1. Lujimuno lwakonsha kwishila mu ñanyi mashinda, kabiji mambo ka o twafwainwa kumvwina?

 ATWEBA bonse tukebewa kwitujimunako bimye bimo. Kimo kimye twakonsha kwipuzhako mukwetu kuba’mba etufundeko. Pa bimye bikwabo, mulongo mu kipwilo wakonsha kwitusolomoka ne kwitunjimunako kuba’mba tubena kuya “mu jishinda jingi,” ko kuba’mba tubena kuba kintu kyakonsha kwitubika mu lukatazho. (Nga. 6:1) Kabiji lujimuno lwakonsha kwiya mu jishinda ja kwitololako inge twalenga mambo. Monse mwakonsha kwishila lujimuno, twafwainwa kumvwina. Umvwe twauba bino, tukamwenamo, kabiji tukapulusha bumi bwetu.—Maana 6:23.

2. Kwesakana na byaamba Byambo bya Maana 12:15 ne tubyambo twa munshi, mambo ka kumvwina lujimuno o kwanemena?

² Kinembelo pa imena uno mutwe kitutundaika “kumvwa byamba bantu ba maana.” (Maana 22:17) Kafwako muntu wayukatu byonse ne; kujipo muntu umo wayuka bintu byavula kwitukila. (Tangai Byambo bya Maana 12:15 ne tubyambo twa munshi.) Onkao mambo, kumvwina lujimuno kumwesha’mba twipelula. Kabiji kumwesha’mba twayuka kuba’mba kuji bintu bimo byo tukankalwa kuba, ne kuba’mba tukebewa bukwasho pa kuba’mba tufikizhe bikonkwanyi byetu. Mfumu wa maana aye Solomone watangijilwe na mupashi wazhila kunemba’mba: “Paji babulañana [nangwa’mba “bafundañana”] maana bavula, bintu bilumbuluka.”—Maana 15:22, tubyambo twa munshi.

3. Mu ñanyi mashinda mo twakonsha kutambwila lujimuno?

³ Ñanyi jishinda jimo jo tutambwilamo lujimuno? Twakonsha kutangapo bimo mu Baibolo nangwa mu mabuku etu byakonsha kwitulengela kutulumana ne kupimpula byubilo byetu. (Hebe. 4:12) Jino jo jishinda jimo jo tutambwilamo lujimuno. Ñanyi jishinda jikwabo jo tutambwilamo lujimuno? Mukulumpe mu kipwilo  nangwa mulongo mukwabo wakoma mu lwitabilo wakonsha kwitubuulako kintu kimo kyo twafwainwa kwingijilapo. Ajino jo jishinda jikwabo jo tutambwilamo lujimuno. Inge muntu witutemwa witupa lujimuno lwa mu Baibolo, twafwainwa kumwesha’mba twasanta kupichila mu kumvwina byo aamba ne kwingijilapo.

4. Kwesakana na byaamba Musapwishi 7:9, ñanyi bintu byo twafwainwa kuchinuzhuka kuba inge betupa lujimuno?

⁴ Kwambatu kine, kechi kyapeela kuswa lujimuno kufuma ku mukwetu ne. Bimye bimo twakonsha ne kuzhingila. Mambo ka? Mambo nangwa kya kuba twayuka’mba twi bambulwa kulumbuluka, bino kyakosha kwitukatazha kuswa lujimuno inge mukwetu witubuula kintu kyo twalubankanya. (Tangai Musapwishi 7:9.) Twakonsha kwibingisha atweba bene. Twakonsha kuzhinauka kine kintu kyalengela yewo muntu kwiya na kwitupa lujimuno, nangwa kumuzhingijila pa jishinda jo etupelamo lolo lujimuno. Twakonsha ne kulengulula muntu witupa lujimuno ne kulanguluka’mba: ‘Ñanyi wamupa luusa lwa kwiya na kumpa lujimuno? Ne aye ulubankanya!’ Kabiji inge kechi twaumvwa bulongo pa lujimuno lo betupa ne, twakonsha kwilulengulula nangwa kukebako muntu mukwabo wakonsha kwitupa lujimuno lo tukeba kumvwa.

5. Ñanyi bintu byo tusakufunda mu uno mutwe?

⁵ Mu uno mutwe, tusakwisamba pa bantu banembwa mu Baibolo bakaine ne baswile lujimuno. Kabiji tusakwisamba ne pa bintu byakonsha kwitukwasha kuswa lujimuno ne kumwenamo.

