1. Ngaˬ hui htaꞈ beˆ maˍ laˇ cawˇ ve hkʼaˬ hkʼe htaˇ le? Leh aˬ htoꞈ ma te teˇ gʼaˇ le le kaꞈ beˆ maˍ laˇ ve htaꞈ gʼa cawˇ ve le?

 Ngaˬ hui teˇ gʼaˇ le le kaꞈ teˇ pawˆ pawˆ kʼo beˆ maˍ laˇ ve htaꞈ gʼa cawˇ ve yoˬ. Tawˇ pa haˉ te kʼo, shu beˆ maˍ laˇ tuˬ ngaˬ hui ca lawˬ˗e cawˇ ve, maˇ heˆ leh ngaˬ hui htaꞈ dawˇ haˍ ve awˬ viˉ awˬ nyi ngaˬ hui “venˇ baˆ teˇ ceuˬ ceuˬ te chehˇ” ve tehꞈ kʼoˆ laˇ ve yoˬ hehˉ. (Gaˍlaˍtiˆ 6:1) Maˇ heˆ leh ngaˬ hui venˇ baˆ uiˍ jaˇ ve htaꞈ te yaꞈ peuˬ hkʼawꞈ nawˉ beˆ maˍ laˇ ve htaꞈ gʼa ve yoˬ hehˉ. Beˆ maˍ laˇ ve hkʼaˬ hkʼe ve htawˇ maˇ kʼoˆ, ngaˬ hui awˬ pon daꞈ leh ngaˬ hui ve a shaꞈ htaꞈ ga laˇ ve pa taw na yuˬ cawˇ ve yoˬ!—Tawˇ naˉ ve 6:23.

2. Tawˇ naˉ ve liꞈ 12:15 hkʼaw kʼoˆ taˍ ve hkʼe, aˬ htoꞈ ma te beˆ maˍ laˇ ve htaꞈ ngaˬ hui na yuˬ cawˇ ve le?

² A yeˇ uiˍ ve Liꞈ hpu awˬ tawn hkʼaw kʼoˆ ve, “na taˍ sheˍ. Cuˇ yiˍ cawˬ ve chaw hui kʼoˆ taˍ ve tawˇ.” (Tawˇ naˉ ve 22:17) Teˇ lawn le le htaꞈ hkʼa peu˗eˬ shiˍ ve chaw maˇ cawˬ. Ngaˬ hui aꞈ kehˉ shiˍ ve chaw cawˬ leh hpehꞈ laˬ jaw ve awˬ lawn kaꞈ ngaˬ hui aꞈ kehˉ cawˬ maˇ ve chaw cawˬ ve yoˬ. (Tawˇ naˉ ve 12:15 gʼaw sheˍ.) Beˆ maˍ laˇ ve htaꞈ ngaˬ hui na yuˬ ve kʼo, nyi ma nuˇ nehˬ ve tehꞈ hpeuꞈ maw piˇ chehˇ ve yoˬ. Ngaˬ hui lehˬ peuˬ kuiˬ leh kuiˬ cawˬ leh ngaˬ hui dawˇ taˍ ve awˬ ceuˬ htaꞈ te gʼa gaˇ ve kʼo, shu gʼa ga laˇ cawˇ ve tehꞈ ngaˬ hui shiˍ ve yoˬ. Yaˬhoˉvaˬ lehˬ, cuˇ yiˍ cawˬ jaˇ ve jawˇ mawˇ Sawˉlaꞈmonˍ htaꞈ dawˇ pawnˍ piˇ leh bvuhꞈ tcuh ve, “ca gʼa ve hkʼe daꞈ ve dawˇ hkʼaˇ htaꞈ ca˗o. Nawˬ uiˍ la daꞈ la tuˬ yoˬ.”—Tawˇ naˉ ve 15:22.

3. Ngaˬ hui beˆ maˍ laˇ hkawˇ hkʼaˬ hkʼe ve htaꞈ gʼa ve hehˉ le?

³ Teˇ pawˆ pawˆ kʼo, ngaˬ hui htaꞈ hteˇ˗ehˍ maˇ beˆ maˍ laˇ ve, maˇ heˆ leh teˇ pawˆ pawˆ kʼo hteˇ˗ehˍ beˆ maˍ laˇ ve yoˬ. Hteˇ˗ehˍ maˇ beˆ maˍ laˇ ve hkʼaˬ hkʼe ve le? Tawˇ pa haˉ te kʼo, Liꞈ hpu gʼaw ve, maˇ heˆ leh Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ gʼaw htaˇ, ngaˬ hui te ve teˇ ceuˬ ceuˬ maˇ cawˇ leh gʼa pa cawˇ ve tehꞈ dawˇ tuˬ te laˇ ve yoˬ. (Heˍbrehˇ 4:12) Chi hkʼoˆ kaꞈ, ngaˬ hui ve te hkʼaˇ dawˇ hkʼaˇ gʼa pa cawˇ ve tehꞈ, nyi haꞈ shaˉ paˍ maˇ heˆ leh awˬ viˉ awˬ nyi hteˇ˗ehˍ beˆ maˍ laˇ ve yoˬ. Ngaˬ  hui htaꞈ haꞈ ve awˬ viˉ awˬ nyi Liꞈ hpu hkʼaw ve beˆ maˍ laˇ hkawˇ ngaˬ hui htaꞈ beˆ maˍ laˇ haˆ ve kʼo, yawˇ beˆ maˍ laˇ ve htaꞈ na leh gʼaꞈ te sheˍ.

