1. Edena dala idauidau ai sisiba ita abia, bona dahaka dainai?

 ITA IBOUNAI be nega ta ta ai sisiba ita abia be namo. Nega haida, lo tadikaka o taihu ta amo sisiba ita tahua diba. To nega haida, reana tadikaka ta ese ita ia hamaoroa ita be “dala kererena” ita badinaia noho. (Gal. 6:1) Eiava kerere badana ta ita karaia murinai ta ese ita ia hamaoromaoroa neganai, unai be sisiba ita abia. Ena be dala idauidau ai sisiba ita abia, to ita kamonai bona badinaia be namo. Unai amo namo do ita davaria bona eda mauri ia gimaia diba!​—Aon. 6:23.

2. Aonega Herevadia 12:15 hegeregerena, dahaka dainai sisiba ita kamonai bona badinaia be namo?

² Inai atikol ena siri badana ese ita ia hagoadaia ‘aonega taudia edia hereva ita kamonai’ totona. (Aon. 22:17) Namo lasi ita gwau ita be gau ibounai ita diba, to ma ta amo heduru ita abia be namo. (Aonega Herevadia 12:15 duahia.) Unai dainai sisiba ita kamonai bona badinaia be manau karana. Unai ese ia hahedinaraia iseda diba be mai ena hetoana, bona ita laloparara ta ese ita ia durua eda tahua gaudia ita hagugurua totona. Lauma helaga ena heduru amo aonega tauna King Solomona ese inai ia torea: “Sisiba henia taudia be momo neganai, do oi kwalimu.”​—Aon. 15:22.

3. Edena dala ai sisiba ita abia?

³ Ita be tadikaka o taihu ta amo sisiba ita abia. Reana elda eiava lo tadikaka ta ese ita ia hamaoroa iseda kara ta ita hanamoa totona. Bema ta be ita ia lalokau henia dainai Baibel amo sisiba ia henia, namona be mai moale ida ita kamonai bona badinaia. To dala ma haida amo sisiba ita abia danu. Hegeregere, Baibel eiava pablikeisen ai ita duahia gauna ese ita karaia karana ta ia herevalaia, bona unai ese ita ia durua eda lalohadai o kara ita haidaua totona.​—Heb. 4:12.

4. Hadibaia Tauna 7:9 hegeregerena, sisiba ita abia neganai dahaka ita dadaraia be namo?

 ⁴ Ta ese ita ia sisiba henia neganai, reana nega haida ia auka unai ita abia dae totona. Bona ita lalohisihisi danu. Dahaka dainai? Ena be ita be goevadae lasi, to ta ese iseda kerere ia itaia bona ita ia sisiba henia neganai, unai ita abia dae be auka. (Hadibaia Tauna 7:9 duahia.) Reana ekskius herevadia ita gwauraia. Reana sisiba ia henia tauna ena kara ita laloa o sisiba ia henia dalana dekenai ita moale lasi. Eiava sisiba ia henia tauna ena kerere ita tahua, bona ita laloa: ‘Ia be maoro lasi lau ia sisiba henia totona. Ia danu be mai ena kerere!’ Bema unai sisiba ita ura henia lasi, reana do ita dadaraia eiava ita ura henia tauna amo sisiba ita tahua.

5. Inai atikol ai dahaka do ita herevalaia?

⁵ Inai atikol ai, Baibel dekenai sisiba idia dadaraia bona idia abia dae taudia haida edia haheitalai do ita herevalaia. Danu, dahaka ese ita ia durua sisiba ita abia dae bona badinaia daladia haida do ita herevalaia.