6. Tufunjilako ka ku byaubile Mfumu Lehoboma pa maana o bamufunjileko?

⁶ Langulukai pa byaubile Lehoboma. Byo aikele mfumu wa bena Isalela, bantu baishile kwi aye ne kumulomba kuba kintu kimo. Bamulombele kuba’mba ebapeezhezheko kisendwa kibatwikile shanji aye Solomone. Lehoboma waipwizhe bakulumpe ba mu Isalela kuba’mba bamubuuleko bya kukumbula bantu. Bano bakulumpe babuujile mfumu kuba’mba umvwe wauba byo bamulomba, bakatwajijila kumutundaika. (1 Mfu. 12:3-7) Pano bino, kyamweka Lehoboma kechi watondelwe na byo bamubuujile ne, onkao mambo, waipwizhe banabalume mo bakomenanga. Kyamweka bano banabalume bajinga na myaka ya mu ma 40, onkao mambo, bafwainwa bayukile bintu bimo bya mu bwikalo. (2 Moba 12:13) Bino pa kikye kimye, kechi babuujile Lehoboma maana awama ne. Bamubuujile kuba’mba akanungileko bantu kisendwa kyabo. (1 Mfu. 12:8-11) Lehoboma byo aumvwine ino milanguluko ibiji yapusana, wafwainwe kusolomoka Yehoba mu lulombelo ne kumupwizha mulanguluko ye afwainwe kulondela. Bino aye wafuukwilepo kulondela mulanguluko wamotokejile ku muchima, ne kuba byamufunjileko bakwabo mo bakomenanga. Mu byo afuukulwilepo mwafumine malwa akabotoka kwi aye mwine Lehoboma ne ku bena Isalela. Ne atweba lujimuno lo tutambula kechi twakonsha kwilutemwa ne. Nangwa byonkabyo, inge luno lujimuno lwaimena pa Mambo a Lesa, twafwainwa kumvwina.

7. Kyamwekejile Mfumu Uzaya kitufunjishapo ka?

⁷ Mfumu Uzaya wakaine lujimuno. Watwelele mu nzubo ya Yehoba ku mpunzha ko baswishishetu bañanga, kabiji wakebelenga kusoka bya kufutumuna pa kya kusokelapo bya kufutumuna. Bañanga ba Yehoba bamwambijile’mba: “Anweba ba Uzaya, kechi mwafwainwa kusoka bya kufutumuna kwi Yehoba ne! Bañanga bo bonkatu bafwainwa kusoka bya kufutumuna.” Uzaya waubile byepi? Inge kya kuba wipelwile ne kuswa lujimuno ne kufumamo bukiji mu nzubo ya Lesa, Yehoba kampe inge wamulekejileko mambo. Bino “Uzaya . . . wazhingijile bingi.” Mambo ka o akanyijile lujimuno? Kyamweka walangulukilenga’mba byo ajinga mfumu, wajinga na luusa lwa kuba kintu kyonse kyo akeba. Bino Yehoba kechi wikiswishishe ne. Na mambo a kuba waubile kintu kyo  babujile kumuswisha kuba, Uzaya wakolelwe mbumba kabiji “waikele na mbumba kufikatu ne byo afwile.” (2 Moba 26:16-21) Kyamwekejile Uzaya kitufunjisha kuba’mba nangwa tuji pa kifulo kikatampe nangwa ne, inge twakana lujimuno, Yehoba uketukana.

8. Yoba waubile byepi byo bamupele lujimuno?

⁸ Kupusanako na bantu bo twafumatu na kwisambapo, mu Baibolo mwanembwa bantu bakwabo batambwile mapesho na mambo a kuswa lujimuno. Langulukai pe Yoba. Nangwa kya kuba waakamwanga Lesa, bino naye wajinga mbulwa kulumbuluka. Kimye kyo apichilenga mu makatazho akatampe, wapushile mu ñambilo. Onkao mambo, bamupele lujimuno lwa kubula kupita mu mbaji kufuma kwi Elihu ne kwi Yehoba. Yoba waubilepo byepi? Wipelwile ne kuswa lujimuno. Waambile’mba: “Naambilenga kwa kubula kuyuka . . . O ene mambo o nalengulwila byambo byo naambile, kabiji nalapila saka nepukula mu maloba ne mu buto.” Yehoba wapesheshe Yoba mambo wipelwile ne kuswa lujimuno.—Yoba 42:3-6, 12-17.

9. Mosesa waubile byepi kimye kyo bamupele lujimuno, kabiji tubena kufunjilako ka?

⁹ Mosesa ke muntu mukwabo waswile lujimuno kimye kyo alubankenye. Pa kimye kimo, wazhingijile kabiji kechi wanemekele Yehoba ne. Na mambo a kino, Mosesa kechi bamuswishishe kutwela mu Ntanda ya Mulaye ne. (Bala. 20:1-13) Kimye Mosesa kyo alombele Yehoba kuba’mba abwezhemo muchima, Yehoba wamubuujile’mba: “Kechi uñambile jibiji pa mambo a kino ne.” (Mpitu. 3:23-27) Mosesa kechi wazhingijile ne. Pakuba waswile byafuukwilepo Yehoba, kabiji Yehoba watwajijile kwimwingijisha kutangijila bena Isalela. (Mpitu. 4:1) Bonse babiji, Yoba ne Mosesa ke bantu bo twakonsha kufunjilako kuswa lujimuno. Yoba wapimpwile byubilo byanji; kechi wikangaizhenga ne. Mosesa wamwesheshe’mba waswile lujimuno lwa Yehoba kupichila mu kutwajijila kwikala wa kishinka nangwatu kimye kyo bamubuujile’mba kechi ukatwela mu Ntanda ya Mulaye ne.