4. Cuˇ yiˍ piˇ ve liꞈ 7:9 hkʼaw kʼoˆ taˍ ve hkʼe, ngaˬ hui htaꞈ beˆ maˍ laˇ htaˇ hkʼaˬ hkʼe maˇ te cawˇ ve le?

⁴ Awˬ tehˬ kʼo, hteˇ˗ehˍ beˆ maˍ laˇ ve lehˬ, ngaˬ hui haꞈ yuˬ gʼa tuˬ haˍ jaˇ leh ngaˬ hui beuꞈ tuˬ kaꞈ te laˇ gʼa ve yoˬ hehˉ. Awˬ lawn kʼo, ngaˬ hui maˇ biˇ ve chaw hpehꞈ ve pa taw, chaw oˇ ve teˇ gʼaˇ ngaˬ hui te yaꞈ ve tehꞈ kʼoˆ laˇ ve kʼo, beˆ maˍ laˇ ve htaꞈ ngaˬ hui maˇ na gaˇ ve yoˬ hehˉ. (Cuˇ yiˍ piˇ ve 7:9 gʼaw sheˍ.) Ngaˬ hui a shu yawˇ awˬ to cawˇ ve tehꞈ dawˇ leh, oˇ ve teˇ gʼaˇ ngaˬ hui htaꞈ maˇ dawˇ cawˇ leh kʼoˆ laˇ ve hehˉ tehꞈ, htawˇ dawˇ nawˬ dawˇ cawˬ ve yoˬ. Yawˇ beˆ maˍ laˇ ve awˬ hkʼaˇ htaꞈ ngaˬ hui maˇ dawˇ cawˇ leh, ‘yawˇ kaꞈ te hkʼaˇ dawˇ hkʼaˇ daꞈ ve maˇ heˆ. Aˬ htoꞈ ma te ngaˬ htaꞈ beˆ maˍ laˇ ve le naˍ’ htawˇ dawˇ nawˬ dawˇ cawˬ puiˉ ve yoˬ. Leh beˆ maˍ laˇ ve chi htaꞈ ngaˬ hui maˇ dawˇ cawˇ ve kʼo, ngaˬ hui kaꞈ a yeˇ maˇ te leh maˇ gʼaꞈ te gaˇ ve yoˬ. Hkʼe te leh, ngaˬ hui nyi ma cawˇ ve htaꞈ beˆ maˍ laˇ tuˬ awˬ nu ve chaw geh kʼai ve yoˬ.

5. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁵ Beˆ maˍ piˇ ve htaꞈ na yuˬ ve, leh beˆ maˍ piˇ ve htaꞈ maˇ na yuˬ ve, chi ve htaꞈ caˉ daꞈ ve Liꞈ hpu hkʼaw ve awˬ lawn htaꞈ teˇ geh henˇ tuˬ yoˬ. Chi hkʼoˆ kaꞈ, beˆ maˍ laˇ ve htaꞈ ngaˬ hui na yuˬ leh awˬ bon gʼa tuˬ hkʼaˬ hkʼe gʼa te cawˇ ve kaꞈ teˇ geh henˇ tuˬ yoˬ.