6. King Rehoboama ena sivarai amo dahaka ita dibaia?

⁶ Rehoboama ena haheitalai ita laloa. Ia be Israela ena king ai ia lao neganai, ia lohiaia taudia be ia dekenai noinoi ta idia karaia. Ia idia noia ena tamana Solomona ese idia dekenai ia henia maduna haida ia kokia totona. Rehoboama be kara namona ia karaia. Ia ese unai taudia ia haere henia totona Israela ena tau badadia dekenai heduru ia tahua. Bona idia ese king idia hamaoroa bema Israela taudia edia hereva ia kamonai, nega ibounai ia do idia hesiai henia. (1 Kin. 12:3-7) To, Rehoboama be tau badadia edia sisiba dekenai ia moale lasi dainai, ena uru tamona taudia edia heduru ia tahua. Unai taudia edia mauri lagani be 40 bamona, bona reana gau momo idia diba. (2 Siv. 12:13) To idia ese Rehoboama dekenai sisiba kererena idia henia. Idia hamaoroa Israela taudia edia maduna ia habadaia totona. (1 Kin. 12:8-11) Rehoboama be sisiba daladia rua ia abia, unai dainai Iehova ia noia diba edena sisiba do ia badinaia be namo. To, ia ese tatau matamata edia hereva ia kamonai bona badinaia dainai, ia bona Israela taudia be dika idia davaria. Nega haida, ita ura lasi dalana ai sisiba ita abia. To, bema unai sisiba be Baibel amo, namona be ita abia dae.

7. King Usaia ena haheitalai amo dahaka ita dibaia?

⁷ King Usaia be sisiba ia dadaraia. Ia be bonana namo muramura ia gabua totona Iehova ena dubu helaga lalonai hahelaga taudia sibona idia vareai kahana dekenai ia lao. Iehova ena hahelaga taudia be ia dekenai idia gwau: “Usaia e, Iehova dekenai bonana namo muramura oi gabua be maoro lasi! Unai be hahelaga taudia sibona ese bonana namo muramura do idia gabua.” Usaia be dahaka ia karaia? Bema mai manau ida sisiba ia abia dae bona dubu helaga ia rakatania haraga, reana Iehova ese ena dika ia gwauatao diba. To, “Usaia be . . . ia badu dikadika.” Dahaka dainai sisiba ia dadaraia? Ia laloa ia be king dainai, mai ena maoro ia ura gauna ia karaia totona. To Iehova be unai ia abia dae lasi. Usaia ese ia karaia gauna be maoro lasi dainai, lepera gorerena ia abia bona unai bamona ia noho “ela bona ia mase.” (2 Siv. 26:16-21) Usaia ena haheitalai amo ita diba, herevana dahaka gaukara ita karaia, to bema Baibel ena sisiba ita dadaraia, Iehova ena lalonamo do ita abia lasi.

8. Iobu be sisiba ia abia neganai dahaka ia karaia?

⁸ Ena be Baibel ai haheitalai dikadia haida ita herevalaia vadaeni, to haheitalai namodia idia noho danu, idia be sisiba idia abia dae dainai namo idia davaria. Mani Iobu ita laloa. Ena be Dirava ia lalokau henia bona ia ura hamoalea, to ia be goevadae lasi tauna. Bona hahetoho badadia ia davaria neganai, ia herevalaia gaudia haida be maoro lasi. Unai dainai, Elihu bona Iehova amo sisiba ia abia. Iobu be dahaka ia karaia? Ia be mai manau ida sisiba ia abia dae. Ia gwau: “Lau hereva, to lau laloparara lasi. . . . Lau gwauraia herevadia be maoro lasi, bona lau helalo-kerehai totona, tano bona lahi kahuna dekenai lau helai.” Iobu ia manau dainai Iehova ese ia hanamoa.​—Iobu 42:3-6, 12-17.

9. Mose be sisiba ia abia neganai dahaka ia karaia, bona dahaka dainai ia be haheitalai namona?

⁹ Ta be kerere badana ta ia karaia murinai sisiba ia abia dae neganai, ia ese Mose ena haheitalai namona ia tohotohoa. Nega ta, Mose ia badu momokani bona Iehova ia matauraia lasi. Unai dainai, Dirava ese Mose dekenai maoro ia henia lasi Gwauhamata Tanona dekenai ia vareai totona. (Num. 20:1-13) Mose ese Iehova ia noia ia karaia disisen ia laloa lou neganai, Iehova ia gwau: “Lau dekenai unai gauna oi herevalaia lou lasi.” (Deu. 3:23-27) Mose be ia badu lasi. To, Iehova ese ia karaia disisen ia abia dae, bona Iehova ese ia gaukaralaia noho Israela taudia ia gunalaia totona. (Deu. 4:1) Iobu bona Mose be sisiba idia abia dae, bona idia be haheitalai namona ita tohotohoa totona. Iobu be ena lalohadai ia hamaoromaoroa, bona ekskius herevadia ia gwauraia lasi. Ena be Mose ese mai anina bada hahenamo ia haboioa, to Iehova ia abidadama henia noho, unai ese ia hamomokania Iehova ena sisiba ia abia dae.