10. (a) Byambo bya Maana 4:10-13 byaamba’mba tumwenamo byepi mu kumvwina lujimuno? (b) Bamo bamwesha byepi kuba’mba baswile lujimuno?

¹⁰ Tumwenamo byepi inge twalondela byaubile banabalume ba kishinka nabiji Yoba ne Mosesa? (Tangai Byambo bya Maana 4:10-13.) Balongo ne banyenga bavula balondela byubilo bya bano banabalume kupichila mu kuswa lujimuno. Monai mulongo wa jizhina ja Emmanuel, wikala mu kyalo kya Congo, byo aambile pa lujimuno lo bamupele amba: “Balongo bakoma mu lwitabilo mu kipwilo kyetu bamwene kuba’mba nabikilenga bulunda bwami na Yehoba mu kizumba kabiji baishile na kunkwasha. Nalondejile byo bamfunjileko, kabiji byankwashishe kuchinuzhuka makatazho avula.” * Painiya mu kyalo kya Canada wa jizhina ja Megan waambile pa lujimuno amba: “Javula bintu byo bambuulanga kechi byo bintu byo nakebanga kumvwa ne, pano bino, byo bintu byo nafwainwe kumvwa.” Kabiji mulongo wa ku Croatia wa jizhina ja Marko waambile’mba: “Bañangachile mwingilo ye naingilanga mu kipwilo, bino inge nalanguluka pa bintu byamwekele, mmona kuba’mba lujimuno lo natambwile lwankwashishe kukosesha bulunda bwami na Lesa jibiji.”

11. Mulongo Karl Klein waambilepo’mba ka pa kuswa lujimuno?

¹¹ Muntu mukwabo ye twakonsha kufunjilako waswile lujimuno ke Mulongo Karl Klein, wajinga mu Jibumba Jitangijila. Mu jishimikila janji ja bwikalo, Mulongo Klein washimikizhe kimye kimo kyo bamupele lujimuno lwakosa bingi kufuma ku Mulongo Joseph F. Rutherford, wajinga mulunda nanji wa pa muchima. Mulongo Klein walumbulwile’mba kimye  kitanshi kechi waumvwine bulongo pa luno lujimuno ne. Waambile’mba: “Kimye kikwabo [Mulongo Rutherford] kyo ammwene, wañimwine na lusekelo amba, ‘Byepi Karl!’ Bino na mambo a kuba’mba nakizhingijile nakumbwiletu na kifwe. Wañambijile’mba, ‘Karl, jimuka! Diabola usakukutola kyangwa!’ Naumvwine bingi bumvu, kabiji nakumbwile’mba, ‘ine, kafwako lukatazho ne, Mulongo Rutherford.’ Bino wayukile’mba namuzhingijile, kabiji wabwezhezhepo lujimuno ne kwamba’mba ‘Kyawama kyo. Pano bino, jimuka. Diabola usakukutola kyangwa.’ Waambile kine! Inge twazhingijila mulongo, kikatataka inge witwambila kintu kyo aji na luusa lwa kwamba . . . , ko kuba’mba tubena kwibika mu kizumba kya kufwa mu tukose twa Diabola.” * (Efi. 4:25-27) Mulongo Klein waswile lujimuno lwa Mulongo Rutherford, kabiji batwajijile kwikala na bulunda bwakosa.

12. Kwipelula kwakonsha kwitukwasha byepi kuswa lujimuno? (Salamo 141:5)

¹² Ki ka kyakonsha kwitukwasha kuswa lujimuno? Twafwainwa kwipelula ne kuvulukanga’mba twi bambulwa kulumbuluka kabiji bimye bimo tutamisha bingi. Byonka byo twaambapo kala, Yoba waikele na milanguluko yatama. Bino palutwe kacheche wapimpwile ndangulukilo yanji, kabiji Yehoba wamupesheshe. Mambo ka? Mambo Yoba wipelwile. Wamwesheshe’mba wipilwile kupichila mu kuswa lujimuno lwamupele Elihu, nangwa kya kuba Elihu wajinga mwanyike bingi kwi aye. (Yoba 32:6, 7) Ne atweba kwipelula kwakonsha kwitukwasha kumvwina lujimuno nangwatu inge twamona’mba alo lujimuno kechi lwitufwainwa ne, nangwa inge witupa lolo lujimuno mwanyike. Mukulumpe mu kipwilo ku Canada waambile’mba, “Na mambo a kuba’mba bitumona bakwetu kechi byo byo twimona atweba bene ne, twakonsha kuyilako byepi palutwe inge kafwako wa kwitujimunoka ne?” Ñanyi mwi atweba ubula kukeba kuyilako palutwe mu kwikala na bipangwa bya mupashi ne kwingila bulongo mwingilo wetu wa bwina Kilishitu?—Tangai Salamo 141:5.

