanachea fasak sampddonk xoktat.” * (Ef. 4:25-27) Punn Bhav Karl Klein-an oxem korunk na. Tannem Bhav Rutherford-acho solʼlo manun ghetlo ani oxem kelolean te bore ixtt zaun urle.

12. Khaltikai amkam solʼlo manun gheunk koxi modot korta? (Mhonnʼnneo 27:6)

¹² Solʼlo manun gheunk ami kitem korunk zai? Ami khalti asonk zai ani sodanch ugddas dovrunk zai ki ami opurnn asat ani khub pavtti chintinastana vagtat. Ami poilim polloilʼlem toxem, Jobachem chintop chukichem aslem. Punn magir tannem aplem chintop bodolʼlem ani Jehovan tacher besanv ghatlem. Job khalto aslo dekhun to oxem korunk pavlo. Ani heach karonnak lagon aplea poros lhan aslolea Elihucho solʼlo tannem manun ghetlo. (Job 32:6, 7) Thodde pavtti, amkam solʼlo dita to munis piraien amchea poros lhan asonk puro vo amkam kainch karonn nastana solʼlo dila oxem amkam disonk puro. Oslea vellar ami khaltim asat zalear, amkam tacho solʼlo manun gheunk sompem zatolem. Canada-nt ravpi ek vhoddil sangta: “Ami khoim sudharnni korunk zai tem ghoddie amkam khobor asona. Tor ami vaddavoll korunk zai zalear dusreancho solʼlo khub mhotvacho.” Amkam sogleank povitr xokteche gunn vaddounk ani bore porgottpi ani xikoupi zaunk dusreanchea solʼleachi goroz asa.​—Mhonnʼnneo 27:6 vachat.

13. Amkam solʼlo melltta tednam ami kitem ugddas dovrunk zai?

¹³Dev amcho mog korta dekhun to amkam solʼlo dita mhunn ami ugddas dovrunk zai. Amchem sodanch borem zalʼlem Jehovak zai. (Mho. 4:20-22) Ani to amcho khub mog korta dekhun, tachea Utrantlean, Bible-acher adarit prokaxonantlean vo onubhov aslolea bhav-bhoinnam udexim to amkam solʼlo dita. Hea pasot Hebrevank 12:9, 10-nt, Jehova “amkam faideachem tem polleun amkam xikxa dita” mhunn sanglolem asa.

14. Amkam solʼlo melltta tednam ami kiteacher dhean diunk zai?

¹⁴Solʼlo koso dila tacher nhoi punn solʼleacher ami dhean diunk zai. Thodde pavtti, amkam solʼlo dita tannem to sarke ritin diunk na oxem amkam disonk puro. Hem mat khorem, ki solʼlo dita tannem dusreank manun gheunk sompem  zata tea ritin to diunk zai. * (Gal. 6:1) Punn solʼlo amkam melltta zalear, solʼlo dita to kitem sangonk sodhta tacher ami dhean diunk zai. Ami amkanch vicharunk zata: ‘Jea toren mhaka solʼlo dilo tem mhaka borem lagonk na zalear pasun, tea solʼleantlean hanvem kitem xikonk zata? Mhaka solʼlo dila tachi chuk polloinastana tannem dilʼlea solʼlea thaun hanvem koso faido zoddun gheunk zata?’ Tor amkam solʼlo konnui dium vo koso-i dium, ami xannim asat zalear ami to solʼlo apnnaitolim.​—Mho. 15:31.

15. Ami dusream lagim solʼlo kiteak magonk zai?

¹⁵ Bible amkam dusream koddlean solʼlo magonk urba dita. Ani heach pasot, Mhonnʼnneo 13:10 oxem sangta: “Budh ghetat tanche thaim xanneponn asta.” Him utram kitlim khorim zaun asat! Karonn dusrim amkam ieun solʼlo dium porian ravche bodlek, ami vochon tanche lagim solʼlo magtat tednam ami chodd korun bore nirnnoi gheunk pavtolim. Tor dusream lagim solʼlo magonk poilem pavl gheunk fatti soronakat.

16. Ami amchea bhav-bhoinnam koddlean kednam solʼlo magonk zata?

¹⁶ Ami amchea bhav-bhoinnam koddlean kednam solʼlo magonk zata? Hea poristhitim vixim chintat. (1) Ek bhoinn onubhov aslolea porgottnnarak aplea sangata Bible obheasak vhorta. Ani uprant tinnem anik bore toren koxem xikounk zata tea vixim tichea koddlean solʼlo magta. (2) Ek ankvar bhoinn kopdde gheunchea poilim, onubhov aslole eke bhoinni lagim tea kopddeam vixim solʼlo magta. (3) Ek bhav aplem poilem jahir bhaxonn diuncho asa. Tor to bhaxonn diunk onubhov aslolea eka bhavak aplem bhaxonn aikonk sangta ani tannem khoim sudharnni korunk zai tea vixim solʼlo magta. Punn ek bhav zaitim vorsam porian bhaxonnam dita zalear pasun, tannem bhaxonnam diunk onubhov aslolea her bhavam lagim solʼlo magonk zata ani to solʼlo apnnaunk zata.

17. Amkam melltta tea solʼleantlean faido zaunk ami kitem korunk zai?

¹⁷ Ietat tea disamnim amkam sogleank solʼlo mellttolo, zaum bhav-bhoinnam koddlean vo anik khoinche-i toren. Tor tumkam solʼlo melltta tednam hea lekhant xiklolim lisanvam ugddas dovrat. Sodanch khaltim ravat. Solʼlo koso dila tacher nhoi punn solʼleacher dhean diat ani to apnnaiat. Karonn amche modlo konnuch zolma thaun xannom zolmonk na. Punn ami ‘budh vo solʼlo aikon ani nittavnni manun ghetat’ tednam Bible sangta toxem ‘ami budvont vo xannim zatolim.’​—Mho. 19:20.