10. (a) Aonega Herevadia 4:10-13 hegeregerena, sisiba abia dae karana ena namo be dahaka? (b) Haida be sisiba idia abia neganai, dahaka idia karaia?

¹⁰ Abidadama tatau, hegeregere Iobu bona Mose, edia haheitalai ita tohotohoa neganai, namo ita davaria. (Aonega Herevadia 4:10-13 duahia.) Iseda tadikaka bona taihu momo be unai bamona idia karaia bona sisiba idia abia dae. Congo ai tadikaka ta, Emmanuel, be sisiba ia abia karana ia herevalaia: “Egu kongrigeisen ai idia noho lo tadikaka idia itaia Iehova ida egu hetura karana ia dika matamaia bona lau idia durua. Edia sisiba lau badinaia, bona unai ese lau ia durua hekwakwanai momo lau hanaia totona.” * Canada ai painia taihu ladana Megan be sisiba ia abia karana ia herevalaia: “Lau abia sisiba be nega momo lau ura henia lasi, to lau diba unai ese lau do ia durua bada.” Croatia ai tadikaka ta ladana Marko ia gwau: “Ena be hahenamo lau haboioa, to unai lau laloa lou neganai, lau laloparara lau abia sisiba ese lau ia durua egu hetura karana Iehova ida ia hagoadaia lou.”

11. Tadikaka Karl Klein be sisiba abia dae karana dekenai dahaka ia gwau?

¹¹ Hakaua Oreana ena memba ta, Tadikaka Karl Klein be sisiba ia abia dae dainai namo ia davaria, bona ia be haheitalai namona. Tadikaka Klein be ena turana namona ta, Joseph F. Rutherford ese ia sisiba auka henia negana ta ia herevalaia. Tadikaka Klein ia gwau matamanai unai sisiba dekenai ia lalohisihisi. Ia gwau: “Gabeai [Tadikaka Rutherford] ese lau ia itaia neganai, mai moale ida ia gwau, ‘Namo Karl!’ To lau do lalohisihisi noho dainai, iena hanamoa  herevana lau haloua lasi. Tadikaka Rutherford ia gwau, ‘Karl, oi naria namonamo! Diabolo ia ura oi ia tarapua!’ Mai hemarai ida lau gwau, ‘Tadikaka Rutherford e, oi dekenai lau badu lasi.’ To ia diba ia dekenai lau badu, unai dainai ia hereva lou, ‘Ia namo. To oi naria namonamo. Diabolo ia ura oi ia tarapua.’ Iena hereva be maoro! Iseda tadikaka ta be mai ena maoro ita ia sisiba henia totona, to ia dekenai ita badu noho neganai . . . , dala ita kehoa Satani ese ita ia tarapua totona.” * (Efe. 4:25-27) Tadikaka Klein ese Tadikaka Rutherford ena sisiba ia abia dae, bona edia hetura karana ia goada.

12. Edena dala ai manau karana ese ita ia durua sisiba ita abia dae totona? (Salamo 141:5)

¹² Dahaka ese ita ia durua sisiba ita abia dae totona? Namona be ita manau bona ita laloatao ita be goevadae lasi bona nega haida kerere ita karaia. Matamanai ita herevalaia bamona, Iobu be lalohadai kererena ia abia. To gabeai ena lalohadai ia hamaoromaoroa bona Iehova ese ia hanamoa. Dahaka dainai? Badina tau matamata Elihu ese ia sisiba henia neganai, Iobu be unai ia abia dae, unai ese ia hamomokania ia manau. (Iobu 32:6, 7) Nega haida ita laloa sisiba ita abia be maoro lasi eiava ita ura lasi matamata tauna ta ese ita ia sisiba henia, to manau karana ese ita ia durua sisiba ita abia dae totona. Canada ai elda ta ia gwau, “Bema ta be ita ia sisiba henia lasi, do ia auka iseda kara ita hanamoa totona?” Namona be ita gaukara goada lauma helaga ena huahua ita hahedinaraia noho bona haroro bona hadibaia tauna namona ai ita lao totona.​—Salamo 141:5 duahia.