13. Twafwainwa kumonanga byepi lujimuno?

¹³ Monainga lujimuno amba jishinda Lesa jo amwesheshamo butemwe. Yehoba ukeba bintu bituwamina. (Maana 4:20-22) Inge witupa lujimuno kwingijisha Mambo anji, mabuku aimena pa Baibolo, nangwa mukwetu wakoma mu lwitabilo, ko kuba’mba ubena kumwesha byo etutemwa. Kinembelo kya Bahebelu 12:9, 10 kyaamba’mba witufunda’mba “tumwenemo bintu byawama.”

14. Ñanyi kintu kyo twafwainwa kutapo muchima kimye kyo betujimunako?

¹⁴ Tai muchima pa lwine lujimuno, kechi pa jishinda jo belupainamo ne. Bimye bimo, twakonsha kumona’mba jishinda jo betupelamo  lujimuno kechi jawama ne. Ibyo, yense ubena kupana lujimuno wafwainwa kumona kuba’mba wilwipana mu jishinda ja kuba’mba ye abena kupa lolo lujimuno wilutambwila bulongo. * (Nga. 6:1) Pano bino, inge yetu babena kujimunako, tafwainwa kuta muchima pa byambo, nangwa kya kuba twamona’mba kechi bebyamba mu jishinda jawama ne. Twakonsha kwiipuzha atweba bene amba: ‘Nangwa kya kuba kechi natemwa jishinda jo bampelamo lujimuno ne, nanchi mujipo bishinka mu byambo byo baamba nyi? Nanchi nakonsha kulubako ku bumbulwa kulumbuluka bwa muntu wampa lujimuno ne kuta muchima pa byambo byo aamba nyi?’ Ke kintu kya maana kumonapo jishinda jo twakonsha kumwenamo mu lujimuno lo betupa.—Maana 15:31.

15. Mambo ka o twafwainwa kulombelanga kwitufundako maana?

¹⁵ Baibolo witutundaika kulomba kuba’mba betufundeko. Byambo bya Maana 13:10 byaamba’mba: “Aba bakeba kwibafundako bo baji na maana.” Kino ke kishinka kyanema bingi. Aba balomba kuba’mba bebafundeko bayilako bingi palutwe mu mwingilo wa Lesa kukila boba babula kulomba maana. Onkao mambo, mwafwainwa kwitendekelako kulomba maana.

16. Mu ñanyi bintu mo twakonsha kulomba kwitufundako?

¹⁶ Ñanyi kimye kyo twafwainwa kulomba maana ku bakwetu ba mu lwitabilo? Langulukai pa bintu byalondelapo. (1) Nyenga waipuzha musapwishi wabanda mu bukine kuyila pamo na kufunjisha muntu Baibolo, kabiji wamwipuzha byo akonsha kuba pa kuba’mba awamisheko mashinda a kufunjishishamo. (2) Nyenga ubena kukeba kupota bivwalo, onkao mambo, waipuzha nyenga wakoma kuba’mba amubuuleko biji bivwalo byo asala. (3) Mulongo bamupa jashi jitanshi ja mvula bantu. Waambila ñambi wayuka kwamba majashi kuteleka byo akambanga jashi ne kumubuulako po afwainwa kuwamishako. Nangwatu mulongo waamba majashi pa myaka yavula, naye wafwainwa kwipuzhako bañambi bafunjisha bulongo kumufundako ne kwingijisha byo bamubuula.

17. Twakonsha kumwenamo byepi mu lujimuno?

¹⁷ Mu milungu nangwa bañondo babena kwiya, atweba bonse tukatambwilapo lujimuno kufuma ku mukwetu wa mu lwitabilo nangwa mu Baibolo nangwa mabuku aimena pa Baibolo. Inge kino kyamweka, mukavulukenga bishinka byo twafunda mu uno mutwe. Twajijilai kwipelula. Tai muchima pa byambo, kechi pa jishinda jo bemufunjilamo ne. Kabiji ingijishainga lujimuno lo bemupa. Atweba bonse kafwako usemwatu saka aji na maana ne. Bino inge ‘saka tumvwina byo betubuula ne kuswa mafunde,’ Mambo a Lesa alaya’mba ‘tukekala na maana.’—Maana 19:20.