6. Jawˇ mawˇ Yawˇbaoˍ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

⁶ Yawˇbaoˍ ve awˬ lawn htaꞈ teˇ geh nyi sheˍ. Yawˇ Iˉsaˍreˍlaˆ chaw hui ve jawˇ mawˇ te htaˇ, mvuhˇ miˬ yaˇ yawˇ geh laˬ leh kʼoˆ piˇ ve, nawˬ pa Sawˉlaꞈmonˍ lehˬ ngaˬ hui htaꞈ kanˉ hehnˇ chaweh nyiˉ te tcuh laˇ ve pa taw, hkʼe taw maˇ te tcuh laˇ tuˬ a ciˉ kʼoˆ piˇ laˇ sheˍ. Leh hkʼaˬ hkʼe te cawˇ ve Yawˇbaoˍ chaw mawˇ hui geh ca na nyi ve yoˬ. Yawˇ chi hkʼe te ve daꞈ jaˇ. Mvuhˇ miˬ yaˇ yawˇ ve awˬ ceˬ hkʼaˬ htaˆ kaꞈ te kʼai tuˬ, yawˇ mvuhˇ miˬ yaˇ hkawˇ kaꞈ gʼa na cawˇ ve tehꞈ, chaw mawˇ teˇ hpaˍ kʼoˆ piˇ ve yoˬ. (1 Jawˇmawˇ 12:3-7) Yaꞈ hkʼaˇ, Yawˇbaoˍ chaw mawˇ teˇ hpaˍ beˆ maˍ piˇ ve htaꞈ yawˇ maˇ dawˇ cawˇ ve yoˬ. Hkʼe te leh, yawˇ a shaꞈ hkʼa ma˗ehˬ ve chaw teˇ hpaˍ geh ca na nyi ve yoˬ. (2 Raˍsaˍvanˍ 12:13) Yawˇ ve awˬ chawˇ teˇ hpaˍ hpehꞈ laˬ jaw ve awˬ lawn cawˬ ve htawˇ, chaw chi teˇ hpaˍ beˆ maˍ piˇ ve maˇ daꞈ. Yawˇ hui Yawˇbaoˍ htaꞈ kʼoˆ piˇ ve, mvuhˇ miˬ yaˇ kanˉ chi aꞈ kehˉ hehnˇ chaweh kʼawꞈ te tcuh cawˇ ve yoˬ. (1 Jawˇ mawˇ 12:8-11) Chi teˇ hkui jawˇ mawˇ leuˆ yuˬ tuˬ ve 2 ceuˬ cawˬ ve yoˬ. Awˬ tehˬ kʼo, yawˇ mvuhˇ miˬ yaˇ htaꞈ hkʼaˬ hkʼe te piˇ cawˇ ve, Yaˬhoˉvaˬ htaꞈ na nyi cawˇ ve htawˇ, yawˇ ve awˬ chawˇ hkawˇ na ve yoˬ. Chi htaꞈ pa taw, yawˇ leh Iˉsaˍreˍlaˆ chaw hkʼa peu˗eˬ htaꞈ shoꞈ shaꞈ tuˬ te piˇ ve yoˬ. Awˬ lawn chi ve htaꞈ ngaˬ hui gʼa mawˬ ve, beˆ maˍ laˇ hkawˇ teˇ ceuˬ le le ngaˬ hui nyi ma cawˇ tuˬ te laˇ ve maˇ heˆ. Yaꞈ hkʼaˇ, beˆ maˍ laˇ ve chi Liꞈ hpu hkʼaw laˬ ve kʼo, ngaˬ hui kaꞈ na yuˬ cawˇ ve yoˬ.

7. Jawˇ mawˇ Awˇziˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁷ Jawˇ mawˇ Awˇziˆ lehˬ beˆ maˍ piˇ ve htaꞈ maˇ na yuˬ. Bon yehˬ hkʼaw yawˇ loꞈ˗e leh paw hkuˇ ceh tiˉ sha hawnˉ tuˉ tanˇ gʼa ve htaꞈ yawˇ tuˉ tanˇ ve yoˬ. Yaˬhoˉvaˬ leuˆ yuˬ taˍ ve paw hkuˇ lehˬ Awˇziˆ htaꞈ kʼoˆ piˇ ve, ‘Awˇziˆ˗oˬ, nawˬ Gʼuiˬ sha htaꞈ sha hawnˉ tuˉ tanˇ piˇ tuˬ ve a hkaw˗anˬ maˇ cawˬ. Paw hkuˇ teˇ hpaˍ ceh tiˉ chi ve htaꞈ te gʼa ve yoˬ.’ Awˇziˆ hkʼaˬ hkʼe te ve le? Beˆ maˍ laˇ ve htaꞈ yawˇ na yuˬ leh laꞈ haˉ tawˆ˗e ve kʼo, Yaˬhoˉvaˬ kaꞈ yawˇ htaꞈ venˇ baˆ hpehˇ piˇ tuˬ yoˬ hehˉ. Yaꞈ hkʼaˇ, yawˇ nyi ma zuhˆ jaˇ. Aˬ htoꞈ ma te beˆ maˍ piˇ ve htaꞈ Awˇziˆ maˇ na yuˬ ve le? Yawˇ jawˇ mawˇ hpehꞈ ve tehꞈ dawˇ ve pa taw, yawˇ te gaˇ ve hkʼe te gʼa ve tehꞈ dawˇ ve yoˬ. Yaꞈ hkʼaˇ, Yaˬhoˉvaˬ chi hkʼe maˇ dawˇ. Awˇziˆ yawˇ te tuˬ a hkaw˗anˬ maˇ cawˬ ve htaꞈ te ve pa taw, “a shaꞈ teꞈ chehˇ ve teˇ co˗e, a naˍ oˇ ve htaꞈ pa taw maˇ daꞈ maˇ kehˬ hpehꞈ la ve yoˬ.” (2 Raˍsaˍvanˍ 26:16-21) Ngaˬ hui henˇ yuˬ gʼa ve lehˬ, ngaˬ hui hkʼaˬ hkʼe ve chaw hpehꞈ ve, maˇ heˆ leh awˬ vuiˬ hkʼaˬ hkʼe ve cawˬ ve htawˇ, Liꞈ hpu hkʼaw beˆ maˍ laˇ ve htaꞈ ngaˬ hui maˇ na yuˬ ve kʼo, Yaˬhoˉvaˬ ngaˬ hui htaꞈ nyi hkʼaˇ maˇ suh taˬ.