13. Ita abia sisiba be edena bamona ita laloa?

¹³ Sisiba abia karana be Dirava ena lalokau karana. Iehova be iseda namo ia laloa bada. (Aon. 4:20-22) Ia ese Baibel, pablikeisen idauidau, eiava lo tadikaka o taihu ta amo ita ia sisiba henia neganai, ia hahedinaraia ita ia lalokau henia. Heberu 12:9, 10 ia gwau, “Dirava ese iseda namo totona ita ia matahakani henia.”

14. Sisiba ita abia neganai, dahaka ita laloa bada be namo?

¹⁴ Ita abia sisiba herevadia ita laloa bada, to idia henia dalana ita laloa bada lasi. Nega haida ita laloa sisiba ita abia dalana be maoro lasi. Oibe, ta ita sisiba henia neganai, do ia abia dae dalanai sisiba ita henia be namo. * (Gal. 6:1) To bema ta ese ita ia sisiba henia, namo lasi ita ia sisiba henia dalana ita laloa, to namona be sisiba herevadia ita laloa bada. Reana sibona ita nanadaia:  ‘Ena be sisiba ia henia dalana lau ura henia lasi, to unai sisiba herevadia amo gau ta lau dibaia, a? Lau ia sisiba henia tauna ena kara kereredia lau laloa lasi, to ia henia sisiba ena namo lau laloa, a?’ Aonega karana be dala ita tahua ita abia sisiba ita badinaia totona, unai amo namo do ita davaria.​—Aon. 15:31.

15. Dahaka dainai ma haida amo sisiba ita tahua be namo?

¹⁵ Baibel ese ita ia hagoadaia ma haida amo sisiba ita tahua totona. Aonega Herevadia 13:10 ia gwau: “Sisiba idia tahua taudia dekenai aonega ia noho.” Unai be momokani! Sisiba idia tahua taudia be nega momo disisen maorodia do idia karaia, to sisiba idia tahua lasi taudia be disisen kereredia idia karaia. Unai dainai ma haida amo sisiba oi tahua be namo.

16. Edena negai ma haida amo sisiba ita tahua diba?

¹⁶ Edena negai eda tadikaka o taihu amo sisiba ita tahua diba? Dala haida mani ita laloa. (1) Taihu ta be Baibel stadi ia karaia namonamo pablisa ta ia noia ena stadi ai ia helai totona, bena gabeai ena hadibaia dalana ia hanamoa totona pablisa amo heduru ia tahua. (2) Singul taihu ta ia ura dabua haida ia hoia, unai dainai lo taihu ta ena lalohadai ia tahua. (3) Tadikaka ta be ena nega ginigunana pablik tok do ia henia. Ia ese tok henia dalana ia diba namonamo tadikaka ta ia noia ena tok ia kamonai, unai amo do ia hanamoa gaudia ia herevalaia diba. Danu lagani momo tok ia henia tadikaka be tok henia dalana idia diba namonamo tadikaka edia heduru ia noia bona idia henia sisiba ia badinaia be namo.

17. Sisiba ita abia dae karana ena namo be dahaka?

¹⁷ Ita ibounai be dala ma haida eiava tadikaka o taihu ta amo sisiba ita abia. Unai ia vara neganai, ita herevalaia vadaeni gaudia ita laloatao be namo. Manau karana ita hahedinaraia noho. Ita abia sisiba herevadia ita laloa bada, to idia henia dalana ita laloa bada lasi. Bona ita abia sisiba ita badinaia. Ita ibounai be aonega lasi taudia, to ‘sisiba ita kamonai bona matahakani ita abia dae’ neganai, Dirava ena Hereva ia gwau ‘do ita aonega.’​—Aon. 19:20.