8. Beˆ maˍ laˇ ve htaꞈ Yawˇbaˆ gʼa htaˇ, hkʼaˬ hkʼe te ve le?

⁸ Liꞈ hpu hkʼaw maˇ daꞈ ve chaw ve awˬ lawn cawˬ ve awˬ hkʼoˆ kaꞈ, beˆ maˍ piˇ ve htaꞈ na yuˬ ve pa taw, Yaˬhoˉvaˬ awˬ bon naꞈ piˇ ve daꞈ ve chaw ve awˬ lawn kaꞈ cawˬ ve yoˬ. Yawˇbaˆ ve awˬ lawn htaꞈ teˇ geh nyi sheˍ. Yawˇbaˆ Gʼuiˬ sha htaꞈ yawˆ yan ve chaw hpehꞈ ve htawˇ, yawˇ kaꞈ maˇ biˇ ve chaw hpehꞈ ve yoˬ. Yawˇ dawˇ haˍ jaˇ htaˇ yawˇ maˇ daꞈ ve dawˇ hkʼaˇ teˇ ceuˬ ceuˬ cawˬ ve pa taw, Eˇliˇhuˆ leh Yaˬhoˉvaˬ yawˇ htaꞈ hteˇ˗ehˍ beˆ maˍ piˇ ve yoˬ. Yawˇbaˆ lehˬ beˆ maˍ piˇ ve htaꞈ gʼa peuˬ hkʼawꞈ nawˉ, hkʼaˬ hkʼe te ve le? Yawˇ nyi ma nuˇ nehˬ ve hkʼaw beˆ maˍ piˇ ve chi teˇ hpaˍ htaꞈ haꞈ yuˬ ve yoˬ. Yawˇ kʼoˆ ve, “ngaˬ teꞈ chiˉ maˇ shiˍ ve awˬ lawn htaꞈ ngaˬ tawˇ yaw leh, ngaˬ kʼoˆ peuˬ ve teˇ hpaˍ htaꞈ ngaˬ kʼawꞈ yaꞈ taw leh, venˇ baˆ dawˇ hpfuhˆ ve hkʼaw, jeꞈ meu˗e leh hkʼawꞈ laˉ hkʼaw chehˇ taˍ ve yoˬ.” Yawˇbaˆ nyi ma nuˇ nehˬ jaˇ ve pa taw, Yaˬhoˉvaˬ awˬ bon naꞈ piˇ ve yoˬ.—Yawˇbaˆ 42:3-6, 12-17.

9. Beˆ maˍ laˇ ve htaꞈ Moˉseˍ gʼa htaˇ, yawˇ hkʼaˬ hkʼe te ve le? Leh aˬ htoꞈ ma te ngaˬ hui awˬ pon daꞈ ve henˇ yuˬ tuˬ hpehꞈ ve le?

⁹ Moˉseˍ kaꞈ daꞈ jaˇ ve henˇ yuˬ tuˬ teˇ gʼaˇ hpehꞈ ve yoˬ. Yawˇ venˇ baˆ uiˍ jaˇ ve htaꞈ te peuˬ hkʼawꞈ nawˉ, beˆ maˍ laˇ ve htaꞈ yawˇ gʼa htaˇ haꞈ yuˬ ve yoˬ. Tawˇ pa haˉ te kʼo, teˇ pawˆ htaˇ Moˉseˍ nyi ma zuhˆ jaˇ ve pa taw, Yaˬhoˉvaˬ htaꞈ maˇ yawˆ yan. Hkʼe te leh, yawˇ Gʼuiˬ sha ka tiꞈ te taˍ piˇ ve mvuhˇ miˬ awˬ hkʼaw lo maˇ gʼa loꞈ˗e ve yoˬ. (Heh puiˉ hkʼaw 20:1-13) Moˉseˍ lehˬ Yaˬhoˉvaˬ ha kʼaˉ laˇ tuˬ lawˬ hkawˉ ve yoˬ. Yaꞈ hkʼaˇ, Yaˬhoˉvaˬ kʼoˆ ve “pehˇ˗o. Nawˬ awˬ lawn chi htaꞈ taˇ kʼawꞈ kʼoˆ loˬ.” (Bon maˍ ve 3:23-27) Moˉseˍ chi hkʼe gʼa hpuˇ ve htawˇ, yawˇ nyi ma maˇ zuhˆ. Moˉseˍ Yaˬhoˉvaˬ dawˇ cheˆ ve htaꞈ haꞈ yuˬ ve yoˬ. Hkʼe te leh, Yaˬhoˉvaˬ Moˉseˍ Iˉsaˍreˍlaˆ chaw htaꞈ kʼawꞈ sheh kʼai tcuh ve yoˬ. (Bon maˍ ve 4:1) Yawˇbaˆ leh Moˉseˍ lehˬ daꞈ jaˇ ve henˇ yuˬ tuˬ hpehꞈ ve pa taw, ngaˬ hui kaꞈ henˇ yuˬ cawˇ ve yoˬ. Yawˇbaˆ yawˇ ve dawˇ hkʼaˇ htaꞈ pa leh yawˇ awˬ pon tiˉ maˇ dawˇ nyi. Moˉseˍ daꞈ jaˇ ve awˬ vuiˬ htaꞈ maˇ gʼa te˗oˬ ve htawˇ, yawˇ Yaˬhoˉvaˬ beˆ maˍ piˇ ve htaꞈ na yuˬ ve tehꞈ hpeuꞈ maw laˇ ve lehˬ yawˇ caˉ leh Yaˬhoˉvaˬ htaꞈ ka tiꞈ yeˬ ve yoˬ.

10. (a) Tawˇ naˉ ve liꞈ 4:10-13 hkʼaw kʼoˆ taˍ ve hkʼe, beˆ maˍ laˇ ve htaꞈ ngaˬ hui na yuˬ ve kʼo, aˬ htoꞈ ma awˬ bon gʼa tuˬ le? (b) Beˆ maˍ piˇ ve htaꞈ awˬ viˉ awˬ nyi teˇ hpaˍ awˬ pon aˬ htoꞈ ma awˬ bon gʼa ve le?

¹⁰ Ngaˬ hui Moˉseˍ leh Yawˇbaˆ htaꞈ henˇ yuˬ ve kʼo, awˬ bon gʼa jaˇ tuˬ yoˬ. (Tawˇ naˉ ve 4:10-13 gʼaw sheˍ.) Chi beuꞈ teˇ co˗e, chi hkʼe te chehˇ ve awˬ viˉ awˬ nyi laiˉ gʼaˇ cawˬ ve yoˬ. Tawˇ pa haˉ te kʼo, Konˍgoˍ mvuhˇ miˬ lo chehˇ ve En˗ma˗veˬ beˆ maˍ laˇ ve htaꞈ gʼa ve yoˬ. Yawˇ kʼoˆ ve, “ngaˬ te hkʼaˇ dawˇ hkʼaˇ maˇ daꞈ ve tehꞈ, Hkriꞈ yaˇ awˬ moˍ hkʼaw ve awˬ viˉ awˬ nyi hawˉ hkʼaˆ teˇ hpaˍ mawˬ ve yoˬ. Ngaˬ ve yonˍ hkʼaˇ awˬ gʼaˇ nuˇ jaˇ leh yawˇ hui ngaˬ htaꞈ ga laˇ ve yoˬ. Beˆ maˍ laˇ ve htaꞈ ngaˬ yuˬ yehˇ htaˇ, ngaˬ htaꞈ ga laˇ gʼa jaˇ ve yoˬ. Hkʼe te leh, ngaˬ shoꞈ shaꞈ ve laiˉ ceuˬ maˇ kʼawꞈ gʼa hpuˇ˗o.” * Kaˬneˬdaˬ mvuhˇ miˬ lo chehˇ ve gʼuˇ suhˍ peuˍ ve Meh˗kehnˬ kʼoˆ ve, “teˇ pawˆ pawˆ kʼo shu ngaˬ htaꞈ beˆ maˍ laˇ ve ngaˬ maˇ dawˇ cawˇ. Yaꞈ hkʼaˇ, beˆ maˍ laˇ ve awˬ ceuˬ ngaˬ awˬ pon a yeˇ uiˍ jaˇ.” Hko˗eˇshaˍ mvuhˇ miˬ chehˇ ve Manˆhkoˇ kʼoˆ ve, “ngaˬ daꞈ jaˇ ve awˬ vuiˬ maˇ gʼa te˗o. Yaꞈ hkʼaˇ, peuˬ taˉ ve awˬ ceuˬ htaꞈ kʼawꞈ dawˇ nyi htaˇ, awˬ viˉ awˬ nyi ngaˬ htaꞈ beˆ maˍ laˇ ve pa taw, ngaˬ Yaˬhoˉvaˬ geh kʼawꞈ meuˆ daꞈ la ve yoˬ.”

11. Awˬ viˉ awˬ nyi Hkan F Hkain beˆ maˍ piˇ ve htaꞈ gʼa htaˇ yawˇ hkʼaˬ hkʼe dawˇ ve le?

¹¹ Awˬ viˉ awˬ nyi Hkan F Hkain yawˇ kaꞈ Uˉ peunˍ ve Kawˍmiˍtiˍ hkʼaw ve teˇ gʼaˇ hpehꞈ ve pa taw, beˆ maˍ laˇ ve htaꞈ haꞈ yuˬ leh awˬ bon gʼa ve yoˬ. Yawˇ awˬ viˉ awˬ nyi Yoˇsheꞈ Raˆhteuˬfawˍ htaꞈ meuˆ daꞈ jaˇ. Awˬ viˉ awˬ nyi Hkan F Hkain ve awˬ lawn hpehꞈ laˬ jaw ve awˬ lawn hkʼaw cawˬ ve yoˬ. Awˬ viˉ awˬ nyi Raˆhteuˬfawˍ yawˇ htaꞈ hteˇ˗ehˍ beˆ maˍ piˇ jaw ve yoˬ. Awˉ lawˉ htaˇ yawˇ nyi ma maˇ sha. Yawˇ kʼoˆ ve, “ngaˬ awˬ viˉ awˬ nyi Raˆhteuˬfawˍ htaꞈ kʼawꞈ mawˬ daꞈ htaˇ, awˬ viˉ awˬ nyi Raˆhteuˬfawˍ ‘Hkan, hkʼaˬ hkʼe kʼai le?’ tehꞈ kʼoˆ laˇ ve yoˬ. Yaꞈ hkʼaˇ, oˇ ve teˇ yanˇ ngaˬ beuꞈ chehˇ sheˍ leh yawˇ geh tawˇ maˇ yaw daꞈ gaˇ. Hkʼe te leh, awˬ viˉ awˬ  nyi Raˆhteuˬfawˍ kʼoˆ ve, ‘Hkan˗oˬ Saˍtanˍ kanˉ te hpehꞈ tuˬ a hkaw˗anˬ taˇ piˇ mehˬ.’ Ngaˬ yaꞈ taw ve hkʼaw kʼoˆ piˇ ve, ‘teꞈ chiˉ maˇ heˆ. Ngaˬ nawˬ htaꞈ maˇ beuꞈ˗oˬ.’ Ngaˬ beuꞈ chehˇ sheˍ ve tehꞈ awˬ viˉ awˬ nyi Raˆhteuˬfawˍ shiˍ ve pa taw, yawˇ teˇ pawˆ kʼawꞈ kʼoˆ laˇ ve, ‘hkʼaˬ hkʼe hpehꞈ kaꞈ shaˍ tiꞈ hkʼa dehꞈ te mehˬ. Saˍtanˍ nawˬ htaꞈ beˬ laˇ tuˬ a hkaw˗anˬ taˇ piˇ.’ Leh awˬ viˉ awˬ nyi Raˆhteuˬfawˍ kʼoˆ laˇ ve cawˇ jaˇ. Ngaˬ hui htaꞈ shaˍ tiꞈ peꞈ laˇ tuˬ a hkaw˗anˬ cawˬ ve chaw htaꞈ beuꞈ chehˇ sheˍ ve kʼo, Saˍtanˍ ngaˬ hui htaꞈ beˬ tuˬ a hkaw˗anˬ piˇ chehˇ ve yoˬ.” * (Eˇfeˇsuꞈ 4:25-27) Awˬ viˉ awˬ nyi Hkan F Hkain awˬ viˉ awˬ nyi Raˆhteuˬfawˍ beˆ maˍ piˇ ve htaꞈ na yuˬ ve pa taw, yawˇ huiˉ maˬ kʼawꞈ meuˆ daꞈ ve yoˬ.

12. Beˆ maˍ laˇ hkawˇ htaꞈ ngaˬ hui na yuˬ tuˬ, nyi ma nuˇ nehˬ ve ngaˬ hui htaꞈ hkʼaˬ hkʼe ga laˇ ve le? (Chiˇ mvuh ve 141:5)

¹² Beˆ maˍ laˇ hkawˇ htaꞈ ngaˬ hui na yuˬ tuˬ aˬ htoꞈ ma ga laˇ ve le? Ngaˬ hui nyi ma gʼa nuˇ nehˬ ve yoˬ. Ngaˬ hui maˇ biˇ ve chaw hpehꞈ leh teˇ pawˆ pawˆ kʼo te yaꞈ puiˉ ve tehꞈ tawnˇ taˍ cawˇ ve yoˬ. Ngaˬ hui gʼa henˇ peuˬ˗oˬ ve hkʼa shuˍ, Yawˇbaˆ maˇ cawˇ ve dawˇ hkʼaˇ cawˬ leh yawˇ ve te hkʼaˇ dawˇ hkʼaˇ pa ve pa taw, Yaˬhoˉvaˬ awˬ bon naꞈ piˇ ve tehꞈ ngaˬ hui gʼa mawˬ ve yoˬ. Aˬ htoꞈ ma pa taw Yaˬhoˉvaˬ Yawˇbaˆ htaꞈ awˬ bon naꞈ piˇ ve le? Yawˇbaˆ nyi ma nuˇ nehˬ ve chaw hpehꞈ ve pa taw yoˬ. Eˇliˇhuˆ Yawˇbaˆ aꞈ kehˉ a shaꞈ i ve htawˇ, Eˇliˇhuˆ beˆ maˍ piˇ ve htaꞈ Yawˇbaˆ na yuˬ ve yoˬ. (Yawˇbaˆ 32:6, 7) Ngaˬ hui kaꞈ hkʼa shuˍ yoˬ. Teˇ pawˆ pawˆ ngaˬ hui maˇ yaꞈ ve tehꞈ dawˇ ve, maˇ heˆ leh ngaˬ hui htaꞈ beˆ maˍ laˇ ve chaw ngaˬ hui aꞈ kehˉ a shaꞈ i ve kʼo, nyi ma nuˇ nehˬ ve lehˬ, beˆ maˍ laˇ ve hkawˇ htaꞈ ngaˬ hui na yuˬ tuˬ ga laˇ ve yoˬ. Kaˬneˬdaˬ mvuhˇ miˬ lo chehˇ ve nyi haꞈ shaˉ paˍ teˇ gʼaˇ kʼoˆ ve, “ngaˬ hui a shu yawˇ awˬ to htaꞈ shu dawˇ ve hkʼe maˇ dawˇ. Ngaˬ hui htaꞈ beˆ maˍ laˇ ve leh shaˍ tiꞈ peꞈ laˇ ve chaw maˇ cawˬ ve kʼo, ngaˬ hui a shu yawˇ awˬ to hkʼaˬ hkʼe te daꞈ la gʼa tuˬ le?” Nyi haꞈ shaˉ paˍ chi teˇ gʼaˇ kʼoˆ ve hkʼe ngaˬ hui kaꞈ dawˇ ve yoˬ. Ngaˬ hui teˇ gʼaˇ le le Gʼuiˬ sha ve kanˉ te ve hpawˇ gʼa cheuˬ la tcuh leh, Gʼuiˬ sha ve awˬ ha hpu ve awˬ shiˍ maˇ maˇ nawꞈ tuˬ ngaˬ hui gʼa coˇ caˇ ve yoˬ.—Chiˇ mvuh ve 141:5 gʼaw sheˍ.

13. Beˆ maˍ laˇ ve htaꞈ ngaˬ hui hkʼaˬ hkʼe dawˇ nyi cawˇ ve le?

¹³ Beˆ maˍ laˇ ve lehˬ Gʼuiˬ sha nga hui htaꞈ haꞈ ve tehꞈ hpeuꞈ maw laˇ ve. Yaˬhoˉvaˬ ngaˬ hui htaꞈ hkʼaˬ htaˆ kaꞈ dawˇ haˍ ve yoˬ. (Tawˇ naˉ ve 4:20-22) Liꞈ hpu, liꞈ kʼoˆ, Gʼuiˬ sha ve kanˉ hkʼaˇ, leh awˬ viˉ awˬ nyi hpehꞈ laˬ jaw ve awˬ lawn, chi ve teˇ hpaˍ ngaˬ hui htaꞈ beˆ maˍ laˇ ve kʼo, Yaˬhoˉvaˬ ngaˬ hui htaꞈ haꞈ ve tehꞈ hpeuꞈ maw laˇ ve yoˬ. Heˍbrehˇ liꞈ 12:9, 10 hkʼaw kʼoˆ ve, “ngaˬ hui awˬ pon daꞈ ve htaꞈ yawˇ dawˇ leh maˍ laˇ ve yoˬ.”

14. Beˆ maˍ laˇ ve htaꞈ ngaˬ hui gʼa htaˇ, aˬ htoꞈ ma htaꞈ nyi cawˇ ve le?

¹⁴ Beˆ maˍ laˇ ve htaꞈ nyi cawˇ ve. Beˆ maˍ laˇ ve awˬ hkʼaˇ htaꞈ maˇ heˆ. Teˇ pawˆ pawˆ kʼo, chaw teˇ gʼaˇ gʼaˇ ngaˬ hui htaꞈ beˆ maˍ laˇ ve, ngaˬ hui maˇ dawˇ cawˇ tehꞈ dawˇ ve yoˬ. Ngaˬ hui teˇ gʼaˇ le le awˬ nu ve chaw htaꞈ beˆ maˍ piˇ htaˇ, yawˇ hui haꞈ yuˬ sha  tuˬ gʼa te cawˇ ve yoˬ. * (Gaˍlaˍtiˆ 6:1) Yaꞈ hkʼaˇ, ngaˬ hui htaꞈ beˆ maˍ laˇ ve lehˬ awˬ hkʼaˇ chi aꞈ kehˉ gʼa daꞈ cawˇ ve tehꞈ ngaˬ hui dawˇ ve htawˇ, yawˇ beˆ maˍ laˇ ve htaꞈ ngaˬ hui a yeˇ yuˬ cawˇ ve yoˬ. Yawˇ beˆ maˍ laˇ ve awˬ hkʼaˇ htaꞈ maˇ heˆ. Ngaˬ hui a shu yawˇ awˬ to htaꞈ na nyi cawˇ ve, ‘yawˇ ngaˬ htaꞈ beˆ maˍ laˇ ve awˬ hkʼaˇ htaꞈ ngaˬ maˇ dawˇ cawˇ ve htawˇ, yawˇ kʼoˆ ve teˇ hpaˍ hpaˍ cawˇ˗aw laˇ? Yawˇ ve te hkʼaˇ dawˇ hkʼaˇ maˇ daꞈ ve htaꞈ ngaˬ maˇ nyi ve kʼo, yawˇ beˆ maˍ laˇ ve awˬ bon cawˬ ve htaꞈ ceh nyi cawˇ ve maˇ heˆ laˇ?’ Ngaˬ hui htaꞈ beˆ maˍ laˇ ve teˇ pawˆ le le beˆ maˍ laˇ ve awˬ bon cawˬ ve htaꞈ ngaˬ hui nyi ve kʼo, ngaˬ hui kaꞈ cuˇ yiˍ cawˬ ve chaw hpehꞈ tuˬ yoˬ.—Tawˇ naˉ ve 15:31.

15. Aˬ htoꞈ ma te ngaˬ hui awˬ nu ve chaw beˆ maˍ laˇ tuˬ lawˬ cawˇ ve le?

¹⁵ Liꞈ hpu hkʼaw kʼoˆ ve, ngaˬ hui awˬ nu ve chaw beˆ maˍ laˇ tuˬ lawˬ cawˇ ve yoˬ. Tawˇ naˉ ve liꞈ 13:10 hkʼaw kʼoˆ ve, “shu geh dawˇ hkʼaˇ lawˬ ve lehˬ leuˉ leh daꞈ jaˇ ve yoˬ.” Chi lehˬ cawˇ jaˇ. Shu beˆ maˍ laˇ tuˬ lawˬ ve chaw lehˬ, shu beˆ maˍ laˇ tuˬ law chehˇ ve chaw aꞈ kehˉ, awˬ lawn teˇ hpaˍ hkʼa dehꞈ dawˇ cheˆ gʼa tuˬ yoˬ. Chi htaꞈ pa taw, shu beˆ maˍ laˇ tuˬ lawˬ cawˇ ve yoˬ.

16. Ngaˬ hui htaꞈ beˆ maˍ laˇ tuˬ lawˬ cawˇ ve hkʼaˬ hkʼe htaˇ le?

¹⁶ Awˬ nu ve awˬ viˉ awˬ nyi ngaˬ hui htaꞈ beˆ maˍ laˇ tuˬ lawˬ cawˇ ve hkʼaˬ hkʼe htaˇ le? 3 lawn htaꞈ teˇ geh nyi sheˍ. (1) Awˬ viˉ awˬ nyi yaˇ miˇ teˇ gʼaˇ awˬ nu ve awˬ viˉ awˬ nyi teˇ gʼaˇ Liꞈ hpu teˇ geh ca maˍ˗e tuˬ jehˬ piˇ ve yoˬ. Liꞈ hpu maˍ peuˬ hkʼawꞈ nawˉ yawˇ hkʼaˬ hkʼe te Liꞈ hpu maˍ cheuˬ la gʼa tuˬ awˬ viˉ awˬ nyi chi ve teˇ gʼaˇ htaꞈ na nyi piˇ ve yoˬ. (2) Awˬ viˉ awˬ nyi yaˇ miˇ haˉ, haˍ htaw teˇ hkʼoˆ vuiˬ tuˬ dawˇ ve yoˬ. Hkʼe te leh, awˬ viˉ awˬ nyi yaˇ miˇ yawˇ aꞈ kehˉ a shaꞈ maˇ ve teˇ gʼaˇ htaꞈ haˍ htaw chi ve nawˬ hkʼaˬ hkʼe dawˇ ve le, hteˇ˗ehˍ kʼoˆ˗aꞈ tehꞈ kʼoˆ piˇ ve yoˬ. (3) Awˬ viˉ awˬ nyi hawˉ hkʼaˆ teˇ gʼaˇ bon awˉ lawˉ teˇ pawˆ maˍ htaˇ, bon maˍ cheuˬ ve chaw yawˇ bon maˍ ve htaꞈ hkʼa dehꞈ na taˍ laˇ tuˬ lawˬ piˇ ve yoˬ. Leh bon maˍ hkawˇ hkʼaˬ teˇ tawn gu cawˇ ve a ciˉ kʼoˆ˗aꞈ tehꞈ kʼoˆ piˇ ve yoˬ. Awˬ tehˬ kʼo, awˬ viˉ awˬ nyi hawˉ hkʼaˆ bon laiˉ hkʼawꞈ maˍ jaw˗oˬ ve chaw htawˇ, bon maˍ cheuˬ ve chaw beˆ maˍ laˇ tuˬ lawˬ leh beˆ maˍ laˇ ve htaꞈ gʼaꞈ te cawˇ ve yoˬ.

17. Beˆ maˍ laˇ ve htaꞈ awˬ bon gʼa tuˬ ngaˬ hui hkʼaˬ hkʼe gʼa te cawˇ ve le?

¹⁷ Chi teˇ hkui maˇ heˆ leh awˬ gʼuˇ suhˍ hpawˇ kʼo, ngaˬ hui teˇ gʼaˇ le le hteˇ˗ehˍ maˇ beˆ maˍ laˇ ve, maˇ heˆ leh hteˇ˗ehˍ beˆ maˍ laˇ ve gʼa tuˬ yoˬ. Chi hkʼe hpehꞈ ve kʼo, awˬ lawn chi ve hkʼaw ngaˬ hui gʼa henˇ kʼai peuˬ ve hkʼe, nyi ma gʼa nuˇ nehˬ ve, beˆ maˍ laˇ ve htaꞈ a yeˇ gʼa yuˬ ve, beˆ maˍ laˇ ve awˬ hkʼaˇ htaꞈ maˇ heˆ, leh beˆ maˍ laˇ ve htaꞈ nawˬ gʼaꞈ te tuˬ gʼa tawnˇ taˍ cawˇ ve yoˬ. Teˇ gʼaˇ le le kaꞈ paw la htaˇ cuˇ yiˍ cawˬ ve maˇ heˆ. Ngaˬ hui ‘shu dawˇ hkʼaˇ piˇ laˇ ve htaꞈ na leh henˇ yuˬ gaˇ puiˉ ve nyi ma cawˬ ve kʼo, cuˇ yiˍ cawˬ la tuˬ yoˬ’ tehꞈ Liꞈ hpu hkʼaw ngaˬ hui htaꞈ ka tiꞈ te taˍ laˇ ve yoˬ.—Tawˇ naˉ ve 19:20.